EVERGLOW-10

Chapter- 10

“A dik alawm,mahse, ka lo ngaihtuah dan chuan he buaina hi ama thiam loh anih rualin keini thiam loh pawh a ni tel tho,hetiang hriatchian miah loh hi kan hna min thawhsak turin kan lo la a, chumai bakah Interview pawh pal tlang miah lo lehnghal...hei hi chu nang  leh Noel-i kutah awm teh se, ban in duh anih chuan in thu ni se, in duh lo anih pawhin in thu tho.Ka duh ber chu hetiang hi thleng tawh lo rawhse tih hi a nimai” kan Big Boss in a ti leh a.

“Nia, tihfel dan tha ber chu bang se a tha, midang an mimal harsatna vang ngawta lo khawngaih kha ka dik lo tih ka pawm thlap,Noel-i pual anih angin aman hnathawk tu tur chu la mai rawhse,a tha em?” Noel-i lam a hawia, a en dan chuan ka luak a ti chhuak nghal hlui bawk.

“I tih dan dan le, a tha tur chu kei aiin i hria ang..”

Awm ve miah lo ang chiahin ka chanchin an sawia,tenawm leh tangkaina nei miah lo ang chiahin min treat bawk, chung zawng zawng aia na ka tih zawk chu Zorina tawngkam te kha,hmuhsitna tawpkhawk tih bak engmah ka ngaihtuah lo,Zomuan’in ka kut nghet takin a chelha, min hnem a tum tih ka hai lo.

“Ka dik lo tih ka pawm thlap e,min ban dawn tho in ka hria a,a hranpain min banna thu in sawi ngai loin keimah ka lo inban mai ang..min hrethiam dawn nia..” ka kut Zomuani chelhna ka phelh saka, ka ding chhuaka, ka bag atangin kan Branch seal leh thil pawimawh dang ka chhinchhiahna note book ka phawrh chhuaka, Dawhkanah ka daha, tuman engmah an sawi lo.Ka theihtawpin ka in Control a, ka zam a, ka na a, ka kehchhe vek tih an hriat ka duh lo.

“A pawi ka ti khawp mai, i hrethiam aniang chu..i mawhphurhna a ni miau si a” Noel-in dam thlapin a ti a, ka bu ringawt, midang tuman pawi tihna thu an chhak chhuak lo, ka beisei hek lo.Ka bag ka khaia, kawngkhar ka pana, ka thil lo pal tlang tawh tam tak te vang khan na leh thei ka nih ka ring ngai lo,mahse ka lo la na thei khawp mai..A hma a ka natna ai mah khan min ti na zawk hial in ka la hre ta cheu bawk.

“Lawk..” Zorina tawng ri chuan ka pen tan tawh min ti ding leh rih,ka hawi let a.A thutna chair hnung lam a nghenga, a hmelah engmah a ngaihtuahawm ka hre thei lo.

“Enge ni ta?”

“I ID kha dah la a tha in ka hria...” nidawn tak, ka lo la awrh reng alawm,mahse, ka na tawh sa ka nat belh leh chiang.Ka phelh sawk sawka, Dawhkanah bawk ka va dah leh a,ngam leh ngam loin ka hawi kual a, Zomuani mit sen ram maiah chuan min tah pui tih ka hre thei,kei erawh ka mittui lam a hnai lo.Nat lutuk hian tah theih a lo ni lo tawp tih ka chiang ta viau.Kawngkhar ka chhuahsan thlengin tuman engmah an sawi ta lo.

Ngaihtuah bik pawh nei loin ka hmalamah ka kal mawp mawpa, khua a lum uap churh a, chawhnu lam ni tawh mahse ni sa ala tuar tham viau bawk,engchen nge ka kal tawh pawh ka ngaihtuah lo,Mi pakhat hian na zetin min rawn su a, ka pen lak lawh bawk nen ka thal nghal thuai bawk.

“Sorry...i na em?” ka hawi chho a, min su tu chu ka en a, midang ni loin Moses-a a lo ni a, ani pawn keimah ka ni tih ka hriat takah chuan a nui a, a kut a rawn phar chhuak nghal vat bawk.

“Aih, na lo e..” a kut vawn pahin ka ti a, min pawt tho a, Zorina ang bawkin a sang tha hle a, mahse, danglamna tamtak an nei,ka hmuh a piangin a hmelah nui hmel hmuh tur a awm ziah,a tawng duh hle bawk.

“Khawnge kal i tum a? kawng i en miah bawk si lo..” a ti a, a nui var var mai.

“Thil dang daih ka lo ngaihtuah a..” tih pahin ka kawr ka beng fai thak thaka, ka hawi kual a, kan Main Office atang khan ka lo kal thui tawh viau mai,atthlak zetin ka haw na tur lam a la ni lo zui.

“A hriat reng alawm, min hmu maw ka tia, sut tum che pawh ka ni lo, mahse, nangmah zawkin min rawn su ta chawrh sia” a ti leh a, ka ringhlel hauh lo mai.

“Hmu nang mawle, hmu che ila ka su nang che,khawiah nge i kal dawn?” ka ti ve a.Keimah ka ni tih a hriat khan a lawm hmel viau lawi sia.

“Khawiah kal dawn lo ,hei hi kan Restaurant thar hawn na tur hmun ania, kan siam mek a, lo lut kawi la,i hman em?” a ti a, kan dinna bula Building hring lam a kawka,ka chak hauh lo, mahse, engmah tihtur ka nei lo a,Inah haw ngawt ila ka rilru a hah mai mai bawk ang.Tunah rih hi chuan mahni a awm ka mamawh hauh lo mai.

“Pawi miah lo..lut ila..” ka ti a, a inhera, Inchhung lam a pan chu ka zui a,an Restaurant tur a tih chu kawng an chung chiah a lo ni a, a view a tha a, a hmun lah duhthusam a ni ringawt.An siam tawh chin lam te min enkualpui a, a zau huau lo,mahse, a felfai a, a changkang hle bawk.

“Eitur ka chah kep ang che chu,Lunch pawh ka la ei lo a” a ti a.Hnathawk ho erawh chuan an ei mawlh mawlh thung.

“Aaaa, ngai lo,haw hma ka duh a..” ka ti a, diktak chuan engmah ka la ei lo,mahse ei chakna ka nei hlawl lo.

“Ok, mahse,hna i kal lo mi?” uluk zet hian min en bawk.

“Ka....” ka ti hman chiah tihin ka phone a ri ta hlauh,ka hahdam nghal hawk mai,ka thianpa a ni lo a, Zomuani atanga hria ni mahila a thianpa Zorina a ni tlata, a bulah hian fimkhur taka ka tawng a ngai tih ka hria.

“Min lo hrethiam lawk...” ka phone ka phawrha,ka en a, ka thawvenna a bo lehnghal riai riai mai, a rawn sawi tur ka rin hriat thei tlat.

“Hello...” ka phur loh zia tih lan loh tumin ka aw ka control nasa viau.

“Ngatinge i pick theih miah loh a?” a rawn ti nghal hlar mai.

“Hei ka pick hi..” za vak lo hian ka nui a.

“Ahma khan mawle aw, vawi engzat nge ka lo call pawh ka hre seng lo,khawnge i kal daih a?” a rawn ti leh a.Moses-a ka melh zauha, min lo la en ta cheu.

“Hei, Moses-a nen kan inhmua,a dawr thar turah kan awm mek a...eng nge ni ta?”

“Ka lo kal,a bul lawkah ka awm mek “ a dah zui nghal hmak, engtin nge Moses-a dawr thar tur pawh a lo hriat reng reng ni??

“Tu nge a?” Moses-an a lo ti thuaia, a hming sawi ri lo ila chuan tu nge ka biak min zawh ka ring lo,midang te biak tu nge annih lo hriat tum kha thil mawi lo tak a ni tih kei ai pawn a hrechiang ngei ang.

“Zomuani mawle..a lo kal dawn” ka ti a, a then nak mai.

“Um,a that chu..he nau hi chu a lawmawm ania..” a nui hak hak mai.

“Nia, a bula awm a hahdam khawp mai” ka ti ve a.

Rei vak loah Zomuani a lo lut a, eitur Moses-an a duh leh duh loh a lo zawta, min rawn ena,

“I ei dawn em?”

“Aih..”

“Chuti chu ka ei lo mai ang, Nanuni hi ka biak duh vang ania ka lo kal..”

“Engemaw inhriat leh? Hna in kalsan ve ve a, in Boss chu a lawm lo khawp ang mawle” nui chung hian a ti a, Zomuani’n min rawn melh zawka, engemaw sawi tumin a ang ziau a,mahse, a chip leh daih lawi.

“Nia, chu vang chuan ania let leh vat kan ngaih..kal ang..” hrethiam lo zet hian ka en a.

“Enteh, thiannu..”

“Aih, kal pahin kan sawi dawn nia” a ti leh hmawk hmawka,ka banah a rawn kuaha,min pawt chhuak a ni ber zawk.

“Min thlah teh, amak chung chung em mai..” Step kan chhuk thlak laiin ka ti a, a awmdan chuan min ti buai lek lek zawk, tunah chuan hnaah awm tur a ni a, chutiang ni loin ka bulah a awm daih a, min zawng niawm takin a la awm zui bawk.

“Moses-a khan engmah a hriat ka duh lo alawm, buaina hi chu buaina a nimaia, thian pawh nise hetiang thilah hi chuan an intuarpui tak tak lo ania..” a ti a, ka hrethiam chiah lo, Moses-a awm danah khan chuan vawiina kan mualphona hian amah ah engmah nghawng a neih hmel loh,diktak chuan engmah hre lo a ang zawk.

“Ngatinge hnaah i la let loh a?” ka ti a, pawnah kan ding duna.

“Chutak chu ania, ka rawn zawng che mawle, call pick ni la chuan a zia,i pick mang si lo” a ti leh hlaka.

“Zawn ka ngai hleinem..tunah pawh hian haw ka lo tum mek asin,haw hmain Bazarah ka mamawh ka lei kual zawk ang chu ka lo ti a..” ka ti ta ngawt, kan awmna atangin Bazar a hla lo bawka, chhuanlam tha tak a ni tho mai.

“Khawlaiah hi chuan ding chungin kan inbe ngawt thei lo ang,khawiah nge niang aw?” a ti vang vanga, a hawi kual a.Enge tih a tum ka bo tulh tulh thung,dik tak chuan min ban dawn tho vangin ka banga, tunah hna lam engmah sawi dun tur kan neih ka hre tawh miah lo.

“Tih dan ka hria, in Branchah let leh phawt ang, chuan,i Cabinah a ni tawh mai..”

“I sawi sual em?”

“Aih, engmah ka sawi sual lo...kal ang” tih leh kal a ruala,zui lo ngawt dawn ila thil enge thleng tur ka hre si lo,kawng kan kan a, chhak lamah a Scooty a lo dah a, minute tlem te a liam leh meuh chuan kan inphur fel chu a ni leh ta der.

Dawr kan thlen chuan ka dik lo deuh hu mai, Noel-i emaw Zorina zawk pawh hmuh mai ka inbeiseia, mahse, tumah mah an lo awm lo hlauh,ka kal chhuah hnu khan an la inbe leh anih chuan thlen na hun ala awm kher lo maithei, ke a ka kal khan ka kal thui viau a,Motor in an kal ngei anga,thlen hun chu a ni deuh tho mai.Mahse, an lo awm lo ve ve a, Dawr lah nidang ang thoin Customer lunch ei an lo awm nuala, thil dang an hralh chhuak reng bawk.Mahse, tlem chuan mi an tlem deuh thung.

Kim’in thil thlen dan min lo zawta, mumalin ka chhang lo, Zomuani’n a be bawrh bawrh hlawma, engmah thleng lo ang maiin a khawsa a, mak ka ti takzet, Cabinah kan inzui lut a.Kimi bawkin eitur kan duh dawn leh dawn loh min zawt a, ka hnial dawn zeta, he hmunah hian ka thil ei tawpna ber anih takin ka ei ngei ang, ka ei tlem anih leh a tlem animai.

“Kha i thil dah ho kha aw..” dawhkanah ka thil dah tawh ho kha avaiin a rawn daha, mak ti zet hian ka melh reng ringawt.

“Ngatinge a?” ka aw a lawi rat mai.

“I banna kha an pawm leh lo ti ila kan thawh dawn hian dan felfai tak a awm vek a, nang pawn i hria ang chu, an ban che anih chuan engmah sawi tur a awm lo ,mahse, an ban che nghak hman loin nangmah leh nangmah inban i tum a, kha tak kha i tihsual a ni ta anih kha..” ka hrethiam lo tawlh tawlh thung.

“Mahni thu a bang te hian an Contract zawh hma anih chuan pawisa chawi angai thin tih i hria ang tiraw?” ka lu ka thing ringawt.Ka hre lo tak tak.

“Chuti anih chuan hei hi i thawh tan dawna i sign kha ania, tah hian a awm veka..” Paper dang a rawn phawrha, ka lo la thuaia, ka en thuak thuaka, a sawi dik,kum khat chhung atan vek a lo ni a, kum khat hmaa ka duh thu ngeia ka bang anih chuan kum khat tlinna tura thla la awm zawnga ka hlawh tur kha ka pek nghal vek angai,tunah chuan ka nei lo satliah mai pawh a ni lo,Chuan,hei hi engtin nge ka lo hriat loh theih ka hre lo,dik tak chuan ka hming sign a awm ngeia, mahse, ka sign lai ka hre lo.Hria ni ila a hma pawh khan hna dang zawn ka tum lo ang...

“He thil hi ka sign lai ka hre miah lo, tak takin...mahse, min ban dawn tho a, keima thua ka lo inban nen khan eng nge tun tumah hian danglamna awm a?”

“Ka hre bik lo, U Zorina khan a sawi chhuaka, midang zawng chuan i banna kha an pawm nghal vek a, mahse, U Zorina ber khan a pawm bau lo..”

“Engtin nge min tih a tum a?” beidawng zet hian ka ti zuai raih mai,hetah ka thawk thei in ka ring tawh lo,Noel-i ta ania, chumai bakah a pa leh midang awm laiin ka chawlh a tul tih a sawi vek tawha,mahse, he dan tul lo zet vang hian thil a buai leh ta tlat tho.

“Ka hre bik lo, vawiin chu hetah awm phawt se an ti che a,ka thian i nih na leh i senior ka nih angin hrilh tur chein min ti a..chuan..” Kimi lo lut a hmuh veleh a tawp leh rih.

“Zorina chuan engtia tih nge a tum ang?” Kimi chhuah veleh ka ti sepa, ka no tlang ka tuai hauh hauh bawk.

“Ka hre lo, mahse, thil pakhat, u Zorina tan hian i pawimawh lutuk tih vawiin khan ka hre chiah..”

“Maw?”

“Enteh, ka thawh hnu hian vawikhatmah a Pa hi a hnial ka la hre ngai lo,mahse, vawiin chu  i chungchangah a hnial ve ta tlat..” min en lo in a thil ei tur lam a en a.

“Aaaa, chung te chu pawimawhna a ni hleinem,pawimawh zawk chu he dan hi..chumai bakah ama lak ka ni a, a mawhphurhna ka ni tel bawk alawm..”

“ I sawi dik, mahse, thil mak a awm..eng nge anih ka hre lo a, min hrilh tur i nei zawk mial em?” min rawn en thuta, ka ip chawih mai..Rang zet hian ka lu ka thing vat bawk.

“Ok, chuti anih chuan ka ei dawn, ka ril a tam over,nang pawh ei teh, vawiin kha chu engmah thleng lo angah ngai mai la, chuan,naktukah U Zorina i hmu dawn nia..”

“Ngatinge ka hmuh angaih ang?”

“Ka hre bik lo, chuan, U Zorina hian a hna kha a bansan tawha, i hmu dawn anih chuan a officeah aw,a office i hria em?” a tih zawm leh a.

“Aih..”

“Dawrpuiah hian ania....” ati a, a building awmna leh a room number min hrilh nghal a, mahse, a sawi rualin ka theihnghilh zui chu a ni tho mai.

Ka mu meng kar mai, vawiin thil thlen dan zawng zawng kha a mal malin ka ngaihtuah a, engkim mai kha a thleng thuta, a reh lehnghal vek niin ka hria, Zorina khan min hmusit hlawm tawp tih erawh ka chiang ngang thung, Branch dang manager tin te leh an family member, thu tur chin chu Meeting naah khan an thu vek, an vai awm lai khan ka hna thiam loh thu leh ka tlin loh thawk ka nih zia kha a sawia, chumai bakah ka dinhmun harsatna vanga min khawngaih kha a inchhir tih a sawi tel bawk, ka thu chhuak leh ta nge nge.Kan Branch atang kherin engtin nge kha Cake hmuar kha an lei theih? Nikhat lek tal pawh lo check lo ila chuan a lo thleng palh pawh ka ti thei ang, mahse, nitin ka check a, a rem dan atangin a hlui dan azirin engkim kan rema,thil theih loh tawp hi a ni mai, mahse, a thleng miau lawi,kha cake leitu tal kha be pawp thei ila chuan a zia ang, mahse, ka thei miau si lo.

Ka Phone riin min ti harha, ka en a, ka nau a lo ni a, nizan khan khawvar dawn lamah ka muhil ta chauha, ka mit a kham urh mai.

“Hello...”

“U, nizanah ka thianten an sawia, Fb vela an thil post kha, i buaina tur a ni ve em?” a rawn ti a.Ka rum hak mai.

“Aih, kha chu kan Boss te lam chan anih kha, i tha em?”

“Um,tha e,chuan, thil ka hrilh che anga, thinrim suh aw..” a rawn ti leh a, peih lo zet hian ka thu chhuaka, ka mit ka nuai nawk nawk bawk.

“Sawi la...” banga Sana intar lam ka en paha, dar 6 a la ri lo deuh.

“Nizanah u Hriata khan min lo be hlawl a..” LALPA le(h)..Tun ang hunah hi chuan a hming ka hriat peih loh ber pawl a ni ngei ang.

“U, i la awm em?” ka nauin a rawn ti leh a, a lo zuk bia kha ka nau thiam loh a ni lo a, a chungah thinrim tur ka ni hek lo.

“Aw, awm e, thil ka ti pah alawm, sawi zawm la..” ka ti a.

“Eng lo, in thawhna nei tupa nen khan in inkawp a ti a...” ka khawng nghal lah mai.

“Teuh lo lutuk,hman zanah min tibuaia, kan Boss ti ila kan thawhna te family a mi pakhatin min rawn chhana,chuvang anih chu..” ka ti a.

“Um, anih chu..engpawh nise khapa kha ka hria asin, ka thiante hian an sawi peih tawpa..”

“Aaaah, anih tak chu..” awlsam hmel zet hian ka ti a.

“Nia, ka lo haw hunah ka hmuh ve ngei angai ang,nih phawt, a la hma si, ka mu leh dawn” a nui kar kar mai, Hriata vang in a lo muthei lo   a ni phawt ang, ka lo sawi fiah takah chuan rilru nuam takin a mu leh dawn chu ania, ka nau khawngaihthlak..Ka dem hauh lo, Hriata vang khan kei chauh ni loin an ni pawh an kehchhe ve a, mahse, a nihna tak erawh engtikahmah an hriat ka phal ngai lo ang.

Eirawng ka bawl sawk sawk a, vawiin ka awmdan tur ka chiang lo,hna lamah ka kal dawn nge Zorina hmu turin ka kal dawn ka hre lo, nimin kha chuan Zomuani khan nimin chauh kha Dawrah awm tura min tih thu kha a sawi ngei mai a..

“I buai em?” phone a pick veleh ka ti ta nge nge.Nimin khan a hmun min hrilh mahse ka hre leh tawh lo.

“Aih, eng nge ni ta?”

“Engtia awm tur nge ka hre chiah lo, Zorina chu vawiinah ka va hmu dawn nge?”

“Dawn ka tih kha,bakah Dawrah kha chuan u Noel-i a thu dawn alawm,U Zorina chu va hmu phawt mai teh” a rawn ti a, ka huphurh zia hi hria se chuan min kalpui hial ang.

“Nizanah Moses-an i number min dil a, ka pe ania” a rawn ti leh a.

“Ngatinge?”

“Ka hre bik nang, mahse, thil pakhat, nang nula, Moses-a tlangval..i hrethiam em?” a nui hak hak mai,ka nui ve ngawt bawk.

“I ho em mai a, ka buaina hian min ti chau ania” ka ti a, a thaw hak ri ka hrethei.

“Ka hrethiam che lawm, mahse, Moses-a hi ka hrechiang ania, kal pah hlek suh ang che..” a off zui daih bawk, a va han nghal thin tak, engpawh nise ka nuih phah leh ta chu ania, a zia tho e.

An office awmna ni a min hrilh kawtah ka ding vang vang a, ka lut huphurh takzet, dik tak chuan Zorina ka huatna avang ngawt pawh hian ka awm mai mai hi ka na vek thei tlat,kan pahnih a kan awmdan kha chu engpawh nise khatiang taka min hmusit tur kha a ni chiah em ka hre lo,chutih rual chuan a dik lo leh tuartu ber chu kei hi ka ni leh ta tho.

“Hey...” ka darah tu emaw hian a rawn khawih zauh a, tu nge anih en tumin ka hawi vat bawk.Moses-a a lo ni a, helaiah kher chuan hmuh ka besei lo.

“Nang maw? Eng nge i tih dawna?”

“Aaah, eng ti dawn lo e, i chho dawn mi?” a ti a, ka bu ringawt.

“Zorina i rawn hmu dawn ami?” kal pahin a ti a

“Aw,a awm em pawh ka hre lo..” ka ti a, stepah muangchangin kan chho duna, thil eng eng emaw a sawia, a nui leh hak thin bawk, dik tak chuan a sawi engmah mumal in ka hre lo.

“Moses,...oh,nang pawh maw?” Zorina rawn chhuak tur chiah nen kan intawka, min melh run mai.

“Um, vawiin chu ka lo kal hun a fuh khawp mai, Nanuni hi pawnah a lo awma” a ti a, Zorina a kal pel a.Zui ve lo in ka dinna ngaiah ka la ding ngar thung.

“Nia, a fuh anih hmel..” a ti hluka, a inhera, Office chhungah a lut leh daih bawk.

“Nanun,lo lut la..” Moses-a zawkin a rawn ti a, tim deuh dai hian ka pen lut a, an office chhung fel fai leh nuam zet mai chu ka en kual a,ka hmuh theih chin chu Mipa pahnih awmna tih takah engmah han tarmawi lam a awm lo.

“Zo-a,nizan khan Assistant thar tur a lo kal dawn kha i ti sia, Ramkimi chawlh lai hian lo kal vat se a tha ang a” a ti a,Remkimi chu tu nge anih ka hre lo.

“Nia, a lo kal alawm” awlsam zet hian Zorina’n a ti a, Table lian lutuk lo awm chu a nghenga, a phone a khawih mawlh mawlh bawk.

“A lo kal..khawnge?” awmze hre lo hmel zet hian a ti a

“Nanuni hi..vawiin atangin helamah a rawn thawk tawh ang,kum khat atan..” ka melh reng ringawt,engtin nge he laiah hian ka thawh theih tehlul ang? Nitin kan inhmu dawna, chumai bakah ka tana nawm loh rawkna tur khawp in a khawsa lo ang tih a sawi theih loh,a tawngkam ngeiawm tak tak nitin hre tur a ka in ngaihtuah ngawt pawn ka dik lo nghal nghulh thei.

“Wow, a va nuam dawn ve..” Moses-a aw a phurna chuan tlem chuan min hnem deuh.

“Nia, nuam i ti phian ang ka ring, hna leh thil dangah pawh..” a ti hmuka, a ding mar a, huatna nen ka en lo thei lo.A tawngkam ngeiawm lutuk chu tun atangin ka hre tan nghel der chu ania.