EVERGLOW-18

Chapter- 18

Tawng mai nachang hre loin ka en reng ringawt, hei hi chu ka lo ngaihtuah lawk tawh tho nangin a tak a ka hmuh erawh ka ring eih lo.

“Lo lut la...Zorina i be duh mi?”  ati a, a nui deuh sang bawk, chhan ka tum zeta, ka bu ta nghauh ringawt,ka tawng chhuah theih pawh ka ring lo zawk.

A tawlhsawna, ka luhna turin min kiana,zahna nge natna zawk ka hre lo, min fan rawih rawih bawk,muangchangin ka pen lut a, Curtain engmah an la hlim lo a, Light an On bawk si lo nen a lang thim deuh khap bawk.Kar kalta te kha chuan ka ta emaw tiin zalen tak khan ka tei vel kha ania, ahmun engmah a la danglam lo, mahse, tunah chuan neitu lo zawk ngawih ngawih a inhriatna in min luh ngut ngut a, tlawm ka inti hluah hluah bawk.

“Thawh kan hai deuh alawm mawle, ka han ko ang, lo thu la...” a ti leh a, min hnaih ber a Chair awmah chuan  ka thu thla a, ka bet hlawl lo.Stepa a kal chho chu ka en a, Mutna a hak chi kekawr bul tawite a ha a,a kamiz hak chuan a kekawrbul hak a khuh pil tep bawk, a len danah a ta a ni hauh lo ang tih a chiang reng bawk.Ka thaw hawk mai, darkar 24 pawh a liam hma hian enge thleng leh ta hi? Zorina hi engtin nge ka rin theih ang? Hetiang hi a nih ziah vangin ka ring thei lo chu anih hi.Sumdawnna ngawtah inzawm se engvangin nge a bulah a riah kher ang? Ka mutpui duh lo vang maiin a mamawh pe tu tur a lo zawng leh tihna a ni ngei ang..Ka luak a chhuak nghal hlui mai.

Noel-i chauh a lo chhuk leh a, a thawmhnaw hak a rawn thlak ta bawk, ka thut dan ngaiin bet lo zetin ka lo la thu a, ka kut ka bag hnuaiah ka dah a, nghet zetin ka hum kawp tlat bawk.

“A lo chhuk tep,lo nghak rawh, Coffee lo in ang aw” a ti leh siam siama, Curtain ho a pawt hlim zung zunga,engtinmah ka chhang let lo.A chevel chu ka en ngawt ngawt ringawt.

“I va hma ve” Zorina aw hian a rawn ti thut a, rang zet hian step lam ka hawi chho a, Kekawrbul dum, a khup kuh lo deuh leh T-shirt var a ha a, Slipper dum a bun bawk, a chawn sei thlur chu hmulin a khuh dap a,ka chil ka lem khawlh ringawt,dik tak chuan engtia lo hmachhawn tur nge ka hre miah lo.Ka kal tur hre lawk vek siin kal hma min ti leh lawia, an duhtawka khawsa dun turin zankhua kha a tawk zo lo emawni?

“Zingkarah tih a ni sia, kal tlai ka hlau a..” ka beisei aiin ka aw a pangngai.Noel-i kitchen lam atangin a rawn daka,Coffee a duh leh duh loh a rawn zawt a,ka insehruh fan fan thung.

“Engmaw ka tih?” ka thutna ep zawnga Chair awmah chuan a rawn thu ve a, a bawp sei zet a khawkherh nghal bawk.

“I msg ah khan hna pawimawh a awm thu leh zingah heta kal tura min tihna ka hmu a” ka ti leh a, thinrim lutuka ka au vak loh nan ka theihtawp ka chhuah takmeuh.

“Maw? Chutiang ka tih ka va hre lo ve..”

“I msg ka chhiar sual a ni maithei..”a awki ang chiaha ngeiawmin ka ti ve hmaka, ka insum hman lo, mahse, ngaipawimawh lo hmel zet hian a then suk duh chauh.

“Ka ring chiah lo,tak takin Moses-a pawh a lo thleng tep ang” a ti leh lawi,hna chu a lo awm ngei anih hmel ta, msg erawh ama min rawn thawn ni lo in nizan khan Noel-i zawk a rawn thawn tir a ni ngei ang.Atthlak zetin ka mittui a hnai kuar bawk, ka khap sak sak a, engvangmahin ka tap ngawt tur a ni miah lo.

“Keima lo thawn che nih kha, a buai vangin ka rawn thawn sak a” Noel-in Coffee rawn chawi luh pahin a rawn ti a.Ka bu nghat nangin ka awih chuang lo, khatiang tlai tawhah khan a la buai anih chuan buaina pakhat bak eng buaina mah a ni hauh lo ang.

Side tableah a hung a, in chakna ka nei miah lo, Moses-a lo thleng vat vat se ka ti takzet,a awm chuan ka mal lo deuh ang, chubakah hetianga thil lo inthlak leh thut vanga ka mangan zia pawh hi ka hrilh thei mahna le.

Vanneihthlak lutukin Moses-a a lo thleng ta hlauh, ka thaw huai mai,nidang ang bawkin vei nei lo niawm tak hian a rawn lut a, a rawn tawng nghal lawng lawng bawk.Ka bul hnai bera Sofaah a rawn thu ve a,Coffee a duh ve thu a sawi nghal zat bawk.

“I riak ve mai lo a..” Zorina’n Moses-a en pahin a ti a, a thle buk bawk.

“Nia, ka inchhir tep, zing hma tawka lo chhuah leh tho angaia, mahse, a pawi lo..Nanun,i thlenna rei tawh em?” min rawn en a, ka lu ka thing ringawt,ka hmelah dik lo awm angin ka lo awm nge ka hre lo, min melh deuh vang vang bawk.

“Ka rilru ka thlak leh a, Nanuni hi kal ve se a thain ka hria” Zorina bawkin a ti leh sup a, engmah ka la hrethiam chuang lo.

“Nia, pawi miah lo, Office lamah te chuan Ruata a lo awm mai ang chu..Bakah ni hnih chauh ania” a ti leh a, khawiah nge kal tur ka hre eih lo.Nizan chuan Moses-a pawh hi a awm ve anih hmel ta riau mai.

“Bairabiah..zan hnih kan riak ang” a,Bairabi hi kan bungraw pawimawh leh khawl zawng zawng awmna a ni tih ka hria.

“Engtikah nge chhuah tur?” ka ti leh a.

“Chawhnu lamah kan chhuak mai ang chu, Mos..In enkawltu kha bia la..Pathum kan ni dawn tih pawh hrilh nghal la” a ti leh a.Tun ang boruakah hian zin chhuah ka chak hlawl lo.

Zoi bawr fein a rawn haw a, a bazar anih hmel,ka kal khan in kha chhunglamah an la kalh bawk sia, mak ka ti deuh, Zorina Ofiiceah kan lut khawm ta dial,hna lam an sawi zui ta char char a, ken ngai tur an la khawma, mi biak kual tur apiang Zorina zawkin a be zel a, File chi hrang hrang kan keu a, Document pawimawh fe fe kan ken tur ka dahkhawm nual tawh bawk.

“Mamawia chu ka lo be lawk dawn em?”  Noel-in a rawn ti a, engmah sawi ve loin a lo thu ve char char a, mak takin Moses-a nen vawikhatmah an la in be eih lo.

“Lo bia la a tha khawp ang,naktuk zingah emaw hmuh ka tum dawn a,a number kha min lo thawn leh mai teh,ka nei tawh lo. Chuan Driver kha a lo let tawh chuan inthlah tir mai rawh” en mang lo hian Zorin-an a ti liam puat,Noel-i hmel a na tuar hmel lo lang zawk chu ka hmu hman tho,mahse, a in control leh vata,nui chung hian min rawn en a,” Nia, ka lo inthlah tir mai ang, in buai bawk si” a ti a, a aw a dam thlap a, engmah hian a ti danglam ve thei lo emaw tih mai tur hian a awm thei hi ka it thlawt.

“Nan, i duh chuan nang pawh kal la, i insiam lawk theih chuan a tha ang” min rawn en a, a hmelpa zetah chuan hriatthiam chiah si loh thil a lang zawka, min duatna nimaiin ka hria.Mahse, a rei lo.

“Um, Scooty ka lo keng tho a, Office lamah ka va tlang zawk anga, kan thil ken tur thenkhat kha ka va la kual dawn mawni ka lo ti a”ka ti tha ve mai,kan thil ken tur thenkhat te Office lamah a la awm hlawma, Moses-an Laptop nen hna a thawk char char a, Zorina lah in phone a hmang reng bawk nen keimah lo kal tur an awm dawn lo tih ka hria.

“A tha tho mai,dar 3 velah muangchangin kan chhuak dawn nia”a ti leh a, ka chhan hmain a phone a rawn ri leh a,.A ning ve deuh ngang a ni ang a ner nawk bawk.

Officeah Hlui leh Ruata an lo awma, Ruata hi site a awm thin a ni a, a hriselna lam a pan deuh vangin helamah a rawn thu ve ta rih a, pa lian lem lo, che fel thlap  mai a ni a, hna lamah chuan a ngaihtuahwm hauh lo ang.Ka thil lak tur ho ka la khawm sawk sawka,Hlui’n min pui bawk a, kan kalna tur leh kan awm hun chhung tur ka hrilh pah mawlh mawlh bawk.

Tlai dar 4 velah kan chhuak ta chauh, an pahnihin min rawn lam kuala,khua a dur deuh khup a, thli a thaw deuh vur vur bawk nen ka awm a nuam lo,thli hi ka hlau hran lo a, mahse, ruahsur nasa leh tek tla te hi ka thil hlauh ber an ni leh lawi.

Seat hnungah ka thu tawm chaiha, Driver hruai lo in Moses-an a khalh a, an pahnihin hna lam bawk an sawi dun a, ka hre chiang lo nangin kan hna kal tlang na tur ram ah buaina a awm a nih hmel a, buaina satliah ni loin a serious hmel viau bawk.

“Kei chu ni ila ka ti tau nasa hle ang...Nanun, nang eng nge i ngaihdan?” a rawn ti a, Pawnlam ka lo hawi daih avangin engmah an sawi lai ka lo hre mumal miah lo.

“Maw?” ka ti ha mai.

“Zinga ka rawn hmuh kha mawle..Noel-i khan mikhual ang maiin a treat che a..” a nui hak hak bawk...A sawi dik chiah ka ti rilru a, zingah khan ka na a, ka zak bawk, mahse, hna lamah khan kan buai ta lutuk a engmah mumal takin ka ngaihtuah thei ta lo mai zawk kha ania.

“Mikhual chu ka nia lawm” ka nui lui hak bawk.

“Moses.Duhtawk teh..Nanuni i hrechiang lo ania,,bakah nizan khan engvangin nge a riah pawh i hria lawm” Zorina’n a ti hluk a, hahthlak hian..Ani pawh hian min hrechiang bik lo,kei phei chuan amah hi ka hrechiang lo lehzual.

“Ok, ka duhtawk e,mahse,kei ni ila chuan eng eng emaw chu i nghei chiang khawp ang” a ti leh a, ka thaw halh mai.Moses-a hian kan inzawmna hmasa kha engmah a hriat hmaih hauh lo tih ka chiang lehzual.

“Khawngaihin..” zawi sup hian Zorina’n a ti leh a, nawr luih chi a nih loh zia a lang chiang viau.

“Tehreng mai, Nanun,Bualpuiah chaw kan ei mai dawn mi?” a tih zawm zat.A titi kal lai a thlak hlawk nangin danglamna engmah a lang eih lo.

“In tih na apiang kha animai,khawiah nge kan riah dawn?”

“Ekhai, kan lo la hrilh miah lo tak che, Kolasibah In kan luah alawm,hna kan thawh chhung a kan awmna tur,in enkawltu kan daha, kan thlen chuan mut tawp animai” a ti leh puat a, pawisa a awm phawt hi chuan engkim hi a awlsam vel vek chu anih hi maw.

Bualpuiah chaw kan ei thla a, kan  tlan leh chauh tihin ruah a tla a, tam erawh a ni lo.Mutchhuakin min zem chiai chiai a, Coldplay ho hla a play bawk nen, ka muthilh lai pawh ka hre lo.Motor ding dawtah ka harh ta chauh,In lian vak lo,gate chhe te awm ve hmaah kan lo ding fel der tawh.Ruah pawh a sur tawh lo.

“Kan thleng e, i mutui maw?” Moses-a zawkin min rawn ti leh a.

“Um, ka mu nasa khawp mai, kawng a tawi phah vek mai” ka ti ve a, kan chhuka, ka bag ka ak a, kan awmrei dawn lo bawka, thawmhnaw inthlakna tur pahnih khat bak ka keng lo, Underwear erawh pathum lai ka keng thung, ka period a hun hnai tawha, thut thei anih avangin in rin lawk loh ka duh lo.

In enkawltu an rawih chuan kan thlen a lo nghaka, kan han inchibai leh rih a, kum 50 ver bawl anih ka ring, ka hawi kuala, a felfai thlap mai,an inluah piah lawka khawsa an lo ni a, An zin chang a buaipui an ngai tih loh chu hna a nei lem lo.

“Ka chhuak lawk dawn nia,in pahnih in in lo awm mai dawn mi?” Moses-an rawn luh pahin a rawn ti a, phone a hman vangin kan luh rual khan a lut ve lo.

“Khawiah?”rang fe hian ka ti a.

“A tih dan pangngai anih kha,kal rawh,i riah dawn chuan lo sawi hma tawh la” Zorina’n a ti hmuk a.Moses-a lah chuan Zorina aw a lawm lo ri chu ngaipawimawh lo fe hian a nui a.

“Tehreng mai, kha chu tihpalh ka tih kha..Nanun, kan kal hnuhnun ber khan ka riah chhuah tur sawi loin ka chhuaka, zankhuain Kawngkhar kalh loin a mu a, a hlau anih ka ring” a nui hawk hawk mai, an thiandun hi an inpawh takzet,Moses-a a tawng duh em em a, Zorina erawh a tawng duh hran lo a, a nui khat viau lawi, chuti chung chuan Moses-a hian a chhaih kuala, a fiam a, Zorina Mood fuh vak lo pawh hi engahmah a ngai lem lo.

In enkawltu a haw tawha, kei pawh ka mutna tur roomah ka kal tawh,Mama ka call a, a pick lo, call nawn tawh loin msg in kan thlen thu ka hrilh ta zawk.Sana ka en a, dar 11 a lo hnai thuak tawh, kal kawngah khan ka muthilh vang a ni ngei ang, ka mut a chhuak der lo.

Kawl a rawn phe zawka,khawpui a ri nghal dur dur bawk, hlau zet hian ka mu tawm chawih a, ka inlukhup tlat bawk,ruah tam zet hian a rawn zui nghal a, a ri nghal buan buan mai,an in luah hi Assam type a ni a, ceiling a awm vek tho nangin ruah sur thawm chu na tak a ni tho.Zorina inbual laiin ka mutsan ta kha ania, Room kawngkhar kalh ka tum zeta, palh thleng thei anih avangin ka kalh leh ta lo zawk.

Khum a  che data, Dunlop a hniam deuh sat bawk, ruah sur thawm avangin room kawngkhar in hawng ri engmah ka hre si lo,ka inkhuhna ka hai hawng a,tu nge anih ka hmu thei lo, Current a lo thim daih bawk nen a thim uluk lutuk.

“Shh..keimah..” Zorina aw hian a rawn ti sup a, ka inthlah dul nghal a, ka puan sin a rawn pawt kau a,min rawn kuah a, amah si chetin min pawt bet zui nghal bawk,tukin zing kha ka ngaihtuah chhuaka, Moses-a hnenah khan Noel-i riah chhan a hria tih a sawi anih kha..Ka tang nghal teuh mai.

“Ngatinge i lo kal a?” ka mut dan ngaiin ka mu a, a taksa lumna chuan min ur pha titih bawk.

“Ka ngai che..” ka bengah a rawn fawp thawi thuak a, ka darah a hmui lum ham ham chuan a rawn fawp a, ka khawng nghal lah mai.

“Nizanah Noel-i i bulah a riaka”

“Aih, ka Inah, mahse, ka bulah ni lo”

“Ngatinge a riah kher? Chuan i phone a lo pick bawka” ka lungawi lo tih ka awah a hriat theih.

“Maw?” mak tih hmel zet hian a ti hmuk a.A lam hawi turin min kuai her a, ka inlet ve mai bawk,min pawt hnai leh a,a awmah ka hmai ka phuma, a lungphu ri dat dat ka ngaithla leh ta.

“Nizan khan i lo caall na ka hmuh vangin ka lo call back a,Noel-in min lo chhang a, i buai a ti a, ka nghak reng che a, mahse,engmah i rawn sawi lo a..Zingah lah khan i kawr a lo ha a...” ka aw a zuih ral vek, ka rilru a na thar leh vawng vawng a, a hun laiah khan ka let leh a ni ber.

“Chutiang engmah ka hre miah lo,ka ti tak tak..Ka phone kha Roomah ka kalsan a, hna lamah chuan kan buai ngei, Moses-a a lo kal a, Pi Zuali a lo kal bawk,Noel-i kha chu pawimawh a awm vanga ko kan ni thung.Mahse, ka phone a lo pick chu ka hre miah lo..ka ti tak tak” a awah ngenna ka hre thei.

“Dik tak chuan i nupui hlui a ni a, a la duh em em che tih ka hria, hmeichhia chuan kan hmeichhiatpuite rilru kan hrethei bik a,chutih laiin i inah ariak ve a, ih..ka thik ve ang tih i ngaihtuah ngai lo ami?” ka insum hman lo.Nia, ka thik em em tlat.

“Sorry, zingah khan i thinrim tih engmah i tilang lo a, Moses-an a sawi hnu khan ka ngaihtuah ta chauha, keimah lamah hian engmah a awm lo lutuk a thik ngaiah pawh ka lo dah lo..mahse, ka tihpalh aw..Tih nat che ka duh ngai lo ang tih i hria lawm” thu tak lutuk hian a ti hrawka, ka sam karah a kut a rawn rawlh a,a kut lehlamin ka mal a rawn chawi kanga,a mipatna khauh tung mai ka sik rualin tawp a hun tih ka ngaihtuah chhuak nghal zawk bawk.

“Ngatinge a riah kher? Zingah lah khan i roomah a rawn kal a, a rawn kai tho che a” ka ti leh nghat a, ka la lungawi thei lo.

“Ka lo la hrilh lo tak che, Noel-i u mipa hi zu ngawlvei ania, nizan khan a nu leh pa an awm bawk si lo nen a haw ngam tawh lo a, Moses-a pawh khan a hria alawm”

“Hmun dangah pawh a riak thei lo ami?” ka ti leh talh.

“Oh, Mate, zan dar 12 dawn thleng ka inah hna kan thawka, engtin nge Hotel emaw a chhungte Inah riak tura ka tih theih ang? I duhdan anih ka ring lo..” ka samah a rawn fawpa.A sawi dik chiah, awm ve pawh ni ila ka remti hauh lo ang tih ka chiang.

“Min tiam rawh, i mutpui tawh lo ang tih tal, chuti lo chu rin che harsa ka ti” ka ti leh a, ruah sur bur bur thawm kha a reh tawh a, mut ti nuam tawk lek hian a sur ri chiar chiar a, current a awm leh tawh bawka, room light ka on lo nangin pawn lam eng chuan room chhung thim lutuk tur chu a ti ziawm a, eng tak erawh a ni lo.

“LALPA!! Chutiang vel leka nepah chuan maw min lo ngaiha?” a ti chhuak hrawih mai.

“Aih, ka ngainep che a ni lo, hmeichhe nalh tak a ni a,  chumai ni loin i nupui hlui a la ni tel cheu bawk..i tan engmah harsa a awm lo a,i tan engmah a ni lo ti mah la in awmdun fo chuan a thleng palh thei a...” ka hmuiah a kut a rawn daha.

“Nangmah vanga ka in control hram hram lai hian hmeichhe dang mutpui turah min lo ngai a? ka awih thei lo zawk” za miah lo hian a nui lui hawk bawk.A thinrim a ang viau bawk.

“Mipa i ni miau a”

“Nia, Mipa..tunah pawh hian Mipa ka nih avangin ka in control nasat zia i hre lo zawk ang” a ti leh hmuka,ka ringhlel hauh lo.

“I roomah i kal dawn lo mi?” ka ti leh sep a.

“Dawn lo, mahse, hlau suh,engmah a thleng lo ang,thil pakhat..Min neih vat angai thung ania, engchen nge ka in control theih dawn ka hre miah lo”a nui a.Ka nui ve ringawt.

“Moses-a..”ka rilruah a rawn lang thut.

“A lo haw lo ang” a ti awlsam mai, a riahna tur zawh ka tum zeta ka thulh leh.

Reife chu engmah kan sawi ta lo,mutchhuak bawkin min rawn zem leh a, a darah ka lu ka nghata, a thawk danah a muhil niin ka hria,kaihthawh ka tum zet a Moses-a a lo haw dawn chuang lo a  ka kai tho duh ta lo,a kawngah ka kuaha, a rawn inlet thuk a, min rawn kuah leh a, a rum zui tuah tuah nangin a harh chuang lo.

“Good Morning” ka chala rawn fawh zauh pahin a ti sup a, a inbengkang a, uluk zet hian min en vung vung bawk.Room chhung chu ni in a rawn chhun at tawh bawk.

“Morning, i va tho hma ve..” ka ti a, thawh ka tum chu min rawn nem mu leh a, a rawn kun hniama,a hmui chhah tap mai chuan ka hmui a rawn si a, a hnawng deuh chap bawk.Ka mit ka chhinga, a nghawngah ka kuaha, min pawm tho nawlh a,Mahse, a hmui a phawi eih lo.Khumah a thu a, a malchungah ka thu ve thung, a kawngah ka kherh bet chial bawk.

“I power chak zia hi i hria em?” a inlak hran veleh a ti sup a, ka biang tawn tawnah a dawma, ka chalah a chalin a rawn nawr bawk.

“Aih, ngatinge?”

“Nizan zankhua khan hmeichhe bulah ka mu a,chu pawh nangmah lehnghal,engmah ka ti lo,zing ka harh veleh khan min lo kuah chiala,i hmel kha reife ka thlir asin..Hmeichhe danglam lutuk,induhtawk si.Chapo si,mahse, ka hmangaih che in ka hria ka tih kha..” min kuai daka, ka chhan hmain min rawn fawp leh nghal vang vang a, hlimna sawifiah thiam si loh hian min fan a, ka mumang a ni ang tih ka hlau hluah hluah.

Nihnih chhung chu buai tak kan ni ringawt, chhunah Bairabi lamah kan chhuk a, thim hnuah Kolasibah kan let leh chauh zel a, chaw erawh Hotelah kan ei mai thung,eirawng han bawl pawh ka duh viau nangin kan tei kual nasa lutuk a ka peih hlawl lo.Nilengin site lamah kan chhuaka, Revenue Dept lam nen ram kan teh tha leh a,a ram neitupa lah hmuh tum pawn hmuh turin a awm duh der lo,Revenue detp a an boss erawh Mamawia an tih kha a ni a, Noel-i cousin pasal ani a,engkimah min lo buaipui vek thung, kan kalna lamah pawh a nau te tir mai loin a rawn kal ve a, kan awlsam phah takzet.

“U, Zuala pa a chatthla tep a, ka kal tlang nghal ania” Office a ka awm laiin Mama’n a rawn ti a, kan zin kan haw atangin ni thum lai a liam leh tawh, Zorina nen kan boruak erawh sawifiah thiam loh khawpin a tha zui ta tlat bawk.

“Ehe, a va zia lo ve, kan ban veleh ka rawn kal ve dawn nia” ka ti a, Zorina rawn lut mek chu ka mitsirin ka va hmu a, ka en vat a, ka nuih sak bawk.

“Chanchin ka lo hrilh leh ang che,anih phawt” a off a, Hlui a dam loh avangin a lo kal lo a, Ruata leh Moses-a an haw deuh chiah thung, ka hna khawih lai a laklawh lutuk vangin ka la kal ve lo mai zawk.

“I la hman lo mi?” tih pahin a rawn kal hnaia, ka bulah thu loin Moses-a chairah zawk a thu a.Min drop deuh ziah avangin tun ang huna a lo kal hi thilmak a ni lem lo.

“Zo tep, i hmanhmawh ami?” ka til tih lai ka tihzawm leh a.

“Aih, thil ka sawi pui duh zawk che”

“Eng lam nge?” ka en chuang lo.Pen ka la kanga, ka thil ziah tawhsa hnuaiah ka ziah belh leh a.

“I nu chungchang mawle” ka khawng nghal lah mai, ka pen ka thlauh tap bawk.

“Maw?” ka ti chhuak thei hram.

“I nu leh ka pa chungchang mawle..” a ti leh sup a, min melh run bawk.