EVERGLOW-14

Chapter- 14

Min rawn en a, a hmai dang lapah chuan ka kut thla a lang kalh bawk.

“Min beng leh rawh, mahse, nangmah ka ngaihdan che engmah a danglam phah chuang lo ang” Ben leh lam a lang lo, ka chhungril a sahal huam huam a ni ber.

“Nangmah vang hian  tlaiah khan zak lutukin ka awm asin, ka nu vanga kan tawrhna te kha a tawk ila ti lo tihna ami?” min en ran a, ka mit ka la sawn ta nge nge.

“Enge sawi tura min duh?” ka ti sepa.Ka hnaih ber Chair ban ka ngheng a,dam hian hlawkna a nei pawn ka hre ta lo, ka dam chhan ni a ka lo hriat thin ka nau hian engtikahmah min ngaidam thei in ka ring lo,min haw mai pawh ni loin min ten zawk hial ta ve ang.

“Ka nu kha i haw thin emaw ka ti asin,mahse, in lo in angreng,ka tan i ti anih pawhin vawikhat a tawk mai lo mi? Chutak chu ka hrethiam lo..” ni e, a dik,vawikhat kha a tawk reng..Mahse, keipawn ka duh dan hi ka hrethiam lo a, nakinah ka la inchhir leh ang tih hrereng chungin a bulah ni hnih hun ka hmang anih kha,mahse, hetiang khawp hian a vuak let a na ang tih erawh ka lo ring pha lo a, ka ngaihtuah ngai hek lo.

“Ih...engtin nge?” ka ti hman chauh tihin Zorina a rawn tawng ta tlat, mak ti lutuk hian ka hawi let a, Mama pawh a mengphawk ve hra tho,a lo kal lai kan hre lo ve ve.

“Engmah tih dik loh kan nei lo,Mi pahnih hi kan inhmangaih anih phawt chuan engpawh kan ti thei..Tichuan i zawhna ka chhang em?” rawn kal phei pahin a ti a, ka en ngawt ngawt thung,a thilsawi kha a dik emaw dik lo emaw lam ai chuan min chhan nana sawi anih vang ringawt pawn ka lawmna tawk a tling em em tho.

“Nang maw? Engtin nge i lo kal ngam zawk?” Mama rawn ding khawng auh chu ka en a,”Ti suh” ka ti tuar bawk,mahse, ka tlai ta tho.Zorina a bawh rawk a, a ban a vai fua bawk..Ka te tuara, ka mit ka chhing ta ngawt, eng nge thleng ka en ngam lo..

“A tawk e..” Zorina aw dam leh ril ruih ka hria, ka meng vat a, ka hlauh ang kha engmah a thleng ta lo tlat, Zorina’n a kuah bet a, a kut lehlam a hnunglamah a pawh beh sak tlat a,a kut lehlamin a nghawngah a kuah bawk.

“Nan, engtinmah ka ti lo ania...” min rawn en a, min koh dan tehhrep pawh chu a, a landanah hi chuan rei tak lo inkawp tawh kan ang mah zawk.

“Min thlah rawh..” Mama thinrim sehchilh rap rap mai chuan ka kawchhung a fana,a tan chuan engkim hi a maka, Nu leh pa ang maia a lo ngaih leh a zah hian khatiang thil tenawm kha ka tih a ring ngai lo ang tih ka hria, mahse, ka ti a, ka ti satliah mai pawh ni loin a hmu bawk.A nat dan tur chu ka ngaihtuahpui thiam vek, Ni e..Kei pawh khan ka lo tuar tawh miau a,tun thlengin ka la haw zui cheu bawk.

“Ni lo e, khawih let ve tur che in min siam ka duh lo..” a ti nghut a, a rawn nawr phei a,Mama hmela tlawm hmel lo lang chu ka hmuh hmaih lo, ka na vawng vawng a ni ber.

“Thu rawh le, tha takin thu la, ka sawi i ngaithla ang..chuti anih loh chuan tu nge ka nih he video clip pe tu che hian a hrilh tel chein ka ring” a aw a ring hauh lo nangin nek luih loh a him zawk zia a lang vek, Mama pawh hian chu chu hria se ka duh ber.

Ka thut lohna lam chairah a nawr thu thla hnawka, la ring ngam lo niawm tak hian a din chilh a, a melh run bawk.Mahse, Mama a thut ngaiin a thu ,engmah tih leh tum hmel a pu lo.Zorina a rawn kal phei a, ka kut a rawn la a,a hmer zui vang vang bawk.

“Thu la...chuan ,engkim hi i nau bulah i sawi fiah dawn nia..hetiang ngaihdan dik lo nen a hrereng tur che hi i duh lo ang tih ka hria ania” a ti a, engmah sawi loin ka thu thla a,ka thutna Chair banah a rawn thu ve nghal a, ka darah a rawn kuaha, amah si thei turin min pawt hnai zui bawk.A thil tih zawng zawng hian min hnema, ka beiseina nung che che,thi mai tur a ka lo ngaih kha amah vang hian a eng leh tial tial mai.

“Sawi ta che..” Mama’n min rawn ti leh a, a thinrim em tih ka hre tawh lo, a aw a pangngai  leh thlap tawh.Mahse, a mitmeng sen ram maiah chuan a chhungrilah na a tuar tih ka hriatsak thei tlat thung,mahse, a mak lo..Unau,thisen hmunkhat ami kan ni miau alawm le.

“Engtin nge ka sawi tan ang?” tanna mai tur ka hre tlat lo.

“I duh duhin..mahse.,a chhan hi a tha tawk tur a ni”

“Keiman ka sawi ang, i U hian nangmah chhan nan min mutpui,chuan, a thil neih hlu ve ang ang te a hralh bawk..A dang eng nge i la hriat duh?” nghet zet hian Zorina kutah ka hmera, engtin nge ka thil neih ka hralh tih a hriat ka hre lo.Mahse, ka chanchin hriat tumin a lo ngaihven tih erawh ka ringhlel ta hauh lo mai.

“Chuan nangin ti hian Video tawp lutuk hi i lo siam vel a?” a kut a humruh a, a rawn ding leh mai dawn emaw ka lo ti hman,mahse,engmah a ti ta em lo.

“Siam hauh lo mai, chubakah a hmasaber kha chu i tan a ni a, a dang pawh i hmuh loh kha a la awm,chu erawh chu kan pahnih tan a ni ve tawh thung..”ka lo ip chawih mai..a sawi dan teh lawng chu sumdawnna lam a sawi nen danglamna a awm lo.

“Chu chu i chhuang tihna mi? Mahse, ka tan chuan a zahthlak asin..ka ten lutuk che u” a hmai a hup zui nghal vang vang bawk,ka mittui a rawn hnam sawka, mahse, tap ngawt tur ka ni hauh lo.

“Ka chhuang hauh lo, mahse, kan tih dik loh lai chu nupa ni loa kan mudun chauh kha, chu pawh chu keini chauh ni loin mifel leh tha ni a i ngaih te zingah pawh keini aia nasa an tam ang,an tam avang ngawt in kan ti dik ka ti chuang lo.I ngaithiam dawn lo anih chuan i u hi ka hruai haw mai ang” ka thawk a sak talh mai.A ti tak tak hauh lo ang tih ka hria, Mama vau nan a hmang mai a ni tih ka hre bawk.Mahse, Mama hi vau zam chi a ni lem lo tih a hre lo hi a pawi ka lo ti ru vawng vawng thung.

“Zorin..khawngaihin kal tawh mai la, kan lo chingfel ange” min kuahna ka dah sawn saka..Hetiang chuan engmah kan sawi fel dawn chuang miah lo tih ka hria.

“Aih, ka kalsan ngawt thei lo che, i buaina hi ka buaina a ni ve zel tawh ka tih kha..” nghet churh hian a ti a, chet tum awmin a awm lo.

“Khawngaihin kal tawh rawh, engmah a thleng lo ang” a mitah tak ka  en a, min rawn en ve bawk,a mitmeng lian leh melh na zetah chuan min Duatna niawm tak ka hmu zauh a, mahse, a rei lo em em lutuk a, ka hmusual emaw ka ti leh lawi.

“Nia, kal tawh la, ngaihtuah suh,engmah a thleng lo ang” Mama zawkin a rawn ti ve leh a, a thinrim eng ang mahse kut min thlak chuan a che dawn hauh lo tih ka chiang.

A tho a, min ngaihtuah niawm tak hian min rawn en leh a, he thil thleng tur hi a hre lawk anih ka ring ta hial, min dropa,a kal lehnghal mai khan ka hre sia,tunah a lo lang leh lawia,min care ta thut bawk..Engkim a dik ta thlap mai.

Ka tho ve a, kawngkhar lam a pan chu ka zui a, tunah zawh nghal chi a ni lo tih ka hria,a lem a lo ni anih pawhin Mama hnenah chuan min chhan tawh tho tho a, ka laka a thinrim lutuk tur kha tlem tal chuan a zia phah mahna le.

Kawngkhar pawn kan thlen veleh min pawt hnai nghal a, khawlai a reh thuap tawha, Light a in On bawk si lo a, Ka pi te nen kan inkalpawhna gate a la awm cheu bawk nen mi lo kal pawh awm se min hmu mai lo ang.Ka khabeah a rawn khawiha min kuai daka..

“Ka ngaihtuah tak tak che, a hma a ka sawi kha i hria em? Noel-i hi i tan chuan a lutuk mah mah ang ka tih kha” zawi sup hian a ti a, hrechiang tak ka ni tawh,ka bu nghat ringawt.

Ka kawngah a kuaha, kuah let ve lo tuin ka insum tang tang thung,reilote atan ka bialpa angin a che a, khavang khan amah ah hian ka innghat ngawt thei tihna a ni lo.A rawn kun hniama, ka chalah a chalin a rawn nawr a, a thaw lum ham ham chuan min fan rawih rawih mai..Ka ngheng ta nge nge,a nghawngah ka kut ban pahnihin ka kuaha, ka uai ani mah zawk.A rum hawk mai, ka mit ka chhinga, thil thleng tur ka hria, a hmui sexy zetin ka hmui a rawn sik rualin ka inthlahdul ve nghala, tun tum chu nidang ang lo takin amah ah ka in nghat thlap a ni ber.

Duhthawh zet hian ka hmui a rawn pet kuala, ka chhan let ve takah phei chuan a rum hawka, amah hnaih lehzual turin min hnuk hnai  nawn leh salh bawk. Ka kawr a rawn zen tur chiahah chuan ka harh chhuak ta chauh, helaiah hian hetianga khawsak ngawt tur ka ni miah lo...Inchhungah Mama a awm a, ka let hun a nghak ngei bawk ang.Ka inlahrang ta nge nge, lungawilo hmel zet hian a rum hak thung..A darah ka hmai ka phum a, ka kuahna pawh ka thlah bik chuang lo..Hah zet hian ka thaw hle hle bawk.

“Kal tawh la..”

“Um..” mahse, min kuahna a thlah chuang lo.

“Min thlah loh chuan i kal thei nang” ka nui hak mai..Zawi te hian a nui ve tho bawk.

“Um, mahse thil pakhat..Ka nei ngei ngei ang che..” ka hresual emaw ka ti zawk.

“Maw?”

“Ka nei dawn che ka ti anih chu,midang neih tumna i lo nei anih chuan i thi ang” a uang tih ka hrereng nangin a duh loh dana thil a kal chuan a ti tak tak hreh hauh lo ang tih ka chiang thung.

“I hlauhawm thei em mai..kal tawh teh” inlakhran tumin a kut ka phelh saka,

“Ka ti tak tak ania,Joe-a pawh tiamin...” ka nui leh hak mai..Em em bawka..

In chhung ka luh leh chuan Mama a lo awm tawh lo,a Room kawngka bulah ka ding ren rawna, ka kik dawn zuau a, ka thulh leh ta nge nge,tunah chuan rilru mumal pawh a la pu thei lo maithei a, eng pawh sawi ila a rilruah a lut chuang lo ang.Zingah ka sawipui zawk mai ang chu.

Ka mu meng kar mai, vawiin zet chu nun a va han harsa zual tak em, ka nu vang khan ka chau vek thei a, ka zia leh dawn chauha, Mama min lo biak dan leh a thil hmuh te kha,Ka nu lam kha chu hriat pawh ka lo hre tawh lo zawk.Ka hmai a sa hut hut mai,ka zak hluah hluah bawk, ka nau ngeiin ka awmdan a hmu vek tihna ania..Zorina lah kha a awmdan a thlak veka, min nei ngei ngei ang tiin a tiam bawk.Thil engkim kha a thleng chak lam hret vek.Rilru mumal engmah ka pu thei lo, ka hriat chian chu pakhat chauh,zep rual lohin Zorina hi ka duh,ka hmangaih hial maithei bawk.Ka laka a chet dan ngeiawm tak tak te pawh kha ka chhungril hian a ngaidam thlap thei tlat.Mahse, a hre ngai lo ang, inkawp a duh tak taka kan inkawp zui dawn anih pawhin keimah lam atang chuan ka duh tih hi ka tih lan a thiang lo bur.A rilru a thlak leh thut anih chuan kei aia na leh tur chuang an awm lo ang tih ka chiang.

Ka phone riin min ti harha, meng mang loin ka pick a.Zorina aw ka hriat rualin ka thu chhuak hlawl mai.

“Nan...Good Morning..” min koh dan teivet pawh chu a.

“Morning...i va hma ve” ka mu thla leh a, ka lu na chuan min tur ut ut nimaiin ka hria.

“I that leh that loh ka hre duh a..”

“Ka tha lawm,mahse..ka lu a na angreng”

“Um, nizan i mu tha lo anih ka ring,ka ring dik ngei ngei ang” a rawn ti leh a.Ka meng a, khum bula sana inhung chu ka en a, dar 6 pawh a la ri lo.

“Mu tha vak lo..mahse, i va hma tak tak ve’ ka ti leh a.

“Ka tih dan pangngai a ni tih i hre leh tawh na nge?” zawi deuh hian a ti sup a, a Inah zan hnih ka riah chhung khan min thawh khalh ve ve,ka thawh ve chuan a lo inbual hman ve ve anih kha.

“Aaaa, a rei lo em a, engmah i tih thin ka hre lo a”

“Chuti chu i hriatchian vat angai dawn anih chu..” a nui zui hawk bawk.

“Ka hre lo le, engkim mai hi mumang ang vek ni maiin ka hria” ka ngaihdan dik tak ka sawi ta nge nge.

“Aaah, i bulah chuan mu ila i mumang a ni lo tih i hre ngei ngei ang..tak takin ka inbual lawk ang”

“Um...”

“Lawk..hna i rawn kal peih loh chuan i lo kal kher angai lo ania” a rawn ti leh a, ka nui sak mai.

“Ka hre lo,lo kal chu ka tum dawn nia”

“Ok...nih phawt”  ka chhan let hmain a off zui daih bawk.

Mama thawh tawh leh thawh loh ka ngaithla vang vang a, engmah thawm a awm lo.Ka mit ka chhing leh vang vanga, ka lu na lah chu reh a hnekin a zual tial tial niin ka hre zawk.Ka tho ta nge nge,ka Damdawi dahna bawm ka hai a, Saridon lo awm chu pahnih ka la chhuaka, ka hmawm zui nghal hmak, khumah ka lawn leh a, Lu na benvawn hi ka pa hnen atangin ka chhawm a, kei chauh ni loin ka nau te pawh hian an nei ve ve bawk.Ka chal nghet fein ka hreng a, ka muthilh theih phawt chuan darkar khat hnuah chuan a zia leh mai ang tih pawh ka hre tawh.Zan ka mut that loh viau leh ka tah nasat hian a tukah lu na vangin ka buai ngei ngei.

Ka harh leh chuan ka rin lawk ang ngeiin ka lu na a lo reh vek tawh,ka zi mar ar ar a, khua a lum avangin tukverh hawngin ka mu a,Curtain leng dar dar chu hmuhnawm awm niawm tak hian ka en vang vanga, ka rilruah erawh engmah a awm lo, a ruak vek thung.Nizanah Zorina a lo haw chiaha, hna a tam dawn tih ka hria, ka kal ngei ngei angai.

Dar 7 a ri hnai tawh,Mama a tho tawh em ka hre bawk si lo, eirawng ka bawl vat vat angai ang.Kitchen lam ka pana, ka beisei loh zetin Mama a lo tho tawha, Dinning table kilin thil a lo ei mawlh mawlh tawh zawk.

“I va tho hma ve” nidang ang bawkin ka ti a, mahse, nizan kan boruak te avang khan chhan letna ka beisei  hauh lo thung, chu ai chuan ka zak a, ka khur titih hial bawk.

“Eitur ka siam zo vek a, ka kal hma angaia, ka inbual anga ka kal ang” min rawn en zawk pahin a ti a, a thil ei lai a eizawm leh nghal mawlh mawlh bawk.

“Mam...’ sawi zawm loin ka khuh kharh mai.

“Sorry..ka hmanhmawh ka tih kha..” a tho a, a thil ei lai a ei zawh mumal loh chu ka en a, min ten anih ka ring ve tawp, chumai bakah ka hriat thin ka nau kha a la ngai renga, a thinrimna te engmah a theihnghilh mai mai ngai lo miau a.

“Ok...dah Mai rawh, ka lo tifel mai ang” ka ti a, min en loin a bu nghat a, living room a pan zui nghal daih bawk.Min hre ngai miah lo chu awm ve se engmah danglamna an hre lo ang, mahse, ka tan chuan engkim a danglam tih haider theih rual a ni lo thung.

Mumal pawn engmah ka ei ta lo, ka inbual leh sawk sawka,hna kal tlai hi ka thil duh loh ber anih avangin ka hmanhmawh a, nidangah chuan ka thawh hma thin avangin hmanhmawh lutuk loin ka insiam thei a, tukin chu ka tho tlai em mai a, ka hmanhmawh hle loh chuan ka tlai ngei ngei ang tih ka hria.Ka sam ka hru hul nawk nawka, chhem ro tur pawn hun ka nei lo, hnawk zetin ka tawn khawm tawp bawk.

Vanneihthlak lutukin ka thlen in Hlui chauh a lo la thleng hlauh,Zorina hmuh ka chak rualin ka hreh lawi,Moses-a lo kal se ka ti a, mahse, nizan a ka khawsak dan tehhrep avang khan ka hmu chak chuang lo.Bakah Zorina nen kan inzawmna zawng zawng te kha a lo hre ru vek a, Zorina awm loh lai pawh khan min lo veng tihna a nih hmel zawk lehnghal a..Hlui’n kan chawei khawm nawm leh nawm loh min lo zawt nghal var bawk.

Ka mail ka Open a, a lo awm thla tiara, ka rin ang chiah,ka hawnga,Print out ngai ka print out nghal zung zung bawk.Vawiin chu ka buai hle ang.

“Morning..” Moses-an a rawn ti a, a hmelah engmah dik lo a awm lo.Nizan boruak  kha a hre tawh lo zawk pawh a nimaithei.

“Morning...” ka ti let ve a,Hlui hnenah thingpui a chah a, a lo thlen veleh thingpui a in ngei ngei tih  ka hria.

“Enteh, hei hi nangma min rawn thawn kha nia,min lo enpui lawk hman em?” Laptop ka kawka, ka Print out sa ho ka chhep fel pah mawlh mawlh bawk.

A rawn tho a, a rawn en a, ka paper dah ho nen kan hnawk nuaih mai,

“In va lo buai awm ve” Zorina aw hian a rawn ti thuta, hmanhmawh zeta hawi chhuah ka tum chu Moses a lo kun hniam leh chiah nen kan in tauh chawrh mai,ka tum loh tawpin ka te that bawk.

“A na em?” tih pahin ka chal a rawn tuaia, ka lu ka thing a, ka nuih a zat rualin a na ka hre vang vang thung.

Moses-a a kalsawna, Zorina lam ka hawi ta chauh, a hmel a dik miah lo, a in petruh fun bawk.

“Ka thil lo thawn che kha i Print out em?” min rawn en pahin a ti hmuka, zinga min duat hmel taka min rawn be tu kha chu a ni leh ta miah lo.Engemaw dik lo awm le?

“Aw, zo e..i en duh nghal chuan ka lo la dawn mi?” zangkhai thei ang ber hian ka ti a.

“Aw, ka en duh vang ania ka lo thawn che,Hlui Coffee min lo chah sak lawk mai “ a ti zui zat bawk, Room lam a pana, Meeting Room lo lam Corridor ang deuh zimte awmah chuan a Room a awma, a awm loh lai kha chuan Moses-a zawk a thu fo thung.Tu Room zawk nge ka hrethiam chiah lo.Ka hmuh dan chuan Moses- a ai chuan Zorina hian thu a nei zawka, Staff te pawn an hlau zawk.

Roomah ka zui lut a, ka hnungah Moses-a a rawn kal ve nghal bawk,a Jacket a phelha, a chair hnungah a banga,a bag pawh Dawhkanah a dah bawk.

“Khawi?” tih pahin a kut a rawn phar chhuaka.Nelawmna pakhatmah a nei lo,hnathawk te biak dan tur bakin min be lo.Hei hi Office a ni tih ka hre tehmeuh mai, mahse, tlema ngaihsak ka lo phut hi ka dik bik chuang hauh lo.

“Moses,ka be duh che nia..i kal thei aw” min en loin a ti a, Moses-a hnar tum dat ri ka hre zui zat bawk, ka melh zawka, a hmelah nuihzatna a lang thei a, enge nuih zat tur a lo hmuh bik pawh ka hre lo.

Nilengin buai tih piah lamin kan tluan ta thak, inleng kan nei renga, Zorina hmu duh an ni deuh zel bawk.Sana ka en zauha, dar 5 leh a chanve a pel tawha, ni a rei leh tan tawh bawk nen khua a la thim lutuk vak lo.Tlai khaw hnuah Meeting an nei a, ka awmve ngai lo mahse an ban hma chuan ka hawsan thei lo.Nidang a ka hmuh tawh pahnih an lo kal leh a, hmeichhia kha chu a lo kal ta lo,Mipa pahnih an lo kal belh bawk,hna tul zualpui kan zo hman titih a, naktukah site lamah kal kan ngaih dawn avangin ken tur zawng zawng ka peih fel vek tawh bawk.

Darkar khat deuhthaw ka nghak leh a, Hlui lah tihtur a neih avangin ka kal tir tawh bawk nen keimahin ka thu a, ka Phoneah games ka khel kual vel mai mai,Meeting Room a ri raka, ka thaw huai mai, a tawp a tawpah chuan an zo ve ta nge nge e.Min rawn be luam hlawma, Moses-an a rawn thlah hlawma, Zorina a lo chhuak ve lo thung.

“Nanun..ka rualin i lo kal ve dawn nge?” Moses-an a bag lak pahin a ti a, vawiin chu a awm nileng ve ta thak.

“Aih, i tan kual a buaithlak mai mai, engmah zan lamah tihtur ka nei chuang lo a ka hmanhmawh lo..”

“Ok,i tih te chuan...oh..nang maw?” ka hawi chhuak vat a, ka tum loh lutuk ka hmuh takah chuan ka meng phawk vak bawk,ka mawl hmel ngawt ang.

“Mi pawimawh in min koh chuan lo kal loh theih pawh a ni lo..”a nui var var mai, Confi zet hian a rawn pen lut a, a nalh leh thlarh mai.

“I lo thleng maw?” Zorina a rawn chhuak a,Noel-i a en a, min en lo hrim hrim..

“Um, in meeting in zawh hman vel ka ringa, ka ringdik in ka hria..” nui chung hian a en a, atthlak zetin ka chhungril a na nghal vang vang bawk.

“Nia, ka hman alawm, Mos...kan kal hmasa dawn ania..” a ti vut a, Roomah a lut leh a, a bag a rawn a chhuaka,engmah sawi ve tur ka hre lo.A ruala haw ka beisei hauh lo,mahse, hetiang hi chu ka beisei dan a ni chuang lo.

“Eee, lawk..Nanuni hi i drop nghal mai dawn mi a tlai tawh sia” a ti leh a, ka haw hluah hluah,nizan kha chuan amah ah ka innghata, a sawi engkim kha ka lem duak duak bawk, tunah chuan ka haw hluah hluah.

“Aih, angai lo..ka thianpain min rawn lam dawna..Ka lawm e, kal rawh u” ka aw a dam thlapa, ka beisei aiin a pangngai zawk bawk.