BLACK HORSE-27

BLACK HORSE-27

“I tha em?” Ruatdika'n a rawn ti vat a,ka bu nghauh a,ka nui ringawt..ka nuih chhan ka hre der lo thung.

Misual leh mahni hmasial tak a ni tih hre tawh mahila midang thah duhna khawp rilru tenawm hi a put tak tak ka lo ring ngai lo,ka ring phal lo zawk mah,mahse,a tuartu ngeiin a sawi takah leh a tawngkam ka hriat nen hai rual loh a a in man fuh takah chuan a hma a na ka lo tih thin te chu a bul tanna chauh anni lek mai.

“Haw tawh ila a tha in ka hria” ka spoon thlauh dah that pahin ka ti a,mahni a awm a in ngaihtuah ka mamawh ber.

“Ok...kan kal dawn nia,mahse,engtia hmalak chi nge ka hrethiam lo a” min zawt niawm tak hian a ti a.

“Ka la hre mai bik lo..” ka hre lo tak tak,eng anga sual pawh lo ni se ka pasal,ka Mipa Hmangaih awmchhun,ka naute pa a ni bawk a,na tak tuar emaw mualpho na vawrtawp nen  a nun a hmanglai hi hmuh ka duh chiah em ka la hre ta lo fo.Nizan kha chuan thah mai ka duh kha ania,tunah erawh eng nge ka duh ka hre tawh lo.

“U Hmingthani tan hian an In lama awm a that ka ring,tihpalh thilthu ang deuh khan i taksaah Tur te hmu leh ta se…” ka vawt rawih rawih mai.Kha tur kha Simon-an ka nau pai tih tlak nan a hmang tih a sawi kha..Min lo that ve nghal mai se tha tur hi ania.Mahse,Mak takin ka nunna chhan him tumin a bei leh lawi...LALPA leh...amak hleinem,min hman tangkai duh avangin ka dam a ngai atih tak kha.

“Ni lo,engmah sawi rih lo ang,haw ka duh rih phawt” ka bag ka la a,ka tho zui daih bawk.

“Nia,kal ang u”Ruatdika'n a ti a,min rawn zui leh zui loh ka ngaihven lo.Stepah ka chhuksan a,a Motor dahna lam ka pan a,min rawn um pha ve mai bawk.

A mi chhawrpa kha a lo tel ve lo a,tumah kan tawng lo.Sawi tur ka hre lo hrim hrim bawk,Hmeichhe fing leh fel tak,mahni pawh in enkawl thei ve tawk tak thin kha thla rei lo te chhung hian hmeichhe nep leh hlu lo ber ah ka in let ta der chu ania,engtin nge hma ka lak ve ang tih vawitam ka ngaihtuah thin a,Simon-a lakah hi chuan ka in la hrang thei tehmeuh ta mai.Mahse….thil tha lo dang a lo thleng dawt zut a,ka Naupai vangin ka dawih ta riau bawk.Hmeichhia hi kan tlawm a ni lo.Diktak chuan kan hun tawn azir zela insiamrem thei khawpa chak kan ni zawk.Simon-a thlazar hnuaiah ka lo awm rei tawh a,ka tih ai leh ka buaipui ngai hauh lo in engkim a buaipui thin a,kha khan Hmeichhe chak tak thin kha Hmeichhe nep berah min chhuah chu a ni ta der mai si,ka nulat lai a ka suangtuahna huaisen tak te kha la nei vek mahila a taka che chhuak tur chuan a harsa ta tlat.Engpawh nise Simon-a nihna hrechhuak turin ka kutah engkim a awm tawh a,a bak chu hunin a hril ang chu.

In kan thlen chuan Simon-a a lo haw tawh a,verandaah a hnuaia thawk pakhat leh Architect a rawih thin nen an lo thu a,Motor atanga ka chhuk chu min rawn en vung vung bawk.

“Hey...Simon...i tha em?” Ruatdika'n a ti a,lenglut turin ka sawm lem lo bawk a chhuk tum awmin a awm lo.

“Ka tha lawm,i rawn thlah ami?” dam thlup hian a ti a,a hmelah nuizatna a lang thei tlat bawk.

“Um,innu hi a lal khawp,tak takin ka kal lehnghal mai ang” ati a,Gate a a tlanchhuah thleng ka thlir a,zui ve daih mai ka duh rum rum,ka thei ngawt si lo.

Ka tawng chak hlawl lo,biak pawh be lo in inchhung ka pan a,a inlengten mak an lo ti anih pawhin lo ti vel mai mai tehse, Sawmtluangi a room lam panin a kal a,kei pawh Room lam ka pan nghal bawk.

Simon-a lo chhoh dawn leh dawn loh ka hre lo,mahse inleng a neih lai chuan a lo kal ka ring chiah lo.Engdangmah ti lo in Laptop ka la chhuak a, Pendrive min pek kha ka vit lut a,Simon-an a lo hmu palh anih pawn a copy neih hman ka duh a,laptopah ka copy a, Pendrive dangah ka la chhuak leh bawk.

Kawngkhar a rawn rik rualin rang lutukin Laptop ka khup nghal a,Simon-a a rawn lut zui nghal mai bawk.

“Engthil nge a?” min rawn pan a.

“Engmaw?”

“Ui eiru ang mai alawm i nih,i hmel ah khan thil tha lo ti zo chiah i ang a” a ti leh nghut a,Tv a on a,khumah a rawn thu mu zui nghal bawk.

“Engmah tisual lo e,ngatinge Tetea kha thisen i lo pek?” ka aw a chang lam hret.

“Ka duh,ani khan a mamawh bawk a” min en lo in Tv lam a en run bawk.

“I pek leh dawn tho si chuan amah intihlum duh tur khawpa beidawngin siam loh mai tur alawm le” ka ti leh nghat a,ka bag dahna ah ka bag ka dah lut a,ka scarf ka phelh a,ka dahlut leh tur chu a rawn phih a,a lo kal hnaih lai ka hre si lo,ka phu zawk mai.

“Pathian hmingin...i nau ka khawih lo..” thinrim insum puak keh a ang ber.

“A va lawmawm ve,nia,nang chuan i kut i hmang ngai lo a,an mahni intihlum turin i nawr thin alawm”ka nui hak mai.

“Ok...chu chu ka pawm e,mahse i nau kher hi chu ka nawr lo a,ka khawih hek lo.Chutiang tihna chhan tur ka nei hauh lo bawk”, chang zet hian a ti leh hrawih a,ka melh ran mai.

“Emily pasal i lo ni reng bawk a,engtikah nge min hrilh ang ka lo ti a”ka ti leh a,ka scarf a vawn beh tlat avangin ka thlah ta zawk.

“Sawi tur ka hre hauh lo mai” a ti nghut a,a ngaihpawimawh loh zia leh ka thinrimna a inmil lo lutuk a sawi leh mai tur ka hre lo.

“Ruatdika hi ka duh lo ania, Sawmtluangi nen hian an inhnaih mah mah bawk a” ati leh a.

“Amah hrilh rawh,bakah midang chungchanga inrawlh hi a mawi lo ania” ka ti nghat a,ka pheikhawk ka tlawh phelh a.

“Midang ni lo in ka farnu anih hi…”

“Farnu lem...hah...ngaihtuah tak tak te pawh i ang alawm”

“ Farnu lem...i sawi awmzia ka hre hauh lo,mahse,vawiin chu nangmah ah hian danglam a awm,chuan,thil pakhat,Ruatdika hian Sawmtluangi ni lo in nangmah ania a buaipui zawk” ati hluk a,ka hnungah a rawn ding tih ka hria,min hnaih mah mah bawk.

“Min buaipui anih pawhin a  thian ka nih ang leh Hriati vang a ni ang,chuan,Sawmtluangi hi i pu tunu ani a,mahse a fa lak fa a ni thung,engpawh nise a pa kha that lo la chuan a tha mawle” ka banah a rawn hmer a,amah en thei turin min phih her sawk bawk.Ka ban na lam anih avangin ka te tuar mai.

“Min ti na alawm mawle...thlah rawh” phelhsak tumin ka kut lehlamin a kut ka vuan a,a thlahdul deuh nangin a thlah duh chuang lo.

“Eng nge i hriat?” a vin lo,mahse hlauhawm tak a ni.

“Ka hriat zawng zawng ka sawi chuan a tha nang,ka thil hriat hmangin ka do let dawn che alawm,Mipa i nih chuan min bei let ang chu” a kut phelhsak tumin ka khawih leh a,mahse ka kut lehlam pawh awlsam zet hian a man bet a,a hmer kawp nghal hmak bawk.

“Sawi rawh,eng nge thildang i la hriat?”thinrimna ni lo in vauna lam a lang ta zawk.

“Eng ang pawn min khawih mahla ka sawi chuang lo ang,tur min pe leh anih chuan ka thi anga,a pawi lehzual ang” ka ti leh a,hlauhna ka nei lo,a mitmeng  hlauhawm zetah chuan ka melh ve ran mai.

“Ka hmang tangkai che hi nang aiin ka inchhir zawk,eng nge i hriat ka zawt tawh lo ang che,mahse engmah ka hrilh loh che hian chhan a nei...i tana tha ber chu ka thu a awm hi animai” a ti leh hmuk a,a thuawih tur ka nihna lai ka man hauh lo.

“Zorina Hotela thil thlen zan khan nang leh Sawmtluangi kha Hotelah khan in awm ve ve,eng nge in tih ka hre lo.Kha video vang khan i thinrim vel a tiraw? i siam ngei anih kha..engvanga siam nge i nih? ka fa hi midang fa nih tir i tum vang maw?” ka aw a khur a,ka duh ang pawh ka sawi zo thei lo.

Ka kut a vawnna a thlah a,min chhan tum hmel a pu lo.Ka thinrim a zual sauh thung.

“Engkim vang khan min ngaidam dawn nia,pawi ka ti” sofaah a thu thla hnawk a,a hmai a hup nghal vang vang mai,a awmdan chuan min ti hamhaih zo vek.

Ka chhan buai ngai lo in ka Phone a ri ta hlauh,ka ka vat a,ka pa a lo ni a.

“I nau hi a rawn harh a,mahse,biak an la phal lo a,a lawmawm em a ka rawn hrilh che,Simon- a kha lo hrilh rawh ka phone a chhang thei lo a” a rawn ti a,ka thawveng hawk mai.Mahse,Simon-an an nunah hmun a chang thuk lutuk hi engtin nge ka thlak danglam sak tak ang??

“A va lawmawm ve,ka lo hrilh dawn nia..” ka ti a,kan inhau mek tih a hre der si lo.

“Um,hei Cabin pawh kha kan nei fel tawh tih lo hrilh tel la, a lo awm hlauh chu a tihzia khawp mai” a rawn ti leh a,ka kut ka humruh ngat ngat mai.

“Ka lo hrilh ang,pa..Nakinah ka lo bia ang che” ka ti ta thlawt,Simon-a laka a lawmna chuan rilru ipik na bak min thlen belh lo.

“Ka pa in cabin an nei tawh a ti a,chuan,Tetea pawh a harh tawh” ka ti ringawt.A rawn hawi chhuak a,a hmelpa leh hriam hrak thin kha ni lo in tanpui ngai lutuk hmel zawk ka hmu ta tlat.Mahse,a reh leh vat tho.

“Alawmawm,ti khan ka khawih ila ring em?” nelawm lo zet hian ati hmuk a,ka lo khawngaihna kha a bo lehnghal.

“Engmah lo ti tawh suh,thil hi a harsa mai mai ania” ka ti chhuak halh mai.

“Ni e,nizan pawh khan i sawi tak kha,mahse,i nu leh pa in min ngainatna hi tihreh tum mahla a harsa tawh ang” a aw ah chuan tihelna ri ka hriat hmaih lo.

“Tihreh ka tum hauh lo,an hriatrengna ah hian i chanchin tha zawng tal an hriat hi ka duh ve, engdang vang mah ni lo in ka fa pai lai tan hian 'pa’, i ni tlat atin ni” ka ti a,a ner nawk mai.

“Naute….”zawi sup hian a ti a,engmah a sawi belh chuang lo.

Room ka chhuahsan a,sofa hnunglam nghengin a thu a,chunglam a melh ngur bawk.

Awmdan mai tur ka hre lo,ka thawpik hlauh hluah a,mahse eng nge ka tihtur ka hre si lo,Simon-a lah khan ngaihdam min dil ta ngawt bawk.

“U Hmingthan,engtin nge?”Sawmtluangi ka bulah a rawn thu a.

“Eng chu?”

“Pendrive kha i hawng thei ta em?”

“Aih,ka la en lo” ka ti ringawt.Ka rilru a buai bawk nen midang ka hne vel vek.

“Diktak chuan Emily ka ngaitheih loh zia pawh i hria ang” a ti leh sap a,ka melh ringawt.

“Ka pa boral dawn zan khan a lo kal a,ih...ka pa nen khan an inkawp niin ka hria,chuan,zingah khan a lo thi khawng vek tawh a,Mama nen hian kan pahnihin…”a sawi zawh hmain Simon-a a rawn lut ve a,a ngawi ta daih.

“Ka kal chhuak dawn ania,Chaw min lo eisan mai rawh” min rawn en zawk a,Fridge atangin tui Bottle a la chhuak a,a thawmhnaw hak danah chuan Gym kal tur a ang.Tawng lo in ka bu ringawt.

“Sawi zawm la..” ka ti a.

“Ahhh...ka ngaihtuah a,thil kal daih tawh ania,i tan hriat a nuam lo ang” a ti leh lawi.Rindan ka nei thiam vek.

“I thu le... Ruatdika nen hian in inhmeh khawp mai” ka ti leh a,a hmai a sen tawn tawn a,a nui ringawt bawk.

“Hriati hmun ruak luah hi a harsa ngawt ang” a ti halh a,'a theih loh’ ka rilru in ka lo ti ve thung.

“Hriati hmunruak luah tum lo in nangmah i nih ang hian hnaih tawp mai rawh” ka ti a,ka nui lui sak bawk.

“Ka hrethiam e...ih...diktak chuan Mama nupui neih dawn khan Emily bak a neih ka lo ring miah lo a,mahse nangmah zawk i lo ni daih sia”

“Emily te chu a thian ania”

“I hre lo der nge i hre duh lo zawk?an inkawp nasat zia hi haider theih pawh a nihleinem” a ti leh halh a,ka hre lutuk mah mah tih khum nghek ka chak.Mahse,ka ti ta em lo

Chaw kan ei kham veleh Roomah ka chho a,ka thil en tur khan ka rilru a luah a,engmah ka ei tui lo.

Room kawngkhar ka kalh a,khumah ka thu mu a,ka en chak a,ka huphurh bawk.

Ka en zawh meuh chuan ka thinrim nge ka na pawh ka hre lo.A vai mai khan ka lo rinlawk nimahse min den dan a danglam chuang lo, Sawmtluangi pa a thahtir dan te,ka pu nen ro chungchang an buaina te,a tam lutuk..mahse engmah video ni lo in paper chi hrang hrang,Simon-a nihna tifiahtu vek.Voice record a awm nual bawk.Simon-a lah ka hai hauh bawk si lo.Emily nen an inbiakna te,a michhawr hnena tihtur a hrilhna te a ni nual bawk.

“Ruatdik,i nau kha a number ka duh ania” phone a pick veleh ka ti nghal tawng.Engkim a chiang thawkhat,mahse ka duhthu a sam lo.

“Ka rawn thawn ang che,i en thei ta em?” a rawn ti a,ka en thei tih ka hrilh a,thildang engmah ka sawi zui lo.

Reivak loah number min rawn thawn a,call nan chuan tlai ka ti deuh tawh.

Tetea accident atangin ni hnih a liam leh tawh,a harh tha tawh a,mahse che thei chi a la ni lo.ICU atangin an sawn chhuak tawha,Simon-a engmah min hrilh lo in a zin a, Sawmtluangi a thiante huanah dil sah turin an kal bawk.

Sana ka en a,dar 3 ala ri lo deuh,Damdawi inah ka kal hmasa a,Ruatdika mi chhawr nen inhmuh kan tum avangin ka chhuak leh thuai a,Tetea hi biak tlak,duh duh sawipui theih nise ka ti takzet.

“Min lo nghak rei tawh em?” rawn thut ve pahin a rawn ti a,ka hmuh hmasak a a thawmhnaw hak ngai bawk kha a rawn ha leh.

“Ka thleng deuh chiah..eitur i duh em?” ka ti a,a lu a thing ringawt.

“Ka hmuh duh chhan che chu Pendrive ami ho kha a Paper copy i nei em? bakah Simon-a hnenah i thawh thin chuan a chanchin dang pawh i hriat ka ring a” ka ti a,a kut a elh ri khauh a,min chhan a tum lo emaw ka ti hman.

“Ka dah ho kha chu kei chuan ka kawl lo,Emily kutah a tam zawk kha chu a awm ang,chuan Simon-a chanchin chu i hriat duh min zawt mai rawh,sawi mai dawn chuan a tam lutuk” a ti a.Sawi hmasak ber tur ka hre lo.

“Ka pu that tur khan nangmah i kal em?”

“Aih,khasi pakhat a tir a,mahse,a lo inven ve avangin a that ta lo a,khawih chu a khawih nasa viau..Dawmdawiin a awm lai khan midangin an that ta zawk niin ka hria,khalai tak kha ka chiang lo” a ti a,ka bu ringawt.

Thildang ka zawt teuh a,mahse titura a tih chin bak engmah hriat  a nei lemlo,a mimal nun phei chu hriat a nei vak lo.Pawisa tam tham fe ka pe a,ka mamawh phawt chuan engpawh tih a huam tih a sawi tel zauh bawk.

“Min lo hrethiam lawk,ka Motor a chhia a,khilamah khian ka lo chho ve thei angem?” Pa pakhat hian min lo phar a,ka din veleh a sawi nghal mawlh mawlh a,ka hma lamah chuan car pakhat a ding a,a ta anih hmel.

“Um,lo chuang la…” ka ti a,a rawn lut a,ka tlan leh chiah chu car pakhat hian min rawn tlan pel a,ka hmaah tak a ding chawt bawk.Brake ka rap nghek a,ka intauh lo chauh bawk.

“Engthil nge a?” ka phurh pa chuan a ti tuar a,kei erawh ka hlauthawng lutuk  rilru mumal pawh ka pu thei lo.

“I tha em?” Zorina a rawn dak a..Ka beisei lo lutuk.

“Nang maw?” ka ti lawi rat mai.

“Um,ka be tlang thei lo che a,Simon-a…

“ sawi zui lo in a ngawi leh rih a,hlauthawnna a lo lut a,ka khur zui leh nghal titih.

“Eng nge Simon-a?”

“Ok...a na vak lo,khawi,ka lo khalh ang..ka pu,khawngaihin midang lo chang leh mai ta che” a ti nghal zung zung a,hreh hmelzet hian a chhuk a,ka chhuk a,Driver Seatah Zorina a thu lut a,thil thlen dan a rang lutuk a,mumal ka nei thei lo.

“Simon-a a zin sia” ka rilru tihfim tumin Boruak ka hip lut vang vang bawk.

“Nia,an lo haw lamah an che sual a,an be tlang thei lo che a” a ti leh a,tihnat let tum in ka buai a,a accident tih ka hriat takah chuan ka rilru a buai vel vek.

In kan thlen veleh hmanhmawh zetin ka chhuk a,Simon-a hmel ka hmu lo.

“Sangi,khawnge Simon-a?” Sangtei ka au a,Room zawng zawng ka en vek a,Simon-a a awm lo.

“A lo la haw lo...ngatinge?” mak tih hmel deuh hian a ti ha mai.

“Mahse...Zorina khan….” ka hawi kual a,Zorina pawh ka hmu leh chuang lo.

“Tumaw?” a hawi kual ve ringawt.

“Zorina kha...a kal leh tawh mi?”

“Tumah an lo kal hleinem,nangmahin alawm i lo haw” mi a melhin min melh a ni ber.

“Ni lo...aaa….ka hrethiam lo…” Room lam ka pan a.Zorina kha a lo kal ngei alawm..

Room kawngkhar a ri rak a,engchen nge ka mut ka hre lo.Light ka on lo tih pawh ka lo hre leh tawh lo.

“I dam na nge?” Simon-a aw hian a rawn ti a,ka thu chhuak nghal vat bawk.Light a on a,zin haw tih hriat zet hian a pawr fap mai.Vawiin khan call ka tum leh tum loh pawh ka hre tawh lo.

“I accident a ti a” ka ti ringawt.

“Aih, accident nang...mahse,thil pakhat...inthen ang..i u ka hrilh vek tawh a,a lo thleng tep ang…” a fiamthu emaw ka ti zawk.Mahse,a hmelah fiamthu hmel a lang lo.

Ka mumang emaw ka ti a,ka mit ka chhing a,ka men leh pawn angai ang bawkin ka hmaah a lo la ding ta tho.Inthen hi duh ngawih ngawih zawk tur ka ni.Tualthah hmang anih na te,sumdawnna atan amah siam liantu a pu ngei pawh a that bawk a...mahse,amah zawkin inthen a sawi takah chuan min thawng em em lawi si..