EVERGLOW-7

Chapter- 7

Ka tawng dawn a, ka tawng ri chhuak zo lo, ka nui ta ngawt.

“I tha em?” a ti leh a, ka en a,harsa ti zet hian  ka nui lui a.

“Tha e,mahse, khati taka khuh te chuan a hrehawm ve lawm..Engpawhnise kan kal mai dawn mi?” ka ti a, min hmuh ka duh hauh lo,bakah ka zahna belhchhah tura mawl taka chet ka duh hek lo.

“Ka va be lawk ang..” tih leh thawh a rual a, kan inkawm hnuah ka huat ber tum a la ni hial ang.Eng nge va biak kher a tulna? Ka lo kalsan ngawt thei bawk si lo,an rawn luh tirh atangin a kil lama thutna awlah an thu a, Restaurant neitu niawm tak hian a va zawm ve a,an inhre sa anih hmel,min hmu lo hrim hrim thung.Min hmu se ka ti miah lo bawk.

Zomuani kal phei chu ka thlir a, tu nen nge an kal an lo zawt anih chuan min rawn kawk ngei dawn,chu tak chu ka duh lo,nizan kha chuan a zinna atangin naktuk lamah chauh a lo haw a beisei thu min hrilh kha ania, tunah chuan engmah sawi tur a awm ta lo.Nihnih leh zan hnih a bulah hun ka hmang a,ka mipa kawp lai a nih duh thu min hrilh bawk.LALPA... kum 30 ka tling dawn tawh, ngatinge hetiang em em hian ka at theih mai? Mipa zawng zawng hi an in ang vek tih hre tur khawp chuan ka na tawk tawh,mahse, min bum leh ta tho, Danglam bikah ka ngai nge ka hre tawh bik lo.Bum ka nawm lutuk vangin min lo nuih ru thin ngei ang, kei lah chuan a sawi te kha thinlung tak takin ka ring lo ti ru reng chung si in ka Bialpa emaw ka lo ti leh hman tak tak,Pawisa sengin min mutpui a, pawisa seng lo a min mutpui theih nan nihnih lek chhung khan that a chhuah a,ka lawmna tawk a lo tling leh hman bawk.Tunah a nupui hlui nen an inzui a, Zomuani sawi dan kha chuan an inthen ringawta, an inthlah miah lo a ti anih kha.Chumai bakah Am-i pawh a lo la kawp tel tho.Chhaw intih luat vang hian thih theih se chuan ka awmna hmunah hian ka thi nghal ngei ngei ang.

Zomuani a thleng phei chiah tihin ka tho ve nghal a, eng nge tih ka tum ber ka hre lo, mahse, min hmu lo se ka duh ber.Wash room ka pan ta ngawt,tu nge ka nih an zawta a hrilh anih pawn ka hnunglam chauh an hmu anga a ziawm,ka chhuah leh chuan ka lam an lo hawi tawh kher lo ang.

Wash room darthlalang lian zet awmah chuan ka in en a, ka hmai a dang var lap a, hmuh thiang lo hmu niawm tak hian ka hmel a pangngai lo.Eng nge ka hlauh chiah? Chawlh laiin hun kan hmang dun animai alawm,ngatinge hetianga ka tlanchhiat kher? Ka mit ka chhinga, huaisen taka hmachhawn tluka duh ka nei lo.Ka thei lo mai zawk, mahse, hei erawh ka chiang,ka mipa kawp tur chi a ni lo a, kan inzawmna lah SEX mai chauh a ni bawk, kan inzawmna derthawng leh zahpuiawm tak hian engmah min thlen dawn lo.’PASAL’ tih ka rilruah a lo lang zawk, ka lu ka thing nawk mai.Mumang lamah pawh hei hi chu ka mang chhin lo ang.Atak phei chu hla tak a ni ringawt.

“Hey, khawnge i lo kal hman daih?” ka chhuah veleh a lo ti nghal hlar mai.Zorina te thutna lam hawi loh hram hram ka tum a,ka chair ka pawt sawn deuha ka thu leh a.

“Toilet lamah, i be zo tawh mi?” ka ti a, kan thil eina bill an lo dah chu ka en a.

“Aw...ahh..lo thu rawh” min en loin ka hnunglam a en a.Ka hnungzang a za mar mar a, tu nge ka hnungah ding ka rin hriat thei mai.

Muangchang hian ka hawi let a, ka nui lui sang bawk.Hei aia hmachhawn dan tha a awm chuang lo tih ka chiang.Zorina nen kan inmelh ta ran mai.

“I tha maw?” a ti sup a, min hmuh vanga lawmna lam engmah a lang lo a, lungawi lo hmel pawh a pu chuang lo.

“Ka tha lawm..” pangngai tak hian ka ti a.

“U Zorin, hei hi Nanuni ania..” Zomuani’n a rawn ti a,Zorina ner nawk chu ka hmuh hmaih hauh lo,a hmui hnuailam a pet zauh a,a nuih a za a ni mahna le.

“Ka hria a lawm..hmelhriattir kher ka mamawh lo ania..” a mit thim deuh raih chuan chik zet hian min en a, ka lo ip chawih thung,a tawng duh dan lah chu ka haw hluah hluah.

“Maw? I hre sa maw?” min melh tawn zak zak a, sawi ve tur hre lo in ka ding mawl tawp ringawt.A hma lawk pawh khan min ringhlel tawh a, tunah phei chuan a hria a ni hrim tawh mai.

“Nichinah i sawi kha...” a thle buk a, ka thaw huai thung,ka kut ka phar chhuak a,kei ang bawkin tu nge ka nih a hria tih midang bulah tihlan a duh ka ring lo,kan inzawmna lah a chhuanawm fahran si lo.

“Oh, ni dawn tak..Thiannu, a chang chuan a chimawm ve thei ania, engpawh nise Boss ang in en duh miah suh..” nui har har chung hian a lo ti a.

A nui suk a,a  kut a rawn phar chhuak a, ka kut a rawn vuan a,a vuan nghet lam hrat bawk,lak let tuma ka pawt chu hre lo niawm tak hian a chelh tlat bawk.

“Dawrpui lama in Dawr tharah ka awm ve a,in hnenah min thawh tira ka lawm takzet” ka beisei ai mahin ka aw a pangngai, mahse, chik taka lo ngaithlatu chu awmse ka aw a khur tih an hre thei ngei ang.

“Ok, ka hria lawm..” a ti leh sup a, ka kut a vawnna a thlah a,a Jacket ipte a zen a,min hmu tu tan chuan kan lo inhre tawh sa kan ni tih rin a harsa viauin ka ring.

“I nupui nen ami in lo kal a?” ka tum loh tawpin ka ti a, mahse, ka sawi zo vek tawh.

“Nupui..nia, mahse, a hlui zawk mawle...” a khabe hmul kual raih chu a chul thuak a, kei erawh chuan thildang ka lo ngaihtuah daih thung,hahthlak hian..

“Ok, engpawh chu nise ka hmuh ve chak nen,mahse, tunah chuan kan kalsan che angai dawn anih hmel..” Zomuani lamah ka thle zauh a, Zomuani pawn min pawmpui niawm tak hian a lo bu ve nghat bawk.

Pawn kan thlen veleh theih tawpin thawk ka la vak a, kan inbiak chhung khan ka thaw reng,mahse, ka duh khawp boruak ka hip lo nge ka hre lo, pawn kan thlen meuh chuan ka thaw nghal hawk thei.A mi uapna na lutuk kha ka tuar zo lo thelh niin ka hria.Noel-i leh mipa pakhat an ding duna, kan bulah Zorina kha chu rei vak lo a ding a, kan chhuah hmain a kalsawn ta hlauh.

“Zomuan,lo ding lawk..” Mipa aw hian a rawn ti a, ka hawi let a, Restaurant chhunga Zorina te bula awm pa kha a lo ni a.An lo inhre pawh thum anih hmel e.

“Eng nge?” Zomuani’n a ti a.

“Naktuk zan kha ka sawi theihnghilh a, i card tur an dah tho nangin i thiannu hi...” min rawn en a, a nui var var bawk.

“Eng thil nge ni ta?” ka ti ve a, ka tel vena tur thil anih hmel ta.

“Naktuk zanah ka thian ten  Falkland parkah hun an nei dawn a, i lo kal ve theih chuan kan lawm viau ang”a ti a.

“Eng lam hawi nge ka zawt thei che em?” ka ti ve thung.

“Um, thei e, Band an nei a, Shillong lam mi an nia, live a perform tur an nia.Sawm bik tlem te kan ni dawn a.. i lo tel ve theih chuan..?” a ti leh a, a sawi lai reng pawn ka kal ngei ngei ang tih ka chiang nghal.Tu te band nge ka hre hauh lo,mahse, Shillongah kum 4 vel lai ka awm ve a, a ram mi te an sual ti thin mahse kei chuan ka ngaina a,thian tam tak ka nei bawk.

“Ka va phu lo si em..mahse, zah loh chhuah pawn ka lo kal ngei ngei ang” ka ti a, ka College kala Shillong kan awm lai ka mitthlaah a lo langa, mahse, thil pakhat hriat chhuah tel ka nei ve zel hi chu tawp tawhse ka ti takzet.Ni e, kha mi tenawm Hriata kha..ka tana mipa hmasaber leh awmchhun a ni emaw ka lo tih thin ngei kha..Ka duh em avanga mawl taka ka inpekna pawh Shillongah bawk.A rawn perform tur te band hming a sawi leh a, ka thaw hak mai, ka rilruah Hriata bawk a lo langa, kan pahnih khan he mi te Concert en tum hian kan chhuak ru dun anih kha..Kum a liam ta nual,kan awm lai kha an lar vanglai a ni a, Mizoram lam thleng pawn an hla kan sak pui dual dual thei thin kha ania.Tunah chuan an mahni pawh an upa ta deuh a, Member te pawh a ngai vek an  la ni em ka hre tawh lo.

Mama’n eirawng a lo bawl vek a, hna thawh a tum viau nangin  ka la remti lo.Ka hlawh atangin kan khawsakna tur chu a awm ve zel rih a, kan ba te erawh engtin nge ka pek ang ka la hrethiam rih lo thung.Hlawh ka lak apiangin tlem tal ka dah bang a.Mama’n hna a thawh ve theih hunah chuan kan ziawm mai in ka ring bawk.

“U,i phone hi a ri reng ania” Bathroom kawngka bul atangin a rawn ti a, chaw kan eikham hnuah ka inbual leh riha,zan inbual hi ka ti thang laklawh a, inbual lo chuan ka mu thei thin lo.

“Tu nge?”

“Zorina..” ka beisei lo satliah mai pawh a ni lo.

“Aaaa, pick duh suh,nakinah ka call back mai ang” ka ti ta ngawt,eng nge sawi dun tur kan neih ka hre miah lo.

Ngaihtuah loh hram hram ka tuma,vawiin khan ka zaka,tlawm ka inti bawk a,mak takin a nupui kha ka thik pawn ka hre ta chiah lo,mahse, Am-i pawh a lo kawp thina, a In a kal pawh Am-i ah an ngai tih ka hriat khan ka zak nge ka induhtawkna a chhe zawk pawh ka hre lo,ka haw hluah hluah.

“Ka lo pick mai dawn, a ri char char a..” Mama bawkin a rawn ti leh a.

“Aw, ka muhil tawh tih hrilh rawh..” kawngka ka hawnga.

“I zawh tho chuan nangman chhang mai la..”

“Aih, chhang rawh, hna chungchang anih chuan ka kal peih dawn si lo..a muhil tawh min ti rawh” ka ti leh a.A kalsawn a, hna chungchang a ni dawn hauh lo tih ka chiang, hna a lo ni hlauh anih pawhin a mimal hna tenawm tak bak kha a ni lo ang,oh..tenawm chu amah chuah ni loin kei pawh mawle.

Roomah Mama a rawn lut leh a,khumah ka phone a rawn theh thla a.

“Tu nge a?” a awah lungawi lo a ang viau.

“Kan Boss te zinga pakhat...” nui chung hian ka ti a, a nui ve hauh lo.

“Khatiang hnuaiah khan maw i lo thawh a?” a ti leh nghat a,engtin nge Zorina’n a tih ka hre si lo,ka lungphu a rang nghal dawt dawt mai.

“Ngatinge a? eng nge a sawi a?”

“Engmah...mahse, a tawngkam a mawi lo..” a ti leh hlak a, Mama hian midang chanchin a sawi zen zen lo,hlauhthawnna bawkin min rawn tuam leh a,ka awmdan zahpuiawm lutuk vanga keima thiam loh a ni tih han hre na se chuan aw..ngaihtuah pawh ka ngaihtuah ngam lo zawk.

“Ka lo bia ang, hna lamah pawimawh a awm thut anih ka ring” ka ti a.Uluk fe hian mi en a.

“Zan lamah chuan dawr in hawng si lo a,ngatinge?”

“A mimal zawk,a chang chuan kan tihpui angai thin alawm” tlawn ti tih hian ka ti a, ka aw a nghet charh bawk.

“A mizia kha ka ngaina lo tawp mai,heta lo kal thin kha amah a ni tiraw?” a ti leh a.

“Um, thin tih lemah vawi hnih khat bak a nih loh kha..” ka ti leh a, ka thawmhnaw bawm lam ka hawisan a.

“Thil ka zawt thei che angem?” a la ti ta fo. Muangchangin ka hawi let a.Engtin fakau nge a lo biak hrep le?

“Han sawi la..’ngaipawimawh lo hmel fe hian ka ti a.

“Mi sawi hi a dik em?” a ti a, hrethiam lo fe hian ka en a, ka thle bak ringawt.

“Eng chu?” ka ti ta tho.

“Niminah Nutei’n a sawia, kha pa nen khan in in kawp a ti a..” ka nghing lawih mai.

“Aih..ni lul lo e,a hresual anih chu..”

“Hresual se ka ti khawp mai,tu nge anih i hria em ka hre lo, amah kha hmeichhe lamah chuan a hming tha fahran lo ania.Bakah Nutei Cousin Am-i nen an inkawp thin a..” a ti leh a.Nutei hi ka hriatna a rei ve tawh, Am-i nen an lo in Cousin tih erawh ka hre ngai lo.Bakah Am-i zawk hi tun hnaiah chauh ka la hria,a va han kual teh nuaih em!!

“Chuan?” sawi tur dang ka hre lo.Ngawih reng aiah ka chhuanlam a ni mah zawk.

“New Year khan khawiah nge hun i hman?”

“Mama, khawngaihin..hna ka thawk ka tih kha..Bakah ka mimal thil lutuk chu min zawt lo teh” ka lungawi lo miah lo, mahse, ka aw ki erawh ngaihthlak a nuam fahran lo maithei.

“Ka u i nia,kan tan i thawh nasat zia ka hria,mahse, ka hre duh, unau chauhin kan awma, zahawmna kan neih ve chhun hi a tlem lutuk,chuvangin mi pasal nena inzawmna inneih ka duh lo..” a thusawi zawng zawng chuan min deng dawt dawt niin ka hria,ka mutpui hmasak ber atang khan zahawmna ka nei tawh lo,ka hralh fel vek tawh, chumai bakah a hnu lehzel a thleng phei kha chu keima thiam loh liau liau a ni bawk.

“Ka hrethiam che lawm,i hlauhthawnna pawh a awm tho mai, a tha ber chu hna dang thawk ila hetiang neuh neuh hi chu a bo maiin ka ring,mahse, thil pakhat,nupui a nei lo a, Pathlawi zawk..engpawh chu nise mipa leh hmeichhia kan ni a,mi in min lo sawi pawh a awm tho mai” ka ti a.

“Ka ring lo che a ni lo, mahse, min hrilh takah chuan kan Inah alo kal bawk a, hna lam engmah a lo kal khan a sawi miah lo tih ka ngaihtuah a, chuan, tuna ka biak leh takah khan ka ngaihbel lo thei lo a, chuvangin ka zawt che anih kha..” a ti leh a.

“Ka hrethiam che.Engtin tak nge in inbiak ka hre lo nangin ti khan a mizia i hria ang,Eng pawh nise kan unau tan zahna tur engmah ka siam lo ang tih ka tiam che.Min hria alawm” ka ti leh a.

“A tawng danah khan a ta ang maiin a rawn sawi che a” a ti leh hmak a.Ka ngaihtuah zawng pawn ka danglam vek thei.

“Ni lo e, a thinchhe ve em bawk a, kan pick mai si lo nen a hua anih dawn chu, engpawh nise hna dang chu ka ngaihven tho ania” ka ti leh a.Ka sawi awih hram se ka ti takzet.

“Nia, kei pawn thla thar atang chuan hna ka thawk thei tawh ang, ka thianpa ka be fel vek tawha, an sales dept ami pakhat a bang a, chu mi hmun awl chu ka luah nghal thei dawn a..” a ti leh a.Hna la thawk lo se ka duh, mahse, ka nau hi ka hrechiang, a thawk dawn a tih chuan a thawk ngei ngei ang.Ka pa damlai khan Mama hi chu Delhiah a awm thin a, B.com a zir lai ani a,ka pa boral kha a tuar na lutuk a, kum khat a paih a, kan nawrna vangin a kum lehah a zo ta hram kha ania.

Zir zawm zel a tum laiin ka nu a che ho leh a, khatiang teh nuaih kan nih tak avang khan hna a zawnga, a zirlai khan a thiam pawl ni lo mahse rual pawl tawk a ni ve a, hna pawh a hmu mai reng a.Mahse, a accident leh takah khan pvt a lo ni bawk nen a thawhna ten ui viau mahse a chawl hlen ta zawk.Kei kha chu min ui thu sawi chungin min ban thung.

Hreh zet chungin ka call back ta nge nge, eng vanga min be duh nge anih ka hre lo a, Mama bulah khan eng nge a sawi ka hre bawk lo a, khati taka Mama ti thinrim tur kha chuan a tawngkam a mawi lo hle ang tih erawh ka chiang.

“Khawiah hrep nge i awm a?” phone a pick rualin a rawn ti hlur mai,ka phone ka beng bul atangin ka la sawn a, ka melh nghek ringawt.Hei chiah hi anih hi Mama chuan a lo huat ni?? Engamah hmain a rawn au chiam ringawt mai.

“Eng nge ni ta?” a rawn tawng dan ngeiawm zet hre lo niawm tak hian ka ti a.Mama khan kan inbiak lai a ngaihven ngei ka rin vang a ni pakhat bawk.

“Ka lo call che anih chuan pawimawh a awm tihna animai” a ti leh hmuk a, a hma ai chuan a ziawm ta deuh.

“Pawimawh a awm ka rin vangin ania ka lo call back,eng thil nge?” ka aw a ka inringtawk hmel lutuk chu mak ka inti zawk.

“Hna ka nei..” teh tawp a.

“Tunah chuan office hour a ni tawh lo”

“Ka hna hi Office hour loah pawh kan thawk dun thei khan ka lo hria a..” a nui zui hawk bawk,a nui riah hmuhsitna a lang chiang ngang mai.

“Maithei, mahse, tunah chuan ka thei lo tlat mai,min hrethiam dawn nia” ka aw a la dam thlap tho mai.

“LALNUNPAR,min ti thinrim lo teh, fiamthu ka thawh lo ania”a aw a hniam sat a, vauna lam a lang tel lek lek bawk.

“Kei pawh ka fiamthu hleinem,ka thawhsak thei lo che a min hrethiam dawn nia..ka buai deuh a, nih leh phawt le..” min rawn chhan let hmain ka off hmak bawk.A lo call nawn ka ring miah lo bawk, chutiang ti tur chuan a induh tawk lutuk mah mah.

“Hmela chuan eng nge a lo sawi a?” Living room ka chhuah phei veleh a lo ti nghal a.

“Eng lem mah,ka rin ang chiahin site ah kal an ngai a,ka kalpui thei em tih min rawn zawt a..” ka ti a.

“Anih tak chu, i kalpui thei dawn em?”

“Aih, ka hniala,a tlai tawh em mai, bakah tun atanga ka hnial loh chuan nidang zelah pawh min ko mai ang, hlawh extra min pe dawn te anih ngawt loh chuan..” ka ti leh a.

“I kal lo tur chu a pawm mai tihna maw?” a la ti ta fo, ka thusawi kha a awih emaw ka tia, a lo awih chiah lo tih ka hre ta chiah mai.

“Pawm chiah lo, naktukah min hauh ka ring, hauh mai mai a na lo em mai” ka ti liam puat.

“A thinchhe ve hle anih hmel e” a ti leh boh a.Ka chhang lo, kitchen lam ka pansan a, tui bottle ka la chhuak a, mutnaah hian tui inchhawp lo chuan ka mu thei thin lo.

Ka phone ka en a, ka rin ang chiahin a lo call nawn miah lo,a duh duha tihkual theih ka ni lo tih han hre ve reng reng tehse,kan hun lo hman dun tawh te kha chu theihnghilh hmak a, hmalam pan ka mamawh takzet,hna dang ka mamawh em em bawk.Joe-a tal awm se chuan a zia tur,Zomuani hi chu ka kawmngeih tawh nameuh mai, mahse Zorina nen kan  chungchang kher hi chu hrilh ka duh lo bur.Hrilh tur khawpin ka la ring tawk lo pawh a ni tho bawk.

Nilengin hnaah ka buai a, Manager ho min ko khawma, Chawhnuah Main lamah meeting kan nei leh a,ka thawh hnuah meeting vawi thum ka kal na a ni ta a, vawikhatmah Zorina a lo tel ve ngai lo vek.Dawr lamah kal tawh loin Zomuani nen kan haw ruala,kan buai ta deuh bawk nen Zorina ngaihtuah na hun pawh ka nei ta lo hlauh.

“Zanin kha i thulh ngawt ange,Moses-a khan a beisei teh mai che nia” a ti a, kalna tur kan nei tih ka lo hre leh tawh pek lo,kan kawtah kan ding duna,lo chhuk loin Scootyah a thu vang bawk.

“Tu nge Moses-a chu?”

“Nimina sawmtu che kha, awi..i hahthlak e, nimin pawh khan a hming a hrilh reng che kha..”a ti hlak a, ka nui ringawt.

“Naaaa, min hrilh lo niang ka hre lo.Engpawh nise sawi lo la chuan ka lo theihngilh hmak a..mahse, ka kal ang,min lo lam la” ka ti a, ka lo theihnghilh tak tak.

“Khati kha ania, dar 7 ah ka lo lam ang che, lo inpeih vek la..” a ti a, ka inpeih hman tur thu ka hrilh a, vawiin chu Mama a chhuak ve a, eirawng bawl chawp ka la ngai dawna, ka chet vat vat loh chuan ka tlai ngei ang,Zomuani hian mi nghah a thei bau lo.

“Lawk, entry fee lam kha engmah a sawi lo a..” ka ti leh rih a.

“Nidawn tak, mahse kha lam chu ngaihven suh.An band nen hian Deal an nei a, chuvang zawk chu,zanin chu sawm bik tak tak kan ni dawn,a fel fai thlap ang” a ti leh a.

Dar 7 hmain ka inpeih vek hman, Mama a thiante inah chaw a ei nghal a,an lo thlah leh dawn avangin a lo haw hma dawn lo tih min rawn hrilh a.Ka kalna tur ka hrilh a,ka haw hma lo maithei tih ka hrilh bawk.Zomuani lo thlen veleh kan kal nghal a, khua a vawt tawh vak lo bawka a nuam phian mai.Titi lawng lawng chungin kan tlan a,kan tawng kan inhre tha thei lo  leh thin bawk nen kan han nui leh rih a, a bula awm hi a hahdamthlak thin a, mahse, Zorina Cousin anihna hian tlem chuan min hlat tir ka ti lo thei lo.

Mi kan tam lo,Moses-an min lo welcome a, boruak nuam tak hnuaiah an music ka ngainat em em thin, Soft rock ri dam raih mai chuan min awi a, ka hnuk a ulh lek lek mai,member pangngai deuh vek an la ni a, an Drummer an thlak tih mai loh chu.An hla nise thiam loh mang ka nei lo a, an sak apiang ka lo zawm ve zel bawk.

“Rei lo te va hawi thawveng ila..” Zomuani’n a rawn ti sa sa a.Kan thlen atangin darkar khat lai a liam tawh, nuam ka tih em avangin hun a kal duai tawh tih ka lo hre miah lo zawk.

“Pawi miah lo,kei pawh Toilet ah kal zuai ka duh’ ka ti a.

Toilet kan pan duna, a dan ngai te bawkin a tawng leh siam siama, ka aw liam vel mai mai thung,

“Lo ding lawk..” ka hmaah Mipa pakhat a rawn dinga, Light eng hliah zawng taka a din a avangin tu nge anih ka hre thei lo.

“Eng nge nita?” ka ti a, a thle deuh a, ka beisei loh lutukin Hriata a lo ni a.Ka thaw hawk mai.Kan pahniha kan atchilh thin Band anni a, a lo kal ang tih te chu lo ring lawk tur ka ni asin le.

“Ka be lawk duh che a..” tih pahin Zomuani a melh zauh a.

“Ka lo va kal ang, nakinah kan inhmu dawn nia” Zomuani’n a ti a, chhan pawh ka chhan hmain a kal zui nghal mai bawk.

“Eng nge min biak na tur i neih a?” ka ti hmak a.Nelawm taka lan ka tum lo, vawi tamtak min biak a tumna ka hnawl tawh, zanin zet chu tihngaihna a awm lo.

“Sawlai deuhah sawn kal ila..” kan piah a thutna tur awm chu a kawk zauh a, hnial ka tum zet a, ka thulh leha, ka bu ta nghauh zawk, he lai chu mi kal vel an awm renga, eng chungchang nge kan sawi dawn ka hre si lo.

Ka zui phei a, a thutna hlat thei ang berin ka thu a,tawng hmasak ka tum lo bur.

“Ngaihdam dil che ka duh a,bakah zanin hian i kal dawn tih ka hria a,chuvangin ka lo kal..”

“Ka kal dawn tih engtin nge i lo hriat ngawt theih a?” ngaihdam dilna lam chu sawi zui ka tum bau lo.

“A buaipui tu te zinga mi hi ka u thiante anni a, list ka en sak a, i hming ka hmu..”

“Card engmah min pe lo a, ka hming a lan ka ring lo,bakah min biak hi tum tawh lo la a tha ang.” tih leh thawh ka rual a, a rawn tho ve nghal a.Min rawn hnaih nghal ruak bawk.

“Kal rih suh, hetiang ringawt chuan ka tuar thei tawh lo..” ka ban rekah a rawn vuan a.Eng chu nge a lo tawrh theih loh hrep ni?

“Min thlah rawh..” ka ti chang fak mai,mahse, min thlah chuang lo.Phelh sak tumin ka ban a,mahse, ka kut lehlam pawh a man bet tel leh tlat tho.

“Kal a duh chuan kal tir mai kha a tha zawk lo maw?” Mipa aw hian a rawn ti a, ka chhing sawk mai.Zorina aw a ni tih ka hria, tu nge anih hre turin amah hmuh kher ka mamawh hek lo.A aw ka hriat chuan a tawk reng.

“Lo inrawlh miah suh,i buaina a ni lo.”

“Oh,,,hmeichhe duh lo chung chelh hi buaina a tling ve hrim hrim a” ngaihsam hmel fe hian a ti  leh a,Hriata hmela thinrimna lang chu ka en a.Ka hriat thin kha a la ngai reng anih chuan buaina a hnai hle ang.

“Mi buaina a inrawlh kher hi a thing,tu nge i nih?”

“Tu nge ka nih lam chu i hriat angai lo a..”ho ti hmel zet bawk hian a ti leh a.

“A bialpa ka nih hi..lo buai ve suh..”a va han zak lo ber, mahse, a ni lo tih hi Zorina bulah kher hi chuan sawifiah ka tum hauh lo.A hma pawh khan a hmu tawha, a la hrereng em ka hre lo thung.

“Wow,a va ropui ve..kei chu a Customer ka ni ve thung a...”

Ka khawng vek,rapthlak ti lutuk hian ka en a,thil rit lutukin min deng ta thut se a na hle ang, a nat lutuk avangin ka thi nghal zawk hial maithei..Chu nen chuan tuna ka awmdan hi a in ang hial ang.Ka mit ka chhinga, ka mumang ni se ka ti hluah hluah.