EVERGLOW- 9

Chapter- 9

A mithmul a ti sang awk a, ka thusawi chuan a deng na hran lo anih hmel viau.

“A harsat deuh ka ring, video copy chu le?” a ti leh hluk a.Min en run bawk.

“Ka nei lova,kha video tawp lutuk kha ka siam hek lo,min that dawn hial mahla pek tur che ka nei chuang lo ang”

“Ahh,that dawn nang,ka thah daih chein ka chan ropui lutuk ang,dik tak chuan i hmanrua i hman thiamna ang hi tu hmeichhia mahin ka taksaah an la thlen thei lo..chu ngawt pawh chu chan ka tum bau lo ania” a then suk bawk.

“Ramhuaipa, ka haw lutuk che..” thinrim luat avangin ka tawng ring thei lo hial zawk.

“Ahh,min haw duh suh, ka umzui che a dal dawn lo, min huat viau ai chuan kan inpek theih in pek tawn mai kha a tha zawk daih” ka tawng engahmah ngai lo tih hriat zet hian a la ti duh lek.

“Engpawh nise i thil neih chu le? Nakinah min vau nana i hman ka duh dawn hauh lo ania’’

“Chutiang engmah ka nei lo ka tih chu, hmeichhe fel tak ka ni lo,mahse, khatianga mahni leh mahni nuam chen lai in en let leh tura Video bawlhhlawh siam tur khawp kha chuan ka zah theih lohna hian a tlin lo..”

“Oh...pawisa hlawha inzuar khawp te chuan engpawh i ti thei ang chu” tawngkain ka chhang thei lo, ka no kena ka thil inbang la awm zawng chuan ka theh thawt a, a hmai a huh hlapa, a khabeah a luang thla a,a T-shirtah a far thla leh a, a huh val nghal kalh hlawm mai.

“Hmeichhe nasa lutuk, ka hmuh tirh atang che khan hei hi chu a la thleng ang tih lo rin thiam awm tak,mahse, i lawmman i hmu dawn khawp” a ti nghut a, a tho a, min rawn pan hnaia,tlemin ka rilru a lo fim leh hman tawh,hlauhna avangin ka thu tawm chaiha,engmah tih pawh ka tum lo.Enge lo thleng tur ka nghak mawl tawp.

Ka hmaah a rawn dinga, ka huaisenna zawng zawng sawmkhawmin a mitah tak ka melh lui ngar bawk,hlau pawh ni ila tih lan kher ka duh lo, ka hlau tih ka lantir avang khan min ngaihsan phah dawn lo a, min zuam sauh zawk ang tih a chiang reng.

“I thil tih hi i hmu em?” a rawn kun hniama, a hmai huh deuh chu a tuai pawk bawk.

“Aw”

“Hmeichhia hi mipa chunga mi kan ni tih i la hre lo tiraw?”

“Hre miah lo, engtik laimahin ka chunga leng angin ka en ngai lo che u”

“A tha hle mai,tha tak a ni...”a ding mara, a nui zui nghek bawk.

A t-shirt a phelh a,min khawih dawn emaw ti khan ka lo hlauthawnga, mahse, a chet dan mak lutuk zawk chuan min barakhaih a, chet na chang ka hre lo.

“Enge i tih a?”

“I hmuh ang hian ka thawmhnaw a wine kai hi suk fai vat a ngaia, i tihfai theih nan ka hlip anih hi..” ka chil ka lem khawlh ringawt.Ka beisei loh dan lutuk hi a ni tawp mai.

“Ni lo,kha chu ka tihtur a ni miah lo,i duh phawt chuan awmpui tamtak i ruai thei a, awmpui te suk sak i duh lo anih pawhin i hmeichhe kawp te pawh, aaa,,,anni ai chuan i nupui deuh roh Noel-i khan a su fai thei ang..”

Min rawn phih tho lawpa, na zet hian ka darah a rawn vuana, min thing nawk nawk bawk,khawi lai ber khan nge ti thinrim ka hre lo,mahse, ka tum a hlawhtling ta tho, kei chauh hi chhaih thinrim theih ka ni lo a, ani pawh hi tawngkam ngeiawm tak tak te hian a ti thinrim thei tih hriattir ka tum ber a ni a, ka ti ta chiah bawk.

“Noel-i chungchang khatianga i sawi leh anih chuan ka that tak tak ang che..” ka  tukhum samah a thama, min pawt daka, a hmel, thinrimna avanga dur khup mai chu ka en a, min that duh tak tak hmel a pu bawk.

“Ti ta che, ka la sawi nawn leh fo dawn tlat a” engvanga cho ngawt nge ka nih ka hre bik lo, mahse,rahbeh nih te hi ka duh lo,ka naupanlai chhung zawng khan mi tumah ka awt ngai lo a, mi pangngai chunglam ni lo mahila chhungkaw pangngai a mi ka ni ve bawk a,thil ka tih na kawng tamtakah hian ka pa awm tawh lo mahse ka pu vang te leh ka pa thiantha te vang pawn ka la awlsam phah ta zel,Ka nu vanga kan tlakchhiat na hi a nasa em mai zawk,mahse, ka chhungril chapona te hi a lo la thi bik lo a, na tak taka tawngkhum leh hmusitna te kha ka lo tuar tam tawh, ka peih tawh lo pawh a ni mahna.

Min thing leh nawka, ka inrin hmain min thlah thuta, ka thu thla hnawk bawk,engmah sawi loin a kalsawna, a thutna ngaiah a va thu leh a, a che vel chu ngawi rengin ka lo thlir ringawt thung.

“I haw thei tawh ang,kan inzawmna a tawp tawh bawk e” beer a in pawp pawp a,min rawn melh leh a,ka tawng chhuak mai dawna, ka thei der lo zui.

Ka taksa awmdan dik lo tih reh tumin thawk ka la vaka, muangchangin ka ding chhuak a, tluk mai ka hlau ru takzet, dik tak chuan kan inzawmna a tawp leh tawp loh lam khan min thawng hran lo, kan lo inzawm chiah em ka hre lo zawk,kha tiang inzawmna lem lem, tisa in it tawnna leh nawmchenna mai kha chu kan awmdun loh rual khan a tawp zel zawk.

“Mangtha le..” ka ti sap a, min chhang lo, ka beisei hek lo.

Gate ka chhuah fel rual deuhthawin a inkhar leh hmaka,Taxi changin ka ding ren rawna, a vang phian zui,a hma lawka thil thleng te kha tunah chuan engmah ngaihtuah loh hram hram ka duh rih a, In ka thlen hunah rilru fimin ka la ngaihtuah leh zawk ang, khatiang em em hmuhsitna kha dawng tur ka ni chiah em tih te pawh ka la ngaihtuah ang chu..Chhanna pakhat erawh ka nei sa,ka thiam loh hmasak a ni tih te mai hi.

Motor pakhat hi a rawn dinga, tlan luh tum anih ka rin avangin ka tawlh sawna, kawng lam ka hawi leh mai.Dar 8 a ri tep tawha, Mama pawn min ngaihtuah hle maithei,Joe-a call tumin ka phone ka dap a, ka hmu mai lo,ka bag ka hai leh a...Motor kawngkhar inkhar ri dawt ka hria a, ka hawi chhuak chuang lo.

“Hello...” ka hawi chhuak chuang lo, tu emaw Car a mi khan inchhung luh a duh avangin Zorina a call nimaiah ka ngai..

“Miss...Nanun..” rang fe hian ka hming lam ri ka hriat takah chuan ka hawi chhuaka, Moses-a a lo ni a, mi ka hrethei lutuk vak lo nangin ani hi chu hriat hran a harsa lo anih ka ring, nizan Falkland parkah  pawh khan ka hre thei nghal mai.

“Oh, nang maw?” ka bag ka hai leh a..

“Um,keimah..eng nge i tih zawk?” In lam a melh zauh a.

“Hna thilah ka kal lawk..Taxi ka chang mek anih hi..” ka nui lui sak a, ka phone ka dap fuh takah chuan ka thaw huai mai.

“Um, anih chu..ka lo drop dawn che mi?”

“Aih,ka lawm..a van viau leh ka nau ka call mai ang..eng nge i tih dawn zawk?” ka ti ve a.

“Hei, he lai pathlawi hian inkhel en turin in betah min cho peka, chu lam zawk chu..” a ha var that langin a nui a, a ngainatawm ngawtin ka ring.

“Anih chu, a nuam viau ang, chak ngei turin ka duhsak che..”

“Yeap, nangin min tan phawt chuan ka chak ngei ang, mahse In boss thinchhe zet bulah chuan ka lamah i tang tih ka sawi hauh lo ang” a mit a siai zauha, ka nui hak mai..Tun tum chu tihluihna a nui ka ni ta lo.

Drop i ngai lo tak tak maw? Ka hreh lo teh ania” a ti leh a, ka lu ka thing vat thung.

“Ok, anih chuan ka luhsan dawn che nia, chu pa pawh chu enge a hriat hrep ni? Call pick bawk si lo” a ti zui nuah nuaha, Gate hawnsak tu tur a mamawh tih ka hrethiam mai bawk.

“I tlan lut thei na nge?” ka ti khawmawi a.

“Nih hi mawle, Nula a tawm pui em?” nui chung bawk hian a ti leh a,

“Ka hmuh lai chuan tawm pui miah lo..”

“Ha...i tan nghal sa tih ka hria lawm,yes,a rawn hawng ta hram e” min bia pawh ni lo hian a ti zui nghal a,min rawn en a, a ban a vai zauh a, Motor chhungah a lut zui a.Gate rawn inhawng tual tual chu ka en a, amah kher gate hawng tura lo chhuah angai emaw ka lo ti kha mawl ka inti leh hnuhnawh viau.A chang hi chuan thil engmah hre lo niawm tak hian ka mawl leh tlat thin.Mi aia chungnung em em ni lo mahila rual pawl tawk chuan ka hmuin ka hre ve thin kha ania, thil danglam nasa lutuk hian kei pawh hi min thlak danglam tel zel chu anih hi maw..

Vanneihthlak lutukin a tlan luh fel rual deuhthawin  Taxi a lo kal ta hlauh,lawm zet hian ka chuang lut nghal a,pawnah ka la awm tih Zorina a hrilh tur ka duh bau lo.In ka thlen hma deuhin Mama’n min rawn call a, hna lamah meeting kan nei tih leh ka thlen tep thu ka hrilh a, engmah ti thei em em lo mahila ka nau te hian min thlamuanpui ve a,ka haw tlai deuh chuan min rawn ngaihven vat zel bawk.

Inah Joe-a a lo awm ve a, Mama nen music lam sawiin an lo ti ti lawng lawnga, ani hi chu Aizawlah a awm anih phawt chuan kan Inah hian an in ai pawn a awm tam mah zawk, chaw a ei nghal tum lah a tam na niang.

“In ei tawh em?” zawh bik pawh nei lo hian ka ti a.

“Aih, kan lo nghak che” Mama’n a ti a.Dik tak chuan ka ril a tam miah lo, ka thil tawn teh nuaih khan eng ei mah min ti chak lo.

“Ei ila...ka ril a tam tawh lawm” a langah chuan ka ti ta zawk.

Ka rin ai tak chuan ka ei hnem ta phian,ka ril a lo tam ngang tih ka hrechhuak leh lawi,nileng khan hnaah ka buai a, kan haw hnu boruak lah kha a...ka thil ei ka lem sual a, ka awm ka dawm a, ka khuh nghal bawrh bawrh mai.

“Enge a? nichin deuh tang khan ngaihtuah nei niawm takin i awm renga?” Mama chhuah hnuah Joe-an a ti a.

“Ngaihtuah nei lo an awm ngai mi?” thlengsil mawlh mawlh pahin ka ti ve thung, a nui hak hak mai.

“Nghal viau lo teh a, i rilru kam tu a awm leh tawh tih ka hria nia, tunah chuan engmah han buaina em em tur a awm lo a, thla tharah Mama pawn hna a thawk dawn tawha,nang lah hna tha tak i nei bawk a” a ti leh zat zata, ka hna hi ka la thawk zui dawn em ka hre tawh lo a, hna tha tak a ni em pawh ka hre ngam tawh hek lo.

“I sawi dik alawm” ka ti a, ka hrilh ang nge hrilh lo ang tih ka ngaihtuaha, ka rilru ka la siam fel thei lo.

“Nia, ka sawi dik,mahse....dik lo a awm alawm, ka hrethei tlat” a ti leh talh.

“I hriat chuan min zawh kher angai ami?”

“Oooo, eng ber nge ka hre si hleinem,tak tak...sawi la..ka pui thei maithei che sin”

“Aih, engmah chutiang a awm lo,hna lamah tlem problem ka nei mai mai,bakah hna hi a dang ka duh deuha, ka thawh thiam chi a ni chiah lo” ka ti ta nge nge,anihna tak kha chu hrilh lo ila a fuh ka ring zawk,ka ring em em a, pawisa hlawha keimah inhralh tur  pawh khan ani hian thurawn min pe ngam tur khawpin min hrechiang,mahse, tun tum ka buaina hi chu zep ka duh tlat.

“Amah vang kha ni em?” ka thil tih lai ka chawl dat a, a lo hrereng anih chu.

“Tu?”

“Zorina kha...engmah buaina siamsak loh che min tiam ngei sia..” ka thil tih lai ka dah ta nge nge.He thilah hian amah ngeiin ka Bio-data zawng zawng min submit sakin min lo dilsaka, a thiante thian leh chhawng anni tih a sawi tawh, mahse, hei hi chu ka beisei phak loh thil a ni ta,Ka apron hak laiah ka kut ka hru fai a,ka inhera, tawngkam na lutuk hmang lo turin ka inthunun hram hram bawk.

“Eng maw a sawi?” min melh zawka, Dawhkana kan thil dah lam a en a, a khal nauh nauh bawk.

“Joe..” nelawmna tel miah lo hian ka ti leh a.

“Ih, nia...ka tihpalh,he thilah kher hi chuan ka ti fuh lo lam nge ka hre lo a, mahse, thil zep ka nei ngei e” a ti ta nge nge.Min la en chuang lo, min en ngam lo pawh a ni mahna.

“Ka bio-data i submit dawn khan tu nge a neitu te tih i chiang a, chuan, ka thawh ngei theih nan ka dinhmun khirh zia i lo sawi bawk a,chuan...mahse, enteh...Zorinsanga hi tu nge anih i hria a, hetiang hi ti tur i ni lo asin...” a tawp lamah chuan ka au a ni ber tawh zawk.

“Min ngaidam rawh, khatih lai khan i hmel ka en ringawt pawh khan ka lo manganpui thin che a, hnathawk tur an la dawn tih ka hriat rual khan ka va hmu a...” a tawp leh rih,ka thaw a chham mai dawnin ka hria,engvang tehlul in nge min lo hmuhsit loh ang? A bulah kut ka dawh a ni ringawt alawm,engmah danglamna a awm miah lo.

“Nangmah i ni tih a lo hresa a, chuan,engmah interview pawh i hmachhawn ta lo renga, mahse,in pahnih inzawmna lam engmah khan hna a kaihhnawih lo a,sawi chhuah nawn a ni tawh lo ang a ti a, chu mai bakah i tana hrehawmna engmah a thlen lo ang a ti bawk a..”

“Chu pawh nise...enteh, tunah ka bansan ringawt thei tawh si lo,engkim hi a buai nuaih asin, nakin lawkah chuan mi zawng zawngin an la hria ang,bakah Zomuani khan min ringhlel tawh sa bawka”

“Engtin nge a rinhlelh theih che a? ka lo hriat dan chuan Zorina hi an dawrah hian a involve ve vak lo a, share chiah a nei an ti sia.Nangmah hmu turin a lo kal thin tihna mi?”

“Aih,kal miah lo..Share a nei anih chuan involve tluk chu a ni tho alawm,bakah..” ka ban ka phar hliai a, beidawng zet hian ka dah thla leh a,sawi chhuah kher eng nge a tulna?

“Buaina a thlen che chuan keiman ka va hmu leh mai ang..”

“LALPA, ti lo hram teh, engthilmah min hrilh lawk loin lo ti tawh lo hram rawh..”

“Eh..chuti chu ka lo tihsak ve che avang khan kei chu misual ka ni ta tihna mi?” a awah a lungawi lo tih a lang thei.

“Ni lo, chutiang zawngin ka sawi lo...ka tana tha ber i ngaihtuah thin tih ka hria lawm..” a hmel thutak ran maiah chuan ka thusawi chuan a hmin lem lo tih a lang thei.

“Nia, ka hria,engmah ka lo ti tawh lo ang, ka va haw phawt teh ang” a tho nghal a,ka kohna pawh hre ngaipawimawh lo hian a ban avai zauha, a kal chhuak zui nghal nal nal,hei tak hi mipa tak tak nen an danglamna a ni a,Mipa tak tak erawh a ni reng, Mipa rilru a put chiah lohna ti ila a dik zawk,a thinrimna hi mipa anga ti lang mai loin tih tauh lamah a kal ta thina,kei lah hian chu chu hrereng mahila ka lo ti leh thina,vawi tamtak kan inhaua, kan inti thinrim tawh.Mahse, a lungawi leh hma em em bawk.

Muhil thei loin ka let ka leta, ka taksa a kham thum tawh,Joe-a lakah ka thinrim em em rualin a tih chhan ka ngaihtuah chuan a thiamawm na lai a awm ka ti tho bawk si,min ngaihtuah em em a,a thian nu leh a unaunu ang maiin min en a, ka manganna lak atanga min chhanchhuah theih nan khan engpawh huamin a lo ti ve tihna a ni a, Zorina hmaa kut va dawh vel kha nuam a ti bik lo tawp ang, mahse,...ani chu Zorinate hnuaiah a thawk ve lo va, Zorina nen an mu dun ve hek lo..Keimah bawk a tuartu ka ni leh a,zahna..thinrimna,nep intihna...

A vaiin min delh beta, chapo thei ka ni lo lutuk leh Bansan ngawt thei lo khawpa dinhmun hniam ka ni  hian min ti na lehzual a,a hma aia let tamtakin Ka nu ka huat zual phah bawk.Amah vanga tiang dinhmun thleng hi kan ni miau a,ka pa awmloh hnu pawh khan min enkawlin min buaipui hram hram se chuan ka pa damlai ang em kha pha lo mahila hetiang kan ni dawn si lo,kan unauin kan phurh zawh tawk aia tam kan phur vek a, upa ber ka nih angin ka mawhphurhna a tam bik lo thei lo a,a hurherh lutukna kha dah thain kan puitlin vek hun te lo nghak hram hram se chuan a zia tur hi ania le...

Dawr ka thlen veleh buaina min lo hrilh nghal pang mai, va han hahthlak tak, keima mimal buaina pawh ka la chingfel thei lo ania.

“Engtin nge kan tih ang?” Kimi thil ken chu ka en a.

“Kha tak kha engtin maw?” ka lak sak a, ka lek kuala, engmah dik lo ka hmu mai lo.

“ A hmuar nasa an ti a, bakah kan bula sawi mai loin facebook lamah an lo post hman peka,phone hi  a ri sek mai..” a sawi lai rengin Landline a rawn ri a.

“Ka lo chhang ang..” tih pahin ka ban a.

“Hello..”

“Nanun,eng nge thil awmzia hi?” Zomuani a lo ni a.

“Ka la hre bik lo..hei ka thleng chiaha, ka’n enfel lawk ang”

“En fel mai theih pawh a nih ka va ring lo,kan Items eng pawh ni hnih aia tam show phal loh tih leh zawrhchhuah phal loh a ni tih kha i hria tiraw?” a rawn ti leh a, ka hriat thu ka hrilh a,kan thil neih hi nitin Main lam atangin kan hralh theih tawk tur ang an rawn daha, keima Order siam a ni ziah bawk,kan hralh zawh loh palh a awm anih pawn a tam ngai lo.

“Chuti anih chuan a hmuar kha engtin nge in hralh theih le? In Branch atanga lei nimahse kan vaia buaina a ni tih pawh i hriat ka ringa” a rawn ti leh zel,a sawi dik, an leina hmun lam ai chuan CAKEWALKERS tiin an sawi zel ang.

“Ka hria lawm, Thiannu,tih mai dan tur ka hre meuh lo, a post tu te kha va be mah ila awmzia a nei tawh dawn lo a, engkim a nih ang tur a ni vek tawha, Mizo te chu engmah hmain kan duh duh sawiin kan phul vak zel sia” ka ti a, a thaw halh ri ka hrethei.

“Ok, nia, ka hre tawh bik lo..in Branch bik phei kha chu u Noeli ta a ni lehnghal a” ni tak, a pasal pawh a sa khawp ang chu.

“Ka dah phawt ang,nakinah kan inbe dawn nia” ka ti a, ka bing mum mum mai.Manager ka ni miaua, ka buaina a ni tel tlat,engmah nihnih aia tam kawl kan nei ngai miah si lo,thil mak tak a ni tawp mai.

A hnu lama kan buaina chu pui tak hi a ni ringawt,Main Officeah Emergency  Meeting an ko nghal rum rum a, Cake lei tu te biak pawh tuma ka beihna lah a hlawhchham thak bawk,call a pick duh der lo.Mak tak a ni, a post ngam anih chuan sawifiahna leh thildang te pawh sawipui theih awm tak, chutiang a ni tlat lo.

“Nunpar, hei hi engtin nge a thlen theih le?” kan Big Boss ber chuan dam thluam hian a ti a,Min koh dan chuan min ti na zawk bawk, ka chhan hmain ka chil ka lem hmasa te te,ka zam lutuk tih reh nana ka tih a ni pah bawk.Nidangah kan meeting in Noel-i leh Zorina an tel ngai miah lo, vawiin chu an la awm ve ve zui bawk.

“Ka hrethiam lo,nitin hian kan items la neih te hi ni hnih kan kawl tawh em tih ka check vek zela,mak ka ti khawp mai..”

“Nia, amak khawp mai, mahse,mak tih ngawt khan he thil hi a chingfel dawn miah lo a, kha thil lo post tu kha i be thei em? Nge biak i tum lem lo zawk?”  a ti leh a, a aw a dam hle nangin ka zamna a nep phah eih lo.

“Biak ka tuma, ka la hlawhtling rih lo,pawi ka ti takzet..” ka ti leh a.

“In Branch atanga lei nimahse kan vaiin kan hmingchhia a, hetiang hi vawikhat kan tawng tawha, kum 10 zet a vei leh hnuah kan tawng leh ta a, tunah phei chuan Media a chak em em tawha, kan mualpho na hian kan elpuite a ti lian awk thei a, kan loss tur tam zia hi i chhut thiam kher lo maithei” a ti leh a, a sawi dik em em tih ka hria, tawngkain ka chhang thei lo, ka bu ringawt.

“Noel, hei hi i manager a ni a,i pual bik deuh nimahse kan vaia mualpho na a ni tlata, engtia tih chi nge le?”Noel-i hnenah a ti a.

“Ka hrethiam chiah lo, Manager hi Zorina lak ania, ka lo hriat dan chuan interview pawh a hmachhawn lo niin ka lo hria a...a dik em?” min rawn en a, a hmeltha takah chuan hmuhsitna niawm tak hi a lang thei bawk.

“Aw, nia...a dik alawm...”

“Ka pa, hei hi keima tih dik loh niin ka hria,facebook lama post tu kha ka nau te ka enzui tir meka, mahse, thil pakhat awm chu Manager hi thlak a tul ka ti..” Zomuani’n ka kutah a rawn vuan vat bawk.

“Chu chuan buaina a chingfel dawn tihna a ni hleinem..” Big Boss  in a ti ve thung.

“Nia, chingfel dawn hauh lo,mahse, he Hmeichhia hian engmah thiam vak a nei lo pawh a ni maithei,an chhungkaw dinhmun harsatna sawi khan a thianten min rawn ngen chiama, ka lo la anih kha, ka ti fuh vak lo anih hmel,chu bakah nakin zel atan hei aia buaina lian zawk min thlen chuan a pawi khawp ang, chuvangin ban mai a tha ang..” min rawn en a, min hre ngai miah lo niawm tak hian min melh run bawk.

A sawi zawng zawng kha ka ngaithla a, ka hre vek, mahse, ‘HE HMEICHHIA” tih lai tak chuan a kher kherin min kher ngut nguta, ka bengah a ri nawn tlut tlut bawk.