EVERGLOW-25

Chapter- 25

“Khawngaihin en tha leh teh, chutiang a ni ngawt thei lo ang..” ka bag hnuaiah ka kut ka hum ruh tlat bawk.

“Naktuk lamah kan en tha leh dawn nia, test pawh hi a bul atangin kan ti leh bawk anga,tunah chuan Damdawi hi sang deuh hlek ka chawh ang che u,hei hi lo ei se,naktuk erawh thulh ka duh lo ania” nelawm tak hian a nui a, mahse, a nui hmel chu a lem vek ni hian ka hre tlat tawh.

Pawnah ka chhuaka, Zorina ka hmu mai lo, ka hawi kual a, Tukverh bulah a kekawr ipte zen in a lo ding a, hnuailam a lo thlir vung vung bawk,a ni thei hlawl lo, Doctor te pawn an tisual ve thei tho a, hetianga lo mangang tur ka ni lo..Keimah leh keimah ka inhau a, awmzia a awm chuang der lo.

“Kal ila...” a bulah ka va ding a, a rawn hawi vut a.

“Um, i lo chhuah lai pawh ka lo hre miah lo a,en lawk teh...” a ti a, a hawina ngai bawk a hawi leh a, ka kal hnaia, hnuai lam ka zuk bih ve a, Mipa naupang pakhat hi Hatkora tui niawm tak  bottle kengin a lo ding a, a bal niau a, a cher hle bawk.Kawngkal te chu a lo zawrh thin a ang viau.

“Ngatinge?” ka ti sep a, In entir tur tam zawk kha test kan neih kual chhungin an lo zo duak tawha, tunah chuan pahnih khat bak an awm tawh lo.

“Lo thi ta thut ila tih ka ngaihtuah a, Bawihpuia hi ti khuan awm ve ta se..”

“Aaah, i ho em mai, haw tawh zawk teh ang, In lamah mikhual kan ngah si” ka ti a, a rawn hawia, a mitah engemaw a lang zawka, ka hrethiam chiah lo,bakah a rei lo lulai lutuk.

“Ni dawn tak, kal ila..” a ti tha ve mai.

A damdawi tur kan lei leh a, test naktuk lamah neih that leh angai tih ka hrilh a, min hnial lo in a ‘Aw’ ve mai bawk, seat hnunglam a ngheng a, a mit a chhing a, ka kut a hum tlat bawk.A awmdan inthlak danglam chuan min ti chau zual ngawih ngawih, zing karah kha chuan engmah insawiselna nei loin Office a kal a,a rawn haw hnuah a lu nat thu a sawia, tunah chuan chhungrilah dik lo awm niawm takin a mood a thlak hlawk tawh.

“Damdawi hi ei nghal mai la” ka ti a, a rawn menga, min rawn melh zawka,engmah sawi loin a kut a dawh ringawt.

Ka pe a, Driver in ngawirengin motor a khalh mawp mawp bawk, In kan thlen in khua a la thim chiah lo deuh a,chawei tur ho an lo thleng nual tawh tih hriat zetin kan compound chhungah Motor an lo tlar dal tawh bawk.

Ka nuin Zohlima a lo paw mu mek a,kan in entirna vel min lo zawt nghal vat bawk,”A tha, mahse, naktukah kan en tha leh ang an ti a...a lo sual em?” tih pahin Naute ka en a.

“Aih, a tha lutuk..han inthlak fel ula..” a ti a,Roomah kan inzui chho a, a thiante leh chhungte a hmuh tak vang nge ka hre lo,na nei hmel pawh a pu leh tawh lo..

Ka beisei loh tawpin ka pi leh ka pu an lo kal tel ve mial,an kum a tam tawh bakah len vah nuam ti lo chi an nih avangin ka beisei ngam lo hrim hrim,Zorina pi nen an inkawm a,Ka pu erawh Zorina pa leh Patea te nen an inkawm thung.Kan chawei chhung zawngin rilru nuam in ka awm thei lo,Zorina che vel ka enzui zel a, thawk lehkhatah tlu thut tur ang hian ka ngai a, hlauhna hian ka chhungril a man tlat ti ila a dik ber ang.Mahse, ka hlauhthawn angin engmah a thleng ta lo hlauh.

“Ka inbual zuai duh a, Mambawiha hi lo en lawk la..” ka ti a, ka fapa muhil chu ka en a,thla khat lek a la ni chungin a te chhe lo.Apa te lamah a kal anih chuan a te thei lo hrim hrim bawk.

“Aih...” min en loin a ti hluka, a ngaihna hre lo zet hian ka melh vak thung.

“Ngatinge? I nuam lo leh tawh mi?”

“Aih..” angai bawkin min chhang leh,min rawn en a.

“A tha, en suh..ka inbual lo tawp ang” ka ti hlaka,a rawn tho a, vawiin khaw lum uap churh leh kan boruak khan min ti chaua, ka thlan in min ti ban chuap bawk.

“Thinchhe lutuk..” ka kalsawn tur min rawn man beta,min pawm bet zui nghal hmak bawk.

“Min thlah teh,ka chau ania”

“I rualin ka inbual ve duh alawm” ka thusawi ngaipawimawh lo zet hian a ti a,ka tal laih a, mahse, a sawt lem hlei lo a.

“Zohlima a lo harh chuan a buaithlak alawm..”

‘Chhuanlamah i fapa hi hmang ziah suh aw..” a ti supa, ka hmaiah a kut zungtangin a rawn rin kual riak riak bawk.

“Chhuanlam...oh...i sawi mak ka ti”

“Anih chuan min hne tawh tihna ni mai em?” ka nghawngah a hmuiin a rawn nawr a.

“I sawi ho em mai a..”

“Anih chuan kan fapa hi a muhil a harh mai mai lo tih i hria a..enge harsatna dang la awm le?” a nui a..Ka nui ve ta nge nge.

Ka beisei loh tawpin ka mutui ta phian, ka harh leh chuan khua a lo eng ut tawha, ka inlet vata, an Pafa in an lo awm tawh lo,ka zi mar ar ar a,nimin lama thil thleng kha ka ngaihtuaha, vawiinah Doctor hmuh leh kan ngai tih ka ngaihtuaha, ka hnual leh nghal raih raih mai,vawiin test result azirin engkim a chiang ang kha a ti a, a tha lam ni hram se ka ti ngawih ngawih, a tel lo chuan engmah ka ni lo tih ka hrechiang lutuk.

“Morning...” step a ka chhuk min hmuh veleh zangkhai vuh hian a lo ti a, uluk zet hian ka en a, engmah danglam na nei hmel a pu lo,Kekawr bul a ha a, slipper a bun a, amah ang lo takin Jockey vest dum a ha a,Vest nen chauh hian Inah pawh a awm ngai mang lo,Roomah chuan thuhran nise. Zohlima a pawm bawk.

“Morning..in va tho hma ve..” a bulah ka thu thla ve a, Zohlima leng ve bat bat chu ka en a,lak sak pawh ka tum chuang lo.

“Moma hi a hnar ring em alawm tiraw Bawihpui?’ Zohlima hnenah a ti a, ani te lah chuan hrethiam ve niawm ta hian a ke leng a tawp ve hmak bawk.

“Sual em mai a,Thil i ei tawh em?”

“Aih, ka lo nghak che..”

‘Ehe..min kaitho bawk si lo a, i damdawi kha zinga eitur a awm sin..” ka ti hliai a.

“Zing ala ni tho alawm,mahse, ei vat ila..Doctor kan hmuh hmain test kha Trinity ah va la lawk vek ila te ka lo tia, tlaiah Meeting ka nei a” a ti leh duah.

“Mi an tam viau angem aw?” ka ti a, khawl an neih that avangin mi an tam thin miau a.

“Tam rawhse, kan test tur a in ang chuang hlawm lo a,a lo in ang anih pawhin kan tam belh dawn a nimai, bakah nizanah Phillipa khan a thian te a be vek a, kan kal hun hunah kan ti thei nghal ang” a ti awlsam leh mai,Nia, ka ringhlel hauh lo, Mizo zingah leh he kan Aizawl khawipuiah na na na hi chuan a tan thil harsa a awm lo tih ka hrechiang tawk tawh tlat.

“Eng meeting nge a? Chhuak lo deuh la ka duh nen “ ka ti tha leh a.

“Jordan-a rawn sawi pa khan a hna kha min leitir a tum ta tak taka,Meeting tenau deuh neih kan ngai a..”

“Ok, Eitur ka va en lawk ang..” ka ti a, ka thawhsan a, Zoi’n kan ei duh tur min lo zawt nghal a,thil danglam vak kan ei ngai lem lo,Thei lam kan ei nasa a, Zorina bik hi chuan thau belh a hlauh avangin a Diet lam  uluk thar a, Buh hi nikhatah vawikhat chauh a ei a,thildang Fats awm lo chi a ei uar deuh thung.

Dar 10 rik hmain kan chhuaka, Traffic jam hisap a kal chhuah loh chuan kan Khawpui tawt lutukah hian hunbi neih a harsa talh zel,Punctual lo ni hlawh pawh thil awl tak a nih phah ve thei tlat bawk.A sawi lawk ang ngeiin engkim kan thlen veleh kan ti thei nghal vek a, result nghah chhung pawh rei a ni hek lo.Naute ka ngaihtuah avangin ka nu kan ko phei leh a, Nau awmtu kutah ngawt kalsan chu thih hrehin ka hreh.

Zorina Doctor kha tlai lamah chuah Clinic ah a thu thin a, mahse, Greenwood lamah kan hmuh theih tur thu a sawi avangin kan pan phei lehnghal a,rei pawh nghah ngai loin kan hmu thei lehnghal mai.Hlauhthawnna vangin ka lungphu a dik leh thei tawh lo, a chhe zawng a thlen loh nan ka rilruin ka tawngtai a, Zorina erawh nimin lam ang lo takin engmah na nei hmel a pu lo a, danglamna nei awm pawn a awm hek lo.

“Kan pahnihin lut ila..’ ka kutah a rawn vuan a.Rang fe hian ka lu ka thing vat thung.

“Anih chuan keimahin ka va lut mai ang,lo thu la..” tih leh din a ruala, rang lutuk hian ka ding chhuak ve nghala, a test result ka ken chu pek ka tum lo,amah hian engmah hre lo se ka duh a, keiman a tul chu hre vek zawk ila ka duh.

“Ngai lo,keiman ka va hmu ang..’ka ti a, min rawn en a, a mit a ti zim deuh sun bawk.

“Thil tha lo thleng tur ang maiin i awm a..” zawi sup hian a ti a, a thle buk bawk.

“Engmah awm lo e..”

“Ok, anih chuan kan pahnihin kan lut ang chu..” a ti a, a sawi zo hman deuh chiah tihin lut turin min rawn ko ve chiah bawk.

Min hmuh rualin nelawm tak hian a lo nui leh a,mahse, a nui hmel chuan min thlamuan eih lo.Thu turin min ti a, a test result kan ken chu ka pe a, a phawrh a, uluk fe hian a thlir leh nghal a, ka hlauthawng lutuk tih hian a sawifiah zo lo,ka mal chunga ka kut ka suih kawp chu Zorina’n a rawn hum a, thlamuan tu tur zawk hi thlamuan ka ngai chu a ni ber.

“Result hi ka en nawn duh chhan chu nimin khan confirm nghal ngawt ka duh loh vang anih kha..” muang churh hian a ti a, dawhkanah a dah thla a,a sawi leh tur thaw dep depin ka nghak a, zawhna zawh tur pawh ka hre rih lo.

“Hlauhthawn tur thil a ni lo e, hei hi en la...” a la kang leh a, hmun khat lai chu pen hmawrin a rin kual a,min rawn en a, Zorina a en leh a.

“Hei hi bawk ti ila bawk ni si lo,Thisen zam tereuh te te awm khawm a ni a, nimin khan engmah function lo ang maiin a awm a, tunah chuan hei hi en la,bawk ni loin thil hlawmkhawm satliah a ni a, tai darh na tur anga zung kaih engmah a awm lo” ka thaw hawk a, ka chair hnung lam ka ngheng rawk bawk.Ka lo insehruh nasat zia ka hrechhuak ve chiah bawk.

“Chuti chu ka tha tihna a ni em?” Zorina zawkin a ti hmuk a.

“Aw, i thluak lam chu a tha chiang e, i mit erawh entir la ka duh hle mai, a hma pawh khan i mit lam kha anih ka ring tih ka sawi kha” a ti a, hahdam hmel zet hian a chair nghenchhan nghengin a thu awn duai bawk.

“Nia, kha lam kha chu kan check vek a, Damdawi min pe a,Tarmit bun tur em chuan min la ti lo..” awlsam zet hian a ti liam puat.

“Um,a tha anih chu, mahse, thil pakhat, lu na benvawn i chhar ve tih erawh ka sawi tel angai tlat mai,thil hlauhawm lutuk phei chu a ni lo a” a ti leh a.

“A serious viau em?” ka lo ti hmanhmawh.

“Serious lo ti ila a na a chhuah chuan na tak a ni ang,Khawvelah hian chutiang natna nei chu an tam lutuk,tih damna a awm chuang lo, a damdawi bik erawh a awm a, chu chu a nat apiangin i ei zel mai ang chu”a ti a,a sawi danah chuan tlem chuan ka hahdam leh ta deuh.A thluak lam mawlh kha ka buai phah a, tunah chuan Lu na benvawn a ni ta zawk hlauha,a tuartu tan chuan thil nuam ni chuang lo mahse ‘Zeng’ tih thlawt ai kha chuan a hahdam thlak zawk.

Damdawi min ziah that sak leh a, Zorina lu na kha Mizo in Lu na pui kan tih mai,Migraine a lo ni a, a na a chhuah chang chuan  a bulah midang awm loh a tha tih a sawia, Hriau tla ri takngial pawh Bomb puak ang maia ringin he natna tuartu hian a na a chhuah lai chuan a hre thin tiin a sawi bawk.Inah min thlah leh a, Lunch kan ei hnuah ka nu thlah pahin Meeting turin a chhuak leh a, Driver hruai tura ka tih erawh min hnial fithla thak.

Dar riatah pawh Zorina a lo la haw ta lo,a test result ah khan thil hlauhawm a ni lem lo tih hre mahila ka ngaihtuah lo thei chuang lo,a hma ang khan ka riru a hah lutuk ta lo mai chauh zawk, Naute a muhil a, a bula mu chungin Tv ka en a, ka Tv en lam in ka rilru a luah hlawl lo.Ka call ta nge nge, a ring ral thak, ka ti nawn leh dawn uk a, ka thulh leh ta zawk, hna lamah a buai a, a pick lo anih chuan a hman lo tihna animai.

Ka phone nghawr dar darin min ti harh a, Zing emaw ka ti thelh,ka phone ka ban vat a,Zorina a lo ni a, sana ka en hmasa leh rih a, Dar 11 a pel vah tawh.

“Hello..”

“I mu tawh mi?”

“Ka nghak che a, mahse, ka lo muhil a..i lo haw dawn tawh em?”

“Ka lo chhuak chiah e,Sorry aw..” a rawn ti a, engvanga thuphachawi nge anih ka hre lo.Oh,ka call a pick lo tak e.

“A pawi hleinem..fimkhur deuh khan lo inkhalh la” ka ti tha ve mai.

Kan nun a pangngai leh ta viau, Zohlima pawh thla thum lai a ni ve tawha, Zorina lu na pawh ka hlauh ang em chuan a chhuak zing ta lo,hna lamah hun a pe nasa em em a, a zin deuh reng bawk,mahse, thil pakhat duh miah loh leh ngaimawh ka nei ta tlat.Noel-i duh aiin ka hmu zing ta tlat.Kan inneih hma atangin Sumdawnna thilah an thawh dun angai tih a sawi tawha, ka hrethiam anih kha,kan inneih hnuah khan ka hmu ta meuh lo a, ka chhuah khat vang pawh a ni maithei bawk,mahse, tun karah ngawt pawh vawi li lai kan inah a lo kal tawh tlat.Sumdawnna chu engpawh nise Pasal hlui te in a kal fo mai hi nunphung pangngai pel thil a ni ka ti lo thei lo.

“Fimkhur ta che mawle” Zorina rawn vin deuh thawtah chuan ka phu zawka, ka thil ken lai ka thlauh chawrh bawk. Phawk zet hian ka en a, nin hmel zet hian a ner nawk bawk.Dinning tableah Soup dah ka tum a, ka lo in ngaihtuah muk lutuk a, ka tibua tih pawh ka hre lo, a rawn au thut khan min ti phu nasa lutuk a, ka thlauh daih bawk.

“Sorry...thildang daih ka lo ngaihtuah a..” ka ti a, hruk fai tumin Dawhkan hrukna ka ban a,mahse Zoi’n min rawn tih khalh hman.

“Vawiin kha dar engzatah nge in chhuah ang?” ka ti a, amah ep zawngin Dinning Table kilin ka thu thla ve nghal a.

“Dar 11 ah,chu pawh chu nizan khan ka hrilh tawh che a” a ti leh hluk a, tun hnai ti ila kar hnih vel kal ta atang khan thil ho te teah a mood a thlak thut thut a, a thinchhe zuala, a huat a ho em em bawk,enge ka tihsual pawh ka hriat si loh hian min khak fo bawk, zanah hna vangin tlai tak takah lo haw chang a nei ta zauh zauha, ka ringhlel hauh lo nangin ka awm erawh a ti nuam miah lo.

“Oh, ka lo hre leh tawh pek lo,vawiin Zohlima vaccine lak ni kha ania”ka ti a.

“Ka nu ka hrilh tawh,a kalpui ang che” a thil ei lai ei zawm mawlh mawlh pahin a ti a.

“Kalpui kher pawh ka ngai lo ang,a harsa lo a” ka ti a, Zoi Soup min rawn chhawp sak chu tlem ka hawp a.

“Anih chuan kal lo turin i hrilh mai dawn nia” a ti leh nghut a,chhan ka tum zeta, ka chip leh hmak, kan awmpuite awm laia inbat deuh anga lan pawh ka duh lo.Kan nupa kar chu kan nupa chauhin hria ila ka duh tawk mai.

Kan nau awm tu ka hruai tel a, ka nu pawh kal angai lo ang tih ka hrilh ta tho,Nu ka ni ve tawha, buaipui ngai nih ka duh lem lo,ka theih chin chinah chuan keimaha tih zel pawi ka ti hek lo.Ka kal duhna apianga min hruaitu tur Driver a awm reng bawka, engmah a harsa lo.

“Nichin khan ka vin che a, tihpalh aw” a kal turin min rawn kuah pahin a ti kha ania, ka ngaidam thlap,a hma pawh in min vin deuh chuan amah bawk in nuam a ti lo leh ngei ngei thin a, mipa chapo leh induhtawk tak a ni chung hian ka lakah chuan a nem a, keimah vanga a inthlak danglam zia pawh amah hrechiang tu ten an sawi fo bawk.

Vaccine kan lak zawh veleh Motor dahna lam kan pan a, kan Vaccine lakna hi MC ah a ni a, a hnuaiah Motor kan dah nghal bawka, a remchang viau.“Nanun,Lo ding lawk” hmeichhe aw hian a rawn ti a, min ko tu lam ka hawi vat a, ka tum loh tawpin  Ka nu nen kan inhmachhawn ta siah mai.

“Remi,Bawihpuia hi Motorah lo va hruai lut la, ka rei lo ang” kan nula hnenah ka ti a, Zohlima ka pawm chu ka pe a,ka nu in kei min en lo in Zohlima a en vang vang chu ka mitsirin ka hmu ru reng bawk.

“Enge i duh?” ka aw a nem lem lo.

“A hmeltha hle mai” a ti daih.Zohlima a sawina a ni tih a hria.

“Sawi tur i neih loh chuan biakna tur che ka nei lo ania” ka ti leh hmaka, ka la haw reng nangin ka nau neih hma atang khan ka ngaihtuahna a luah ngun ta viau a, ka ngai chu ka ti duh em lo mai zawk.

“Ka fanu i ni a, sawitur pawimawh tak chhuanlam tel kher lo pawn ka be thei lo ang che maw?”

“I fanu kha a thi tawh..” zawi sep hian ka ti hmak.

“Ni lo e, keimah ang bawk hian min ngai ve ang tih ka hria,Ka fa te zingah pawh min chhun ber leh min ngai bertu kha i ni tlat a” nelawm zet hian a nui sak bawk.Ka nu a ni na vang vangin a hmel hi chu a tha chiang thlawt e.Nidang ang bawkin a lang zahawm leh thlap bawk.

“Anih phawt le...” ka ti hmaka, kal tumin ka inher zui nghal bawk.

“La kal suh, a pawimawh ania” ka banah a rawn chelh a.Muangchang hian ka hawi let a.A mitah tak ka melh a.

“Min thlah rawh’ ka aw a chang fak mai.

“I pasal khawiah nge a awm?”Ka beisei loh lam daih..

“I lo hriat tur a awm lo..”

“Ni lo e, ka hriat tur a awm, zin chhuanlamah hmangin a kal chhuak tih ka hria ania” ka melh reng ringawt,ahma ang bawk khan ka Mipa hmangaih leh ka in nghahna hi min laksak leh a tum a ni mai angem?

“Kha mi tenawm nen a in khawsak ang khan lo khawsak pui i tum anih chuan pawi i ti hle ang” min chhan tuma a ang ziau tawh chu midang lo kal an awm avangin a ngawi leh rih,an kal liam a nghak tih ka hria.

“Ni lo e, ka tihsual siamthat tum khan ka bei zawk asin,chuan,hei hi hrilh che ka duh, engmah ka sawi i awih lo maithei,thil pakhat chauh erawh awih turin ka duh bawk che,I pasal hi khawiah mah a zin lo ania, Jordana Hotelah i duh phawt chuan amah hmu turin kan kal thei ang, chu pawh a nupui hlui nen room intawmin an awm lai hmuh kan duh chuan....”