STOP- 6

Chapter- 6

‘Nakinah ka rawn bia ang che” ka ti hmuka.

“Aih,tunah hian ka lo kal mek,ka rawn thehchhuak ang”

“Ni lo e, thil dangah chuan i duh duh ti rawh,pawi ka ti lo,mahse, hei kher hi chu keima mimal nun a ni a, tel ve lo zawk la ka duh ang ka ring” ka aw a chang lam hret.

“Takzet..” a rawn au leh nghek.Ka ner nawk mai.

“Aw,engmah ka sawi mai mai ngai lo tih pawh i hria alawm” ka aw a dam ta deuh.Min chhan let leh hmain ka off a, ka mit ka chhing zui vang vang bawk.

“Tu nge?” zawi sep hian Ruby awin a rawn ti a.Ka mengchhuaka, a hmai dang lap maiah chuan manganna niawm tak a lang thei bawk.

“Ka u anih kha..”

“A hre tawh tihna ni em?”

“Um,anih kha...”ka ti hmuka, ka puan sin ka thehhlima, ka thu chhuak a, ngaihtuah muk hmel fe hian a hmui a pet fan mai.

“Engtin nge ka awm ang?”

“Tikhan awm tawp mai rawh” ka nui lui a, a then ve sak nangin a nuih a za lo tih a mitmeng dul raih maiah chuan a lang thei,min chhan tumin a ang ziau a, mahse a phone a rawn rik takah chuan a phone lam a melh ta zawk.Che sawn map loin ka en ngur bawk.

“ Hello...” zawi sap hian a ti a, a dinna atangin tukverh lam panin a kalsawna.

“Lo haw ang, englo ania nizanah Ni...’ ka tho a, ke lawngin a dinna ka pana,lehlam thusawi a ngaithla a,ka kal hnai tih pawh a hre lo.

‘Aih, chutiang a ni lo..nizan kha chuan amah zawk khan ...” a tih lai mekin a phone ka pawhthlak saka, tu nge a biak ka hre lo, mahse tuemaw amah hnaih tak tu lakah a insawifiah mek a ni tih erawh ka hre thei mai thung.

“Eng...?” phawk zet hian min rawn ena, min laksak tumin a rawn phar nghal da bawk,mahse, awlsam zetin a banrekah ka hmera, a tal deuh laih chu ka pawt nawka, a kawngah ka kuaha,min rawn nek rawk bawk.

“Nang a hur bo mai mai enkawl che hi kan hna a ni lo..” ka hriat hmasak ber chuan engtin nge a khawsak ang tih thui tak min rin thiam tir nghal mai bawk, nizana ka thil lo kal tlang pui kha ka inchhir lo zual sauh bawk.

“Ka pi,keimah zawk, Malsawmtluanga ka ni e’ zaidam thei ang berin ka ti a.

“ Tu maw? Khawnge Zosangliani kha?” a hma ang thoin a la vin thak mai.Zosangliani a lo nih chu.Ka nupui tur pawh a hmingpum ka hre ve ta nge nge ka ti rilru a, ka thensak mai.

“Ka bulah hian a awm,nizanah a lo haw lo a, ka rawn hriattir loh che avangin pawi ka ti khawp mai” ka ti leh hmuka,thinrim hmel zet hian a thaw ri vak bawk.

“A duh leh lo haw se a duh loh leh lo haw lo se ka pawi ti lo, mahse, nizanah ka fapa amah vangin kut an thlaka, tu nge i nih lam ka hre peih lo bawka, amah kha lo haw nghal rawh se” a rawn ti leh tun tun mai, Hmeichhe nasa tak a ni ngei ang, nizana ka hmuh chinah khan Ruby hian tihsual em em a neih ka hre tlat lo.

“ Nia, i tan chuan a pawimawh lo ang, mahse, ka sawi tur hi lo ngaithla la ka duh,a lo haw lo satliah a ni lo a, ka nupui turin ka ru zawk,Hmeichhia leh Zawhte te chu ruk thiang an tih kha tiraw,chuan, i fapa pawh khan mawi lo taka mi zinga a tihkual vanga kut thlak ka nih kha..” ka ti ta duah,ka aw a ring lem lo nangin a nelawm fahran lo.

“I va han chaltlai ve mawle, i nu rual zet tur leh i bialnu chhungte i biak dan ah hian inneih loh phahna tham a ni tih i hria em?” a rawn ti ve thung.Ruby ka melh chhuk zawka, hlau hmel zet hian min lo melh kal mai.

“oh,sorry,mahse, min biak dan khan a zir bik lo a, engpawh nise a lo haw rih lo ang, an khuaah keiman ka han dah ang” a rawn tawng leh hmain ka off zui hmak a,khumah phone ka thehphei nghal daih bawk.

A kawnga ka kuahna ka phelha, a ding sawn tur chu a banrekah ka vuan leha, Sofa panin ka kaia, engmah sawi loin min zui ve mai bawk,ka thu thla hnawka, ka pawt thu ve nghala,min en loin hnuailam a bih ngar mai.

“Tu nge anih kha nu kha?” ka ti supa,.

‘ Ka ni anih kha, ka pa nau’ a ti sepa, min en chuangloin a kut tin a sik niap niap a, chu lam ngawt chu a en bawk.

“I haw leh duh nge duh lo?” min rawn en ta nge nge.

“Ka hre lo, mahse, khatiang a i tawngkhum hnuah kha chuan haw tawh loh a him in ka ring’ za lo zet hian a then sak bawk.

‘Ok, nia, a mizia a tha vak lo hmel tlat,Palai kal tirna tur ka pain a hre duha, In khuaah kal mai se a that ka ring ta riau” ka ti leh a,min rawn ena, a mitmeng lian kel kawlah chuan manganna a lang chiang ngang mai,ka hmuh tirh atang khan hmeichhe in control thei tak niin ka hre thina, mahse, tun tum chu a mangang ve ngang a ni tih a hmelah a lang ta tlat.

“Engkim mai hi ka mumang niin ka hria, a thleng chak mah mah bawka, bakah zingah khan hnial tur chein ka rilru ka siam fel tawha, mahse, tunah Ka ni khatianga i tawngkhum hnu kha chuan hnial che aiin neih che a tha zawk,ih..tunah pawh hian Ka pa a be mek zawkin ka ring’a ti ta duah.An khawsak a awlsam zawk zawk lo tih ka hresa tawha, mahse a inluah atanga a chhuah hnu khan engvangin nge adang a luah mai loh? Hna nise hlawh sang lua lo pawn thawh tur a hmu ngei anga, kei pawn offer ka pe bawka,nizana a Ni fapa lah khan engkim ka hria tiin a vau bawka.Enge amah hian thuruk a neih ka hrethiam nek lo e.

‘Neih che ka tumna hi ka chak zawk zawk vang a ni lo tih hria la ka duh,mahse, ka ti tawha, tih mai mai ka tum hauh lo,Palai chu kal phawt se engkim kan ti fel mai ang,inneih hi a hmalam nise a tha in ka hre bawk” ka ti leh nghut a, a hmui a peta, a hnar a tum dat bawk.

‘Engmah ka la ngaihtuah thei lo,ka pa ka ngaihtuaha,na a ti dawn em mai’ a ti hap a, tun hun hi an chhungkaw chanchin hriat hun tak pawh a ni mahna le.

“I pa chu a lawm lo maithei, ka pa pawh a lawm ring bik suh,mahse, innei tur hi kan pahnih kan ni a, midang kan mamawh chuang lo,chuan ,i pa chuan kei aia Makpa tha a hmu ngai lo ang’

‘oh..ka beisei..’ a ner nak mai.

“Vawiinah bazar ila, i thawmhnaw tur leh mamawh chu kan lei mai ang, i ni te Ina mi lak kher i duh loh chuan?” ka ti a, rang fe hian a lu a thing a, a haw hreh lutuk chu ka khawngaih zawk.

‘Thil pakhat, he Inneih naah hian enge hlawkna i neih ang?” min ti ta khauh mai.

“Engmah ,dik tak chuan nang ka neih che avang hian ka thiante zingah nuih ka hlawh ang, chu zawng chu’ ka tho zui daih bawk.

‘Chuti anih chuan min neih angai hleinem,bakah mihring ka ni ve bawk a, bungrua ang maia min ngaih hi titawp teh’ a ti chang fak mai.

‘Bungrua..i sawithiam hle mai,engang pawn ngai la pawi ka ti lo,mahse hei hi hre rawh, nupui i nih na tur hi a tak a,mi zingah min tihzah ka duh ngai dawn lo, chuan, ka u lakah pawh tha ber angin lang la ka duh ang,chutiang tur chuan i induhtawkna hmang tangkai ang che” min chhang loin a thaw hak ringawt.

Ka inphihfaia, ka hma a darthlalang awmah chuan ka in en a, thil mak a ni,nizanah nupui ka ru a, mahse khawih pawh ka khawih eih lo,Inneihna hian min la phuar ve ang tih hi a chang chuan ka ngaihtuah thin,ka ngaipawimawh em em lo nangin Nupui ruk emaw neih zana mut dun loh hi ka lo la ngaihtuah ngai lo, chumai bakah ka ngaihzawn loh leh tu nge anih pawh ka hriatchian loh neih phei hi chu mumangah pawh ka la mang eih lo.

Ka thawmhnaw ka thlaka, Tukverh biang nghengin Ruby a ding a, pawnlam a thlir vauh vauh a,ka che vel thawm pawh hre awmin a awm lo.

“Thil ei ila, bakah mo thar Room a tawmreng chu Mo sual an ti mai ang che’ka ti supa, ka chhaih chak tlat.

‘Ka ril a tam lo’

‘Ouch,i ei tho angai, ka pa ngaihdan hi hre nghal bawk la a tha ang, Pathianin malsawmna chaw min pe a, kan dam anih chuan chhungkuain Dawhkan kan kil tlang ngei ngei ang, hna lamah problem kan neih anih chuan thuhran nise, tin, peih loh vang mai mai a chaw nghei hi a duhdan a ni hek lo..Ka nupui tur i ni a, he inchhung Mo leh nakina he In enkawl zuitu tur i ni a, kan dan te hi engmah ziakin dah lo mah ila i vawn a, i chhawm nun a la tul ang’ ka ti ta duah.

‘Nupui,Mo...ngaiah neih a har dawn hle mai’ zawi sap hian a ti halh mai.

‘Nupui tihtur engkim i tih hunah chuan ngaiah  i nei em em ang’ka nui lui hawk bawk.

‘Hmeichhe kawp lai i nei em?’ teh daih chuan a..

‘Nei ta ila...?’ a mitah tak ka en a.

‘He thil avanga a na tur hi ka duh ngai lo ang’

‘Tumah an na dawn lo’ nghet churh hian ka ti a, a mit a la sawn ta nge nge.

‘Nia, chu chu ka beiseia, hmeichhe kawp lawr chi i ni tlata’ ten hmel zet hian a ti hlak mai.Hreptak hian...Mi hretu te zawng zawngin min sawi dan hi a dik ngei nangin inchhuanna tur a ni hrep lo e.

‘A that chu,ka kawp te zingah i hming a lang ve ngai lo ang,ka nupui i ni zawk dawn miaua,chawimawina ah ngai mai rawh’

‘Chawimawina,ni lul lo e,ka inten zawk,mahni pawh inhmuhim thei lo ka ni hi ka zak’ a meng ling hlar mai, engemaw a hriat hrep ni.

‘Ka nupui nih chak hi an tam kher lo maithei a, mahse,an tlem lutuk ka ring chiah lo’ ka induhtawkna a khawih che tlat.

“An tam chuan nei mai la tha tur’ a ti leh salh,a hma lawka Puih ngai kha chu a ang leh ta lo.

‘Aih, ka duh lo tlat,nangmah ang deuha mahni nihna aia sanga in ngai leh tha inti ve tak hian min ti phur zawk’

‘A va lawmawm ve,fakna ah ka ngai e’ a mitmeng lian nalh zet leh a mithmul sei er sang chu ka ena, a hmai sen tawn tawn chuan a thinrim tih a tihlan rualin a ti lang tha zual sauh,a vawikhatnan a hmui nalh zet chu ka fawp chak ta tlat bawk.

Ka pan hnaia, a tawlh hnung ve hrat thung,mahse, ka kal hnai zela bangin a dan hma chu a tawlh ve zel bawk,ka mitah tak a en ran bawk,diktak chuan tlemin ka zam ve deuh tih ka hria, hei pawh thilmak bawk, Hmeichhia vang hian ka la zam chhin ngai lo.

Bang a va si a, thinrim niawm tak hian a mit a khap zauha, a hmel a dur deuh khap bawk, min hlau hmel a pu lem lo thung,chu chuan min ti thinrim sauh bawk,min hlau se, ka hmaah khawngaih min dil chungin tap se tih ka ngaihtuah rih tlat.Ka kal hnai leh sauha, a mit a chhing ta nge nge, a ban a thlakthla hnaka, a ding zum zat bawk,a lang khawngaihthlak awm reuh kher bawk.

A lu chung bang ka nema,ka kun hniama, a hmui tlema kau deuh chu dim tein ka zuk si a, a kawngah ka ban lehlamin ka kuah a, ka pawt hnai nghal salh bawk,a hmui nem thep chu ka lo rin ang chiahin fawh a nuam takzet, min chhang let loin a chip tlata,min kuah let bawk hek lo.

“Mam...oh...’ ka u aw ka hriat rualin ka thiltih lai ka chawl nghala, Ruby inlakhran tum erawh chu ka kuah nghet sauh thung,ka thlah rual rualin ka u tan hun tha ka pe a ni dawna, chutiang mai mai a tih kual atan ka phal tlat lo.Humhim ka duh hluah hluah.

Muangchangin ka hawi chhuaka, ka inher a, Ruby ka kuahna ka thlah chuang lo.

‘Room a i lo luh dawn chuan kik hmasa tawh la tiraw?” ka aw a vut ruih mai, diktak chuan ka thil lo tih zawh chiah kha mak takin ka vawikhat tihna ang maiin keimahah a cham tlat.

‘Engmaw? Aw,nia..’ a ti bah naka, mahse keimah min en lo,Ruby zawk a melh ngar mai.

“Hei hi ka nupui tur Ruby anih hi,i hriatsa nimahse tunah chuan i nau anih tawh dawn avangin ka hmelhriat tir leh che ni tehse,chuan,hei hi ka u ania,i hriatsa kha’ tih pahin ka u lamah ka bu nghut bawk.Ka u hmai sen tawn tawnah chuan enge thleng ang tih ka lo ngaihtuah daih bawk.

‘Ka be duh che’ thinrim insum tih hriat zet hian a ti ta nge nge.

‘Thil ei kan lo tum meka, i hmanhmawh em?” Ruby ka kuahna ka thlah dula,mahse, amah zawkin min rawn hnaih leh nghal sauh thung.A awmdanah a zam tih ka hre thei mai bawk.

‘Hmanhmawh,Ka pa roomah ka lo nghak ang che’ a ti leh hmaka, a inhera, a chhuak zui nghal daih bawk, hmeichhe nasa leh induhtawk tak a ni tlata, Ruby ka hmelhriattir vang ngawt pawh khan a khua a sik hial maithei,mahse,..amah nen kan danglam lo,unau kan ni miau a, tunah pawh hian ka u ang chiaha luhlul ka nihna a lo lang ta chiaha,ka thiltih tur hi ka ti tlang ta reng bawk,ka lo la ngaihtuah duh loh nimahse Inneihna hmanga phuar ka ni kumkhua tawh ang.

‘ I tha em?’ ka melh chhuk a,a bu nghauh ringwt.

‘I u kha...engtin nge niang?”

“Ka u i nei dawn lo a, keimah zawk..a chiang em?”

“Um, mahse, tlem tal pawn lo in hrechiang hmasa i la ka ti’ a thaw halh mai, a sawi dik..Kei pawn chu chu ka ngaihtuah ve tho, mahse, tunah tihngaihna a awm tawh lo.

‘Min ring rawh, mahse, i pa te biak pawhna tur ka mamawh ania..Engkim hi tihfel thuai ka duh ang’ ka ti a, min chhang loin a bu leh mai.

‘Chhuk ang’ ka ti nghuta, a hmui a peta, a hmelah chuan a hreh zia hai der theih a ni lo.

“Tuman an ei dawn lo che, ka u kha chu ka kutah dah rawh’ ka ti leh a, ka beisei loh tawpin a mittui a rawn tling ta pam mai,rang fe hian a kut hnung lamin a hru vata, mahse, ka hmu hman tho.

‘Aaaah, naupangchhia lutuk,a pawi lo, tah hian lo awm rawh, Anggua ka call anga, a awm ve chuan nuam i ti zawk ang’ ka ti ta nge nge.

“Ka tibuai hle mai che’ a ti sepa, a nui lui hak bawk,a hmai a dang lapa, a sam rawng nen chuan a inhmeh vel vek, mahse a lang der dep lehzual in ka hre tlat lawi, a khawngaihthlak awm tih hian a awmdan chu a sawifiah kim ber.Hmeichhe buaipuiawm lutuk hi ka lawm ngai lo a, no leh lutuk lah ka ngaithei bau lo,mahse, ani hi chu a danglam, a changin a induhtawk em em a, min hlau miah lo ang maiin a awma, achangin tihnat awlsam em em hmel a pu leh bawk a, a landan ang ang hi engmah tihderna a awm lo niawm tak hian amah nen a inhmeh zawk tlat zel bawk.

Anggu-a ka call a, rang zet hian a pick ve tlat.

‘Ka lo thleng tep’ Hello pawh a rawn ti lo.

‘A that chu, engemaw thilah Ruby hi kalsan lawk ka ngaia, i lo awmpui ka duha’ ka ti a, a nui kak kak mai.

‘Eheu...amah pawn a awm thei meuh na nge?” a rawn ti leh a.

“Awm thei e, a la awm ngai lohna hmun a nih vang zawk, lo kal vat la” ka ti a.

“Ka lo thleng a nimai’

Ruby lam ka hawia, ui eiru ang maiin a ti dak mai,ka khawngaih hluah hluah.Reivak lo hnuah Anggu-a a lo thleng ta mai renga, nidang ang bawkin Roomah a rawn chho tlanga,ani hi chu kei lo ang takin a tawng duha, a nelawm bawk,hmeichhia pawh hian an ngaina thuai mai renga, chuvang taka Ruby pawh hian a nel beisei ka ni chiah reng bawk.

Inhnuaiah kan inzui thla a, nizana a thawmhnaw hak ngai bawk a la ha chu Anggu-a chuan mak a ti anih pawhin a ti lang eih lo, thawmhnaw dang han hak ngawt tur awm miau hek lo le,ka thawmhnaw hak lah kha a ha tawk lo lulai bawk si,ka slipper erawh a bun thung.Chu pawh a lian lam mah chu a ni e.

Kan nula te pahnih in mak tih hmel deuh hian an  lo thlek ha mai,Hmeichhia hi ka kawp lawr nasa viau a, ka lar phah bawk, chuti chung chuan hruai haw hi ka nei meuh lo,Remi erawh kha chu a lo kal fo,mahse, zan em chu a riak ngai lo.Ruby hi chu zan a riak ta tlata, chu pawh an vawikhat hmuhna chauh a la ni zui bawk.

Ka pa room ka pansan a, ka lut thawm a hriat rualin ka u a rawn hawi chhuak vata, ka pa erawh chuan a phone a khawih mual mual thung.

‘Enge ni ta?’ Chaira thut pahin ka ti a.

‘Han sawi fiah teh’ ka u aw chang fak maiin min ti zui zat bawk.

‘Eng ber chu?’

‘I nupui ruk hi mawle, abak enge awm ang?”

‘Nupui ka ru a, engmah han sawifiah ngai a awm lo” ka aw a ring lo, mahse, a nem lo.

‘Ngawi rawh u,inhnial hian enge thil tha zawk a thlen ang? Mampui, i rilru ka hria, i pasal nena inkawp ni a i hriat kha tunah i nau nupui a ni dawn ta thuta, i hrethiam lo ang tih ka hria, mahse, hei hi i pawm angai, i nau hian engmah ngaihtuah hmasa loin a ti ngai lo,chubakah engpawh nise nang chu pasal i nei tawha, engmah chanvo i nei lo ni loin he Inah hian ro i rawn rel a rem lo ania’ dam deuh thlup hian a ti a, a aw a dam vang ngawta hnial chiam chi erawh a ni lo tih kei ai mahin ka u hian a chiang zawk ang.

‘Chutiang lam ka sawi tum a ni lo, mahse, engkim hresa veka a nei hi ka hrethiam thei lo,min lo ngaipawimawh miah lo zawk nge?” chang fak in a ti leh a, nia, a sawi dik..a pasal leh a nau in hmeichhe pakhat,chu pawh hmeichhe naran ve tak kan buaipui miau alawm le.

‘A hre sa veka a nei anih chuan a thu a nimai,chubakah i bula ka la sawi chhuah loh chu i pasal in kut a thlak che i tih tum khan thudik ziktluak lo min hrilha, kha kha ching tawh lo la ka duh,i lama tang a huaisen taka itan midang te ding tura min beisei dawn anih chuan i dik tur a ni,Mama, nang pawh i nupui turin i rawn hruai haw tawha, engmah tih tawp leh hni hne ka duh lo ania.Tunah i putea te ka be fel tawha, an lo kal ang, palai kalna tur chi kha chu ka buaipui mai ang’ a ti leh duaha, ka bu nghut ringawt.

‘Pa,mahse...kan chhungkaw tan a mualphothlak dawn asin,bakah ka pawm thei lo..’ a tih lai mekin ka pa in a ban vaiin a khap leh hmiah.

‘I pawm ngai dawn lo tih hre chungin i nau hian a nei lui tho,i pawm leh pawm loh kha awmzia a awm lo tihna a nih chu, mahse, kan chhungkaw tan mualphona i tih kha chu ka pawm zawng a ni ve thung,kha erawh kan tuar mai ang chu’ a ti leh boh a, dik tak chuan nuam ka ti chiah lo.

‘Engmah a pawi hma hian kan titawp thei reng lo ami?’ a la ti ta fo.

‘A pawi tur chu a pawi zo vek tawh, i nau hian pasal nih tumin nupui a rawn hawna, zankhat riah dun mai hi atan a pawi lo thei ,mahse hmeichhe tan erawh dam chhunga Nuthlawi nihna a ni asin’a ti leh a,ka u tawng leh tum ang ziau tawh chu ka pa hmel thutak zet avangin a ngawi leh hmiah.

Palai kalna tur te min zawt a, Ruby te khawlam engmah kan la hrilh loh thu leh nakinah ka hrilh tur thu ka hrilh ta ngawt, ka u erawh engmah sawi leh tawh loin ngawirengin a haw ta bawk, a rilru a lian em ema,a duh zawngah chuan dan theih a ni ngai lo a, tunah pawh ka pa a zah avangin a ngawi hram hram a, enge a tih leh ang tih ka ngaihtuah a, ka fimkhur a tul hle ang tih ka chiang.

Thil kan ei zawhah Anggu-a kan kalna turah kal ve turin ka sawma, a aw ve mai,mahse,ka rilru ka thlak leh a, Ruby awmna teinah kal ka duh ta tlat,a thawmhnaw neihsa kha lak sak kher lo pawn a mamawh zawng zawng leisakna tur ka nei,mahse, khati fakaua hmusit tu te kha hmuh ve ka duh tlat.

‘Jamie,kalna tur ka nei tlat,ka hrechhuak,ka kalsan zawk ang che u,tlaiah ka lo kal dawn nia’ Motor a kan lut tur min rawn ko leh a,ka thle buk ringawt.

Kan pahnihin Motorah kan chuang duna, sawi tur hre loin a ngawi ran mai,thil kan ei lai khan ka en ru zauh zauha,a buai lem lo,mahse, tih tham a ei lo.

‘I awmna ah kal ka duh a, i ni kha hmuh ve ka duh’ phawk zet hian min rawn en a.

‘Ngati? ‘

‘Hmuh ve ka duh a ni tawp mai,bakah i mamawh te pawh i la ang chu’ min chhan hmain a phone a ri a,a en vata.Min rawn en leh a, ‘Ka pa anih hi, ka rin aiin min rawn be hara’ a ti sepa, ‘ka lo be dawn nge?” ka ti supa, a lu a thing mai.

‘Hello..’ a ti sapa, mahse, hlauhthawnna engmah hriat tur a awm lo.

‘Aw, pa,Ruati khan a lo hrilh tawh che nge ka ni zawkin?” a ti dam leh thlap,lehlam tawng ngaithlain a ngawi leh rih.Ka motor khalh chauh ngaihtuah niawm takin hmalam ka en a, mahse, a tawng bak engmah ka rilruah a awm lo.

‘Nia, ih..nakinah ka lo bia ang che,bakah amah hian a be duh che a’ min rawn en a,a hmai a sen awp awp bawk.

Reivak lo an inbe leha, a phone a off a, bagah thun loin nghet zet hian a hum a, a rilru a hah hmel viau bawk.

‘Enge a sawi a?’ ka ti hluka.

‘Engvakmah, ka ni in a lo han hrilh vek tawha’

‘A thinrim nge rim vak lo?”

“Rim ve ang,a rinrawl ber ka ni ve tlata,a beisei lawk loh thil a ni miaua, oh,kei pawn ka beisei lawk lo..’ a ban a phar hliaia, beidawn hmel fe hian a dah thla leh a.

‘Nakinah ka lo be dawn nia,naktukah Palai kal tur te kal rualin kan kal ve a tul leh kan kal ve ang chu’

‘Ka hre lo, ih..diktak chuan nizan atang khan milem,duh duha control theih nimaiin ka inhria..’a thaw halh bawk.

‘I ni lo’

‘Mahse, nangmah ber hian chutiang tur chuan min siam alawm’ a ti hlaka, pawn lam a hawi zui daih bawk.

In kan thlen leh meuh chuan bawr tak kan ni tawh, mahse, ka beisei angin thil a kal ta hauh lo bawk,a Ni nen khan phone a kan inbiak khan kan in tauh deuh rap rap a, mahse, an in kan va thlen kha chuan that a lo chhuah hluau lawi.Ruby mamawh zual tur kan la a, amah pawh a inthlak nghal vek bawk,nizana ka khawih pa kha ka hmu hauh lo.

‘Ka inbual lawk dawn asin’ min rawn ena, thatchhe zetin Sofaah ka thu thluang duai thung.

‘Um..’ ka lu ka ti kanga, ka melh phei a.

‘Naktukah chuan tu nge kal ang?” a ti leh a.

‘Putea te an kal ang,ngaihtuah suh,inbual phawt la, hna tlem kan lo khawih lawk ang’ ka ti supa, vawiin hna ka kal ta miah lo,kan managerin thil pawimawh min rawn thawn tih a sawia, lo enfel lawk ka duh tlat.

Bathroom a luh veleh room ka chhuahsana, ka room dawt chiah hi room awl a ni a, a piah leh hretah Library lian vak lo kan nei a, Officeah ka hmang tel bawka,a remchang viau.Ka Phone a rawn ri a, en mang loin ka pick a.

‘Mal,ka thil hriat hi a dik em?’ Remi aw hian a rawn ti a, ka mengphar awk bawk.

‘Eng ber?”

‘Nupui i ru a,chu pawh i u pasal Bialnu hlui’ ka pen ka dahthlaa.

A vawikhatna atan ka u hlauhthawn ang thu ka hre ta pang mai chu ania.