BLACK HORSE (2)

BLACK HORSE - 19

“Ka hua che..”

“Yeap...dik tak chuan min huat hian ka tan a awlsam zawk,ka hman tangkai duh vang che a nei che ni mahila hei leh chen ka Nupui i lo ni tawh a,duh lo tawp che ka ni bik lo...min huat hian ka tan a awlsam zawk” ka beng ka hup ta ngawt.A sawi tam poh leh ka na tam ting animai.

“Ka sawi zawm leh dawn em?” ati leh nghut a,ka lu ka thing ringawt,hetiang em em hian engtin nge ka lo mawl theih?Meng reng chungin nitin min lo bum kual a,ka lo la HMANGAIH hman zui..

“Emily hi eng nge i tan anih?”ka ti chhuak ta nge nge.

“Ka engkim...a dang sawifiahna a awm lo”

“ Ka hria e,tunah chuan i tan eng nge ka nih ka hre tawh a,ka fa hi ka pai tlang dawn,chuan,i neih  zawng zawng chanve hi i nupui ka lo nihna vangin ka hlawhah min pek angai anga,ka fa lo piang tur tan a ni ang” sawi zawm leh mai tur ka hre lo.

“A dang zel..” a ti duh lek..

“I nupui ka lo ni tawh a,a chhan hre tawh mahila ka tan chuan pasal i ni tho.Engvang mahin then che ka tum leh ta lo,mahse Nupui angin min en lo la,kei pawn a hming mai bak chuan Pasalah ka en lo ang che tih ka tiam nghal..Min mamawh miau avangin eng vang mahin min that thei lo bawk ang..Bei let tur che ka ni em ka hre lo a,ka rilru a fim hunah ka bei let dawn che anih chuan ka hrilh ang che.Nang ang lo takin tumah an hnung lamah ka bei ngai lo.Ka rai tih ka hre chauh a,rilru thlamuanna ka duh,chuvangin engemaw chen chu Kan In lamah ka awm ang” by-heart sa sawi ang par par hian ka ti a,keimah pawh mak ka inti zawk.

“Ok...i lakah ka chetdan mawi ka ti bik lo a,dik ka in ti bik hek lo,i sawi zawng zawng bak kha adang pawh i la duh maithei.In ngaihtuah la,min biak peih loh chuan i duh leh paper in min pe mai dawn nia”

“Nia,ka biak peih che ka ring lo.Chuan,thil pakhat..Mipa tupawh,in nghahna tur ka zawnga ka lo hmu ta anih pawhin min sawisel lo la ka duh,nang pawn i nunah Emily i nei ang bawk hian keipawn ka engkim ni tur ka duh ve tho..In sawisel lo ang”

Min chhang lo in hmalam a en run a,min chhang dawn lo emaw ka tih hnuah muangchangin min rawn en a.

“A tha alawm,bul ka tan tawh a,a tawp pawh ka thleng ang chu..Mahse,tuman kan nupa karah Mipa dang a lo tla zep tih an hriat ka duh lo.An hria anih chuan i duh i sawi zawng zawng kha a bo vek ang.I ram i pa pek che pawh kha i chan hlen ang” min vau niin ka hria,mahse ka ngaipawimawh lo.

“A fair lo hle mai.Nangin i duh i kawp thei a,kum hnih chhung min lo hman tangkai tawh vang ngawt pawh khan engkim hi ka phu ve in ka hria.Zanin chu I inah ka riak ang.Naktuk atangin ka peih chen chen ka nu te bulah ka awm ang” ka ti leh a,Kum hnih chhung tehmeuh ka pasal a lo ni tawh a,ka pasal anih hma pawn ka Bialpa niin ka lo hre lawk tawh bawk.

“Nang ang lo takin midang fa ka neihpui ve hleinem”

“Midang fa a ni hauh lo.Mahse,i duh loh chuan pa nihna i nei hauh lo ang.I tel lo pawn ka enkawl thei em em ang”

“Ok..a tha lawm..Ka fa a ni i tih chuan a ni animai..I bulah ka mu a,nuam ti takin Sex pawh kan hmang alawm” ka thinrim zual sauh.Mahse engatanmah min ngai lo tu bulah ka thinrimna tih lan tul ka ti lo.

A vaiin a lem a lo ni vek a,ka ta emaw ka tihlai khan lem a lo chang mai mai bawk.Ka pasal ni lo in hmelhriat loh niin ka hre tawh zawk.Ni e,Hmelhriat loh..Ka lo hre ngai reng reng lo.Lo hria ila chuan hetiang hian ka awm lo ang.Mahse,ka indem pumhlum thak ve lo thung.Engkim mai kha a lem niin ka hre lo ve tlat.Ka hriat lohna tak kha min lo bumna leh lemchan a thiamzia lanna a ni leh lawi si..

In kan thlen veleh Kitchen lam atanga eitur rim rawn chhuak chuan ka hnar a verh zar mai.Engmah mumal in ka la ei lo.

“Nu,chaw i ei tawh em?” Ka nu lo chhuak mek chu Simon-an a lo ti a,a lu a thing ringawt.Min la en chuang lo reng reng.Mahse ka dem lo.Nu tan chuan an fa te hmaia chil chhak tu chu hmuh a chakawm fahran lo ang.

‘Sangte,chaw kan lo ei ang..chuan,Nu...Hmingthani hi a rai a” chawhmeh tui leh tui loh sawi ang maia awlsam hian a ti liam puat a,Ka nu hmel danglam nghal vek chu rei lo mahse ka hmu hman tho.

“Ehe...a va lawmawm ve” a hmelah lawmna pakhatmah lang chuang lo hian a ti halh a,a fapa ang chiah.Kei hi engvanga a fapa hian min nei nge anih a hria a ni ngei ang.

“Nia...Vawiinah kan hre chauh a”Simon-a bawkin a ti awlsam leh mai.

“Thla engzat nge ni a?”

“Thla khat vel chiah a ni ang”ka ti a,Sangtei’n chawei an peih tih a rawn sawi a,Ka nu kalsan na remchang ka hmuh takah chuan ka thaw huai mai.

Ka riltam tehlul nen engmah ka ei leh hleithei chuang hauh lo.Simon-a erawh chuan engahmah ngai lo niawm tak hiana ei mawlh mawlh thung.Mihring ni lo in Ramsa..Ramsa ah pawh Sakawr ang mai..Midang ngaihtuahna nei miah lo.Amah a puar chuan a duhtawk reng tih a chiang.

Ka eikham veleh Roomah ka lut chho a,kum hnih zet nau ka pai loh hnuah ka rai ve ta chenga lawm ka la hlawh hauh lo zui.Simon-a lah khan a fa a ni lo a ti a,mahse a hnu kha chuan a pawm leh lawi tih a chiang.Simon-a khan a lawm lo anih pawhin Ka nu tal kha chuan lawm tur a ni asin.

Simon-a Roomah a rawn lut a,a hmelah chuan a hma lawkah khan nasa takin kan inhau tih engmah ngaiven leh hre hmel pawh a pu leh tawh chuang lo.

“Ngatinge min en reng a?” min rawn en a.

“Tu nge i nih ka ngaihtuah a..” ka ti tha ve mai.

“ Min hre na nge?” ngeiawm zet hian a nui huk mai.

“Hre lo..tu nge i nih?”

“Simon-a,i pasal..” a ner nawk bawk.Engtin nge ka lo hmangaih theih zawk???

“Pasal lem…”

“Ahhh….pasal tak mawle,a vai khan nuam lo ka ti hran lo ka tih kha”ngeiawm zet hian a ti a,a thawmhnaw hak lai a phelh a,a Boxer a phelh tel vek bawk.Vawitam tak thawmhnaw inbel lo in ka hmu tawh a,ka tan thilthar a ni hek lo.Mahse,tun tum chu a danglam ta.Ka hawisawn a,nawmna min thlen zo zai te avang ngawt pawh khan he Taksa lian leh nalh thlurh,in fit zet hi ka theihnghilh leh tawh ngai lo ang tih ka chiang.Ka tan chuan a hmasa ber a ni a,a tawp ber pawh a ni ngei ang tih ka hre tel bawk.

“Room hi ka hman tawm tho che angai ang.Sawmtluangi a lo haw dawn a”a ti leh nghut a.Chhan enah pawh ka en lo.Zanin bak chu kan In lamah ka awm tawh dawn tho a,a duh leh hmang se duh loh leh hmang lo se buaina ka nei lo.

Ka chhan buai ngai lo in ka Phone a ri ta hlauh.Lawm ru zet hian ka en a,Sangpuii a lo ni a,ka thaw huai mai.

“Hello...Thiannu..”zangkhai thei ang ber hian ka ti a.Ka mit sirin Simona Bathroom pan chu ka va hmu a.

“Ruatdika chanchin i hria em?”

“Hre nang...Hriat tur a awm ami?”

“Hriati boral hnu khan zu a in nasa lutuk an ti a,a che ho viau aniang.Naktuk tlai chu Dineout ang u..Zilh deuh ang..” a rawn ti duah.

Ruatdika ka hmu khat takzet,eng nge a tih thin leh a la tuar na zel em tih ka ngaihven lo.Hriati thihna ah khan mawh a phur tlata ka hriat avangin ka chhungril hian a hlat deuh tlat.Mahse,Ruatdika ni lo in Simon-a zawkin a lo khawih reng a,vawiin khan a sawi ngei kha..Mi tenawm..Ramhuai a ni tawp mai.

“A va zia lo ve..biak chi a ni em?”

“Aaah,ka hre nang...i duh leh bia la..naktuk chu?” a rawn ti leh a.

“Mo i nih kha,chhuahna tur hre viau suh” a nui ar ar mai.

“Ho em mai,kan pa pawh a tel dawn tho a.Simon-a pawh lo hrilh la…” ka mit ka chhing a,Pasal tak tak mawhphurhna ka lo pe hnem tawk tawh,pek belh leh a tul hauh lo.

“A hman ka ring lo..ka lo kal ang..eee,thil…” hrilh loh mai tha ka ti leh ta zawk.Ka pai puitling dawn em pawh ka hre si lo.

“Eng nge thil chu?”

“Engmah,naktukah ka hrilh ang che” ka ti ta zawk.Hrilh tak tak tumna erawh ka nei hauh lo.

Simon-a inbual zo chu Towel nen chauh a lo chhuak leh a,en loh hram ka duh,amah ka ngaihna la chambang zawng zawng hi reh vat vat se ka ti ber.Khua a vawt tan tawh viau nangin AC kan on a,a nuam tawk viau mai.

Sofaah khan i mu thei mai ang chu maw?” amah en lo in Tv lam ka en a.

“Ka hreh hauh lo,mahse Khum a awm reng a,Sofa lama mut chu ka lo tum miah lo”

“A tha lawm,zanin bak hetah ka awm dawn chuang lo a,Sofaah chuan ka lo mu mai ang” ka ti hmak a.Ka rin ang chiahin hnialna a awm lo.

“Hriati kha ngatinge i thah kher a?” inbe lo a reife kan awm hnuah ka ti ta nge nge.Engmah zawh loh ka tum hle nangin min tur nasa lutuk.

“Ka that lo..” bung zet hian a ti hluk ringawt.Ka nui hak thung.

“I sawi chian hle kha...engpawh nise kha chu Ruatdika kutah ka dah e.A la zawngchhuak ngei ang..” ngeiawm fe hian ka ti hmak a.

“Ka beisei pui e” a hmusit tih a tawngdanah a lang chiang viau.

“Mi engzat nge i thah tawh?”

“Hmingthansang….” ati tuar a,ka phu nasa kher bawk.Vawikhatmah ka hming pumin min la ko ngai lo.

“Min ti phu alawm mawle” ngaipawimawh lo lui fe hian ka ti nghat a,ka la en chuang lo.

Khum a che laih a,Dunlop chhah zet chu a hniam sat bawk.Khumah a rawn thu tih ka hria,mahse ka la hawi let duh chuang lo.

“Min en rawh” tih pahin ka darah a rawn vuan a,rang zet hian ka tawlhsawn ve thung.Mahse,min rawn man bet leh a.

“Min khawih miah suh.Sik pawh min si suh.Chuti anih loh chuan Hmeichhia hi tunlaiah an humhalh nasa ania”

“Sorry...mahse thil pakhat..Tumah ka that lo,ka sual a ka tenawm viau pawh animathei..mahse tumah ka that lo..” ka rin loh tawpin a aw a dam thluam a,na tuar a ang phian bawk.

“A tha anih chu..” ka chhungrila khawngaihna rawn lang leh tur chu duh lo in thildang ngaihtuah ka tum a.Mahse hetiang hian a la awm ngai lo.Oh...Lemchan dan thar a ni ngei ang.

“Ka pa boral hian ka la naupang..mahse,an that lai kha ka hmu a,tunthleng hian ka mitthlaah a la cham asin..” ka vawikhat hriatna..ka thu khawng lah mai.

“Pawi ka tih pui hle mai che..” ka ti sep ringawt.

“Pa neih loh rapthlak zia te,ka nau te zawng zawng enkawlna tura ka thawhna te..avai hian mi pakhat duham na vanga thleng ani a sin..” a ti leh sup a.

“Ka hriat a tul kher hleinem...hahdam tak khan awm rawh..Engkim i neih tawh hi” ka ti dam thlap mai.Ka haw ngei a,mahse a chhungril natna te hmu tur hian ka hrechiang hman em atin ni.

“Nia,ka la hahdam ang chu..i hriat hauh loh a ka nupui i nih vanga ka tan i tih tam zia hi mak i ti zawk ang.Engtik niah emaw chuan tu nge ka nih chiah i la hria ang.Chumi hunah erawh i zah na ka thlen loh hram ka beisei ang..” ati leh duah a,chhan enah ka en ta lo.

“Thil pakhat ka hrilh che kha,tumah ka that lo.Ka pawisawi te chu an mahni an intihlum mai zel zawk..” a nui hawk a,Simon-a ngai bawk kha a ni leh ta.

Ka beisei loh zetin Sofaah a mu ta hlauh,muhil thei lo in ka mu meng kar mai.Hmeichhe pangngai ka ni a,mi min hmuh danah chuan mi pangngai chunglam pawh ka ni hial maithei.Mahse,ka va han chak lo in ka va han tlaw tak.Keimah ngei pawh hian ka awmdan leh thil thleng hi ka ring zo lo hial mai.

Pasal neih hma kha chuan Pasal zurui reng nei te leh an Pasal ten ngaihzawng a neihsan reng te ka hmuh khan engvangin nge an then mai loh ka ti thin a,an dawihzep ka ti ru thin em em bawk.Huaisenna an nei lo ni khan ka hre ru tlat zel bawk.Mahse,han neih ve chiah hian a lo nih loh zia leh Pasal neih hma a kan huaisen ang ngawt kha a lo nih loh zia ka hrechiang ta chiah.Simon-a min tih dan zawng zawng te ka ngaihtuah a,lawmna tur a awm lo.Haw ngawih ngawih mai tur ka ni.Huat pawh ka hua a,nat lah ka na nasa ngiang mai.Mahse,then ka duh na leh duh lohna a la inzat ta fo...Midang nep ka tih thin te pheikhawkka bun ve ta chiah a..an dinhmun ka hrethiam ta chiah bawk.

Ka beisei loh zetin ka ngaihtuahna kawm in ka muhil ta hlauh.Ka harh leh chuan khua a lo eng uar tawh.A vawt vur mai.Nizan ka mut dawn khan Ac a la in On veka,tunah chuan a in Off ta thung.Current a awm lo anih loh chuan Simon-an a off a ni ngei ang.

“Good Morning’ ka thu chhuak chiah chu Simon-an a lo ti a,chhan enah pawh ka en lo.A Walk zo tawh tih a dressah ka hre thei mai.

‘Vawiin kha ka haw phei ang chu ka ti a,ka nu i lo hrilh mai dawn mi?”

“Eng vangin?” nelawm lo zet hian a ti hmuk thung.

“Nizanah ka sawi tawh kha..” ka ti ve thung. kan inchhang tawk viau e.

“Phalna ka pek che ka va hre lo ve..” ka va han ngei tak.

“Chawhnu lamah ka kal ang” ka puan ka theh hlim a,Ka tho chiah chu ka luak chhuakin min rawn hnawh up up a,ka inring hman lo.Ka uak pawp a,Bathroom ka pan nghal rawk rawk mai.

Ka luak thei lo,mahse ka luak chhuakin min hnawh tho si..ka uak nasa lutuk a ka chau hnawk mai..Bathroom chhuatah ka thu sawp a,bang ka ngheng a ka thaw hle hle mai.

“I tha em?” Simon-a aw hian a rawn ti a,kawngka a rawn kik bawk.

“Ka tha e..ka lo chhuak ang” ka sawi zawh rualin ka uak leh nghal vak bawk.

“Lo hawng teh” kawngkhar a rawn chum a,ka che chuang lo.

“Hon...hawng teh” min koh dan tehhrep pawh chu..

Reife hnuah ka chhuak ta chauh,Kawngkhar bulah a lo ding a,min ngaihtuah hmel a pu bawk.

“I tha em?”

“Khati khan min ngaihtuah vel lo teh” ka ti hmak thung.

“I that leh that loh ka hre duh mai ania” ati hluk a,chhang lo in ka thawmhnaw dahna ka hawng a,ka thawmhnaw ka la chhuak a,engchen nge ka awm dawn ka hre lo.Ken tlem lutuk pawh a dik chuang lo.

“Khati chung kha chuan khawiahmah i kal dawn lo” ka thawmhnaw dah chhuah ho chu min rawn laksak a.Ka thlah ve mai.A dang ala tam em mai,a dang ka keng mai ang.

Darkar khat a liam leh meuh chuan kan Inah ka awm vang tawh.Ka nu lah a lo lawm phian zui.Simon-a a haw lehnghal a,keimah a kal ka tum teh nangin min thla a tum lui tlat.Ka hnial zo lo.Kal ka duh anih chuan hnial viau ai chuan a thu anga awm mai kha atha ber.

Ka rai tih a hriat lah chuan ka nu a lawm em em mai bawk,.Hahthlak hian..Tlai lam dar nga velah kan inhmuhkhawmna tur ka pan a,Ka car nen thlap Simon-an min thlah a,kal chhuah ka duh pawn buaina a awm lo.Pasal tha leh Makpa tha ber anga khawsak kha lemchan a ni tel miau a,a ti tha kher bawk.

An lo thu thap tawh,Ruatdika ka hmuh rualin Hriati bawk ka mitthla ah a lo lang a,ka hua nge ka khawngaih ka hre lo.A tih a nilo tih hre reng mahila ka ngaidam hleithei meuh lo.

“I lo thleng maw?” Sangpui’n a lo ti thuai a,Ruatdika erawh chuan min be lo in min en ringawt.

“In va hma ve..Ruatdik,i tha em?” ka ti a,min chhang lo in a bu ringawt.

“Enteh...Simon-a saw,a hman lo i ti bawk sia” ka beng bulah Sangpuii’n a rawn ti sep a,a en na lam ka en thuai a,kan piaha Cabin kawngkhawr inhawng chu ka en a,Simon-a ka va hmu a,min hmu ve lo anih hmel.

“Meeting an nei alawm” ka ti ta ngawt.Min hmuh ka duh loh vangin ka hawisawn leh daih bawk.

“Ni dawn tak,Emily nen hian an thawk dun tiraw?” a ti leh a,Emily Cabin lam pan chu ka va hmu a,a luta an khar zui hmak bawk.

BLACK HORSE - 20

Ka hrawk a ro halh mai.Helaiah  hian engvangin nge a lo kal kher tih ka ngaihtuah a.Hotel dang leh Restaurant dang tamtak a awm a,helai hmun ber kherah hian ka hmuh ka beisei lo.Kan kal dawn tih ka hrilh bik hek lo.

“Emily law lut kha?” Ruatdika’n a rawn ti a,ka bu ringawt.A mitmeng fim zet chuan min melh kar mai.

“Nge min en reng a..?” ka nui lui hak bawk.

“Ka khawngaih che..” a nui hauh lo.A rilru lam a chiang lo emaw ka ti hman.Min khawngaih chhan tur ka hre lo lui tlat.

“Engvangin maw??” ka ti ta tho.

“I hmuh ve reng kha..” Cabin lamah a thle buk bawk.

“Ha...ka pasal a meeting vang ngawt chuan maw?” ka ti a,ka nui lui leh hak bawk.

“Engmah i hriat lohna tak hi alawm ka khawngaihna che” a la ti ta fo..Ka hre lutuk tih khum nghek ka chak.

“Ruatdik...Khawngaihin..” Sangpuii’n a ti sep a,a dar a ti sang uk a,a ngawi zui ve mai bawk.

Kan chawei chhung zawng Sangpuii a tawng deuh renga,a khat tawkin ka zawm ve chauh.Ruatdika zu Inhnem zia lah chu pui tak a ni.

“Hmingthan,Motor i rawn keng em?” Sangpuii pasalin a ti a,ka bu ringawt.

“Min drop ang che,Motor ka khalh peih lo”Ruatdika thle bawk bawk chu ka en a,hetiang hi a ni ngai teuh si lo.Mipa smart tak leh mahni in enkawl zo tak.Hmeichhe tan pawh in nghahna tlak kha a ni thin ania.Heti taka Hriati boralna in a khawih hi hmuh nuam ka ti hlawl lo.Ka chhungrila ka lo huat rukna te kha chu a kiang duak tawh.

“I motor engtin nge ni ang?” ka drop hreh vang ni lo in ka ti a,Beer can a ban leh chu ka lak khalh a.

“Min pe teh..” buh zet hian a ti a,pek ka tum chuang lo.

“I inhnem tawh lutuk”tih pahin ka dah sawn a,la it hmel zet hian a en tawk tawk tho.Khawgaihthlak hian a…

“Ka haw duh..” a ding hluai a,mahse a din chhuah fel hmain a thu thla leh hnawk bawk.

Sangpuii pasal a tho thuai a,a zakah a dawm a..Ka tho ve vat bawk.

“Ehe!!!.Hon..hetah in kal dawn tih ka hre miah lo” Simon-a aw hian ka hnung lam atangin a rawn ti a.

Ka hawi let a,Simon-a leh Emily an lo ding dun a,chhang lo in ka melh ran mai.

“Nang Ramhuai sual…Ruatdika a rawn che thut a,a nghet bawk si lo nen Dawhkan a bawh a,a chunga thilawm an tla nghal rum rum bawk.Sangpuii pasalin a chelh leh vat a,vawn beh tumin ka che ve phat bawk.Mahse ka tlai hret,ka bek a ri chawrh a,ka mit a thim salh a.Arsi ka hmu cham cham bawk.

“Engthil nge maw i tih?” Simon-an a ti tuar a,kei erawh ka bul hnaia Chairah ka thu hnawk a ka bek ka dawm vang vang mai.Sangpuii a rawn thu hnai nghal thuai a,ka bek na lai a rawn dawm ve a,eng nge thleng pawh ka hre hman lo.A rang teh thut lutuk.

“Hmingthan...nangmah tihnat che ka tum lo ania..” Ruatdik’an a ti tham tuak a,Simon-a hnek tumin keimah zawk min hnek fuh anih hmel e.

“I na em?” Simon-a a rawn thu hniam a,ka biang rawn khawih a tum chu ka thle sawn daih.

Midang an rawn tlan khawma,Ruatdika lah mumal nei miah lo in a rak a,mahse a rui em mai a tihngaihna a awm lo.An man bet a,pawnah an nawr chhuak a..Ka hamhaih vek.Hetiang khawp hian mihring hian nun a lo thlak theih tih ka hre ngai lo.

Sangpui’n min vuan a,Simon-an min kaihthawh tum in a kut a rawn dah hnai a,mahse ka hai der lui tlat thung.Ka tho a ka bag ka la a,midang te tan hmuhnawm kan siam nasat zia ka ngaihtuah a,ka rilru a bing vek.

“Khawge i kal dawn?” Simon-a bawk.

Ka ding a,ka hawi let a,”Ka haw dawn mawle”

“Sawtah sawn i Car a awm a,khalamah ni lo in..” ka kal na lo lam a kawk zauh a,nidawn tak...Engatinge mawl leh chhaw tak hian ka khawsak teivet ni??!!!

“Ka hria..rei lo te awm hahdam ka tum mai zawk,enteh...ngaihtuah der chiam ka ngai lo ania..saw..i engkim a lo kal” ka nui lui hak mai…

“Ka engkim...Hreptak hian…’a ti hluk a,ka ngaipawimawh lo.Emily a rawn thleng chawpchilh nghal titih bawk.

“I tha em?” Simon-a bulah a ding a,ka luak a ti chhuak hluah hluah.

“Um,tha lutuk..nang zawk?” pangngai tak hian ka ti dam thlap mai.

“Tha lawm,Naute a tha em?” ati leh a,Simon-a ka melh zawk a,hriatthiam har zet hian min melh ngur ringawt.

“Um,tha animai…” ka ti sep a,Sangpuii a rawn kal hnai a,kan thusawi a rawn hre hman lo chiah thung.

“Kal ila...Simon...a zialo hle mai,tunlai chu Ruatdika hi a buai riau a” ati nghal mawlh mawlh a,kan boruak tang zet chu hreawm pawn a awm lo.

“Anih kha…”a ti hmuk ringawt.Vawikhatmah ka lak atangin a mit a la sawn eih lo.

“Kal ila…”Sangpuii bawkin a ti leh a.

“Kan kal san dawn che u,kan tibuai ta nek bawk si che u a” ka ti leh a.Emily hmel buai nak mai chu ka en a,ka nui lui sang bawk.

“Sangpui,Emy hi in rualin haw ve se a pawi em?” ka pen tawh.Mahse a thu rawn sawi chuan min ti ding dat mai

“Oh...Hmingthani rualin ania ka haw dawn” Sangpui’n a ti a.

“In pa a kal tawh mi? Hmingthani hi Motor khalh lo turin ka duha,anih chuan kan rualin haw mai rawh u.Ka Motor chu nakinah ka Driverin a lo la mai ang..khawnge chahbi?” tih pahin min rawn hnaih a.A a ta emaw ka ti hial.

“Ka khalh thei…” ka tum aiin ka aw a chang hret.

“Keimahin ka haw thei reng a,min ngaihtuah suh u..”Emily-in a rawn ti ve ta thung.

“Ni lo e,in kal dun a,haw pawh in haw dun ang chu...Ngaihtuah ka ngai lo.Motor te chu ka khalh rei tawh em mai” zangkhai fe hian ka ti a..Simon-a tawng tum ang zuau tawh chu a chip leh hmuk bawk.

'Ok,a tha lawm” a ti hmuk a,a inher a a kal zui nghal  nal nal..A rawn hawi let eih lo.

Thawveng hawk awm tak ka thawpik zual sauh,a awmdan engkim kha lemchan ah chuan a tak mah mah.Mahse,Emily ka hmuh rual khan ka chhungril a na lutuk,ka duhna leh ka Hmangaihna ai chuan ka huatna a tam rih zawk.Ruatdika sawi tum pawh kha ka hai miah lo.Diktak chuan Simon-a leh Emily inkawp reng vanga min nuihzat a ni tih ka hai hek lo.

“Engtik nge min hrilh dawn?”reife ngawirenga kan chuan dun hnuah Sangpui’n a ti hmak a.Ka melh zawk a,hmalam ka en san lehnghal mai.

“Engmaw?”

“I nau pai kha”

“Ahhh….engtin nge i hriat a?” ka zawhna mawl zia ka ngaihtuah a,a thinrim zual sauh ang tih ka chiang.

“In sawi kha ka hria,mahse ka hre lo ah ka ngai mai ang” ati leh hmak a,ka dem hauh lo.Mahse ka awmdan buai nuaih leh Simon-a nen kan boruak avang khan hrilh loh mai ka thlang ta kha ania.Engtikah emaw chuan a hriatchhuah tho ring mahila ka duh ai chuan a rang mah mah.

“Chulam a ni lo.A la chiang lo em a..” ka ti ta ngawt,a thaw hak mai.

“Emily kha chuan a hria a,keiin ka hre lo thung.Emily hi i tan a lo pawimawh viau tih ka lo hre hleinem” a ti leh duaha,min tihel nan a sawi tih ka hria.

“Loh theih loh in Simon-a nen kan sawi a,a lo hria alawm..Niminah ka hre chauh a,engtin nge ka hrilh loh theih ang che?” ka ti dam thlap mai.Tih thinrim belh ka duh lo.

“Anih tak chu.In nupa kar hi i sawi duh hauh lo nangin ka hre ve teuh a sin,kei lo pawn an sawi sep sep reng tho.Simon-a leh Emily hi sawi an kai nasa tih pawh i hriat ka ring,engtikah emaw chuan min la hrilh tho ka rin vangin ka sawi lo a,ka zawt lo bawk che.Mahse,i danglam nasa tih erawh ka pawm thlap”

Sawi ve mai tur hre lo in ka ngawi ran mai.A sawi dik vek.Ka thiannu tak tak a ni a,mahse chutichung chuan alakah zep ka ngah lutuk.Sawi chhuak ila ka thawl hawk maithei.Mahse,Simon-a demna midang hnenah ka sawi ngawt thei lo.A chhe ber thleng ta se...Ngaihtuah pawh ka duh lo e.

Sangpuii an in thleng ka thlah a,Sana ka en a,a la tlai vak lo.Reilote mahni in awm ila,duh tawkin au bawk ila...ka thawpik lutuk hi ka au chhuak vek thei mahna le.

Kan inlamah kal lo in ka tlan tlanga,khawi laiah nge ka kal ang pawh ka hre chuang lo.Ka hmalam ka pan tawp a ni ber.

Ka Phone a rawn ri a,kawngsirah Motorah ka din tir a,ka en a..Ka nu...min ngaihtuah deuh a ni ngei ang.

“Aw,nu..” hello pawh ka ti lo.

“I lo haw dawn tawh em?” a rawn ti a,'Aw’ tih ka tum zet a,ka thulh leh.Ka rilruah thildang a awm ta tlat.

'Nu,zanin chu ka lo haw lo mai ang,kan In lamah ka riak leh lawk si dawn” ka ti a,a thaw hak mai.

“Mahse,hetah Simon-a a awm daih bawk sia” LALPA leh...engemaw a hriat hrep ni??

“Ok,a that chu..Inah ka haw tih lo hrilh mai rawh,ka haw dawn tih ka hrilh lo a” ka ti ta zawk,thinrimna ka ti lang ngawt thiang lo.

“Awle.A tha lawm” a rawn ti leh mai.

Inah kal ka tum eih lo.Ka bag ka hai leh ,ka zawn ka  hmuh rualin ka thaw huai mai.Motor ka tinunga,ka turn pawpa,Simon-a farm house lam ka pan ta zawk.Chahbi ka lo la kawl hlauh ka lawmzia chu pui tak a ni.

Ka tlan zel a,a reh thuap mai,Midang tawh tur pawh an awm lo.Kan farm house ka thlen chuan tumah an awm lo tih hriat zet hian a reh thuap a,mahse thla bial tan tawh chuan a chhun eng deuh ruih a,a lang nalh takzet.

Ka chhuk a,Gate ka va hawnga,Motor lam ka pan leh a,zan dang ang nise ka hlau maithei.Mahse tunah chuan mahni a awm ka duh ber rih a,helai aia hmun thlanawm zawk hi a awm hek lo.

Light ka on vek a,kan kal lohna a rei ve ta deuh bawk nen furniture ho an paw deuh thak hlawm.Fridge ka hawng a,eitur chi Engmah a awm lo.Tui Bottle a tlar thap thung.Chaw ka ei tawh tho a,eitur awm lo mahse pawi tihna ka nei lo.

Freezer ka hawng a,vur a lo awm hlauh,ka la chhuak a,ka bek na laiah ka hmehbel nghal a..A zia huai huai mai.

Living Roomah ka thu a,engmah thawm a awm lo.Rannung hram ri chiah chiah bak chu.In ngaihtuah fim ka tum vei nen ka hlawhchham leh ta tho.Mahse,chimbuaitu awm lo a mahni chauha awm erawh nuam ka ti takzet.Midang bulah kha chuan ka thawpik hluah hluah anih kha.

Pawn lam ka pan leh a,Ral leh lam ka thlir a,ka awmna chung lam hretah chuan Aizawl khawpui a pe tuar a,a lang nalh takzet.Kei anga mawl leh bum nuam mihring hi an awm ve angem tih ka ngaihtuah a,an awm ka ring lo.Hmeichhe smart ve tak ka ni emaw ka lo inti a,teuh lo..Kum 3 tal tap min lo bum kual tawh a,engmah ka lo hre miah lo.Sangpuii sawi kha ka ringhlel lo.Mi te chuan Emily leh Simon-a inkawp dan an hria ang.Kei pawn ka hria alawm.Nuam ti taka ka bulah sex a hmang ang kha Emily bulah pawh a hmang anga,ka laka a tih ang zawng zawng te pawh kha a ti vek ang…

Luak chhuak in min rawn hnawh up up a,ka tum loh tawpin ka uak nghal pawp bawk.Phul chungah ka thu thla a,Dai in a ti hnawng chap mai.Mahse ka ngaipawimawh duh chuang lo.

Ka mu ta nge nge,Van thiang kuka Arsi lang tuar chu ka thlir a,an phe neuh neuh a,an mawi takzet.Thi ila Arsi ah chang daih ila tih ka ngaihtuah a,engvangin nge ka dam reng ang??

“Keimah vangin” ka pum chhung atangin zawite hian a rawn ti in ka hria.Rang zet hian ka dul ka dawm a,Ka naute..ni e ka ta bik liau liau..Simon-a khan a fa a ni lo a tih kha.

Engvangin nge Emily kha a hrilh kher? Min nuihzat nan maw???

Ka te chhuak nghek ringawt.A aia ring zawkin ka te leh vak a,ka khuh zui bawrh bawrh mai.Engkim mai hi Emily hnen a thleng nghal zel alawm.Tunah pawh an pahnihin nuam an chen anga ka chanchin sawiin an nui dun mek maithei..Ni lo,Ka nu khan kan In ah a kal a ti tak..Lemchan nan leh Makpa tha tak anih zia tihlan nan a kal kual vel a..Ka nun hlimna te kha a infiamna hmanrua a lo ni a,ka nun infiamna atan a hman man a pek angai.Hriati vang pawn engemaw tal ka tih ngei angai bawk.Ani nawm chen duhna vang leh phuba lak duhna vangin tuman an nunna an chan kher a tul lo.

Engchen nge ka mut ka hre lo.Ka phone ri ka hria,mahse ka en peih lo.Ri vel mai mai tehse,ka nu ka kalna ka hrilh tawh a,midang tumah min be tur an awm lo.A tawpa a rawn ri leh nghal zat..Thinrim zet hian ka en a,ka rin loh lutukin Zorina..Simon-a ka beisei vang nge ka hre lo.Ka ngui zual sauh.

“Hello”

“Khawnge i awm?”

“Ka mu tawh a,ngatinge?”

“Eng ni lo e,naktukah min rawn tlawh hman angem?”

“Engthil nge ni a?”

“I hriat duh chi tur..a pawimawh hmel riau ania” a rawn ti leh a.

“Ok,ka lo tum ang” ka ti a..Eng nge pawimawh ang ka hrethiam lo.

Zorina hian eng nge a hriat chiah? Mak takin kan buaina hi a hria ni a rinna ka nei thut.Mahse,a ni nen hian inzawmna engmah kan nei lo tih ka hrechiang.Simon-a nen leh an in kawmngeih em em bawk si lo.Engpawhnise tunah hi chuan Zorina hi ka in nghahna a ni rih.Ruatdika lah a lak tlak miah lo tih a awmdanah a lang reng bawk.

Khua a rawn vawt zual ta riau..Ka tho a,inchhung ka pan a,ka au nghek nghek na khan tlem chuan min ti ziawm in ka hre bawk.

Kan Room hman thin lam ka pan a,Light ka on a,engkim a ngai vek.Bedsheet phah chawp angai a,Lukham lakchhuah angai bawk.Simon-a nen kan hun hman tawh te ka mitthlaah an lo lang iar iar a,he room hi ka hmang hauh lo ang. Dimtein ka khar leh ta zawk.

Ka phone a rawn ri leh a,ka en vat a,Simon-a….ka pick lo...a tawp a,a rawn ti lehzel..Ka phone ka switch off  ta daih.Engmah sawi dun tur kan neih ka hre hrep lo e.

Ka beisei loh zetin ka muttui ta phian,ka harh leh chuan khua a lo eng iar tawh.Sava thawm a ri nak nak bawk.Khua a vawt vur a,mut nilen mai ka chak zek zek.Mahse,Zorina va hmuh ka ngai.Ka blanket ka tlawh hlima,Boruak vawt chuan min rawn hmet nghal zat bawk.

Kawngkhar ka hawnga,ka beisei loh lutuka Living Room a lo thu ka hmuh takah chuan ka phu nasa lutuk..Ka tum loh tawpin ka te chhuak thawt bawk.

“Morning..” nelawmna nei miah lo hian a ti nghut a,chhan enah pawh ka en lo. Ka melh reng ringawt.

“Eng nge i lo tih dawn?”

“Ka lo kal” teh tawp a..

“Ka hria.Eng nge i lo tih dawn ka ti zawk?” ka khur tih reh tumin ka in control nasa kher bawk.

“Nizan zankhuain ka zawng che a..”

“Mi bo ka ni hleinem..” ka ti ve thung.

“Nia,i bo lo,mahni thu ngeia tlanbo hi chu hmuh an har” ati leh nghut a.

“Ka tlanbo lo,keimaha awm ka duh mai zawk”

“Anih chu...insiam rawh,i nu in a ngaihtuah viau che ania” ati leh nghut a.

Ka phone ka off daih tak e,Ka nu in min ngaihtuah ang tih te chu hriat awm tak..Simon-a ka hmuh rual khan min zawng tak tak emaw ka lo ti hman a,hahthlak hian...

“Ka be mai ang..Chuan,min ngaihven ka ngai lo tih ka hrilh nawn leh ang che.Lemchan hi bansan rawh,ka hne hluah hluah che ania” ka tawng hnem lutuk a ka sawi zawh meuh chuan ka thaw hawk mai.

“Um,min hne nasat poh leh a tha animai..mahse,ka nupui i la ni tlat a,Nau i pai bawk..Ka duh phawt chuan ka ngaihven thei che..Lemchan a ni hek lo”

“I nupui lem zawk..Chuan,thil pakhat leh..Emily hnenah engkim i hrilh thin tih ka hria,mahse a sawi chhuah ziah loh nan fimkhur rawh se” ka ner zui nak bawk.

“Engkim ka hrilha i ngai chu a lawmawm,mahse min hmu nep deuh hret anih chu” ngaipawimawh lo hmel zet hian a ti leh awlsam leh mai.

“A tha anih chu,i khum pawh a tawmpui fo che a,chuan…”

“Duhtawk teh,i ngaihdan sawi khan i chau vek ang. Khatiang rilru hniam kha a pu ve lo ania”

Ka luak a ti chhuak zawk.Engmah keng lo in ka kal a,hawn tur chuang pawh a awm lo.Ngawirengin kan Motor ve ve in kan haw a,keimah min ngaihtuah vanga lo kal emaw ka lo ti leh hman kha mawl ka inti hluah hluah.Eng hi nge maw ka la beisei cheu ni??

Ka nu in min hmuh veleh min hau nghal mial mial mai,”Simon-a hi i pasal ania,i hmu peih lo emaw in inhau anih pawn tiang hian awm loh tur” eng chu a hria nimaw?

“Kan inhau lo,ka hmu peih lo chuang hleinem,eng nge a sawi a?” ka thawmhnaw ka hlip a.

“Engmah a sawi lo,mahse a hmelah ka hmu thei” ka nui hak mai.Lemchan a thiam zia lah a hre hauh si lo.

Tlai lamah ka chhuak leh ta chauh,Ka in entir chhuan lamin Zorina te Hotel ka pan a,ka kal hmain ka call lawk a,ka thlen chuan Gate bulah a lo ding vang tawh.

“Ka rin aiin i lo thleng hma” nui chung hian a lo ti a.

“Nia,vawiin chu kawng a thawl tha khawp mai,Bakah ka hre chak tawh a” ka ti ve a,pawna Security lo awm hnenah chuan Motor chahbi ka pe a,a lo dah fel mai ang tih ka hria.

CCTV roomah bawk min hruai a,”Ka duh zan tak kha ka en thei dawn tihna a ni em?”

“Aih,thu la..”a ti a,Mouse a ban a,a khawih nghal mawlh mawlh bawk.

“Hei hi i duh ni hma chiah kha a ni a,Sawmtluangi lo thlen lai kha.Chuan,Hotelah Sawmtluangi leh i Pasal an inhmu a…”sawi zawm mawlh mawlh mahse engmah a sawi ka hre tawh lo.

Khatih lai khan Simon-a a zin tlat atin ni...Nge a lo zin miah lo zawk???!!

BLACK HORSE - 21

“ I hre sual a ni lo maw?” harsa zet hian ka ti chhuak thei hram.Min rawn en a,”a eng ber chu?” a ti a,min en danah chuan rilru lam chiang lo ang maiin min en in ka hria.

“Sawmtluangi leh Simon-a inhmuh hun kha mawle,khatih lai kha chuan hna thilah Simon-a a zin chhuak a..” ka ti a,kan nupa chungchang midang hnena ka sawi vawikhatna a ni a,nuam ti lo zet hian ka che sek bawk.

“Lawk...ka en sual lo chuan ka hria a,mahse ka’n en tha leh lawk ang” a ti a,Mouse a ban leh a,ngaihtuahna mumal ka pu thei lo.

“Lo en la,lo thu hnai rawh” tih pahin a chair a nawrsawn hret a,ka tawlh hnai a.A ni zat lo lang chu ka en a,engmah hriatsual a awm lo.A dik thlap vek.He Hotelah hian an lo in hmu anih chu..Zan hnih a riak chhuak ngei.

“Thil dang ka la dil duh cheu che” ka ti sep a,a chal a ti chuar tap a,min hnial dawn emaw ka ti hman.

“Sawi la…” a ti ta tho.

Ka dem hauh lo.Eng nge anih pawh ka hriat si lohin ka mikhual te chungchang en kuala hriat tum chiam ta se ka lawm hauh lo ang.Hrilh pawh ka hrilh duh kher lo ang.Mahse,mak takin ani hi chuan min hrilh duh a,min pui duh tlat bawk.

“Khami khan tu nge Hotelah hian lo thleng ka hre duh..Chuan….aaaa,chumi chin chu ni phawt se” ka ti leh rih a.

“Kha chu midang ka zawh angai dawn anih chu..lo nghak lawk la..” ati a,a phone a ban a,ka tho ta daih,Tukverh lian leh sang tha zet lam chu ka pan a,Pawnlam ka thlir thla a,Motor an tawlh dul dul a,ke a kal an awm teuh bawk.Khua a hnim ruih a,a vawt viau bawk nen ka nun ipik a ti zual hluah hluah.

Zorina’n tuemaw a be mawlh mawlh a,an tawng ka hre phak vek nangin ka ngaihven lo.An sawi pawh ka hre mumal lo.Simon-a nge sual ang Ruatdika tiin ka ngaihtuah nasa thin a,Ruatdika kha chuan sualna a neih ka hmu ta miah lo.Hriati thihna vangin a a lo chauh tih mai loh chu a nunah khan dik lo ka hmu lo.Sawmtluangi a lo lang ve leh a,amah maiin emaw ka beih dawn ka tih laiin Simon-a nen an tang dun niin a lang leh ta tlat!!!!

Ka in humruh a,Hmeichhe pangngai ve tak ka nih thin kha,Hmangaihna avangin bum leh tih nat ka ni a,kum 3 teh meuh min hmang tangkai tawh bawk.Eng berah nge phuba ka lak dawn hre lo mahila Simon-a kal zel tur hi ka dan ngei ngei angai..Nau ka pai lawk loh vangin ka lungngai a,tunah ka rai ta lem a,diktak chuan pawi ka ti ru ta hial mai.Ka duh ang ang a che turin ka fit tawk lo anga,ka naute hian chet ka lak dawn pawhin a pa anih vangin min ti tim tlat tawh ang.

“Hmingthan…”ka darah a rawn khawih zauha,ka per sawn nawk mai..

“Sorry...ka biak che i hre si lo a” inthiam lo hmel deuh hian a ti a,a then sak bawk.

“A pawi lo,ka lo ngaihtuah muk lutuk a” ka ti a,ka nui lui sak bawk.

“Lo en chhin la,khami ni hma chiah khan Sawmtluangi a lo thlenga,a lo kal hma karkhatah khan online in room hi a book fel sa vek a,Single ni lo in Double a ni thung..Chuan,a room Book hi Single ni lo in Double a ni bawk”, ka thaw tha ngam lo.

“Midang thlenpui a nei tihna a ni em?”

“Um,a inziah dan chuan Mipa pakhat a rawn kalpui a,lawk...hei hi Mipa zawk chu…” Monitor ka lamah a rawn her a,Simon-a hming hmuh ka inrin tehreng nen mipa dang hming ka hmuh takah chuan ka thaw huai mai.Hming dang daih a ni a,Mizo hming a ni hek lo.

“Thil ka zawt ve tawh ang che chu?” min melh reng pah hian a ti a,ka bu ringawt.

“Hotel i lo kal tirh atang khan i mamawh hi eng nge anih hre lo mahila a pawimawh ang tih ka ring sa thlap,mahse….i theih chuan tlem tal min hrilh ta la..ka tan tanpui che a awlsam ang,eng nge anih sawi lo mahla i tan he Hotel a thil thleng hi i nunna tluk thuakin a pawimawh tih a lang reng…” a thaw hak a,a sawi zawm leh dawn emaw ka tih laiin a ngai ta daih.Ka chhanna a nghak tih hriat zet hian min melh reng bawk.

“Engtin nge ka sawi tan ang ka hre lo alawm’ka ti ta thlawt.

“Um...min hrilh la,i thawl hawk ang ka ring” nelawm zet hian a nui suk bawk.

“Vawikhatmah kan nupa kar hi ka la sawi ngai lo a...engtia tan tur nge ka hre lo a” mangan hmel zet hian ka ban ka vai ringawt.

“In nupa kar chu ka hriat duh loh zinga mi a ni chiang...mahse,min ring rawh.

i awmdanah hian tueawm nghenchhan i mamawh ania” ati leh a,a sawi dik tih ka hria..

Ka tum loh zetin ka mittui a rawn tla a,ka hru vat a,ka insut hraih bawk.A rawn tlawh hnai a,ka kut a rawn vuan a,lak sawn pawh ka tum bik lo.A sawi ang chiah khan tuemaw nghenchhan tur ka mamawh takzet..Zorina hi ka rinchhan thei maithei asin..mahse ka la hrechiang lo deuh maithei...a pawi chuang lo.

Ka mittui a rawn tla leh a,min rawn kuah ta nge nge...Simon-a nen kan inneih hnua mipa dang min kuah leh hmasa ber tu a ni ngei ang.Engchen nge ka tah ka hre lo.Sangpuii emaw ka nu emaw tal hrilh thei ila chuan a zia tur.Ka chungchang hrilh turin ka ring lo ni lo in ka tihnat dawn avangin ka hrilh thei lo mai zawk.

“Tap vak rawh,i thawl hawk ang” ka hnungah a beng thak thak a,mipat hmeichhiat lam ni lo in Thiantha emaw farnu ang in min hnem zawk tih ka hria..Hei hi ka mamawh tak pawh a ni reng bawk.

“A zia lo hle mai” ka in la hrang tur chu min dang lo.A chair a ngheng ur ur bawk.A ngaihdan a ni lo anih pawhin a hmelah engmah a lang chuang lo.

“Tah i mamawh tih ka hria lawm.Mi dang daih angin min ngai lo la,chuan...han sawi la..” ka mit ka hru chat chat a,ka lan dan a nalh lo khawp ang.

“Simon-a hian thil tum a nei a,mahse eng nge anih ka hre lo a,bakah Hriati thihna ah khan dik lo a awm a,chu pawh chu hriat ka duh a..Simon-an a buaipui tho avang hian ka nghak dawn em ka hre lo..” ka thaw hak mai.

“Um.chuan,a dang leh…” a la ti ta fo,kan nupa kar engmah sawi lo turin ka fimkhur viau.Tawngsual ka hlau zek zek bawk.

“Eng lo,Hotelah hian zankhat ka lo kal a,aaaa...ka lo k chiah lo…” thil thlen dan ka sawi a,ka sawi zawh meuh chuan min hrilh ang ngeiin ka thawl hawk mai.

“Tu nge hruai che i hre lo maw?”

“Hre lo tak tak.Zingah ka harh a,chuan...a hnuah video kha Simon-an a lo hmu a….chuan…” ka hrawkah min rawn hnawha,ka sawi zawm thei lo.

“Het….Simon-an a hmu maw?!” a awah thinrimna a lang thei a,mak ti zet hian ka melh a.Engvangin nge a thinrim ang ka hre thiam lo.

“Um...a thinrim ang tih i hria lawm..” ka nui lui hak mai.

“Ka hrethiam,i pasal thinrim thawh nat zia ka hmu tawh alawm” ati leh a..A mood danglam ta vek chuan min ti hrilh hai vek.

“Simon-a hi engchen nge i hriat tawh?” ka ti ta ngawt.

“A la rei lo..tak takin kan nau te thilzawh fiah ka ngai..ka thlah dawn che mi?”

Sawi miah lo mahse haw turin min duh tih ka hai lo.

“Motor ka lo ken kha…” ka tho nghal a,mahse ka lu a hai lutuk,ka luak a chhuak hlui bawk.

“I tha em?” min rawn hnaih a.

“Tha ang.Ka tha in ka hria..” a thim vek..

Chiang lo ruai hian ka harh a,ka hmuh theih chhun chu a var vek..Thawm engmah awm lo in a reh thap bawk.

Engmah na ka neih ka hre lo,thawh tumin ka inbeng kang a.

“Shhh….i harh maw?” Simon-a a rawn kun hnai a..Hmuh ka beisei loh ber.

“Khawnge ka awm a?” ka tawng zawi lutuk a a hria em pawh ka hre lo.

“New lifeah kan awm...i tha em?” a ti leh a,a hmel a dam thlapa,min duatna ka hriat thin a awah a lang bawk.

“Tha…” thawh ka tum leh a,ka darah a rawn vuan a,thinthlak nawk ka chak zek zek mai.

Khumah ka thu a,ka pum a rawn che leh buta,ka uak that bawk.Khum sira locker chunga tui awm chu ka ban a,min lak  khalh a,hawn sa in min rawn pe a,hnial lo in ka ban ve mai bawk.

“I in check-up leh dawn hunah chuan min hrilh tawh ang che” thupe aw zet hian a ti nghut a,chhan pawh ka chhang peih lo.

“Ka haw thei in ka hria” ka ti nghat a,khum atanga ka chhuk tur chu min rawn puih leh tum tih hriat zet hian a rawn che leh vut a.

“I thei lo.Zanin tal i riah angai..”

“Ka thei...min lo dan tum hlek suh,chuan min khawih leh tawh suh ang che”

“Mahse,Hon…”

“Midang an awm loh hi...ka hmingin min ko zawk rawh” ka ti leh hmak a..A ding khawng luh a,a thinrimna a thunun vel a ang khawp mai.

“Ok..mahse avai chuan lemchan a ni lo ania,chuan,Nupui te nikhaw hre lo a awm hi Mipa,chupawh a Roomah lehngal i tlu reng tih hriat hi thil nuam a ni lo”

“A lo hrilh che a pawi ka ti,i lemchan pawh chu ka mamawh chuang lo.I duh leh lemchang la,i duh loh leh chang lo la..i thu thu..”

Ka kal sawn a,engtin nge a ni hian min lo awmpui ngawt theih ka hre lo.Oh...Zorina’n a lo va hrilh tak e,Nuam lo a lo tih ve ngawt tak kha..

Zorina Hotelah khan ka tlu mualpho tih a chiang..A bulah ka tap chiam a,buaipui ka ngai leh bawk a..

Kawngkhar a ri rak a,ka hawi let a,ka nu leh Sangpuii an rawn inzui lut a,eitur an khai tun bawk.

“Ehe...i lo harh tawh law?” ka nu in a rawn ti nghal thuai a,thawveng hawk hmel a hmuh theih bawk.

“Ka tha reng,ka inthiar lawk dawn” ka ti a,Toiletah ka lut zui nghal a,kawngkhar ka kalh a,ka ngheng a,ka mit ka chhing nghal vang vang bawk.

Ka harh hlim kha chuan na ka neih pawh ka hre lo a,mahse tunah chuan ka lu a hai bur a,ka pum a no hlui bawk.

Rei lutuk tawm bo ngawt theih a ni si lo a,mahse Simon-a ka hmu hne hluah hluah.Ka hua niin ka hre ber.

Vanneihthlak zetin a lo awm tawh lo.Ka nu leh Sangpuii an lo awm a,an tawng dun mawlh mawlh a,Simon-a chungchang an sawi niin ka hria.

“Ka haw thei reng asin…”Sangpuii ka en a,a chal a ti chuar tap mai.

“Mu mai mai teh,Doctor kha ka bia a,ni 3 tal awm turin ka dil a,a ngaihdan chiah a ni bawk a,Cabin ruak a lo awm hlauh bawk” ati a,ka melh reng ringawt.

“A tul lo.Ka tha vek,a tul viau chuan zanin chu ka riak ang” luhlul zet hian ka ti nghat a,khumah ka lawn a,muthilh vang vang ka chak ber.

“Luhlul viau lo teh,a landan chuan i naupai hi i zo lo ania,i kum a tlem chhe tawh lo a,chubakah rilru hah luat vang a ni bawk a” a ti leh nghauh a.A sawi dik ngei ang.Ka rilru hah zia hi sawi fiah mai chi a ni lo.

“Min ti mangang alawm,Simon-a lah phili lutuk bawk si…”ka nu in a lo ti ve a,a aw ah min demna a langa,Simon-a lamah a tang reng mai.Atthlak lutuk,tu nge a nih a hriat hun chuan na a va ti dawn em???! Ngaihtuah pawh ka ngaihtuah peih lo.

“Ka muhil dawn ania.Nu,nangmah a mi riak dawn?” ka ti leh rih a.

“Riah ka tum a,mahse,Simon-a kha riah a tum ruh em a ka hnial ta lo mai” ka kut ka humruh a,chhan enah pawh ka en lo law law.Eng nge a duh chiah hi ni ang? Kei hian atan enge ka la tihsak ngai hrep ni??? Min mamawhna nei lo se hetiang hian a khawsa hauh lo ang.

Ka harh leh chuan a hma ang tho khan  thawm awm lo in a lo reh leh thap mai.Che lo in ka mu meng kar a,Simon-a a lo thleng tawh em ka hre lo.Lo thleng lo tawp mahse pawi ka ti hek lo.

Phone a ri a,keima phone emaw tiin lak tumin ka che a,mahse Tuemaw hian min rawn lak khalh a.

“Hello…”Simon-a aw hian a ti sup a,ka phone ni lo in Simon-a phone zawk.Kan ringtone a in ang thin tak e.

“A muhil a,ngaihtuah a ngai lo…” a ngawih vung vung hnuah a ti leha,ka nu anih ka ring ve ngawt.

“Naktuk zingah lo kal la,mahse,Nu...alakah that chhuah hram hram ang che.Chu chu i theih loh chuan lo kal lo mai rawh”a ti leh a,ka nu ni lo in a ma nu zawk a bia tih ka hria.

Kan In ka haw phei dawn khan tha takin ka hrilh thlap a,'aw’ leh 'aih’ sawi lo in a bu ringawt anih kha..Vawikhatmah ka that leh that loh pawh min rawn zawt hek lo.Mahse,Thil mak a ni chuang lo.Ramsakawlh ang maia khawsa thin Fapa neitu kha a ni miau a.

Sangpuii sawi ang ngeiin ni thum ngawt ka awm hnuah ka chhuak ta hram.Ka bp a hniam mah mah a,mu tha tur leh ei leh in lam uluk turin min chah ngun viau.

Zantin Simon-an min riahpui ziah a,chhun lamah ka nu a awm ve thung.Simon-a nu erawh a lo kal ta miah lo.Sawmtluangi ka muthilh hlanin a lo kal ve ngei thung.Zorina hmuh ka inbeisei laiin ka hmu ta miah lo thung.

Vawikhatmah Simon-an min khawih leh ta lo.A mawiah min riahpui tih ka hai hauh lo bawk.Min khawih lo tur khan ka ti ngeia,mahse min khawih loh avangin ka lawm phah chuang miah si lo.

“Zorina nen khan eng nge in tih a?” a rawn ti chhuak thut a,mu chungin Tv ka en a,khum bula Chairah a thu ve bawk.Damdawiin ka chhuahsan atangin thla a liam tep tawh a,In lamah pawh min rawn ngaihven zui zel a,Ka nu pawh a lo kal ve ta nge nge.Kan inbe mumal lo.Midang hmuha mawiah kan inbe tawk tawk ani ber.

“Amah zawt la”

“Ka zawt a,min chhang mumal lo.”

“A tul a ti lo anih chu,keipawn tul ka ti lo”

“Kan buaina ah hian midang hnuk lut tel suh,Zorina phei hi chu tel lo tur dik tak” ati leh nghut a.

“Eng buaina mah kan neih ka lo hre hleinem” ngeiawm zet hian ka ti a.Min chhang lo in Banga Tv awm chu a en run ringawt.

“Engtik nge i lo haw dawn?” tehdaih a..

“Ka peih hunah…”

“Lo haw tawh la ka ti khawp mai” ati leh supa,ka melh zawk a min lo en ve chiah avangin kan mit a intawng sak mai.Ka hawisawn vat a,a nui hawk ri ka hre zui zat bawk.

“Haw tawh la a tha ang,bakah nitin lo kal ziah kher a tul lo.Lemchan hi nang ang bawkin ka hne ve ania” dam thlap hian ka ti a,min chhang lo.

Simon-a haw hnuah Zorina a lo kal a,Hmeichhe hmeltha leh nalh zet a rawn hruai tel a,an inbiak vel danah a bialnu a ni tih a hriat theih mai bawk.

Kan in chibai a,a tawng tam lo hmel viau mai.Hmeichhe tha tak anih ka beisei takzet.A mipa kawp hi Mipa tha tak a ni miau a.

“Bawihi,rei lo te  Hmingthani hi ka be fal lawk duha”a kutah a vawn sak zauh a.Rei lo te mahnise ka hmu hman tho.Atthlak zetin Simon-a ka hrechhuak nghal zat bawk.

“Um,ka lo va chhuak ang..” a ti a,nuam ka ti chiah lo.

“Ngatinge i kal tir kher a?” ka ti hlak a,a nui ringawt.

“Thil tha vak lo hre turin i fit em?”

“Lutuk…”

“I tlu leh ngawt ange...min ti hlauthawng ania” za lo zet hian a then sak bawk.

“Sawi mai mai teh..ka tha vek” ka ti ve thung.

“I damloh lai khan ka hre tawh a…” a ngawi leh rih.Nghakhlel zet hian ka en thung.

“Sawmtluangi’n Hotela Room a luahpui kha…”

“I hria maw?,tu nge?” hlauthawnna avangin ka lungphu a rang nghal dawt dawt mai.

“Simon-a….” ka melh reng ringawt..Kha khasi hming neitu kha Simon-a a lo nih chu!!!!??

BLACK HORSE - 22

“Khasi hming daih a ni sia…” ka lungphu ri dut dut chu a hriat ve loh hram ka beisei takzet..

“Um,ka en kual a.Bakah mipa a lo kalpui leh, a hnua Rooma eitur an dah a Mipa lo awm ve kha Simon-a ngei a ni tih duty khan a sawi thei tlat a” nuam ti lo hmel zet hian min en a,ka mit sulh maiin ka hria.Mahse ka insehruh a Simon-a thil tih lai hi ka hre duh anih chuan hei aia tha lo zawk hi ka la hre fo ang,chung hun a lo thlen pawha chiai lo turin ka in control zel angai bawk ang.

“Sawi zawm la…” ka nui lui thei ta hram.

“Han sawi zawm vak tur pawh a awm chuang lo.Mak ka tih deuh zawk chu i video an siam zan khan i pasal pawh ka Hotelah a awm ve reng a,in inhmu fuh lo palh anih pawn thil mak a ni lo.Mahse,Garrageah i Motor chu a hmu turah ka ngai a..” a ti leh a.

A sawi dik chiah,Hotel chhungah khan kan lo inhmu lo anih pawn thilmak a ni lo a,mahse a sawi ang ngei hian Garrageah ka motor a hmu ngei ang.Zankhua a Motor dah chu an tam hauh lo,mahse Garrage lamah a kal lo pawh a ni ve thei tho bawk.

“Garrageah a kal lo pawh a ni thei alawm..mahse Video kha a hmu ta tho a,mak a ti a a thinrim bawk a...i Hotelah a ni tih a hre lo maithei bawk a”

“Sorry...a hria,nangmah ang bawkin kha mi zan CCTV record kha en tumin a lo kal ve tho tlat” ka ang phiau mai.Engchen nge a hriat ang ka hre lo.Engpawh ti dawn ila tlan khalh ngaihna ngang a awm lo e.

“A va mak ve,engtin nge a hriat le aw?” ka ti halh mai.A lu a thing a.

“Ka hre bik lo,mahse i lo kal hnu kha anih avangin engmah a en thei ta bik lo a” a ti a,ngaihtuah muk hmel fe hian min en vung vung bawk.

“Engmah hi ka hrethiam tawh lo,Simon-a tlan khalh hi a theih hlawl loh anih hi a” ka ti chhuak phawng mai.Beidawn san mai ka tum hauh lo.Mahse,kal leh zel dan tur reng reng ka hre lo.

“Nghak phawt mai teh,chet la ve vak thei pawh i ni lo.I naute khan a tuar viau maithei ania,bakah Simon-a hian engpawh ti se chhan nei lo chuan a tih ka ring lo” ati leh a,ka en vat a,a  sawi ang ngawt ni lo hian Simon-a hi a hrechiang tih ka chhungril hian a hrethei tlat.

“Um..a dik ang,thil tam tak a lo tih tawh te pawh kha chhan tha tak nei vek alawm” ka ti sap a,ka tah a chhuak zawk.

“Ka kal ang..Julie ngaih a tha lo palh ang” a nui sak a,ka nui ve tak nangin ka nuih a za hauh lo.Reitak Simon-a nen an inhre tawh ni a ka hriatna chuan min ti hah vek.

Thla khat lai a liam leh tawh,haw turin ka pa in min nawr a,Simon-a lah a rawn lang sek bawk.Simon-a  awmdanah engmah  danglam a awm lo a,thil tha lo thlen belh pawh a awm hek ,ka nu Shillongah a chhuk leh tawh tih a sawia,ka chunga a awmdan inthlak dawrh avang hian nuam ti lo mahila ka dem chuang lo,a fapa Rangkachak kha a hmaiah  beng lo in chil ka chhak miau a.

Khawiahmah ka kal ngai lo a,Sangpuii a lo kal zeuh zeuh thung,a khat tawkin Zorina a lo kal bawk.Sangpuii sawi danin Ruatdika a zinbo a,a lo haw chin tur a hre lo thung.Kan monu hian ka awmdan hi a hria em ka hre hauh lo.Engmah min zawt ngai lo a,min tha en ve hmiah.Ka pasal neih hmain a mo hman a,laizawn ang tak takin ka en bawk nen hnawk min tih ka ring lo ve tawp bawk.

“Mambawih,vawiinah Simon-a ka hmu a” rawn thut ve pahin a ti a,Inchung zawlah  ka thu a,thli a thaw heuh heuh a,Shawl lian zetin ka intuam hlan bawk.

“Um,khawiah nge i hmuh a?” ngaihven lo zet hian ka ti liam puat.

“Caveah ka hmu a,kha Emily nen khan,an Bazarin ka hria” ati leh a,ka danglam lo.

A duh duh kalpui mai mai tehse,Ka hmangaih thin a,ka la hmangaih reng bawk.Mahse thlakhat tehmeuh mahni a ka in ngaihtuah fim hnua ka hriat chhuah tak chu ka nun infiam nan a hmang tu mipa hi,ka naute pa emaw ka Mipa Hmangaih chhun pawh nise ka tan chuan Hmelma a ni tawh.Eng kawngin nge ka tih let ang ka la hre lo chung pawhin a tih dan nitin ka la ngaihtuah ta zel.

“A that chu...haw phei tawh ila a tha in ka hria” ka ti a,Ni tla turin kan inchung zawla pangpar kan dah ho a rawn chhun sen phut chu ka en kual a,a nalh takzet.Mahse Simon-a In a ka pangpar leh plant nalh tak tak te kha ka hrechhuak lo thei lo.

“Englo...sawi tur a ni em ka hre miah lo a...Simon-a hian hmeichhe kawp a nei an tih hi i hria em?” ka en vat a,a hmela nuam tih lohna langchhuak chu ka hmuh hmaih hauh lo.

“Aih,hre miah lo..” ka hriat zia sawi khum nghek ka chak zek zek.

“Ka nauin vawiin a kan hmuh khan min hrilh a,ka lo la hre ve lo a,bakah mi hian thil an hrethei ka ti lutuk a” a ti leh a,ka thle bak ringawt.

“Midang chanchin sawi te chu a nuam alawm,kei lah helamah ka awm ta reng bawk sia,a awm lo miah lo” ka ti a,a ngaihthat nan ka nui lui var var bawk.

“Nia,a dik alawm.Mahse,ka nau sawi dan chuan a hmeichhe kawp pawh Emily kha a ni a ti a,ka nu te inbul ami Tlangval pakhat kha in hnenah  Showroom lamah khan a thawk ve a” ka ka chhung a ro halh mai..Dawr a thawk te pawn an hriat tawh chuan an inthup miah lo tih a chiang.

“Engmah ka hre lo,Emily te chu a best alawm”

“Um,i hriat loh chuan atha...chuan,hnawk ka tih vang che ni lo in haw phei tawh la tha ka ti.Nupa hi awmhran miah loh tur,a theih phawt chuan khum intawm a,Taksa lum si phak a mut hian kan inzawmna a nghet bik an ti thin ania”a ti leh a,ka hrethiam...Simon-a nen hian awmdun tam turin min duh a,chupawh Simon-an hmeichhe dang a kawp niin a hriat vang a ni tih ka hre bawk.

“Nia,haw ka duh tawh..Helam hi nuam viau mahse haw leh tho angaia,bakah ka zia awm tawh hrim hrim a” ka ti a,thli thawin ka sam a rawn chhawl leng a rawn chhem leng dar dar mai.

“Harsatna i neih chuan min hrilh thei reng ania...Ka nu leh ka pa hriat i duh loh thil a awm palh chuan…” a ti leh a,Simon-a nen kan inkarah buaina awm niin a hre tlat tawh a,a hlauthawng tih ka hai lo.

“Tehreng mai...chutiang a thlen phawt chuan ka hrilh em em ang che” ka ti sep a,ka u a rawn kal ve leh takah chuan engmah kan sawi zui ta lo.

Chaw kan ei laiin a tukah ka haw dawn tih ka sawi a,ka pa a lawm viau,ka nu erawh chuan min ngaihtuah thung.

“Simon-a hrilh la,Motor hi khalh rih lo teh” Ka u in a lo ti ve a.

“A ho lutuk,hna lamah an buai a,keimah a inkhalh haw a thil lei kual te ka ngai”

“Hnial lo mai thin la...Driver pawh in nei a” ka nu in chawei mawlh mawlh chungin a ti a,hnial lo in ka bu ta ngawt,ka nu hnial a sawt loh zia lah ka hrechiang.

“Um,nakinah ka bia ang.Lo hrilh duh suh u,a zin tur a cancel palh ang” ka ti a,a zin dawn leh dawn loh ka hre der lo.Vanneihthlak takin tuman ka hmel an en lo hlauh bawk.

Mu chungin ka in ngaihtuah a,engpawh thleng se Simon-a hian eng nga a tum ka hriat chhuah hma chuan ka tawp  tur a ni lo.A pa kha thah niin a sawi a,thah pawh lo nise keima thah a ni lo a,engvangmahin ka nun a ti chhe thei lo.Min lo hmang tangkai ngawt pawh kha phuba lakna tur a tling tawh sa reng.Ka dul puar ve deuh ak tawh chu ka chul a,'Pa’ a tih tur hi Pa ni tlak lo khawpa bawlhhlawh a ni a,hre lo law law se a nun a nuam zawk ang.

Ka phone a rawn ri a,ka beisei loh zetin Ruatdika..ka bek a hnek hnu khan kan la inhmu leh lo a biak pawh kan inbe ta lo.Min  hnek fuh vang khan ka haw hauh lo a,a Hmeichhe hmangaih tak kha nun pawh chak lo khawpa siamtu ka pasal a ni tih ka hriat avangin keimah ka inthlahrung a ni zawk.

“Hello...khawnge i awm?” ka ti nghal thawr.

“Ka roomah mawle..i tha deuh tawh em?”

“Tha lutuk,nang zawk,i lo haw tihna mi?”

“Ka tha e,vawiinah ka lo thlenga,i damlo tih ka hre ve chiah a?” inthiam lo hmel deuh hian a ti dut a.Ka nui ringawt.

“Ka tha reng alawm.Senior hnuah nau ka pai a,ka buai anih hi..” ka nui leh a,a ni pawh a nui ve hak tho.

“Ka lawmpui che,I nu te in ah ami ila awm?” a rawn ti leh a,a aw ah ruih nei aw a ni lo.Amah tak hmu lo mah ila ka hriat thin Ruatdika kha niin ka hria.

“Um,naktukah ka haw ang ..i lo leng dawn nia” ka ti a.

“Tehreng mai,i ngaihawm tawh lawm” nui chung hian a rawn ti a,a lusun nasa lutuk pawh kha a zia ta deuh anih hmel.

“Thil engemawah ka mamawh dawn che a,tlaiah chaw lo ei la…” ka ti leh rih.

“Aaah,naktuk tlai chu Hriati te in lamah ka kal ang..A tuk leh tlaiah animai” a rawn ti a,ka mitthlaah Hriati a lo lang a,a hmeltha tak,engtiklai pawha hlim hmel pu reng kha...tunah chuan mahni intihlum anga ngaih niin a bo ta vang vang mai.

Ka thawh veleh ka thawmhnaw ka pack a,ka keng tam lem lo bawka ka zo thuai,Sawmtluangi awm leh awm loh ka hre lo,Zorina ka call dawn zeta ka thulh leh,ka chhungril ah hian engemaw ka sawithiam si loh a awm tlat a,engkim hrilh hi dik lo niin ka hre leh ta lawi.Min pui tur chuan ka thiante pahnih aia rintlak tur an awm lo.Ruatdika a lo haw tawh tho a,  ani pawn min pui duh em em ang.Hriati vangin Simon-a a haw em em tih ka hre ru kar bawk.

Dar hnih pelh hretah ka inkhalh chhuak a,ka nu ngaihdan ni lo a ang hlak hlak mai.Kan driver te an buai thu chhuanlamah ka hmang a,diktak chuan tumah ka be lo.Ka haw dawn tih pawh ka hrilh lo.

Bazar lamah ka mamawh lei turin ka kal kual hmasa a,ka hmanhmawh lem lo bawka In lam ka pan meuh chuan dar li a ri tluk a nimai,Tlasik a ni tawh a,ni a tawi tawh a,Christmas thlen nan thla hnih pawh a awm tling tawh mang lo.

Kan in ka thlen meuh chuan khua a thim titih tawh,Gate hawnna remote ka kawl tho avangin buaina ka nei lem lo.

“Ding teh..”Security niawm tak hian ka tlan lut chu min lo tiding a,ka la hmu ngai lo.Thla khat zenzawn ka awm lo a,a CCTV camera awm thleh thluah duh tawk lo in Security dang pawh a lo neih belh leh ta..Ka damloh lai khan Farmah khan pakhat chu a awm ngei a,mahse In a kan haw hnu kha chuan a lo kal zui ta lo.

“Kal tir rawh,U Hmingthani anih kha..Kan pi.. “Tlana’n a rawn ti ta hlauh.

Inthiam lo hmel zet hian thupha a chawi a,ka nuih sak ringawt.Tlana’n ka bag khai a tum a,mahse ka hnial thung.Ka beisei loh zetin Simon-a car a awm a,tun ang hunah Inah a awm ka ring hauh lo.

Inchhung ka pan a,kawngkhar ka hawnga,Living room sofa a lo thu te ka hmuh takah chuan ka lungphu a rang nghal dawt dawt mai,Emily awmhmun kawr ha in a lo thu a,a mah ep zawng takin Simon-a a thu bawk.Hei hi chu ka la hmachhawn fo angai ngei ang,a bul tan na ah hian hetiang mai mai hian min tihbuai ka phal hek lo.

“I lo haw dawn tih i sawi si lo”Simon-an a ti sup a,a kuta Beer Can a ken chu Darthlalang a siam dawhkanah chuan a dah a.Emily erawh chuan Ramhuai emaw min ti niawm tak hian min melh reng thung.

“Nia,sawi a ngai ka ti lo a.Emy..i tha em?” zangkhai fe hian ka ti zui zata,a bu nghat ringawt.

“Bag hi ka han dah tha lawk ang” ka ti leh a,Inchung panna step ka pan a,ka khup sai dar dar chuan ka pen a tihbuai ka hlau viau nangin eng em a thleng ta lo hlauh.

Room ka thlen hnuah erawh ka insehruh nasat zia ka hre ta chauh,Boruak hip tur hmu tha lo ang mai hian duhthawh zetin ka hip kawk kawk bawk.

“I tha nge tha lo?’ ka phu nasa lutuk.

“Tha e,ka phu nasa deuh tih mai loh chu..” ka nui lui hak bawk.

“Sorry...mahse,i lo let leh ta nge nge a lawm”, ka mit ka chhing a,diktak chuan ka nu te in lama ka awm lai pawh khan 'Ka In’, hi ka ngai ru vawng vawng zel.

“Nia..ka in a la ni ve tho a..”, ka ti awlsam leh mai,ka bag pawh hawng lo in chhuatah ka dah tawp bawk.

“I damchhung leh i thih hnuah pawh i In chu a la ni reng zel ang” a ti leh hluk a,ka chhang lo.

“Sawmtluangi a awm em?”

“Awm e,ngatinge?”

“Emily le…?” ka hawi let ta nge nge,a thinrimna a thunun tih hriat zet hian a kut  hum ruh a,a in seh ruh fun bawk.

“Inhauh ka peih lo ania” nelawm lo zet hian a ti leh hrawk a.

“Ouch...ka hnial hleinem che,taktakin in chanchin ka lo hre thin a,a tir kha chuan nuam ka ti vak lo.Mahse tunah chuan ngaiah ka neih thei ta viau e” ka thle bak a,ka nui lui var var bawk.

“A va lawmawm ve,nui chunga i lo ngaihthlak theih chuan…’ a kekawr ipte a zen a,a hmel chang zetah chuan a ngaihtuahna hriat tumin ka en ngar a,mahse engmah ka hre thei chuang lo.

“Um,nui chunga lo thlir mai hi a nuam ka ti tawh a,mahni nihna han hriat chhuah kha a na deuh a,tunah chuan ka pawmzam viau e” ka chhungril hian a pawm eih lo a,tunah pawh ka la na vawng vawng tih hrilh kher ngai ka ti lo a,tihlan ka tum hek lo.

“Damdawi i ei tha em?” teh daih a..

“Lutuk,mahse lo ngaihven duh suh,i fa pawh a ni lo a” ka inher a,ka thawmhnaw dahna lam ka pan zui ta daih.

“Khawngaihin…”zawi sup hian a ti a,ka chhang lo.Engmah khawngaih na tur ka hre lo.

“Ka’n inbual lawk ang,Chawei turin min lo nghak suh u” ka ti leh nghat a.

“Ok,i thu thu le” a ti hmuk a,a chhuak thawm chu ka ngaithla a,Kawngkhar dimte in a rawn nem khar a,ka thaw hawk mai. Ka chau hluah hluah.

Tuilumah ka inchiah a,ka mit ka chhing a,nun hi a hahthlak takzet.Ka tihtur tha ber chu ngaihpawimawh loh luih hi a ni tawp mai.

Ka inbual zawhah muanchangin ka chhuk thla a,ka rin loh tawpin Emily a lo la awm ta cheu,Sawmtluangi a lo awm tel tawh bawk.

“Ehe!!!,i lo haw tih ka hre lo” phur hmel zet hian a lo ti nghal hliai mai.

“Nia,i ngaihawm tawh lawm” ka ti let ve mai,Simon-a nen Hotelah khan engtak ti ang maw??

“Kan ei dawn mi?” Simon-an a rawn ti a, Tlansanga nen  library tangin an rawn inzui chhuak a.

“Hey...i tha em?” Tlansanga zawkin a rawn ti leh a.

“Um,ka tha lutuk..nang zawk?”

“Ka tha e,Naute hmuh a chakawm tawh khawp mai”

“Hah...a ni khawp mai”Simon-an min melh reng tih ka hriat avangin ka en duh lo lui tlat thung.

Chaw kan ei a,Tlansanga leh Emily pawn an ei ve ve.Hna chungchang sawiin Simon-a leh Tlansanga an inbe pah a,kei erawh ngawirengin ka ei mial mial thung.Sawi ve tur ka hre lo hrim hrim bawk.

“Ka kal mai ang…”Rei vak lo Living Rooma kan thut khawm leh hnuah Tlansanga’n a ti a,a tho zui ngal mai.Emily ka en a,kal ve tum hmel a la pu ta chuang lo.

“Naktuk kha i tlai ange,ka nghak dawn miah lo che ania”Simon-an a ti hluk a,chhan pawh chhang lo in Tlansanga a nui hawk hawk ringawt.

“Keipawh ka han mu teh ang” ka tho a, Sawmtluangi'n min mangtha a,Emily erawh chuan phone a khawih mawlh mawlh thung.

Ka mu meng kar a,Simon-a a lo la chho ta lo fo.Room dang a hmang zawk pawh a nimaithei..ka tho leh ta nge nge,Fridge ka pan a,ka hawnga,engmah a awm lo.

Inhnuai lam ka pan leh ta nge nge,light a lo in off deuh vek a,mahse Simon-a office a la eng kalh thung.

Pan hnaih loh ka tum zet a,ka thei thlawt lo,ka kal hnai ta nge nge.Room kawngkhar zau vak lo in a inhawnga sa a,thawm dim zetin ka kal tham tham a,ka awmdan a mawi lo tih ka hria.Ring vak lo hian tawngri a rawn chhuak a,tun ang hunah tu tak bia ang maw??

Ka kal hnai leh sauh a,ka bih ta nge nge.

Emily Simon-a chairah a thu a,Dawhkan lian leh hnum hlurh tlangah chuan Simon-a a thu thung.

“Ngaihtuah suh,a lo haw emaw haw lo emaw engmah danglam a awm lo..” Simon-an a ti sup a,keimah min sawi tih ka hria.

BLACK HORSE - 23

Ka kut ka humruh a,nia,ka haw leh vangin engmah danglam a awm lo.

“Mi sawi a hriat i ring em?”,Emily zawkin a ti sep a.

“Hria e..a pawi lo.Hria se kan duh kha”Emily kut a zuk vawn sak a...Ka luak a chhuak ut ut thei.

Thawm dim zetin ka kalsawn them them a,mi tawng ngaihthlak ruk te hi thil mawi a nih loh zia ka hre ve tho.Mahse ka ti leh ta.Ka hlawh chhuah chu natna chiah.

Tui pawh la ta chuang lo in Room lamah ka let leh a,khumah ka inthawlh leh nghal hmak.Reife hnuah Simon-a thawm ka hria a,a lo lut dawn em ka hre lo,mahse ka mit ka chhing nghal hmak tho.

A rawn lut a,thawm dim zet hian a kal kual a,Khum bulah a tawp chat mai.Thawk pawh ka thaw tha ngam lo,reife hnuah a kalsawn thawm ka hre leh a,ka thaw nghal huai bawk.

“Muthilh der kher angai lo ania,lungngai suh,Sofa hi ka hmang mai ang” nuihza aw deuh hian a ti hmuka,engtin nge ka muhil lo tih a hriat? LALPA leh!!!...he In chhungah hian Camera a awm tak e.Ka awmdan atthlak zet pawh kha a lo hmu vek ngei ang,mahse ka che duh chuang eih lo.Ka zuk chhuk hnuah minute a liam leh teuh tawh tlat a ka muhil hman tihna animai.

Ka muhil mang lo,ka harh leh thin a,ka mumang a buai nuaih nuaih a ni ber.Simon-a erawh engmah vei lo tih hriat zet hian a reh zui nghal hmak.

Ka harh leh chuan khua a lo var tawh,mahse Curtain chhah zet inzar avang chuan a thim deuh ruai thung.Tho mai peih lo in ka mu meng kar a,nizan thil thleng kha...ka mumang a ni lo tih ka hria.Mumang ni se ka duh em ka hre chuang hek lo.

Peih lo zetin ka tho tham tham a,ka rin ang ngeiin Simon-a a lo awm tawh lo.Ka luak chhuak in min rawn nawr a,hmanhmawh zetin Bathroom ka pan a,ka luak chhuak hi a la reh hleithei miah lo.

Inhnuaiah ka chhuk ve meuh chuan an lo tho kim thap tawh.

“Good Morning…”Simon-an a lo ti sup a,tha takin ka chhang let ve mai.

“I mu tha thei maw?” Sawmsangi zawkin a rawn ti ve a,Emily erawh chuan min en meuh lo.Min hmuh a hreh nge min  ngaipawimawh lo ka hrethiam hauh lo bawk.

“Lutuk.Simon,tlaiah Ruatdika chawei turin ka sawm a,i lo haw hma thei dawn em?” kan nula in Thingpui min rawn pek lak pahin ka ti a.

“Meeting kan nei dawna,Dinner kan ei nghal dawn a...mahse,min mamawh chuan…” a nui suk bawk.Ka luak a ti chhuak zawk.

“Ahhh...mamawh hran lo e..” pangngai takin ka ti ve mai.

“Emily,Ka nu thil lo chah che kha i ti ta em?” Simon-an a ti leh a,kei chu a haw hnuah min la be miah lo a,Emily erawh a mamawh a chah ta vel...hlawm tak hian a...lo inchah kual vel mai mai tehse.

“Vawiinah Meeting hmain Driver ka tir mai ang chu ka lo ti a” ka tum loh zetin ka nui chhuak hawk a,ka thingpui in lai ka hak thelh bawk.

“Eng nge nuih tur awm a?” Simon-a aw chang zet pawh chuan ka nuihza min tawp tir thei chuang lo.

“Emily nen hian Best friend ni lo in Nupa in ang lutuk a” ka hmui ka hru pah zauh a,ka en kual a,an hmel landan in ang lo hlawm lutuk chuan ka nuih a ti za zual mah zawkin ka hria.

“Hon...i duh duh sawi hi ching lo teh”

“Ahhh….Sorry...pawn lamah pangpar ka va enkual lawk teh ang” ka chair ka nawrsawn a,min chhan hmain ka kal zui daih bawk.

Emily hmela maktihna leh nuam tih lohna lang te,Sawmtluangi na ti hmel te..Simon-a insehruh nasa lutuk te kha...hahthlak hian...an duh duh an sawi lai leh an duh duh an tih lai khan khatiang hmel kha ka pu ve thin ngei ang tih ka hria..Tunah chuan ka awmdan avanga mak tihna neiin an awm fo tawh zawk ang,natna ka thlen thei lo anih pawhin min damtir avanga inchhir ngawih ngawihin ka siam ngei ang.

“U hmingthan…” ka hminga min ko ri ka hriat rualin ka hawi let nghal a,Sawmtluangi lo ding chu nui chung hian ka en a..

“Eng nge ni ta?”      

“Engni lo e..ka thiannu in pangpar nalh deuh deuh a chah thleng a,i duh ve ka ring a” a phone a rawn lek hnai a,pangpar thlalak nalh zet zet lo awm chu ka enkual a,nalh hlawm viau mahse ka duh zawng an ni tlat lo.

“A va mawi ve,mahse,ka indim deuh angai sia,tunah chuan ka hnar mai ang” zangkhai tak hian ka ti a,a phone ka pe let a,engmah sawi lo in a la ve mai bawk.

“ Eng lo…..” sawi duh nei niawm tak hian a ngawi leh rih a.

“Sawi la..”

“Engtin nge khatiang khan i tawng theih zawk a?” a ti sep a,a sawi ka hrethiam..mahse,ka hawi bo lui tlat thung.

“Eng chu?”

“Mama leh Emily kha….”

“Aahhh,ka sawi mai mai alawm”

“Mi sawi i hria tiraw?” a ti leh a,inchhunglam a en zak zak bawk.Ka bula thutna thira siam awmah chuan ka thu a.

“Hria ti ta ila…” min rawn en a,Pangpar phunna kan siam chu a ngheng a,Zing ni chhuak chuan a sam a chhun tle siau bawk.A nalh reuh takzet.

“Ka hre lo..ngatinge kan Inah hian a lo awm ve ngawt? zak thei lo ka ti” a ti nghat a,zak thei lo a ti ni lo in a thik zawk tih ka hre ru kar.

“A ho em mai,i u best ania..bakah...ka awm loh lai pawn kan Nupa khum..” sawi zawm duh lo in ka ngawi daih,diktak chuan ka ti lui zawk.

“Maw?!” a hmui a hup vat bawk.

“Shhh….sawi chhuah ka tum loh tawp ka sawi palh anih kha...bakah kan pa Farnu teah chuan ka ngaina ber che a,chuan..nang chuan ka natna pawh i hrethiam ang tih ka hria” ka ti leh a,a mit a khap sak sak a,a rilru a buai hmel viau mai.

“Nia,ka hriat veleh ka rilruah i awm nghal a,mahse...engtin nge a lo awm luh ngam ka hrethiam lo,i lo haw tih a hriat hnu pawh hian chhuah a tum chuang lo a…” ngei tih hriat zet hian a ner nak mai.

“A ho lutuk,thla khat aia tam ka hre tawh a,tuar dan ka thiam tan viau ania..chhunah eng nge itih ang?” ka ti a,kan thusawi her danglam ka duh a,amah hi ka ngaina a ka ring em em bawk tih hmuh tir ka duh ta tlat.

“Ka hre lo,ngatinge?”

“I hman chuan min chhuahpui la..”

“Awi,a nuam ngawt ang...eng nge kan tih ber ang?” a ti leh lawi a,a nuam ngawt ang a ti zo chiah sia..

“Ka Doctor hmuh hun ania,bakah thawmhnaw lei ka duh a..Ka kekawr ho hi hak an nuam lo lutuk a” hei hi chu ka ti tak tak.

“Mahse,Mama nen in kal dawn lo mi?”

“A meeting tur kha a pawimawh ang,bakah Emily a awm a…” ka mit ka siai zauh a,a ner nak mai.

“He nu hi….”Simon-a rawn chhuak chiah ka va hmu a.

“Shhh…..i u alo kal ania,kan ngam dawn der si lo” ka then lui sak bawk.Hrethiam niawm tak hian a bu ve nghat bawk.

“Vawiin hi ka in check-up hun ania,mahse i buai hmel bawk sia Sawmtluangi nen kan kal mai ang” chawei laiin ka ti a,min rawn en a,a mitah engemaw a lang zawk a,mahse a bo lehnghal mai.

“Driver hruai ang che,nangmahin Inkhalh kual tawh suh” a ti hmuk a,chaw a ei zawm lehnghal mai bawk.Ka rin lawk dan anih avangin a awmdan chuan min ti danglam pha lo.

“Nia,mahse….”

“Ka sawi tawh kha…” ati hmuk a,ka ngawi ve mai bawk.A sawi vang mai khan ka tih tur leh ka tumdan thlak ka tum chuang lo.

Chaw kan eikham hnu lawkah Emily leh Simon-a an chhuak rual a,diktak chuan hetah a cheng ve tih ka hre hauh lo,nizan khan a riak ve satliahah ka ngai mai a.Mahse Sawmtluangi sawi hmang kha chuan ka chhuah hnu lawkah a lo lut tih a chiang,Simon-an a lo mamawh viau animahna..Mahse,ka nu lehzel in a mamawh a lo hrilh vel erawh ka ngaithei bau lo.Ka chungah a thinrim anih pawhin Hmeichhia ve tho a ni a,a Fapa bialnu lo lawm huam kha a tihturah ka ngai miah lo.

Dar 11 velah Ruatdika a lo thleng a,Simon-a hnenah khan tu nge ka kalpui dawn ka sawi ta miah lo.Tlana lah hruai ka tum miah lo bawk.Motor khalh hi chu a sawi vang ni lo in kei pawn ka tum tawh rih lo hrim hrim.

“U Ruatdik,i dam em?” Sawmtluangi'n a hmuh veleh a ti nghal chul a,an lo innel hman hle tih hai rual a awm lo,ka na zawk bawk.Ka tana na erawh ka ni lo thung.

“Dam alawm,nang zawk?” ati let ve a,a hmel hmuh a hahdam thlap mai.Zorina ka mitthlaah a lo lang a,Ruatdika nen heti khawpa an in ang hi thilmak tak a ni.

“Um,dam e...eng nge i lo tih dawn?” ati leh a.

“Boss hian min ko a,kan bazar dawn anih ka ring” ka lamah a thle zauh a,a nui var var bawk.

“Ehe!!!,i van fel..’ a ti zuai raih mai.Min rawn en a,mahse ka thil khawih lai ngawt ka en ve tlat thung.

“Fel loh theih pawh ni lo.Naute hi a that kan duh alawm” ati leh a,a nui zui hak hak a, Sawmtluangi pawh a nui ve ta tho.

Ka kekawr en turin kan kal hmasa a,Doctor hmuh hun kha chawhu lam daih anih avangin kan hmanhmawh lem lo,kan kal dawn khan Sawmtluangi mood a danglam viau a,mahse Bazarah erawh a zia leh tawh,incheina lam a hre hneh bawk nen Bazar pui nuam tak a ni.Thil eiturin kan Bazarna bul hnaia Zote Bakery ho dawrah kan lut a,ei reng atan chuan ka duh lem lo nangin an thil siam erawh tui ka ti viau.

“Doctor hmuh satliah nge thildang?” Ruatdika'n a ti a.Kan eitur kan nghak mek bawk.

“Hmuh satliah mawle,a rei lo ang”

“Rei pawh nise a pawi lo,Nimin piah khan chaweiah min sawm kha,ka la hrereng ania” a nui a.

“Ka la hrereng e...i ei duh zawng kan nei lo a,Bazarah kan zuk lut thla law law dawn mi?” ka ti a,thlai hnah a ngaina em em a, Salad a duh em em bawk.

“A ngai kher lo,a awm apiang animai”

“Ok,nang nge nge,i fel thin..Ka makpa i ni thei ta lo tur hi ka ui che,oh...mahse,i ni leh thei si”Sawmtluangi ka en a,an awmdan hriat ka duh avanga chhaih lui ka ni hrim hrim.

“Dik chiah mai” a nui huk bawk, Sawmtluangi sen awp awp chu ka hmuh hmaih hauh lo thung.

Ruatdika hian eng rilru nge a put ka hre chiah lo,midang laka rilru pe turin a la hma deuh maithei bawk,mahse Sawmtluangi hi chuan a hnial ka ring ta lo.Hriati kha Sawmtluangi khawih hi chu a ni thei lo ang.Simon-an a hmelma anih angin amah leh amah intihlum turin a nawr tih a sawi vek tawh.

Doctor kan hmuh zawh veleh in lam kan pan a,engmah that lohna ka nei hran lo.Khawlai a tawt tawh viau, Christmas a hnai tawh bawk nen mi zawng zawng an phawklek leh tan tawh a,Kum dang aiin khua a vawt hma bawk nen a boruak a nuam a,ka lung a leng ve ngawt bawk.

“Hmanzan khan min hmu duh i ti sia,engmah i sawi leh bawk si lo a” Sawmtluangi inbual tura a room a pan veleh a ti nghal a,a sawi dik.mahse ka hmuh duh chhan erawh a danglam daih tawh thung.

“Thil ka zawt duh che..” ka ti sep a,kan nula te an awm ve reng avangin kal sawnna tur ka ngaihtuah a,ka thian tak tak pawh nise kan Room lamah em chuan hruai ka duh lo.

“Pawn lamah inbia ila...avawt lutuk lo bawka’ kan nula te lamah ka thle zauh bawk.A Hrethiam tih hriat nan a bu zauh a,a tho chhuak nghal mai bawk.

Pangpar kara thutna awmah chuan ka thu a,ani erawh thu ve lo in a ding a,ni tla turin kan piah ral a chhun sen phut chu a thlir vang vang bawk.

“I birth day kan lawm zan khan ka chungah eng nge i tih ka hre duh?”

“Engmah ka ti hleinem,i rui hle a chu zawng chu animai”a thensak bawk.

“Hotelah khan min dah ngeia tiraw?” ka ti leh a.

“Um,i haw duh a,mahse i ruih vang khan Motor i khalh thei lo a,hruai haw che ka tum a,mahse inah i haw duh loh vangin Hotelah ka hruai ta zawk che.diktak chuan Hotela ka dahna room che kha Hriati nen kan riahna tura ka book ania” thil kal tawh ngaihtuah tih hriat zet hian a mit a chhing vang vang mai.

“I hria em ka hre lo,khami zan khan engmah ka hre zui miah lo a,zingah khan Hotelah khan ka lo awm ta ngawt,mahse mak leh zual ta chu...Khami zan khan tuemaw ka bulah a awm a,ka taksa khawih kualin video a siam bawk a….” ka thaw hawk mai…

A rawn meng kawk a,a hmel a danglam nghal vek bawk.”Engtin maw?” harsa tih hmel zet hian a ti chhuak hrawk bawk.

Ka sawi nawn leh,ka sawi chhung zawngin a mit a khap eih lo.

“Simon-an a hmu em?”

“Um,chu chu buai in tanna ania,mahse engmah i hre lo tlat chuan min ti buai”

“Ka hre lo tak tak,Hotel kan thlen pawn i muhil tawh a,chuan,hawsan che dik a ka hriat loh vangin Hriati ka ko a,i awmna Roomah khan kan riak ve tho bawk…” mak ti zet hian ka en a,Hriati a awm tawh si lo.A hmelah dawt sawi hmel a pu miah bawk si lo.

“Diktak chuan nangmah ka puh che a” nuam ti vak lo hian ka ti a.

“Ka dem hauh lo che,ka dah luh i ni a,mi puh tur alawm,mahse ka ni lo a,engmah ka hre si lo hi buaina anih tak ber chu a” ati leh a,ani leh ni lo ang takin a thutak viau bawk.

“Engtin nge ka tih ang ka hre lo.Simon-a leh Emily awmdan chu kei aiin i hrechiang a,chuan ka fa hi Simon-an a fa a nih loh thu a sawi bawk a…” a tawp lam a zuih ral a ni ber.

“Kan Ramhuaipa zet chu...a pawi miah lo,ka fa a ni mai…” min rawn pan a,ka bulah a rawn thu thla ve nghal bawk.Misual ni a ka lo ngai kha a ka inti takzet.

“Min tanpui rawh,kha thil ka chunga ti tu kha ka hre duh,chuan,Hriati that tu pawh ka zawng duh bawk” ka mittui a hnai kuar mai..

“Kei pawn chu aia duh ka nei lo..engtin nge ka tanpui ang che?”

“Sawmtluangi hi ngaizawng der rawh,kha video an siam zan khan Hotelah khan a awm ve tih ka hria,mahse a hnu feah kan hnena awm turin Shillong atangin a lo thleng chauh niin ka hre thung...Chuan,a dang leh...khami zan khan Hotelah Simon-a pawh a awm bawk,ani pawh ka hriat dan chuan hna thilah a zin bawk”

Min rawn kuah a,Pangparin min hliah avangin tuman min hmu thei lo ang tih ka hria.

“Ka pui em em ang che,Hriati thihna pawh kha i pasal telna niin ka hria ania” ati hrawk a,Simon-a a lo hua a,kut thlak hial a lo tum kha ka dem ta hauh lo.

Simon-a te lo haw hma hretin a haw a,kan pahnihin thil tamtak la ruahman thei lo mahila engemaw chenah ka thawveng hawk tho mai.Mahni ngawt chuan ka tan hneh ngaihna a awm lo tih ka hre tawh a,mahse tunah chuan ka thian leh ka unaupa ni bawk nen kan ni tawh a,engmah ka hlau lo.

“Vawiinah Ruatdika a lo kal a” a thawmhnaw hlih pahin a ti nghut a,min bia ni lo in a sawi ve tawp a ang zawk.

“Nia,min kalpui a”

“I awmdan hi a naupangchhia em mai” ngeiawm lutuk hian a nui hawk bawk.

“Nia,naupangchhia khawp mai,eee...Chuan Naute pa hmingah pawh khan Ruatdika ka dah ta mai ania” ka ti leh a,ka dah hauh lo,a kekawr hlih tuma a kawnghren a khawih tawh chu a tawp chut a,muangchang hian min rawn en a…

“Dam nge i duh thih?”

“Oh….dam te chu kan duh vek a,i duh ve lo ami?” ka tho tharh a,inhnuai lamah Apple ka dah vek,zanah ka ril atam takin Roomah hian chawp ka duh.

“Khawnge i kal dawn?” a ti tuar a,ka phu zawk bawk.Mahse ka in control leh vat.A tawngkam vin leh a chetdan maksak, mood danglam thut thut te hian min ti hlau thin tih a hriat ka duh hauh lo.

“Inhnuaiah...au vak lo la,ka beng a ngawng lo ania” ka ti hmak a.

Room kawngkhar hawn tumin handle ka vuan a,mahse ka tlai hret..Na zet hian ka kut a rawn man bet a,Kawngkharah min nawr bet nghal hmak bawk.

BLACK HORSE - 24

A chet dan teh thut chuan min ti hamhaih lutuk,ka rak thawt bawk.

“Eng nge i tih a?” ka ti tuar a,tawngka a min chhang lo in ka Darah a hmui in a rawn nawr a,rei vak loah a inlahrang lehnghal a,a hmui lum ham ham chuan ka beng a rawn fawp zui leh a,a nuam ka tih lam ai chuan ka hamhaih lutuk chuan min chet tir thei lo a,ka ding khawng lah mai.

Ka mit ka chhing ta ngawt,ka huatna leh tihnat ka duhna tam em em mahse kan inhip tawnna hi a la reh hauh si lo.Ka kawngah a rawn kuah a, a hmui lum ham ham chuan ka bek a rawn si a,ka samah a fawp zui leh nghal a….Ka harh kawk mai...Ka special na emaw tia ka lo lawm ve thin na leh ka habbit lo ni hman hial kha...Kha thil ngei kha Emily chungah pawh a ti ve tho..

“Min thlah teh a” ka beisei aiin ka aw a pangngai.

“Ni lo e..”ka kawr lum a rawn zen a,mahse keimahah engmah danglam thlen tir ka tum tawh loh avangin ka in control lui tlat.

“Emily hian i khamkhawp a pe meuh na che nge?”

A kut che a tawp hmak a,a insangmar talh talh chu ka hrethei a,ka pawisa chuang lo.

“Emily….hreptak hian..” min thlah a,a kalsawn zui nghal daih bawk.

Hawi let tawh lo in ka chhuak a,ka khup a sai dar dar mai.Apple ka la chhuak a,Simon-a awmdan teh thut kha ka ngaihtuah leh a...Khatiang khan awm fo lo se ka ti takzet.Thinrim ila,ngeiawm tak tak leh ka rilru nat zual zelna turin awm se ka duh zawk.Hmangaihna hian tiam chin a nei si lo a…

“I la mu na nge?”, Emily a rawn lut ve chiah.

“Mu chiah lo” ka ti ve mai,ka hua em ka hre chiah lo a,ka ngaina ngai hauh lo ang tih erawh ka chiang thung.

“Thil sawipui che ka duh a...eng lo ania..Simon-a leh kei hi…” a sawi zawh hmain ka ban ka vai zauh a,ka nui lui sang bawk.

“Ka hria lawm..sawi duh suh,nghah rei angai lo ang tih ka tiam che” ka ti a,ka aw a nghet charh mai.

A hmai a dang lap a,engemaw sawi tum niawm tak hian a ang ziau bawk,mahse a chip leh hmak a,min en lo in ka hnunglam a en daih bawk.

“Mate,i phone hi…”Simon-a aw hian a rawn ti a,ka inher vat a,ka phone a rawn lek hnai a,ka ban thuai a, tunge min lo call tu ka en a,Ruatdika…

“Hey,engnge ni ta?” zang khai vah hian ka ti a,ka awah chuan phurna a lang chhuak chiang viau.

“I phone keng thin teh,in pa hian ka biak peih loh ang bawkin min be peih lo ania” a nui zui hak mai.

“Sorry...ka lo hrereng dawn nia..lawk aw” ka phone ka la sawn a,Simon-a ka en a.

“Min lo hrethiam lawk aw, a pawimawh deuh a” ka phone ka lek kang zauh bawk.

Min chhang lo in a bu nghut a,min melh ngur bawk.Dawhkana ka Apple lak tur awm chu ka la a,hawi let tawh lo in inchunglam ka pana,Ruatdika ka be pah mawlh mawlh bawk.

“Eng nge min lo biak chhan?” Room ka thlen veleh ka ti tha leh a,a nui hawk hawk ri ka hre zui zat bawk.

“I han thawveng kual vel chu i thiam hle mai,i pasal tan chuan i ngeiawm ve khawp ang” a nui leh kur kur a,ka then ve sak tho.Khatianga han thawven kual vel kha engtik laiin nge ka chin tan ka hre lo,mahse nuam ka ti tih erawh ka hrechiang.Ka awmdan thawveng leh pawisak nei lo lutuk khan an awmdan a ti danglam miau alawm le.

“Sawi mai mai teh…”

“Thil pakhat hriat ka nei a,naktukah i hman chuan kal ila,hrilhfiah pah che in a hmunah kan kal ang chu”

“Khawiah nge kan kal ang?” ka ti ve thung.

“Hotelah khan….Bakah thil dang awm a awm bawk a”

“Hotelah chuan ka kal ngun tawh,engmah hmuh ka nei lo..tangkaina tur a awm lo zawk” ka ti ta duah,a thaw hawk mai.

“Ok,mahse,Hotel ah khan thil thleng an hrilh kim lo maithei che asin” a ti leh a,min hrilh ni lo in ka en zawk.

“Keimah ngeiin CCTV record ka en vek alawm,mahse ka duh lai kher kha a bo vek”

“Um,mahse,Staff pakhatin min hrilh hi chu a danglam daih maithei..” ka beng a verh zak mai.Staff te lam ka la be kual hauh lo,ka kal ve pawn Zorina hlir ka hmu ziah zawk.

“Engthil nge?,diktak chuan Simon-a hian kal chhuah a phal chiah lo in ka ring,Motor khalh a phal tawh lo a” ka ti halh a.

“Naktukah le...i pasalin kal chhuah a phal loh pawn ka thil hriat dang hrilh tur chein ka lo kal mai ang,tunah chuan hahdam la,muhil rawh, hna ka nei tlat”Sana ka en a,dar 11:30 a pel tawh..

“Eng hna nge tun ang hunah i thawh ang?”

“I hna min pek kha bawh zui a hun a” ka hrethiam lo deuh nangin ka hrechhuak leh lawi.

“Ok,nangmahah ka innghah nasat zia i hriat kha…” ka ti sep a,ka ti tak tak bawk.

“Ka hre reng ang,i tan anih phawt chuan engkim ka ti thin tih i hria alawm”

Kan inbiak zawh hnuah pawh Simon-a a lo la let ta lo fo.A awmdan ah khan Hmeichhia a mamawh hmel em mai a,Emily bulah a riak dawn ani mahna le..

Ka harh in khua a lo var tawh,ka thu chhuak thuai a,Sofa lam ka en a,ka rin dan chiah.Simon-a a lo awm lo.Mutna hnu ani lo tih  a hriat reng bawk.

Inhnuai ka pan a,Simon-a inkhel a lo haw ve chiah thung.Hunawl a neih phawt chuan zingah Badminton a khel deuh ziah a,a chang chuan Gym ah a kal nghal thin bawk a,a pian a nalh a,a in uluk bawk,hei vang hi a ni ngei ang,eng thawmhnaw pawh a inhmeh viau zel

Thawmhnaw ha lo pawn a nalh zia a lang chiang zawk mah..hreptak hian..ka ngaihtuahna chuan ka biang a ti sa hat hat mai.

“Good Morning” a rawn ti sup a,chhan loh ka tum zet a kan nula a awm ve avangin ka chhang leh ta zawk.

Pawn lam ka pan a,khua a dur a,ni pawh a lang lo.. Sawmtluangi walk zo a lo haw ve chiah bawk.Thlasik a ni tawh bawk a thlan tla hnepa tlan a har tawh ani ang,a hah hmel nen a hul phak mai.

“Morning...i mu tha thei em?” a rawn ti a,ka bu ringawt.

“Vawiinah U Ruatdika a nen kal chhuahna tur kan nei a..” a hmel hlim sarh mai chu ka en a,eng vanga hlim nge anih ka hre thei mai.

Simon-a a duh viau emaw ka tia,zankhat thil thuah Ruatdika vanga hlimna a chang leh mai thei hi a mak..Tianga rilru nghet vak lo nih ve hi ka chak ru ve ta hial mai.Kei ve hian ka chunga a thil tih sual leh dik loh zawng zawng pawh hre si in ka Hmangaihna vang hian na lutuk a tuar ka la hlau ta cheu.

“Ehe...a va nuam awm ve” ka ti ve a.

“Aih..chutiang a ni lo,a hnaah ka pui dawn zawk a..” ka bu leh ringawt,engtiangin nge hma a lak ka hre tlat lo.

“Enteh,chhuahpui ila i hua angem?” ati leh lawi a..

“Teuh lo mai..ngatinge?”

“Hriati kha i cousin a ni sia..” a hmui hnuai lam a pet fan mai.Ka hrethiam,diktak chuan ka ngenna vanga kawp ni mahse Hriati tan ka na ngei alawm,mahse ka tihlan kher a tul hauh lo thung.

“Pawi ti suh,nang pawh ka pasal nau i ni tho alawm” ka nui lui sak bawk.

“Um,ka va inbual lawk ang” ati a,ka bu nghat a,inlam a pan chu ka en zui vang vang a,Simon-a nen thisen inzawmna an nei lo tih ka hre tawh,engtik niah emaw chuan he nu pawh hi tu nge anih ka la hre chhuak ngei ang.

Inchhung ka luh leh pawn Emily ka la hmu ta chuang lo.Kitchen lam ka pan a,a hma kha chuan keiman ei ka siam ziah a,tunah chuan ka ti ngai ta lo.Sangtei a fel a,inchhung lam chet khawih tu tur midang an awm bawk a,Kitchen lam hi chu a kutah a awm ta deuh vek.

“Eng nge i ei ang?” a lo ti thuai a,engmah ei chakna ka nei lo.

“Ka ei lo mai ang...eee,Juice min lo pe la..” ka ti a,keimah hian ei chak lo teh mahila ka pum chhunga ka thawk ruala thaw ve a nung ve a awm tlat,chuvangin  engemaw tal ei ka mamawh tih ka chiang.

“Juice lo thil dang a ngai lo maw?”ati leh a.

“Cake a awm chuan..” ka ti leh a,Cake hi ka ngaina em em a,siam fuh vak loh pawh ka ei thei viau zel.

“Nizan khan U Simon-an a lo hawn a…” Simon-a pawh hian cake ka ngainat zia a hria.

“A that hlauh chu,a ei tawh em?”ka ti a,a la ei loh tih a sawi a,Cake leh Juice min rawn pe a,pawnah khan ka awm rei vak lo a,a inbual anih ka ring ve ngawt.

Ka ei zawh hnuah Sangtei eisiam ka en pui leh a,Bawngsa roast  leh Antam a kan pawlh a,a lo awm tirh khan eisiam a thiam tho nangin Simon-a duhzawng a ni chiah lo a,ka ziritir a,zirtir rei angai lem lo.

“A va rimtui ve…”Simon-an a rawn ti a,a inbual zawhna a la rei lo tih hriat zet hian a sam a hnawng chap a,a rim pa zet chuan ka hnar a rawn verh zar bawk.Jogger pant a ha a, Sweatshirt pawl  takzet a ha thung.

Dinning room leh kitchen hi a inzawm deuh titih a, a karah eitur chhawpna tur,Teak a siam,kawngchen deuh thaw a awm a,a chang chuan Dinning Table kil kher lo pawn thil ei nan kan hmang fo bawk.

“Nia,thil i ei tawh em?” pangngai takin ka ti a.

“Aih,i ei tawh mi?”, ka juice inna ruak a la awm a,Cake erawh a la sawn tawh thung.

“Um,ka riltam lem lo a,mahse ei ngei ka ngai bawk sia” ka nui a,Sangtei a lo nui ve hak hak bawk.

Engmah sawi lo in uluk zet hian min rawn en a,ka dul a en thla leh a,ka ip chawih mai..Ka in check-up naah khan engahmah Ruatdika hming ka dah hauh lo.Mahse,a huat zawng taka awm ka duh vangin ka Naute pa hmingah Ruatdika ka dah tih ka sawi lui a ni mah zawk.Ka rin ang ngeiin a thinrim ta chiah bawk.A hnu a thil thleng erawh kha chu….ngaihtuah loh ka duhzawk.

Sangtei’n eitur a chhawp sak a,a tlangpuiin zingah hian chaw pangngai kan ei vak lo,siam erawh kan siam vek tho.A duh tan chaw eitur a awm a,thil dang duh zawk tan pawh a awm tho bawk.Kan nupa hian hnathawk ve ve kan nih avangin dar 9 velah kan ei tlangpui a,kan chhuah dawn loh ni chuan juice leh thei lam kan ei a,Dar hnih vel bawrah chaw pangngai kan ei chauh thung.

“Emily hi a nuam meuh lo amwni a reh ka ti riau” amah pawh en lo in ka ti a.

“Zingah a kal tawh” ka en vat a,min en lo in a thil ei lai a ei zawm mawlh mawlh thung.

“Khawiah maw a kal?”

“Hnathawh tur a nei a,bakah a Inluah kha an siam zo tawh a,hetah a cheng zui lo ang” ati leh a,chhan ka tum ziau a,mahse ka chip leh daih..Eng nge ani zawh hi a tulna? ka duh chuan ka zawng ve mai ang chu..

“Anih chu mawle,la awm se tha tur,a nuam ve a” min rawn en a,engmah a ngaihtuah awm ka hrethiam lo.Ka thilsawi vang khan a thinrim nge thinrim lo pawh ka hrethiam chuang lo.

“Vawiin chhuahna tur i nei em?” teh daih chuan a..

“Neih pawh ka va hre lo,eng nge ni a?”

“Shillong lama ka thianpa te nupa an lo kal a,Dinner ei pui turin min rawn bia a..” a thian tu ber nge ka hre lo.

“Chuan…?” ka ti ringawt.

“Dawr lam ka va tlawh kual zuai anga,ka rawn lam ang che…”ati awlsam leh mai.Mahse,ngaihdan hran ka lo nei leh hman tawh tlat.

“Min lo lam duh lo mai rawh,Ka nu te in lamah kal ka lo tum deuh a,i hman hunah min lo bia la,ka lo kal mai dawn nia”ka ti a,Ka nu te tlawh ka tum hauh lo.

“Motor khalh rih suh ka tih kha,ka rawn haw hma ang,i Nu te chu kan tlawh mai dawn nia” hnial chi loh khawpa khauh hian a ti hmuk a,Sangtei a awm ve bawk nen chhan enah ka en ta lo.Thuawih awm fe hian ka thu ngawi ta hle hle.

A chair a nawr sawn a,room lam a pan zui lehnghal mai.Kan inneih tirh lam kha chu nise insiam pui turin ka zui chho ngei ang,mahse tunah chuan engkim a danglam vek tawh tlat.

“Emily kha ka ngaina miah lo” Sangtei tawng ri ah chuan ka phu deuh zawk a,ka lo in ngaihtuah kual leh chiam hman tawh.

“Ngatimaw?” ka ti ringawt,kei ang em chuan a huat ve loh ka beisei.

“Ka hre chiah lo,ka ngaina lo ve tawp.Engtinmah minti pawh a ni lo” ati leh a,sawi duh chiah loh nei niawm tak hian a awm bawk.

“A fel alawm..i la hriatchian loh vang mai mai anih kha” ka ti a, Sawmtluangi a rawn lut ve ta bawk nen engmah kan sawi zui ta lo.

Simon-a chhuah hnuah bawk Ruatdika a lo thleng a,a hmel hmuh a nuam leh viau mai,Hriati boral a tuar nat zia ka ngaihtuah a,hlim se ka duhsak takzet.

“Khawi lamah nge in kal dawn?” ka lo ti thuai a,a thle buk a..

“Hna hi ka thawk leh tan tawh ang chu ka ti deuh a,mahse mahni mai chuan ka zuam meuh lo a, Sawmtluangi hi min pui turin ka rawn sawm mawle” ati a, Sawmtluangi hmuh loh in mit a siai zauh bawk.

“Ka va insiam lawk ang,ka rin aiin i lo thleng hma a” tih pahin Sawmtluangi a tho a,Room lam a pan a,Ruatdika’n a en zui reng chu ka thlir a,Hriati bawk ka hrechhuak leh tawh.

“Ka hrethiam che,ani aia pui tu tha i hmu hauh lo ang” ka tawngsual tih ka hria,tunlai chu fim taka in ngaihtuah  ka harsat ta tlat,mahse ka sawi zo vek tawh,awmzia a awm tawh lo.

“Tu emaw chu a awm tih i hria alawm,a hmun ruak hi midangin an hnawh khah zawh ka ring lo a,ka phal lo bawk” a ti sup a,a hmelah na tuar hmel a lang chiang viau bawk.

“Sorry...ka sawi tum tak pawh a ni chiah lo…”ka ti bah nawk mai.

“A pawi lo,i sawi dik lo chuang lo a,hmalam ka pan a hun tawh a” a nui suk bawk.Ka thaw huai mai.

“Nia,hmalam pan tawh rawh,chu chu Hriati pawh khan a duh ang tih ka chiang..”

“Hey...nang te hi..nangman tih luihna in min nawr a,i serious leh ta si tihna mi?”

“Ka hre lo,amah hi ka rin ang a lo ni lo anih chuan ka thian tha ber nupui atan chuan ka pawm zawng ani maithei”

“Um,ka lo ngaituah ang..mahse,ka nunah hian Hmeichhe pakhat,pawimawh em em..thi ve ngai lo a awm tih nang aia hrechiang tu chu keimah ka ni mai a,chuan,Sangpuii pawh …” ka bu nghat a,kum a liam fe anih pawhin Hriati kha chu a theihnghilh leh tawh ngai lo ang.

“I thil min hrilh tur kha…” ka hre chhuak chiah.

“Tunah chuan a hun chiah lo,zan lamah emaw tlai lam ni se”

“Zanah Dinner eipui tur kan nei a...a hmun tur ka la hre miah lo” a chek tlak tlak mai.

“A hmun tal lo hriat tur alawm..a pawi lo,Simon-a nen a mi?”

“Um,a thiante Shillong lam ami an lo kal a,a hmun tur pawh hria ila engtin nge i tih ang?” ka ti leh a.

“Tihpalh thil thu in  ka lo kal ve mai ang chu..tak takin Hotela thawk pakhat kha niminah ka nau pakhatin a lo va hmu a,khami zan khan Simon-a leh Sawmtluangi hi Hotelah an awm iti a,an awm lo, Sawmtluangi hi nilo in Emily zawk hi tih a sawi a, Sawmtluangi nen an awm tih kha tu hrilh che nge?” ka ang pham mai.

“Zorina...aaa,ka hrethiam teh nuaih lo e a” ka ti halh a,ka hrethiam lo tak tak.

“Thil pakhat leh,tuna Simon-a thian lo kal chu ka hriat ka ring,a thian ni lo in Sumdawnna lama a thawhpui niin ka hria” a ti leh a,

“Sumdawnna lam pawh nise thian a ni thei tho alawm”

“Nia,a dik..mahse,i pasal hian Naupang ro bu in a sumdawnna bul hi a tan tih i hriat angai ania” ka melh reng ringawt.

Chhan tuma ka ang ziau tawh chu Sawmtluangi ka hmuh rualin ka tawp leh a,an kal nghal deuh mai bawk nen chhanna hun a awm ta lo.Zorina biak ka mamawh ta tlat.Mahse,engtin nge Ruatdika nau chuan a va hriat ka hre lo.Zorina aia hrechiang tu tur an awm in ka hre si lo,Ruatdika lah in dawt a sawi ngawt ka ring bik si lo.Chu zawng zawng aia pawimawh zawk chu Simon-a bul tanna kha...Sangpuii khan a hausa thut tih a sawi a,mi pawn an ringhlel nasa a tih kha..

Zorina biak tumin ka bei a,a tlang thei der lo.Ni thum vel lai ka hmu tawh lo,Tlana, Simon-an a hruai daih a,Motor khalh ka hreh tawh si..Mahse,chhuah ngei ngei ka ngai..

“I lo haw tawh dawn em?” phone a pick veleh ka ti nghal tawng.

“Dawn lo deuh,nge nita?” bung zet hian a rawn ti a,a mood a fuh lo anih hmel viau.

“Kal chhuah lawk ka ngai a,a pawi lo” lo haw se ka ti nge Tlana ka mamawh zawk pawh ka hre chiah chuang lo.

“Taxi ko mai la,Tlana hi chhuahpui leh ka duh a”a hma ai chuan a aw a nem ta deuh.

“Ok...chuan,khawiah nge Dinner kan neih na tur kha?”

A rawn sawi a,vanneihthlak lutuk in Zorina Hotelah a ni hlauh zui.

“Hotelah chuan ka rawn hmu zawk mai ang che,haw leh ngai lo in ka insiam sa mai ang..” ka ti leh a.

“I tih dan dan le’ a ti leh nghut a,chhan pawh ka chhan let hmain a dah nghal daih bawk.

Ka insiam sawk sawk a,ka Taxi hman thin ka call a,Standah a lo awm remchang hlauh.Rei vak lo hnuah a lo thleng ve mai bawk.Sangtei hnenah ka kalna tur ka hrilh a,chaw kan ei nghal dawn tih ka hrilh bawk.

Zorina Hotel ka pan a,engvangin nge ka biak theih tlat loh ni??, Receptionist hnenah chuan a awm leh awm loh ka zawt a,a awm thu min lo hrilh a,a officeah hmu mai turin min ti bawk.

Room kawngkhar ka kik a,hmeichhe aw hian lut turin min rawn ko a,ka hawnga,ka beisei loh zetin Julie a lo awm tel ve.Min hmuh an beisei bik lo tih a chiang.

“Ehe...eng nge ni ta hlawl?” Zorina’n a lo ti thuai a,a mah ep zawnga chair awmah chuan thu turin min zaizir zauh bawk.

'Phone i pick thei lo a,biak che ka duh mawle” ka ti a,Julie a tho tharh mai.

“Ka kal ang aw,zanah kan inhmu dawn nia” ati a,Zorina Dawkana a bag dah chu a la a,nuam ka ti lo takzet.

“Ka tibuai che u in ka hria,zan lamah ka lo call mai ang che” ka ti a,ka ding ve nghal hluai bawk.

“Aaah,chutiang a ni lo,kal ka lo tum tak tak a”a nui sak bawk.

“Nia,kan lo inbe zo chiah alawm..ka va thlah lawk ang” ati a, Julie-in tha takin min mangtha a,kal a lo tum chiah tak tak anih pawhin nuam ka ti chiah lo.

Ka hawikual a,Simon-a office ang em chuan a liam lem lo,mahse nuam tak chu a ni tho.A phone dawhkana a kalsan chu a rawn ri a,lo pick ka tum lem lo.

A lo let leh mai dawn emaw ka tia,a lo let leh mai ta si lo,Balcony ah ka chhuak a,inhnuai lam chiang takin a lang a,Zorina leh Julie ding dun ka zuk hmu bawk,a phone bawk….

Ka pan hnai ta nge nge,ka la kang a,a number ka hmuh takah chuan ka phu nasa lutuk... SIMON-A

Ka pick a,mahse ka tawng hauh lo.

“I phone hi ngaihven thin teh,chuan,kan mikhual kha a lo thleng tep a,chu aia buaithlak chu i Hotelah khan Hmingthani a awm in ka hria,lo enkual ang che..a tan a hlauhawm lutuk ania” khauh zet hian a rawn ti a...Eng nge hlauhawm ka hre miah lo,hriat ka mamawh hek lo.

Naupang rukbo hmang..chuan,he Zorina nen hian ka hnung lam atangin min bei zui bawk.

BLACK HORSE-25

“Ka sawi i hria em?” thinrim hmel zet hian a rawn ti leh a,ka off ta ngawt.

Engtia awm tur nge ka hrethiam lo,Simon-a hian eng pawh lo ti se a  mak ka ti tawh lo,mahse Zorina hi chuan a tanpui ka lo ring ngai lo.Min thawng lutuk  a ka a vek nimaiin ka hria.

Ka ngaihtuahna a vir zawk mai,Zorina Phone ka la kang leh a,beisei ngam lo chungin ka hmet a,a lo lock lo hlauh..Simon-a call ka pick na ka delete nghal a,a missed call na erawh ka delete tel lo.

A dah dan ang thei berin ka dah leh a,ka lo kal chhuak ang nge ka nghak ang??? Ka hriat duh eng pawh zawt ila a chhanna chu Dawt bak a ni dawn hauh si lo.

“Ka rei em?”Zorina aw hian a rawn ti a,ka inher nghal a,harsa ti zet hian ka nui lui sak bawk.

“Aih,rei lo..i phone zawk kha a ri a” ka chil ka lem khalh mai.

A chairah a thu a,a phone a ban a,ka lo thaw dep dep thung.

“Nakinah ka call mai ang,eng nge i lo kal chhan lam sawi tawh ang” a nui hmel phena a nihna ka hriat tawh tlat avangin ka nui ve thei meuh lo,a bulah thlamuang takin ka tap a,ka rilru hahna te ka lo sawi vel kha ania...min va han hmusit dawn tak..

Mahse,Simon-a chanchin niawm tak leh Hotelah a thleng ve tih te,ka thatna tur leh min puih a duh vang niawm taka a thil tih te kha...Simon-a nen an tangdun anih si chuan engvangin nge Simon-a thil tih te kha min hrilh ka hrethiam lo.

“Hey…..’ ka hmai bulah a kut a rawn vai a,ka phu zawk bawk.

“Ka sawi i hre miah lo..”a chal a chuar tap mai.

“Hria e,ngatinge? sawi zawm la..”

A chair hnunglam a ngheng a,uluk zet hian min melh run bawk.

“Engmah ka sawi hleinem,eng nge i ngaihtuah a? he lai Room ah hian kan thu dun nangin nangmah a awm ang maiin i awm a” a ti a.Ka nui ringawt,ka nuih zat vanga nui erawh ka ni lo chiang..

“Thil ho mai mai mawle,hetah hian Dinner kan rawn ei dawn a,Simon-a ka nghak a..”

“Dinner ei tur tunah i lo kal maw?!” a aw ah mak a ti tih a hriat theih a,nuihza aw a tel bawk.

“Ka nu ka tlawh hmasa ang ka ti zet a,mahse a lo kal chhuak daih sia,ka rawn kawm mai ang che ka ti leh a” ka ti a,a nui leh a,mahse ka thusawi chuan a rilru a hmin lem lo tih a lang chiang viau.

“Nia,pawi miah lo,in pa chuan in lo kal dawn tih a sawi lawk miah si lo a,in nupa in Romantic deuhin in duh zawk nge?” a nui hawk hawk a,mahse ka nuih zatna te an thlawk bo vek.Chhan ka tum laiin vanneihthlak zetin a phone a rawn ri leh a,ka chhan buai angai ta lo..Ka thawl huai mai,ka chhang leh anih chuan ka dawtsawi hmasa zawk thup nan dawt dang ka sawi leh ngai ngei ang.

“Min lo hrethiam lawk…” a phone pick lo in a ding hluai a,ka ding chhuak ve tur chu min rawn khap nghal thuai bawk.

“Ka kal mai ang...i buai si”

“Thu rawh,thil pawimawh hrilh tur che ka nei ania”a vawikhatnan a aw a chang fak mai.

Muangchangin ka thu thla leh riai riai a,ani erawh Balconyah a chhuak a, Kawngkhar a rawn nem  khal zui  nghal hmak bawk.Tu a biak ka hre lo,mahse Simon-a bak a nih ka lo ring lo ve tawp,Zorina hmel awmdan kha ka hriattirh atangin khatiang hmel kha a la pu ngai hauh lo.

Eng nge ka tana hlauhawm tur ka hrethiam hauh lo.Simon-a dan ka tumna ah hian thil dik lo engmah a awm hek lo.Simon-a khan “kan mikhual tur’ a ti a,eng mikual nge ka tana hlauhawm tur chu ni ta ang???

“Hmingthan,ka chhuah lawk angaia,i duh chuan ka drop nghal thei che” rawn kal hnaih pahin a rawn ti a,ka duh leh duh loh min zawt tak nangin min thlah a tum tih a lang reng.

“Keimahin ka haw mai ang,bakah kal kual na tur ka nei a” ka ti ta ngawt.Khawiahmah kal kualna tur ka nei der lo.

“Engpawhnise i kalna tur lamah chuan ka hruai ang che...mahse,Motor i keng em?”

“Aih,Taxi..mahse,thlah ka ngai lo tak tak.

Ka ding chhuak a,min hnial tum niawm tak hian a ang zuau a,a chip leh daih.

“Ok,i tih dan dan le..ka hmanhmawh deuh a..” Kawngkhar lam a pan a,ka zui ve nghal vat bawk.Diktak chuan a khawsak dan a polite lo hlawm tawp,mahse,ka dem hauh lo.Hetiang hian ka kal in min la nawr chhuak ngai lo a,tur tu thil tha te a awm ngei ang.

Lift kan pan dun a,eng emaw hlauh nei niawm fahran hian a hawikual a,mi an awm leh awm loh a en nimaiin ka hria.

“Dik lo a awm em?” ka ti nge nge.

“Eng ti zawngin?” min zawt let ve khauh thung.

“Engtizawng pawh ka hre lo,i awmdan a mak em a” ka ti ta ngawt,Simon-a thil rawn sawi kha ka hria tih a hriat ka duh lo.

“Chhungkaw thil mawle,a ho lutuk..het…” ati zui nghal zat.

Lift a hman theih loh anih hmel khawp mai,min rawn en a.

“Step lamah kan kal mai angai dawn anih hi….” ati sup a,lift in inhnuai lam Floor a a chhuk thlak chhung a rei dawn loh tehlul nen...Step ah pawh kal ila a lo let leh kan nghah chhung nen danglamna a tam lo viau  ang.

Step awmna lam bang kil lam a pan a,a hnung ka zui a,step a rapthla tawh,tu emaw hian min rawn kal pel thuak in ka hria a,ka hawi let vat a,tumah an awm lo.Ka hresual chuan ka hre si lo.Ka hriatthiam chiah si loh hian ka chhungril a rawn man a,ka mur ar ar mai.. up

“Eng nge ni ta?” Zorina a rawn au a,ka en thla thuai a,ka lu ka thing ringawt.

“Ok,Step kal mai mai chu i va huphurh ve a,ka lo paw thla mai dawn che mi?” a nui hawk hawk mai.

“Ngai lo mai rawhse,Simon-a i ngam lo ang” ka ti a,a nui nasa zual sauh.

Step chung ber ka rap a,mahse dik lo a awm,ka hnung a za mar mar a,tu emaw min hnaih takah ding an awm in ka hria a,ka beng a thawk khum niawm tak hian a lum hak bawk.

Ka hawi let thut a,tuemaw hlimthla liam zawk ang mai hi a phe vuai a,ka hriat sual a ni tawh lo.Hmanhmawh lutuk hian Step ka rap thla leh a,ka hmanhmawh lutuk vang nge hnunglam atangin min rawn nem zawk ka hrethiam lo.Ka sawp thla hnawk a,ka rak tuar bawk.

“I na em?” Zorina a rawn thleng chho nghal a,ka nat leh nat loh   lam ka ngaihtuah lo,Naute a that leh that loh ka ngaipawimawh zawk.

“Aih,na lo in ka hria..mahse,Doctor hmuh ka duh” ka pum ka sawh ka hlauh lutuk na lamah ka banin ka in nem khalh hman hlauh.

“Ok...tehreng mai..nang kha lo kal hnai teh”Room Service la naupan hmel deuh lo kal chho mek chu a ti tuar a,kei lah thawh mai ka tum a,ka in bengkang dawn a ka kut a na nghal zawk a,ka la let leh vat bawk.

“Lo tum buai duh suh,ka lo pui ang che” ka kawngah a rawn vuan a,lehlamah Staff zawkin min rawn dawm ve bawk.

“Min kaitho la a tawk mai,ka na hleinem”

“Ngawi mai mai teh” ati duh lek.

Inhnuai lam pan lo in inchunglam bawk kan pan leh a,”Doctor ka hmu duh ka tih kha..” hrethiam lo zet hian ka ti a,a nui mai.

“Ka hria,hmu turin va pan kher angai hleinem,kan ko mai ang…”ati awlsam mai,a office ah bawk min hruai lut a,Sofa ah min thut tir a,ka kal thei lo pawh a ni hauh si lo.Min tih vel danah chuan na tak tuar ka ang khawp ang le.

A staff hnenah tih tur a hrilh zung zung a,kalna tur a nei bawk si nen ka inthlahrung lutuk a ka thu ngawi ngal mai,mahse,Ka phone a ri ta hlauh.Ka bag atangin ka phawrh a,ka beisei loh tawpin Simon-a...kan buai tak hnu hian Inah kan inbia anih loh chuan kan inbe ngai lo tluk a niber.

“Hello….”

“Khawnge i awm?” a dan ngai bawkin a aw a nem fahran lo leh pek.

“Zorina….” ka sawi hman tawk,Zorina'n ka phone a rawn phih thla a,a awmdan teh thut chuan min ti hamhaih lutuk a ka melh reng ringawt.

“Ka hotelah,ka office ah...chuan,i nupui hi ka drop dawn a,kan chhuk tur Stepah a tlu a…” an inkawm ngeih lem lo a,an inhre tha ve satliah a ka lo ngai kha ka lo a let tawp tih ka hre chhuak chiang ta viau.Tuna a biak danah pawh hian thian tha leh a close em em nen inbia an ni tih a chiang.

“Aih,phili vak angai lo,Doctor ka ko tawh a,ka rawn hrilh leh ang che..”ati leh a,Simon-a rawn tawng a ngaithla leh rih a,chet lak ngaihna ka hre bau lo.

Ka phone min rawn pe a,sawi mai tur pawh ka la hrethiam ta chuang lo.

“Khawi lai nge na ber?” chair a rawn pawt hnai a,min hmachhawn takin a rawn thu nghal bawk.

“Engmah a na lo,chu ai chuan tu nge i nih hi hriat ka duh ta ber mai” ka ti ta khauh zawk.Ka lei ka veng hman lo.

“Zorina..min hre na nge?”a nui tak nangin a nuih a za hauh lo tih ka hria,ka zawhna kha a beisei hauh lo bawk.

“Zorina...hmmm,a dik alawm,Simon-a hi i eng nge?”

“Ka thianpa...chuan,kan thenawmpa pawh a ni bawk a” a then leh sak tho.A nui thei reng mai hian min ti thinrim hlur bawk.

“In inkawmngeih hle tih ka lo hre lo a..” ka ti leh fak a,a mit a siai zauh a,engmah ka zawt chhuak dawn lo anih hmel viau.

“Nang leh Ruatdika ang em chuan kawmngeih lo e” Ruatdika hming a sawi laia a aw chang zet chu ka hriat hmaih hauh lo.

“Kei leh…” ka sawi zawm hmain ahma a Room service ka hmuh leh Hmeichhe pakhat hi an rawn inzui lut a.

“In lo thleng maw?,hei hi ania..”Zorina’n alo ti thuai a,min rawn pan hnai a,a rawn hruai tu chuan mamawh kan neih leh neih loh Zorina a zawt a,kan nei lo a,a kal thei tih a hrilh a,a chhuak zui nghal mai bawk.Hmeichhia zawk erawh chu sawi kher lo mahse Doctor anih ka ring ve mai.

“Khawngaihin mu la,chuan,Naute a that leh that loh ka lo en ang” ati a,a hmel tha lem lo nangin a hmel hmuh a hahdam a,a aw a dam thlap bawk.

Ka thutna Sofaah ka mu a,ka dul a rawn khawih a,Zorina a tho vut a,Balconyah a chhuak zui nghal daih bawk.Ka dem lem lo,mahni Nupui leh Bialnu pawh ni lo dul lang vek han hmuh kha thil nuam a ni hauh lo ang.

“Naute a tha a,nangmah zawk hi na i nei em?” ati dam thlap a,ka thaw huai mai,tunah hi chuan ka naute hi engtikawng mahin chan ka tum lo bur.

“Ka inbengkhalh na lamah ka ban hi a na deuh a,mahse na tak a ni lo” ka ti a,a rawn khawih a..

“Ruh lam chu ka zir lam ni lo mahse ka lo en tho ang…um,a tliak lo a,a tha anih hi,a ziawm leh mai ang” a ti leh a...Ka va han vannei tehlul em..

“Ka lawm lutuk,i lo kal thei hlauh a,Dik tak chuan Naute ber hi ka ngaihtuah a” ka ti a..a nui sak mai

“Ka hrethiam che,i kut khan in bengkhalh hlauh lo la chuan a pawi viau maithei...mahse,tunah chuan a tha vek e” ati leh a, a tho a,a hmanrua lo ken a bagah a khung fel nghal mawlh mawlh bawk.

“A tha vek em?” Zorina a rawn lut a,ka that thu a lo hrilh a,a hmela lawm hmel ka hmuh rualin mak tihna bawk..Ka naute hi Simon-a fa ni lo in Zorina fa zawk lo ni ta se…..ka lu ka thing nawk mai..Ngaihtuah pawh ka ngaihtuah duh nek lo e.

Lawmthu a hrilh a,a haw tur chu a zui chhuak a,kei hi engtin nge ka awm dawn ka hrethiam lo.Simon-a lo kal nghah nan chuan a la hma lutuk,Ruatdika lah Sawmtluangi nen an chhuak daih bawk si.

“A lawmawm hle mai,in pa pawh a lo thleng tep ang” a rawn luh pahin a rawn ti a,a thutna ngaiah bawk a rawn thu leh a,min en vung vung bawk.

“Hrilh loh ka duh teuhlul nen… a thinrim ngei ngei ang..oh...i kalna tur kha..” ka hrechhuak thut,a hmanhmawh nasat vei nen..

“A pawi lo,midangin an lo ti mai ang,Nang aiin in pa ka hlau zawk” teh daih a.

“I sawi awmzia ka hre lo e a” hrethiam lo fe hian ka ti nghat a.

“Ka hotelah i tlu a,i pasal ka hrilh loh chuan min that duh mai ang” a nui leh ta..

“Engtinmah a ti hauh lo ang che...kan nupa buaina neih i hriat kha..” ka ti lui ve salh,ka tana thahnem ngai nge anih Simon-a tan zawk ka hre tlat lo.

“I rilruah eng nge awm ka hre hauh lo,chuan,min ringhlel tih erawh ka chiang,thil pakhat ka hrilh ang che.I pasal hian chhan awm lo in engmah a ti ngai lo ang ka tih kha ka ti tak tak mai ni lo in ka chiang zawk,chuan...i Pasal hian a HMANGAIH  takzet bawk che..”

Ka nui chhuak hawk mai..Min HMANGAIH anih chu…!!!!

Ka chhan hmain Simon-a a rawn thleng ta hlauh,a necktie a awrh tawh lo a,a jacket chhing tei tawi,a taksa rem zaih a thui erawh ala ha,a overcoat erawh a phelh daih bawk.

“I tha em?” a rawn thu ve nghal a,a awmdanah chuan engmah ti der hmel a lang lo,Best Actor award la tlak a va han ni tak.

“Ka tha vek e,i lo kal duh kher anih kha,Dinner ei nan chuan a la hma dawn sia,ka haw leh rih ang chu ka lo ti a” hahdam leh zangkhai tak hian ka ti let a,ani chauh hian lemchan a thiam reng reng lo.Ka pasal hi Actor tha ber anih chuan kei pawh Actress tha ber nih ka tum ve mai ang chu.Kawngdang a awm lo.

“Dinner lam kha chu theihnghilh hmak rawh,kan haw dawn nia” a kut zungtang sei thlurh chuan ka kut a rawn hum a,ka lo ip leh chawih hman pek..hahthlak hian a..

“Hey...ka awm ve reng hi…”Zorina nuih za insum ri ka hriat rualin a awm ve tih ka hre chiah tak tak..Simon-a ngawt ka lo ngaituah leh vang vek.

“I ti lawmawm hle mai,kan kal phawt ang” nelawm lo zet hiana ti hmuk a,an in pawh em em a,an tangrual a,min beih rawn bawk tih hi ka la hre lo ah angai ani mahna...A pawi miah lo,ka hriat loh hian thil an zep hnem em mai.

Lift nghah buai ngai lo in  hmantheih nghal hlauh, Zorina'n min zui lo hlauh bawk.Kan pahniha kan awm veleh ka kut a vawn ka thingthla nghal a,inkhawih emaw insik pawh ka peih der lo.

“Engtin nge i tluk a?” a ni pawh a nihna ngai a lo ni ve leh hman tawh.

“Ka rap sual anih ka ring”

“I va chiang lo ve,i rui ami?” ka thinrim phat mai,mahse min chhaih thinrim a tum ni a ka hriat avangin ka insum leh rih.

“Tlem ka in a..enteh,ka naute hi Zorina fa hi anih i ring em?” zawhna atthlak anih zia ka hai lo,mahse,an pahnih inkarah hian ka tla zep lui thei,kawng thui tak ni lo mahse tlem tal chuan an inkar a buai ve phah mahna le.

“Eng maw?” min rawn hnaih a,vanneihthlak takin lift a ding ta hlauh.

Ka kawngah a rawn kuah a,mi dang kan kal pelh apiangin min en zui zel ang tih ka chiang,kan insan hleih bawk si..dik tak chuan en zui loh a har khawp ang le.

Dinner eitur pawn kan kal ta lo,In kan thlen thlengin vawikhat mah kan tawng leh ta miah lo bawk.

“Ka chhuak dawn ania” Roomah a rawn dak a,chhun lama a thawmhnaw hak kha ha tawh lo in Leather Jacket dum,a taksa rem zaih a thui a ha a,zipper a zip vek bawk.

“Min hrilh kher angai hleinem”  ka tum loh tawpin ka ti bak hlak mai.

“Ka thiante khan hmuh ve che an duh a,mahse i kal thei ta si lo a,naktuk tlaiah hetah an lo ei mai ang” ka chhan dan ngeiawm zet chu a haider lui hmak mai.

“A tha anih chu..’ ka ti leh hmak a,Tv lam ka melh san leh daih.

A rawn kal hnai ri ka hria,en lo turin ka insum hram hram bawk.Khum a che dat a,ka insangmar nghal teuh bawk.

Ka samah a rawn fawp zauh a,ka thu khawng lah mai.

“Khati khan min ti tawh suh ang che”

“Sorry” abak engmah a sawi lo,a in her a,Kawngkhar a pan a,dimte hian a rawn nem khar leh bawk.

Chaw tlem ka ei a,khum lam ka pan lehnghal deuh mai.Ka kutin min tur at at tih loh chu na dang ka nei lem lo.

Ka phone a ri a,en mang lo in ka pick a,Ruatdika a lo ni a,vawiin khan Sawmtluangi a lo dah laiin ka awm lo a,ka haw khan Sawmtluangi zawk pawh a lo chhuak leh hman a,a lo la haw ta lo.

“Eng nge ni ta?”

“Video ka lo thawn che a,i lo en dawn nia”

“Eng video nge?”

'En la i hre mai ang” ati leh mai.

“Khawnge i awm?” ka ti leh rih..

“Zorina te Hotelah..i pasal te nen kan in hnaih viau bawk..lo en vat la” a rawn ti leh a,ka off a,min lo call hma khan WhatsApp ah a lo thawn a,Tv ngawt ka lo en avangin ka lo hre miah lo.

Ka open a,Simon-a ka hmu a,Pa pa khat,upa hmel deuh a awm a,Simon-a bulah Emily a thu bawk,A zin emaw ka tia...ka kal theih tak lohah chuan a hruai leh si a ni ngei ang.

“Hei hi ka Nupui,Emily anih hi…” a bula pa upa lam thu hnenah chuan a ti a,ka nghawr vek..

Ka ai awhin a hruai ang tih kha a tir atangin ring lawk mahila a sawi ngei ha hriat chu na tak a ni.