BLACK HORSE-28

BLACK HORSE-28

Mumang ang ruaiin ka chhuahsan a,engmah ka thawmhnaw pawh ka keng hek lo.Ka u rawn thlen hmain Gateah ka lo nghak a,Simon-a hmel tak ngul leh hlauhawm zet kha ka mitthlaah a cham a,ka hlau hauh lo.Diktak chuan sawi tur thlawt ka hre lo a,mi a ang maiin ka awm a ni zawk.Ka lo nep thlawt e.

Inah min hruai haw a,Ka nu a tap a,ka pa erawh chuan engmah a sawi lo.Tetea vangin rilru hahna an tuar hnem tawk tawh a,keiin ka belhchhah sak leh ta bawk.

Thlipui na tak a rawn thawk a,awmngaihna hre lo khawpin min nuai a,thawklehkhatah a reh leh nghal hmuk a,thlipui a lo thawk ani tih rin harsa khawpin khua a thiang leh a,ni a sa ut bawk..Mahse,thlipui sulhnu,a thil tihchhiat zozai te avang chuan Thli a tleh tih haider theih a ni lo ang mai hian ka nunah pawh Simon-a thil sawp chhiat leh natna a hnutchhiah te avang hian damni ka nei leh ngai anih pawhin kum tam angai tawh ang.

Ka u in kan inthen chhan min zawt hauh lo,min rawn hruai mawl tawp.Ka rilru nat a hlau pawh a nimahna..

Kan inthen atangin thla a ral leh tam tawh, Christmas a lo thleng a,ka tan awmzia a awm lo,Kum thar pawn ka nunah danglamna a thlen chuang lo,ka dul thanglian zel chuan minung ka ni tih a lantir ve a ni chauh mai.Damdawiin lamah Tetea nen kan hmang dun tam a,Simon-a chanchin engmah hriat ka nei ngai lo.Vawitam Tetea hnenah a thil hriat min hrilh turin ka nawr a,engmah Simon-a chanchin hriat a neih loh thu in a tang kawh tlat,ka zawt chhuak zo dawn chuang lo tih ka hria a,ka zawt zui ta lo.

Kan inthen tirh khan chhuah pawh ka chhuak ngai lo a,Damdawiin leh kan In inkar bak khawiahmah ka kal ngai lo.

Nitin ka nun awmze nei lo in ka hmang liam zel a,Naute hi lo awm hman lo ni se chuan ka chet dan tur ka ngaihtuah ngam lo zawk.Simon-a min tih dan tlawm thlak lutuk te kha tuman min hriatpui lo a,Sangpuii sawi dan chuan mi tupawn Emily vanga inthen angin min ngai vek a,thil awm lo a ni lo.Vantlang hriat a inkawp anni a,khawiah pawh nupa ang maiin an kal dun a,mi sawina an ngaipawimawh hek lo.

“Khawnge i awm?” Ruatdika'n min rawn call a.

“Doctor ka nghak mek,i lo kal ve dawn maw ka ti a?”

“Um,dawn chiang..i hnung lamah” ka hawi kual a,ka hnungah a lo ding a,a phone a lek kang zauh a,a nui var var bawk.

“Lo thu la..” ka bula thutna awl lamah ka thle zauh a,a rawn kal hnai a,mak takin Sawmtluangi nen khan engmah an ni zui ta lo.Ka zawh lah hian ‘ nangmah vangin ka kawp alawm,nangman kawp turin min tih kha” tih zawngin min chhang,a sawi dik miau avangin ngawi hmasa ka ni ziah bawk.

“Nghah rei a la ngai dawn em?” a sana a en zauh a.

“Ka hre lo..i hmanhmawh chuan keimah pawn ka thei vek ania” ka ti a,a lu a thing ringawt.

“Ka tihtur lam chuan a nghak thei a,mahse...hei te hi a lo pian hunah ka ngihsak loh vanga min huat ka duh lo” ka dul a rawn tawk zauh a,ka nui hak mai.

Simon-a nen kan inthen khan nun hian awmzia neiin ka hre lo a,mahse Ruatdika hi ka bulah a awm renga,vawikhatmah ka mamawh laiin a tlanchhe hek lo.A bulah ka tap fo a,Sangpuii lo haw hnuah pawh ka rinchhan chu ani ni lo in Ruatdika tho a ni ta zel.Ka mamawh a nih chuan a hna tulah zin chhuah pawh ngai se a thulh mai zel bawk.Ka tan chuan hlu tak a ni.

Ka sir lehlama thutna awlah chuan mipa pakhat a rawn thu a,ka ngaihven lem lo.Helai hmunah hi chuan an nupui te kalpui in Mipa an lo kal ve ziah a,thilmak a ni lo.Keipawh Ruatdika nen kan kal ziah a,hre ngai lo tan chuan ka pasal a ni ve mai.

“I dam maw?’ ka bula thu chuan a rawn ti a,Ruatdika phone ah mi a biak avangin a kalsawn lai a ni a,midang thu ve an awm loh avangin keimah min bia tihna nimai.

“Keimah maw?” mawl hmel zet hian ka ti hu a,a nui ringawt.A hmain ka hmuh awm ka la hre ngai lo.

“Um,nangmah…”a tawngkam bung zet chuan Simon-a min hriatchhuah tir zawk bawk.

“Ka hria che em?” ka polite lo tih ka hria,mahse,ka hre tlat lo.

“Ka hre lo..Hre maithei…” a ti leh sup a,ka ngaihtuah ngial pawn ka hriatna awm ka hrechhuak zo lo.

“Sorry,ka hre lo tlat che..” ka ti a,ka hriat loh vanga pawiti hmel pawh a pu chuang lo.

“A ho em mai,engtik nge i neih dawn?”

“Thla thar tawp lam a nih hmel,i nupui i kalpui anih ka ring ngawt a..?” ka ti a,a thle buk a,a awmdan engkim mai chuan Simon-a min hriatchhuah tir lo thei lo.

Kan inthen hnu khan vawikhat min rawn biak a tum a,mahse ka be duh lo.Damdawiinah a lo kal leh a,chutah pawh chuan Coffee in ka lo leih leh bawk anih kha..Khata tang khan ka hmu ngai ta lo a,a chanchin engmah hriat ka nei hek lo.Ka hriat zawng chu ka haw em em tih zawng animai.

“Ni lo e,in Doctor hi ka nghak zawk a” a ti a,a then suk bawk.

“Aw,anih chu” inbiak zui ka chak lem lo tih ka awmdanah ka ti lang zauh bawk.

“I pasal ami?” ka be chak lo tih a hre ngei ang,mahse a ngaipawimawh hauh lo.

'Ni lo e”

“Sorry…” a ti sup a,a nui huk bawk.A thilsawi leh a awmdan chu lei leh van ang vel a ni.

Ruatdika a rawn let a,ka sira mi pawn min be ta lo.Ka mitsirin ka en leh zauh thin a,a phone lam chauh ngaihven nimai hian ka hria.Hmuh tawhna neia ka lo in ngai  kha Simon-a nen an khawsa zia a in an vang a ni ngei ang,a lian ve tho a,a hmel a nelawm lo hle tih mai loh chu in anna pakhatmah an nei hauh lo.

“Simon-a case chungchang kha...rin aiin a khirh leh ta tlat a” a ti a,a thinrim anih hmel.Ka dem hauh lo,kan inthen hnu lawk khan Simon-a sumdawnna a fel hlel awm ni a a hriat te FIR a thehlut a,mahse,beisei ang he hu in engmah a kal ta tlat lo.Fiahna tha tawk a nei chung pawhin a beisei angin engmah  a kal chuang lo.

“Engtia tih chi nge?” ka ti a,man se ka tih rualin man lo se ka ti tho bawk.A tana tha tur ka ngaihtuah vang ni lo in ka naute pa a ni a,apa in Jailah hun a hmang tih hre chunga a seilen ka duh lo.

“Ka hrethiam rih lo,Simon-a ber hmuh tur a awm lo hi a buaithlak anih hi..” a ti nghut a,engmah ka sawi lo..A chanchin sawi pawh ka duh lo.

Ka hma a lut a rawn chhuak a,ka lut zui ve nghal a..engmah harsatna ka nei lem lo.Ka naupai tan tirh khan rilru hahna ka tuar nasa lutuk a,mu leh mal nei mang lo in thla ka hmang liam a,mahse,a tlai lutuk hmain ka harhchhuak ta hlauh.Doctor ka hmu a,rilru hahdam ka mamawh avangin Simon-a chanchin ka hriat theih na zawng zawng ka chhu chat vek.Ruatdika’n amah man tir tura hma a lakna pawh min hrilh hmasak berah hriat ka mamawh lo a,engtin pawh ti se ka pawm tih ka hrilh a,min hrilh nawn ta lo.

“I tha vek e...thil pakhat...Simon-a chanchin i hre ngai em?” ati a,ka chil ka lem khawlh mai.Vawikhatmah Simon-a chanchin min la zawt ngai lo a,an inhria tih pawh ka lo hre lo a,hresa ngat ila chuan ka Doctor ka thlak ngei ang.

“Hre lem lo” ka ti nghat a,vawiin chu duh aiin a chungchang ka hre hnem a,ka ngaihtuah na a luah tam bawk.

“A hma khan ka lo hrilh lem lo che a,Simon-a hi ka pasal nen Cousin an ni a..” nuam ti vak lo hmel a pu a,pawn a ka hmuh kha ka hrechhuak a,khapa kha a ni ngei ang.

“Anih tak chu...ka kal phawt ang” ka ti a,ka tho a.

“I rilru ka tih nawm loh chuan ka tihpalh aw..mahse,i hriat leh hriat loh ka hre lo a,Simon-a hi a na viau ania” ati leh sap a,ka pen lai ka tawp chat mai.

“Ka ngaipawimawh lem lo e,a pawi ka ti khawp mai” ka ti nghat a,za lo zet hian a then ve mai bawk.

Ruatdika a tawng deuh reng a,mahse a sawi pawh ka hre mumal chuang lo.Simon-a ngaihtuah loh ka tum pawn ka hlawhchham thak,eng nge na ang? khawiah nge a awm ang? a chanchin lam reng reng ka hre lo vang vang a,ka hriat leh hmasak ber pawh rilru nuam lo a awmna leh bawk.

“Eng nge i ngaihtuah a?” ka darah a rawn khawih a,muhil harhchhuak hlawl ka ang ber.Kan in kan lo thleng der tawh.

“Eng lem mah,kan va thleng hma ve” ka nui lui sak mai.

“Ahh,i harh chiang meuh lo chu anih kha,Simon-a lam kha i lo ngaihtuah hah ange,a fel duak mai ang” a ti leh a,ka nui leh ringawt.Kum chanve hnuah pawh engmah a la fel lo ania,diktak chuan ani kha zawng keini khin phak rual a ni lo e.

“Teuh lo mai...i lo lut dawn em?”ka ti a,a lu a thing ringawt.

Ka neih hun a hnaih tawh avangin engkim ken maitheih in ka dah fel sa vek a,ka neihchhun leh keima ta liau liau anih dawn avangin a tha thei ang ber ka duh a,ka hmuh phak china a tha thei ang ber vek ka lakhawm a,ka chhungte pawn engmah an sawi lo.

Simon-a nen kan inthen hnu khan mak takin a chhungte lam in vawikhatmah min rawn be lo,diktak chuan tuemaw tal chuan Naute vang tal pawn min rawn biak ka lo beisei ru ve a,mahse,beiseina beidawnthlak a ni ringawt.Tunah phei chuan ka beisei lo satliah pawh a ni lo a,ka ngaihtuahna pawh an chang lo.Ka induhtawkna an tichhe hneh lutuk a,an chhungkua ka lo ngaih thinna te kha chu huatna ah a chang zo tawh.

Khawi atanga lo lut nge pawh ka hriat loh in ka Ac ah pawisa tam tham lutuk a rawn lut a,kan chhui ngial pawn kan hrechhuak zo lo.Ka ac neihna Branch ah ngei cash deposit anih avangin chhui chhuah ngaihna a awm lo.Simon-a anih te ka ring thut thut ,mahse,hetiang ti leh tho tur chuan atthlak lutuka min thehchhuah ka ring si lo.

“Enteh,Simon-a Cousin nen kan inhmu a”Sangpuii'n a ti sap a,nuam ti chiah lo niawm tak hian a che sek bawk.

“Min hrilh kher angai hleinem” ka aw a nem vak lo.

“Um,mahse,i hriat tur thil a awm alawm” ati leh a,ka melh zawk a,a mitmeng fing zet chuan min melh kar mai.

“Ka hriat chi a ni emaw ni lo emaw ka hre duh lo ang tih i hria alawm” ka ti leh a,a hmui a pet zauh a,a rilru a buai anih hmel viau.

“Simon-a hi a na angrenga,a tawngvaiin  a ko nasa thei viau che aniang” he thu bawk chu..kei pawh ka na a,ka rum vawng vawng alawm,ka kalsan fel tawh ni a ka hriat thil hian min tih buai leh ka duh tawh lo.

“Rilru ti nuam lo thei hi hriat ka duh lo ania” ka ti nghat a,a bu ringawt.

“Ka rilru a luah deuh a,Emily nen lah khan an innei leh miah si lo a,chuan, Sawmtluangi lah kha i awm loh hnu lawk khan chin hriat lohin a bo ve daih bawk a” a ti leh a,ka beng hup san mai ka chak,mahse ka ti ta em lo.

“I duh phawt chuan i ngaihven thei a,mahse,min hrilh angai miah lo ania” ka tawngkam a mawi lem lo.

Ka pum a rawn na riai riai a,a reh leh mai ringin ka dawm a,mahse,a na zual ta tlat.

“I nuam lo ami?” min rawn thut hnaih a,ka nau neih hun tura Doctor sawi aiin ni hnihin a la hma zawk.

“Ka pum a nuam lo...ka tai zawk pawh animaithei..” a rawn na leh a,ahma ai khan na tak a ni tawh.

“Lawk...i nu kan ko ang” hmanhmawh zet hian a tlanchhuak a,reivakloah ka nu nen an rawn let leh a,Fa hring tawh chuan ka awmdanah nau ka vei tih a rawn hre chat mai.

Kan buai ta rum rum mai,Nau neihna hmun tur kan lo thlang sa tawh a,ka bulah ka nu leh Sangpuii an thu a,ka thlan in min bual huh hlap tawh.

Darkar 9 tehmeuh ka vei hnuah Mipa ka nei ta hram,a tap ri chu chau zet hian ka ngaithla a,ka mit ka chhinga,lawmthu sawiin ka tawngtai a,ka mittui a rawn luang a,ka bekah a luang thla leh a,hmui lum thar thar hian ka mittui luanna hnu a rawn fawp a,ni e...Vawiin hian a pa anih ang ngeiin a lo kal ve ang chu.

Atthlak zet hian Simon-a ka zawng a,ka hmu hauh lo.Tu nge ka bek a rawn fawp tu kha ni ta ang?,ka vei rei bawk nen ka chau a,ka ngaihtuah zui peih ta lo.Cabinah kan awm a,khuma min dah veleh ka muhil zui nghal a ni mai.

“Naute hi hnute pe la…” ka nu in a ti a,ka hnute a tang a,vanneihthlak zetin hnute tui ka nei tha ta hlauh.

Ka fapa,sam dum hlap mai,naute,ni hnih leka upa la ni mahse a pa a ang dawn tih hai rual a ni lo.Hnute hne chungin ka kut zungtang a chelh ve ran a,ka en ning thei lo.

“Nu,engtik nge kan chhuah theih ang?”

“Karkhat vel kan awm hmel a,ngatinge?”

“Eng ni lo e,ih...ka neih ni khan Simon-a a lo kal em?” ka ti phawng mai..kha hmui lum leh fawh nuam zet kha midang anni hauh lo tih ka chiang.

“Kal ka va hre lo ve,bakah ani pawh a dam lo a,azia leh deuh an tih chauh kha” a ti a,a chanchin khawi atangin nge a hriat ka hre lo.

Damdawiin kan chhuahsan ni in ka pa in a hming phuah na chaweikhawm a lo rawt a,Malsawmzuala...ka lawm chiah lo,mahse,kan thenawm pitar,tar ve tawh tak maiin tawngtaina a ka hmuh a ti miau a,duh loh ngawt theih a ni si lo.Kan ri laih laih reng a,a hlimawm bakah ka rilru kal ding lutuk tur a danglam ve bawk.Vanneihthlak takin a tap mang lo a,zan mut that loh pawh kan nei lem lo.

Bawihtea thla li lai a ni ve tawh,hmanhmawh zetin ka inbual a,a mizia  a thlak a,tah a ching thar a,ka nu leh kan monu hian min lak chhawk hneh viau nangin keima fa a ni a,ka kutah awm tam se ka duh a,reitak thildang ka tihsan ngai meuh lo.

“I phone kha a ri ngun khawp mai” ka nu in a lo ti a,Bawihtea a lo muhil leh hman tawh.

Ka phone ka en a,vawi thum lai min lo call a,number ka neih sa a ni lo a,tu nge anih ka hre lo,vawikhat mai ni lo,vawi thum lai anih avangin ka call back a...A ring tawp thak.Ka call nawn ta lo,a pawimawh anih chuan a lo ti leh mai ang.

Rei vak loah a rawn ri leh a,ka pick a,ka beisei loh zetin Zorina…

“I dam maw?,Naute a tha em?” zangkhai zet hian a rawn ti a,ka hmuh lohna chin pawh ka hre tawh lo.

“Dam e,kan tha..khawnge i awm a?” ka ti let ve a.

“Aizawl ka lo thleng deuh chiah,ka lo kal dawn asin” a rawn ti a,ka hmu khat viau nangin ka hmu chak em ka hre lo.Simon-a nen an tangdun ni a ka hriat atang khan ka lo ngainatna kha a kiam ta tlat anih kha.

“Um,lo kal rawh” ka ti a,phone ka dah veleh ka insehruh teuh mai.

Darkar chanve vel a liam hman awrh ang tihah a lo thleng a,Julie hmuh tel ka inbeisei deuh nangin ka hmu tel ta lo.

“Khawimaw ka lo pawm ang” nui chung hian a ti a,Bawihtea a lo harh leh hman tawh a,a mize thlak zingah hian mut rei loh a tel bawk a,a mu rei ngai mang lo,Zanlam erawh min la tibuai lutuk lo thung.

“A duh che ka ring chiah lo,duh loh a hre ve tawh a” ka ti a,a nui mai.Ruatdika nen hian engtin nge an in an em em theih ka hrethiam hlawl lo.

A rawn ban a,A lo duh ve mai bawk,in tithei fe hian a mithmul a ti sang a,'ka tih reng kha’ tih melh hian min melh bawk

Ka nui ve ringawt.

“A chanchin i hria em?” a ti thut a,ka en vata,a nui hmel kha a bo leh daih tawh.

“Tu?” ka ti tawi tak mai.

“Tu nge ni se i tih a?” a ti ve thung.

“Um,hre ngai lo a,ka hre duh lem lo bawk” ka aw ngaihthlak a nuam fahran lo khawp ang,mahse ngaipawimawh hmel a pu chuang lo.

“Mi tuemaw in thah tumin a bei a, thih pawh a thi teuh khawp mai...mahse,tunah chuan a tha leh tawh viau mai” a ti leh a,Mala’n a thil ken lai a thlauh a,a chharsak leh rih.

“A lawmawm anih chu,i sawi ta bawka thil ka zawt ang che” ka ti a,min chhang lo in min en ringawt,Ka nu in Thingpui a rawn dah a,kan awm danah tihbuai chi kan ni lo tih hria niawm tak hian a let lehnghal daih bawk.

“Min zawt la….” tawng tuma ka ang ziau hman chu ka tawp leh rih a.

“Simon-a nen khan thil engemawah in tang dun a,mahse ka bulah khan Simon-a thil tih te min hrilh leh lawi a,eng nge a awmzia?” ka ti sap a,Simon-a nihna diktak,Tualthah hmang,Pawisa hmuh na tura engmah tih hreh nei lo kha hre tawh tho mahila engvangin nge a lo tanpui ka hre duh tlat.

'Kha chu amah nen sawi dun ula a va tha awm ve?”

“Aih,ani nen chuan sawi dun tur kan nei lo,thil kal daih tawh mahnise ka hre duh tlat” luhlul zetin ka ti leh a.

“Kan tangdun tih engtikah nge i hriat?” min zawt let khauh mai.

“I hotela ka lo kal a,Julie nen in lo awmdun ni khan,i chhuah hlan khan Simon-an a lo call che a,ka pick alawm..chuan,nangpawh kha ka rinna che a chhe ta vek bawk” ka ti ta duah,a chal a tichuar a,hun kal tawh ngaihtuah let a ang viau.

“Thil tamtak chu ka hrilh thei lo che,mahse,ahma a ka hrilh tawh ang bawk che khan Simon-a hian chhan tha tak neiin engkim a ti a,a then che pawh hi nangma tan harsa taka a tih tho ani bawk” ka awih lo lutuk ,ka nui hawk mai.

“Naupang ka ni lo ania,bakah ka ring lo che ka tih kha” ka ti leh nghat a,Mala a tap a,ka lak sak a,a bang ve mai bawk.

“Ka hrethiam che,min rin em em laiin i rinna ka ti chhe ve bawk a,mahse,hei hi chu kei chauh ni lo in i u pawn a hre maithei...chuan,hei hi lo en la...i hrethiam kuar ang,ka lo kal chhan tak a ni bawk a” a ti a,a jacket ipte atangin Envelope a rawn phawrh a,ka hmaa dawhkanah a dah a,a tho zui nghal bawk.

A kal hnuah Roomah Bawihtea mut pahin ka inkalh khum a,Zorina Envelope min pek ,khuma ka dah chu ka en vang vanga,ka ban a,ka hawng ta nge nge..Lehkha fel taka inthlep a ni a,ka ti pharh a,ka meng zau kawk mai..

Ka pa in ram min pek,Simon-an ama hminga a thlak tak kha a lo ni a,mahse,keima hming a ni ta thung,pakhat la awm chu ka en leh a,a hma aiin ka phu nasa zawk.

Simon-a thil neih ho a inziak tlar thla a,engemaw palhin a lo  boral anih chuan avaiin a fapa Malsawmzuala hmingin a dah a,kum a tlin hma chuan keiman ka enkawl ang tih a inziak kalh a,Simon-a hming sign a awm a,hriatpuitu midang pahnih hming sign a awm bawk.