BLACK HORSE- 12

Chapter- 12

Chiang lo ruai hian ka meng chhuak a, ka chil ka lem dawn a, ka ti hleithei lo,ka hrawkah hnawh tu awm ang mai hian a na tawlh tawlh a, ka ner sawk bawk.Ka mit ka chhing leh a, thil kal tawh ka ngaihtuah a, Simon-a khan min rek bet tlat anih kha..Ka thi lo tih a chiang,Thlarau ni ila chuan na ka hre lo ang, mahse,khawiah nge ka awm?

Ka mengchhuak leh a, inchung  ceilling,uluk taka mau hmanga siam ka hmuh takah chuan ka awmna ka hre nghal mai.Kan Farm House ah ka awm,kan Inneih hnu lawkah Simon-a hmelhriat pakhat ten an sumdawnna ah buaina an tawk a, helai hmun hi an ram a ni a, Simon-a hnenah leisak mai turin a ngen a, Simon-an mamawh lo a intih pawh khan a nawr in a nawr lui a, a theih veleh a lei chhawng leh ngei ngei ang tih intiam chungin Simon-a kha a ngen a, a leisak ta nge nge,tunah kum 2 a liam dawn tawh, an dingchhuak leh angem tih pawh hriat loh khawpin an bet tawh a, kan lei tirh chuan engmah kan khawih lo,mahse, lei let leh lam reng reng an ngaihtuah tak loh hnu khan Simon-an a chei tha a, In sak dan leh a chhung chei erawh hi chu keiman ka ti vek thung.Chhawng awm lo a sak a ni a, a chung a sang tha hle bawk,Room pawh pahnih chiah a awm a,in lian lah a ni hek lo.Kan nupa khan kan ngaina ta thuai a, a awmna hmun hi khawpui daifem ah a ni a,fal deuh raih mai, mahse, kawngpui atanga hla lo te ani lawi a, Aizawl khawpui nen a in ep tha angreng a, tlem chuan kan chung en deuh thung.Kan kal ngun ngiang mai bawk.

Ka inbengkang a, muangchang hian ka thu chhuak a, pawn lamah Sava chiar ri nawk nawk bak engmah thawm awm lo in a reh thap mai..Khua a eng vek a, tukverh Puanzar inzar chu tukverh atanga thli rawn lut chuan a chhem leng dar dar bawk.

Khum atangin ka chhuk a, helai hmunah hian Simon-an min dah nge amah a awm ve pawh ka hre lo a, engtik laiin nge kan kal pawh ka hre hek lo.Zinglam nge tlai lam pawh ka hre chuang lo cheu.Living Room zau lo te awm chu ka kal tlang a, Kitchen leh Dinning Room inkawp lam ka pan a, ka tui hal huam huam bak engmah ka rilruah a lang lo.

“I lo tho alaw?” Hmeichhe pakhat, la upa hmel vak lo hian min hmuh veleh a lo ti vat a, ka beisei loh lutuk ka hmuh thut vang nge ka tui hal huam huam pawh ka theihnghilh titih.

“Aw...er..eng lo, tui ka induh a..” Fridge lian vak lo awm chu ka pan hnai nghal a, tui Bottle ka hmuh hmasak ber ka phawrh a, in zawh nghal vek tumin ka lem nghal khawlh khawlh mai..

“I tha em?” ka in zawh veleh min lo ti lehnghal a. Tui khawihna a a thil sil lai mek pawh chu en lo in ka chevel chu hmuhnawm tih hmel zet hian min en kar bawk.

“Tha e,mahse, ka hre miah lo che..” ka nui lui sak a,mahse, a hmel buai nak mai chuan min ti hrilh hai.

“Sangtei ka nia, helaiah hian Boss in nangmah lo enkawl tur chein min ti a..” ati a, reilote ka in ngaihtuah a, engpawh hi thleng vel mai mai tehse.

“Um, anih chu,chuan tunah khawnge ka pasal?” ka ti a, Dinning chair ka pawt chhuak a.

“A ngaihtuah viau nang chein vawiin hian kal chhuah ngei ngei angai sia, a hma thei ang berin ka lo haw ang ati” ati leh a,engvangin nge In ah awm lo in helaiah hian kan awm ka hre lo.

“Anih chu mawle, mahse, ka tha lawm.Bakah nangpawh i awm a” ka nui lui leh sak a.

“Kan pahnih mai bakah Security pakhat a awm bawk a, Motor a khalh thei nghal bawk a, kan him viau chuan ka hria..” ati leh mai,eitur ka duh leh duh loh min zawt a, ka duh lo dawn zet a ka ei loh na chin a rei tawh a, ei a tha zawk in ka ring leh lawi a,” a lawmawm ngawt ang” ka ti ta zawk.

Eitur a rawn chhawp chhuak teuh a, eitur hmel ka hmuh takah chuan ka ril lo tam zia ka hrechhuak leh ta thung, ka ei nghal mawlh mawlh a, ka duh tawk ka ei meuh chuan ka hma a eitur inchhawp kha a tam vei nen a kam nghal duak mai.

“Ni hnih deuhthaw i mu ania, a awmlo miah lo..” ka ei hnem a ti ve ngang aniang, mahse, Ni hnih....a va mak awm ve, ka hriat dan chuan zankhat ka mu mai ani sia,Banga sana intar lam ka melh a, dar khat a pel tawh, chawhnu lam a lo ni ngei e.

“A va mak, ni khat chu ka mu bo thak animaw?” ka ti a, a bu nghat a.

“I taksa ah khan a lo thawk nasa hman em alawm..” angaihna hrelo zet hian ka en a,ani lah chuan ka thil eina a seng fel mawlh mawlh a, a thusawiin min thawn zia a hre miah lo tih a lang reng.

“Eng ber chu nge?” ka ti a, min chhan tuma a ang ziau tawh chu Motor thawm a hriat takah chuan a thulh leh a, Tukverh ah a va dak a, a rawn hawi let leh a,a nui sang mai.

“A lo haw e..i harh tha tawh a, i hmelah pawh engmah tha lo a awm tawh bawk si lo,nuam a ti viau ang..” engmah hi ka hrethiam nek lo e.

Reivak lo ah Simon-a a rawn lut a, Dinning Table kila ka lo thu a rawn hmu chu ani leh ni lo ang takin a hmelah lawmna niawm tak ka hmu thei,mahse, a rei lo lulai em a ka hmusual ah ka ngai leh hnuhnawh, chumai bakah min thah tum khan ka hrawkah min rek bet a, tunah engvangin ka dam nan a beih a ka dam avangin a lawm tehlul ang ni??

“Ehe, ka va beisei lo ve,i tha em?” a rawn ti hluai a, a hmel chang leh sual hmel tak, tunhnaia ka hmuh reng thin kha awm lo in ka hriat thin, ka Pasal Simon-a hmel diktak kha ka hmu bawk.

“Um, ngatinge hetah hian kan awm daih a?” ka rilrua awm hmasa ber ka zawt nghal a,a nui suk a..a nui hmelah pawh tihelna a awm lo.

“Kha chu nakinah le..Sangte, intur ka mamawh in ka hria, chuan ,Hon..roomah kal ang hmiang..” atih zawm zat, min va han duat leh lawi si ve..

Room lam panin ka zui a, khawiah nge Sawmtluangi a awm ang? In ah kan awm si lo a, kei ka awm lo mai ni lo in Simon-a pawh hetah a awm ve daih bawk si, kan hnenah cheng turin a lo kal a, mahse, hetah kan awmsan leh lawi a..

A thawmhnaw hak a phelh a, a thawmhnaw dahna atangin T-shirt leh kekawrbul a la chhuak a, puih na chang pawh hre lo in a chevel ka en reng mai..

“Ka hmuhnawm tih ka hria ania..” ka phu zawk a, awmze nei lo zet hian ka nui ringawt.

“Engmah hi ka hrethiam lo,ngatinge hetah kan awm daih? Chuan Sawmtluangi khawnge?”

“Tu nge Sawmtluangi,oh..ani kha maw? Ngaihtuah suh, a in enkawl thei alawm” min rawn en a,a mitmeng thim mak maiah chuan dawt a sawi leh sawi loh ka en ran a, engmah ka hmu thiam lo.

“Hetah kan awmsan daih sia, a va fair awm lo ve” Khumah ka thu a,ka sawithiam si loh hian ka chhungrilah ka chau leh tan ta riau mai.

“Ngaituah suh, keimah chiah hi min ngaihtuah la a tawk mai,kha i hmel a dik tlat lo..hahdam la..” ati leh daih..ka lu ka thing tak nangin ka chau hluah hluah tih ka hai lo.

Sangtei’n Simon-a eitur trayin a rawn dah lut a, a kal veleh chhunglam atangin kawngkhar a kalh a, khumah a rawn lawn ve a, min rawn kuah zui nghal zat bawk.Ka samah dimtein a rawn fawp a, a kut zungtang sei thlurh chuan ka kawr hak lai a rawn zen a, dimte hian ka hnute hmur a rawn khawih a, min tihnat hlau hliah hliah niawm tak hian min dim hle bawk.

“I eitur saw ei phawt la..” ka ti sep a, mak khawpin ka mutchhuakin min zem leh chiai chiai tawh.

“Nakinah le,tunah chuan ka nupui hi ka ngai rih zawk,nihnih zet chu min muthilh san tawh a...kuah ka duh a, thildang pawh..” tham tuak hian a ti a, a hmui lum thar thar chuan ka nghawngah a rawn nul kual zai zai bawk..

“Ka mut a chhuak eee, nakinah kan ti zawk thei angem? “ka ti niah niah a, diktak chuan min mamawh ang chiahin keipawn ka mamawh takzet, amah hnaih turin min pawt hnai leh sauh a, a mipatna ruh tung mai chuan ka mawng a rawn si run bawk.Ka kut a rawn la a, a pawt hniam a, a duhna takah a dah takah chuan a thaw hawk mai,keipawh ka bang chuang lo..Mahse.....ka mutchhuak lutuk chuan min ngaihtuah tir hleithei lo.

“Okhey,ka nghak leh mai ang chu,mahse, kum tamtak nitawh  maiin ka hria ania aw..’ ati leh sup a, a aw pawh a mumal lo, a che sawn a, a tho kang a,a rawn kun leh a, ka kawr a rawn hlim a, dimte hian a lei lum thar thar chuan ka hnute hmur a rawn liak kual leh a, na vak lo hian a seh zui leh bawk..ka rum hak a,a samah ka tham a,nuam ka tihna leh muthilh ka duhna a inzat vel chiah thung.

Ka harh leh chuan Room a lo thim thap a, ka kawngah Simon-an min kuah a, a thaw ri sak sak a, a thawk danah a muhil tih ka hria,min thah duh khawp khan a thinrim a, tunah hian engthil nge thleng leh ta? Engmah hi ka mumang a ni lo tih lah ka chiang, min reh hma khan khum sira ka tui chhawp kha ka in a, ka nghawngah a rawn reh bet tak tlat avang khan mumal pawn ka lem  hman lo..A hmelah khan Ramhuai hmel ka hmu thei hial a, tunah lem min duat a, min ngai ngawih ngawih a, min mamawh tih lah hai rual a ni lo a, zep lah a zep hek lo.

Tih harh hlau zet hian ka kawng a kuahna ka laksawn sak a, khum bula Switch ka ban a, ka on takah chuan a eng uar mai, Simon-a muhil hmel chu ka thlir a, a sam a hnawk deuh a, a hahdam hmel hle bawk, a khabe hmul a to siar siar a, a vun uk kharh leh a sam dum chhah zet te,a hnar, mizo hnar niawm lo taka sang vah mai leh a hmui chhah tap, a khabe phir thaih mai te, hmeltha tih tur zawng a ni lo, mahse, amah ah hian Mipa tih hi a awm kim chiang em em lawi si..

Khum atangin ka chhuk a, ka Phone ka hmu mai lo,ka zawng leh rih a, Ka lukham bulah a lo awm bal a, charge a mamawh ngang mai.Simon-a puan ka sin tir leh te te a, Living room lam ka pansan a, Sangtei leh Mipa pakhat hian Tv an lo en dun a, ka thawm an hriat veleh min rawn en rual thawih bawk.Mipa zawk chu a ding chhuak nghal hluai bawk,a lian a, a fit hmel hle bawk, tu nge anih zawh ngai lo in Security ni turah ka ngai nghal mai.

“Chaw pawh in ei ta si lo a, eitur in duh angem?” Sangtei’n a lo ti thuai a,”Aih, duh rih lo..Simon-a phei chu a la muhil a..” ka ti a, pawnlam Light in a chhun en iar mai chu ka thlir a, vah harh ka mamawh a, ka chak takzet bawk.

“Pawnlamah sawn phone hman pahin kan vak harh lawk ange” ka ti a, Mipa zawk chuan rang zet hian min rawn zui tumin a rawn che ve nghal a, mahse, ka kutin ka zap a.”Angai lo ang, ka ngaihtuah awm lo ang, ka kal hla dawn hleinem” ka ti a, a hmel buai deuh nak chu ka en a, ka nuih lui var var bawk.

“Mahse, ....englo..” ati nuah nuah a, “I rilru tihah suh, Simon-a harh hma in ka lo lut leh mai ang, ka rei lo ang” ka ti leh a, hreh hmel zet hian a thu leh ruai ruai a, Pawnlam ka pan a, kawngkhar ka hawn veleh thli fimin ka hmai a rawn chhem nghal a, ka harh sawng sawng mai.

Kawtzawl, Phul in a khuh dap maiah chuan ka tei kual a, zanlama hram chi rannung an hram chiah chiah a, kan ep lama Aizawl khawpui pe tuar mai chu ka thlir vang vang a, ka rilru erawh a ruak vek thung.

Ka mitthlaah Sangpuii a lo lang a, call ila a that ka ring, “Hello..” nidang ang bawkin a aw a dam thlap a, hriat a nuam hle bawk.

“I tha em?” ka ti a, a nui hak mai.

“Ka sawi tur zawk min sawi khalh ania, i tha zawk em?” a rawn ti leh a, ka nui ringawt.

“Tha e, mahse, Farm lamah kan awm daih a, lo len pawh ka duh vei nen...” ka tih laiin min rawn tawng khalh a.

“Angai lo,naktukah ka rawn tlawh zawk ang che ka lo ti a, i taksa ah engmah buaina a awm tawh lo maw?” a la rawn ti ta fo.Eng chu a hria nimaw? Simon-an min that thelh tih kha a lo hre ve zawk a ni mai angem?

“Engmah chutiang ka nei lo..enteh, ngatinge Damlo niawm takin min treat tlat a?” mak ka ti lo thei lo.

“Oh, i dam si lo alawm, mahse, lungngai suh, engkim Simon-an a chingfel vek tawh ania, naktuk ah kan sawi dun dawnnia..ka dah phawt ang, kan pa in min ko a..” nui chung hian a rawn ti leh a,ka mangtha a, mahse, ka rilruah a thusawi zawk kha a awm tlat.Eng nge Simon-an chinfel tur a neih? Amah zawkin min thah tumin min rek bet tlat anih kha.

Ka Phone a rawn nghawr dar dar a, Sangpuii bawk anih ringin nui chung hian ka en thuai a, mahse, ka beisei loh zetin ka nu zawk..”Aw, Nu... “Hello pawh ka ti lo.

“I va that hmel ve, eng nge i an?” a rawn ti vau vau a, hei pawh chu ka ti rilru a, eng nge maw an hriat hlawm hrep ni?

“Aw,ka tha lutuk, NU,mahse, ngatinge chu chu min zawh a?”

“Ehe, ka fanu hi a damlo a, keiin ka zawh loh chuan tunge zawt ang?” lungawi lo aw a tel.

“Aaah, chutiang zawngin ka sawi lo, ka damlo em em pawh ani hleinem,ka chau ringawt alawm..min ngaihtuah suh” ka ti a, a nui leh ta nge nge, thildang a sawi belh teuh a, in enkawl uluk turin min chah mawlh mawlh mai.Thil ka hrechhuak thut.”Ka pa ka lo be lawk ang” ka ti a,

“Lo nghak lawk rawh, Toiletah a lut a..” a ti a, a ri rak rak a, ka pa a ko lang lang thawm ka hre zui zat bawk.

“Aw, Mampui..i tha em?” reivak loah ka pa aw hian a rawn ti a, engtin nge ka sawi tan ang ka ngaihtuah leh rih.

“Ka tha.Pa, englo ania, ka ram min pek kha Simon-an...” ka  sawi zawh hmain amah zawkin min rawn ti tawp a.

“Aw, ka hria lawm, kha lai ramah khan In sak a duh a, chuvang anih kha a pek loh che, min hrilh tawh alawm” a rawn ti a, ka thaw hawk mai.Engtik laiin nge ka pa nen an lo sawi dun hman leh tak? A duh na ah chuan engkim hi a ti tlang zung zung mai si, Ka pa lah chuan a lo ring em em a ni tih lah a chiang reng mai,Hahthlak hian a..

“Um, ilo hriat chuan a tha alawm” ka ti chuai raih mai.

“I aw a va dul ve, i tha chiang tawh tak tak maw?” min ngaihtuah hmel fe hian a rawn ti leh a, ka tha tih ka hrilh a, thildang a sawi leh hmain ka mangtha ta zawk.

Ka naupan lai atangin hmeichhe naupang fing kir ker a sawi tur ka ni ngai lo, ka zirlai ka thiamthei a, midang te hi rilru chhe pu turin ka ring ngai hek lo.Tu pawh mai hi an sualna ka mit ngeiin ka hmu anih loh chuan midang sawi hi awih mai harsa ka ti thin a, tun thleng pawn hei hi ka nihdan a la ni reng, Simon-a hi mi tha lo a ni tih vawitam Ruatdika hnen atangin ka hre tawh a, mahse, ka mit ngeiin ka hmuh chin bak ka ring lo, Midang thah duhna khawp a rilru tenawm a put ka ring tak tak ngai hek lo.Mahse, kha zan kha..min thah tuma min khawih chiah khan amah ka rindan a chiang ta vek.Vawiin hian min duat na ka dawng a, ahma a ka hriat thin Simon-a kha a ni leh tawh,Mahse...mahse a awm tlat thung.

“I vawt vek tawh ania” min rawn kuah pahin a rawn ti a, puan in min tuam a, ka kawngah a rawn kuah a, ka darah a hmai a rawn phum nghal vang vang bawk.Amah ka lo ngaihtuah lai tak anih vang nge ka hre lo, ka insangmar nghal teuh mai.

“Thil ka zawt duh che”

“Sawi la...” a ti tha ve mai..

“Hmanzan khan ka hrawkah i rek a..kha kha ka mumang a ni lo tih ka hria..” ka hmuiah a kut a rawn dah a.

“Sawi suh,theihnghilh ka duh ania” na tuar niawm tak hian a ti hrawk a.

“I ril a tam em?” ati leh a, ka bu ringawt, engvangin nge sawi a duh loh? Min thah law law loh chhan te pawh hriat ka duh asin, mahse, ka zawt tawh lo ang,sawi a duh loh chuan ka sawi hauh lo ang. Keimahin ka zawng chhuak ve tawh mai ang chu.

Zan hlimawm leh nuam tak a ni zui ta ngei e, min mamawhna a nasat tluk zetin ka mamawhna pawh a nasa ve tho, duhtawk chin a nei thei dawn lo emaw tihtur khawpin a duhthawh a, vawi engzat nge nawmna nasa lutuk kha ka chungah a thlen pawh ka hre seng lo.Lukham in a in kamkang deuh a, A taksa ruak kung mai, engmah khuhtu awm lo chungah chuan ka mu ve thung a, ka malah a bawp sei thlurh chuan  min kherh bet a, a awmah ka hmai ka phum a, a lungphu ri dat dat leh a muhil thawri  bak engmah hriat ka duh lo.Thil hlui ka hriatchhuah dawn apiangin rang takin Simon-a ka en lui vat bawk a, naktuk chu naktukin hril mai rawh se, tunah chuan ka Pasal bulah hian hahdam takin ka nun hman ka duh a, zankhat chauh pawh hi a nimaithei.Kan nun inthlak thleng thut thut mai hian engmah min rin tir zo tawh lo a, tuna nuam ka tihna leh ka thlamuanna bak hi engmah hriat ka duh rih lo.

Zingah pawh ka thawh hmain a tho lo ve teh mial, tih harh hlau in dim tein ka tho them them a, mahse, khum ka chhuk san hmain ka kawngah a rawn man a, amah si chetin min pawt bet leh a, ka te that bawk.

“Min tlanbosan hi chu tum buai lo mai teh...” thatchhe zet hian a ti sup a, ka taksa ruak vek chu a kut lum thur thur chuan a rawn chul kual nghal dun dun bawk.

“Tlanbosan..hah..ka tho ringawt dawn zawk a..” ka ti hlak a, a nui nghawr dat mai.

“Hmanhmawh suh, vawiin chu reilote chauh ka chhuak ang, i bulah a theih anga tam awm ka duh tlat” ati leh a, ka bengah a rawn fawp a, ka hnute hmur a kut zungtangin a chep hrual pah bawk..Nuam ti zet hian ka ngheng ar ar mai..

“Simon...”

“Um..”

“Min hmangaih em?” sawi tum sa ka ni lo, a lo ri chhuak ve tawp ani ber.A kut che a tawp chut a, min chhanna tur ka hriat chakna leh huphurhna a inzat reng.

“Ka hmangaih che in i hria em?” a kut a che zui lehnghal a.

“Ka hre lo,a chang chuan min Hmangaih in ka hria a, a chang chuan ka hlau che a...” a tawp lam a zuih ral a ni ber.

“Min enteh..”alam hawiin min kuai her a, ka biangah a rawn dawm a.Amah en thei turin min kuai dak a, a hmelpa leh chang zet thin kha a dam thlap mai.

“Ka nupui ni lo la chuan vawiin hian i dam tawh lo ang, natna min siamsak kha nangmah Thah nan che hian a tawk lutuk..mahse, i na tuar hmel ka hmuh khan ka rilruah thildang a awm ta zawk, eng anga nasa pawn tihnat che tum ila keimah hi ka na ve zel a, i tello hian ka dam zo lo ang ka ti lo, mahse, mithi nen danglamna ka neih ka inring lo...chuvangin i tihsual te kha chu ka theihnghilh thei lo anih pawhin ngaihdam mai che hi ka duh ta zawk..” a hmui chhah tap mai chu ka hup sak ta ngawt, ka sawi zawm tir thei lo.Min hmangaih thu a sawi hauh lo,sawi pawh ngai ka ti hek lo..Ka tel lo in a nung thei lo tih ka hriat ringawt pawh kha ka tan chuan a tawk lutuk,a dang engmah hriat belh ka mamawh lo.

“Engmah ka ti sual lo asin ,mahse, fiahna ka nei si lo...” a darah ka lu ka nghat a,a thaw hawk mai.

“Sawi tawh lo ang, hriatchhuah leh hi ka duh tawh miah lo” ati sup a, ka chalah a rawn fawp vang vang mai.

“Thil pakhat min tiam thei angem?” ka ti leh a.

“Um..sawi chhin la..”

“Tualthah hmang i ni lo tih min hmuh tir rawh,ka chhungrila zawhna awm teuh hi chhanna ka duh..”

“Shh...ka ni ngai reng reng lo, min hria alawm, Midang thah duhna khawp rilru tha lo ka pu lo..mi fel ka ni lo,mahse, chutiang rilru ka pu lo tih i hriat kha..”

Kan nupa nun inthlakthleng thawk chuan min tihlim viau dawn emaw ka tih laiin ka hlim chuang hauh lo, keimah ah hian zawhna chhan theih loh, dik kim si lo,eng nge anih ka hriat chuan si loh a la awm tun nimai hian ka hria, Simon-a a chhuak a, Sangtei leh Security nen kan awm a, Sangtei tawng siam siam chu ka ngaithla reng tak nangin a sawi zo chiah a ka theihnghilh zui nghal animai.

Gate lamah Motor thawm a rawn ri a, ka dak chhuak vat a, Sangpuii car ka hmuh takah chuan phur zet hian ka tlan chhuak a, Security in a lo ti ding a, ka va hrilhfiah a.A tihtur diktak tiin a lo zawt kual vel anih hmel..

Sawi tur kan ngah dun ngang mai,Sangpuii pasal erawh chuan in hnung lama Dil ngawt chu a lo va buaipui pek a, ka dem hran lo.Sangha an awm nual a, hmuh mai theihin an hleuh kual del del bawk nen Mipa tan chuan a nuam khawp ang.

“Ruatdika te kha i lo hria em?” a ti hliai a,ka lu ka thing mai.

“An inthen asin..mak ka ti ngang mai” ati a, keipawn mak ka ti,an inkawp nasat zia lah kan hre vek a, inneih mai an duh tawh ka rin vei nen..

“A va mak em em,Hriati chuan a tuar viau lo maw?” ka ti a, a thle bak mai.

“Ka hre lo, a tuar maithei,a zin bo nghal daih a..Ruatdika chu ka hmu a, engmah chutianga tuar awm pawn a awm lo,eee. Simon-a Cousin kha tu nge khah?” atih zawm a, ka mit ka tizim a, tu nge sawi a tum ka hre lo.

“Tu a cousin ber?”

“In ina awm ve kha mawle,khanu nen khan an inzui ka hmu a” mak ti deuh hian ka ang pham mai.

“I hmu sual a ni lo maw? An in hriatna a la rei lo em mai a” ka ti a, a awih lo tih ka awah pawh a hriat theih.

“Naah, hmu sual nang, kan inbia alawm’ ati awlsam leh mai.Hriati thlak nan a lo hmang anih teh chuan aw? Simon-a nena nunhlui nei hmeichhia lehnghal kha..Ka chungah eng nge a tih hi ka la zawng chhuak ngei ang, engmah chu ka hre chiang hauh lo nangin Ruatdika hi mi tha a ni in ka hre tawh lo.

“Enteh, thildang daih ka zawt duh che a, ka natna hi eng nge ni reng reng a?” ka ti ta zawk, natna ka neih ka hre miah lo,mahse, nimin khan ka tha lo tih an sawi vek a.Eng natna nge ka neih chu Sangpuii aia hrechiang tur an awm lo.

“In pa i zawt lo ami a?” ati let ha mai.

“Aih..zawt lo..”

“Zanah khan Simon-an min rawn bia a, mahse, Simon-a khan a lo luak luih tir nasa che a, kha khan a chhan che kan ti thei ang” ka natna pawh sawi chuang lo in a ti leh a.Engmah ka la hrethiam chuang lo fo.

“I sawi awmzia ka man lo..”

“Test result atanga a landan chuan tur i ei..ni lo, i eiturah an pawlhsak che ti ila a dik zawk ang..”

Ka hresual emaw ka ti a, mahse, a hmel thutak zetah chuan ka hresual lo a, fiamthu pawh a thawh lo tih a lang chiang ngang mai..