EVERGLOW-8

Chapter- 8

“Maw? Eng customer?” Hriata awki a hriatthiam lohna lang chu ka mang hriat riai ruai.

Engtin nge khatiang a sawi theih?Ka mumang a ni miah si lo,ka hmaah a dinga, ka melh reng nangin engmah ka hmu pawn ka hre lo.Ka mawl huih a, thi law law thei ila ka ti hluah hluah bawk.

“Nanuni hi Cakewalkerah Manager a ni tih i hria anih chuan eng Customer nge ka sawi i hria ang chu..” a awm atangin muangchangin ka melh chho a, a mit mu dum fiah zet chu ka en ta nge nge,pawisak nei lo hmel zet hian a mit a ti zim sun bawk.

“Oh...hre lo,chu kher chu ka hre miah lo” uar zet hian a ti leh nghek a.

“Wow,a va ropui ve, i bialnu ni a i sawi hian eng nge a thawh pawh i hre lo anih chuan nang aiin ka hnaih zawk fe tihna a nimai em?” a mit a siai zauh bawk.

“Ni lo, i hre miah lo,tu nge a nunah hian hmasa ber tih te..” a sawi zo hman lo,Zorina kut a phe vuai a, Hriata’n ka ban a chelhna a inphelh a,leiah a thal nghal der bawk,ka hamhaih lutuk a, engmah tih nachang ka hre lo.

“Tu nge hmasa hriattir tura au kual vel kha i tum leh anih chuan i lei ka pawt chhuak tawh ang,chuan tu nge hmasa ka ngaipawimawh lo,a hnuhnung ber ka ni dawna, midang reng reng an tel ve ka duh ngai lo ang tih i lo hre dawn nia..” khauh fur hian a ti nghut a, engmah sawina chang ka la hre chuang lo.Thil thleng engkim mai hian min thawng em em a ni tawp mai.

“Kal ang le..” ka banah a rawn chelh a,min kai a..Mawl hmel zet hian ka zui ve ringawt bawk.

“Nanun, hey..khawnge in kal dawn?” Zomuani’n a rawn tih ri ka hriat rualin tu nge min kai ka ngaihtuah chhuak a, ka harh kawk a ni mah zawk.Ka banreka Zorina chelhna ka thingthla a,Zomuani hian ani nen min hmu dun ngawt pawh hi a rapthlak lutuk.A hma atang tawh khan rinhlelhna mitin min en tawha, ka la him hram hram zawk.

Zomuani’n min rawn pan mek chu ka en a, ka dinpui hi tu nge anih a hriat ruala mak ti lutuka a hmel a thlak danglam tur ka ngaihtuah zawng ngawt pawn ka khur titih hial, chumai bakah tun lawka thil thleng te nen khan engmah fim takin ka la ngaihtuah thei lo.

“Hey..ka zawng che..oh,nang maw?” ka dinpui a hmuh rualin a sawi tum a tawp nghal hmak.

“Um, keimah, i tha em?”

“Um, tha e,i kal ve tih pawh ka lo hre lo a”

“Kei pawn in kal tih ka hre hleinem..mahse hei Nanuni hi ka hmu hlauh a..” a nui suk bawk.

“Nia,khawiah nge in lo inhmuh a?” zawhna mit meng hian min melh a, ka melh zawka,ka en rei ngam lo.

“Saw laiah sawn, chuan ,i thiannu hian buaina a tawk ania..”a tawng tawp lamah chuan thinrimna niawm tak a hriat theih bawk.

“Maw? Eng buaina?”

“Ni lo, haw ka duh tawh, kal pahin ka hrilh ang che” sawi zui ka duh lo tih hrethiam se ka ti takzet.

“Mahse, tu nge tibuai che ka tia lawm” ka duhna a hrethiam hlawl lo.

“Sorry, kal phawt ang, chuan,min rawn chhan avangin ka lawm lutuk ania” ka theihtawpa pangngai hian ka ti a,ka nui lui sang bawk.

“Ok, i ngaihtuahawm lo ang chu maw?” a kekawr ipte a zen a, a Jacket nghawng a ti tung chho a,a khabe hmul kual raih leh a dress thim lam te, a khabe hmul awm lohna chin fai vang leh a hmui nalh zet chu a inhmeh vel vek.

“Ka tha tawh e,ka lawm tak tak” ka ti leh a,a bu nghut a, a inhera, inchhung lam pan in a kal zui chu animai.

“Enteh...” ka banah Zomuani’n a rawn khwiha,Zorina lam ngawt ka lo la en pek.

“Um..eng nge?”

“Tu nge tibuai che?”

“Mi pakhat, ka hmelhriat hlui ania..”hul hak hian ka ti a.

“Ngatinge a tihbuai ngawt che a? mahse, Chhantu tur che a lo awm hnai hlauh a” a ti a, a ngawi zui leh daih lawi, ka rilru a nuam thei lo,engkimah hian min ringhlel niin ka hre zel tawh tlat.A hriat chhuah hunah engtin nge niang? Min ten hle anih loh chuan min haw hial ta ve ang.Ka lu ka thing nawka, ngaihtuah zui rih loh ka duh zawk, nakinah chuan a lo hre ta anih pawn a hriat a tul tihna a ni tawh mai.

Ka mu meng kar mai,Hriata vang erawh a ni lo tih ka chiang,Zorina thil sawi kha ka ngaihtuah let a,a sawi laia a hmel thutak run te khan a tak a ti ang takzet, Hriata tan pawh khan awih loh ngawt theih pawh a ni lo ang, kei ngei pawh hian ka awih lo chauh ve tho tlat.Tunah chuan tu nge ka nunah hmasaber tih a hre tawh ngei ang,mi a a ni lo a, Hriata sawi dan atang khan a rin hriat theih vek, ani erawh pahnihna a ni a, chu erawh engtikahmah a hriat ka ring lo,Hriata lo pawh midang ka mutpui lo ang tih engtin nge a hriattheih tehlul ang? A tawp ber nih a duh tak tak angem? Ka ring bau lo,hmeichhe tamtak a mutpui ang tih a chiang, a nupui hlui nen an la inzui a, Am-i a kawp bawk a, midang ka la hriat tel loh tamtak an awm ngei bawk ang,a hmeichhe kawp te zingah kei pawh ka tel ve ta, mahse, kei chu a danglam,a hmeichhe kawp dang te chu midang hriat pawi a ti lo a, hriat pawh an hre ngei bawk, kei chu hmeichhe inzuar satliah, a nuna lo tel ve palh mai ka ni tih hi ka pawm angai,min chhan avanga a tawngkam te khan eng beiseina mah min siam sak tur a ni lo.

“Ruata, kha kha helamah lo dah la, ka lo check lawk ang, nimin khan complaint kan dawng ania” Driverin Basket lian puia kan thil zawrh chhuah tur a rawn chawi lut mek chu ka bia a.

“I cabin lamah maw?”

“Aw, helamah keiman ka lo check ang” ka ti a, a rawn chawi lut a, chhuatah a nghata, pa thau tawi lam,nui sang reng mai a ni a, a thlan a tla hluam bawk.Dawrah an thil rawn ken an rawn Delivered ngei tih lanna turin seal ka chhu a, check erawh keiman ka check dawn avangin Phone in ka hrilh ang tih note ka ziak tel bawk a.Ka tih tur ni miah lo mahse he laiah hian a hmingin Manager ka ni a, engmah Complaint a awm leh ka duh tawh lo.

A mal malin ka la chhuak a, min pui turin pakhat ka ko bawk a, ka chhiar zel a, a vaiin an rawn dah nen a inmil thlap vek, nimin khan cash zawk a kim lo a, kan stock leh kan thil hralh,cash nen a inmil thei lo, kha tak kha ka zawn chhuah angai, ahma pawh khan Zomuani khan min hrilh tawh a, thil dangah buaina lian tham a awm vak ngai lo,Pawisa chungchang a ni deuh zel a ti a, ka thawh tirh atangin engmah buaina em em ka la tawk lo,a changa Staff te han ri leh deuh phat thin hi chu buainaah ka ngai lem lo,mahse, nimin khan cash chungchangah buaina kan tawk ta tlat, Camera hmaah nilengin ka thut angai ang.Chutah pawh ka la hmu chhuak ta lo anih chuan Counterah keimah ka thut te pawh a la tul ang.

Nilengin CCTV ka thut chilh a,mahse eng nge dik lo ka hmu zo chuang lo,nimin lam khan meeting naah khan min khak miah lo nangin an tawngkamah khan fimkhur turin min duh tih a chiang reng bawk.

“Miss, khar a hun dawna, engtin nge niang?” nula cher lam, engtik lai pawha ti dek reng mai chu ka en a, he dawr hawn anih khan kan lut rual deuh vek a, midang te hi chu an inkawm ngeih deuh vek tawh,ani hi chu a danglam, a ri zawk zawk lo a, lei rah chim hlau niawm tak hian a kal a,mahse, midang zawng zawng aiin a duty a tlin ber lawi.

“Ok, kan khar dawn nia, mahse, Counter lam a cash kha..”  ka thle zauh a, a hrethiam tih hriat nan a bu zauh bawk.

A kalsawn rualin dawhkana ka thil chheh hnawk ka hai a, vawiina an hralh chhuah leh kan stock a inmil em tih en tumin Computer lam ka melh lehnghal a, an thil hralh apiang hi chhin chhiah nghal zel theih anih loh avangin ban dawnah closing angreng kan nei mai thin a, a awlsam a, hun a heh lo em em bawk.Mahse, awlsam ringawt hi a tha lo dawn a ang khawp mai, niminah ka tisual ta tlat.

“I va buai awm ve” tawng ri ka hriat rualin ka dak chhuak vat a, Zorina nau Malsawma a lo ni a.

“Tlemin, ban dawn closing lai hi buai lai a ni tih i hria lawm..” ka nui lui sak bawk, a rawn lut a, Zorina ang thoin a sang tha hle a,an hmel a in ang em em lo nangin unau tih takah an in ang tho mai.

“Lo thu la..” ka ti leh a, ka thutna ken ka tum zeta, mahse, ka thil tih a lak lawh lutuk,ka bula chair awm ka kawhhmuh ta zawk,a rawn kal hnai a, a thu a, Cabin chhung a en kual a, Zorina ang em chuan a hmel a nelawm lo hran hauh bawk.

“I cabin chu a hrehawm lutuk  loh hi tiraw?” a ti a, a nui suk bawk,a nui hmel chuan Zorina min hriatchhuah tir lehnghal..hahthlak hian a..

“Nia, a zia awm,enge i rawn tih dawn teh mial a?” ka ti a, Kimi thil rawn dah luh chu ka en fel pah mawlh mawlh bawk.

“Ka lo kal kawi zuai, bakah hmuh duh na che ka nei hrim hrim a” a ti a, ka chhungrilah engemaw a lo lang zawk a, eng nge anih chiah ka hre lo nangin hlauhthawnna lam a ni in ka hria.

“Um,anih chu, intur i duh em?” ka chhungrila zamna ti lang lo thei ang ber hian ka ti a.

“Duh maithei, mahse, a tlai tawh em mai..”a ti leh lawi a.

“La tlai chuang lo ve, nimin chungchang kha a ni em i lo kal chhan?” ka ti ta nge nge, ka vei run a, ka awm a ti nuam lo a, zawh mai loh chuan a sawi hun tur ka nghak zo lo.

“Ni tho a, ni chiah lo bawk..” a tawng danah chuan Zorina niawm zawk tak a ni.A va hahthlak em , engkimah Zorina hlir mai.

“Lawk, kan zo law law ang, min lo nghah hman chuan?” ka ti a.

“Nghak hman tehreng mai,haw kawngah pawh kan sawi thei tho ania” a ti leh a, mak ti deuh hian ka en a ,min en lo in a phone lam a lo en daih thung.A ruala min haw tir a tum anih teh chuan aw..

“Ok..” ka ti ta tho.A ruala haw angaih loh nan ka tawngtai ru mawlh mawlh bawk.

Minute 20 vel zet ka thawk leh a, engmah sawi loin a lo thu ngar ngar thung, a neitu te chhungkaw zinga mi a lo kal miau a, tuman dawr khar lam an rawn sawi ngam lo,kan closing tawh avang erawh chuan tuna an hralhna hi chu naktuk atan a ni tawh mai ang chu.

“Ka in nghah tir rei hle mai che, mahse, zawh hman a ngai miau sia” nui chung hian ka ti a, ka zi mar ar ar bawk.

“Ka hrethiam alawm,i theih chuan vawiin tlai bik kha Dawr lamah ni lo in keima mimal min rawn send mai dawn mi niang?” a ti a, a rawn tawlh hnai a.

“Oh, tehreng mai, i mail min lo hrilh theih chuan?” a thle buka, a sawi angin ka chhu lut a, ka save a, engtik niah emaw chuan ka la mamawh leh maithei a, a thara va dil leh kher kha a chet fel loh thlak hmel riau,mahse, eng chen nge thawh ka la tum chiah? Zorina hnaih takah hian ka him meuh em?

“Ka zo e..” ka ti a,pawn lam ka va hawi a, a lo thim tawh,sana ka en a dar 7  a lo hnai thuak tawh, nidangah chuan 6:30 aia tlaiah kan bang ngai lo.

“Ka hmu e, kan kal dawn mi niang?” ka hresual emaw tiin ka melh ha mai.

“Kan haw na lam a in an ka va ring lo” ka bag lak pahin ka ti a, Kimi ka vai zauh a, a rawn kal hnai a, inkhar fel turin ka ti a, lawm hmel zet hian a nui a, ka dem hauh lo,Kulikawna la haw tur tan chuan a tlai lam hret tawh.

“Biak che ka duh tlat a, pawi itih loh chuan kan haw rual mai ang chu” a ti leh a.Pawi ti pawh ni ila enge ka sawi chuan ang le? Ka boss te zinga pakhat a ni miau a.

“Pawi ti lo e, Taxi lak kual angai lo tihna nimai a” ka ti a, ka nui lui sak bawk.

“Ok, chuti anih chuan a zia hlauh,kal ila” a ti a, a dinga, Zorina ai chuan a tawi hret maithei,tlemin a ngo deuh zawk bawk.

Dawr sira Parkingah a motor a lo dah a, ka thawh puite ka mangtha a, kan inzui chhuak mak an ti anih pawhin tuman engmah an sawi lo.A motor pana a kal chu a hnungah ka zui hnak hnak a,eng nge min biak a duhna tur ngaihtuahin ka awm a nuam thei miah lo.

“Lut la..” kawngkhar min hawn sak a, luh mai loh chu tihtur a awm lo.A rawn thu lut ve a, engmah sawi loin Motor a start a, kan tlan chhuah thlengin engmah a sawi lo,Nidang ang bawkin Motor tawt hun lai a ni bawk a, kan tlan sawt lo ngang mai.

“Ka biak duhna chhan che chu ka Unaupa vang ania, i lo hre tawh sa tho maithei a” ka en vat a,motor din lai tak a ni bawk a, min lo en kar mai, rang fe hian ka hawi let a.

“Aih, engmah han rin lawk tur engmah ka hre miah lo.”

“Ah, anih chu, i hre lawk emaw hre lawk lo emaw a pawi chuang lo ve ve,sawi tur ka ni em tih ka ngaihtuah a,Zorina hi ka u a nimai lo a, ka phirpui a ni a..” ka ang pham mai, ka vawikhat hriatna.

“Aw, a lo nih chu,mahse in in ang vak lo..” ka ti a, ka tang teuh reng tihreh tumin ka  thaw hak bawk.

“Nia, kan in ang teh vak lo,ka sawi tum tak zawk chu Noel-i khan a hmu dun che u a, bakah kha video tawp tak mai kha siam miah lo tur inni a...” ka khawng lah mai.Eng video nge a sawi ka hre miah lo.

“Eng video nge i sawi? Ka hrethiam miah lo..”

“Ka bulah chuan i nih ang ang khan awm tawp mai rawh, hei tak hi ania ka unaupa nen kan danglamna, tumah hi ka tilui ve ngai lem lo a, tunah pawh hian inthiarfihlim tura tih che ka tum miah lo ania” a ti leh zel, ka bo tulh tulh thung.

“Khawngaihin i sawifiah deuh thei angem? Eng video chungchang mah ka hre lo”

“A vaia sawi chhuah kher a ngai lo ania,chuan, ka u hi hetianga nawr luih chi a ni lem lo a, tunah hian he thil hi kei leh Noel-i chauhin kan la hria a,engtikah emaw chuan a la darh huk mai thei, chu erawh a thlen loh nan ka theih tawp ka chhuah bawk a” a ti leh duah.

“Enteh, engmah ka hrethiam lo a, anih ang angin sawi mai ta che,eng kawngahmah inthiarfihlim ka ngaih pawh ka hre lo a..”tlemin ka inringtawk ta deuh.

“Um, chuti anih chuan a lawmawm anih chu, nizan khan i mail atangin Noel-i video i thawn a, Ka u nen in khawsa dun lai kha, engvangin nge Noel-i kher i thawn ka hre lo nangin ka ring thiam deuh tho lawi a”

“Ni lo, chutiang engmah ka ti lo..” mangang zet hian ka ban ka vai a.

“Vawiin khan hna chungchanga i thil save sa ka inthawn tir nachhan che chu engemaw fiahna ka duh vang mai anih kha, ka fiah vek tawhah ka ngai bawk a..chubakah ka U hian a nupui hi engvanga then nge tih leh an inzawmna hi kan chhungkua hian kan hrechiang a, tuna i awmna Branch pawh hi Noel-i ta a ni a, a ta ka tih awmzia chu kan chhungkaw zinga mi anih angin a hminga awm ni chiah lo mahse a share neihna ka tihna anih chu..” ka hrawk a ro vek, harsa zet in ka chil ka lem thei hram.

“Video chu ka lo en thei angem?”

“Huh, i awmdan hian ka rilru a ti danglam lo ania,ka duh ber zawk chu video kha copy dang i siam leh loh nan i dahna ka hre duh,Noel-i i thawn mai bakah original khawiah nge i save?”

“Engmah ka save lo, eng video mah ka thawn hek lo,i unaupa nen chuan lo inzawm ta tehreng pawh ni ila engvangin nge a nupui hlui ka hriattir kher ang?” awmze nei lo lutuk hian ka nui hawk bawk.

“Chu zawhna chu ka chhan tur ni loin i chhan tur anih ka ring,videoah khan i hmel a lang tam vak lo nangin i awmdan khan min hip ve tho,kei pawn ka u ang khan tih ve ka hreh miah lo,Video dang siama min Blackmail zui dawn loh phawt chuan..” ngeiawm zet hian a nui hak bawk.

“Ding rawh, ka lo chhuk ang.Chuan, hna ka bansan bawk e” ka aw a dam thlapa, khurh pawh a khur eih lo.

“Ni lo e, Noel-i leh ka u in min lo nghak reng tawh’ a ti a, kawng peng thuam lo awm hmasa berah chuan a herh kual pawpa,kan kalna tur lam ka hria, Zorina In kan pan mek.Eng buainaah nge ka intah luh tak??

Gate lo inhawng saah chuan kan tlan lut a, ka kal hmasak ang tho khan a la pangngai, danglam ta chu a cheina light leh Wreath te kha an awm lo tih mai zawk,ka khup a sai dar dar mai.

“Kal ang le,i bulah ka awm ve dawna, min mamawh phawt chuan i lamah ka tang reng ania.Chuan, ka u ka dem lo ka tih kha hrethiam ang che” a nui a, ka ten hluah hluah.

Muangchangin inchhung lam ka pana, ka intehkhin dan ber chuan khaihlum tura dawhsan pan ka ang ber,eng nge thleng dawn ka hre lo,mahse, thil lawmawm lam erawh a ni dawn hauh lo.

“Hey..in va lo thleng har ve..” Noel-i hmel hlim sarh mai chu ka en a, ka nuih let ve thei lo.

“Motor tawt lutuk vang bawk, khawnge ka u chu?” a ti nghal a, Chair lian leh dup zetah chuan duh dah fe hian a thu thla zui nghal a,meichhemna thuk lam ka hawia, thlasik a zo tawh bawka, an khar vek a,a chung kualah pawh cheimawina chi dang an lo tar chhuak vek tawh.Ka mitthlaah thil a lo lang zut zut a, engmah ka theihnghilh lo.

“Nanun...nang maw?” Zorina aw hian ka hnunglam atangin a rawn ti a, ka phu zawk mai,ka inher nghal vat bawk.

Kekawr bul dum a ha a, a chawn sei thlurh chu hmulin a khuh dap a, T-shirt sen duk a ha a, slipper a bun bawk.Kal chhuah a tum lo anih loh pawhin a haw na a la rei lo a ni ngei ang.

“Aw, ka rawn hruai anih kha..” Malsawma’n a lo ti thuai a,min rawn pan a,a hmelah mak a ti anih pawhin engmah a ti lang lo.

“Ok, a tha lawm, mahse, eng nge pawimawh awm a?”

“Nanun, thu phawt teh,chuan, ka sawi dawn nia..Intur ka lo la ang..” ka bul hnai bera chair awmah chuan ka thu thla a, nghet zetin ka bag hrui ka chelh tlat bawk.Noel-i kal sawn chu ka en a, an lo sawi dik vek mai, he inah hian a neitu a ni a, an inthen tawh ti mahse kei chuan Nupui nen danglamna ka hre lo.

Glass no tung nalh zet zet hian intur a rawn chawi phei a,min rawn pe a, eng nge anih ka hre lo, ka ban ve mai bawk, eng pawh lo nise min ti chaktu atan ka mamawh ka ring ve tawp.

“Eng lo ania,nizan khan Nanuni hnen atang hian video ka dawnga,a hmuhnawm dan a hmuhnawm vak loh,in en ve duh kher em?” min rawn en a, ka lu ka thing ringawt, Zorina lam a hawi leh a, Zorina hmel buai deuh nak mai chu ka hmu a, amah ang lo takin mak ti hmel zet hian min rawn en bawk.

“Eng video nge?”

“En ila a chiang zawk ang a” Malsawma zawkin a rawn ti a, a tho a, Tv lam a pana, ka bag hrui ka hum nghet sauh bawk.

“Khawngaihin,eng nge anih chu ka hre lo,mahse, en loh ka thlang zawk”

“Ni lo e, i la ngam anih chuan i en ang chu..” a nui hak mai.

“Ti la, veh kual vel lo khan..” Zorina aw ah chuan dawhtheihna a tlem tawh hmel viau.

“Tehreng mai..”

Ka thaw tha ngam lo zawk,ka hma zawnah tak Tv a awm a, hnuailam ka bih a,rei lo teah a lang ta tih hriat zet hian Sound a rawn ri a, zahna avangin ka hmai a sa hut hut a, ka hawi chhuak ngam lo.

“Engthil nge?” Zorina’n a ti tuara,kei erawh ka mittui nen ka hawi chhuak a,engmah sawi tur ka hre lo.

“Off nghal rawh..” a au ring ta lo, mahse, a aw hlauhawm zia chu pui tak a ni.

“Hei hi tu tih nge?” ka bulah a rawn kal hnaih lai ka hre miah lo.Muangchangin ka en chho a, ka mittui vangin ka khawhmuh a phe vek.

“Ka hre bik lo, mahse, ka...ka tih a ni lo...”

“Ook, i tih a ni dawn lo tih ka hria,Malsawm, i phone kha min pe rawh..”

“Aih, engtin nge a tih a ni lo tih i sawi ngawt theih a?”

“He hmeichhia hi tu nge anih ka hrechiang alawm,buaina dang i duh belh loh chuan min pe rawh” a ti leh hmuk a, Malsawma’n a Phone a rawn pe hnai chu ka hmu phe ruai a, Noel-i lam ka hawi a, na tuar hmel a lang thei,ka la hmuh ngai hauh loin huatna nen min en bawk.

“Khawi atangin nge Noel-i chuan a dawn tih lam ka ngaihven lo,chu aia pawimawh chu hriat duh keipawn ka nei,ka la hre thuai bawk ang.Tunah pawi intih loh chuan in pahnih khan min kal san tawh rawh u.” Hnial chi hauh loh hian a ti leh a.Sawi ve tur ka hre miah lo.

“Mahse, Dear,engtin nge kei hi...”Noel-i tah aw tiau mai chuan min fan raih raih mai.Ka mit ka chhing ta ngawt.

“Nakinah ka rawn bia ang che, tunah chuan Malsawma rual hian kal phawt rawh..”ati leh nghuta,ka thutna chir banah a rawn thu thla,ka darah a rawn vuana, ka samah a rawn fawp zui vang vang bawk, engmah sawi lo mahse a awmdan engkim mai chuan min thlamuan hliah hliah.

Ka lo rindan kha chuan hetiang hian ni loin Zorina kut ka tuar hial ka lo ring kha ania, mahse, a ni ta hauh lo,ka lamah a tanga, a unaupa leh a nupui hlui awm lai ngeiin min hnem nan min fawpa, min kuah ta zawk.

Pawn lama Motor thawm ri hla tial tial chu ka ngaithla a,Zorina lungphu ri dat dat nen..ka hawi chhuak ngam hek lo.

“A tawk e, Drama a tawp ta,tunah chuan kan pahnih chauh kan ni tawh ania..” min kuahna a la sawna, a kalsawn zui nghal bawk.

Ka hawi chhuaka, a chevel chu ka en a, Kitchen lam a pana, a thil sawi kha hriatthiam tumin ka lo in ngaihtuah ve thung.Rei vak loah a rawn let leh a, Beer can a rawn keng a, pakhat min rawn pek a tum chu ka lu ka lo thing a.Min pek luih a tum hlei lo a.

“Le...video copy dang chu le?” min ep zawnga thut thlak pahin a ti a,a hma ai khan a aw a nem lo lehzual.Mak ti leh hrethiam lo lutuk hian ka en a.

“Eng video nge i sawi a?” ka aw a tham chal mai.

“Ouch,tuna mi kha..Malsawma leh Noel-i kha chuan engtikahmah an sawi chhuak ngam tawh lo ang, mahse, nang tereuh hi..Ramsa hlauhawm tak ang mai i ni miau a..” thil tenawm lutuk chanchin sawi ang hrim hian a ner nawk bawk.

“Engmah ka hrethiam lo,kha thil kha ka tih a ni lo tak tak,I nau kha Dawrah a lo kala, min biak duh thu sawiin min rawn nghak a, a rualin ka lo haw a,Motorah a sawi a ka hre ve chauh..”

“Yeap, midang chu i bum thei, mahse, kei chu ni loin..i nghawng nalh zetah khan ka rek hreh dawn hauh lo che ania...” a nui suk a, mahse, a nuih zat vang a ni lo tih a mitmeng thim leh hlauhawm lutukah chuan a chiang ngang mai.

“I duh duh tirawh, mahse, kha thil kha ka hre lo tak tak..” mak takin ka aw a pangngai a, ka inringtawk hmel hle bawk, a mithmul a ti sang awk a,ka awmdan danglam ta chu a hria tih ka hre thei mai bawk.

“Ok, a pawi hleinem,i sawi duh lo anih chuan sawi lo mai rawh, pawisa engzat nge i mamawh?” min deng dawt mai.

“Pawisa ka mamawh tih ka sawi lai ka lo hre lo a”

“Nia, i sawi lo,mahse,i thil neih hmangin min nawra, a lo hrehawm em em bawk si lo nen..ka dem lo che,zep lo khan i duh zat sawi la...” ka haw hluah hluah..

“Ka duh min zawt anih rau rau chuan ka duh ka hrilh ang che, engtikniah emaw chuan ka la that ang che..” a mitah tak ka en a, ka chhungrilah hlauhna engmah a awm miah lo bawk.