STOP- 14

Chapter- 14

‘Mala, i tha em?” ka hmaah a rawn dinga.

‘Um,tha e..’ ka ti supa, ka dingchhuak ve nghal bawk.

‘I hmel a dik lo deuh em a, chuvang mawle’ a ti leh a, uluk fe hian min thlek nawn leh kher bawk.

‘Ka tha,ka va kal ve lawk ang,eee, ka be lawk duh che’ ka ti leh a, ka then lui suk bawk, helai hmunah hian kan pahnih chauha awm kan ni lo a, ka duh duh sawi ngawt chi a ni lo tih ka hria,chumai bakah ka hre lo tih a hriat chuan ani ngei pawh hian mak a ti hle dawn tlat.

Kan inzui chhuaka,ICU thlen phei hma lawk,a reh deuh laiah ka dinga, ka kekawr ipte zen chungin ka dinga.

‘Eng chungchang nge?” tih pahin a rawn ding hnai ve a.

‘Thil ka zawt duh che, mak i ti maithei bawk’

‘Um,sawi la’ a ti a, ICU lam a melh phei vang vang bawk.

‘Diktak chuan Ruati hi a rai tih ka hre miah lo,i sawi khan ka hre ve chauh zawk’ ka ti supa, rang zet hian a rawn hawi leta, mak tihna niawm tak a hmelah a lang thei bawk.

‘Aaahh, chuti maw?” a ti halh mai.

‘Um,mahse pawi ti suh, engmah buaina a awm lo.A hmain hetah a lo kal tawh nge a lo luh vanga i hriat zawk?” ka ti leh a.

‘Kan thawhpui pakhat hian a enkawl a ni awm e, mahse, ka hrechiang lem lo,vawiin a an sawi dan kha chuan a hma pawn paih tum awmin a awm ngai lo a, Treatment engkim a la vek bawka,tunah thla li hmel a hmuh tawh hnua tih tlak tum leh si hi mak a ti viau a’ a ti ta duah.

‘Anih chu mawle..’ ka ti hmuka, a bak sawi tur ka hre hlawl lo.

‘Nia, mak tak a ni, thil chinchang hre lo lutuka mawl leh hawiher zim a ni hmel si lo,mahse, a hma pawn ka sawi kha, fing awm tak hi an fing zo lo leh fo a, bakah a naute pa hian a nei duh lo pawh a ni thei a...Oh...lawk, Ruby hian a hrechiang hle sia, i hre miah lo maw?” a ti tha leh a.Ka bu nghut ringawt.

‘Amak hle mai, kan thiannu chuan i nupui nen an kal fo tih a sawia, i hresa turah ka lo ngai ngawt asin le..Engpawh nise engmah sawisual ka neih loh ka beisei ania’ nuam lo tih hmel fe hian a ti leh a.

‘Aih, chutiang mai maiah kan buai hlau duh suh’ ka ti a, ka nui lui hawk bawk.Kei pawn ka sawi hi ka awih lo.

‘Ok, ka ring e..engpawh nise amah hi chuti taka ngaihtuahawm ni tawh lo mahse enkawl erawh a la mamawh nasa dawna, thisen a hloh hnema, chumai piah lamah engmah hre loin a lo awm rei hman deuh bawka,a tlukna lamah a lu a sawh tel bawka...theihtawp kan chhuah ang chu’ a ti leh a.Ka bu leh ringawt.

Min kalsan hnuah reife keimahin ka dinna ngaiah ka ding leh rih a, rawn vei tlang an awm leh zauh thin nangin tu nge lo kal ka ngaihtuah lo.Ka thinrim nge ka mangang lah ka hre hek lo,tunah chuan a pawimawh ber chu Ruby biak a, engkim zawhfiah a nimai.Ka u in a hriat loh hram ka duh takzet, a kehchhe nawn leh anga, an inthen hial pawh a ni thei,a lo haw leh anih chuan kan inchhungah Indona hautak zet a intan dawn tihna a ni bawk ang,Ruby nen tak inzawmna nei tawh lo mahse a thiannu a ni miaua, ka u hian a hmer tel ngei ngei bawk ang tih ka chiang.

‘Kan haw mai dawn mi niang’ Ruby aw in a rawn ti sepa, muangchangin ka hawi chhuaka, a jacket ka kensak kha a lo ha than a,muffler pawh a nghawngah a vet kual a, a hmui hnuailam a khuh tel lek lek bawk.

‘Riah a ngai leh dawn na nge?” ka ti supa.

‘Aih, a u te an lo kala, haw turin min ti a, haw mai a tha zawkin ka hria’ a ti leh a.

‘Um,nia..enge tunah a an a?”

‘A zia deuh an ti a, a harh tawh a, mahse a la chau aniang, thisen an la pe mek bawka’ a ti leh a,  a sam pawr deuh phang leh a hmai dang deuh lap te, a mitmeng zuai raih maiah te chuan a chau thawkhat tih a lang theia, tlu mai tur te pawh a ang lek lek zawk.

‘A that chu, kal ila’ ka ti a, a bu nghata, ka kal hun nghak niawm takin a tawlh hnung hrat bawk.

Kan tlanchhuah thlengin kan inbe leh ta miah lo,kan rilru ve ve kan kawma, kan ngaihtuah erawh a inhlat viau in ka ring ve ngawt.Kan veng leh kan veng thenawm inri na bul lawkah Tank lorry leh Taxi an lo insu a, eng Motor mah tlan tlang thei loin kan tang khawm leh riha,kawng a zau lo bawk nen tlan tlang luih ngaihna a awm lo.

‘I ril a tam em?” ka ti supa,mahse, min chhang lo.Ka en phei a,a thutna seat hnunglam nghengin a lo muhil hman.A sam a hnawk deuh niaih a,a Jacket ipte a zen than bawk,a lang duhawm takzet.Hahdam hmel zetin a thaw sek sek bawk.Ka ban ta nge nge,dimtein a sam rawn tla hnawk deuh chu a bengah ka zeh saka,a harh lo..A biang vun mam han mai chu ka kutzungpuiin ka tuaia, a hmui chhah lam lek lek,tlema kau deuh chuan ka mit a la thlawt, mahse, ka khawih ta em lo.

Ka kut ka la sawna, ka Jacket ipte ka zena, ka seat hnunglam nghengin ka thu a, ka mit ka chhing bawk.Ka mitthlaah ka u a lo langa, ka pa a lo lang leha,ka pa hlauh ber chu kan unau kan in ngeih loh hi a ni a, a zep hek lo.Mahse, ka u hian hetiang thil hi a hria anih chuan Ruby hi a chhuah dawn miah lo tih lah ka hming ka hriatchian tluk zetin ka chiang bawk,Ruby lam ka en leha, a awm dan ngaiin a la awma, engvangin nge hetiang thil lian lutuk a zep hi ka hrethiam thei lo,min hrilh mai hi enge a harsatna? A nun tawm puitur leh a harsatna engkim sutkian pui tur atan Pasalah min nei a, mahse, ngatinge?? Kei aiin Ricky-a a ring zawka,engkim ka hriat ve loh a hre vek bawk..Anggu-a hian kei aiin a hre tam zawk ngei bawk ang, mahse ani pawn engmah min hrilh chuang lo..A tirah lo hria ila chuan hetiang lutuk hian a pawi hman lo maithei bawk.

Ka hnunga Motorin horn a rawn hmet ri a, ka phu deuh zawk bawk,ka thu mara,ka hmalam ka ena, ka hma chiaha ding kha a lo tawlh hla hman tawh, motor ka start nghal a, Ruby thu mar leh zi mar ar ar chu ka mitsirin ka hmu thei bawk.

‘Kan la thleng lo maw?” mak tih hmel deuh hian a ti sap bawk.

‘Um,kha...Tank lorry te khan an insu a’ tih pahin kan tlanpelh chiah Tank lorry lo ding lamah ka thle buk bawk.

‘Ehe, ka hre miah lo..hliam tuar an awm em?” a ti leh a.

‘Aih,chutiang an sawi pawh ka hre lo..’ ka ti tha ve mai, ka zuk enfiah bik chuang lo a, midang zuk kal hnai te kha ka an lo let leh lam ka lo zawt a, min chhanna bak kha engmah hriat ka nei lem lo.

‘Anih chu’ a ti leh sepa,ka chhang lo.

Gate bulah kan Driver pakhat a lo awma, kan inbul a Nepnawi dawrah hian a leng fo a, an nula nen hian an inkawmngeih viau,haw pawh a haw hma vak ngai lo,kan mimal thil tihtur a awm anih pawn kan call mai zela, anih lemloh chuan zana an leng chhuak lehzel hi chu sawisel tul ka ti lo.Ka pa phei hi chuan engmah a sawi ngai lo tawp zawk.

Inchhung ka luh chuan room lamah a lo chho hman tawh, muangchangin ka chho ve a, room lamah ka kal ang nge Library ah zawk ka kal ang ka hrethiam lo,mahse, biak ka mamawh, a bulah ka riak ang ka ti lo, nizanah ka riak chhuak tawha, zanin pawh hian riak chhuak law law ila a tha zawk ang.Mahse, room a kalh angem? Kawnkhar ka nema, a kalh lo hlauh.

Ka lut thawm a hria ang tih ka hria,mahse, rawn hawi let loin a Jacket a phelh a,a muffler a la thla leh bawk, ka kal hnaia, Dressing table nghengin ka dinga, a purfume bur tung it et awm chu zahzelah ka la kanga, ka tuai hauh hauh bawk.

‘Chaw i ei dawn em?”

‘I ei tawh em?” min zawt let khauh.

‘Aw...’

‘Chuti chu ka ei lo mai ang,min lo nghah palh takin ka ti a’ ngeiawm zet hian a nui ri hak bawk.

‘Inbiak kan ngai ania” ka ti hmuk.A sawi kha ka hre lo der hmiah.

‘Ka peih ka ring lo’ ka aw ang bawka nelawm loin a ti ve hmak bawk.

‘I peih hun ka nghak dawn lo tih i hria alawm’

‘Aih, ka hre lo..ka chau hlea, intihfaia, mut ka mamawh hle bawk’ a ti leh hlaka, min ngaipawimawh lo zetin a thawmhnaw dang a hlip zui leha, Bra leh Panty nen chauh a din thlengin a hlip thla vek.

‘Inbual rawh, mahse, ka lo nghak ang che, a pawimawh’ ka ti ta nge nge.

‘Naktukah ni zawk rawhse,tunah chuan ka peih lo ka tih kha’ teh fo chuan a..

‘Hetiang hian awm lo teh, a pawimawh ka tih kha..’

‘I sawi tum ka hria,mahse, ka sawi peih rih chuang lo..Chuan,i riak chhuak leh ang tiraw?” ka mitah tak a rawn en a,mak takin ka zam niberin ka hria, ka awmdan ka sawithiam chiah lo.Hahthlak hian a..

‘Aih...riakchhuak dawn lo’

‘Ahh, chuti chu Sofaah ka lo mu ang, khumah mu rawh’ Bathroom kawngkhar bula a Bathrobe inkhai a pawtthla a.A ha zui mawlh mawlh bawk.

Towel a pawtthla leha, Bathroom kawngkhar a hawnga,a lut a,na zetin a khar chawrh bawk,ka nui chhuak hawk mai,eng ber nge ka nuih erawh ka hre lo,a awmdan khan min ti thinrim lutuka, ka nui ta zawk ni berin ka hria.

Ka thawmhnaw phelh chuang loin khumah ka thu mu a, Tv ka on nghal bawk,en tur ber hre loin ka hmet kuala, Tv hi inkhel te a awm anih lem loh chuan ka en khat viau, enna hun ka nei tam lem lo chu thuhran ni se ka ngaina vak lo pawh a ni tho.

Khum che deuh datah ka harh a, ka lo muhil hman chu niin,che loin ka mut ngaiin ka mu a.A rawn che leha, dimtein puan min lo sintir a lo ni a,ka mit ka chhing leh daih,ka awm thleng a rawn khuh a,ka beisei loh tawpin ka samah a rawn khawih de de a, mahse, khawih thiang lo khawih ang hrim a kut a la kir lehnghal mai,ka mengchhuak a, a inher tur chiah a banrekah ka mana, a phu nasa lutuk,a te that bawk.

‘Ka ti harh che a” lawi deuh rat hian a ti a.

‘Aih...khawnge i kal dawn?”

‘Ka mu dawna..puan i sin lo a,a vawt sia’ a ti leh a.

Pyjama dum spot,thawl deuh hnakin a haa, kawrlum zangkhai hmel deuh a dum plain tawp a ha bawk.A sam a lo chhemro hman vek bawk.A hmel thar leh fai sar mai chuan ngaihtuahna tha lo zet min neih tir nghal zat bawk.

‘Hetah hian lo mu rawh’ ka pawta, a tang lo,a rawn kal hnai data, ka pawt leha, min rawn bawh titih..Ka tho kanga, a kawngah ka kuaha,a hnute inkarah ka hmai ka phuma,a lungphu ri det det ka hrethei bawk.

‘Aih...ka..ka thei lo ang...ih’ a ti bah nawk mai,vawt a tih vang nge ka hre lo, a khur deuh dar dar bawk.

‘Khawngaihin...’ tham tuakin ka ti leh supa,min chhang mai loin a ngawi deuh vang vanga, ka hawi chhuaka, ka melh chho ta nge nge, min rawn en chhuka, a biang a sen deuh tan mai.

‘Ka chau a,chuan hahdam vang vang ka duh bawka’ a ti leh sepa.

‘Ka tiam ang che, engmah ka ti lo ang, inbiak pawh i duh hun ka nghak mai ang..um,min ring rawh’ ka ti leh supa.A mitah tak ka ena, a hmel buai deuh nakah chuan a rilru a buai hle a nih ka ring ve tawp.

A che hrata, tawngka a min chhang loin a rawn kun hniama, ka samah a kut a rawn dah leha, ka chhip samah a rawn fawp zui zat bawk, hei baka zawhna chhanna tha zawk engmah dang ka mamawh lo,a rawn lawn kanga, ka tawlhpheia, ka sirah min hnungchhawn zawngin a rawn mu ve a, a kawngah ka kuaha, ka darah a lu a nghat bawk,a sam rimtui zet chuan ka hnar a rawn verha..

‘Muhil rawh le...engmah thil tha lo a thleng lo ang’

‘Um, nangpawh muhil la..’ a ti a, a ham zui bai bai bawk.

‘Ka lo veng ang che’

‘Aah, ven ka ngai hleinem,i hnaah i buai a, i chau tih ka hria lawm’

‘Muhil phawt rawh, thildang chu zingah emaw hun dangah pawh kan la sawi dun thei,hun a tam’ ka ti leh supa, a bengah ka fawp zauh bawk.

‘Zantin hian engtikah nge a tawp ang tih ka ngaihtuah thina,aaa, engpawh nise ka muhil phawt mai ang..Mangtha le’ a ti sepa, a rawn inlet thaka, ka darah a lu a rawn nghat leha,ka kawngah a rawn kuah ve chial bawk.

Kan room kawngkhar kik thawmna ka harh hlawl,ka mengchhuak nghala, thawh mai ka tuma ,mahse,ka thulh leh,ka awma a hmai a rawn phum kak chunga muhil chu ka en a,a mal in min kherh chial bawk.Nidangah kha chuan ka thawh khalh meuh lo,tukin chu a chau ngang aniang.Room kawngkhar an rawn kik leha,dimtein a mal ka lak sawn saka, a che tiah tiaha, ka awm ngaiin ka awm leh rih,min hnungchhawn zawngin a let thak bawk.

Ke lawngin kaa kal pheia,sana ka melh zauha dar 7 a pel hret, room kawngkhar ka  hawnga, Dino-i inthlahrun hmel zetin a lo ding ran mai.

‘I phoneah an be thei lo che a,pu phoneah an lo ti a’ tih pahin ka pa phone a rawn lek hnaia.

‘Um,tu nge?”
‘Ka u aniang,ka hre lo,ka lo nghak dawn em?” a ti leh a.

‘Aih,ka rawn kengthla mai ang’ ka ti a, ka beng bulah ka keng hnai chho a.Room pawnah ka chhuak a, enge a rawn sawi dawn hre lo mahila kan inbiakna Ruby-in a hriat ka duh lo.

‘Hello’ ka ti a, Library kawngkhar ka nek hawng zui nghal bawk.

‘I phone ngatinge i off a?” ka u in a rawn ti zangkhai vah, a awah dik lo a awm em tih hriat tumin ka ngaithla a, mahse ngaihbel tur eih a awm lo.

‘Nia,Battery low lutuk a,enge ni ta?”

‘Vawiin kha innu nen kan chhuak dawn mawni ka ti a?” a rawn ti a.Min deng deuh dawt mai.

‘Eng ti turin maw?” ka aw a chang lam lek lek.

‘Ka pa khan a sawi lo mi? Home naupang thenkhat kan bazarpui ang chu ka lo ti a,bakah ka Pa khan Ruby tel ve zel se a duh a,kei pawn ka duhdan chiah a lo ni ve bawka’ka thaw hawk mai, ka lo hre leh tawh pek lo.

‘Oh, anih chu mawle, ka lo theihnghilh a.Amah nakinah bia la’ ka ti supa.

‘Ani pawh ka call tlang thei lo alawm mawle, tunah khan ka lo be mai dawn mi?” a rawn ti leh a.

‘Nizan a mu tha vak lo a, a la tho lo..nakinah ka lo call tir ang che’ ka ti a, ka thawveng hawk chu mak ka inti zawk, ka tana hlauthawng erawh ka ni lo tih ka chiang.

‘Ok, mahse, tlai lutuk lo hram se aw, a theih loh palh chuan keimah pawn ka ti thei ania’ a rawn ti leh a,.

‘Um, ka rawn biak tir vat ang che,nih phawt..’

‘Nang hi a, in la pa hle si,nupui te mut chen chen mut kher angai lo ania’ a nui kar kara, ka chhan let hmain a off daih bawk..Ka nui ve suk tho mai.Hmeichhe luhlul leh ngawhngawl tak nimahse tunah rih hi chuan ka u ka hriat thin ka a ni leh tawh.

Roomah ka let leha, khum a lo ruak vek tawh, a lo inthlep fel thlap tawh bawk.Inhnuaiah a chhuk nge Bathroom lamah a awm ka hre lo,ka phone ka la kanga, a lo thi tak tak,nizan khan ka off miah lo.Charge tumin charger awmna lamah ka kalphei puia, Bathroom kawngkhar a ri raka,ka  hawi let chuang lo.

‘Morning’ ring vak lo hian a ti a.Ka hawilet ta nge nge.

‘Morning...i harh deuh em?” ka ti supa,a sam a tawnkang laha,a hmai engmah make-up tello, vun nung sar mai nen chuan a lang tha takzet.

‘Ka zia lutuk...’ a ti a, a rawn kal pheia, a phone a la kanga.

‘Ka u in a be duh che a, a be thei lo che a...’

‘Maw?”a awah hlauhthawnna a lang thei,a lawi rat bawk.

‘Ka hre bik lo, a sawi duh lo a,i hman hunah i call dawn nia’ ka ti leh supa, enge ka hriat ka hre bik lo, chhaih kual ka duh tlat.

A bu nghata, harsa tih hmel zet hian a then lui sak bawk.

‘Nizan khan kan sawi ta lo a,Ruati chungchang ania biak ka duhna che kha?”
‘Um,mahse...nakinah kan sawi thei angem?” a hmelah ngenna a langchhuak chiang viau.Atthlak zetin ka chhungril a thleng leh tlat tawh bawk.

‘Ok, i peih hun hunah le,i phone kha a thi aniang, lo charge la,bakah Ruati enge a an pawh ngaihven a tha ang chu’ ka ti leh a, engmah sawi loin a bu nghat ringawt.

‘Ka intifai lawk anga, thil ei turin ka lo chhuk ang,ee. Ka pa phone kha lo zuk kengthla teh aw’ ka tih zawm leh zat.

‘Ka lo nghak zawk ang che’ ka ding chuta, ka hawilet vut bawk.

‘Ngatinge?”

‘Ngati lo e, i duh loh chuan a pawi lo a’

‘Duh lo lem nang,i ril a tam tawh takin ka ti zawk, nizan khan engmah i ei ta si lo a’ ka ti leh a.

‘Aih, tam lo...bakah ka be duh che a’ a ti leh lawi.

‘Sawi rih loh i duh emaw ka ti a?”

‘Ruati chungchang sawi rih loh ka duh mai zawk, thildang ania’

‘Ok, ka rei lo ang’ ka ti nghuta, Bathroom ka pan a, enge sawi a tum ang ngaihtuah ngaihna ka hre lo.

Ka chhuah leh chuan phone charge chungin tuemaw a lo be mek,min rawn melh zawka, a awki a tihniam zui daih bawk.

‘Ruati chu a harh tha a, vawiinah Wardah an sawn chhuak dawn anih chu’ phone a biak lai a tihtawp veleh a rawn ti a.

‘A that chu..’

‘Ka va kal leh ang chu ka ti asin,ka pa khan Dawr lamah kal ve turin min ti angem ka hre lo a’a ti leh a.

‘A bulah sawi la..bakah ka u pawh chu bia la,a pawimawh viau thei a’ ka ti leh supa, ka phone charge ka pan hnaia.Vawiin hi kan Conference zawh ni tur a ni a, zan lamah Party kan nei dawn bawk.Ruby pawh ka la hrilh lo.

‘Um...mahse, enge min biak duhna niang le?’ min zawt pawh a ang lo,amah leh amah inbia a ang zawk mah.

‘Enge min biak i duhna chu sawi la,ka kal tlai i duh loh chuan?” ka nui a.A then ve sak tho,mahse, nuihzat vanga nui erawh a ang lo.

‘Ih...eng lo ania, Remi bawk kha’ a tawp lam a ri chang chang.Ka ding khawng nghal luh mai,diktak chuan Remkimi a awm ve tih ka lo hre leh tawh lo.

‘Chuan?” zawi supin ka ti a, ka phone ka dah thla leha, ka kekawr ipte ka zena.Ka en chhuk ngur bawk.Min rawn melh zawka, Tukverh lamah hmuhnawm a awm emaw tiin a melh leh nghal daih.

‘Nimin khan i lo kalpuia,eng lo ania, a rai an ti a...ih...i fa a ni em tih ka hre duh a?’ min rawn en ta nge nge....

‘I ring em?” ka nuihzatna ka thup thei lo teuh kher bawk.

‘Ring a, mahse rin loh ka duh’ tlemin a inringtawk ta deuh.

‘I pasal ka ni a...’

‘Mahse, i kawp reng sia lawm..’ ka sawi zawh hmain a rawn ti leha, awmze nei lo zetin a ban a phar hliaia, beidawn hmel zet hian a dahthla leh hnak bawk.

‘Sorry...’

‘A dang engmah sawi tur i nei lo maw?”

‘Aw...’

‘Anih chuan  i fa tihna a ni em?”
‘Ni lo,ni lul lo mai...Pathian hmingin...ka zui a, ka kawp pawh a ni maithei, mahse, midang mutpui leh tur khawp chuan ka nupui hi ka ngainep lo’

‘Mahse, ngatinge min ngaihnep si loh chuan i kawp kher?” ka mitah tak a en a, ka chhungril thlengin a hmu tlang vek nimaiin ka hria.

‘Duhtawk ang...tun bak hi hemi chungchang hi sawi ka duh lo ania’

‘Chhanna ka hmuh si loh chuan?” luhlul zet hian a ti leh talh.

‘I hmuh kha,ka fa a ni lo...a chiang em?”

‘Aw...mahse...’

‘A tawk,ka tlai dawn,chhuk teh ang,chuan ka u pawh i be nghal dawn nia’ ka ti leh hmuka,ka kawp lo a, khawih pawh ka khawih hek lo,chu chu ka sawifiah thei reng, mahse, engemaw hian sawifiah lo turin min dal tlat,engkim ka sawi vek chuan tlawm niin ka inhre tlat bawk,mahse  a chhan ka hriat si lohin ka chhungrilah ka thinrim hluah hluah.