BLACK HORSE - 9

Chapter- 9

Min thlah thut a, ka thutna ep chiahah chuan a thu leh a, eng nge a ngaihtuah ka hre lo,a thilsawi te khan min thawng lutuka chhan let nachang lah ka hre hek lo.Engmah kha a ti tak tak in ka ring lo,hna ka nei a, ka kal lo ngawt thiang lo.Chumai bakah ka zalenna rap bet a, In a min khung turin theihna anei hek lo..Ni lo e,ka pasal hi ka hrechiang emaw ka lo ti thin a, ka lo hrechiang reng reng lo, chumai bakah engpawh hi ‘ka ti ang’ ti a a sawi tawh anih chuan tih loh a neih ngai ka hre lo.

“Chaw ei ang..” bung zet hian a ti leh vut a, ka la che chuang lo.

“Ka sawi i hria em?” ati leh a, a ding chhuak a. Kitchen lam a pan a, a chevel chu ka en mawl tawp.Khatiang thil tawn hnu khan chawei thei turah min la ngai reng reng emawni??!!

Muangchang hian ka tho chhuak a, inchunglam ka pan ta zawk.

“Khawnge i kal dawn?”

“Ka mu dawn..”

“ka sawi kha i hria em?, chaw ei ang ka tih kha..”

“Nangmahin ei mai rawh, ka ril a tam lo..”

“Ok, a tha lawm..mahse, nakinah chuan i ei dawn hauh lo ania” a ti leh hmuk a,chhan pawh ka chhan hmain a lut leh nghal daih bawk.Ka ei tawp lo ang, chawei chakna ka nei lo takzet, ka ril a tam hle kha ania, tunah chuan chaw ka ngaihtuah zawng pawn ka luak lo chauh zawk.

Ruatdika biak tumin ka bei nasa tawh, a tlang thei miah lo.Simon-a khan a thinrim chhan ber sawi lo mahse nizan khan thil dik tawk lo thleng a awm tihna a ni,ka mit ka chhing vang vang a, mahse, engmah ka ngaihtuah chhuak zo chuang si lo,ka mumang nuam zet kha...kha thil kha..ka mumang a ni takmeuh em? Mumangah khatiang lutuka nuam kha a thleng thei dawn ami?

Ka inring hman lo, ka uak pawp mai..Mumang a ni tur a ni,Pasal nei lai ka ni a, thil tak tak a ni tur a ni lo,Mipa tel loa khawsa thei lo khawpa nun khawhar leh mahni in control thei lo ka ni hek lo..

Simon-a a rawn mu ta miah lo,ka bulah riak lo in Room hran a hmang leh ta tih hrilh hran ka ngai hek lo,eng mipa nge maw a lo nih chiah le?, huaisen taka tawnga hetianga min tih theihna hi a nei lo tih sawi tur pawn engthil nge ka tihsual ka hre miau si lo.Engmah ka ti lo ngei tih ka hriatchian hma chuan ka dik a, a thinrim chhan eng nge tih ka zawt thei si lo.

“Min rawn biak i va tum nasa ve,eng nge ni ta a?” Ruatdika’n a rawn ti a, nizan khan vawi engzat nge biak tum a ka beih ka hre seng lo zawk.

“Biak i va han har em em ve,khawnge i awm?” thinrim insum zet hian ka ti hrawk a, ka mitsirin Simon-a inchung step a a lo chhuk mek chu ka hmu a, mahse, ka ngaipawimawh duh chuang lo.

“Nimin khan hna thilah ka zin alawm, ka hrilh che kha” a rawn ti a, a mood a fuh hmel phian zui.

“Ka be duh che, Hotelah khan engtin nge ka awm daih theih..’ ka hnungah Simon-a a din avangin ka tawng ka ti zawi a.Hotelah ka awm tih a hriat ka duh lo.

“I hrelo amaw? Engmah i hre lo tih min hrilh tum miah suh..” a rawn ti a,nidang ang lo takin min duatna aw a hriat theih bawk.

“Aih, ka hre lo tak tak..engtikah nge i lo haw dawn?”

“Vawiin emaw naktuk aniang,kan inhmu dawn nia” a rawn ti a. Lo haw vat tehse, a hahthlak em mai.

Kan nula a lo la let si lo, eirawng ka bawl sawk sawk a, Simon-a erawh Kawtzawla thutna awmah a thu a, Chanchinbu a chhiar pah a, ka va en a, Ni chhuak in kan kawl zawl a pangpar leh Golden Oak kung lian ve tawh tak a rawn chhun en phut chu a nalh takzet, Golden Oak sira Thir a siam thutna awm a thu zawng zawng nen chuan hmuh a hahdam a, a nalh tih hian a sawifiah zo lo.Kum hnih lai ka lo neih tawh ka pasal hi diktak chuan nitin hian ka duhna a pung zel thin a, nimina thinrim leh tawngkam rapthlak tak a hman hnu thleng pawh khan ka Pasal anih angin huat tak takna thinlung ka la pu thei ta chuang lo cheu.

“Chaw kan ei dawn mi?” Inchhung a rawn lut thawm ka hriat veleh living Roomah ka phei vat a, ka tawng thawm hriain a ding chut a, min rawn en a.

“A hmanhmawhthlak hleihnem” ati nghut ringawt, Sana ka melh zawk a, Dar 9 a hnai tawh, tunah kan ei chuan nidang nen danglamna a awm lo,ka hna kal hi tlai ka duh ngai lo a, ka hriatchian ang chiahin Simon-a pawh hian hun vawndik ka duh zia a hai hek lo.

“A hun tawh alawm, bakah ka tlai ka hlau deuh a, Exam a hnai tawh sia..” ka ti leh a, nizan a hmel rapthlak lutuk kha chu a awm leh tawh lo,a nelawm lo satliah ringawt.

“Khawiah nge kal i tum?”

“Oh...College kal ka ngai tih i hria alawm..” ka ti let hmak a, a awmdan chuan min ti thinrim phat nangin nizana a thilsawi te kha a tih tak tak mai loh nan zaidam zawk a ka dawr hram hram angai tih ka hria.

“I kal dawn lo..” inchung panna Step a rap zui nghal a.

“Aih, ka kal dawn..” luhlul zetin ka ti ve hmak thung.

“Han tum chhin la..” kitchen lam ka pan tur chu a rawn ti leh a, ka ding dat nangin ka hawi let lo a, ka chhang hek lo.

Keimahin ka ei sawk sawk a, nizan khan engmah ka ei tak loh avang khan ka ril a lo tam viau,ka ei tha ta phian mai.

Ka insiam thuai thuai a, ka thawmhnaw tlar put chu ka en kual a, Cotton var, a nghawng zau lam hret ,lian hnek hnawk a thui ka khai chhuak a, kekawr dum tlem a min phuar deuh ka ha leh a, pheikhawk hi chu a sang ka bun ve pawn hniam tawp aia sang hret a ni tlangpui.Ka sam ka chhipah ka bawk khawm a, ka hmaiah make-up tlem ka tat zuai a, ka duh tawk der, engtiklaimahin make-up ka hmang tam ngai lo.

Ka Car chahbi kha nizanah min laksak tawh a, tunah a dahna va zawng kual leh tur chuan a tlai tawh lutuk,kan In atangin Taxi stand hnai ber pan tur pawn kal ve deuh hlek angai, ka phone ah ka Taxi hman than tak number save ka nei tih ka hrechhuak a, hmanhmawh zet hian ka call leh rih..

“Ka Motor a chhe pek a, College thlen vat ka ngai sia,ka va mamawh che ve” a pick veleh ka ti nghal mawlh mawlh a.

“Kan vengah ka awm lo a, mahse, ka rawn haw tep a, min lo nghah hman leh hman loh animai” nui huau huau chung hian a ti a, Sipai pension a ni a, a hnaah hian a chiang a, zu a in ngai ka hre lo a, a rinawm em em tih ka hre bawk.

“Ole, ka lo nghak ang che, mahse, i theih anga hmanhmawhin aw..” ka ti a, ka Paper ken tur ho ka hrechhuak a, nimin piah khan kan thiannu ta ka la chhawng a, nizan kan boruak tehrep khan min manghilh tir pek a, engmah pawh tifel chuang lo in ka ken angai.Ka bag ka hai rawk rawk a, Simon-a Officeah Printer a awm tho a, ka hmang thei mai ang..Taxi ka nghah chhungin ka zo hman mai ang..Mahse, ka tihtur ber Paper ho pawh chu ka hmu leh lawi lo.Nimin kha ka kal lo a, he Bag hi ka ak chhuak lo, Bag dang ka ah thin zawk ka va la chhuak leh a, ka rin ang ngeiin a lo awm ,ka thaw huai mai.Tibo vaih ila chuan a sa hle ang tih a chiang.

Hmanhmawh zet hian Simon-a Officeah ka tlanthla a, ka thil print tur ka  keng a, khawiah nge Simon-a a awm ka hre lo,Officeah a lo awm anih pawn a pawi lo.Kawngkhar ka nem hawng a, tumah an lo awm lo hlauh, Printer ka pan hnai nghal a, ka On chawp a, a sirah chuan file pakhat, chhah vak lo hi a lo awm ngat a, ka en chak tlat pek..Simon-a sawi ang chiah khan tunlai chu ka nun hi a hniam takzet, thil tihruk de de ka ching ta lutuk pawh hi Damlohna chi khat chu a ni chiang alawm, A sawi dik lo hauh lo.

Ka thil print tur Printerah ka dah a, ka duh zat ka set fel a, ka bula File en chakna chuan a tur hian min tur et et a, ka insum zo lo ,ka ban ta nge nge.

Ka keu a, ka beisei loh lutuk ka hmuh takah chuan ka mengphar awk mai.Ka pu Death Certificate leh ka pu ro chungchang ziahna a lo ni a, Ruatdika kha a lo daw miah lo.A ro sum zawng zawng changtu atan Simon-a hming a awm a, ka pu hming sign niawm tak a awm bawk.A ro changtu atan Simon-a a dah vanga mak ti ka ni hek lo.

“Ka boral anih chuan ka neih zawng zawng hi ka Tupa Simon Malsawmzuala tan ka dah vek a, ka damlai erawh chuan engmah a khawih che thei lo ang.Ka thihni atangin engkim, ka neih zawng zawng erawh chu a kutah a lut vek ang,Ka duhdan hi tuman an sawibuai thei lo ang.”

Hei vang chiah hian anih hi a lo thah, that kher lo pawn engkim hi a ta a ni vek tho lo emawni? Ka hrethiam lo.A sumdawnna zawng zawng hi a ta a lo ni ngai miah lo zawk a, ka pu ta nireng siin amah hian a lo enkawl a, ka pu thih hma chuan a ta a ni thei lo.Tunah chuan a thi tawh....Ka khur dar dar mai.

“Eng nge i tih?” ka phu nasa lutuk a ka zuang dawrh thei hial, thla chu nei ila ka thlawk hla hle in ka ring bawk.

“Min ti phu alawm mawle..” ka ti hlak a, Kawngkhar biang nghengin a ding a, a kekawr ipte a zen tut bawk.

“I thil ken kha eng nge?”

“Oh..” tih leh dah ka rual a, khung pawh ka khung fel lo.

“Mi dang thil lo khawih ngawt te hi i ching ta riau a, i mizia hi a danglam nasa ania.Rilru lam Doctor pan mai teh” a sawi zawng zawng chuan a den hian min deng dawt dawt mai.Sawilang chiah lo mahse “Rilru buai” ah min puh tih alang reng.

“Mi a ka ni lo..” a thil Ka lo khawih ngawt hi ka dik lo tih ka hria, mahse, ngeiawm leh hmusit lutuk a min tawngkhumna chuan min ti na a,ka dik loh na ka haider ve hmak bawk.

“I at si loh chuan hetiang hian awm lo la,ka hmuh dan che hi chuan i a let tawp chu anih hi” ati leh a, ka kut ka humruh a,min chhaih thinrim a tum niin ka hria, a tum anga chhan let ka duh hek lo.Ka thinrim khaw hmu lo in ka chhang let leh anih vaih chuan a duh ang ngeiin “Mental Hospital” ah min dah lut fel hmak mai ang.

“Ka pasal hian eng nge a tih thin tih entur hian dikna ka nei..ka lo en har mah mah zawk in ka hria” ka ti let salh a, Printer a tawp a.Ka thil print ho ka la chhuak a, ka Phone a rawn ri ve chiah bawk.

“In Gate bulah ka awm tawh e..” ka Taxi koh khan a rawn ti a, ni e, kal vat ila a tha.Helai hmunah hian inhnial ringawt turin hun ka nei lo.

“Ka lo kal e..” ka ti a, ka Off a, ka Paper ho ka keng a, mahse, kawngkharah ka chhuahna tur dal takin Simon-a a ding ta tlat.

“Kal sawn teh” ka ti hmak a.

“Khawnge kal i tum?” a ti ve thung.

“Ka hna ka kal dawn mawle”

“Nizan khan ka sawi chiang viau in ka hria,khawiahmah ka tel lo in i chhuak tawh dawn lo.In hi i chhuahsan dawn anih chuan ka rualin..” rapthlak ti zet hian ka en a..

“Oh.. chutiang chuan min ti lui thei hauh lo ang..”

“Ka thei tih i hria alawm..ka duh chu ka ti ziah thin tih pawh i hria alawm..” a nui a, mahse, nuihzat vang a nui a ni hauh lo tih a mitmeng dur khurpah chuan a lang chiang hle lawi.

“Midang chungah chuan i ti thei pawh a ni ang, mahse, kei chu midang ni lo in i nupui ka nih hi..kut min thlak hauh lo ang..” ka ti leh hmak a, kal tlang luih tumin ka pan hnai a.

“Hmingthan, min nawr lui suh, ka nupui i nih avang chauh a i chungah hian Accident a thihna thleng lo anih hi hria la, chu thil chu a thlen kher loh nan thuawih mai teh..” Ka khawng vek..ka melh reng ringawt, harsa ti zet hian ka chil ka lem a..

“Ruatdika chungah khan accident kha a thleng lui maw?” ka aw a zawi lutuk ,mahse, Simon-a pawn a hre thei tho anih hmel e.

“Yeap...khatiang ang deuh kha...mahse, a thi em hleinem tiraw?” a nui leh hawk a, a hmela nuam tihna lo lang chuan chet pawh min chet tir thei lo. Tualthah hmang dik tak a ni ringawt.

“Misual lutuk...engtin nge ka lo neih theih che?” ka aw a khur dar dar mai.Min chhan hmain ka Phone a rawn ri leh a, ka inrin hmain a rawn phihthla a,na zet hian bangah a vawm a, a ri pawp a, a keh them nen chuan chhuatah a tla darh nghal nuaih bawk.

“Nia, ka sual..ti khan ka sual zia chu i hrechiang anga,min nawrui tawh lo ang chu..i lu bur nalh zetah khan eng nge ka tih leh dawn ngaihtuah turin thluak i nei tih ka hria alawm.” Ati leh nghut a...Chet pawh ka che ngam tawh lo..Thil thleng hi ka mumang a ni lo tih ka hriatchian nan kei hi khawi atangin emaw ka tlak thlak angai hial ang..Anih loh vek pawn tui vawt lutukah ka inchiah harh angai ang.

A inher a, a chhuak chu ka en a, a pian nalh leh inkhaithli thlurh mai,a dar hlai hlap leh a kawng fek leh lawi si te,a bawp sei zet a a pen pawk pawk te chu nidangah kha chuan nalh ka ti thin anih kha..tunah chuan nalh leh nalh loh lam ka en lo..Ram Sakawr, piantha zet, uluk taka  mihringin an  enkawl..engmah hlauh nei si lo nen ka tehkhin ber.

Taxi kha....hmanhmawh zet hian ka paper ken lai nen ka tlanchhuak a, Kawngkharpui ka thleng chiah tih chuan Simon-a gate bula ding leh Taxi tlan let chiah chu ka va hmu a, a lo va hnar a ni ngei ang.Beidawng lutuk hian ka tawlh let a, hmanhmawh zet hian Room lam panin ka tlan chho a, hun thawl tak hnuaiah,keimah chiah a awm a,ka in ngaihtuah harh angai.

Roomah ka tlan lut a, kawngkhar ka kalh a, a lo luh ka ring lo, mahse, lo luh a tum palh anih pawhin ka hawn sak lo ang..Hmanhmawh zet hian Laptop ka on a, hei tal hi chu min laksak hmain ka duh tih nan ka hman angai, ka phone a vawm chhe tawh a, pawn ka chhuah a khap a,kan nula lah karkhat lai chawlh a lo pe hmiah mai bawk si.Kan Driver lah vawiinah a lo let dawn em pawh ka hre si lo.

Facebook hi ka lawm lem lo a, khawih pawh ka khawih vak ngai lo.Ahming chuan Ac ka nei ve a, chu deuh zawng chu a nimai, bakah mimal nun lutuk pholan nana hman chiam te hi ka tih zawng a ni lem lo.Kei ang chiah hian Sangpuii pawn a lawm lo a, Ruatdika erawh chuan a hmang ve zauh zauh thung.An dawr thil zawrh chhuah nan leh amah intih lar nan a hmang tiin ka fiam thin a, a nui mai mai zel.

“Ka be duh che, tlaiah Inah min lo tlawh rawh, a pawimawh” tih zawng hi Sangpuii ka thawn a, kan nupa kar buaina hi ka thlen dawn kher lo,mahse, Phone ka mamawh a, engemaw tal tih ka ngai bawk.Ka rin ang chiahin a Online lo a..Engtikah nge a hmuh ang ka hre lo.Messenger a hmang em lah ka hre hek lo.

“Rawn hawng teh..” Simon-a aw hian a rawn ti a, mahse, ka che duh lo..Ka thu khawng at mai..Na zet hian a rawn chum leh a, ka la hawng duh chuang lo.Ka laptop hi ka thuhruk angai,wi-fi ka hman theih chuan engemaw chen ah ka tan a awlsam zawk dawn a.Bakah Simon-a beih let nan ka mamawh bawk.Ka shut down a, ka thawmhnaw bawm ah ka nawr lut a..Keimah zawk pawh Bath Roomah ka lut zui hmak,a duh leh Kawngkhar ti chhe mai tehse.

Bath tub chhungah ka thu a, ka rilru buai nuaih nuaih tihfim ka tum a, a sawt lem lo..Tui ka dah lut ta zawk..Ka thawmhnaw hak lai pawh ka phelh lo..Tuiah hian inchiah hlum ta zawk ila ka tan a nuam zawk angem? Ni lo...hetianga min tih chhan ka hre lo a, ka thi anih chuan ka bei let thei dawn lo ,kha zan khan eng nge thleng tih te, chumai bakah tu nge Simon-a hi a lo nih chiah zawng chhuak tur chuan ka dam angai..Zankhat thil thuah ka nun a inlet thut a,ka pasal lah ka tan chuan mihrang hlak a ni ta bawk.He in ah hian mi tang ka ni a ,mahse, ka tan na In hi a lian tawk a, thil thleng hmachhawn ngam lo a ka nunna ka la anih chuan awmzia a awm lo.Ka insehruh a...ka dam tur a ni..Engvangin nge ka chungah hetiang a thlen ka zawn chhuah hma chuan ka thi tur a ni lo.

Nilengin ka awm ta vel mai mai, Simon-a pawh a chhuak chuang bik lo.Tlai lamah Emily a lo kal a, a rualin Hmeichhe pakhat a rawn kal tel bawk, min hmu thut chu makti deuh niawm tak hian a mit ko a san ak a, a hmeltha tak chu nidang ang bawkin hmuh a nuam hle bawk.

“Tun ang hunah te i awm mial a..” nui chung hian a rawn ti a,ka nui let ve tak nangin ka nuih a za hlawl lo.Engti turin nge an lo kal ka hre hek lo.

“Nia, vawiin chu ka kal ta lo mai, kan nula a awm lo bawk nen..”ka ti a.

“Aahh...Simon-a hian i hna i bansan tih min hrilh leh si..i bansan har zawk ka lo ti lutuk a” atih zawm leh a, Simon-a ka melh zawk a, min rawn en ve a, a hmelah engmah a lang chhuak chuang lo.

“Bansan chiah lo, ka la ngaihtuah mek..” ka ti a, a nui hmel tawp riai riai chu ka hmuh hmaih lo.Zawhna nei hmel taka Simon-a a en pawh chu ka hmuh hmaih chuang hek lo.Engvangin nge he Hmeichhia hian ka tihtur a lo hriat ve zel kher ang?

“Simon,i thil min chah kha chu hei ka thiannu hian a rawn keng a, chuan,khawi laiah nge dah tur?” ati a, ka kalsawn duh bik lo.Hna a ni emaw ni lo emaw ka hre ve duh tlat.

“Ka Officeah ka lo en dawn mi niang?” ati a, a tho a, an pahnihin Office lamah an zui lut a,ka melh reng ringawt.

Reife Officeah an pathumin an inkhung a, an haw meuh chuan khua a thim lek lek tawh, Gate thleng a va thlah a, eng nge a rawn kensak chu hriat chakna in min tur leh et et tawh.

“Ka be duh che ania..” Tv en a ka lo thu chu min rawn ti a, ka ep zawng chiahin a rawn thu a.

“Min bia la,khawiahmah ka kalsawn dawn hleinem..”

“Naktukah ka nu nau fanu a lo kal dawn a, hetah kan hnenah a cheng ve tawh ang,chuan, hna i nei tawh lo tih hre reng rawh,College a zo chiah a, a peih leh ka hnenah a thawk ve anga, a peih loh pawn sawi buai tur a awm lo.Kan nupa kar boruak dik lo hi tupawh hrilh i tum anih chuan i hrilh te apiang tan thil tha lo zawk a thleng zel ang”

“Chu hmeichhia chu ka enkawl dawn tihna nge In ah hian chanvo ka nei lemlo tih sawi i tum zawk?”

“I ngaihdan dan kha a dik ve ve” ati leh a,a kekawr ipte atangin envelope a rawn phawrh a, ka hma a dawhkan ah chuan a rawn theh thla a.

“En rawh..” ati hmuk bawk,muangchang hian ka ban a, engthil nge anih rin ngaihna ka hre lo.

Ka phawrh chhuak a, eng nge anih ka hriat takah chuan ka thaw hawk mai,ka banna lehkha.Ziah fel sa thlap leh ka hming sign hnan thlap bawk a lo ni a, hetiang ka ziah awm reng reng ka hre lo.

“Kha lehkha kha vawiinah, Emily rual a lo kal khan a submit tawh a, duh lo a bang i nih ang ngeiin sawrkar chuan lawm takin a pawm ang,bakah hna mamawh ve tak tak an tam, chung ho chu i kian ah ngai mai rawh” ati zui leh a,ka chhungril a thinrimna so bulh bulh chuan puakkeh turin a nawr hian min nawr a ni ber.

“I duh duh i sawi anih kha, ka bang miah lo ang..” beidawng thinrim lutuk hian ka ti a, ka melh lui ngar bawk.

“Ka duh duh ka sawi hauh lo, engkim hi chhan nei vekin ka ti thin tih nang aia hrechiang an awm lo ang” ati leh hmuk a, ka pumah luak tur ang mai hian min rawn hnawh a, ka insum nasa kher bawk.

“Hetianga min tih chhan hi ka hre duh, eng nge tih dik loh ka neih ka hre duh bawk” nghet charh hian ka ti a, ka inringtawk ta riau bawk.

“Kei ai hian i hrechiang zawk ang chu..” ten hmel zet hian a ti sup a, engmah ka hre hauh si lo.

“Ka hriat loh vangin ka zawt che,tu nge i nih pawh hi ka hre miah tawh lo.Kha Hotelah khan hmeichhe pakhat nen darkar khat chuang in tawm dun a, chuan, Emily hi i hmei a ni tih ka hai hek lo.Ka dik zawk a, i dik lo zawk..” ka thaw a chham lo chauh.

“I sawi zawng zawng chu fiahna ka hmu duh..” chang zet hian a ti leh hmuk a..Engmah fiahna ka nei lo,Hotelah khan an CCTV kha Ruatdika nen kan en sak a, mahse, kha thil kha sawi chhuak lo turin min intiam tir thlap avang chauhin ka en thei.Customer te zahawmna leh an dikna chanvo anih avangin Police thu lo chuan Record kha ka en thei lo..

“Fiahna maw?? Ka mit hi animai..”

“I mit chu ka mit anih ve si loh chuan a buaithlak anih chu...” a ner nawk a, min melh run bawk.

“TU nge i nih?” beidawng thinrim lutuk hian ka ti ta thlawt.Hetiang em em a sual leh ngeiawm hi a ni tih ka lo hre ngai miah lo kha ka dik lo zawk a ni hial ang.

“I pasal..thil ka hrilh ang che,ahhh...ka sawi ai chuan en la a chiang ang..” ati leh a, min bia ni lo in amah leh amah a inbia niin ka hre zawk.

A rawn tho ,min rawn pan hnai a,a hmel phiar fat mai chu ka melh ve ran bawk, eng nge tih a tum ka hrethiam eih lo bawk,a phone a phawrh a, ka hma a dawhkanah a rawn dah a.

“En rawh, engvangin nge i chungah rawng takin ka chet i hrethiam ang chu,chuan, zawhna min zawt tawh lo ang che..” khauh leh hriam hruih hian a ti a, ka chil ka lem khawlh mai..

Dawhkana a phone dah chu ka en a, ka awih thei lo zawk..kha Hotel khumah khan ka mu a, thawmhnaw ka inbel miah lo.Mipa kut niawm tak hi ka taksa ah a vak kual vel a.....ka mit ka hup ta ngawt...ka khur hlawk hlawk bawk..Ka hmelah lah khan nuam tihna a lang chiang em em bawk...

“I hmu em? Nang chuan min puh kual mai mai a,kei chuan ka puh lo che, ka hmu thung,Ka nupui i ni tawh lo a, mahse, ka then che tihna a ni lo.He In ah hian nitin hrehawm tuar reng rengin i nun i hmang tawh ang, i Hmangaih te, a mal malin an na tuar lai i lo thlir dawn nia..Eng ang mipa nge ka nih pawh i hriat belh zel ang..” ka beng bulah a rawn ti a...

Ka khur nasa lutuk a engmah tih na chang ka hre lo..