BLACK HORSE-26

BLACK HORSE-26

Ka ti nawn leh a,a la ngai reng,a sawi sual nge sawi sual lo tih hriat tumin vawi tam ka ngaithla nawn leh a...Engmah sawi sual a nei lo.Ka ngaihthlak ngun poh leh ka na tam ting mai bawk.

Ruatdika'n min rawn call leh a.Engthil rapthlak nge a rawn sawi leh ang??

“Hello…”

“I en tiraw??,tunah Hotel an rawn chhuahsan chiah a..” a rawn ti leh a.

“Chuan…??” ka ti mawl tawp,engmah han sawi belh tur ka hre lo.

“Kei chuan ka zui tawh lo ang,ka nau pakhatin a zui anga,thil thlen dan chu a tul ang zelin ka rawn hrilh ang che” a rawn ti leh a,ka tan hna a thawk a,ka hriat duh hriat tumin a bei bawk a,mahse,a hriat chhuah chhun tlem te lek pawh hian min va han khawih na lawi si em!!!

“Ok,i tilawmawm lutuk...ka lo ngaichang dawn che nia”Pangngai takin ka ti thei hram,ka na em em tih hre mahse hriattir kher ka duh lo.

Reife hnuah pawh engmah a rawn sawi leh ta lo,ka mut a chhuak lo ve hrim hrim bawk,Dar 11 pelh tawh hnuah Simon-a a rawn haw a,a motor thawm ka hriat rualin ka inkhuh vat a,ka hmu hreh hauh lo a,ka hlau hek lo.Engtin nge ka lo hmachhawn ang tih ka hriat loh avangin ka muhil der a ni mah zawk.

Roomah a rawn lut a,ka mut tawh a rin vang a ni ngei ang,thawm a dim viau bawk,mahse,ka phone a ri ta tlat.Ka pick dawn lo zet a,Ruatdika a lo nih chuan pawimawh a awm maithei...Harh chiang lo niawm tak hian ka Phone dah na lam ka dap a,ka dap fuh ve mai bawk,diktak chuan a awmna hresa ka ni a,thil mak a ni lem lo.

“Hello…” harh hlawl niawm tak hian ka ti a.

“Mampui,i muhil lai ka ti harh che animaw?” ka beisei loh lutuk hian ka pa aw in a rawn ti a,ka insum hman lo,ka thu chhuak nghal hlawl mai.

“Aw,mahse,a pawi lo..eng nge ni ta?” ka lungphu a rang nghal dawt dawt mai.Tun ang hunah min rawn bia anih chuan a pawimawh hle ang tih ka chiang,ka pa hi Mizo pa ve tak mai,thinphut nei vak lo niin an sawi thin a,a phili lai ka la hmu hauh lo.

“I nau a accident a,na vak phei chu a ni lo a….” ka ip chawih mai,a na thawkhat ang tih ka chiang,bakah tun hnai kum chanve chhung hian thil a thleng hnem lutuk,engmah accident a ni tak tak ngai lo a,tum reng vanga thleng a ni ziah bawk.

“Khawi Damdawiinah nge in awm?”

'Greenwood a hnai ber bawka Greenwoodah kan awm,lo kal duh suh,ka rawn hrilh hre hrim hrim che ania”

“Ka lo kal ang…”a rawn tawng leh hmain ka off zui nghal a,ka hlauhna te kha a kiang duak thung.

“Eng nge a?” Simon-a a awm ve tih ka hre leh chiah.

“Tetea a accident a….oh….accident a nih leh nih loh chu Pathian in a hria ang,nang pawn i hre maithei bawk” thawh pahin ka ti a,Mutna a hak chi Pyjama lum ka ha sa a,Khum bul a thawmhnaw khainaah Poncho ka khai sa a,ka phih thla a,Uggs ka hmuh hmasak ber ka inthawlh nghal bawk.

“Enge sawi i tum tak ka hrethiam chiah lo...a na viau em?” zawi sup hian a ti leh a,ka en ta nge nge.

“A nat leh nat loh chu ka thlen hma chuan ka hre lo ang,mahse,thil pakhat...i kut i lo thawh leh a,Tetea hi a thi anih vaih chuan…”, ka kut ka humruh a,sawi pawh ka sawi zo thei lo.

“Pathian hmingin….engmah i nau chungah ka ti lo” na tuar niawm tak hian a ti tawk mai.

“Kan la hria ang chu” ka ti hmak a,ka inher a,Tunah chuan a tlai tawh a,Tlana kaitho kher lo in keimahin ka inkhalh chhuak mai ang.Ka tlukna ah khan ka ban a na vang vang nangin Motor ka khalh theih tho ka beisei.

“Ka lo kal ve ang” ka banah a rawn vuan a,rang lutukin ka thingthla ve thung.

“Ka mamawh lo che a,ka mamawh ngai tawh lo bawk ang che,ka chhung te emaw kei pawh,kan chungchangah vawikhatmah rawn inrawlh tum ngai tawh suh..min lo hmang tangkai rei tawh a,a tawk tawh viau e,tu nge i nih tak hi ka la hrechhuak mai thei lo a,mahse,ka pasal ni lo in Emily pasal i ni tih erawh ka hria,min khawih tum ngai tawh suh,ngaihtuah pawh lo ngaihtuah  tawh suh ang che” ka sawi hnem bawk a,ka sawi zawh meuh chuan ka thaw hawk mai,mahse,ka thawveng hawk thung..

“Ka lo hrereng dawn nia” a inher a,a dar hlai hlap mai chu a ti kum deuh a,a kekawr ipte a zen bawk,ka tawnglai khan a hmelpa zetah khan nidang a ka la hmuh ngai reng reng loh natna ka hmu a,mahse,ka tana na a ni lo tih ka hria.Min hman tangkaina hlau hauh lo a ka chhan let vanga na a ni zawk ang tih ka ring a,a dik ngei bawk ang.

Damdawiin ka thlen chuan ka rin ang ngeiin a lo na tak tak viau mai,a thianpa b’day an lawm a,a haw lam a accident ta niin min lo hrilh a,Tetea hi ka nau anih vang ni lo in a nungchang a tha a,zu leh ruih hlo dang a khawih ka hre lo,mahse kan hriat loh lamah a lo khawih thei tho bawk.

“I va lo thleng rang ve,khawnge Simon-a?” ka nu in a rawn ti a,hahthlak hian a….an fapa hi thah tumin a bei maithei a,kei an fanu neih chhun pawh min thah tumin min rek tih han hria se chuan a hming pawh a lam hauh lo tur,mahse engmah a hre lo miau a,a Makpa mahnise a thlamuanpui thin a,tunah pawh hian awm ve turin a duh tih ka hai lo.

“A zin a lo thleng deuh chiaha,lo kal ve a tum a ka hnial anih kha” ka ti ta zawk,tunah hi chuan Tetea vangin a rilru hahna tur a hmu lutuk,a dang hriat belh a mamawh hauh lo.

“Anih chu mawle..” a ti zawi sap a,Ka pa a rawn thu ve a,Tetea accident an hriat dan leh tu nge hrilh tih te ka zawt a,a hnunga tlan a thianten awmze nei miah lo in a tlan kawi zawr zawr a,kawngsir a Motor lo ding na lutukin a va su bur mai tih an sawi te min hrilh a,mak tihna bak engmah ka rilruah a lut lo.Engvangin nge awmze nei lo a a tlan vak ang? Ruih a nei anih si loh chuan a Bialnu nen an inthen anga intihhlum a tum a ni thei angem?

Ka lu ka thing nawk mai,ka pa,pa rilru lian leh ngawhngawl tak hian kan naupan lai atangin mahni inthah tum hi mi dawihzep tih dan a ni tih min zirtir thin a,harsatna engpawh hmachhawn ngam lo a bihruk ching lo tur leh kan tihsual ah chuan huaisen taka hremna hmachhawn tur tih te min zirtir nasa lutuk,amah hian a nunpui bawk.Chuvang takin kei,an Fanu ngei pawh hian manganna vawrtawp ka tawrh lai pawh khan mahni inthah tumna ka nei ngai lo..Dam chak lo khawpa manganna leh thi mai zawk ila tih chang erawh ka nei fo thung.

“Nu,Tetea hian kan hriat loh in rilru hahna a nei ani mai angem?” a rilru tihnat belh hlau deuh tak hian ka ti a,min chhang mai lo.

“Ka hrethiam lo,Zuali nen an buai awm pawh ka hre lo,mahse,hmanni deuh atang khan biak a min chhan loh mai mai te a ching a..a hun tam zawk a room lamah a hmang bawk a” a thaw halh mai.Kan unauah chuan a hmeltha ber a,a lian bawk a,rual kawm a thiam ber bawk.A bialnu nen hian kum 5 vel lai an inzui tawh a,kan chhungkua mai lo Zuali te lam pawn an hre vek a,kan Inah pawh a lo kal zauh zauh bawk.

“Chutiang chuan eng chen nge a awm tawh?” ka ti leh talh.

“I haw hnu lawk kha animai,karkhat pawh a la tling mang lo” ati leh a,ka awm lai kha chuan kan infiam bawrh bawrh a,engmah danglamna a neih ka hre miah lo.

“A hlim theih tehlul nen,amak hle mai,Zuali bak chutianga awmtir tu tur ka hre miah lo” ka ti leh sep a,Nurse pakhat a rawn dak a,Tetea chhungte an awm leh awm loh a rawn au a,ka Pa a tho vat a,Ka nu nen kan tho ve nangin kan luh ve an phal lo.

“Eng lo,thil pakhat mak tih ka nei a,i pa awmlai khan ka sawi duh lo a,Nimin khan Pangpar ho lei vel ka thlak kual a,ka bulah a thu nileng ve thak,i chungchang a sawi a...zawh zui ka tum lahin a ngawi leh tlat a” hlauhthawnna bawk in min rawn man a,Simon-a nen kan buaina hi a lo hria a nih vaih chuan a pawi dan tur ka ngaihtuah ngam lo zawk.

“Eng chungchang?” ka ti lawi rat mai.

“Kan haw tir leh che kha a sawisel a,nang lah i lo tlan pawh a ni bawk si lo a” ati a,ka hrethiam lo.

“Eng nge a awmzia?”

'Ngatinge a haw leh kher a?,Ngatinge U Simon-a a neih a? A neih dawn khan in dang lo a...tih vel a sawi a,mak ka ti deuh a,ka zawt ngial a,mahse,engmah a sawi zui duh tlat lo a...I pa pawh ka la hrilh chuang lo” a ti a,ka mitthlaah Simon-a a lo lang a,he mihring hi ka That ngei ngei ang.

“A va mak ve mawle,buaina engemaw chu a nei a ang em mai..Ka pa pawh chu a lo chhuak har e” ka tih zawm a,a thi mai ang tih ka hlau a,Simon-a chungchang avangin a rilru a buai tih lah ka chiang tawh.Eng berin nge tibuai erawh ka hre lo.

Rei fe a awm hnuah ka pa a rawn chhuak a,zan khat thil lekah a lang tar bawih mai.Ka dem hauh lo,an fa te hi min hmangaih vek a,mahse Tetea hi chu a tet lai atangin a hrisel lo a,thi hnu dam leh ang deuh anih avangin ka nu nen hian an atchilh tluk a ni thawthang a,Pa luhlul leh ngeng tak nimahse Tetea thihna ko tlanga a din meuh chuan a mangang ve tih a lang reng mai.

“Engtin nge an tih ?” ka lo ti vat a,a hmai a tuai pawk a.

“A thaw a pangngai deuh hunah an zai dawn a,lang thei lama a hliam ai chuan a kawchhung lam a sawh na zawk anih hmel “ a ti a,Ka nu heh pet fan fan chu ka en a,ka u tal chu awmse a zia tur.

Ka nu leh ka pa nen kan thu tlaivar ta zak,Tetea thiante an awm nual bawk,haw turin ka ti hlawm a,an duh der lo.Khawvar hnuah kan chhungte an lo lang ve ta thung,engmah tih theih nei lo mah ila kan han awmkhawm takah chuan thla a muang ta deuh.

“Va haw tawh rawh,i naupai nen khan indim i ngai ania” Ka nu in min ti a,a sawi dik,mahse haw leh chakna ka nei miah lo a,Simon-a hmuh chakna ka nei lo,engmah fiahna ka hmuh hmain thah mai ka hlau ani mah zawk.

“Kan in lamah ka va phei zawk ang,ka u hi vawiinah a lo haw dawn em?” ka ti a,hna thilah a zin a,mahse,nizanah chanchin an hrilh tawh.

“A lo thleng tep ang,nizan khan an rawn zan chhuah a” a ti a,Kan upa ber,nu leh pa tan innghahna tlak a ni bawk nen tunah tak hian ka nu leh pa hian an mamawh takzet.

Haw tura an vaia min nawr takah chuan ka hawsan ta nge nge,ka kalsan lai pawn engmah a la ang chuang lo cheu.Oxygen an hip tir a,a thaw hram hram a ni ber.

Simon-a car a lo la awm a,a la chhuak lo a nih hmel.Nidang ang chu nise a chhuah a hun daih tawh,dik tak chuan ka chau hluah hluah.

Living Roomah ah Tlansanga leh  midang nen an lo awma,lo awm ve te chu ka la hmu ngai lo,mizo an ni lo a,eng hnam nge annih ka hre mai thei lo.

“I lo leng ani maw?” Tlansanga hnenah ka ti a,Simon-a lam ka melh eih lo.

“Nia,hei kan thiante nupa hian an hmu chak ngang mai che a,mahse i lo awm si lo a,i nau chu eng nge a an?” a ti a.

“A tha animai,a la harh lo a” ka ti a,hnamdang lo awm ve te chu an college kalpui thin te an lo ni a,nupa an ni bawk.

“Nimin khan Dinner kan nei ho ang chu kan lo ti a,i tha em?” Hmeichhia zawk chuan Saptawng nalh zet hian min bia a.

Ka that thu leh ka kal theih loh vangin thupha te ka chawi ve luam bawk,Mipa zawk nen pawh kan han inbe ve luam a,mahse,ka chhungrilah Simon-a bak a awm lo,Tetea kha amah bawk hian a khawih ka ring a,amah inthat duh tur khawpin a nawr chep ngei bawk ang.Hriati a tih ang chiah khan…

“Hon...i tha em?” ka hmai bulah a rawn kun hnai a,ka phu zawk bawk.

“Oh….tha e,ka chau ve deuh aniang..reilote ka han mu lawk mai ang” ka ti ta nge nge,nizan khan ka mangang lutuk a muthilh lam a lang lo a,tunah chuan ka nuam lo a,ka khua a sik niin ka hre bawk.

“Um,a pawi lo..kan mikhual te hi chu an awmrei dawn lo,bakah i nau hetiang a nih takah chuan Heta Dinner ei an tum pawh an cancel leh ta mai” a ti ta duah..

“A zia lo hle mai,thulh kher a ngai lo a,bakah ka awm loh pawn Emily a awm thei tho ang chu”

A mit a tizim a,a thinrim nge thinrim lo pawh ka hrethiam lo.

“Um,nia...mahse,a neitu  ber awm lo chu a ho dawn tlat,an lo kal leh hunah a nimai” a ti leh a,mak tih ka nei..Nizana ka hmuh te kha anni miah lo.Nizana Emily a nupui tia a hrilh te kha chu pa upa lam a ni a,tuna mi hi chu Simon-a aia a upa anih pawhin a upatna a tam lo ang.

Kan inleng te hnenah thupha ka chawi luam a,an ni pawn an lo kal hun a fuh loh thu leh ka nau accident pawi an tih thu an sawi ve bawk.

Khumah ka lawn nghal a,ka mit thip thum a zia deuh beiseiin ka mit ka chhing a,awmzia a awm teh vak lo.Ka mut a chhuak nge ka chau a ka dam lo zawk pawh ka hre hrang teh nuaih lo.

Ruatdika ka rilruah a lo lang a,ani khan Tetea chungchang hriat a nei maithei..Ka phone ka bagah ka dah daih,ka tho leh a,ka va la a,Ruatdika ka call nghal a,mahse,a busy...ka ti nawn ta lo.A hman hunah a lo call mai ang chu.

Khumah ka lawn leh a, Christmas a hnai tawh a,mahse chulam reng rengin ka rilru a luah chhin lo.Ka mimal buaina hian min chiah hneh lutuk,tunah phei chuan Tetea  a telve tawh bawk.Ka thawpik hluah hluah.

Ruatdika'na rawn call let ta ngei

“Hello…”

“Khawnge i awm?”

“Ka mu chiah,nizan khan Tetea a accident a”

“Um,ka hria.Tunah ka awm mek a” a rawn ti a,tu nge lo hrilh ka hre lo.

“Eng nge chanchin thar a awm em?”

“Stable….mahse,lungngai lo la”

“Um,engemaw ka hriat chi a awm em?” ka ti leh a,a thaw hak mai.

“Tunah chuan i boruak a rit rih em mai,nidangah zawk le” a rawn ti halh a,ka rin dan chiah,ani hian engemaw tal a hre tur a ni.Ka rinngam awmchhun a ni miau a.

“Chawhnu lamah Damdawiinah kan inhmu dawn mi?”

“Nia,ka lo kal leh ang..mahse,engmah ka sawi dawn rih lo ania” khauh zet hian a rawn ti a,ka dem lo.Ka rilru hah dan tur ani aia hrechiang an awm lo ang.Nizanah Simon-an a thiante hnenah a nupui tiin Emily a hmelhriattir a,kha pawh kha awm nuam lo a awmna tling a ni a,mahse khatah khan tawp mai lo in Tetea accident thu in min rawn deng leh bawk.Thu thinthawng dang hriat ka mamawh lo em atin ni..Mahse,ka hriat ngei a tul.

Ka beisei loh zetin ka mutui ta phian,Simon-a lo chhoh leh chhoh loh pawh ka hre lo.Dar hnih pelh hretah ka nu in min rawn call a,thawhphan pawh ka nei eih lo.

“Aw,nu…” hlauhthawnna bawk..

“A thawk dan a zia ta deuh a,an zai dawn mek e” ka thaw huai mai..Lawmthu sawiin ka tawngtai ru nghal mawlh mawlh bawk.Simon-a that tuma ka rilru put dan ngaihtuah chuan tawngtai ngam tur ka ni em ka hre lo.Ka ngaihtuah duh lo law law..

“Ka inbual lawk anga,ka lo phei ang” ka ti a.

“Hmanhmawh suh,thisen pek angai nual a,hei,Simon-a ten an pe tawh e..chuan,i u pawh a lo thleng a” ka thu khawng lah mai.

A khawsak dan hi ka hrethiam hlawl lo,amah vang anih ka rin laiin thisen a lo va pe leh lawi bawk si..Engpawh ti rawhse,Simon-a kha a la ni reng tho.

Muangchangin ka inbual a,ruakin Darthlangah ka in en a,ka dul ka chul a,lang tham pawn ka la rai em lo...mahse,reiloteah chuan a lo puar anga,ka thawk rualin a thaw ve ang,ka fa...keima fa liau liau..mahse,Simon-a thisen anihna erawh a bo tawh ngai dawn lo.Ka fa hi kha zan rapthlak takah khan mipa dang nen a kan siam dun ani lo tih ka chiang tawh,fiahna ka nei hauh lo thung.

“Khawnge i kal dawn?” Sangtei’n a lo ti vat a.

“Damdawiin lamah ka va kal leh dawn a,chawei tur pawn min lo nghak lo mai ru” ka ti a, a bu nghat a,sawi duh nei sawi ngam si lo a ang.

“Tunah i kal dawn mi?’ Sawmtluangi aw hian a rawn ti a,inbual zo chiah tih hriat hian a sam a hnawng chap mai.

“Aw,kal ka lo tum chiah,i chhuak dawn mi?” ka ti khawmawi a.

“Ka lo kal ve ang chu ka ti a” ka bu ringawt.

Pawnah Tlana a lo awm a,Motor a lo tifai mek bawk,Kan inneih hnu lawkah a rawn thawk ve a,Simon-a hian a duh viau aniang,a fel ve hrim hrim bawk.Motor engmah hi bal in a awm hman lo a,amah pawh bal tawpin a awm ngai lo.

“In hman tawh mi?” min hmuh veleh a lo ti a,a sawi awmzia ka man lo.

“Damdawiinah kal ka tum a,mahse kalna tur i nei ami?”

“Aih,I kalna turah ka hruai ang che,U Simon-a khan nangmaha motor khalh a phal lo a” hreptak hian….Ka motor khalh a phal lo nge ka kalna apiangah min enthla turin a dah zawk pawh ka hre nek lo,hnial a sawt dawn lo tih lah ka hai hek lo.Min zah der teh mahse kei aiin Simon-a thu a ngaipawimawh fe zawk a,eng ang pawn hnial mahila ka chil per a uihawm thlawn mai mai.

A hnungah Sawmtluangi amahin a thu a,a phone lam ngawt a buaipui a,engtin nge Ruatdika nen an awm ka hre lo,thui tak kal tur erawh chuan ka la ring lo,a rei lo lulai em mai.

Damdawiin kan thlen chuan an lo awm teuha,Ka u hmel ka hmuh rualin ka thaw huai mai.Ka lo thlamuanpui zia ka hriat chian phah lehzual,Sangpuii awm se chuan tlemin ka zia ang.An inneih hnu lawkah a nu a damloh avangin an buai zui char char a,tun thla tir khan an nupa in Bangkokah an thlawk chho a,hmun dang dang tlawh tum anni bawk a,an lo la haw ta lo.Kan nupa kar buaina pawh engmah ka la hrilh ta lo zel chu ania.

Simon-a a lo awm tawh lo hlauh,ka thlen hnu reivak lo ah Ruatdika a lo thleng a, Sawmtluangi hmai sen tan tan chuan an boruak tur awm min hriattir thei ruak mai.

“I tha em?” Sawmtluangi be lo in min rawn ti a.Ka bu ringawt.

“An zaina a rei tawh em?” a ti leh a,ka nu zawkin a lo chhang a,Darkar khat aia tam fe an khawih tawh a,hlauhna bawk in min rawn tuam leh ta.

“Zai zawh hunah kan inbiak theih chuan?” ka nu hriat loh turin a rawn ti a,ka bu ringawt.Thil tha lo dang hre turin ka fit tawk em ka hre lo,mahse hriat ngei ngei ka ngai tih erawh ka hria.

Darkar li tehmeuh an zai hnuah an zai zo ta hram,an zai hlawhtling thawkhat tih an sawi a,mahse ICU ah an la dah avangin kan hmu thei chuang lo.An zai chhung khan ka nu leh ka pa an thu hle hle thei lo.Ka thutna ngaiah ka thu reng a,rilru mumal ka pu thei der lo thung.Hriati ang mai khan mahni intihhlum tum anga sawi niin a kal leh mai ka hlau ngawih ngawih.

“Nu,va haw ula..ka lo awm ang” ka ti a,mahse,a lu a thing mai.Ka nu luhlul zia ka hria,tihluih a sawt dawn chuang lo.Zuali nen an awm a,Zuali pawh haw tura nawr chi a ni chuang lo,a tap nasa tih hriat zetin a mit a sen ram mai.

“Nangmah kha va haw zawk teh,nizan i tlaivar ve ngawt tawh bawk a..indim i ngai ania” a ti a,diktak chuan ka chhunglam a khawsik in min tham avangin mut ka chak takzet.

“Nia,ka va haw mai ang...Tlana lo va haw ula,Ruatdika hian min rawn thlah mai ang” ka ti a,a hmel buai nak mai chu ka khawngaih zawk.Kei min hnial hreh a,Simon-a a hnial ngam lo hlei hlei.

“Nia,lo va haw rawh,U Hmingthani nen kan lo haw ang” Sawmtluangi'n a lo ti ve a,a ngaihna hre lo zet hian ka en a,Ruatdika ka en leh a,a bu nghut a,a hmui phunin 'Pawi lo’ a ti zauh bawk.

Coco Cafe kan pa ta dial, Sawmtluangi nen kan nih tak vang khan Tlana pawh min hnial lo in a kal ve ta mai.

“Ruatdik,biak che ka duh a” ka rilru a hmanhmawh,mut hahdam ka duh.

“Lawk,a lo thleng tep ang…” a sana a en zauh a,tu nge lo kal tur awm ka hre lo.

“A rei angem?”

“Rei lo ang..um,saw a lo kal chiah e” Kawngkhar lam a en a,ka va en ve a,Mipa pakhat,lian lutuk lo,Baseball cap a khum bawk.Ruatdika’n a ko vat a,ka sira thutna awlah a rawn thu ve a,ka hmuhawm ka la hre lo.

“Hmingthani hi a hmanhmawh sia,sawi tan mai ta che” teh tawp a.

“Ka sawi kher ang nge a copy ka dahna pendrive hi ka pe ang che? i duh zawk zawk?” a aw a nem lam lek lek.

“Eng copy nge i sawi ka hre lo,mahse,lo en ila a tha zawk ang” ka ti a,haw vat vat ka duh ber.

“Nia,hei hi aw” a kekawr ipte a zen a,Pendrive a rawn phawrh a,ka hmaah a rawn dah a,eng nge awm ang hre lo mah ila ka en chakna leh huphurhna a inzat reng.

“Kan thil chah ei phawt ang,chuan ka drop ang che u” Ruatdika'n a ti a.Chu em zawng ka hnial ta lo.

“Nizana Video kha i en em?” a ti leh a, Sawmtluangi awm laia min zawt chu ka duh vak lo.

“um” ka ti tingawt.

“Nizana mi kha i pasal sumdawnpui lian ber a ni a..”

“Khawgaihin….keimah in min la hrilh dawn nia” a sawi zawh hmain ka ti ta nge nge,za vak  lo hian a then sak a.

“Hlau suh, Sawmtluangi hi i pasal tan hian hmelma lian ber a ni a,tuna i pasal chanchin diktak leh nihna diktak kan chhuina ah pawh hian ani hian min puih vang chauhin ka hre thei a” ka melh zawk a,engemaw a awm tih ka hresa a,mak ka ti lem lo.

“Nia,diktak chuan Ka pa min thahsak khan ka la naupang a,ka pu a thah tir kha chuan ka nula tawh” a hmui a pet a,ka thu khawng lah mai..

“That tir….eng nge i sawi awmzia?”

“Sangpuii te inneihni tak khan min tir a,that turin...i pasal tan ka thawk thin” ka bula thu chuan zawi fiah zet hian a ti a,ka Spoon ka thlauh tawp mai.

Ka la hre reng,inneihna a kan kal hma khan a officeah tu emaw that tura a ti lai ka hria a,ka rilru nuam lo in ka zawh khan 'ZAWHTE” tiin min chhang anih kha..