BLACK HORSE-33

BLACK HORSE-33

“Tuin maw min hmangaih?” ka ti a,ka mengphawk hra bawk.

“Ruatdika mawle,Mipa ka ni a,ka mipatpui rilru ka hria,nang pawn hmeichhe rilru kei aiin i hrethei ang” ati a,za lo zet hian a then leh suk bawk.

Ka ban ka phar hliai a,sawi mai tur ka hre lo,beidawng zet hian ka dahthla leh a,ka awmdan engkim chu min hmutu tan chuan a mawl thlak tih mai tur a ni ngei ang.

“A tel ve tih ka hriat tirh kha chuan lo tel ve mai mai tehse ka ti a,mahse,Hriati a thah atang chiah khan a kal thui ta mah mah a….” ka lungphu rang nghal dawt dawt chu a hrethei hial ang,ka awm ka dawm vang vang mai.

“Mahse,Hriati te chu nangman amah in tihlum turin i nawr a nih kha,i sawi vek kha” ka aw khur hrep pawh chu a…

“Min rinna i hloh tawh tlat a,ka ni lo pawh ti ila i awih dawn chuang hek lo.Bakah min hua la ka tih avangin a hunlai kha chuan ka thah anga sawi kha pawi tihna ka nei lem lo” ati a,a hmui a ti sawi zauh bawk.

“Tunah hian ka ring leh nghal ang che maw? Ka pa hian i pawi a khawih ngei tih ka hria,mahse Hriati kher kha chu Ruatdika hian a ti na lo ang,a at phah lo chauh anih kha” ka au ani ber.

“Min ring rawh ka ti reng reng lo.Mahse,thil pakhat,kan nupa kara Ruatdika thil tih kual dan engkim kha Hriati aia hrechiang an awm lo.An inthen thut chhan pawh kha i ei turah Hriati khan Tur a lo pawlh a, Sawmtluangi tanpuina in..I thih teuh zia a hmuh khan mahni inthiam lohna in a khat a, Ruatdika kha amah zawkin a then anih kha..Engkim kha nangmah hrilh che a tum avangin” a aw chang zet chuan ka chhungrilah a man a,ka taksa a tur an hmuh kha Simon-a tih emaw ka lo ti a,a ni si lo..

Ruatdika hmel ka mitthlaah a lo lang a,engvangin nge min thah a duh ang ka hrethiam lo,ka hrethiam thei kher pawn ka ring lo.Simon-a nen kan in then hnu phei kha chuan amah kha ka nghenchhan takmeuh bawk.

“I duh duh sawi suh..”mangang zet hian ka ti tawk a.Amah ngeiin ka naupai tih tlak nan tur min pe a ti anih kha..

“Ka rai vangin min eitir i tih kha” ka ti leh a.

“Ka zep lo,Fa neihpui che ka tum lo tak tak,ka tihtur ka zawh veleh then che ka tum avangin.. Mahse...ka thei lo,min hua la ka ti ta zawk,min huatna anih beisei in engkim kha ka tihah ka puh ta vek,ka beisei ang ngeiin i mitmeng nalh zetah khan min huatna bak ka hmu ngai ta lo..Mahse,muthilh theih loh te,i muhil lai thlir te...Lalpa le(h)...engemaw ka sawi tak le??” a kut in a hmai a hup zui nghal vang vang mai.

Awmdan mai tur ka hre lo,vawt tih vang ni hauh lo in ka chhungril atangin ka khur dar dar a,ka hlau niin ka hria a,eng nge ka hlauh ber pawh ka hre chuang lawi si lo.

“I rai tih ka hriat khan pawi ka tihna leh ka lawmna a inzat reng,mahse,ka tihtur min thulh tir tu anih ka duh lo,khami zan khan ka nu hnenah khan ka pa thattu fanu i ni tih ka sawi ta chauh,ka pa thattu kha ka nu hian a hming a hria a,mahse a hmu ve lo thung..I lakah a awmdan engkim a thlak ta vek a,hrehawm i tihzia kha ka hmu lo a ni lo” zawi sup hian a rawn ti chhuak leh a,Engkim sawifiah a tum anih hmel.

“Kha video kha kan nupa kar ti chhe tuah ka lo ngai a,mahse, Sawmtluangi nen Hotelah khan in inhmu tih ka hre leh a,mahse kan hnena awm tura a lo kal hun kha chu a hnuah daih ania,a lo thleng chiah angin a sawi a” ka ti a,hriat fiah law law pawh a tha zawk maithei.

“Kha chu a dik, Sawmtluangi kha a hmain khatah khan a lo kal a,Mahse,Zorina hnen atangin a awm tih ka hria a,hmu tur pawn ka kal ngei bawk,zanah khan Ruatdika'n a rawn hruai lut che a,nangmah enthlatu tura ka chhawr khan i thil in turah engemaw pawlh an nei tih a hria a, Ruatdika in turah khan a pawlh ve tho bawk...Diktak chuan khami zan khan i bulah ka riak a,i intura damdawi an pawlh sak che avang khan sex kan hman pawh kha duhtawk chin i nei lo….”

“Nangmah maw lo ni a?!” ka au aniber.

“Um,pawi ka ti takzet,ka zin ka rawn thlen khan i awmdan engkim min lo hrilh nghal a,ka lo kal a...a thleng tur engkim a thleng ta vek anih kha” a ti leh sup a,ka mit ka chhing a,kha kut kha...ni e, Simon-a kut ngei a ni tih ka hre leh hnuhnawh,ani kher hi chu ka mumang lamah pawh ka lo la ringhlel chhin miah lo.Khavang tak khan ka hriatchian em em Simon-a kut a ni tih pawh ka hre lo a nia.

“Kha thil avang khan min hau a,min puh chhe hle bawk a” ka nui hak mai.Nuihzat vang erawh a ni lo chiang.

“Tih theih dang ka nei lo,ka huat theih miau loh che avangin nangmah in huattir mai che kha a awlsam zawk” a ti leh sup a.

“Engmah hi ka hrethiam teh nuaih lo e” beidawng thinrim zet hian ka ti tawk a,a then suk a,a mitmeng dum fiah kel kawl chuan min melh run bawk.

“Engmah hriatthiam loh tur a awm lo,ka phuba lakna tur nisi kha ka khawih thei ta lo che,dik tak chuan…” sawi zawm lo in a ngawi leh daih,ka lo thaw dep dep mai.

“Min khawih thei alawm,natna min thlen kha a tlem hauh lo..” ka ti ve thung.

“I pa hian ka pa chauh a khawih lo,ka pa nunna a lak tum khan Ka pa sumdawnna lama a thawhpui Jailah a dah a,khapa kha an dawpna lamah a tuar zo lo a,a thi ve leh a,Ka pa phuba lakna mai piah lamah Jail a a dah tak hringtu khan i pa hi that tur in min ti bawk a”

“Chuan…?” ka ti ringawt.

“Ka tum angin ka kal thei lo a, min nawr a,ka ti ang ti siin ka che muang lui a,Ka pu nunna khan a tuar ta phawt,kei pawn ka pu that tura a tirh kha ka thah tir ve tho bawk” ka thaw a chham dawnin ka hria,tawng tuma ka ang ziau tawh chu a kutin ngawi turin min rawn zaizir a.

“Ka pu hnenah khan a tan a hlauhawm tih ka hrilh a,mahse engmah hi a hlau duh lo tlat a,A thiante tlawh tura a kal kha an lo tidinga,an khawih a,mahse a thi nghal mai lo.Damdawiinah khan enkawlna tha thei ang ber a dawng chungin a kal ta tho.Kha vang khan ania ka nu nen hmanhmawh a kan chhuk na chhan.., Sawmtluangi lah khan engmah ka tih tak mai loh avangin min rawn nawr zui veleh a,diktak chuan a pa kha ka thah  a ni lo,zu a in nasat lutuk vanga Boral a ni a,mahse tel vena chu ka nei maithei,Emily hian a ngaizawng der a,ka hriat duh ka hriat theih na turin” a ti a.

“Sawi nuam lo anih chuan sawi tawh lo mai rawh,bakah ka kal a hun tawhin ka hria,Mala riltam a hun tawh” ka ti a,ka ding chhuak zui nghal bawk,ka awm rei tawh viau tak tak.Zahthlak zetin ka fapa pawh ka theihnghilh hial bawk.

“Kal lo ang,ka sawi zo vek law law ang” ngenngawl zet hian a ti sup a,min melh ngur bawk.

Ka ngaihtuah a,vawiin hian hre vek law law  ila a that ka ring ta zawk.Mahse,eng nge ka la hriat belh zel tur la ni cheu ang??

“Emily hi i hua tih ka hria,ka dem hauh lo che, Ruatdika lah hian i rilru tihbuai tumin a lo vir ve sek bawk,kan inkawp ngai eih lo,helai hmuna a rawn khawsa ve te,ka office a thil thleng te...avaiin min huat theihna tura plan lawk vek anih kha,i pa vang anih rualin min nawrtu khan nangmah khawih tel che a tum tak vang a ni pakhat” ati leh sup a,bet lo zetin khum mawnga thutna awmah chuan ka thu leh ta nge nge.

“Tu nge chu chu??,nangmah thah tumtu che kha a ni em?”

“Um,ka pu hian sumdWnna bul a tan dawn hian amah in a tan lo,partner  a nei a,chu chu Sawmtluangi pu hi a ni ve thung,an bul tanna hi sawi zahthlak khawpa bawlhhlawh a ni bawk,a fapa upa zawk kha jailah a boral a,a naupang zawk Sawmtluangi pa erawh zu vangin a boral thung, Sawmtluangi pa hi ka pu hian a adopt reng reng lo,vantlang hmaa hmaiphihna mai chauh.An kaihza vengtu te an thih ve ve takah khan Sawmtluangi pu leh ka pu hian an sum khawl sa te an insem a,an fapa te thattu lakah phuba la ngei turin an intiam ve ve bawk.Ka pu nen kan inhmuh khan ka mawhphurhna ah a nghat a,diktak chuan Mizorama ka lo chhuah dawn khan Sawmtluangi pu hnen atangin sum tam tham lutuk ka dawng leh a,mahse a beisei ang engmah ka ti ta si lo kha Sawmtluangi khan min rawn umzui a...nangmah khawihah min vau zui ta bawk a” a sawi hnem bawk aniang,a thaw hawk thei hial mai,kei erawh sawi ve tur hre lo in ka ngawi kar ringawt.

“Ruatdika hian a  duh che a,mahse nangin mipa angin i en lo thung,kei min neih tak avang khan phuba lak tumin a buai a,Hriati lah khan a duh lutuk avangin a tih ang ang kha a hnial thei lo a,ka chanchin a chhui nasa, Sawmtluangi lo kal kha a vanneihpuia ,an tangdun ta chat,nang lah khan i tan an bei emaw i la ti zui a” a ti a,a ner nawk bawk.

“Ka la awih thei lo,kan inthen hnu pawh khan amah vekin min pui a” ka awah pawh a awihloh zia alang thei hial bawk.

“Um,ka hrethiam che,keipawn a tir chuan ka awih lo,ka pu thil pawimawh dahna Pendrive a bo zan khan Hriati’n min rawn call a,khum bula i tui bottle dah thinah khan tur an telh tih tap chungin a rawn sawi a,khavang khan a nia i hrawkah ka reh tak che” hriatthiam har zet hian min rawn en a,ka lo ip chawih thung.Min thah a tum vang emaw ka ti a..

“A tir khan engmah i sawi lo a, Pendrive bo vang khan i ti sia” ka ti sep a,a thle buk a.

“Engvang mahin ka tihtur thulh ka duh lo a,mahse i hrawka rek tur che khan chhuanlam ka mamawh thung alawm,bakah min hua la ka tih vangin thil engmah ka sawifiah lo ka tih tawh kha” a ti leh sup a,engkim hre tu Hriati ber a awm tawh si lo.Awih tur nge awih loh tur pawh ka hrethiam rih lo.

“Emily accident na chhan kha Sawmtluangi leh Ruatdika bawk an ni a,khami zan khan tuemaw in Video in an la tih ka hria a,i hnen ah a lo thleng em ka hre lo,mahse Emily nen khan kan inkawp tak tak anga a lan theih nan a na der a,buaipui a ngai mai zawk,zankhua in a inah ka awm a,mahse keimah chauh ni lo in Tlansanga leh Zorina an awm ve bawk” a ti leh a,khami zan khan a lo haw miah lo tak tak.

“Zorina hi ngatinge i lamah a tan tlat? i buaina hi a hre ve zawk em?”

“ Hria,a vai chuan a ni lo..Kan college kal laiin kan inkawm tawh a,he ka insakna ram pawh hi an hnen atanga ka lei a ni bawk,an hotel a tla chhia a,mahse midang hriat lohin ka tanpui a,lawmthusawinan ka sawi apiang engmah min zawt lo in a ti vek zel..” a ti leh sup a,kan inthen dawn ni khan mak takin Simon-a zin a accident tiin min rawn hruai a,pa pakhatk chuan ve tum pawh kha a chhik tir daih a,In kan thlen khan ka hmu lo leh lawi a,mak ka tih zia kha,ka tan a hlauhawm vangin Simon-an a rawn tir a ni ngei ang,a  kual vel nasa lutuk hi Hindi Serial film te pawh a ang lek lek mai.Phuahchawp leh chan chawp chauha thleng tur emaw ka tih thin kha ka nunah pawh a takin a thleng ve ta tlat….

“Hotel ka awm laiin Zorina i lo call kha ka lo pick a,tah khan in tang dun tih ka hria,chuan khami zan khan Hotelah chaw in ei a,in chaweipui te hnenah khan Emily kha i nupui angin i sawi bawk a” ka ti hlak a,a then suk a.

“Ka sawi ngei e,i thianpa Ruatdika kha kan bul lawkah a thu bawk a,mahse,ka ngaipawimawh hran lo,kan chaweipui te khan Sumdawnna lama ka thawhpui te ni lo in Nangmah that tura lo kal an ni a,mahse,ka then dawn che a,Emily en khan a rukin kan innei fel vek tawh a,ka tan engmah i ni lo tih lan nan Emily kha chu ka hmang mai zawk,ka tan ila pawimawh chhung si kha chuan ka tihtur ka tihtheih nan min karna hmanruaah an hmang miau che a”  ka tim sawk mai..Min venhim hi chu a lo duh ve tak tak anih hmel,mahse Hmangaihna erawh a tel lo tih ka chiang tawh.

“I buaina hi Ka pa laka phuba i lakna tur i tih loh vang a ni a,kan chhungkua vangin i buai a,engmah i tih tak si loh vang khan ani em an thah tep che?” a mitah ka en lui ngar mai.

“Aw ka tih angai tlat mai.Hetiang mai mai hian ka phuba lakna hi a tawp ang tih ka lo ring ngai lo,inchhungkua hian na tak tuara kalsan che u ka duh a,mahse,i pa in min rawn hmu a,Ngaihdam min rawn dil khan engkim a inthlak danglam ta vek”

“Ka pa maw?!” mak ti lutuk hian ka ti a.

“Vawi tamtak lehkha kan thawn a,a kah hlum vanga hremna a tuar miah lo te,tihpalh thila kap a nih loh zia te kha ka hria tih vawitam ka hrilh bawk.Mahse,tu nge ka nih ka sawi ngai lo.Tetea accident khan a lo kal a,patling meuh ka hmaah a rawn tap a,min hriatchhuah dan ka hre lo,Ka induhtawkna te a chhe zo ta vek..Ka phuba lak tumna vangin mi engzatin nge nunna chan tih ka ngaihtuah a,Hriati khan a thil hriat min hrilh a tum vang ngawtin Ruatdika kut tuarin a boral a..Ka pu a thi a...engmah khan hlimna min thlen lo,i nun infiamna leh phuba lakna atan ka hman thu kha i u ka hrilh a,kei pawh ka ti  thei lo tih sawi turin Shillongah ka chhuk bawk. Sawmtluangi thinrim khan min kap a….thi mai mahila pawi ka tih loh nen ka la dam ta cheu anih hi” a  then leh suk a,kei erawh chuan nuihna tur engmah ka hmu ve lo.

“Kal tawh ila a tha in ka hria” ka tawng chhuah theih veleh ka ti sep a,Hriat belh leh tur a awm anih pawhin hriat belh ka duh tawh lo,ka mamawh hek lo.

Min rawn en a..A hmelah na tuar hmel chiang takin a lang a,kei hi hmeichhe nep tak ka va ni tehlul em!!? Ka chhungrila Hmangaihna ka lo up beh,Huatna a ka lo hliah khuh thin kha Hmangaihna zawk a lo lang a,ka ngaidam chu ka ti lo,mahse,a natna tawmpui thei tu nih erawh ka chak leh ta  takzet.

“Ni e,kal rawh..Kan pahnih tan hian awmdun te,inhmuh te hi natna a ni zawk,mahse,ka tan chuan i bula ka hun hman kha ka nunah hian ka hahdam lai ber a ni thung” harsa tih hmel zet hian a ti hrawk a.

Ka dem lo,atan chuan a pa thattu fanu ka ni a,min hmuh apiangin chu natna chu a lo tho leh thin ang tih ka chiang,kei ngei pawh hian ka pa thil lo tih tawh te avangin Simon-a lakah inthiam lo reng rengin ka nun ka hmang tawh a,ka la hmang zel dawn bawk a,a phuba lakna avanga min nei anihna te hi ka pa vang a thleng nimahse engtikahmah ka theihnghilh chuang dawn bik hek lo.

“Engkim vang khan ngaihdam ka dil nawn leh che,tunah chuan engkim a tawp vek tawh a,i lo chan tak leh i kalsan thil zawng zawng te nei leh vek turin ka duhsak tak tak che,kan pahniha kan hun lo hman dun tawh te kha avaiin theihnghilh nghal thei lo mahla kha thil avang khan na tawh lo la,inthiam lo miah suh,i  nun a ka lo tel ve tawhna te kha mangchhia angah ngai la,avaiin theihnghilh i lo tum dawn nia..Ka na lo bik hauh lo a,mahse,a bul tumtu ka pa anih avangin kei chuan ka tuar chhuak vek ang,ka natna te hi chu ka pa thiltih vanga chunglam hremna ah ka pawm thlap bawk ang..’ ka mittui a rawn tla a,hei hi kan nupa tawpna tura ka beisei dan thin kha a va ni si lo em!!!