EVERGLOW-24

Chapter-24

Dressing table nghengin a ding a, a kut a kuangkuah thun bawk.

“Kha thil kha...eng lo,ka hrilh ang che ka tia, mahse, i accident velah khan ka buai lutuk a ka lo hre leh tawh lo a..”

“Nia, engtikah nge min hrilh ang ka ti thin a, vawiina Zomuani chungchang i sawi chhuah takah chuan ka sawi mai mai,theihnghilh rawh..” nelawmna nei miah lo hian a ti leh hluk a.

“Aih, i thinrimna engmah siam ka duh lo,zep tum hrim hrim ka ni lo a a, ka lo mangnghilh tak tak” ka ti leh a, a mitah tak ka en lui ngar bawk.

“Ka ringhlel lo che, min Hmangaih tih pawh ka hria, mahse, zep nei tlata ka hriat na che zawk hian min ti thinrim..” a aw a nem ta deuh.

Harsa ti deuh hian ka thutna atangin ka tho a,min puih tumin a rawn che vat bawk.Ka kutah a rawn vuan a, a chang hian ka nak lam hi a inkalh tlat thin a, ka thut rei phei chuan ka tho mai thei lo fo.

“Sorry..zep ka tum lo tak tak,mahse, i rilru ka lo ti nuam lo a pawi ka ti lutuk..” ka melh chho a, min rawn en chhuk run thung,a khabe hmul kual raih mai chu ka en a, buk deuh ni si loin a bek lam thlengin a zuah vek thin a, a ti lang pa zualin ka hre thin,amah a hang lem lo bawk nen a ti langsar takzet zawk.

Sir zawngin ka ngheng a, ka kawngah a rawn kuaha, ka dulah a kut a nghat bawk,a  rawn kun hniama, ka hnar kawnah a rawn fawp a,a perfume rim pa zet chuan ka hnar a verh a, he perfume rim hi amah nen a inhmeh hluah hluah,kan mutdun hmasak ber atang khan he Perfume rim ka hriat tawh hi chuan amah ka hrechhuak ta ziah kha ania.

“I thiam loh a ni hleinem,kei pawh ka dik bik lo ang, mahse, Nupa kan ni a, kan inkarah engmah thuruk a awm ka duh lo,chu zawk chu hre reng la ka duh ber..Chan che ka duh lo tih pawh hi hre tel bawk la..” zawi sup hian a ti a.

“Ka hria alawm, engmah thuruk ka nei lo a, ka nei ngai lo ang tih nangpawn hre ve bawk la aw” ka ti sep a..

“Um, ka hrereng dawn nia..tunah chuan ka kal phawt ang” a ti a, ka hnar kawnah bawk a rawn fawp leh a, ka ngheng ar ar mai.

Nau nei thei reng ka ni tawha, ka na tak sawi tur awm si lo hian ka chau a, ka ke a rawn vung ta bawk,Doctor khan naktuka Damdawiin lut turin min ti a, Nautei a lo haw tawh a, min awmpui a tum ruh viau,kan In lama riak turin tlaiah a lo phei dawn a, dik tak chuan ka nu ka ngai tih ka hria,ngai nih ka duh lo mai zawk.Ka lo hlauhthawn ang ni lo in Zorina pawh a in check-up na lamah engmah thil tha lo a lo awm lo hlauh,a lu nat chhan a lo hrilh dan chuan a mit vang a lo ti a, enkawl vat anih loh chuan a mit tan a pawi ve theih avangin treatment la nghal turin a lo ti a, Damdawi a lo pe nual.A lu an vuak avanga na kha anih hlau reng rengin a kal chhung khan rilru nuamin ka lo awm lo, mahse, a lo tha ta hlauh.

“Nautei chu va lam angai dawn em?” a lu hruk hul mawlh mawlh pahin a rawn ti a,khumah ka thu mu a,ka phoneah Games ka khel pah bawk.

“Aih, Mama khan a lo dah dawn niang”ka ti a,a thawmhnaw dahna lam a pan a.A damloh vang khan a taksa sawizawi lam a ngaihthah deuh a, tlemin a hma aiin a thau ta hret, thau chhia erawh a ni lem lo.

“Chawei nghal rawh se,hrilh la..”

“A tha viau ang, mahse, Zoi kha engmah ka hrilh lo a, a siam vek tawh ka ring” ka ti a, Sana ka en a, dar 4 a pel tawh,chaw hi kan ei hma vak ngai lo nangin dar liah hi chuan a siam tan tawh tlangpui.

“A ho em mai, a siam belh leh mai ang chu,eee.Moses-a te pawh lo kal an tum tak,Zoi chu hrilh law law mai teh” a ti a, a kawr hak tur zawngin a T-shirt inthlep thut chu a keu kual dun dun bawk.

‘Um,kei pawh ka zuk chhuk ang” ka ti a, a rawn inher vut a, a kawr hak tur a keng a.

“Engmah zuk ti miah suh ang che,ka duh ai hian i indim lo ania”

“Naa, engmah ka ti hleinem a, ka sawi ringawt zel alawm..” ka nui a,a nui ve hauh lo, uluk fe hian min thlek a, ka dul a en vung vung bawk.

“Mate...’ kawngkhar ka thleng hman tep tawh tihin a rawn ti leh a, ka ding data, ka hawi let a.

“Um..”

“Thil engemaw hrilh loh che ka nei a..” a rawn kal hnaia, a awmdan a thlak danglam thut chuan ka awm a ti nuam lo lehnghal ringawt.

“Engmaw? Sawi la..” ka ti a, Kawngkhar nghengin a rawn ding a, hriatthiam har deuh hian min en run bawk.

“I thinrim na tur sawi ka duh hauh lo ania..” a ti leh a, ka ner nak mai.

“Engpawh nise sawi phawt mai teh, min ti hlau alawm mawle” ka ti hlar thung,a nui suk a.Ka kut pahnih a rawn vuan a, a chawi kanga, a fawp zui vang vang bawk.

“Nimin khan i nu nen kan inhmu a...” ka khawng lah mai.

“Chuan..?” a sawi leh hmain ka lo ti hmanhmawh.

“I nau neihna ah kal ve a duh a, i remtih leh tih loh a hre duh a..”

“Aih..” ka lu ka thing a, ka kut a vawnna ka talpit nghal a, ka in kuangkuah zui nghal than bawk.

“Ok, i duh loh chuan tihuih che ka tum lo,mahse,i Nu a ni tlata, i hun pawimawh hmasaberah hian i Nu ngei in i kut chelh se ka duh a, ani chuan i na kha a tawmpui thei ang che ka lo ti a”

“Aih, adang sawi tur a la awm em?”ka aw a chang fak mai,chhungrila ka nu ka mamawhna vanga ka sahal mek chu ka aw ki  chhuak changfak chuan thup ka tum lui tlat.

“Um, ka hrethiam che, i duh loh zawng engmah ka ti lui ngai lo ang che” a ti sup a, a rawn kal hnaia, min rawn kuah a,ka chalah a rawn fawp zauh bawk.

Nautei leh Mama an lo thleng a, a hnu lawkah Moses-a leh an thianpa pakhat an lo thleng leh bawk,ka hmuh tawh hnu niin ka hria a ka hmuhna awm ka hre chhuak zo mai lo thung, Zorina thian te zinga pakhat a ni phawt anga, Damdawiinah pawh khan ka hmu a ni mahna le, Zorina nen an inchen thuak in ka ring, a hmeltha vut lo nangin a langsar thawkhat ang tih ka lo chiang ve tawp.

“Mate, hei hi kan Thianpa tho anih hi,College kan kal ho thin a,Jordan-a..” Zorina’n min hmelhriattir a, a nui suk a, min rawn chibai a, nghet zet hian ka kut a rawn hum a,a kut zungtanga inneih zungbun awm chu ka hmuh hmaih lo.

“Ka hmu che chu ka lawm hle mai” a ti sup a,

“Kei pawh le’ ka ti a.

“Abby lo kal ve se nuam a ti ngawt ang, Nanuni nen hian an mizia a in ang viau asin..an hmel a hrang hlak thung a” Moses-an a lo ti ve a.

“Nakinah chaw rawn ei ula a tha ngawt tak ang, mahse, kan chhangchhe deuh a,Nula kan neih loh lai tak a ni bawka” a ti tha ve mai.

“Nia, a chakawm, mahse, hei keini pawh kan nei hnai lutuk a, thildang  rilruah a leng meuh lo” ka ti a, a bu nghut ringawt, Zorina a nelawm lo ka tih tehlul nen Zorina ai pawn a la nelawm lo hmel mah zawk.

Nautei nen Roomah kan awm a, Mama erawh chawei hmain kal lawkna tur a neih thu sawiin a chhuak leh rih a,Zorina te pathum hna lam bawk buaipuiin a officeah an inkhung bo leh diak thung.Ka thil ken tur dahkhawm te a phawrh leh a, ken kim loh a awm takin tih thuah a check leh vek.A titi siam siam a, kan naute a ni bawka, ka tan hi chuan ani tluk an awm thei lo.

“I phone hi..” a rawn lek kang a, Sofaah thatchhe zetin ka thu a,ka ke vung bawk nen ka awm a nuam hlawl lo.

“Tu nge?”

“I nu...” a thle bak bawk, ka rilruah ka nu ni zawk se tih a rawn lut thut a, thinrim zet hian ka lu ka thing nawk bwk.

Min rawn pe a, naktuk Damdawiin kan luh dan tur vel a hre duh anih ka ring mai bawk.

“Aw, nu..”

“I tha em?” nidang ang bawkin a rawn ti a.

“Um tha e..enge ni ta?”

“Eng ni lo e, naktuk dar engzatah nge luh in tum?”

“Doctor kha chuan riak lut turin hmanhmawh loin lo kal ru min ti a..” ka ti a.

“A that chu, na deuh leh dik lo deuh i nei em?” a rawn ti leh a.Mala nupuiin fa a la nei lo a, kum 5 lai an innei tawh bawk.Kei hi a hmasaber tur ka nih vang nge ka hre lo, an helhhawlh viau vek mai.

“Nei lo, mahse, ka ke hi a vung nasa deuh a..”

“I vung kha ka ngaimawh tlat, i in entir em?”

“Aw, thla tir khan ka entir nghal a, mahse, hei hi chu Nau neih dawn a awm ve thei thil a ni a ti a, engmah ngaihthat lohna tur a awm lo anih ka ring”

“Aw, a that hlauh chu, naktuk zingah ka lo phei dawn nia” a ti a, kan in mangtha a,atthlak zetin kan inbiakna zawng zawng te kha keima nu zawk nen a kan inbiakna ni se ka ti vawng vawng,huatna bak engmah alakah rilru dang ka nei lo emaw ka lo ti a, mahse, a lo ni lo tawp.’Nu’ chu ‘Nu’ an lo ni tak meuh e, abak sawifiahna dang a awm lo.

“I nu hi chu a fel ve ngawt mai, mahse, enteh, Mala nupui hi ka nel miah lo nia” ka bula rawn thut pahin Nautei’n a ti a, kan mizia hi a in ang hle nangin kei aiin a huai zawk ka ti thin a, engmah hi han zep leh pehhel dek dek a nei ngai meuh lo.A duh loh zawngah chuan a ri pawp pawp mai thin a, Mama hian a khak phah fo a, a sim lem hlei lo a.

“Mai mai che hian a, Zorina hriatah te i sawi ange” ka ti a, mahse kei ngei pawh hian ka chhungrilin ka pawh tak tak bik der lo.

“Niminah Noel-i nen ka hmu a, min hmu renga, u Zorina damdawiin awm lai pawh khan kan inhmuh ngun nen min be duh thak lo,min hre lo angin a awm hmak mawle” a ti leh hlak a, ka nui ringawt.

“A ho em mai, nangpawn i be bik chuang lo a..” ka ti a, a ner deuh sak a, ngaihtuah muk tak nei niawm tak hian Tv lam a melh vang vang bawk.

“I hna dil chu engtin nge ni dawn?” ka ti leh a, min chhang lo in Tv lam bawk a la en ta cheu,a darah ka va khawiha, a phu zawk bawk.

“Enge a?” phawk fe hian min rawn en a.

“Ih..eng lo..aa, ka sawi lo mai ang” a ti bah deuh nak bawk.

“Eng chu maw?”

“Niminah ka nu nen kan inhmu a,chuan...” a ngawi leh daih.Engmah sawi tur hre lo in ka en reng ringawt,Zorina lah khan niminah a hmu tih a sawi tawh bawk.

“U Zorina kan hmu a, i nau neihnaah awm ve a dil a..” a tawp lam a zuih ral titih, Zorina khan Nautei a awm ve tih a sawi hauh lo.

“Engtin nge a tih a?”

“I thu thu a ti a, kan lo kal hma khan ka nu in min rawn bia a, inpa  khan i remti lo tih a lo hrilh a, mahse, awm ve a duh sia..” a thaw deuh hap a, min en loin Tv lam a en a, min en ngam lo hrim hrim tih ka hre kar bawk.Ka nu ka huatzia an hai lo,an lo inhmu ngawt pawh ka duh dawn lo tih ka nau te hian an hrechiang lutuk lam mah zawk.

“In awm alawm,bakah ka nu pawh a awm dawn a,Zomuani nen,midang ka mamawh belh hleinem” a rilru tihnatsak belh hlauin ka aw ka ti dam lui hram hram bawk.

“Nia, mahse, ka nu chu adang alawm, midang a ni lo”

“Ka hria e, mahse, ka tan chuan ka nu a thi tawh alawm” ka ti ta nge nge.

“Ngatinge i huat em em? I bialpa a chhuhsak vang che kha nge i kutah keimahni min enkawltura a kalsan vang che..?” min rawn en a, zam hmel a pu lo..Rapthlak ti zet hian ka en reng ringawt.

“Khatiang khan i u be lo la a thain ka va ring ve” Zorina aw hian a rawn ti a, a lo luh lai ka hre miah lo.

 A rawn kal hnaia, ka thutna thutthleng banah a rawn thu thla ve a,a hmelpa zetah chuan engmah a ngaihtuahawm a lang lo.

“I lo luh lai ka lo hre lo a..” ka ti sep a, Min en loin ka darah a rawn kuah a, Nautei lam a hawi daih bawk.

“Ka lo sawi ve in duh lo maithei a, mahse, nangmahni vanga i u tuarna hi hmuh nep tum lo ula a thain ka hria” khauh fur hian a ti leh sup a, thinrimna lam engmah a lang lo a, mahse, nek luih chi a ni lo tih a awah a lang chiang ngang mai thung.

“Ih, chutiang lam sawi ka tum miah lo,eng lo ania..ka nu khan awm ve a duh sia..” Zorina a melh zawka, hnuailam a en leh nghal daih bawk,Zorina hian kan inneih hnu khan nau tak tak anga enin a duat em em a, a exam zawh khan an zirpui Bangkok lam mi in zin turin a sawma, min rawn hrilh a, pawisa ka nei hauh lo tih a hre nangin kal a chak zia a rawn sawi a, Zorina’n a lo hre fuh a, a tukah engkim a tihfel sak nghal vek a, a zin chhunga a hman tur leh a lo let leh na tur zawng zawng nen a tihfel sak vek,a duat hluak lo nangin makpa anihna bak pawh a tihsak niin ka hria a, tlawm em em tur ka nih laiin ka hmangaihna a ti zual sauh zawk anih kha..

“I sawi tum ka hrethiam alawm,mahse i u hian a duh loh chuan tuman kan nawr lui lo ang” dam thlup hian a ti leh a, a vin hran lo nangin a hlauhawm dan a nep chuang lo.

“Um, ka lo hrereng dawn nia, U..min ngaidam rawh..” min rawn kuaha, a mit hnawng chapah chuan a tap thelh tih ka hria, kei pawh ka dang chuang lo.

Kan chawei boruak pawh a nuam zui ta viau, Nautei pawh engmah thleng lo ang maiin hlim takin a ti ti a,Moses-an a lo en leh vang vang hi ka hmu fuh thei riau bawk,engmah a hmain a awm ka hre lem lo nangin an lo inkawp ve anih pawhin pawi ka ti hauh lo ang,Moses-a aia mipa tha zawk hi zawng dawn ta ila an tam in ka ring lo.Jordan-a pawh ka nel ta thuai, mahse, nel tak tak tur chuan ka hmuh tam deuh angaih ka ring ve thung, a haw hnuah Zorina hnenah ka zawt ta nge nge.

“I mit a la deuh tihna mi?” khuma rawn lawn ve pahin a ti a, nui huk huk bawk.

“Naah, ka mitah hian midang an lang ngai lo hrim hrim zawk..” ka hnarah a rawn piaia, a nui hawk hawk bawk.

“Jordana hi chu kan college kal lai pawn hmeichhia hian an duh thei ania..mahse, a nupui a duh hleuh hleuh em mai” ati a, lukhamin a inkam kang a, ka darah a lu a rawn nghat zui zat bawk.

“Nang nge ani nasa zawk?” Apple ka hmawm pah a.

“Ka hre lo le, kan in ang maithei,mahse,an nupa nun hi a tluang vak bik lo a, bakah an dinhmun a inthlau deuh a,mahse, Abby hi a fel khawpa..” a ti awlsam leh mai,midang chanchin sawi hi a ching lo satliah pawh ni loin a sawi ngai mang lo zawk.

“A hmain ka la hmu si lo a, in inkawm danah khan in innel viau lawi sia,mak ka lo ti deuh mawle” ka ti a.

“Um, amah kha a dam lo deuh reng a, tunah khan a zia ta anih kha, bakah Moses-a nen kan inkawm ang em chuan kan inpawh lem lo,hnaah kan buai a, ani pawh Football club a nei a, Hotel nen...” a ti leh duah,ka hmu tawh ni a ka hria kha ka tisual lem lo,IG leh Fb lamah an nupa thlalak ka hmu fo tawh tak alawm le.

“Ka hre leh si e, an nupa photo ka hmu tawh tak alawm,eng thil nge a lo kal chhan ber a?” ka ti leh a.

“Kan hna lam tho hi Company tenau deuhin an khawih ve a, chu chu an khawih zawm thei dawn lo a, min rawn zawrh turin a lo ti a, tah chuan sum tlem invest ve a duh anih kha..” a ti a, kan inneih hnu hian hna lam kan sawi khat ta viau.

“Um,anih chu,ka duh ai hian i indim lo a..” ka ti a, a sam ka khawih saka.

“Indim lutuk,hna hi Moses-a chauhin a tih theih loh a tam zia i hriat kha..mahse, tunah chuan i pawimawh ber” a ti sup a, a tho kang deuh a, ka dulah a rawp fawp a, a samah ka tham ve thung, a nui zui hawk bawk.

Ka pum na lutuk vangin ka harh hlawl,nidangah pawh a na zauh zauh tawh tho nangin tun tum chu a nat dan a danglam tlat,Zorina ka sawi a, a harh mai lo, a rum deuh tuah tuah a, min rawn kuah thuk a, a muhil zui leh mai,ka sawi leh a,ka ko bawk.

“Ngatinge?” khum bula lamp a on nghal a,min rawn en a.

“Ka pum a na lutuk..’ ka sawi zawm thei lo, ka thlan fim in min bual a,ka hmui ka pet a, a kutah ka hmer ngat ngat bawk.

“Engtin nge ka tih ang?” a hmela manganna lang chhuak chu ka en a, vawikhatmah hetiang hian a la phili ngai lo.

“Nau ka veiin ka hria,ka nu phone teh...” ka tho tur min rawn pui a, khum atangin ka chhuk a, ka ding mar thei lo,min pawt kun tlat, khum tlang ka bawh leh rih..Ka khup a sai dar dar bawk.

Nautei a zuk ko a, a rawn tlan chho vat,min hmuh rualin nau ka vei a ni tih ani chuan a rawn man nghal mai.

“Thil ken tur ho hi ka lo la ang, lo hruai thla la, Driver leh Zoi ka lo zuk kaitho ang” a ti nghal sawk sawka, Zorina tihtur ber hre lo phibuai chu ka en a, ka thin a tih rim rualin ka nuih a za tel lawi bawk.

Damdawiin kan thlen rual deuhthaw in ka nu te an lo thleng ve nghal zat, ka thlamuang nghal huai mai, Zorina a phili lutuk a, Nautei lah ka ring zo leh tawh hek lo, ka nu  a lo thlen hnuah erawh ka zia hawk mai.

Khawvar hnaih lama kal chho kan ni a, ka nei mai dawn emaw ka tih laiin ka nei ta mai lo,nileng deuhthaw ka vei hnuah tlai lamah min zai mai angaih thu an sawi ta nge nge,ka huphurh rualin pawi ka ti tawh lo,zai turin min buatsaih a, a hma khan atuka lut mai tur kan nih avangin Zorina’n cabin a lo book vek tawh avangin Cabin kan nei sa a, Nau neihna room lamah kan awm daih laiin midang erawh kan cabin lamah an lo awm ve thung.

Naute tap ri ngak ngak ka hriat rualin ka mit ka chhing a, Pathian hnenah lawmthu ka sawi lo thei lo, a hma in vawi tamtak Zorina hian mipa nge anih hmeichhia hriat lawk a chak thu a sawi thin a, Mipa nise a duh em em bawk, keiin hmeichhia ka duh ve thung, mahse,vawiin a ka vei hnu khan eng mi pawh nise pawi tihna ka nei ta hauh lo, ka duh ber chu dam takin piang se tih hi a ni tawp tawh.

“Fapa i nei e...” Nurse in a ti a, a tap ri chuan ka chhungril a fan a, sawithiam si loh engemaw hian min tuam tlat bawk.

A rawn pawm hnaia,  a mit a chhing a, sam a nei ve hlap bawk..tu nge a chhun lam engmah ka hre lo,Hmangaihna nen ka en ngawih ngawih a ni ber.Cabinah min nawr phei a, Zorina ka zawnga, ka hmu mai lo,khumah min mut a, muthilh vang vang ka chak ber, mahse, Zorina ber ka hmu mai lo khan min ti hrilhhai tlat lawi.

“Nu..khawnge Zorina..?” ka ti ta nge nge.

“Doctor te nen khan an inbe lawka..” peih leh peih lo hian ka menga, Damdawi kha ka rui nge pawh ka hre lo, ka mut a chhuak ngawih ngawih.

“Naute a tha lo tihna a ni em?”

“Aih..tha vek e,thildangah zawk..” ka mit ka chhing leh a, enge an sawi lam chu nakinah ka la zawt ang chu, tunah chuan muthilh ka duh ber.

Karkhat na cham chiahah kan chhuak a, Naute hming atan Zorina piin ZOHLIMAWMA a phuah a, ka pawi ti lo,a kum a tam tawha, a tu chhuan neih hmasak ber a ni bawk nen a duh duh phuah se ka ti zawk.ka che thei vek tawh nangin indim erawh ka mamawh tih an sawi nasa,zan khatmah Zorina riah loh zan a awm lo,Nautei leh Zomuani an inriah chhawka, ka nu chhun lamah a rawn awm ve ziah thung.Naute a mu duh a, a tah belh lo phian bawk nen riah pui hahthlak kan ni lem lo hlauh bawk.Hnute tui ka nei miah lo erawh a buaithlak ve deuh thung.

“I muhil tawh mi?” khumah a rawn lawn ve a,kan khum bulah Naute khum kan daha,mahse, ka bulah Naute ka muttir thung,thla li tal a tlin hma chuan mut hran tir ka tum lo bur.

‘Muhil chiah lo..mahse,a chhuak..”

“Kei pawh..zanin chu tui deuhin mu ang aw” a ti sup a, min rawn kuaha.

“Nia, i chau thei ngawt ang..” ka ti leh rih.

“Aih, chau lo..mahse, tlem chuan mut ka mamawh in ka hria, Damdawiinah kha chuan ka muhil tho nangin ka mutui chiah lo..” a ti sup a.Ka hrethiam takzet,min ruahpuitu apiang khum awl awmah an mut angaia, Zorina zawk chhuatah a mu thin a, ka khawngaih thin.Tihngaihna a awm der si lo.

“Ka lawm e aw..” amah bawkin a ti leh a.

“Ngati maw?”

“Fapa min hrinsaka, chuan,ka nupui i ni bawk a..” ka samah a hmai a rawn phum vang vang bawk.

“Kei hi ka lawm zawk daih asin..Ka tan hian engkim i ni tak tak ania”

“I tan engkim ka ni a, nang chu ka khawvel a ni thung a, chuan,kan naute hi kan Pahnih khawvel thar a ni bawk”

“Ka hmangaih che..”

“Nang aia nasa in..”

Kan naute thla a tling ve ta,tlaiah Naute puala Dinner neih a rawta, eitur zawng zawng erawh siam tu tur midang a ko vek.Awmpui pahnih kan neih sa bakah lang kal kan nei a, Nau awmtu tur a la rawn lak belh ta cheu,ka sawisela, a nui mai mai.

“Hon...ka lu na hi nidang a ang tlat lo” a ti a, Kekawr dum,a pian nalh zet tilang tur niawm taka thui a ha a, a kamiz hak ban a thlep pah mawlh mawlh bawk.

“Damdawi i ei em?” ka ti a, Zohlima hnute tur ka siamsak pah a.

“Um, Officeah ka ei tawha,min chhawk pawn ka hre lo”

“I Doctor kha kan han hmu leh lawk mai dawn mi?” ka ti a.

“A pawi lo maithei” a ti sup a, sawi awlsam a tum viau nangin a hmelah na nei a ni tih a lang thei.

“Ka lo kal ve ang,kal hmain ka call lawk dawn nia,kan mamawh chuan be turin min tih kha”

“I theih chuan?” a nui a, kan nupa hian kan chhuak dun khat ta viau, Nau awmtu nei mah ila a la no lutuk a, midang kuta dah ka duh lo a keiman ka buaipui vek.Lian pawh nise an kutah ka dah angem ka la chiang chuang lo,ka fa a ni miau a.

“Ka nu a lo then hman chuan ka kal thei ang chu..” ka ti a.A thle buk a, Naute khuma awm chu a pan hnaia.

“Lo thleng hman turin ka’n call ang..” a ti a, min en lo in Naute lam a en run bawk.

Doctor kan be lawk vek tawh a, kan thlen chuan kan hmu thei nghal mai, test chi hrang hrang kan nei tha leh a, Tlai lamah chawei tur kan nei teuh bakah Naute kalsan kan ni a, ka hmanhmawh ru viau,Keimahin result entir turin ka lut leh a,test result a en vung vunga, ka duh aiin a en rei lam hret.

“A tha em?” ka ti ta nge nge, a pen in Dawhkana test result awm chu a chhu kauh kauha,muangchang hian min rawn en a, a tarmit a la thla leh rih.

“Tha lo, ti ila en that leh ka la duh ang,tunah hi chuan ka sawi chiang ngam chiah lo nangin a thluak lam effect niin ka hmu tlat..”

“A thluak maw? Enge a awmzia?”

“Aw, a thluak a hriatna lam control tu hi a fel lo,hei hi naktukah test leh ila kan ti chiang thei ang,tuna a landan ka hmuh chin hi a nih chuan kan tlai thelh maithei..”ka ka chhung a ro halh mai.

“Enge a awmzia? Lu na ringawt ania, kan rawn kal hmasak atang khan thla tam pawh a la vei si lo a..”

“Nia, a la rei lo khawp mai, a lo kal hmasak khan engmah dik lo ka hmu lo,ka hmuh hmaih ni loin dik lo a awm lo ka tihna nih chu..mahse, tuna a landanah hi chuan treatment a la vat anih loh chuan a taksa chanve hmawk hi a zeng vek thei..” ka melh reng ringawt...

ZORINSANGA  hi a zeng ang maw?!!!