EVERGLOW-16

Chapter- 16

Ka hresual emaw ka ti a, mahse, a hmel pa leh tak runah chuan engmah fiamthu na lam a lang eih lo.

“Ka hresual em?” ka ti chhuak thei hram.

“Aih,maithei..keipawn ka sawi kha ka chiang bik lo..” a nui zui suk bawk..Ka thaw hak a, reilote chhung chu ka hamhaih avangin ka khawng lah a, mahse, reilo te tak tak..Ka che thut a, a hmui chhah tap mai chu ka fawp ta nge nge.Engvanga fawp nge ka nih lam ka ngaihtuah lo,bumna a ni em ka hre hek lo.Mahse, ka duh chu ka chiang.Amah hi ka duh.

A hamhaih ve nge ka hre lo, reilote chu engtinmah a awm lo, min chhang hek lo..Mahse, ka inlahrang tur chiah chu ka tukhum samah a rawn thama, min rawn fawp let ve leh lawi, zei zet hian a lei a rawn ti che kuala, ka kawngah a ban lehlamin a kuah a, a bawp sei thlurh chuan min khan bet tlat bawk.Duhthawh zet hian min rawn fawp leh a, min dim lo lam lek lek zawk,mahse, pawi ka ti hauh lo.A inlakhran meuh chuan hah zet hian kan thaw dun hlawp hlawp mai..A awmah ka hmai ka phum a, a lungphu ri dat dat chuan min fana, engemaw ti tak hian nun a famkim ngawih ngawihin ka hre tlat bawk.

“Min en teh..” thuawih zet hian ka hawi chhuak ve mai bawk.

“Nimin khan Moses-a kha ka hnek chak zia i hre kher lo ang..Min chhaih kual tawh lo la a tha ang” a ti a, tehdaih chuan..

“Engtinmah ka chhaih miah lo che,hna kan lo en dun ringawt anih kha..” ka sawi zawh hmain a rawn kun hniam lehnghala, ka hmui a rawn khar zui nghal hmak bawk,mahse, kei hi hetianga awm tur ka ni lo..Rang zet hian ka inlahrang vat a, min rawn fawh leh a tum chu ka hawisan lui a, lungawilo zet hian a rum hawk bawk.

“Duhtawk ang, i lu kha..” ka kawr a rawn zen tur chu ka dang a, a mit a thim raih mai.

“A na lo...tak tak..”a kut a pawt dawka, ka kawr hak,T-shirt chhing lam deuh chu a rawn zen chho nghal a, ka bra a nawr tawm chho nghal tawk bawk..A kut zungtang sei thlurh leh lum ham ham chuan a rawn hum a,ka danglam nghal tih ka hria, ani pawn a hai hauh lo ang,ka hnute hmur a khawiha, a kutzungtangin a chep hrual a, ka tum loh tawpin ka rum chhuak nghal hawk bawk...Hetiang chuan ka tawp thei dawn hauh lo.In control ka ngai, min duh a min hmangaih a, min nei ngei dawn pawh nise hetiang chu a tha miah lo.Kan tih tawh kha atawk reng.

“Ngatinge?” tham tuak hian a ti a, a hmel phiar fat maiah chuan enge a duh ka hmu chiang mah mah.

“A tul lo..khawngaihin..”

“Um, i tih chuan le..” a then suk a, ka tukkhumah a rawn vuan leh a, a darah ka lu ka nghata, min tihluih tumna a nei miah lo.Ka kut a rawn vuan a, a pawt hniama, enge tih a tum ka hriat hman hmain a kap zawnah ka kut a daha,a mipatna ka sik takah chuan ka thaw halh mai,ka thinrim miah lo,ka khawngaih zawk, tiang khawp hian a inpeih a, mahse, ka duh loh miau avangin min nawr lui eih lo..

“Ka lawm e aw” zawitein ka ti sep a.A nui nghawr dat mai.

“Nia, lawmthusawi chu i ba e..a harsat zia i hrethiam lo zawk ang” zawi sup hian a ti a, ka ring thlap.

“Eitur ka va siam lawk ang, chuan,Moses-a hnenah ka kal dawn lo tih pawh ka hrilh angai ang” ka ti a, min kuahna ka phelhsak a.

“Keiman ka lo hrilh mai ang, bakah i kal a ring lo ang.Eitur chu siam lo mai rawh, Inah kan ei mai dawn nia” a tho tur ka pui vata, a ner nawk danah nat zawng a la na tih ka hre mai.Khum tlangah a thu a, a mutna hnawk deuh chu ka pawt mara, Khum ah ka awm ve tawh lo.

“In inah ka lo kal dawn hleinem..”ka en a.

“Oh, i kal dawn khawp..Driver ka ko a,a lo thleng tep ang” a ti a, engtiklaiin nge a lo koh ka hre lo.”I muthilh lai khan ka call tawh” ka rilru hria niawm tak hian a rawn ti leh a.

“Mama hi lo haw phawt se ka ti a..” a hmel danglam zawk chu ka hmu hman a, ka rilru a nuamlo lehnghal vek.

“I call mai dawnnia.,Bakah a lo haw ka ring chiah lo” min en loin a hawisawn daih bawk.

“A awm lo tih ka hrilh miah si lo che a, engemaw hriat i nei zawk em?”

“A awm lo tih i sawi angai nang, khatiang khawpa kan thawm a nat hnuah khan a lo tho miah lo anih chuan a awm lo tihna nimai,tak takin nizan khan ka hmu lawm..” ka thaw hak mai,ni lo hram tehse.

“Khawiah?” ka ti tawi tak.

“Zuala te inah mawle, ngatinge? A kalna a hrilh che a ti sia” ka ang pham mai, thil thlen dan hi ka duhdan a ni hlawl lo,Zorina kutthlak tu hi Mama a nih teh chuan ka nau pawh nise ka ngaidam thei kher lo ang, kut thawh hi ka lawm zawng a ni lo a, tawngkam a sawifel theih chhung chu sawifel mai a tha zawk,bakah in ring leh inring ah chuan Mama hian a hneh dawn lo tih ka chiang, a hnung lam atang bei tur khawp chuan ka nau hi a hniam lo a, a dawihzep lo ang.

“Oh..nia, hrilh e..i kal ve tih ka lo hre lo a..” ka ti nawi nak mai.

“Ka kalna tur min zawt miau lo a, biak pawh min be lo a,Moses-a nen...” a hmuiah ka kut ka dah a,midang a thik hian nuam ka ti tih ka hai lo, mahse Moses-a kher chu ni lo e.

“Khatiang zawngin Moses-a sawi tawh suh, i tan ani aia thian tha an awm lo ania” ka kut a rawn vuana, a fawp zauh bawk.

“Ok,ka sawi tawh lo ang, mahse,ka thik tih i hria a,a lehpek ka duh lo ania” a la ti ta fo.Ka nui ta ngawt, ka thikthu a chhe ve hle emaw ka lo ti a, kei ai pawn a thikthu a la chhe zawk fe mai.

“Noel-i nen hian engchen nge min kawp ang?” ka insum hman lo.

“Kawp...oh..ni lul lo e, ani nen chuan Sumdawnna lamah chauh kan inzawm.Thil thenkhat hi then hran mai rem lo a awm tlata,Kawp tih kha chu a tel lo”

“Ka duh lo ti ta ila...?”

“I duh loh chuan tihluih che ka duh lo ang ka ring, mahse, vawilehkhatah a tawp thut thei lo tih i hriat erawh angai ang”

“Nia, ka sawi lo ah ngai la” ka ti nghata, ka tum loh tawpin ka awah titau aw a lang tel bawk.A nui suk a, ka kalsawn tur chu ka kawngah a rawn kuah leh a, ka hnute inkarah a hmai a rawn phum a.

“A chang hi chuan tianga hmuh che hi ka chak thin, ti tau la, thlem che ila..chu chu tunah ka hmu a, ka lo beisei aia nasa zawkin a la hmuhnawm bawka”  a sam ka khawih a, engmah sawi ve tur ka hre lo.Kan inhriat atang khan kum pawh a la tling lo, mahse, kan inzawmna hi a mak a, a danglam a, tumah hetianga inzawmna mak nei hi an awm ve ka ring lo,thawnthuah te chuan a lo awm mahna le.

Driver lo thlen veleh a In a kal turin kan chhuak zui a, ka thawmhnaw dang engmah ka keng lem lo, inthlak loin ka hak lai ka ha a, Slipper ka bun a, Sling bag ka ak tawp bawk.A Driverin a kuah thla a,Stepah khan Nutei nen kan intawk a, mak ti hmel a pu nangin engmah min zawt lo.Engmah min zawt lo kha keiin mak ka ti let mah zawk.

In kan thlen chuan ka la hmuh ngai loh hmeichhe pakhat hi a lo awm a, a naupan hmel vak tawh loh,Apron a ha a, a kut bal deuh liam nen chuan a nula awmpui a ni ang tih ka rin hriat thei mai.Noel-i ka rilruah a lo lang zawka, ka bulah khan a enkawl tur thu kha a sawia, a sawi ang kha a ni lo tih Zorina khan min hrilh mahse ka rilru a nuam chiah chuang lo.Engemaw thil lo thleng thut tur awm ang mai hian ka tang ru teuh a, keimah leh keimah ka in hau ru thul.Awmzia erawh a awm tam lo ngang mai.

“Zoi,eitur min lo siam la, midang an lo kal em?” a ti a,min rawn en a.”Chho ila..” a ti a, Zoi a tih chu ka melh zawka, nuam ka ti chiah lo,ka vawikhat hmuhna ania,chumai bakah Roomah kan chho dun dawn bawk nen nuam ka ti lo.Awmpui satliah emaw Cook pawh nise mihring vek anni miau a.

Ka darah a rawn vuana, kal mai loh chu tihtur a awm lo,stepah kan chho duna, ka darah a kuah a,min rinchhan deuh hian a kal bawk.Ka vawikhat kalna a ni lo bawka, ka mikhual lutuk lo thung,a room pawh a lo sawn hman anih loh chuan ka hre sa a, hre satliah pawh ni loin a khum tawmin zanhnih ngawt ka riak ve zawk.A darin a nek hawnga, engmah danglam a awm lo.

“Inbual ka duh..”khuma thut thlak pahin a ti a.

“I pem kha inbualpui chi a nih ka va ring lo” ka ti ve thung.

“Keimahin ka inbual ang ka tih awm ka lo hre miah lo..” ka en vata, a mit a siai zauh bawk.Ka biang sa hat hatah chuan inhmu thei ila chuan ka biang a sen nasa hle ang tih ka hria.

“Thil ei phawt la..”

“Um,nangpawn i ei ang chu..mahse, intihfai hmasak ka duh” a ti a, Khum tlangah a thu a,a kawr a phelh tur chu puih tur nge puih loh tur tih ka ngaihtuaha,a then leh nawk ka hmuh rualin ka ban vata, a kap karah ka dinga,a lu atanga a pawt chhuak tur chu ka chelh bet a, a na lai Philipa khan a tuam vek a, a bel chhah deuh bawk nen a harsa viau mai.

“Bathroom a darthlalang chhungah khan Bakcheh a awm ang, chep tet mai teh”  hul huk hian a ti hluk a. Rang zet hian Bathroom ka pana, a bath room hi Toilet nen a inkawp tho nangin a hranin Toilet hian kawngkhar a nei leh a, a fai in a thianghlim sar mai.Ka pawt hawnga, a sawi ang ngeiin Bakcheh pathum lai a lo awma, a lian ber ka la chhuaka,ka let leh vata, ka kalsan dan ngai in a lo la thu a, engmah a lo tihzawm loh danah a na tih a hriattheih a, Philipa koh leh ngei ngei angai ang.

A nghawng hnung lamah ka chep a,nizan khan phelhsak nachang ka lo hre miah lo pek a, thisen a lo kai nual mai,ka hamhaih buai vel khan a kawr pawh ka thlaksak lo.Bakah kan thawmhnaw a ha tawk dawn lo hrim hrim.

“Philipa lo kal se a tha lo maw? A nih loh pawn Damdawiinah kal ila a tha ang” ka thil tih lai tih zawm pahin ka ti a.

“Philipa a lo kal ang,bakah a na vak lo ka tih kha..” teh talh zel a.

“A that chu, ngatinge Damdawiin kal pawh chu i hreh viau mai le?” ka ti hlaka, a nui hak thung,mahse nuihzat vanga nui a ang lem lo.

“Syringe ka hlau ti ta ila?” ka nui ve ta thung.

“Hlauh zawng a in ang lo ania aw” amah bawkin a ti leh a, ka nui nasa zual sauh thung, a inhmeh hlawl lo.”Ka hria alawm, mahse., i inhmeh lo em mai” ka nui leh a...Ka kawngah a rawn kuaha, a mah hnaih zetin min pawta, ka kawr hak a pan bawk nen engmah a inbel si lo,a taksa lumna chuan min rawn ur a, ka chhungril a fan raih raih mai.

“Inneih vat kan ngai dawn ania” a aw a dik lo..

“Chutiang ngawta awlsam a ni lo tih  i hria lawm”

“Aih, hre miah lo, nupui ka neih  khan nei tur a thutlukna siam turin kum 3 lai ka mamawh a, mahse, tunah chuan thla tlemte bak ka mamawh miah lo, ka rilru ka siam fel vek tawh,bakah engmah tih i phal tawh bawk si lo..” a thaw lum ham ham chuan min fan nawn leh rawih rawih a,a bula ka awma ka danglam ang hian Hriata bulah khan ka danglam ngai miah lo.Mipa, kan hmuh zawnga kan danglamna thlen thei leh min khawih apianga insumna min hlohtir vek thei hi chu Lehkhabu emaw mumang lamah lo chuan an awm ka lo ring ngai lo, mahse, a lo awm tlat lawi chu nih hi!!

“Ka tan pasal neih harsat tur zia hi i ngaihtuah ngai em?”

“Aih..” teh tawp a.

“Ka nau te hi an mahni a in enkawl thei an la ni lo,Nautei a la zir zo lo a, Mama lah tunah hna a thawk veleh tan chauh bawk,keimah ber ka awm lo anih si chuan tuman an enkawl dawn lo a, Mama ka enkawl vanga ka pawisa ba pawh ka la rul zo lo a..aaa..ka tan chuan pasal neih hi thil theih loh tluk vel a ni” beidawng zet hian ka thaw hak bawk.

“Min en teh..” a ti a, ka melh chhuk a, a mit thim raihah chuan engmah a tihtum leh sawi tur awm ka hrethiam bau lo.Mahse, thuawih zetin ka en ve ngar tho.

“Min ring em?” chhan mai dan tur ka hre lo.

“Min ring la ka duh,i ngaihtuahna kha a awm lo ka ti lo a,ngaihtuah suh ka ti lo, mahse, keimah min ring la..engkim ka tihsak ang che ka ti lo,ka theih ang zawng zawng ka pe ang che..”a ti leh a ,rin ka duh zia hi a hrethiam lo zawk ang.Mahse, a mize thlak danglam thut thut te avang ngawt pawh hian min duh tih pawh hi ka ringngam tak tak dawn em pawh ka la hre chiang ngam lo a, tunah nei ta ngawt ila enge thleng ang? Ka lu ka thing ta ngawt.

“Ka lo ngaihtuah ang..mahse,ih...i mize thlak danglam thut thin te avang hian ka ringngam lo che a, chuan,a chang chuan min duh a, min mamawh angin i awma, a changin min hre lo ang hmakin i awm leh thin bawk si, tunah pawh hian kan awmdan hian engchen nge a daih ang ka ngaihtuah ngam lo zawk” ka ti ta nge nge.Ka sawi chhuah takah chuan ka thawl hawk mai.

“I sawi dik ang, nangmah vang hian ka inthlak danglam dawrh chu ka ti hauh lo,mahse, ka Mood dik lo thut leh danglam hi chu nangmah vang a ni tho” a ti nghut a, za lo zet hian a nui lui hak bawk.

“Keimah vang maw?” ka awih loh zia ka awah a lang thei.

“Um, ka ta chauh ni la ka duh laiin midang nen ka hmu dun che u a, min ngaipawimawh lo tih i ti lang fo bawk,kha khan ka induhtawkna a ti che pha tlat a”

“Chapo lutuk mai..” ka ti hlak a, ka chhungrilah erawh a hlim veng veng thung.Keimah vanga inthlakdanglam Mipa, chutah pawh ka mumangah pawh ka lo la hmuh phak loh ZORINA  a la ni zui.

“Aaahh, chapo chu kei ni loin nangmah zawk” na vak lo hian a samah ka tham a,ka kuna,a samah ka fawp zui vang vang bawk.Nula naupang ka ni tawh lo, pasal nei rual zet ka ni tawha,a hun lutuk mah mah tawh zawk, Mipa huatna nen hun ka hman laiin Zorina ka tawnga, kan inzawm atangin ka nun hi hlimna vekin ka hmang bik lo, mahse, ka hlimna tawn tawh te apiang kha ka nunna ka hun tawn nuam ber a ni vek lawi si.Tunah pawh a bulah ka awma, a Inah ka kal bawk.Hmeichhe tih tur ni lo a ka lo hriat thin kha ka ti ta vek.Ka nun hi a inthlak hlawk ka ti lo, a chanve erawh he pa ka Hmangaih na hian a thlak danglam ngei e.Ka duh ngawt lo, ka Hmangaih..haider talh tur ka ni lo.A hriat erawh ka duh ngai lo ang.

“Inbual la..” ka ti a, ka kawng a kuahna ka phelhsaka.

“Um, mahse, puih ka ngai dawn tak tak ania” a ti a, ka hnial lo,ka bu nghauh ringawt.Bath Roomah ka zui lut a, a lu ka suk pui a, a pem lai ti huh lo thei ang ber turin a hnai deuh lai chu ka hruksak ringawt.

“A dang kha chu i ti thei ang tiraw?” ka ti a, a Boxer phelh tumin a kekawr kawng a vuana, ka hawi sawn daih bawk.

“Um, i awm ve loh a tha zawk ang, thil thleng tur i hria lawm” hul huk hian a ti a, ka bu leh nghat a, hawi let loin ka chhuak zui nghal mai bawk.Ruaka a awm lai kha ka hmuh vawikhatna tur ni lo mahse nuam ka ti lo.Ngaiah ka nei thei der lo.

Nilengin ka awm a, haw tlaiah Moses-a leh Phlipa bawk an lo kal leh a,an lo thlen laiin khuman kan lo mu dun a, Zorina a muhil a, keiin Tv ka en thung,kan awmdan min hmuh vanga mak an ti anih pawhin an hmelah engmah an ti lang lo, Philip-an  a en leh a, thil tha lo zawk a lo awm leh palh hlauin ka lo thaw dep dep thung.Vanneihthlak takin engmah thil tha lo a awm lo hlauh.

Zanah ka hawsan ta chauh,Moses-a leh Philipa pawn chaw an ei ve nghala, a dam tha lo hle chungin hna lam an sawi ho leh ta tho.Moses-a te rualin ka haw a, In ka thlen chuan Mama a lo haw tawh, a hmelah engmah a lang lo a, Joe-a a lo awm tel ve bawka, an pahnihin tui zetin Futsal chungchang an lo sawi dun a,ka thawm an hriat rualin an rawn hawi dun vat  bawk.

“Ka rawn call tep che a, enge a an a?” a aw a zangkhai vaha, nidang nen danglamna a awm lo.A hmel chik takin ka en a,dik lo engmah ka hmu chung lo.

Ka pan phei a, an thut lohna lamah ka thu thla hnak a, nizan ka mu tha lo a, vawiin lamah lah muthilh ka tum pawn ka thei lo a, engmah hahthak ka ti lo chungin ka chau tlat.

“A tha...Zuala pa zawk pawh chu enge a an a?”

“A tha animai, mahse, a daih rei tawh lo ang, hun i neih leh kan ve la” a ti awlsam leh mai,ka lo ringhlel a, ka hah thlawn mai mai anih hmel e.

“Nia, naktukah animai, ka mut a chhuak lutuk, Joe,ka mu mai dawn” ka ham zui bai bai bawk.

“Mu tak teh, i hmelah pawh chau hmel a lang ania” nui hau chung hian a ti a,ani hi chu inleng angah pawh ka ngai tawh lo.

Zorina accident atangin karkhat a liam leh tawha, amah pawh hna a rawn kal tan leh tawh, kan buai viau a, zin ngai ah erawh Moses-a a kal a, mak takin Zorina Accident kha tuman an hre lo nge an sawi miah lo, Hlui pawn min zawt lo a, Zomuani pawn min zawt chuang lo.

“Hello...” ka table a Landline awm lak kan pahin ka ti a, ka laptop lam ka melh ran bawk.

“Nanun..”Hmeichhe aw hian a rawn ti a, ka hriat ngai a ni lo.

“Aw, khawi atangin nge aw?”

“Zorina nu ka nia,Officeah ka lo kal mek a, biak che ka duh a” ka khawng deuh lah mai, enge min hmuh a duhna tur ka rin hriat thei mai bawk,kar liamta chhung khan nitin hna ka banah Zorina ka tlawh ziaha, Noel-i emaw Zoi ka atang pawn an hre ngei ang tih ka chiang.

“Eng thil nge ni ta?” ka ti ta tho.

“Ka lo thleng phawt ang,nih phawt” a off zui nghal hmak bawk.a fapa ang mai.

Reivak loah a lo thleng a, Zorina emaw Moses-a tal pawh awm se a zia tur.

“Mama room lamah hian nimai tehse, Hlui coffee min lo lak la” ka hmu tawha, ka hmuh thin ang bawk khan a nalh leh thlarh ,Puan a bih leh thlap bawk, Zomuani khan a sawi thina, a zin chhuak dawn anih loh chuan chhuah naah kekawr ha lo in Puan a bih ziah a ti reng a.A puan bih te lah hi a simple em em ziah bawk.

“Thu la..” Zorina chair a thut pahin a ti a.Amah ep zawnga chair awmah chuan ka thu a, ka tang ru teuh mai.

“Hna lam inbuai em?” a ti a,hna lam vanga lo kal anih ka ring hauh lo.

“Pangngai animai..”

“Mama hi a lo kal em?” a ti leh a, a mit lian meng lian leh zahawm zet chuan min melh reng bawk nen, ka tiril a khur dar dar mai.

“Aw, kal e” a aia seia chhan ka duh viau nangin sawi zawm tur ka hre lo.

“Ka sawi tum i lo hresa maithei,ka fa te mimal nunah hian ka inrawlh ngai miah lo,tunah pawh inrawlh ka tum chuang lo,ka sawi tum ber zawk chu i Nu leh ka pasal an inkawp hi i hriat ka ring a, i lo hre lo anih chuan tunah ka hrilh che a,Mama hriat hmain i nu lo bia la ka lawm khawp ang”

“Maw?!” a hma khan Moses-an min hrilh tawh, mahse, keima buaina nen ka lo hre leh tawh lo zawk.

“I hriat chian loh vanga min zawt nawn nge i nih a i ka hre ve mak i tih vang zawk?” a aw a dam hle nangin a hlauhawm dan a nep lo.Zah vang hian thih theih se ka thi chiang khawp ang.

“Ka...ka hre miah lo...ih..”sawi mai tur pawh ka hre lo..

“I lo hre lo anih chuan tunah ka hrilh ta che a, keima lam ai chuan kan chhungkaw tibuaitu hmeichhia hi i nu anih tlat avangin ka fapa hian a hria anih chuan a nei lo ang che..”