BLACK HORSE-31

BLACK HORSE-31

“Hello…”thawp sut hian a ti a,a ha var rual that langin a nui suk bawk.

“Hi…” ka ti a,ka nui ve hak tho,nupa lo ni tawh thin ni lo in mihran daih,polite taka inbia kan ang zawk.

“Khawnge Naute?” ati leh sup a,a mit meng thim raih chu tim deuh chungin ka melh lui a.

“Ruatdika'n a pawm a,i lo kal ve tih pawh ka hre hleinem” ka ti a,a ner nawk chu ka hmu hman hram.

“Kal lo thei nang” a ti liam puata,a sam chhip buk lam lek lek chu uluk zetin a khuih a,a bek tawn tawn erawh a kawng thung.A inhmeh zia chu pui tak a ni.

“Anih phawt” ka ti a,Hmeichhe  Toilet awmna lam panin ka pen a,ka pheikhawk a sang bawk nen ka rap suala,ka rak thawt mai.Tluk hlau zetin ka invai a,mahse ka tlu ta lo hlauh.Hneh zet hian ka kawngah a rawn kuah a,amah si chetin min pawm bet nghal thlap bawk.A lungphu ri dat dat chuan ka chhungril a fan raih raih a,thil kal tawh ka hrechhuak lo thei lo.

“Eheu!!!...nang ni pahnih chu” Mipa aw hian a rawn ti a,kan inthen phawk mai..Ka hmai a sa hat hat a,hawi pawh ka hawi chhuak ngam lo.

“Thil dik lo a awm ami?” Simon-an a ti hluk a,ka hawi chhuak ta nge nge.

Tlansanga a lo ni a,engmah thil dik lo kan ti hauh lo chungin ka zah deuh tlat lawi,min rawn en a.

“I tha maw?” a ti a,ka bu ringawt.

“Emily khan a zawng che a”Simon-a hnenah a ti leh a,Emily a lo kal telve tih ka hre miah lo.

“Sorry aw,ka pheikhawk bun hian a zir lo a,ka tibuai ta deuh che anih kha,anih phawt u”  ka nui lui sanga,a hmela engmah lang chhuak lo hian min en ngur ringawt.

Min en zui reng ni a ka hriat avangin ka hnung a za mar mar mai,Toilet ka thlen veleh ka thu hnawk a,ka mit ka chhing nghal vang vang bawk.

Simon-an min kuah chhung kha a rei lo,mahse,hun kal tawh ka hriat chhuah nan chuan a tawk tho.A taksa phiar fat te,a rim fai leh pa zet,a purfume rim te pawh..Kan inkawp tirh khan a perfume hman kha ka sawisel a,ahnuah keiman ka thlansak a,a hmang ta reng a,tun thleng pawn..Engkim a la pangngai vek a,mahse,keini erawh kan danglam tawh,ni lo ...kei hi ka la danglam lo,danglam ta zawk chu amah kha..

Rei lutuk awm bo chi ani si lo, Simon-a lo kal ve beisei khan kan thlen tirh atangin ka mit ka len a,ka hmu lo,tunah ka hmu ta chenga,ka awmdan a dik leh si lo,pawn lamah chuan ka khauh maithei,mahse chhungril hi a nem a,let leh tawh miah lo tura rilru ka siamna hi amah ka hmuh a,a thil tuar chhuah te ka ngaihtuah hian ka duh loh dan zawkin ka ngaihtuah leh nge nge a,Hmeichhia hi zawng bumna ngaiah hian vawi thum mai ni lo vawi tamtak kan tlu nawn thei tih lah ka chiang tawh..Mahse,chu bumna ngaia kan tluk nawn leh na te chu kan Hmangaihte lakah chauh a ni thung.

Sangpuii amah in a lo thu a,,Ruatdika leh Bawihtea  erawh ka hmu lo thung,haw mai ka duh tawh, Simon-a a awm ve tih ka hriatna chuan nuam takin min awmtir thei tlat lo,mahse Ruatdika leh Bawihtea ber an awm si lo.

“Khawnge an kal? haw mai ka duh tawh asin” ka ti a.

“A kal kualpui anih kha,a hrim hrimin Chaw kan ei ve phawt ang chu,eng nge i hmanhmawh viau a?” ati ta chiah reng a.

“Bawihtea hi tlai lam boruak dawng tam lo se ka duh mawle..” chhuanlam tur dang ka hre mai lo.

“Naaa,kan tlai vak lo ang,mahse ka rin aiin an lo let har?” ati a,a hawi kual nghal bawk.

“I awm reng sia,a kalna tur a sawi lo ami?

“Sawi nang,a kal kualpui dawn tih bak,ehe!!!!,saw Simon-a?” a ti hliai mai.

A en na lam ka en ve a,Emily nen an ding dun a,an inhmeh lutuk chu ka lo na leh hman pek,hahthlak hian a..

Emily khan keimah vanga tuar niin a sawi a,mahse,engmah a awm danah a lang leh eih lo.Bakah a thil min hrilh te avang khan keimahah hian beiseina mak zet a lo piang leh hman a,a lo haw anga,min rawn ngaihven ka lo ring a,ka ringsual chiang khawp.Kei chu sawi loh Bawihtea takngial pawh a rawn tlawh leh ta miah lo.Hna lamah nise nikhat Meeting tura min rawn koh bak kha tuman min rawn be leh bawk si lo.A hma ang bawk khan min bum a duh avangin Emily khan dawt phuah chawp min hrilh niin ka ring leh hnuhnawh.

“Toilet ka kal dawn khan ka hmu alawm,a ho em mai” ngai pawimawh lo niawm tak hian ka ti a,min rawn en a, Simon-a te lam a en leh a,eng nge a ngaihtuah ang ka hrethiam lo.

“Ruatdika'n a hmu angem?” zawite hian a ti sap a,nidawn tak..hlauhthawnna ka chhungrilah a lo luta,engemaw thil tha lo thleng tura ngaihna ka nei zui nghal bawk.

“Ka hre lo,enteh,haw ila a that ka ring” ka ti leh a, Ruatdika zawngin ka hawi kual a,ka hmu hauh lo.Khawiah hrep nge a kal ni??

Reife hnuah pawh an lo la let ta lo fo,ka call a,a switch off tlat, Sangpuii pawn a call ve bawk,awmzia a awm lo.

“Zawn nei in va ang ve?” ka bula Chair ruakah chuan a rawn thu ve nghal a.

“Nia,Sangpui,lo thu lawk teh u” tih leh thawh ka rual a,mahse ka kal hmain ka banah Simon-an a rawn chelh chat mai.

“Khawnge i kal dawn?”

“Bawihtea leh Ruatdika ka han en lawk ang” ka ti a,engemaw sawi hian a phun hluk a,a sawi ber ka hre lo thung.

“Keipawh ka lo kal ang” a rawn ding chhuak ve nghal a,ka hnial dawn zeta ka thulh leh ta zawk,kan bul hnaia thu ve te chuan min rawn en deuh ha hlawm a,tu te nge annih hre lo mahila inhnial buaina atthlak zet thlen tir a,an tan hmuhnawm siam ka duh hauh lo.

Pawn lamah ka va en a,ka hmu lo,ka hnungah Simon-an ngawirengin min zui ve zel bawk.Inchunglamah an kal anih ringin Lift ka pan a.Ka thinrim deuh teuh tawh.

“Hmingthan..” min kohna lam ka hawi vata,Ruatdika a lo ni a,Bawihtea a pawm a,a muhil bam bawk.

“Khawnge i kal daih a?” ka pan hnaia,ka ngei hlur bawk.

“Ka kal kual mai mai” min en lo in Simon-a a en run bawk.A hmelah chuan Thlahrang hmu a ang zawk.

Bawihtea ka laksak a,min hnial lo in min pe ve mai bawk.

“Min zawng nasa tih ka lo hria a”nelawmna tel miah lo hian Simon-an a ti hmuk a,ka lo ip chawih mai.

“Nia,hlauh nei ini bawka,hmuh i harsa khawp mai” Ruatdika'n a ti ve thung.

“Hlauh nei...ok,nia..i hlauhawm alawm,thil ka hrilh ang che..Ka fapa hi i lo khawih leh anih chuan a pawi ang” Simon-a ka melh a,a hmel pa leh hlauhawm zetah chuan a ti mai mai lo tih a chiang viau.

“Nang zawk khan min hnaih tawh lo la a tha ang” zawi fiah zet hian ka ti a, Ruatdika hian theih tawpin min buaipui a,a duh duha a tih ve ngawt ka duh hauh lo.

“Honey...nang chu ni lo e.Ruatdika hi tu nge anih i hriat angai ania” min rawn en a,a then suk bawk.

“Khati khan min ko miah suh,nangmah vanga zahna leh natna ka tawrh zawng zawng te kha Ruatdika tello hian ka tuar chhuak hauh lo ang,ka engkim anih hi” ka ti hmak a,Ani pawh hian Emily kha a engkim a ni tih min hrilh tawh.Kan engkim nih dan erawh a hrang daih ang,pawi ka ti chuang lo.

Za lo zet hian a then leh suk a,mahse,a hlauhawmna a nep chuang hauh lo.

“I tan ni lo in ama tan alawm a tih,a tihsual siamthat hna a thawk miau a” a ti hmuk a,a kekawr ipte a zen a,na zet hian min rawn melh a,ka ip leh chawih mai.A sawi awmzia ka hre der lo bawk.

“I la him zel a,i duh duh i sawi bawk a,i lo nghak dawn nia,eng nge ka tih i hre mai ang’Ruatdika’n a ti hmak a,Simon-a nui hawk ri in a zui zat bawk.

“Ok,ka inpeih thlap e,kum khat deuh thaw chu tunge i nih ka zir chiang alawm,i theihtawp i lo la chhuah si lo a,i duh duh i tih hun ka lo la nghak ania,mahse….a tawp nan tak tak,Ka fapa leh ka nupui hi hlat ang che,an bulah ka hmu leh che anih chuan i duh i tih hun ka nghah hi ka ti tawp anga,ka duh ka ti ang” a ti leh a,a aw a ring lo,mahse,a nghet churh a,a hlauhawm takzet bawk.A tawng danah chuan a hmusit tih a lang reng bawk.

In kan thlen thlengin Ruatdika a tawng ta miah lo,ka be buai duh lem lo bawk, Simon-a khan a hmusit tih a lang reng a,a eizawnna kawngah a hlawhtling a,mi hausa chhungkua a seilian a ni bawk,khatiang taka hmuhsitna kha a la tawk ngai hauh lo ang.Mahse, Simon-a sawi kha a dik lo hauh lo,a theihtawp chhuahin man tir tumin a bei a,a hlawhchham thak anih kha.Mualpho zawng a mualpho ve laih ringawt.

“I lo hria em?” Sangpuii call ka pik rualin Sangpuii'n a rawn ti nghal ringawt.

“Eng chu maw?” bo zet hian ka ti hu ringawt.

“Fb lamah khan en teh, Ruatdika te dawrah Damdawi an man teuh ania” ka mengphawk nghal hra mai.

“Eng damdawi nge?”

“Damdawi chi khat tih ringawt a la ni rih a, Ruatdika chu ka va be tawh tho a,min lo vin hlur a” a ti leh a,eng damdawi nge ni ta ang? Sangpuii aia Damdawi chinchang hre tur an awm chuang hauh lo,mahse eng nge anih a hre lawi si lo.

Call ka tum zeta,ka thulh leh,Simon-a nen an inchhan hnu atang khan min rawn tlawh leh ta miah lo.Simon-a khan a tihsual siam that hna a thawk tih a sawi a,eng nge a tihsual ang ka hre thiam lo.

Kitchen lam ka pan a,Ka pa  leh Bawihtea pawn lamah an awm a,a chhawn chhaih theih ve tawh a,inchhung a ti nuam ve tan tawh,Ka u te fapa lah a lian ve tawha,chhaih kual vel a duh tawh mang lo.

“Nu,khawnge midang an awm vek a?” ka ti a,nidang ang lo takin a ka nu chauh a lo awm mial.

“I u te an chhuak a,Tetea pawh a kal tawh” a ti awlsam mai.

“Nu,Ka pa hi a hmain eng nge a thawh thin?” ka ti a,min rawn en zawk a,a thil tih lai lam a en leh a.

“Police officer a ni thin a,ngatinge?”  mak ti deuh hian ka en a.

“Ngatimah,ka hre ngai lo em a,niminah putar pakhatin min zawt a” ka ti a,tuman min zawt hauh lo.

“I u pian hnu lawk hian a bansan thut a,a chhan ka zawh lah chuan a sawi tha duh lo a,mahse,midangin an mimal hna thawk turin an chhawr leh a” a ti leh a,ka la hrethiam lo.Simon-a pa boral khan Simon-a te unau an piang vek tawh.Mahse,ka pa in a hna a bansan hun erawh chu Ka u pian hnu lawkah a ni tlat.Ka u leh Simon-a hi an inrual chiah bawk.

Ka zawhna zawng zawng chhanna hi Simon-a chauhin a nei,tunah Ruatdika a buai a,bakah ka pa chungchang a ni a,ani hriattir ka duh lo,ka u ka zawh lah khan chhanna min pe mumal ta si lo.

“Nu,ka chhuak lawk dawn asin,Bawihtea hruai lo ila a pawi em?” ka ti a,min rawn en a.

“Khawiah teh thut maw?”

“Hna thil ania,mahse,Bawihtea a tlei loh chuan min lo ko mai rawh aw” ka ti a,min chhan hmain Room lam ka pan san a,ka thawmhnaw ka thlak sawk sawk a,Simon-a chhuah hma ngeiin va hmuh ka duh.Nidang ang anih chuan office kal turin a la chhuak hman lo maithei.

Darkar khat a liam leh meuh chuan Simon-a gate bulah ka ding der tawh,ka chhuahsan hnu khan ka let leh ta miah lo bawk,Building lian leh nalh zet,ka ta ni a ka lo hriat thin kha…

Motor atangin ka chhuak a,Gate ka pan a,ka zam tha leh lawi,he Inah hian tumah dil lo in ka duh duhin ka lo tal kual vel thin kha ania,tunah chuan gate min rawn hawnsak theihna turin Bell ka hmeh angai ta thung.Kum khat lek chhung hian engkim a lo danglam ta,a kal chak mah mah bawk.

Vanneihthlak zetin Tlana a lo chhuak ta hlauh,ka koh hmain min rawn hmu a,Gate min rawn hawn sak a,ka hmuh loh chin pawh ka hre tawh lo.Ka awmlaia awm ve thin te kha an la awm em ka hre hek lo.

“Khawnge Naute?” a ti a,ka hruai loh thu leh Simon-a awm leh awm loh ka zawt a,a lo la awm hlauh.Ka hriat thin ang khan a hun a la hmang zel animahna.

“Roomah han chho mai la” a ti a,ka tim deuh tlat,Ka pasal,min hnawtchhuak tu inah  sawm hleih loh in ka lut a,a roomah lehzel han kal chilh nuam ka ti lo.

“Ngai lo mai,ka lo nghak ang” ka ti a,Living Room ah ka thu a,ka hawikual a,engkim a la ngai vek,Banga kan inneih thlalak intar chenin a la awm kim thap.

“Ehe...U hmingthan,i lo haw alaw?” Sangtei'n a rawn ti hliai a,eng eng emaw a keng bawr taih bawk.

“Ka lo kal zuai, Simon-a nen thil sawi dun tur kan nei a” ka ti a,min hmuh vanga mak tihna lam engmah a lang lo,lawm hmel a pu mah zawk.

Tlana a rawn chhuk a .

“A inbual a,lo chho mai rawh a ti aw”a rawn ti a,ka rilru thlaka haw leh vang vang mai ka duh rum rum mai,mahse,ka kal ta sa sa,ka hriat duh zawng zawng chhanna ka neih ngei ngei angai,engkim ka hriat hunah chuan Simon-a hi ka thlah fel tak tak tawh ang.

Room kawngkhar ka nem hawng riai riai a,tumah an awm lo,Curtain chhah zet zet,keima thlan ngei kha a lo la inzar a,a lang thim deuh khup a,Simon-a thawmhnaw dahna leh Dressing table awmna chung zawna light awm chu a in on a,mahse,hmun dang en tur khawp chuan a eng fahran lo.

Ka hawi kual a,engkim a ngai vek,mahse,khum a hnawk nuaih a,khum bul chhuatah chuan Zu um leh lighter a let bal mai,hei hi chu ka awm lai khan a awm tel ngai lo.

Bathroom kawngkhar a ri rak a,ka inher vat a,Simon-a nen kan inhmachhawn siah mai,Towel a veng a,abak engmah a taksa khuhtu a awm lo,a pian nalh zet chu ka en a,a dar a hlai hlap a,a kawng a fek leh thung,ka chil ka lem dawn a,a sak talh bawk.

“I duh phawt chuan i khawih thei ania,ka nghak rei tawh mah mah zawk in ka hria” a nui hawk a,ka hrawk a ro halh thung