EVERGLOW

Chapter- 2

Rang lutukin khum atangin ka chhuk a, tu nge anih a khawilam mi nge anih pawh ka hre hek lo.Ka Phone ka la chhuak a, Joe-a ka biak vat angai, ani tal chuan tu nge anih a hre tur a ni.A hre lo anih ngat chuan ka chhe vek animai.

“Joe...khawnge i awm?” phone a pick rualin ka ti nghal a, ka mangan zia tihlan loh hram ka tum teh nangin mi hrechhiang em em tu hian ka mangang tih a hriat loh ka ring chuang lo.

“I nau bulah ka awm a, i lo kal har ta bawk nen..” LALPA le(h)..

“Sorry...ka lo kal tep, mahse, buaina ka nei..eng lo..nizan ami kha a kal tawh, tu nge anih ka hre lo ania..” ka au a ni ber tawh zawk.

“Ekhai!!!, i uang em?”

“Noo....tun ang hunah uanna chi ka sawi i ring ami?” ka ti tuar a, thinrim lutuk tihngaihna hre lo hian ka phone ka melh nghek ringawt.

“Okhey,hahdam teh, lo kal phawt la..chuan, chinfel dan tur ka lo ngaihtuah ang..” nem deuh hlai hian a rawn ti dam leh thliam a, ka tih dik loh nimahse Joe-a zawk ka haw hlur mai.

Toiletah ka tlan lut a, ka hmai ka phih sawk sawk a, ka sam ka tuai mam leh a, Darthalang lian zeta ka thla lo lang chu ka va hmu a, mawl ka inti hluah hluah,nuam ka tihna vang mai khan hahdam tak leh thlamuang zetin ka lo muhil ngawt mai kha chhaw ka inti ngawih ngawih,Kha mihring tan kha chuan hlep hlang a ni ngei ang.Ka phone riah ka hawisawn ta hram,Joe-a bawk anih ka ring a, anih loh chuan ka nau, kan teber, Shillonga lehkhazira awm a ni ngei ang,Nitin Mama hmasawnna leh chanchin chhia emaw tha lam pawh hre turin min rawn call ngei ngei thin a, min lo biak loh ni a awm ngai lo.

Ka Phone ka la kang a, ka nau a ni hauh lo, number ka la hriat loh zawk a lo ni a,tu nge anih ka hre lo chungin ka thawveng hawk tho mai.Ka nau be tur pawn ka inring zo rih lo ti ila a dik ang.

“Hello..”

“Good morning..” amah kha a ni chiang lutuk, engtin nge ka number a lo neih?

“Hey...nang kha, engmah min pe lo in i kal ania” ka rilru a lo lang hmasa ka sawi chhuak nghal pawp.

“Ka hria e,chuvang chuan ania ka lo biak che” zawi te hian a nui ri hawk bawk.

“I kal hma pawn min pe thei reng alawm le,i fair miah lo ania” ka pawisa mamawhna hian min tur nasa lutuk a, engtin nge ka hlawhchhuah lam ka ngaihtuah lo, ka tihtur ka ti vek tawh a, min pe ngei ngei turin ka duh a ni tawp mai.

“Ok, Ka fair lo hran lo ania,ti hian ti ang, khawiah nge ka hmuh theih ang che?” ka awih thei lo zawk, na zet hian ka phone ka melh nghek ringawt.

“Inhmuh nawn leh kher kan mamawh miah lo,ka pawisa tur ka duh a ni tawp mai”

“Ka pek dawn che chuan ka hmuh che angai a, i Ac number min lo thawn mai dawn mi?”

“Teuh lo lutuk..” ka in control zo tawh lo, ka sawi pawh ni lo in ka au a ni hrim tawh mai.

“Chuti anih chuan tihngaihna a awm lo anih chu..” ka chhan let hmain a off zui nghal hmak.Hrep tak hian...

Inhmuh nawn leh ka duh lo a, ka Ac number pek ka duh hek lo, zankhat atan chauha ti ka ni a, ka hmu nawn leh anih chuan beiseina ka siamsak ang, atan chuan Ks satliah ang tho ka ni dawn tih lah ka hai hek lo, chumai bakah ka Ac number ka pe anih chuan tu nge ka nih a hrechhuak nghal mai ang, nakin zelah ka duh loh tawp buainaah ka inbat lut ang tih ka hlau bawk.Mahse....Pawisa...LALPA..engtin chuan ka ti dawn chu nimaw?

“Khawiah nge ka hmuh ang che?” Phone a pick veleh ka ti nghal tawng,vawi 10 chuang zet ka call hnuah a pick chauh bawk.

Rilru mumal pawh nei loin Hotel ka chhuahsan a, Damdawiin ka pan ding nghal a, Joe-a a lo la awm bawk.Ka nau hmai dang lap mai leh na tuar thup tum taka a ruka a then leh chak chak thin chu ka hmuh hmaih thei lo,Beidawnna nasa lutuk,Sawifiah thiam theih si loh hian a tuamin min rawn tuam leh hlup hlup a,nizan tehhrep kha..Ka hna duh hauh loh thawkin pawisa hlawh nan ka kal chhuak a,mahse, ka thil tih te kha..Nuam ka la ti em em zui bawk a.Ka hlawh ber tur Pawisa pawh chu ka nei ta chuang si lo,Doctor a lo kal a,kan pawisa dinhmun inthlahrung takin min rawn zawt a, kan nei thei ang tiin ka lo chhang ngawt bawk.Joe-a lakah ka beiseina neihchhun ka la nghat a, mahse..Joe-a hmel pha dai mai chuan ka beiseina min tih hlawhtlin sak dawn lo tih a ti chiang ngang mai.

“Ih, diktak chuan,tuemaw ka biak tir a, anni khan an lo be fel vek a,tu nge anih ka hre hauh lo..mahse, hriat dan a awm tho ang,ka thiante a hre tur ber hi ka call tlang thei rih lo a” a ti hlai a, mahse, awmzia a awm lo..Tlai lam dar li thleng pawn engmah thu thar a la awm lo,Ka nau lah pawisa a awm hma chuan an khawih thei tawh si lo.Tihngaihna ngang a awm lo,Khapa..hmuh leh ka duh hauh loh kha ka hmuh angai ta tho.

“Tu nge aw?” a rawn ti bung nghut a,ka sa zak mai.Mahse, tunah chuan chapona emaw thinrim tihlan hun a ni lo.

“Eng lo...ih..nizan ami kha ka nia..” ka hrawkah min hnawh a, ka khuh zui kharh bawk.

“Nizan...ok,ka hria e,min hmu duh lo khan ka lo hria a.” a va han ngeiawm ber tak.

“Nia, mahse, a thlawn ringawt chuan ka kal bo tir thei lo che a..”

“A that hlauh chu,nangman thlang la..”

“Ka hrethiam chiah lo,ka kal chhuak thei angem ka hre lo a” ka ti a,Ka nau ka awmpui atangin thla a liam tep tawh a,midang min chhawk tu ka nei hek lo, Damdawiin hi kan In pakhat zawk a ni hrim tawh.

“Chhungte hlau rual chu i ni tawh meuh si lo a..” a nui hawk ri ka hrethei.

“Khawngaihin..fiamthu na hun ka nei lo ania” ka aw a chang beng bawng viau.

“Ka fiamthu hleinem..tak takin i chhuah theih loh chuan ka lo kal zawk angai dawn tihna ania,khawiah nge ka lo kal ang?” a rawn ti leh a,kan awmna Hospital thlang deuha Restaurant lian vak lo hming ka hrilh a, zan lam an inhawng rei thin a, Dar 11 thlen loh zan an nei ngai lo.

“Dar 8 velah lo kal ila pawi  i ti em?”

“Tlem chuan a tlai deuh ka ti, Dar 7 tal ni thei se” ka ti leh a, Damdawiin Gate an khar chuan ka buai phah ngei ang.

Dar 7 rik hma hretin ka chhuak a, Restaurant kil lama thutna awmah chuan ka thu a, a lian lo hle nangin a changkang reuh a, Customer neih loh lai an nei mang lo.Hmu miah loin Menu ka en a, ka mitthlaah ka huat em em ka nu hmel a rawn lang a, ka mit ka chhing sawk mai,Hmangaihna nei miah lo,Fa te aia Mipa dang thlang tu, chu mipa lah chu a Fanu Bialpa ni mek bawk kha..ka ngaihtuah zawng pawn ka luak a chhuak hlui thei,an pahnih awmdan ka hria tih an hriat takah khan Lunglei lamah an tlanbo dun ta daih kha ania, kum 4 teh meuh a vei hnu pawh hian a fa te hi min rawn ngaihven leh ta miah lo,Ka pi sawi dan chuan Aizawlah hian ka nu a lo let leh tawh a,Hriata nen erawh an inthen leh tawh  a ti a, vawi tamtak Hriata khan min rawn biak pawh a tum thin a, ka number ka thlak phah a,tum loh tawpin kan thiante Inneihnaah kan inhmu fuh a,mualpho lutuk lo in ka kalsan thei hram thung.

 Ka nu zawk erawh ka la hmu leh ta miah lo,Ka nau accident te hi a hre ve em ka hre lo.A lo hria anih pawn atan chuan engmah anih ka ring chuang lo a, diktak chuan rawn ngaihven se ka duh chiah em tih pawh ka hre hek lo.Ka nu nu leh pa an tar tawh a, ka nu khawsak hoh takah khan ka pa chhungte lam nen an inmil ta lo a, kan awm dan turah an intibuai bawk a,mahse, kan unaua awm kan thlang a, min si rengin ka pi leh pu an awm tho bawk a.A tir kha chuan an fapa fa te kanni bawk a,min ngaihven viau,hun a lo kal zel a,Ka patea Nupui hian min hmangaih ni a lang si hian kan tan buaina a siam ta tlat,Ka pi leh pu lah tar lam anni tawh bawk nen Bangdan maia awm si hian khawvel hran daiha khawsa nen kan danglam lo.Tunah Mama vanga ka buai em em pawh hi a hming chuan min pui ngei,mahse...Pawisa an ta ka hman pawh a vaiin puk angin a kal vek.

“Ka tlai em?” Mipa aw ka hriat hnu hian a rawn ti thut a, rang zet hian ka hawi chhuak a, amah ngei kha a lo ni a,Nizan lam kan awmdan kha ka rilruah a lo lang zawk a, ka biang a sa nghal hat hat mai.

“Aih, tlai lo e..” ka hawi kual a, min ep zawnga chair awmah chuan a thu a,Hmeltha han tih hluah chu a harsa maithei,an thlahtu teah Hnamdang an tel ka ring ru deuh ngawt, a hnar a sang deuh vah a, a mithmul a chhah tha a,a hmel a mizo fahran lo.

“Eitur ei na hun i nei thei em?” a ti leh a, a chair hnunglam a ngheng a.

“Aih, pawi i tih loh chuan Pawisa kha min pe la, kal lehnghal ka duh”

“Um,,i hmanhmawh hle mai..in awmna a hla em?” a ti leh a, ka lu ka thing ringawt.

“Engpawh nise i hming hi hre ta ila...” a ha var rual nalh zet langin a then suk a.

“Ni lo...a tul miah lo..” ka darah tuemaw hian min rawn khawih a,rang zet hian min rawn khawihtu lam ka hawi chho a, mahse,...ka khawng nghal lah mai.

“Min khawih miah suh..” ka aw a ring lo,na zet hian a kut ka paih sawn sak dawrh bawk.

“Sorry..i dam maw?” chhan loh ka tum zeta, kan bul lawka mipa,a hming ka hriat si loh thu ve chu ka hrechhuak zawk a.

“Dam e..” ka ti tawi tak mai.

“Bawihi..i thianpa ami?” rang lutuk hian ka en a, a mit a siai zauh ringawt.Hahdam hmel zet hian a thu a, min en lo in Hriata lam a en a,Hriata ai chuan a lang upa zawk a, chumai bakah a hmela nui hmel lang chung si in a nelawm hauh lo.

‘Aw, aaaa...ni chiah lo..” ka tum loh tawpin ka ti nawi nak mai.Hreptak hian..Hetianga awm tur ka ni hauh lo.Kum 27 lai ka ni ve tawh.

“Hriata ka nia..” a va han zak lo tak.

“Um, anih chu..Zoduha..” nelawm vak lo hian a ti a,engvanga han inhmelhriat tir kual vel nge anih ka hre bau lo.Ka tan engmah a ni lo a,ka bul hnaia awm ngam tur lah a ni hek lo.Mahse, amah hi ZODUHA a lo nih chu a..

“Ka kalsan phawt ang che u, in sawi muk hmel em mai” a ti leh lawi a, chhan pawh ka chhang buai peih lo.A kalsawn chu Zoduha’n a thlir zui vung vung a, a hmela nuihzatna niawm tak lang chu ka en a, eng nge nuihzat tur a lo hmuh hrep ni?

“Enteh, ka hmanhmawh tawh sia..” Gate an lo khar hman hlau ru deuh chung hian ka ti a, bakah Hriata vang hrep khan ka mood a fuh lo takzet bawk.

“Uhh...umzui i tum em lo ang chu maw?” ka kut ka humruh a,Dawhkana tui inchhawp sa chuan theh thawt lo turin a insum nasa viau.

“Ni lah lo e..ka kal vat angai tawh a” pangngai tak hian ka ti leh thei hram.

“I hming min la hrilh lo a,Hriata kha ka va zawt zawk mai dawn nge?” a mizia hi hmeichhe tan chuan a huatthla la tawk viau ang,tu hmeichhia pawhin an mil kher lo ang.Mipa tan pawh hetiang reng anih chuan a ngeiawm viau bawk ang.

“Hming hriat kher....” sawi zo lo in ka ngawi leh rih a.

“Tak takin ka chelh khawtlai tawh lo ang che,engzat nge ka pek ang che?” ka rilru a na nghal vawng vawng mai,ka hmeichhiatna hmanga ka hlawhchhuah,zahawmna tel si lo hi ka hua,haw thei ka ni si lo lai tak hian min ti na thung.

“Midang i pek thin ang kha animai.” Ka mittui tla tur chu khap kir tumin rang zetin ka mit ka khap a.

“Midang hnenah an duh zat ka la zawt ngai lo a..bakah ka hmu nawn leh ngai lo bawk a” a aw a nghet charh mai.

“Ok, i duh zat zat animai”

“Ka duh zat lam ni loin hreh chung chunga i thil tih man zawk kha min dil rawh” ka hmui ka pet fan fan mai.Mahse, ka duh loh dan berin ka biang a rawn lum pap a, ka mittui a tla tih ka hrethei.

“Min ngaidam rawh..” ka mit ka nuai a, tah zui ka duh hauh lo.Ka awmdan engkim mai hi a mualpho thlak tawk tawh lutuk.

“Ka hrethiam e..hei hi ka cheque ania,engmah ka ziak lo a,ka hming sign  a awm sa a,i duh zat i lo la chhuak mai dawn nia..” Dawhkanah HDFC bank cheque a rawn nawr phei a.Ka ring ngam dawn em ka hre lo..

“Chutiang ka duh lo,Cash min pe zawk rawh...” ka aw a lawi rat mai.A thle buk a.

“Ni lo e, min ring rawh, cheque lem mai mai ka pe lo che..ka number i neih kha..” ati leh a, mak takin dawt a sawi ka ring hauh lo.Ka chhungril hian a ring nghal thlap thei tlat.

Dawhkana tui awm chu a ban a, tlem tein a kut zungtang a ti huh a, cheque rawng tak laiah chuan a zuk khawih a, a rawng a rawn pherh a,min rawn en a.

“I hriat tho ka ringa, hei hi cheque lem leh tak enna ani a, a rawng hi a pherh thei lo anih chuan Cheque lem a ni tih na animai” a ti leh a, ka bu ringawt.

A Motor lan theih chhung chu ka dinna ngaiah ka ding a,a liam ta maw tih veleh hmanhmawh lutukin Hospital lam ka pan a,naktukah, hma thei ang berin Pawisa ka la chhuak ang, ka la thei ta lo anih pawn a sawi ang khan a number ka nei a, buaina tur a awm lo.Vanneihthlak zetin Gate an lo la khar lo a, ka nau lah a muhil a lo la harh lo hlauh bawk.Ka hming ka hrilh lo a, chumai bakah ka hmuh nawn leh a tulna tur ka hre lo a, tunah chuan engkim a tawp vek tawh,mahse, engzat nge ka lak chhuah ang? Joe-a ka biak angai ang.

“Joe...kan inhmu a, cheque min pe a..” ka ti a, Kan Room balcony lian lo te awmah chuan ka ding a.

“Chuan, i ring mai tihna mi?” mak tih hmel zet hian a rawn ti a.Nia, amak alawm..

“Um, rin mai loh chu tihtur a awm lo, naktuk zingah ka mamawh dawn che ania”

“Sure..ka lo kal ang, Bankah engkim kan confirm angai anih chu..mahse, eng zat nge a pek che i sawi lo a?”

“Engzatmah, keima duh zat la turin min ti a, ka la thei lo anih chuan amah biak pawhna tur min pe bawk a..” ka ti a, a thaw halh mai.

“Ka hau chak hle mai che, i upat tawh nen ka rin aiin i nawi riau mai..engpawh nise naktukah kan inhmu dawn nia..Bye phawt..” ka nui sak mai..

Ka nau ka be leh a, Pawisa puk tur ka hmuh thu leh, rulhna pawh a hmanhmawhthlak loh thu ka hrilh a, lawm zet hian a rawn khek raih mai,kan teber a ni a, ka nu awmloh hnu pawh khan kan unauin kan hlawhchhuah hmangin kan chawm a, nuamsa tak chuan kan dah hauh lo,kan dinhmun a hrethiam a, a mamawh loh chu min dil ngai hek lo.Tunah kan dinhmun hetiang a a chhiat lehzual takah chuan chawlhsan mai a duh a, mahse, ka phal lo bur thung.

Dar 10 rik hma hretin Joe-a a lo thleng a, Scooty a nei bawk a, hmang tangkai tak ka ni ringawt.Kal pahin min hau leh rih a, chhan pawh ka chhang peih lo, nizan khan ka ring thlap nangin tunah chuan ka rilru a nuam leh tawh miah lo thung.Joe-a sawi ang tak tak hian ka kum a tam tawh a, ka thil pal tlang te avang ringawt pawh hian mawl taka khawsa tawh tur ka ni hauh lo.

“Engzat nge i lak tak ang?” Bank chhung kan luh hnuah a ti leh hnuhnawh a.Ka mamawh zat tak la tur chuan ka ngam lo ang tih ka chiang, mahse, ka mamawh takzet thung.Joe-an ti tura min nawr tirh kha chuan 10k atanga 20k tih kha a ni a, ka mamawh erawh chutiang lek a ni hauh lo, deposit hmasak tur kha singa anih avang chauha ti ta kha ka ni a,Mahni hmeichhiatna eizawnna atana hmang te hian an lo hlawh hnem thei khawpin ka hriat phah hial anih kha..Mahse, pawisa chu engpawh lo nise zahawmna an hralh tel miau alawm le,Ni lo,kan hralh tel a ni zawk, ka lo hmuh hniam thin te nen huang khatah kan awm tawh miau a.

“Singhnih ka la mai ang,mahse, ka mamawh zat chu i hriat tho kha..” ka ti sep a, a lu a thing nar nar a, a ngaihtuahna a buai hmel viau.

“Sing nga la la, chuan i theih veleh i rul leh mai ang chu..” rang zet hian ka lu ka lo thing a,engti kawng mahin ka rul leh thei lo ang tih ka hria, ka puk hmasak ho pawh rulh miah lohin a la awm teuh tlat.

Cashier hmel fel veng vawng, Smart zet mai,hna thawk mawlh mawlh chu ka pan hnai a,singhnih la turin ka rilru ka siam fel vek tawh a, Cheque ka nawr lut a..min rawn en zawk a, a nui var var bawk.A buai tehreng nen engtin nge maw a nuih hram theih zawk ni?

Computerah Ac number a chhu lut mawlh mawlh a, mak tih hmel zet hian a mit ko a san awk a,min rawn en leh a.

“Kan Manager va hmu lawk ta che,a pass a ngai a,eee...lawk..inleng a la nei a,ka lo hrilh lawk ang, a inleng a lo chhuah veleh i lut nghal mai dawnnia” a ti a, Manager awmna room min kawh hmuh nghal a.Ka thaw huai mai,ka lo ringsual hauh lo,Pawisa a lo awm ngei tih a chiang tawh.

Darthlalang chhah tha chi a siam kawngkhar lian pui chu ka pan a,Cashier khan kik kher angai lo atih avangin ka nem hawnga,kawngkhar lama thawm hria in an Manager lo thu chu a rawn hawi chhuak nghal vut a, mahse...ka Lungphu a chawl a, ka thisen a khal nghal vek niin ka hre ber.

Amah ZODUHA kha...min hmuh vanga mak ti hmel a pu lo,nuam tih hmel zet hian a then zui suk bawk.