EVERGLOW-26

Chapter- 26

“Ka Pasal chungchang i duh duh i sawi ka remti lo ania” ka beisei aiin ka aw a pangngai.

Ka chhandan chuan a barakhaih tih hriat zet hian a mithmul a tisang ak a, hei hi chu a hamhaih deuh changa a tih fo dan a ni tih ka la hrereng tlat.

“A tha lawm, mahse, ka tihtur chu hriattir che hi a ni a, abak kha chu i thu a ni tawh mai, min mamawhna i neih chuan..” ka ban vaiin a tawng lak lawh lai ka ti tawp a.

‘Aih, ka mamawh ngai lo ang che, hmanah ka mamawh lai che khan kan tan i awm tawh lo a, tunah chuan ka mamawh tawh bik lo che..” ka nui lui sak bawk, harsa ti zet hian a nui a,a hmai dang deuh lapah chuan a chhungrilah nuam tih lohna a awm tih hai rual a ni lo thung.

In ka thlen veleh Roomah ka tlang chho nghal a, Zohlima lah a Vaccine lak avangin nidang a ang thei lo, a tah khat tehlul nen a tap deuh reng a, puak mut tumin ka awia, rei fe ka beih hnuah a muhil ve ta hram, chau zetin khumah ka let thla a, chunglam ka melh a,Ka nu thilsawi te kha a mal malin ka rilruah a lo lang leh a, a bulah khan ngaihsam awm tak leh Zorina lam tang tlat angin ka tawng anih kha, mahse, ka chhungril hmu thei se chuan min kalsan kher lo hial maithei,a sawi te kha rin loh tum eltiang mah ila ka chhungrila ngaihthat lohna awm tlat leh Noel-i a lo lan fo avanga ka rilru nuam lo tawhsa a belhchhah a, Jordana Hotelah khan fiah tura va kal kha thih hrehin ka hreh a ni zawk.A sawi ang tak khan thil lo awm ta se ka tuar chhuak zo dawn tlat lo.

Zomuani ka biak angai, nge Joe-a zawk ni ang? Joe-a hian kei leh Zomuani ai fe in thil a hrechhuak hma thin a, hmelhriat leh thian tam tak a nei bawk,Pasal ka neih hnu hian kan inkawm tam ta lo a, ama puala eizawna a din ve tak vang a ni tel bawk pakhat.

“Hey...enge ni ta?” phone a pick veleh Hello pawh ti hmasa lo in a rawn ti nem leh hlai mai.

“I buai nge buai lo?”

“Buai ve tho, naktuk inneihna ami tur Hall cheina vel ka khawih mek a”

“Chuti chu nakinah nimai rawh se”

“Sawi mai mai teh, Bawihpuia a tha em?”

“Tha e, mahse, hei vawiin chu Vaccine kan la a, a khua a ti sik ve a, nidang ai chuan a sual ve deuh, tlaiah chaw i lo ei hman angem?” ka rilru a lo lang hmasa ber ka sawi ta zawk.

“Aaaaa, ka hman ka va ring lo,ee.Tlai deuh hlekah a pawi loh chuan hman leh si ang” a ti a.

“Eng hun pawh a pawi lo,Zorina a zin a, hun bi kan nei vak lo” ka nui lui hak bawk.

“A that hlauh chu,ka lo kal ang..” a rawn ti awlsam leh mai.

Phone a sawi atan chuan a pawimawh mah mahin ka hre leh hnuhnawh a,amah ngei lo kal se sawipui tha ka ti leh ta zawk, rilru thawk thut a sawi mai chi niin ka hre leh ta lo, ngaihtuah fim hman lo a thil tih hian pawi lian zawk a thlen thei miau a, ka nu hmel ka mitthlaah a lo langa, a hmel thutak zetah khan dawt a sawi ka ring lo, min kalsan hma hun kha ka ngaihtuah kir a, vawikhatmah Dawt min hrilh ka la hre ngai lo,min kalsan dan leh a khawsak dan khan min ti na em em lutuk a, kha vang zawk khan ka hua a, ka theihnghilh thei lo mai zawk.

Ka inbual a, ka inbual chhungin Bawihtea a lo harh ka hlauh avangin room kawngka ka kalh ngam lo a, nidangah chuan a mu hi a nghet ve thin a,mahse, vawiin chu a dam that loh avangin ka ngaihtuah a, ka hmuh phak loh a awm tir ka duh vak lo,ka inbual zawk zawka, fa neih hi a lo namai lo khawp in ka hre thar leh a, muangchanga inbual pawh duh ila a harsa talh tawh a, keimahni tan nung kan ni tawh lo a, kan fate tan a nung kan ni tawh zawk a, mahni pawimawh chu kan nawr liam mai mai thei a, fa te tan erawh a theih loh, thil engpawh kan it zawng Naute thil vek a ni ta zel mai.Ka nu bawk ka ngaihtuah a,kan unau zawng zawng min enkawl a, atan khan a lo harsa thin hian ka ring,ka pa khan eizawnna lam a buaipui avangin ka nu kutah khan kan vaiin kan awm thin miau a.

Ka inbual zawh veleh ka Phone ka en a, miss called a lo awm kalh,ka en a, Zorina a lo ni a, ka tang nghal teuh mai, enge rawn sawi a tum ang? An zin miah lo anih si chuan enge a sawi tak ang?Call back loh mai ka tum zeta, mahse, call ila a that ka ring leh ta zawk, ka nu khan dawt emaw thudik pawh sawi rawhse, ka mit ngeia ka hmuh hma chuan ka pasal hi ka ringhlel in ka thinrim khum ngawt thiang lo.

Ka call a, vawikhat chauh a ring hman tihin a rawn pick nghal mai.

“Hello..” hmeichhe aw hian a rawn ti a, tu nge anih hriattum in ka zawh buai angai lo, Noel-i a ni tih a awah ka chiang nghal mai, hlauhthawnna avangin ka kut a khur a, ka hmui ka pet nghek bawk.

“Zorina khawnge?” ka theihtawpa aw dam hian ka ti a.

“Motor a khalh laklawh lutuk a,lawk aw” a ti a,Zorina hneah keimah ka nih thu a hrilh chu ka hre thei a, ka na vawng vawng mai, an pahnihin an zin dun dawn tih ka hre lo a, hna lama kal anih miau avangin a lo hruai tel ve anih pawhin thinrim thei ka ni lo, bakah tun tum a zin tur chu kan boruak dik chiah lo nen tu nen nge an kal dawn ka lo zawt lo ve hrim hrim bawk.

“Aw..” vawt ruih hian a rawn ti hluk a.Ka kut ka humruh a, sawifiah thiam si loh natna hian min fan chhuak vek a, ka hit vek nimaiin ka hria.

“I lo call lai khan ka lo inbual a..”

“Anih chu, thil dang pawimawh a awm em?”

“Aih..”

“Anih chuan nakinah ka lo bia ang che” a ti leh nghut a, a hma ai kha chuan a aw a zia tawh zawk nangin a la nelawm chuang lo fo.

“Ok..bye” nidang ang tho a zangkhai in ka ti lui thei hram, ka rin ang chiahin chhanna ka dawng lo.

Joe-a lo thlen hma chu roomah ka tawm ta reng, midang bula hun hman chakna ka nei lo,bakah Zoi hi kei aia he Inah hian awm hmasa fe a ni a, kei aiin tihtur a hre zawk bawk,mahse, a neitu nupui ka nihna angin min zah thiam a, engmah a thu chuan a ti mai mai ngai chuang lo.

Room kawngkhar an rawn kik a, lut tura ka tih veleh a rawn inhawnga, Joe-a a lo lut a, nidang ang bawkin a nui deuh sang bawk, Zohlima hnute ka lo pe mek a, hnute tui ka nei thei ta miah lo a, Hnute siamchawp hlir a hne ta ngar ngar, a hma kha chuan zanah pawh hian a hnute siam hunah harh miah loh tum ka nei thin a, Zorina zawkin a lo tih tum a tam thin, mahse, tun hnai hnaah a buai bawk nen min pui tlem a, Naute pawh  a la ngai mang meuh lo.Ka phut chuang hek lo, hna lamah a hah in a chau em em a, Inlam leh Naute enkawl hi chu ka tihturah ka dah hmak.

“A khua a la sik em?” Khumah a rawn thu ve a, a chal a rawn dek a, Zohlima te lah chuan a melh kar bawk.

‘Aih, tunah tak chuan a zia, mahse, nidang ai chuan tap peih tak a ni” ka ti a, a kut chum biang chu a vai sek a, a ke a leng bat bat bawk.

“A ni ve bawk ang chu, Inpa chu engtik nge a lo haw dawn?” a ti leh a.

“Ka hre mai lo,a sawi ang hian a awm thei meuh lo a, tul a awm chuan a awmrei leh thin a” ka ti a.

“A buai ve em anih hi...eeee, hmanni khan Zomuani te ka hmu a” min rawn melh zawka, Inthlahrung lo fe hian khumah a let thla zui nghal a.

“Chuan?” ka ti ringawt, Joe-a tluka Hriata nen kan inkawp lai hrechiang an awm lo, mahse, kan inthen tih chiah kha a hria a, a hnuah ka nu nen an inkawp zui pawh a hria.

“Hriata khan min rawn bia a..Zomuani hian a hria em? Ka van chau ve” a tih zawm leh daih.

“Enge a hriattur chu?” ka hai der lui a, a tul lem lo tih ka hre tho.

“Hmanlai thil mawle, mahse, a rei tawh e...an inkawp fuh hmel viau alawm” a ti awlsam leh mai,nia, Inkawp fuh tak lo ni se ka ti, ka thiannu tan hian kei anga natna kha thlen lo se ka duh ber.

“A lawmawm anih chu, chhuk ila,ka ril a tam tawh ania” ka ti a, ka tho a, a rawn tho ve nghal a, Zohlima min laksak a, an chiuna lai a khawih fuh palha, a rak that bawk.mahse, a awi a, a ti tlei leh nghal mai.

Living Roomah Zoi amahin a lo awm a,hmuhnawm tih hmel deuh hian Tv a lo thlir dauh dauh bawk, kan thawm hriain a lo hawi chhuak thuai a, Lang kal kan neih tel mai bakah nau awmtu tura kan lak leh Hmeichhe tleirawl lam pakhat in vel tifai tur a awm bawka, Zoi hi chuan eisiam leh an tihtur hrilh bak a ti ngai meuh tawh lo.A phu ve bawka,sawisel tulah ka ruat lo,kei ai mahin Zorina hian a ngaipawimawh thiam zawka, chutih rual erawh chuan Awmpui anih tlat avangin kan Nupa inkar thu emaw kan chhungkaw rorel ah engmah a tel ngai lo.

“In ei nghal dawn mi?” tih pahin a rawn tho a.

“Joe-a thu thu hi nimai”ka ti a,ani lah pek chuan a riltam zia uar fe hian a lo sawi zui ve zat.Thil sawi uar hi a chin than a ni a, ‘Awi’ deuh duai hi a sim thei hek lo.

Chaw kan eikham hnuah Living roomah rei vak lo kan thu khawmuang a, a tawng deuh reng a, ka rilruah Zorina lam ngawt alan avangin a chang phei chuan a sawi ka hre mumal lo.

“Enge min koh chhan?” a rawn ti thut a,ahaw tur Gate bul thleng ka thlah a.

“Engmah, i ngaihawm alawm” ka nui a,mahse, a nui ve hauh lo, nidanga ka hriat fo thin ang in a hmel a thutak a, a Scootyah a thu ngil auh bawk.

“Sawi mai la, chhan awm loin nang hian min ko lo ang,ka hrechiang lo che emaw i ti aniang e” a ti nghat a,ka hmui ka peta, bul han tan dan tur ka bo leh deuh tlat lawi.

“Chutiang a awm lo,ka...” a ban a vai zauha.

“Ok, keiman ka sawi mai angai dawn a ni maw? Tunlai thuthang hi a dik nge dik lo ka hre hauh lo a, mahse, i lo hre thawi ve tih erawh ka chiang e” ka mitah tak en chungin a ti a, ka en rei ngam lo.A bulah hi chuan dawt ka sawi thei ngai tlat lo.Chu chu amah pawh hian a hrechiang em em bawk.

“Eng thu thang maw? I tihdan vel chu a..” za vak lo hian ka nui lui hak bawk.

“I hria tih ka hria alawm, nang hian engtiklai mahin min bum ngai lo ang,i hmeltha takah hian Dawtsawi i inhmeh lo,mahse, I pasal leh a nupui hlui chungchang hi chu keiman a dik ka hriat hma chuan hrilh loh che ka duh avangin ka zepa, i lo hre hman hi pawi ka ti hle ania” a ti leh dap dap a, kuah a, tah mai ka chak zek zek, a chi loh zia ka hria, ka tan chuan Best a ni a, mipa angin ka en ngai lo, mahse, mi tan chuan a aw nem vang ngawt hian Mipa a nih loh phah lo  a, ka best pawh nise mihrang a ni tho tho.

“Engtikah nge  i hriat?” ka hawikual a, kan bul hnaiah kan nula te emaw Driver pawh an awm ka hlau hluah hluah,kan Boruak tha vak lo hi la rei lo mahse in khata cheng kan ni tlata,an lo hre sa ve maithei a, Noel-i lah zak map loin a lo kal leh mai thin bawk si.

“Thla a la tling lo deuh, mahse, lo hlauthawng lo la, i Pasal hian a hmangaih zia che ka hre ve ania..” a ti leh a, ka bu ringawt.

“Ka kal phawt ang, min mamawh chuan min lo be dawn nia, i tan chuan hun ka nei zel tih i hriat kha” a ti leh a.Scooty a start a, mahse, thil hriatchhuah thut ka nei a, a kawrah ka va pawt leh rih.

“Lawk, kal lo lawk teh..” min rawn en a.

“Ngatinge? Enge?”

“Vawiinah ka nu nen kan inhmu a, chuan, a sawi dan chuan...” ka sawi hleithei lo..Engmah sawi loin min en ringawt bawk.

“Zorina a zin lo a, Jordana te Hotelah a awm a ti a, Jordana chu a thianpa kha ania..”

“Aw, ka hria, Abby Pasal a ni lawmni?” a ti a, ka bu ringawt.

“Chu tak chu hriatfiah ka duh a, Jordana zawt turin a number ka nei lo a, bakah nei pawh ni ila ka zawt ngam kher lo maithei” ka ti a, a thle baka.

“Min ring tawp rawh..i Best hi ka la ngai reng ania” a ti hlai a, intithei hmel fe hian a nui sang bawk.

Muhil thei loin ka let kual sek a, ka taksa a kham thum tawh bawk,Zorina lo call hun ka nghaka, a lo call ta miah lo, sana ka en a, dar 1 a ri tawh, hetiang hunah chuan thlen loh a hun tawh hek lo.Engtin nge tunah a awm ang? Noel-i nen khum an intawm angem? Ka tho ta nge nge,Bawihtea khum bulah ka ding a, a ban phar hiangin a muhil bem a, a lukhamah ama hming a inziaka, a khum banah Thingkung lem kan kilh beh tira, a zarah Ransa lem leh Arsi,Thla lem te kan tar a, zanah chuan a eng sep sep bawk.Engmah a la hre ve lo a, ka rilru natna leh ka manganna te engmah a la hre thei hek lo,ka inrin hmain ka mittui a rawn tla a,kan inthen dawn em ka hre lo, mahse, lo inthen ta ila...engtin nge nun a hman ang? Nu leh Pa kar lo a seilen hi a rapthlak zia ka hrechiang lutuk a, midang hian an tuar ve ka duh ngai lo ang, mahse, kan nupa kar khi mek hi keiin siamthat tum eng ang mahila Zorina zawkin a tum ve miau si loh chuan tih ngaihna a awm lo ang.

Tukverh lam ka pana,ka nawrtawlha, thil in ka sam a rawn chhem leng nghal dar dar bawk,Balcony lian vak lo awmah chuan ka chhuaka, ka nem khar leh a, Railling ka bawha, kan ral lehlam khawpui chhung eng pe tuar chu ka thlir a, tun ang hunah hian keimah ang bawka rilru pik,mut pawh muhil thei lo hi an awm ve angem tih ka ngaihtuah a, an awm ve em em ang, mahse kei ang chu anni lo ang, kan inneih atangin kum khat lekah ka pasal leh a nupui hlui sawi zawm leh an ni a, thil pangngai a ni hlawl lo.

Ka harh leh chuan khua a lo eng vek tawh, Zohlima khum lam ka en vata,  a ke a leng bat bata, naute fel tih takah a tap miah lo thung, ka tho nghal sawk sawka,nizan khan mu tura khum ka panin dar 4 a ri thuak a, ka mit a thial deuh urh a,Naute ka pawm chhuaka, a Diaper ka check a, ka thlak nghal a,a hnute ka siam zui nghal bawk.Engkim Naute mamawh zawng zawng deuhthaw hi Roomah hian kan kawl vek ti ila a sual tam lo ang, kan neih hma deuh khan Naute tan hmun thawl a mamawh ang tiin Zorina’n Mistiri a ruai a, a siam that tir veka, kan Room dawt chiah room nen kan luah kawp ta vek.

Kawngkhar an rawn kik a, kan nula pakhat zawk a lo ni a.

“U Zorina’n a be duh che a, i phoneah a tlang thei lo a” a rawn ti a, nidawn tak, nizan khan ka off daih tak e.

“Ok, ka lo bia ang,enteh, Bawiha hi i lo la lawk mai dawn mi?” ka ti a, phur fe hian a rawn kal hnaia, phone min pe a, Zohlima a pawma, min rawn en a.Hmui phun hian a chhuk dawn tih min hrilh a, ka bu ringawt.

“Hello...” zangkhai thei ang ber hian ka ti a.

“I phone a chhia ami?”

“Chhe nang, nizanah ka charge lo a”

“Ok, nizan khan Site lam kan tlawh kual hmasa a, kan thleng tlai angreng a, ka rawn ti harh duh lo che anih kha..” dam thlup hian a rawn ti a, ka ner nawk mai.

“Um, a pawi hleinem,in tluan chuan a zia hlauh chu” ngaihsam hmel fe hian ka ti liam puat.

“Bawiha chu Vaccine lak chuan a ti nuam lo em?” fapa a nei tih a la hre hlauh ka ti rilru a.

“Nimin khan a khua a sik a, mahse, a zia leh tawh, nizanah Zomuani te an lo kal a, an enkawl thiam dun khawp mai” engvanga dawt sawi ngawt nge ka nih ka hre lo,Hriata hming ka sawi lang hauh lo nangin ‘an’ ka tih tlat avangin a lo kal ve tih ka sawina tih a hrethiam tho ang tih ka hria.

“A that chu..” a ti hmuk a, thinur na lam a lang chuang eih lo chuan min ti hamhaih letling.

“Nia,engtik nge i lo haw theih ang?” ka ti leh a.

“Naktuk anih loh chuan Tukleh a nih ka ring,Moses-a vawiinah a lo chhuk dawn a, ka officeah khan File,Bungraw list dahna kha a awm a, chu chu a rawn la ang”

“Ok, ka lo en dawn nia..”Ka ti awlsam leh mai,ka hriathiam chiah si loh hian min fana, natna nge runluih chakna zawk ka hrethiam lo.Ka nu sawi ang khan Hotelah chuan an tal kual dun lo tihna a ni mai angem?

“Eee, ka Damdawi min ken tir em?” a rawn ti leh a,ka ken tir a, ka dahna nen lam amah ka hrilh thlap kha ania.

“Aw, ka dahna pawh ka hrilh  che kha..”

“Um, min hrilh lai pawh ka hre lo..”zawi deuh sup hian a rawn ti leh a.

“Hrilh e, ka sawi lai khan i buai deuha, i mangnghilh anih dawn chu,a pawi lo, i ken leh ken loh pawh i hre lo thei kha a lawmawm lam alawm,i ei angai lo tihna ania” ka ti leh a, hei hi chu ka sawi tak tak, ei angai lo anih chuan a lawmawm lam a ni miau a.

“Um, nizan chu muthilh har ka ti..” zawi sup hian a rawn ti leh a, ka mit ka chhing ringawt.

“Hna lamah buaina a awm tihna mi?”

“Ni lo, ni zawk se tha tur ania”

“Anih chuan ka hriat ve chi a ni em?”

“Theihnghilh rawh, engmah a ni lo,nih phawt” bung vut hian a ti leh hmuk a, chhan pawh ka chhan let hmain a off zui daih bawk.

Moses-a Dar 11 velah a lo kal a, a thil rawn lak tur ka lo dah chhuahsak sa vek a, Zohlima a pawm leh rih,Nautei nen inzawmna neia ka lo hriat kha a dik tih ka hre tawha, Moses-a hian a duat em em a, zui lah an inzui nasa ngang mai bawk.

“Nangmahin ami i kal dawn?” ka ti a.

“Um, ti ila Driver ka hruai ang,nimin ka inkhelh naah ka banrek ka ti dik lo a” a ti a, Zohlima bawk a chhaih leh a.

“Mahni a kal ai chuan a khawharthlak loh ang chu,Noel-i a kal ve em?” a hming ka lam zawngin ka ip deuh chawih bawk.

“Niminah in pa te rualin a kal ve a, mahse, vawiinah a lo chho ang” a ti awlsam leh mai, engmah dik lohna nei awm pawn a sawi lang lo,thil pangngai sawiin a sawi mai.

“Anih chu..a lu na hi a chhuak leh zauh thina, ka ngaihtuah deuh thin a” ka ti leh a, a chhuak zen zen lo nangin a chhuah tum a awm zauh zauha, amah khawihtu te lah kha tun thlengin engmah chanchin hriattur a la awm ta lo cheu.

‘Lungngai suh, a enkawl dan ka thiam viau tawh ania” a nui a, an zin dun fo a, ka ringhlel lem lo.

Chawhnu lamah room ka tihfel laiin Joe-an min rawn call a, ka hlauthawng lehnghal ringawt.

“Hello..” Zorina T-shirt ka thlep pah a.

“Hun i nei em?”

“Chhuak turin nge inbe tur hian?”

“A pahnih hnihin..”

“Naute a muhil mek a, ka la inbual lo bawka..”

“A pawi lo, keipawh darkar chanve hnu lamah lo chuan ka hman lo ang” a rawn ti a, ka ngaihtuaha, ka chhuak dawn anih chuan Naute ka kalsan angai dawna, chumai bakah Inbual ka la ngai dawn bawk.

“Darkar khat hnu lamah ti zawk ila, chuan, kan rei angem?’ ka ti leh a.

“Aih, rei lo ang,ok..darkar khat a liam hnuah in Inah ka lo kal ang” a rawn ti leh lar lar a.

“Driver a awm tho a, ka rawn inhruai tir mai ang, i awmna sawi la”

“Ngai lo, kan pahnihin kan chhuak dawn nia” a ti ta tlat,enge a tih tum a sawi hauh lo nangin ka hlauthawng zual sauh thung.

“Enge kan tih dawn ka hre lawk thei em?”

“Aih, mahse, thil tha lam a ni lo tih erawh ka sawi lawk duh ania, chuan, thil pakhat leh lawk,i Nu kan hmu dawn bawk ania”

“Aih..’

“Aw..kan hmu ang” a rawn ti ve thung, thil kal tawh ka hrechhuak nghal uar uar a, Zorina hnena Mama tan inhralh tura min nawr lai khan hetiang chiah hian a awm tawha, nek luih theih miah lohin a khawsa a nih kha.

Darkar khat a liam leh meuh chuan Jordana te Hotel Lobbyah kan awm der tawh, kan thlen chuan Ka nu a lo awm tawh bawk.Enge kan tih dawn engmah ka la hrethiam chuang lo a, nimin khan ka nu khan he Hotelah hian Zorina leh Noel-i an awm tih a sawia, Joe-an thuthang a awm tih a sawi ve leh bawk nen khan Ka nu sawi kha ka lo awih hman titih a, mahse,  tukinah an zinna atangin min rawn bia a, chumai pawh ni loin Moses-a pawn an kal ngei tih a sawi chiang viau bawk.

“Naute i rawn kalsan a ni maw?” damthlap hian min ti a, ka bu ringawt.

“Joe,kan tihtur engmah i sawi si lo a” Joe-a zawk ka bia a.

“I nu khan a hria alawm,niminah pawh a hrilh tawh che kha” ka nu lamah a thle zauh ringawt.

“Ni lo, hetah an awm lo, Moses-a ngei pawh a lo kala, an zin ngei tih a sawi chiang vek,an mahni chuan min lo bum pawh nise Moses-a chuan min bum lo ang”

“Chu zawng ka hre lo le”

“Nia, i hre lo ang, i duh duh  i sawi pawp tlat a,mahse, oh..LALPA” ka hmui ka hup nghal chawt ringawt.

Ka hawina lam rang fe hian an hawi dun ve nghal a, hawi pawh ka hawisawn thei lo,ka thisen kal an chawl vek zawin ka hria.

Inchung panna Stepah Moses-a a lo chhuk a, a hnungah Zorina leh Noel-i an lo chhuk ve mek bawk.Ka awih thei lo zawk, Moses-a hian an pahnih a min bum an tumna ah hian a lo thurualpui anih chu!!