BLACK HORSE-30

BLACK HORSE-30

“Maw?!” ka tawngchhuah theih veleh ka ti chhuak thei tawk,sawi tur ka hre lo a,sawi tur pawh hria ila ka sawi thei chuang lo ang.

“Um,he thil vang hian Tetea pawn mahni intih hlum a lo tum phah tawh bawk a..Simon-a hi a ngawi thei ka ti asin” a ti leh a,a kekawr ipte zenin a ding a,min en lo in ral lehlam ah hmuhnawm a awm ta emaw tih turin mit khap miah lo in a en ngai a en reng bawk.

“Ka awih thei lo...Ka pa hian tumah a thah ka ring lo” mahni inringtawk lo zet hian ka ti leh a.

“Ni lo se ka tih lutukna hian mumal nei lo in engchen nge min awmtir ka hre tawh lo,mahse,pawm mai hian a hahdamthlak”

“Ka pawm thei lo,enteh..ka pa hi i hria alawm,zu pawh a in ngai lo a,engmah thil dik lo a tih pawh ka hre ngai lo a..engtin nge midang sawi i awih theih?” ka ti leh halh a,ka sira thing thutthleng awmah chuan muangchang hian ka thu thla hnak a,ka chau hluah hluah.

“Midang sawi awih thin ka niin i hria em? a ti sup a,ka ngaihtuah a,ka u mahnise ka chhuang ru thin kha ania,midang sawi vang ngawt chuan a buai hauh lo ang.

“Mahse….” ka sawi zawh hmain min rawn en a.

“Simon-a hian i himna a duh avangin loh theih lohin min hrilh ta anih kha,min thawnga,ka thinrim bawk.Mahse,ka chhui a,ka zawnga,chhanna ka hmuh takah kha chuan engkim a tawp kha tha ka ti zawk.Simon-a khan then tumna che a nei lo,mahse,ka la chhuak lui che a,chuvang chuan in inthen chhan pawh ka zawh kher che angai ta lo anih kha” a ti leh duah.

“Ka nu in a hria em?” ka natna lam ai chuan ka nu ka ngaihtuah zawk.

“Hre lo,a hre ngai lo ang” a awki hriam hraih chuan a sawi ang ngeiin a ti ang tih min rin tir thlap bawk.

Ka u in min chhuksan hnuah pawh reife keimahin ka awm leh a,ngaihtuahna mumal ka nei thei bawk hek lo.Simon-a ka khawngaih nge keimah ka la inkhawngaih zawk pawh ka hrethiam lo.Engtin nge a thlen theih ka hrethiam lo hul hual bawk.

Ka nu in min rawn koh takah chuan phurna nei miah lo hian ka chhuk a,ka pa huat loh tumin ka beih nasat angai dawn,Simon-an ka nun a tihrehawm ni a ka hriat avanga ka huatna te kha a la reh der si lo.Engtin chiah nge a lo tuar ve ang??? Ka pa a hmuh apiangin a na a lo thar ziah anga….ka lu ka thing nawk mai,ngaihtuah loh law law ka duh zawk,amah vanga inthiamlohna neih ka duh lo.

Ka thu hle hle thei lo,diktak chuan ka hmu hreh hluah hluah,engmah la hre lo chu ni ila a lo kal laia lo awm ai chuan chhuah ka duh zawk ngei ang.Mahse,Ka pa in a chungah eng nge a tih ka hre vek tawh a,haw tur nge ka nih a khawngaih tur pawh ka inhrethiam tawh lo.

Door bell a rik apiangin ka lungphu a rang nghal dawt dawt ziah bawk.Mahse,a lo kal mai lo,Ka pa a lo haw a,Tetea a lo haw veleh bawk.A lo la thleng ta chuang lo.Emily a lo kal ve ngei bawk ang,min then duh lo mahse phuba lakna ka nih tlat avangin atan chuan Hmeichhe dang nen danglamna kan nei lo a,Mala nu ka nihna chauh hi danglamna ka neih chhun chu animai.

“Engemaw i ngaihtuah le?” ka nu tawng bak hlakah chuan ka ngaihtuahna a tangin ka harh chhuak zawk mai.

“Eng lem mah,eng nge?” ka ti a,Mala ka mal chungah a muhil bam a,a hmeltha zet chu ka en a,ka hmangaih hluah hluah.Engtikahmah Simon-a hi ka ta a ni leh tawh ngai dawn lo,ka neih chhun chu Mala hi a nimai.

“Simon-a hian lo kal hi a chak vak bik dawn lo ania,i hmu peih lo viau anih pawn lo tuar mai ang che” a ti a,ka thin a rim lo,ka nuih a za zawk.Kei ai chuan a thinlungah a makpa hlui hian hmun a la chang lian ta zawk cheu mai.

“Biak chakna pawh ka nei hleinem” ka ti nghat a,Mala ka pawm  tha a,a khumah ka mut a,vanneihthlak zetin a harh lo hlauh bawk.

“Engthil pawh lo ti se Mala pa a ni tih hrereng la,i inchhir lehna tur engmah ti suh” a la ti ta fo.

“I tan hian kei nge pawimawh Simon-a?’ ka ti ta thlawt.

A hmelah ngaituahna buai hmel a lang zauh a,a reh leh mai.Za vak lo hian a nui a.

“Ka fanu i nia lawm,ka neihchhun i ni a,ka tan tunge pawimawh min zawh angai hleinem” min rawn pan a.

“Mahse,i tawng danah khan Simon-a i ngaipawimawh em alawm”

“Ka tan chuan ka fanu hi i pawimawh ber a,chuan,Simon-a pawh hi ka makpa a lo ni tawh thin a,in inthen avang ngawt hian kan inzawmna a chat ta tihna a ni lo..In inthen khan na chu ka ti,mahse ka haw thei tlat lo,tunah pawh a fapa hmuh chakin a lo kal a,atan lo kal hi a chakawm bik lo ang,mahse a tul a ti a a lo kal dawn animai,hriatreng tur natna insiam sak tawh lo ula ka duh vangin ka sawi anih kha..Puitling i ni tawh a,engkim i hrethiam alawm” min rawn kuah a,kuah let ve lo in ka ding tlawn ringawt thung.

Ka rin ang ngeiin Emily nen an lo kal a,Tlansanga leh ka nu an lo kal tel bawk.Ka tang teuh mai.

Kum khat vel ka hmu tawh lo a,tlemin a hang zual a,a hmel a nelawm lo zual sauh bawk.Kamiz pawl dal lam a ha a,a pian nalh zet chu a phuar tanga,a ban a thlep chhing a,a kekawr  thui nalh zetah chuan a bilh lut a,a lang lian ta sawtin ka hria.Min rawn en zawk a,min be lo in ka nu nen an inbia  a,midang nen an inbe bawka,Diktak chuan sawi ve tur ka hre hauh lo.

Vanneihthlak zetin Bawihtea  harh tawh  hlauh a,kei ni lo in Mala zawk an buaipuia,ka leh awl ta hlauh bawk.Ka hahdam huai ang chu ka ti a,teuh lo.Min ngaisak lem lo a an khawsa chuan min ti thinur letling.

“I dam tha em?” ka bulah ka nu a rawn ding a,kan inbiak lohna chin pawh ka hre tawh lo.

“Ka tha e,nangni zawk?” ka ti ve a,Simon-a chil ka chhak khum hnu khan min be mumal tawh lo a,a haw thlak hnu phei kha chuan min rawn be ta miah lo.

“Kan tha,inneihna lam buaipui hian kan buai em a” a ti a,ka tum loh tawpin ka chhungril a nghawr dawt mai.

“Um,anih chu..” ka ti chhuak thei hram.

“Naute tha taka i lo enkawl vang hian ka lawm khawp mai” a ti leh a,ka bu ringawt.

Living room lam ka en a,Emily-in Bawihtea a pawm a,a bulah Simon-a a thu bawk,chhungkua an ang takzet.An hmuhnawm hluah hluah bawk,Simon-a a rawn hawi thut a,kan mit a intawng sak a,ka tek chawk mai.Rang zet hian ka hawisawn nghal daih bawk.

Chaw kan ei chhung pawn ka tang tluan chhuak zak,Bawihtea lah a tap lo a,buaipui angai si lo.Mumal pawn ka ei lo,mak takin an vaiin awm pangngai vekin an awm a,kei angin engmah danglamna an nei lo.

Chaweikham hnuah erawh a mutchhuak a sual ta thung,ka tan chuan vanneihna ropui tak a ni ve thung.

“Ka han mutpui lawk ang” ka ti a,a tap nasa bawk si nen min chhanna pawh ngaihtuah lo in Roomah ka pawm chho a,a mize thlak hian tahna a keng tel a,a mut chhuak leh hnute chak hi a tap nasa thei lutuk a,a zei lo chi ka lo ni bawk nen a chang chuan ka mangang lek lek zel.

Ka pua a,ka awia,a bang mai lo,reife ka awih hnuah a muhil ta hram,Simon-a te an tawh leh haw loh pawh ka hre lo,a khumah mut ka tum zeta,mahse ka khumah ka mutpui a, Simon-a khan a pawm ve ngei a,mahse a tah avangin Emily khan a laksak leh thuai a,mahse,a mit a la sawn mang meuh lo.Hmuhnawm tih hmel zetin a thlir dauh dauh anih kha.

Room kawgkhar inhawngthawm ka hria a,Mala tih harh hlau zetin ka hawi let a,ka beisei loh lutukin Simon-a nen kan inmelh ta ran mai.Muangchang hian a rawn kal phei a,sawi tur hre lo in a che vel chu ka en mawl tawp.

Dressing table bula Plastic chair awmah chuan a thu a,a kut zungtang sei thlurh chuan ka dressing table tlang a chul kual zai zai bawk.

“Eng nge i duh?” bung zet hian ka ti hmak a,ka thu chhuak zui nghal bawk.

“Zorina khan a pe che em?” a ti sup a.

“Eng?” ka hre lo der a,a mit a tizim a,hriatthiam har zet hian min melh run bawk.

“Lehkha pawimawh ka lo thawn kha,mahse...I bialpa khan a pawtthler tak e” a nui hawk mai.Engtin nge a lo hriat ka hre hauh lo.

“Ka mamawh lo tihna anih kha”

“I tan chuan i duh lo pawh animaithei,mahse ka fapa zawk ania ka pek” a then suk bawk.

“I fapa a ni lo..” ka ti hmak a,Mala a harh ka hlauh avangin ka tawng ring ngam lo,chuti ni lo se chuan ka au ring khawp ang.

“Wow….nitin a zui kual reng che avang khan a fapa a ni tihna ani chuang hleinem” ati leh a,ka haw hluah hluah,ka pa vangin alakah ka lo inthiam lo hman kha ania,hetiang mize ngeiawm neitu hi a ni tih ka lo theihnghilh leh hman pek.

“Ka chungchang engmah sawi hauh suh..chuan,vawikhatmah ka fapa hi rawn hmuh tum tawh suh” ka ti leh a,a thle buk ringawt.

“Ni lo e,ka neih zawng zawng,ka chan tak te kha nei let leh turin ka lo kal,nangpawh telin..mahse,i duh lo anih chuan sawitur ka nei lo a,i bialpa nen min dan han tum leh ula…” a tho a,min rawn pan hnai a,ka tawlh hnung hrat bawk.

“Min rawn hnaih miah suh” ka ti a,mahse,hre lo ang hmak hian a rawn kal hnai zel a,ka tawlh zel bawk.

Bangin min lo dan takah chuan beidawng zet hian ka ding ta nge nge,min rawn hnaih a,a rim pa zet chuan ka hnar a rawn verh a,ala ngai reng mai.Ka lu bulah a kut pahnihin a rawn nem a,Ka mit ka chhing ta ngawt.

“Vawikhat tal min ngaihtuah ve ngai em?” ka rin loh lutukin ka beng leh ka dar inkarah a hmai a rawn phum a,ka meng nghal zawk a,a hmui lum thar thar chuan a rawn nawr zui leh a,ka hamhaih vek.

'Ti suh…” ka ti thei hram,mahse ka aw a khur a,ka awmdan buai vek chu hriat loh chi a ni lo.

“Sawi teh,min ngai em?” ngenngawl zet hian a ti leh hrawih a,ka kawngah a rawn kuaha,hnialna chang pawh ka hre lo.

“Simon..i pa kha…”

“Shh…..a kal liam tawh,engkim theihnghilh ka duh bawk” ka hmuiah a kut a rawn daha,min en run bawk.

“Emily..kha...oh..kal tawh rawh,Inneihna lam ngaihtuah i ngaih kha” ka ti bah nawk nawk mai.

“Um,ka kal phawt ang..mahse,ka lo let leh ang,ka kalsan tawh dawn lo che” ka chalah a rawn fawp a.A nu khan inneihna an buaipui a ti a,engmah a sawi leh hauh si lo.Chhan pawh ka chhang lo,ka ding khawng lah ringawt.

Ka muhil miah lo tluk ani,Sangpuii ka call dawn thut thut a,mahse ka thulh leh, Simon-a awmdan engkim mai khan min thawng a,awmdan tur ka hre der lo.Ruatdika ka mitthlaah a lo lang a,ka tan engmah tih hreh a nei lo a,kha lehkha a pawh chhiat avang mai khan haw ngawt tur ka ni lo.

Simon-a te lo kal atangin kar khat lai a liam leh tawh,a lo lan leh mai beiseina ka nei a,mahse a lo lang leh ta miah lo,call ngawt turin ka induhtawkna a lian lutuk.Lo kal leh a tum tih a sawi kha ka lo awih leh hman der tawh,hahthlak hian a…

Mala ka bual a,ka bual zo in ka phone ka en a,number pakhat hian vawithum lai min lo call a,Naute buaipui ngai bawk nen phone khawih neuh neuh na hun ka nei meuh lo.Ka call back a,Mipa aw hian min rawn chhang a.

“Hello..”

“Naktuk hian officeah meeting kan nei dawn a,dar 10 ah ania,kan lo beisei thei dawn che em?” a rawn ti a,min hai a ni ngei ang.

“Min hai a ni lo maw?” ka ti a.

“Aih,hai lo e,Sir Simon-a khan hna i zawm thei tawh ang a ti a,amah a awm dawn loh avangin nangman min rawn telpui theih ka beisei a”a ti leh a,ka thaw hawk mai.

“Ka lo tum dawn nia” ka ti ta ngawt.

Simon-a hian dawr leh sumdawnna hmun nei nual mahse office atana a hman ber hi chu Motor ho a zawrhchhuahna ah a ni a.Chulai hmunah chuan ni turah ka ngai mai.

“In be lawk ang” hmeichhe aw hian a rawn ti a,ka hawi let a,Emily bawk

Meeting chhung zawng khan a awm tluanchhuak zak a,ka sirah a thu a,ka hriatthiam loh lai min lo hrilhfiah zel bawk.

“Eng chungchang nge?” Mala ka ngaihtuah a,haw ka lo tum mek.

“Simon-a chungchang ania,thil hriatsual i nei in ka hria” a ti a,ka thu leh ta nge nge.

“Engmah hriatsual a awm lo,bakah ka tan engmah a ni tawh lo”

“Ni lo e,tunah pawh hei i nihna kan hmu zo chauh alawm,bakah engkim mai kha ruahman lawk veka thleng anih kha..” ati leh a,ka hrethiam lo.Mahse,a sawi ang ngeiin Simon-a hna lamah ka inbarh lut ta chiah.

“Min hmu chak lo ang tih ka hria lawm,mahse,sawi ngei ngei ka duh,vawiin bak chu Aizawlah ka awm tawh dawn lo a,ka tihtur ber Simon-a hna ka zo tawh,diktak chuan Simon-a hi ka thian mai ni lo in ka boss ani a,a hna engkim hi ka hriatpui a,phuba lak nan chuan a nei ngei che,mahse,nangmah a tihnat theih loh che avangin a nunna a derthawng asin..” ati leh a,ka la hrethiam chuang lo

“I bialpa pawh a ni bawk a” ka ti ringawt.

“Kha thil aia hrehawm tih kha ka nei lo,engmah inzawmna kan nei lo, Simon-a khan engtinmah a khawih theih loh che avangin inhuattir che a tum mai ani zawk,i mita i hmuh te,i hriat te..a vaiin chanchawp liau liau anih kha” a ti leh a,ka chil ka lem khawlh mai.

“Simon-a hian a bul tanna turin thil dik lo pawh a ti ngei,chu thil chuan a umzui a,engkim ti tura a tih apiang a ti vek bawk,mahse,nangmah khawih an tum ve takah che kha chuan a hnial a,phuba lakna kha a lo atchilh tawh che,a then che a,chuti ni lo se chuan i thi ang ...i tel lo a mi pangngai ni tura a beih nasat zia kha i hrethiam ngai lo hial ang,a veng che a,a zui che a...a muhil thei lo a,engmah a ei mumal lo bawk..”

“Tunah khawiah nge a awm?”ka ti ta nge nge,a sawi chhung zawng khan a hmel ka lo en renga,thudik a sawi ang tih ka ring ve tawp

“Shillongah a kal a,i chungchang sawipui turin a nu a hmu ang,chuan,naktukah a lo let leh ang” ati a,A pasal that tu fanu ka ni tih a hre ngei ang,min pawm thei lo kha ka dem ta lo,khami zan khan Simon-a khan a hrilh ani ngei ang.

“Neih che a,tihnat che a,i pa chungah phuba lak kha a tum ber a ni a,mahse,Hmangaihna hian engkim a lo thlak danglam ta vek anih hi” a ti leh halh a,sawi ve tur engmah ka hre lo.

“I insiam tawh em?”Sangpuii’n min rawn call a,Vawiin hi Zorina te inneihni a ni a,kal loh ka tum zeta,mahse,Zorina ka ngam dawnin ka hre lo.Simon-a lah min rawn biak ringin ka lo nghak mawl ve tawpa,thla a liam hnu pawh hian a la reh ta vung vung,a nu khan min lo pawm tak tak hauh lo tih ka chiang mai.

“Ka insiam mek,ka lo kal har lo ang” ka ti a.

“Bawihtea kha nalh deuhin lo chei rawh,Hotelah kan inhmu dawn nia” a rawn ti leh a, Ruatdika'n min rawn lam dawn a,Mala ka hruai dawn bawk nen motor khalh ka zuam lo.

Inneih inkhawm a zo a,A nupui Julie hi thlah pawlh ani a,Biakinah innei lo in an Hotelah an innei a,an misawm te kan kal tha thawkhat hmel viau mai.Sangpuii nen kan thu dun a,Mala erawh chu Ruatdika'n a pawm thung.

“Toiletah ka va kal lawk ang, Ruatdika a lo let chuan Bawihtea i lo la dawn nia” ka ti a,a bu ringawt.A la rai ta lo fo mai.

Toilet ka pan a,ka pheikhawk bun a sang bawk nen ka puan bih ka pawt tawm a,ka hawi chhuak leh chiah chu ka pen lak lawh lai ka tawp chat mai.Simon-a nen kan in hmachhawn ta ran mai ,a lo kal ve tih ka hre lo,Suit thui nalh zet a ha a,a kamiz var hak chuan a ti lang hang deuh nangin sawiselna tur vang tak a ni.