STOP-9

Chapter- 9

Reply tumin ka type vek, mahse, ka delete leh ta zawk, he nu hian a duh duhin min tikuala, a duh leh min ti thinrim a, hei hi ka nih dan a ni ngai lo,ka insehruha, a duh dan danin ka awm tih a hre tur a ni lo.

Kan inneih na tur engkim kan tifel tawh,nitin kan inhmu a, chhuah dun na tur a tam tial tial bawk,engmah danglamna awm loin min bia a, a msg pawh kha ka reply lo tih pawh hreawmin a awm chuang hek lo.A awmdan engmah a thlak danglam lo a,a pasal tur ang pawn min en lo niin ka hria.

Ka u pawh ka rin ang ngeiin kan inneih hmain a lo haw leh tawha, kan in lamah a tul tul buaipuiin a rawn tap deuh chawt, ka cousin te leh ka thiante an buai zar zar viau, mahse, thian nihna hi ka duh aiin Remkimi hian a hrechiang mah maha, a lo kal zing lam hret, amah chuan a lo kal ngai lawi si lo,khak ngawt theih a ni der lo.Ruby nen pawh an inhmu fuh zing viau, mahse, Ruby zawk hian engmah danglamna awm miah loin a be leh mai,an insut zan khan ‘mahni aia upa’ tiin a tawnga, mahse, ka hrechiang tawh, Ruby aiin Remkimi a upa zawk,Ruby nen kan inkarah kum 7 lai a tla bawk.A thil paltlang te avang leh a thawhrim na hian a nihna ai bakin a ti lang puitling mai zawk.

An khuaah an haw chho leha, Inthlahna an neih turah erawh min hmu duh an awm avangin Anggu-a bakah ka pa leh ka nu unaute kan palai te nen kan han kal leh a,bungraw phurhna turin Dawr lama kan motor pakhat kan kal chhoh rualin a kal chho ve bawka,lo chhuk duh an awm dan kan hriat loh avangin Bus pakhat kan hire bawka, mahse, amah hi an khuaah a awm tam lo a, thian han tih tur em em a nei lo,an chungte erawh kal an awm nual,engmah an mahni insenso na tur ka duh lo.

‘Ka chau hle mai, zanin Party hi ka thulh thei angem?’ a pheikhawk a tlawh phelha.Thatchhe zetin sofaah ka thu thluang duaia,Anggu-a leh Ruati an awm ve bawk.

‘In lamah hian tihtur a tam ang,inleng te hian an hmu duh maithei che..’ ka ti supa, a kawr hnunglam zipper pawh phelh tumin pha leh pha loin a ban tak tak bawk.

‘Anih chuan kal loh mai a tha anih chu’ a ti leh a.A kawr hnung lam bawk a ban leh a.

A lang nalh takzet, vawiin khan Inneih kawr,simple taka thui a haa,a incheina nidang ang bawkin engmah over a awm lo,make-up pawh a mawi tawk bak a hmang chuang lo.Mahse, a langtha tih piahlam a ni thung.Ka beisei loh tawpin mi an lo kal tha em em a, engkim Biakin lamah neih vek anih avangin in lamah kan leh awl phian,tlai lamah erawh lawi kawr an ha a,chu pawh a inhmeh leh pek, a mawngbawr lian leh poh lah chuan ka mit a la lo thei lo,nia..ka ngaihtuah zawng ringawt pawn ka danglam titih..Hei pawh a mak leh ta..

‘Khawi keiman ka lo ti dawn mi?” Ruati’n a ti a, min rawn en zawka, a hmai sen tanah chuan a zak anih ka ring ve ngawt.

‘Bawiha, lo inthlak fel se, chhuk lawk ang,Ramdina khan Drinks lam kha a enfel leh fel loh zawh ka duh a’ ka ti a, chhuanlam anih rualin a ni chiah lo tho bawk.

Kan inzui chhuaka, pawnlamah awm an lo la thahnem phian,Ramdina ka zawnga, Party na tur hmun a lo pan daih tawh,kan compound a te chhe lem lo nangin Ruby-in hmun danga inneih zan hman a duh tlat loh avangin kan Inah chuan kan ti ta lo,pawi pawh ka ti lem lo,ri bung bung hi thenawm nei kan ni a,zakhat lek mahnise inthahrun a na dawn tho, inchhungah tihfel mai theih nise chuan thuhran, a ni dawn der si lo.

‘Mal,Linda-i te i lo hmu em?” Remkimi a lo ni a, tlaiah khan Linda-i te nen an haw rual tawhah ka lo ngai a, mahse a thawmhnaw ngai a la hak danah a la haw lo tih a hriat theih.

‘Hmu miah lo, ti nge?”

‘Kan haw rual ang chu kan tia, mahse, min lo kalsan daiha’ a ti a, a mangan hmel phian.

‘An la awm aniang chu, i call em?”Anggu-a zawk in min chhan khalha, a ti lang chiah lo nangin Anggu-a hian nupui nei tur ka ni tih hre chunga min hnaih a tum hi a duh vak lo niin ka hria,bakah Ruby nen an inpawh em em tawh tlat.

‘Call a, a pick thei lo a, ka zawng nasa tawh..’a ti leh a, a hawi kuala, ka hawi kual vea, Linda-i emaw Rsa pawh ka hmu lo.

‘A va pawive,Bawiha, lo han chho la, ka lo buaipui ang’ a ti leha, hnaih lo se min ti niin ka hria,ka bu nghuta, inchhung lam pan tumin ka inhera, mahse, ka thil hmuh vangin ka ding leh chat mai,Ruby leh Ricky-a an rawn inzui chhuaka, an nui dun hak hak bawk.Ka hriatthiam chiah loh hian ka chhungril a rawn chhun a, a hmaa a bialpa anih leh nih loh ka zawhna kha chhanna min pe lo, mahse, tunah a bulah a awm ka hmuh rualin kha thil bawk kha ka hrechhuak leh ta chiah.

‘Keiman ka lo drop ang che’ inher pahin ka ti hmuka, Anggu-a hmel a mak tihna lang zawk chu ka hmuh hmaih lo, mahse, ka haider hmiah.

‘Angai lo, Anggu-a a awm tho a..’ nuam lo ti tak tak hmel a ang.

‘Ngai lo, thil lei lawk tur ka neia, bakah rei lo te han chhuah thawven lawk ka mamawh’ Anggu-a hmel a lawm lohna lang chu ka en duh lo lui tlat bawk.

‘A that chu..’ a ti hmuka, min kalpel a, inchhungah a lut zui nghal nal nal mai.

‘Kal ila..’ ka ti supa, ka kalpela,min rawn zui ve mai bawk,Motor, Gate pawnah a awma, kan Driver a lo awm hnai hlauh bawk,chahbi ka laksaka, kan tlanchhuah hmain ka hawileta, Ricky-a nen lu insi lek lekin phone an lo bih dun lai ka va hmu leh chiah bawk.

‘Innu ngaihdan a ni lo angem?’ kan tlanchhuah hnuah a ti a.

‘Engvangin maw?’

‘I bialnu hlui ka ni tih a hre awm sia’

‘A hlui te chu...a ho em mai’ ka ti hmuka, nghet zetin steering ka hum a, ka mithlaah an nui dun hmel kha a cham tlat,Chu chuan min ti thinur hluah hluah bawk.

‘A that chu, mi hian thil an sawi peih em a,eee. Innu lo kal chhuahpui kha ka hria asin’ a ti leha, ka beng a verh zak mai.

‘Tu chu maw?’ ka ti supa.

‘Ricky-a kha, innu nen hian an inkawm nasa aniang, a nupui nen pawh an inthen phah tih vel an sawia, mahse ka awih lem lo’ a ti leha,Steering ka hum na zual sauh bawk.

‘Kan in ang anih chu’ a langah chuan ka ti awlsam mai.

‘I nupui anih dawn takah kha chuan ka duh aia tam a chanchin ka hria a, sawi vek hi tul ka ti miah lo,ih..mi hian kan inkawp tih an hriat vang anih ka ring, min hrilh an chak phiana, i u pasal chungchang pawh kha..’

‘Kha thil kha thil hriatsual palh a ni a, sawi loh ka duh in ka ring’ a tawnglai ka tihtawp sak hmiah,an lo inkawp reng em ka hre lo,mahse, ka u in a chungchang a sawi kha dawt a ni tlat thung.Inkawp nise a hnu khan Makima pawn a ngaihven ang chu, mahse, angaihven zui tlat lo.Ricky-a...ani lam chu ka hre lo hul hual.

In ka thlen leh chuan awm an lo tlem deuh tawh,a neitupa ber han  chhuah nul nul kha a mawi hauh lo tih ka hre ve reng, mahse, chhuah kha a tul ta tlat.Room ka pan chho a, a lo ruak vek,khawiah tak kal ang maw? Ka chhuak leha, inhnuaiah ka chhuk a, ka u lo chhoh tum nen kan intawk ve chiah bawk.

‘Khawiah nge i kala?’

‘Ka chhuak lawk’

‘Lo kal vat teh, Inhnuai roomah Makima leh Anggu-a an inhnial buai ania’  hmanhmawh hmel zet hian a ti leha, ka mengphak awk mai.

‘Maw?” ka nui hawk bawk.Min chhang loin min rawn pawta, min kai kal nghal dawr dawr bawk.

Pangpar dahna sira Step lian lo te,inhnuai panna  awmah chuan min pawt thlaa,helai hi  kan Driver te awmna a ni a, Veranda lian lo tak awm phei zaiah chuan min pawt zela, room awl a awm tela, chumi kan hnaih deuh chuan Mipa thinrim aw ka hre thei ta chiah.

‘Enge a?” luh pahin ka ti a, Makima tawng tun tun chu ka tawngri hriaiin a rawn hawi vut bawk.Mahse, Anggu-a hmai hup chunga thu  chuan ka mit a la nghal nalh thung.

‘I thianpa hi lo zilh rawh,naupangin min fiam mai mai ka duh lo ania’ thinrim zet hian a ti leh a.Engmah ka hrethiam der lo,ka hawi kuala, Ruati leh Ruby hlau hmel taka ding zum zat mai chu ka en a, engmah an sawi bik chuang lo.

‘Tuemaw tal khan thil awmzia sawi teh u’  ka en kuala, tawngtum an awm chuang lo, ka u lah a ngawi ngal mai.

‘Ruby thiannu hi biak lawk ka duh vangin ka ko a, mahse, he pa hian kal zu han phal lo a’ Makima bawkin a ti leh.Engemaw tal sawi tur a ka duh avangin Anggu-a ka melh a, mahse, a ngawi tlat.Makima ka ena, zu a in ang tih ka chiang, mahse, rui chhe hmel a pu lo, Anggu-a lah engtiklaimahin a rui chhe ngai lo tih ka hre chiang.

‘Ok, engpawh nise intihbuai hun a ni lo, U,kal phawt ru’ ka ti supa, Makima la phun hluk hluk chu ka ngaipawimawh lo lui tlat bawk.

Kan ngawi thap mai, tawng hmasa tu nih kan chak lo vek anih hmel,ka mood off sa tawh nen ka thinrim zual sauh,muangchangin Anggu-a a rawn dingchhuaka, a hmelah chuan na tak tuar a ang.

‘A zia lo hle mai..enge tih leh tur kan neih le?’ a hmel leh a aw a inmil lo.Uluk zet hian ka melh ngur ringawt.

‘In be lawk ang, Ruati i hmanhmawh em?” ka ti a.A lu a thing ringawt.

‘Anih chuan lo han chho ula..kan rei lo ang’ ka ti a.

‘Thil hi ka beisei loh danin a kal dawn tlat mai’ an chhuah veleh zawi angreng tak hian a ti chhuak nghal sup bawk.

‘Engtizawngin? Ngatinge engmah i sawi loh a?”

 ‘I u khan hre lo se ka duh mawle..’ a ti liam puat,a hmel pawh tlemin a zia leh ta deuh.

‘Eng chu maw?” a veh kual vel chu ka dawhtheihna in a tlin lo.

‘Makima bialnu chungchang mawle..’

‘Chuan..?” ka awm nuam lo ti lang lo turin ka insehruh nasa viau.

‘Ka hriatchian hunah...’

‘Sawi mai mai teh..’ka ti hlur mai.

‘Ruby maw i tih hi Ruby niin ka hre lo,Ruati zawk hi anih ka ring ta tlat,Ruati khan Makima kohna kha a ngaipawimawh lo angrenga, bakah a kal duh lo tih min hrilha, kha kha ka lo sawi mai mawle..a haw ta viau anih kha,a thil neih laksak ang chiahin..’ a ti ta duah.Mak takin ka thawveng ru hawk thung.Zahthlak hian a..

‘Anih chuan Ruby ni loin Ruati zawk hi a bialnu i tihna a ni em?’ ka hrethiam tho nangin ka sawi nawn ve leh kher.

‘Ka rin dan,bakah a hma tang tawh khan Ruby hi chu anih ka ring lo fel vek tawh’a ti leha.

‘Ok,engpawh nise a khawih hman che em?” ka ti ta zawk.Inneih zan hman dan tur a ka lo dream nen a inpersan nasa tawh.

‘Teh nang, bakah a rui a, khin tlakah ka ngai lo.Chho ang, Ruati kha drop emaw Party na lamah kal ka duh..’ zangkhai fe hian a ti leh a,a mize pangngai nen a danglam leh tawh lo.

Inleng te an haw fel meuh chuan dar 11 a ri thuak tawh, ka chau hluah hluah, kei pawh ka chau anih chuan Ruby phei chu a chau hlein ka ring, Ka pa a mu tawha, inchhung hnawk zual kan nula ten an thian fai mek thung.Room lam ka pansana, ka chhoh hmain Ruby a chho tawh thung.

Room a lo ruak vek, a thawmhnaw thil rawn chhawm luh ho a then then an lo tifel hmana, a tam zawk erawh Room kil lamah a la awm rum thung,engmah ken chiam tul ka ti lo a, ka pa pawn a sawi ngun viau, mahse, chutiang ngawt a lo ni bik lo a, Mizo thuamchhawm engmah ken hmaih an nei lo.Engmah an keng Over chuang hek lo.Ka kamiz ka phelha, ka kekawr ka phelh leha, ‘Ber’ thla kan chuangkai tawh nangin vawiin erawh a lum viau..Bathroom kawngkhar ri raka, mahse, ka hawilet chuang lo.

‘An haw zo tawh mi?” amah zawkin a rawn ti a.

‘Um..’ ka ti sup ringawt.A rawl kal pheia, a ri sat sata, a bag ho a hawng kual anih hmel.Muangchangin ka hawileta,Bathrobe pawl tak a haa, a sam erawh chunglamah a vial tawm chho thung.

‘Ka’n inti fai ve lawk ang’ ka ti leh a, min rawn en zawka, rang fe in a hawi let leh vat bawk.

‘A lum lutuka, a nuam khawp mai..’ a ti tha ve mai bawk.

Bathroom chhung darthlalang lian zet awmah chuan ka in ena, inbual mai loin Bathtub  tlangah ka thu vang vang bawk,engmah han phurna leh nghahhlelh ka nei miah lo,ka hriatthiam si loh hian ka awm a ti nuam lo a, enge anih erawh ka hre si lo.Makima leh Ruby an inkawp lo tih hi chu fiah chat lo mahila ka chiang tlukah ka ngai a.Mahse, Ruati anih chuan Ruby hian a hre tur a ni, engmah a sawi chuang si lo lai tak hian min ti buai lo thei lo.He nu hian thil zep a thei hrep pawh a nimahna le..Inneih zanah pawh ka la hrechiang hman ta chuang lo cheu chu ania..Hahthlak hian a.

Ka chhuah leh chuan a lo mu fel kak tawh.

‘Light ka off dawn em?’ ka ti nghuta, min chhang lo, mahse, muthilh na hun a la awm hauh lo.

Ka off ta tho,balcony light ka on thung, thim phui vek a mut hi ka theih loh thin avangin ka on tlangpuia, eng uar si loin a nuam tawk viau zel.Khumah ka lawn ve a, AC ka on avangin a lum hran lo, nuam ka tih ber thin chu AC on chunga Blanket sina mut hi a ni ve tlat,a puansin ka pawt kaua, amah si loin ka mu a, ka ban ka kham bawk.

‘A thleng dawn em?’ a rawn in let thak mai.

‘Eng?’ a zawhna awm ze hre loin ka ti nghut thung.

‘Kan inneih zan a ni a, thildang eng nge thleng chuang ang?’

‘I duh chuan?” ka ti let leh hmuk ringawt, a sawi dan teh lawng chuan min ti hamhaih tlat bawk.

‘Duh thlang thei dinhmunah ka ding ngai hleinem’ a thu chhuak ta nge nge.

‘Chuti chu kan inneihna hi i pawm miah lo tihna a ni em?”

‘Ka pawm leh pawm loh hian kawngro a su chuang loa, bakah ka pawm mai angai tiin ka inhnem thin,mahse, i Bialnu hlui i khawihna kut leh i kuahna bakah a sulhnu kai kha a hlui tawk si lo hian ka dinhmun min hriatchhuah tir zel a..’ a aw a ring lo, mahse, ka bengah chuan ring tak a ni..

‘Enge i sawi tum chiah?” ka aw a ring bik lo.

‘I hria alawm, inneih zanah pawh tumah zah zo loin i va drop a...’ min lo hmu tih ka hre chiah.

‘Chuan..?’ ngaihsam hmel fe hian ka ti sup ringawt, anihna takah chuan sawi mai tur ka hre lo zawk.

‘Ka zak ve...nat erawh ka na lo, hei hi chu ka tawn fo turah ka ngai sa’

‘Anih chuan sawi tur a awm lo anih chu, i tawng fo dawn tih i hre lawk renga..’

‘Ka hua che..’

‘Ka hria..’

‘Duh thlang thei ni ila zanin hian i bulah ni lo Sakawlh bulah ka awm duh zawk ang’ a aw a khur dar dar mai.

‘Sakawlhah min ngai mai rawh’ka ti leh nghuta.

Min chhang ta lo, mahse kalsawn tumin a che a, rang lutukin ka che ve ta thung,ka man beta, ka pawt let nawk bawk,min rawn ham tumin a ban a phar a, ka man behsak a, lehlam a rawn phar leha, chu pawh ka man sak leha, hneh zetin a hnunglamah ka hmer kawpa, a tal laih laih nangin awmzia a awm lem lo..

A tal leh laiha, ka vawnna ka tinghet sauh thung.Mahse, ka beisei loh tawpin a insut hraiha,a tap khur zui dar dar bawk.