STOP-8

Chapter- 8

Khumah ka let thla hnawka, ka thin a rim hlur bawk, Hmeichhe mak lutuk mai, a thinrim anih pawn a sawi thei,tu hmeichhia mah hian khatiang khan min la ti ngai miah lo,a duh leh a reject a, a duh leh a Switch off a,ka bulah awm se chuan ka hrem chiang khawp ang.Ka ngaihtuahna in min ti nui chhuak hawk mai,a hmel awmdan tur ka ngaihtuaha, a hmui chhah deuh leh sen nalh zet kha a ti pawrh tarh anga, a mit lian kel kawl khan min melh leh ran bawk ang..Eng ang pawn thinrim thin mahila a tawpah chuan ka nuihpui leh ta chu anih hi a.

Ka harh leh chuan khua a lo eng vek tawh, ka bawkkhupa, ka phone ka bana, msg a lo awm nuala,mahse, ka beisei ber ka hmu lo,open loin ka dah leh a, ka mit ka chhing a, kan inneihna turin ni tam a awm tawh lo, mahse, kan pahnih erawh chhim leh hmar ang velin kan la inhlat ta sauh chu ania.

Ka inphih faia, Inhnuaiah ka chhuk a,ka pa in phonein tuemaw a lo be mek a, pawn lamah ka chhuaka, nizan khan ruahsur tur angin a awma, mahse, a sur ta lo, kan kawt a hnahthel tla nuaih mai chu kan nula pakhat zawkin a lo phiatkhawm meka, kan Driverin Motor a lo hrufai hauh hauh bawk.Ka hawikuala,nakinah chuan he Inah hian kan fa te an la awm anga, ka naupanlai hun ka hman ang bawk khan kawtzawlah hian vei nei hauh loin an la infiam kual ve ang chu..

‘I u a lo kal meka’ ka hnung lam atangin ka pain a rawn ti a.

‘Um, enge a rawn tih dawn?’ ka hawi leta, ka pa in veranda a hnangtah chair kan dah a pan chu ka thlira, tlemin a zang a kul ve deuh tawha, kum taktak ka nu tel loin hun a lo hmang tawh bawka,mak takin ka khawngaih thar ta tlat.

‘A lo kal chhan a sawi lo’ a thu a, kan nula hnathawk lam a thlir a, ngaihtuah muk tak nei hmel a pu bawk.

Ka pan hnaia, thutthlenga thu ve loin veranda hungna chunglamah ka thu kaia,ka pa lam ka hawi thung.

‘Thil dik lo a awm em?”

‘Aih,awm lo..mahse, tlemin Dawr lamah kan buai deuha,chu lam chuan ka rilru a luah deuh’ a ti awlsam mai.

‘Eng buaina? Buai satliah nge?”

‘Ni chiah lo, nimin khan i u leh kan Driver pakhat an inhau peka, a chawl ta daih maia..’

‘Ka u maw? Enge a rawn tiha?” ka lawm vak lo.

‘A lo kal lo,an bungrua tur an rawn phurh kha a duh loh zawng a ni aniang, chu bakah a chhe then bawka’

‘A va zia lo ve, mahse, ban khawp khawpa hauh chu a tul lo hle mai’ ka ti nghuta,min chhang loin a bu nghut ringawt.

‘Chumi chungchang chu mi lo kal a tumna chhan?’  ka ti leh a, a lu a thing leh mai.Engtak chu ni ang maw? Bakah tunah kan inneih tur nen buaina kan ngah tawk riha, engmah buaina dang ka duh belh lo,Driver te chu a dang kan hmu leh mai ang, mahse, tun ang hun,indaih loh nat lai taka a lo ban ve ngawt mai hi ka duh lem lo, chu bakah Pasal nei tawh a ni a, kan In lamah ka duh aiin ro a rel tam tan tlat bawk.Kan inneih tur nise engmah min buaipui duh lo a, a tangkai hun turah tak ama thu lo leh a duh loh zawng ka neih dawn vang ngawtin a inla hrang a, tunah lem a duh duh a lo ti leh ngawt bawk.

Rei vaklo hnuah a lo thleng ve mai bawk, Driver hruai loin amahin a rawn inkhalha, Ka pa nen kan lo thudun chu a rawn hmu nghala, min en zawka, mahse, ka pa lam a en leh mai.

‘Pa,nangmah ania ka biak duh che’ ka pa en chungin a ti nghal hmak bawk.

‘Thu phawt ta che, engthil nge?’

‘Saturdayah kan chhuak dawna, mahse, kan awm rei ang’ ka pa bulah a thu thlaa.

‘I nau nupui neih in rawn nan hman chuan a lawmawm a nimai, in tum sa tawha, thulh kher angai lo’

‘Ka hman ka ring lo,kan lo tum lawk dan khan tun thla pum a nia, Nautei check-up nen,chu chu nia lo sawi ka tum’  zangkhai zet hian a ti leh a, nghet zetin ka thutna ban ka hmer tlat bawk.

‘Chutiang tur a ni dawn em ni?’ ka pa awah lungawi lo insum ri a hriattheih ta.

‘Ka pa, nang tal hi chuan min hrethiam la ka duh asin’ ka melh ngur ringawt.

‘Ka hrethiam tehmeuh mai che, mahse, nakinah chuan i nau hi i la mamawh ang, unau hi hetiang vang mai maia inthen tur kan ni lo,Ruby ngei pawh hi i la mamawh maithei asin’ nghet churh hian a ti leh a.

‘Aih, ka ring lo,a awm ve hunah chuan lo kal ka tum tawh lo’

‘A lawmawm hle mai’ ka insum hman lo.Min rawn en rual thawih bawk.

‘Engmaw?’ min melh ran mai.

‘A lawmawm ka ti,Ruby tan pawh hmuh fo che hi a nuam dawn bik lo tlata,i lo kal dawn lo anih law law chuan a lawmawm ka ti anih chu’

‘Mama,chutiang sawi a tul lo ania’ ka pain min rawn khap nghal thuai bawk.

‘I u ka nih hi..’

‘U angin khawsa hek lo che,bakah thildang pawh ka sawi chiang nghal ang, Inah i lo kal dawn lo a, i inla hrang nghal law law dawn anih chuan engahmah rawn inrawlh tawh suh..’ ka ti leh nghuta, ka thutna atangin ka tho a, ka kekawr ipte ka zen nghal daih bawk.Ka kut ka humruh nasa tih an hmuh ka duh lo.

‘Maw?” a thinrim aw a khur dar dar mai.Kan nula hmunphiat mek chu a rawn hawi zak zaka, kan sawi tak a hre lo maithei, mahse, kan boruak a dik zan lo tih erawh a hrethiam ang.Kan Driver erawh chuan hreawm in a awm lo, a hre phak maithei thung.

‘In pahnih khan ngawi rawh u..min zah lo em mai,khatiangin vawikhatmah tawng tawh suh u,ka mit ka men chhung chuan in unau hian in hrang thei ngai lo ang,hrereng rawh u,nangpawh, i zin tur kha cancel rawh, i cancel lo anih pawhin Inneihna i rawn hmang tur a ni’ ngenna a ni lo, Thupek a ni zawk.

Ka pa a tho a, Inchhung lam a pana, Ka u pawh a tho zui ve nghal bawk,ka pa hian min duat em em a, kei phei chu piangtlai ka nih avangin ka naupan lai atangin min atchilh a, ka nu a boral ta bawk nen ka duh hi neih loh ka nei ngai lo,tunah mahni ke a ding theia ka awm hnu thleng hian ka thil tih a sawisel ngai meuh lo, mahse, tha lo a tih chin erawh dai lo turin ka fimkhur em em thung, tunah pawh a sawi kha thutawp a ni a, hnial chi a ni lo tih ka hria.

‘Nizanah Remkimi nen in Flirt a, nupui neih i tum lawi bawka, chhungkua hi a hlutna hre rawh’ zawi fiah kak hian a rawn ti a, ka melh vat bawk.Amah hi a ni mai angem? A vawikhat nan ka Farnu anih na ang niloin Hmelma ang maiin ka en ta tlat.

‘Engmaw i sawi?” ka ti hmuka, min rawn en a.

‘Ka hrechiang che ka ti anih chu, he Hmeichhia hi tihpalh vanga nei tur i ni a,Remi hi i thlah chuang lo,chhungkaw hlutna hi hre rawh, ka pa ka hrilh rih lo ang’ min kal pela,nizan khan engthil pawi mah ka ti hauh lo, mahse, kha Photo hrep vang khan ka nihna ni miah lo angin ka lar leh dawn tihna a ni mai angem? Ka u hian a nau ka nihna leh chhungkua a ngaihpawimawh vanga sawi anih ka ring lo,mahse, ngatinge ka pa a hrilh si loh.Ka rilru a buai map mai.

Inchhungah ka lut a, ka pa leh ka u ka hmu lo ve ve,kitchen lam ka pana, ka rin ang ngeiin an pahnihin Dawhkan an lo kila, kan nula pakhat in eitur a lo chhawp chhuak mawlh mawlh bawk,ngawirengin ka thutna tur ka pawt chhuaka, eitur min rawn pe a, engmah sawi loin ka ei nghal mawlh mawlh bawk,thildang daih sawiin ka u leh ka pa an inbe mawlh mawlh thung,ka u hi ka pa hian kei ang em chuan a duat langsar lo, pasal a neihna a rei tawh bawk nen a ngai tih pawh a tilang hurh ngai lo, mahse, ani pawh hi kei ang bawka Fanu mal a ni a, ka pian ve hmain amah chauh reitak an lo enkawl tawh bawka,a duh chuan ka pa hi a hlauthiam hle a, a tih thinrim ve pawn a ti lungawi leh mai zel bawk.Mahse, thil pakhat ka hrechiang, kan inneihni ah a awm ngei ngei ang.A duh emaw duh lo emaw ka pa a hnial lui ngam lo ang.

Nilengin hnaah ka buaia, kan sawilawk dan kha chuan naktuk hi Ruby te lo chhuk ni tur a ni a, nizan atang khan min la rawn be leh ta miah lo,ka Office tukverh bulah ka dinga, ka hnuai lam ka thlir thla a, Motor an tawlh dul dul mai,kan Office awmna khawpui chhung ni tho siin a tawp lamah a ni a, keimahni Building a ni bawka, a lian thawkhat, a chung berah ka Office a awm a,a lian a, engkim mai tha thei ang ber in ka chei tir a, a nuam viau,a tul thut chuan riah nghal mai nan pawh a sitawm lem lo.Remi kha vawitamtak a lo kal hmana, helai hmunah hian thleng lo pawh a awm lo.

Ka phone a rawn ri a, ka dawhkanah ka daha, ka pan hnaia, Ruby anih ka beisei a, mahse, a ni ta lo fo.Remi zawk,ka ner nawk mai.

‘Hello..’

‘Mal,i buai em?’

‘Buai vak lo, enge ni ta?” ka aw a vawt ruih mai, diktak chuan ka be chak miah lo,Nizan khan thian nihna kha ka pawm thlapa, mahse, amah vangin Ruby a lungawilo niin ka hre tlata, Ka u lahin nuamti takin min tawngkhum thei bawka, ka be chak hran lo.

‘In Office bul lawkah ka lo kala, i la haw loh chuan i rualin ka haw thei angem ka lo ti dawna’

‘Motor i nei lo tihna?’ ka aw a chang lam hret.

‘Aw,jam nasa thei lutuka, Taxi ka hmanga, mahse, ka tum aiin ka hman har leh sia,i remchan loh chuan a pawi chuang lo’inthlahrung tak tak te pawh a ang e.

‘Rem lo hran lo,haw ka lo tum meka’ ka ti ta nge nge.

‘Anih chuan ka lo nghak mai ang che, pawnah hian ka lo awm ang’nidang ang chu a ni ta lo.

‘Ok, ka lo chhuk animai.’ Ka ti supa, Driver ka hruai lo a, vawiin chu ka kal dawn khan ka mood a fuh lo a, Dawr lamah Driver an lo indaih lo bawk nen ka hruai ta lo kha ania,bakah mahni a inkhalh mai hi Longrun ka nih lem loh chuan pawi ka ti hran lo.

Kan Manager lo vir buai zak zak chu ka haw dawn tih ka hrilha, zanin hian Motor lo thleng tur a awm nuala, Ramri chungchangah buaina kan neih lai anih avangin hnamdang Motor rawn khalh lut tur ten an hreh tlat a, Mizo awm ang angin an zuk la a,showroom lamah a then chu rawn dah thlen nghal tur a ni a, a then erawh kan Servicing na lamah an dah dawn thung,tiang hunah hi chuan keimah ngeiin ka enpui thlap thina, tun tum erawh ka peih hlawl lo.Kan inneih tur buai nen kan Manager a rintlak em em bawka, ka ring ta zawk.Engmah a tisual dawn lo tih ka hria.

Pawnah a lo ding ran tawh, kan Officeah a lo kal fo a, midangin min hmu dun lo se ka duh viau, mahse, enge pawi? Amah Ruby ber pawn engmah ka sawifiahna tur a hre duh lo a, midang te hi chuan lo sawi mai mai tehse.

‘Nizan khan i haw tluang maw?” zangkhai tak hian a ti a, ka rilruah thildang a lo lang zawk, ka sawi hman thelh bawk.Mahse, tul ka ti leh ta lo, kan inkar a buai tih midangin an hriat kher a tulna ka hre leh lo,a lo tumsa thil anih phei chuan hlawhtling a inti viau maithei.

‘Um,tluang e.’

‘Ka nu in a hmu chak khawp mai che a’

Engvangin maw?’ ka ti hmuka, ka awih chiah lem lo, a fanu pasal tur emaw ti niawm tak khan min tlawn hiam thin tlata.

‘Ka hre nang, i ngaihawm em alawm’ a nui a.

‘Min hmuh chak vak ka lo ring lem lo a’ ka ti tha ve mai.

‘I ngaisual em mai,kan innei ta lo hi pawi a ti anih pawn engmah a sawi hleinem,bakah ...angaina ve reng che a’ a ti leh a, a sawi dik maithei.

‘Tunah ka drop dawn tho che a, ka hmu thei ang chu’

‘Naah, vawiinah an zin alawm..ka haw chak lo ania, mahni a awm hi a ninawm,hman ang kha chu nise a zia anga’ a ti halha, a sawi tum ka hai lo, a nu te an zin tum chuan vawitamtak ka riak tawh tlat.

‘Khawi lamah nge an zina?’ a langah chuan ka ti ta zawk, a sawi tum ka haider hmiah bawk.

‘Ka pa thianpa te an tlawh dawna, naktukah an lo haw ang’ a ti tha ve mai bawk.

An in thleng ka thlaha, luh erawh ka lut ta lo, Mipa ka ni a, thil engemaw thleng palh thei lakah inven tluk a awm lo, he nu hian ka tan engmah a ui lo tih ka hrechiang a, tih duh loh lah a nei dawn hauh bawk lo.

Ruby nen kan la inbe ta lo fo, ka pa sawidan hmangah an lo chhuk tih erawh ka hria,Inneih na thawmhnaw vel engmah en ho kan nei lo,Hmeichhe lamin an thawmhnaw tur an thlang mai a, kei lahin Anggu-a ka best dawna, amah a inbuaipui thei vek,kan inbe lo tih erawh ka sawi chhuak lo.

‘Hello..’ ka phone ka lak rualin ka ti a, ka dar in ka chep beta, ka pheikhawk ka bun pah mawlh mawlh bawk.

‘Mala,Ruati ka nia, Ruby thiannu..’Hmeichhe aw sin lam hian a rawn ti a.

‘Um, enge ni ta?”

‘Vawiin hian tihtur i neih leh neih loh ka hre duha,Zungbun vel hi...’ nidawn tak,a hranpa a lei loin an lo chhuk huna chher tir mai turin kan ti kha ania, ka lo theihnghilh hmin hmak.

‘Hun inneih chuan kan va en thei renga,a khawihtu tur te kha ka thiante annia’ ka ti supa.

‘A that hlauh chu..dar engzatah nge niang?’

‘Ruby ka rawn hrilh dawn nia..’ ka ti nghuta, he nu hian enge a hriat hrep ni? Min la be leh eih lo,kei lahin biak ka tum bik hek lo.Tunah pawh aman rawn sawi loin a thiannu zawkin a rawn sawi leha,ka thin a rim hlur mai.A duh duha khawsak a tum anih chuan a pawi hle ang.

Dar 11 ah Anggu-a a rawn thlenga,Ruby biak ka lo tum mek thung,hna lamah pawh kal ka tum tawh rih lo,tul pawh a tul chiah lo bawk.Ka calla, a ring ral thak, ka ti nawn leh dawn chiah tihin a rawn call back ve ta mial.

‘Hello...’ ka tum aiin ka aw a bung.

‘I lo call lai ka lo hre lo a,i hman tawh mi?” nidang ang lo takin a aw a zangkhai vah mai.

‘Hman tawh, lo insiam ula ka rawn lam ang che u’

‘Anggu-a a lo kal ve dawn em?’ atthlak zetin ka thin a tirim leh ta tho.

‘Lo kal ang, i be duh mi?”

‘Aih, be duh lo e..anih chuan kan lo insiam ang, ka ni te Inah khan kan awm aw’ a rawn ti leh a, ka hre tawh tih khum nghek ka chak.

Darkar khat a liam leh meuh chuan Zungbun siamtirna turah kan awm hman tawh,Anggu-a nen an titi a,ka melh zawka, ka tih ngai loh bawk ka ti leh ta, a sam a tawn kang laha,a mithmul er sei sel sawl chu a langsar leh pek,T-shirt dum plain,tlema nghawng dar zau lam hret a ha a, a vun nung nalh zet nen chuan a inhmeh in a langsar viau,ka hmuh apiangin incheina mantam engmah a inbel ngai lo, mahse, a hak apiang hi a inhmeh em em lawi.Bengbeh kual lian lam deuh a beha, abak engmah tlereuh a inbel lo.Kekawr pawl thawl hnakin a ha a,a kekawr kawngah a T-shirt hak tlang a beng lut a, Chapal kaih a bun bawk, hmeichhe incheina hi ka enliam puat tlangpuia, tunah chuan ka en apiang hian ka hmu kim vel vek chu a ni ta zel mai.Ka enreng tih hria niawm takin a rawn hawia, kan mit a intawng saka, a mitmeng lian kel kawla min melh na chuan mak deuhin min fan rawh rawih bawk.

‘Khawiah nge kan kal dawn?” kan tlanchhuah veleh a ti a,a thu tlum deuh kak bawk.

‘Thil kan ei ang chu,ka ril a tam’

‘Eh, nitak...mahse, Inah i ei dawn lo mi?’

‘Ei dawn e, nangni pawn in ei ang chu’ ka ti leh nghuta,Ruati leh Anggu-a an titia, Anggu-a hi chuan tupawh a kawm thei vek mai,bakah Ruati hi a ngaina maithei,a lian lem lo nangin a nalh reuh viau.Nalh lawm reng renga khawsa a ni a,a boring lutuk lo hlauh bawk ang chu.

Inah Lunch kan ei ta dial, kan eikham veleh a ni teinah ka va drop leh a, a ni alo tha leh huam mai,hei pawh hi Hmeichhe nasa tak a ni ngei ang.Tu nge ka nih a hriat takah chuan min chhawr zui na tur a zawng pawh a ni mahna, a ni fapa a lo awm bawk.

Ka haw tur min thlaha, Motor a ka luh hmain Bike pakhat a rawn thleng ve chiah.

‘Ehe, a ilo thleng maw? Min lo nghak lawk rawh,ka rei lo ang’ Ruby-in a ti nghala, lut ta mai loin ka ding khawmuanga, tu nge anih ka hre duh tlat.Mipa kawp a nei em ka hre lo,mahse, a nei ang tih rinna ka nei tlat.

A helmet a phelha, a hmelchhe hran lo,a naupan hmel vak tawh lo bawk,min rawn ena.

‘Hei hi mi in pa tur chu?’ Ruby en loin min en a.

‘Um,Mala,chuan, hei hi ka thianpa,ka best Ricky-a anih hi..’ a ti a, min chibai tumin a kut a rawn phar chhuak nghal bawk.

‘Ka beisei aiin ka hmu hma ta che anih hi,ka thiannu hi enkawl a harsat chuan min rawn pun dawnnia, kei aia hrechiang an awm lo viau ang’ a nui a, ka nui ve tho nangin a tawngdan chu ka huatzawng a ni leh ta tlat pek.

‘Over lo maiteh,Mal, kal phawt la,Ricky-a nen hian kal lawkna tur kan nei a’ min nel tak tak a ang viau, kan inkarah bang sangpui a awm tih pawh a hriat miah loh, lemchan a lo thiam khawp hi a.Ka insehruh teuh mai.

In ka thlen veleh roomah ka chho tlang nghala, khumah ka let thla tawp bawk,khapa kha ka duhzawng a ni lo nghal pang,hei hi thikna a ni em ka hre lo,tumah ka thik awm ka la hre hran lo.Remi nen pawh khan Mipa dang vangin kan buai ngai lo,mahse, tunah chuan a danglam ta tlat..Ka a zo tawh anih hi a..He nu tereuh hian ka thluak a tibuai vek niin ka hre tawh.Kan inhmu lo vang vanga, a duh leh min bia a, a duh leh min be lo a, vawiinah kan inhmua, engmah hre lo ang hmakin a khawsa leh mai...Hmeichhe mak tak a ni chiang, mahse,a hmasa ber ka ni a, a tawp ber pawh ka ni ngei ang.

‘I best nge i bialpa zawk?’ ka insum zo thlawt lo, ka zawt ta nge nge.Msg a read vek,a rawn reply mai dawn emaw ka tih laiin a offline leh daih.

‘Ka bialpa ti ila engtin nge i tih ang?’ reife hnuah a rawn reply ta chauh..mahse, chu pawh thinrimna tur bawk.