EVERGLOW-15

Chapter- 15

Min rawn melh zawka, engmah sawi loin a bu nghuta, Noel-i a en a.”Kal ila” a ti supa,atthlak zet hian ka na nghal vang vang mai, nizan khan engkim kha a hre lawk anga, amah a mualpho zau loh nan engkim a ruahman lawk ang tih engtin nge ka lo hriatthiam loh theih? Hmeichhia hi zawng kan lo mawl em mai, bumna ngaiah vawi thum emaw a aia tam pawh hi kan duh zawng te an nih phawt chuan kan lo tlu nawn zel mai zawng anih hi.

“I tha em?” ka hmai bulah a kut rawn vai pahin Moses-an a rawn ti a, a awm ve tih pawh ka lo hre leh tawh pek lo,ka melh chho a, harsa ti ru zet hian ka nui lui sak bawk.”Tha e...ngatinge?” ka ti a, hahdam tak angin lan tum mah ila ka bum lem lo tih a mitmeng buang thak maiah chuan a hriattheih tho mai.

“I tha lem lo niin ka lo hre ve ngawt a, engpawh nise kal ila..” kawngkhar lamah a thle baka.Ka thianpain min rawn lam dawn ka tih kha a awih miah lo nge ka sawi a hre lo pawh ka hre nek lo.

“Kal rawh, ka rawn kalh fel ang” ka ti a, ka bag ka bana, tul miah lo in ka hai leh rih a, tu nge min rawn lam dawn tih a hriat kher ka duh lo,tuman min rawn lam dawn miah lo tih phei chu a hriat ka duh lo lehzual.

“Luhlul viau thin lo mai teh, Zorina i bum theih avang khan min bum ve thei tihna a ni lo ania..” ka chil ka lem khalh ringawt.Muangchangin boruak ka hip lut a, Moses-a a ni emaw ni lo emaw ka tan chuan engmah danglam a awm chuang hleinem.

“Ka bum anga i lo ngai kha nangmah leh nangmah i inbum ve chiah anih chu” nui chungin ka en a, a chal a ti chuar zauh a, a dar a ti chhing uk bawk.

“Ok, anih chuan engpawh nise kal phawt ang..Kan tlai mai mai” teh talh chuan..

“Kal rawh ka tia lawm,ka lo kalh fel ang”

“Tak tak?” a nui a, kal tum awm pawn a awm chuang lo.Ka haw deuh lek lek mai.Ka Phone ka la kanga, Joe-a msg ka thawna, enge a tih ka hre lo,a hman phawt chuan a lo kal ngei ang tih ka chiang.

“Um, tak tak..Joe-a kha i hria ni lawmni?” ka ti ve ngawt, a bu nghat a.

“Hria e,ka cousin te nen an inkawm thin a..chuan, thil pakhat...” min rawn hnaih a, ka tawlh deuh dawrh thung,hahthlak hian a..Za lo zet hian a nui a, hlau niawm taka ka tawlhsawn kher chhan ka hre hauh lo,mahse, ka tih loh tawp tur ka ti tih erawh ka chiang.

“Ka ei dawn che maw i ti mi?” a aw ngaihthlak a nuam chiah lo.

“Aih., ni lo..chu lam pawh a ni chiah lo..” ka ti buh nak mai.

“Yeap, a tha lawm.Ka sawi tum tak zawk chu,hei hi..” a rawn kun hnai thuta, ka sam a rawn khawih a,ka sam a pawta, thil tang niawm tak hian a sak talh lehnghal.

“Moses, i la kal na nge?” Zorina aw hian a rawn ti a, rang lutuk hian Moses-a a hawi chhuaka,kei pawh ka hawi chhuak vat bawk.

“La kal lo deuh,ngatinge i lo let leh a?” ka hmaah thing ther niawm tak hi a rawn daha, hei ngei hi anih hi ka sam atanga lak a lo tum ni.

“Ka lo let thei lo tihna mi?” za miah lo hian a nui zui hawk bawk,ka melh kar mai, a khawsak dan chuan min barakhaih ti ila ka sawi sual lo ang.Enge a huat hriat si lohin a lo kal tirh atang khan a mood a fuh lo tluan zaka,min biak pawn staff satliah biakin min bia a,tlaiah lah Noel-i a lo lang zui leh a..Tunah a lo let leh a, a hma ai mah khan a mood a fuh lo zual lehnghal..

“No, chutiang sawi ka tum lo tih i hria lawm..” Moses-a aw pawh a nelawm bik miah loh.

“A tha anih chu,ka thil pawimawh ka theihnghilh a,a dang lo let na chhan tur ka nei hleinem” a ti leh hluka, a tawngkam chuan min khei zak mai,nia..Lo let na chhan tur a nei miah lo, ka awm avanga lo let tura ka lo ngai anih phei chuan ka mawl let der a ni hial ang chu.

A roomah a lut a, rei vak loah a rawn let leh a, engmah sawi lo in a chhuak leh nghal chu a ni mai, engtin nge hetiang khawpa mize in ang lo hi an inkawm tlat theih ka man hlawl lo.Engmah sawi loin kan thu ren rawna, tawng zawk nih kan chak lo ve ve anih hmel.Nidang ang lo takin Moses-a pawh a ngawi ve ngur mai.Vanneihthlak zetin ka phone a ri ta hlauh,ka en vat a, Joe-a a lo ni a,ka thaw huai mai.

“Hello..”

“Khawnge i awm si a? kawngah min lo nghak ta che” a rawn ti lawng lawnga, ka nui sak ringawt.A lo kal dawn leh dawn loh engmah a rawn sawi lo a, mahse, a lo thleng der, ka msg thawnna kha a lo berah minute 10 vel chauh a lo ni bawk.

“Yes, ka lo chhuk nghal...” ka off a, Moses-a lam ka hawi a,ngaihtuah muk hmel zet hian a hmui a pet a, hmalamah hmuhnawm a awm emaw tih mai tur hian a melh vung vung bawk.Ka aw ka thian zauha, a rawn hawi vat bawk,ka thaw huai mai, ka be hreh ve tlat tun tum chu.

“Kan kal thei mi?” a rawn ti a, a aw erawh engmah thinrimna lam a lang lo.

“Um, a lo thleng a,kal ila..” ka ti a, ka bag ka khaia, ka awmna bula Switch ka off a.Room chanve a thim nghal khap bawk.

“Kal ila,Joe-a maw lo kal ?” a ti leh a, anih thu ka hrilh a, ka kal hmasa a,ka chhuak tur chu ka banrekah a rawn man leh thut a,ka phu zawk bawk.

“Enge? Ngatinge a?” mak ti zet hian ka en a, veranda light zawkin a chhun a, a hmel a lang dam thlap mai.

“Zorina hi ka hrechiang a,a duh che tih pawh ka hria,engtin nge i ngaih ka hre duh tlat” ka ang pham mai.

“Aaaaa, chutiang lam chu ...ni lo e, sawi loh ka duh zawk” ka kut a vawnna ka thingthla a.

“Engkim ka hria ka tih chuan ka sawi sual mai thei a, mahse,ka hriat loh hi a tlem ania,Zorina hi nangmah chhan nan tunah hian a buai em em tih hria la ka duh, mahse, kei leh zel min thik hi a hahthlak anih hi a” za vak loin a nui hak bawk. Ka hrawk a ro halh mai.

“Engkim i hriat chuan kan pahnih inkar leh kan buaina te hi i hria em?”

“Ka hria ti ta ila?” a nui leh a.

“Ka rilru a buai rih,ka kal phawt ang, naktukah kan sawi zawk dawn nia” ka lu ka thing nawk bawk.Ka mimal buainaah lo inrawlh lo tura hrilh ka duh a, mahse, mak takin ka thei tlat lo.

“Ni lo e, engmah sawi zawm angai hleinem,nangpawn i duh a, mahse,in pahnih hian in induhtawk lutuka, in buai anih hi..Mahse, thil pakhat, Noel-i hi a namai lo ania,i der dep viau anih chuan nui chungin a rap hrual ang che, i lan dan zahawm leh mahni inringtawk tak hi i nihna tak tak anih erawh chuan i hnung lam atangin a bei ang che..i inven angai hle ang..” teh duah a..Mahse, a sawi zawng zawng kha a dik vek ang tih ka ka chhungril hian a pawm thlap thung.

“Ka lawm e..” engvanga lawmthu sawi nge ka nih ka inhre lo, mahse, Moses-an engkim a hria tih a sawi takah chuan ka thawl hawk tih erawh ka hria.

Joe-a a lo ding vang a, chhuk har min ti anih hmel, a tum deuh vuau bawk,Moses-a motor dahna lam pan a kal chu a en zui vang vang mai, kei pawn tlem chuan mak ka ti deuh, Moses-a nen an inhre tho sia, a be miah lo kha mak ka ti ve tho mai.

In ka thlen in a lo la thim vek, Joe-a lo chho ve loin an In lamah a chhuk leh rih a,Mama a lo la haw lo, kei aiin a haw hma ziah sia tlem chuan mak ka ti deuh, engmah chanchin min hrilh si lo, mahse, nizan kan boruak te avang pawh khan ka bulah a awm chak lo pawh a nimahna le.

Eirawng ka bawl chawp leh a, Mama msg ka thawna, a reply lo.A buai anih loh pawn a reply peih lo pawh a nimahna.Ka siam zawh vek hnuah ka call ta nge nge,Banga sana intar lam ka en a, dar 9 a ri dawn tawh,a lungawilo anih pawhin a ni em em tawh lo.Ka ngaihtuah ang tih tal a hre tur a ni a, min hua pawh nise a u ka nihna a bo chuang hek lo.Vawi 4 ka call hnuah a pick ta hram, ka thin a rim hlur tawh.

“Khawnge i awm?” vin vak lo tuirn ka insum nasa lam mah a ni e.

“Ka lo haw lo ang, ka thianpa te Inah ka riak dawn” teh tawp a.Ka kut ka humruh a, ka hmui ka pet fan fan bawk,ka thinrim vanga ka vin vak emaw tawngkam engemaw zeuh ka hmang anih chuan kan inzawmna a chat thei hial ang.Ka luhlul zia an sawi thin a, kei ai pawn ka nau hi a la luhlul zawk miau a.

“Pawimawh a awm ami?” dam thlap hian ka ti a.

“Aw, Zuala ania, apa a dam tha vak lo a.” tlem chuan min chhan na a zia ta deuh.Zuala hi a College kalpui thin a ni a, an inkawmngeih viau a, kan Inah pawh a lo kal zauh zauh,a Pa a dam lo tih ka hre hauh lo thung.Mahse kan veng a in ang lo a, ka lo hre lo hi thil mak a ni chuang lo.

“Ok, anih chu..Zingah tal lo haw la..” ka ti leh hram.

“Ka hre lo,ka buai lawk..” a off zui nghal daih, tul lo zet hian ka biang a rawn lum papa,thinrim zet hian ka mit ka hru tawk bawk.Tah emaw rilru no zawnga thil ka thlir hian engmah tangkaina a nei lo.Ka lo tih tawh te kha a dik lo ngei, mahse, amah vanga ti ka ni tih hi a hriat thiam duh tak tak hunah chuan a la tha leh vek mai ang.A hnu leh zela kan khawsak dan erawh kha chu a dik lo lehzual nangin ka mimal nun a nih tlat avangin min dem mahse min sawisel chiam lo ang tih pawh ka hria.Keipawn ka theih tawpin enkawl mah ila Nutei nen an inkarah engmah ka sawi sak ngai lo.A lutuk anih loh chuan a mimal nun a ni a, lo inrawlh chiam ka tum lo.Kan mimal nun kan inzahsak avang hian ka thil lo tih tawh te kha a dik tihna erawh a ni hauh lo thung.

Keimahin chaw ka ei a, ka ei mang lo tluk a ni,ka ril a tam tehreng nen ka ei hlei thei der lo.Thil kal tawh ka ngaihtuah a, a sawt tawh lo tih hre mahila ngaihtuah ka bansan ngawt thei lo.Bakah engtin nge ka chanchin kha Mama khan a lo hriat ka hre lo,nizan kha chuan ka ngaihtuah ve zawka, mahse, thildang lamin ka rilru a luah hneh lutuka ka lo ngaihtuah zawm leh tawh lo.Zorina khan Mama hnenah khan a pe tu hria niawm tak khan a tawnga, Zorina ka biak angai..Mahse,Noel-i nen an chhuak dun a, engtin nge ka tih chuan ang?

Joe-a a lo chho dawn emaw ka ti a, a lo chho leh ta miah lo, Tv hmu miah loin ka melh reng a, engmah mumalin ka ngaihtuah thei der lo lehnghal.Ka Phone a rawn ri thuta, ka phu nasa lutuka, ka thu mar zawk mai, min lo hmu tu chu awmse mawl hmel min ti khawp ang.Ka en vat a, Number ringawt..

“Hello...” a reh vang vang.Ka ti nawn leh a, awmzia a awm chuang lo.Nimina min lo call tu kha ka rilruah a lo awm zawka, kha nen khan a number a in ang maithei..Ka call log ka enthla dan dana,engmah a awm lo.A number ngai bawk details ka en a, nimina min lo call na a lo lang ta chiah, tu tak ni ang maw? Nimin kha chuan tihsual palh anih kha ka ring a, tunah chuan a nih hmel ta miah lo mai.Mahse, tu nge ni ta ang? Ngaihbel tur eih pawh ka hre lo.

Ka Phone ri bawkin min ti harh leh a,ka thutna ngaiah ka lo muhil pek,meng mang lo hian ka ban a,”Hello..” ka ti a,mit nuai nawk nawk chungin Sana lam ka en a, dar 1 a ri tep.

“Kawngka lo haw teh..” Zorina aw thhawp sut ka hriat rualin ka meng kawk mai.Ka thu mar vat a,tun ang hunah enge a lo tih ang? A awm lo lu lai lutuk.

“A tlai tawh em mai, ka mu tawh a”

“Min hnial suh..Kawngkhar hi ka chhir chhiat i duh loh chuan lo hawng rawh” ka phone ka la sawna, Kawngkhar lam ka en a, ka rilru a buai map mai, a ti leh duh tak tak mai ang tih ka hria.

“Kal bo mai teh a, mi ina kal hun a ni lo em mai” nelawm vak lo hian ka ti lui veleh hlaka,a rum hawk ri ka zui zat bawk.,

“Lo hawng rawh” ka chhan let hmain a off zui daih bawk, tho mai loin ka thutna ngaiah ka thu lui ren rawna, ka hawng dawn nge a kalsawn ka nghak zawk dawn ka hrethiam lo.

Na zet hian kawngkhar a rawn ri bur a, ka kang leh nghal awk mai,Ka tho tham tham a,Kawngkhar bulah ka ding ren rawna, ka hawng lo anih chuan tuna a rawn tih aia nasa khan a ti dawn tih a chiang reng tawh, ZORINA  ni miau a,thil mak a ni lo, mahse, chuti anih chuan kan Colony pumpui in an hre vek ang tih a lang reng, ka pi leh pu tih loh te hi chuan min kalpel vel mai mai a, engemaw changa min mamawh anih loh chuan an nau te leh an fa te ang pawn min en meuh lo.Mi bulah lah ka Nutei hian kan chanchin sawi nuam a ti em em zui bawk.Engvang hrepin nge maw Gate ka lo zuk kalh loh tehreng ni?? Ka inhau ru mawlh mawlh a, awmzia erawh a awm lem hlei lo a.

A rawn ri leh dawta, a hma ai chuan a ri a ring ta lo,tihngaihna dang a awm lo, ka hawng ta nge nge, mahse, enge thleng hi? Kawngkhar ka hawn rual deuhthawin min rawn kuaha, a rawn tlu lut titih..

“Hey, ngatinge?”

“Khar rawh, kalh nghal la..” zawi sup hian a ti a, ka darah a khabe a nghata, a zawi hnuang mai.A rui ti dawn ila eng rim mah a nam si lo.Thei leh thei lo hian kan hnaih bera Sofa lam ka pan pui a, kan inlen hleih bawk nen rit tak a ni ringawt.A thu thla hnawka, ka let leh a, kawngkhar ka khar a, ka kalh zui nghal a, hmanhmawh zet hian ka pan leh a.

“Ngatinge a?” tih pahin ka thu hniam leh a, a luah ka zuk khawiha, a tukkum lamah ka vuan chiah chu thil huh deuh hi ka khawih fuh a, rang zet hian ka kut ka la chhuak a, ka en a, a sen vek..Ka tum loh tawpin ka rak that mai.Enge thil awmzia ka man hlawl lo.

“Zorin, harh teh..ngatinge a?” mangang lutuk hian ka ti a, ka kutah a rawn vuana.

“Moses-a leh Philipa an lo thleng tep ang..mi kut ka tuar anih hi..” zawi sup hian a ti a, harsa tih hmel zet hian a then lui suk bawk.

“Mahse, ngatinge? Tu te nge ni ang?” ka ti bah nawk nawk mai.

“Zawhna min zawt teuh lo teh, ka chau ania” a nui lui leh suk a.Ka thaw hak mai.A hmelpa leh hriam hraih maiah chuan na tuar tih a lang thei a, a sam dum hlap pawh a chhip a hnawk ve deu niaih bawk.

“Damdawiinah kal ang” tih leh thawh ka ruala, mahse, ka thawh fel hmain min pawt thu leh hnawka, ka bawh deuh rawk bawk.

“Philipa a lo kal dawn ka tih kha, tunah chuan Damdawiin lam ai chuan ka mamawh zawk che”  a ti leh a, a aw a tham tuak a, a zawi hle bawk, min rawn kuaha, delh nat belh ka hlauh avangin ka tang teuh thung.

Rei vaklo hnuah ka phoneah Moses-an a rawn phone a, Zorina sawi ang tak takin Philipa nen an lo thlen thu min rawn hrilh a, engkim mai hi a thleng thut a, engmah sawifiah na ka hmu bawk si lo, ka mumang emaw ka ti rum rum mai.

Philipa a tih hi CAKEWALKERS a ka awm lai khan ka hmu tawha, Ortho Doctor tha leh lar tan mek a ni a, Zorina te nen hian an inkawm nasa viau tih ka hre bawk, mahse, ka nel lem lo a, ka be ngai hek lo.A enkual nghal zung zung a, Zorina’n a na tuar thup tum taka a then leh nawk thin chu ka en hleithei lo,ka lo inhumruh a,ka tang teuh reng bawk.Tuilum leh thildang an mamawh apiang ka lo lalsak a, Moses-a  ka en a, a lo thlen tirha a tawng bak kha engmah a la sawi lo, Zorina a melh deuh renga, a hmelah thinrimna thup nei a ang viau.Enge an buaina hi hriat ka duh hluah hluah, mahse, tumah han zawh chi an awm lo,a hun hek lo.

“Ka zo e” darkar khat deuhthaw a khawih hnuah a ti ta hram, ka lo thaw huai mai.A thi a reh thei mai lo a, thisen a hloh hnem deuh bawk nen a dang ve lap mai.

“Hospital lamah kal angai lo ami?” ka ti ta nge nge.

“Aih, ngai lo ang,a ruh lam a khawih lo in ka hria,a thisen chhuak ber kha a tawp chuan muhil vangg vang se a zia mai ang” a ti a.Ka thaw huai mai.

“Engtin nge niang? Zanin chu hetah a riak mai anga, Nanun, a pawi angem?”  ka lu ka thing a, a pawi leh pawi loh ka ngaihtuah duh rih lo, tunah chuan muhil rih se ka duh ber,khawiah mah phurh chhuah kual ka phal lo bur,nakinah ka inchhir leh anih pawhin a pawi lo zawk,hmeichhe easy leh rilru thlak awlsam tak angin lan phah dawn mah ila pawi ka ti lo.Kan Colony a mi ten hre mahse pawi ka ti tawh hek lo.

Moses-a te kal meuh chuan khawvar a hnai thuak tawh, Mama hnenah Zorina buaina tawh leh kan Inah a awm thu ka thawna, engemaw rilru dik lo a put belh ka duh lo,Philipa khan mu tam se a zia ang ati tho a, rilru hah lutuk na tur a awm lo in ka hre ve ngawt.Mahse, ngatinge kan Inah kher a lo kal erawh ka la man lo,Thil dang zawh ka tum zeta, ka thulh leh ta zawk, nakinah ka la hre em em ang, chhan tha tawk nei lo chuan tiang hian a ti lo ang tih ka chiang ve tawp.

Ka khumah a mu a, mu ve loin khum bulah Chair ka pawt hnaiah ka thu mu thung,a muhil hmel chu ka en a, a khabe ruh kual lian leh a mithmul buk tha zet te, a hnar sang vah mai leh a hmui chhah tap mai te chu a inhmeh hluah hluah,hahdam hmel takin a muhil a, a tukhum lam delh zawnga mu loin a sir zawngin a mu a, na nei pawh a ang vak lo.Mahse, a let a, a tukhum lam a delh apiangin rang zet hian a rawn let leh nghal zel a, chu chuan a thil tuar hi a na thawkhat ang tih a ti lang tho mai.Chhunah leh tlaiah kha chuan ka chunga a khawsak dan vang khan ka haw hman hial a, min bawl kual mai mai niin ka hre bawk.Mahse, tunah nikhat em pawh a liam hmain ka khumah a mu a, lainat na leh Duatna nen ka thlir leh ta thung, rilru nem leh inthlak zung zung, hneh awlsam em em ka ni ta tihna a ni hauh lo, ka thil tawn hian a zir lo a, khauh taka lo dawngsawng tur pawn kan awmdan khan a zir hek lo.Hmeichhe tam tak, an pasal te nen an inthen a, an let leh  mai thin te kha ka lo dem thin a, mahse, an chungril lo hriatpui loh chuan lo dem ngawt tur an ni hauh lo.Ka pasal em pawh a ni lo a, mi hriatah pawh ka bialpa ang pawn a la awm lo, chuti chung chuan ka thil tawn leh a tawrhna te avang hian mualpho ka huam leh zak tawh a, chutih rual erawh chuan he thil vang hi ni lo ta se hetiang maia awlsam hian ka khum erawh min tawmpui lo ang tih ka chiang thung.

Ka luah min rawn khawiha, rang fe hian ka hawi chhuak a,Khawvar hnuah khan ka mut a chhuak ta lutuk a,khum bawhin ka lo muhil a,ka en a. Lukham hian a lo in kam kanga, a hmel hmuh a nuam ta deuh.

“Morning...i tha em?” ka ti vata.

“Ka zia viau e,lo lawn ve la..” tih pahin a mutna sir a beng thuk a,ka lu ka thing nawk thung.

“I ril a tam em?” ka ti a, khum bula Lamp awm chu ka Off a, Curtain chhah zet kan zar bawk nen khua var vek tawh mahse a eng lutuk lo.

“Aih, lo mu phawt la..” a la ti ta fo.

“A tlai tawh em mai,inbuala, hna kal vat ka ngai dawna, bakah Mama a lo haw tep ka ring a..” ka riat nawi ta vel mai mai, nizan khan Mama khan pawi a tih thu leh Zuala pa that loh leh deuh avanga a lo haw dawn loh thu min rawn hrilh vek tawh tlat.

“I kal lo ang, vawiin chu tihian kan nileng mai ang chu”

“Engtikah nge i haw ang?” a sawi lam sawi zawm duh loin ka ti a.Min melh run bawk nen ka en let ngam lo.

“I lo kal ve dawn chuan engtik hunah pawh ka haw thei..”

“Ka lo kal lo ang tih i hria alawm”

“Aaah, hre hauh lo..Kha i mitmeng lian kel kawlah khan min Hmangaih tih ka hria alawm,nizan pawh khan i tap tep chu anih kha..” a nui hawka, min chhaih tih hre mahila ka hmai a sa hat hat tho. A sawi dik miau a.

“Lo lawn la...” amah bawkin a ti leh a, ka lawn ta nge nge..Min rawn kuaha, ka tang lehnghal teuh mai.

“Tu nge khawih che? Ngatinge?” ka ti sep a, ka kutzungtang karah a kut zungtang sei thlurh chu a rawn rawlh a.

“Hre lo la a tha zawk ang..” a aw a khauh fur mai.

“Ngatinge?” ka chhungrilah hlauhna a rawn lut zawka,Mama a lo mai angem? Ni lul lo e..

“Min en teh...” a ti leh sup a..Muangchang hian ka inher a, a mit takah ka en ta nge nge.

“Ka nei duh che ka tih kha ka ti tak tak,mahse, Moses-a nen in awmdan ka thik erawh ka dik lo thung,hetiang hian ka la awm ngai hek lo..Chuan, ka la hre chiang miah lo a, mahse,...” a ngawi leh rih a, ka thaw dep dep mai..Mama lam a sawi chhuak mai ang tih hlauhna in min fan raih raih bawk.Engmah sawi ve loin ka melh lui kar a,engpawh thleng se anih anga hmachhawn tawp mai a tha ber ang.

“Ka HMANGAIH che in ka hria..” harsa tih hmel zet hian a ti chhuak leh hrawiha,a mit a chhing zui nghal daih bawk.