STOP- 15

Chapter- 15

Inhnuai ka thlen thlak chuan ka pa nen Ruati chungchang an lo sawi dun meka,ka chhuk thawm a hria ang,mahse hreawm pawn a awm lo.Ka u be tura ka tih lah kha a be hek lo,a phone pawh charge chungin a kalsan daih bawk.

‘Mama,Ruby hi Ruati tlawh tura a kal leh duh si chuan i u nen an bazar tur kha engtin nge in tih ang?” ka pain a lo ti a.

‘Ka hre lo,an mahni inbia se’ ka ti hmuk ringawt.

‘Eng Bazar nge?” min rawn en zawka, ka pa lam a hawi lehnghal daih.

‘Home enkawl kan neia, i hria em ka hre lo,Kan nu dam laia a a enkawl thin kha anni a, a awm loh hnu pawh hian kan bansan chuang lo a, i u hian a enkawlzui ta zela, Mama’n pawisa a pe thunga, tunkum Christmas chu i u khan an duhzawng lei tura hruaichhuah a duha, a lian zual,kum 10 chin nge kum 6 chin ka hre lo,kal ve thei la ka duh,a neitu i ni tawha, i kutah awm tam se, in unaua in enkawl ka duh’ a ti dam thluam.

‘Oh..ka lo hre miah lo a,chu chu aniang min rawn biak a tumna?” min rawn en leha, ka lu ka thing ringawt.Ka hre renga mahse ka hre lo der laklawh tawh, bakah tun lawka kan boruak vang khan ka mood a fuh lo lutuk mah mah bawk.

‘Vawiin hian kal chhuah a duha, mahse Ruati i awmpui duh chuan naktuk lam pawh a theiha,karthar mai Christmas a ni tawh bawk si a’ a ti leh chuar chuara.

‘Ruati chu tlai lamah pawh ka va tlawh thei alawm,ka u chu ka lo bia ang,ka phur zawng tak’ a awah a phur zia a lang thei.Mahse, chu pawh chuan min ti thinrim leh tho.A hma lawka thi thleng khan engmah amahah a ti danglam lo niin ka hre tlat bawk.

‘Nia, va be rawh, chutiang i tih theih chuan a tha ang, bakah Inchhung pawh hi i awm ta bawka, kum dang ai chuan Christmas tinuam tura i chei a ngai maithei ania’ nui chungin a ti leh a,nia, kan pahnih chauh kan ni a, Mipa ve ve lehnghal,kan chei ve ziah nangin a ho lam thei viau,Tree leh Wreath satliah deuh a ni tlangpuia, Meichhemna thuk kan neih pawh  ka u te lo len changa kan chhem anih loh chuan kan hawng ngai chuang lo.

‘Vawiinah ka tih hman loh pawn naktuk lamah ka ti ang,ka chak alawm’ a awah phurna a lang thei.

Thil kan ei chhungin ka pa nen an titi mawlh mawlha, engmah ka sawi ve lo, an eikham pawh nghak loin ka thawhsana,inchungah insiam turin ka chhohsan nghal daih bawk.

‘Sawi dik loh ka neih chuan?” zawi deuh sap hian ka hnung lam atangin a rawn ti a, a lo luh lai ka hre miah lo.

‘Nei lo..’

‘Chuti anih chuan thinrim tur hi keimah zawk ka ni ang tiraw?” zawi fiah zet hian a ti leh a,ka necktie awrh tuma ka lak chhuah chiah chu ka dahthla leh a.

‘Enge sawi i tum chiah?”
“Ih,eng lo ania, i sawi dan khan Remi nen in inkawp hi i pha miah lo a, i fa erawh a ni lo a, ka pasalin Hmeichhe dang a kawp tlat hi na ka ti ve maitheia, ka ti lo anih pawhin ka zak ve ang tih i hria alawm’

‘Anih chuan sawi tawh loh tur ka tih kha i hria emaw ka tia’

‘Aw,hria e...,mahse, sawi ka duh..anih loh law law chuan Nupa anga awm loh mai a tha zawk ang’

‘I duh duha awmturin tu nge ni a i inhriat?” ka melh ngur bawk.

‘Keimah pawh hi ka inhrechiang tawh lo, ka nuna i lo lan atang hian tu nge ka nih pawh ka hre lo fo asin..Diktak chuan kan khua ka ngai lo, mahse, ka chhungte ka ngai ve a...hetah hian ka ta engmah a awm lo ni a ka hriat laiin ka tana hriat nuam lo tak turin i nun i hmang zela....’ sawi zo lo in a tawp leh rih, beidawn hmel zet hian a thaw halh bawk.

Sawi mai tur hre loin ka ding khawng luh ringawt.Chutiang lam ka lo ngaihtuah ngai eih lo,ka hna bakah amah ngawr ngawr bak hi a chhungte lam ka lo ngaihven ngai lo..

‘Anih chuan enge i duh?”
‘Duh ka thlang dawn anih chuan kan khuaah kal ka duh,hun engemaw chen awm ka duh bawk” a hmui a pet a.

‘Aih, a theih loh, i kal dawn anih pawn ka kal ve a ngai ang’ eng vanga sawi ngawt nge ka nih ka hre bik lo.

‘Ni lo,lemchan ka mamawh lo,i nih lohna anga lan i tum thin hi ka hua,nia..namgmah chawp khan ka hua che’

‘Ka hria...chuvang a ni lawmni kei ni lo a Ricky-a zawk hnemtur che a i pan thin?” a meng buai deuh nak mai..

‘Ricky...oh..ni lo e, ni lo tawp’ uar zet hian a ti a, a ban a phar hliai bawk.

‘Anih si loh chuan ka laka zep ruk neih hi enge a tul na?” a ang pham mai..

‘Kha chu...aih,engmah ka zep ru lo’

‘Ka sawi sak dawn che mi niang?” ka ti leh nghuta.

‘Aih...engmah a awm lo,kal tawh rawh,i tlai ang...’ mangan hmel zet hian a ti leh a, a aw a lawi rat bawk.

‘Zaninah kan mikhual te bakah Staff te tan party Dintluanga Hotelah a awm dawna, lo inring ang che..’ ka ti nghuta, ka hawi leta, ka necktie ka dah thlak ka la kang leha, ka awrh zui nghal mawlh mawlh bawk.

‘Ka lo tum ang e’ zuai raih hian a ti a, engmah ka sawi lo, ka thawhnaw dahna Wardrobe lian zet ka nawr tawlha,a chhuak thawm ka ngaithla ru ran thung.

A chhuah veleh ka thawmhnaw ka khawih kual ka tawp a,Che loin ka ding deuh vang vanga,Remi nen kan inkawp kha na a ti tak tak angem? Kan inkawp miah si lo,sawifiah mai ila tha tur.Mahse, ani pawh khan Ricky-a chungchang engmah a sawifiah bik lo. Ka Coat leh Jacket inkhai tlar dul chu ka en a.Leather Jacket dum ka la chhuaka,ka ha a, a chungah Overcoat ka hak hnan leh bawk.

Nilengin ka mood a dik lo tluan ta thak, Dar li pelh hretah kan Prog kan khar thei ta hram,Dintluanga ka call leh a, zan lama Party na tur chungchang vel ka zawtfiaha, engkim an peih tawh thu a rawn sawi a,ka thawl deuh huai mai.Kan managerin engkim a buaipui vek tih hre mah ila keiman va confirm ve hrim hrim ka duh vanga bia ka ni pakhat.

‘Hi...i va chau awm ve’ Remkimi a rawn dak hlawl, ka thaw hawk mai,tunah chuan ka hmuh duh loh ber zinga mi a ni hial ang.

‘Enge i lo tih dawn?” ka ti hmuk.

‘Ka lo kal...ka tibuai che anih hmel’a rawn kal hnaia, nuam lo ti hmel a pu bawk.

‘Aih, kan lo zo chiah zawk, mak ka ti deuh mai mai mawle’ ka tawngkam kha a bung bawk nen nuam ka ti chiah lo.

‘I buai anih hi a, nizan khan Ricky-a hnenah ka thiannu in ka rai tih a lo sawi peka, innu nen inbuai phah ka hlau deuha’ za vak lo hian a nui a.

‘Ahh, i sawi anih pawn Ricky-a chuan engmah a sawi lo anih chu,engmah buaina kan nei lo’ ka ti nghuta, kan buaia, kan inhau bawk tih hria se engtin tak ngai ang maw?

‘A that hlauh chu,zanin Party hi Staff bik nge?” a ti leh a, engtin nge a lo hriat ni?

‘Um,staff te leh kan mikhual te...engtin nge i hriat a?” ka ti supa, thu loin ka dawhkan nghengin ka bulah a rawn ding a.

‘Min hrilh kha..’

‘Maw?”

‘Nimin tlai khan i sawi kha...kal ve i hlau leh si tihna nge?” titau aw a hriat theih.

‘Ah,phalloh pawh ka sawi loh chu, ka hrilh che tih ka lo hre leh tawh lo zawk’

‘Min hrilh kha, kal tumin ka rilru ka lo siam fel ve hmak asin’ a ti leh a.A duhna lamah hi chuan a zak miah lo.

‘I thu le, mahse, Ruby ka hruai dawna, nuam i ti kher lo ang’

‘Engvangin? Thian tan engmah danglam a awm hleinem’ a ti a,a sawi dik.Thian bak engmah nihna kan nei lo, mahse, mi sawi rik danah leh Ruby tan chuan ka hmei a ni tlat.

‘Ok, i thu thu le...haw ka lo tum mek a’ ka ti leh a, ka dingchhuaka, ka Chair hnunga ka coat ban ka la a.Ka ha zui nghal mawlh mawlh bawk.

‘Kei pawh,pawnah Car ka daha, kal ila’ a ti a.Helaiah hian lo kal tur a ni lo tih hi kei aiin a inhrechiang zawk ang, mahse a lo kal tlat, thian nihna hmachhuan hian engthil nge a la tih zel ang ka hre hauh lo,mahse, dem thei ka ni lo.Hetianga ngampa tur hian kei hian ka siam miau alawm le.

In ka thlen chuan ka pa a lo thleng ve deuh chiah bawk.Room ka pan chho nghala, Ruby haw tawh leh tawh loh ka hre lo,roomah ka luta, khumah a thawmhnaw a lo awm darh deuh niaiha, a then chu a thar anih hmel hlawm,Bathroom lamah a awm tih hriat zetin a zai ri rat rat a hriat theih a, eng hla nge a sak erawh ka hre thei lo.Ka coat leh Jacket ka hlip a, ka thawmhnaw dang pawh ka nghal vek, Boxer nen ka awma, Ac a lo on sa avangin a vawt hran lo,Kan bill hi a sang thei far far viau mai.Mahse, hman tura lei kan ni a,regular taka hman char char hi a pawina a awm ka hre lo.

Bathroom kawngkhar a ri raka, ka hawi phei vut,ka awm tih a hre lo nge min rawn hmu chu a phu zawk mai,Bathrobe ha loin Towel a hnute chungah a venga, a mal chanve pawh a khuh phak lo.Towel dangin a lu a tuam bawk.A lang duhawm lehpek.

‘I lo haw tih ka hre lo a’ bah nak hian a ti a, a rawn kal pheia...a towel a vuan tang bawk.

‘Nia, lo haw...enge vawiin lam a an a?” ka ti leh sup a.

‘Beisei phak bak a nimai, chuan Ruati pawh a lo tha tawh lutuk a’ a ti a, Ruati lam ka lo ngaihtuah leh tawh pek lo.

‘A lawmawm chu,kan intifai ve lawk ang’ ka ti a, min chhang lo.Bathroom ka luhsana,Darthlang lian zet awmah chuan ka in en a, ka inthlahdah deuh bawka, tlemin ka thau belh hret,mahse, nalh lo khawp erawh a ni lo.

Ka chhuah leh chuan a lo awm tawh lo, khuma a thawmhnaw dah hnawk niaih pawh kha a lo awm tawh hek lo.Kan boruak dik loh zual atang khan ka thawmhnaw hak tur lo dahchhuah pawh a ti ngai ta lo,ka dem lo.A dahchhuah kha khawih miah lo a kalsan tum ka ngah zawk miau a.

Ka Phone a rawn ri a, ka ena, ka u..

‘Hello..’

‘I haw tawh em?”

‘Aw,haw tawh e, enge ni ta?’ ka ti a,ka kawrlum dahna ka keu kual pah dun dun bawk.

‘Eng ni lo e, vawiin kha...Ruby khan a sawi em?’

‘Aw, nuam a ti viauin ka hria’ ka ti a, ka kawrlum phiar lo awm hmasa ber chu ka lachhuaka.Party kal hmain reilote chu ka mu hmanin ka ring.

‘Nia, a hlimawm tawp, kumtin kan dam chuan Bazarpui zel tawh ila a tha ang ka ti hiala, mahse, naktukah emaw a tuk lehah vawiina kal lo ho zawng kha kalpui an ngai leh dawna, in hna lamah inbuai viau loh chuan lo tel ve la’

‘Ka lo ngaihtuah dawn nia’’

‘Ok,eee.ka lo call chhan tak chu, vawiina kan pawisa hman vel kha Ruby kutah ka daha, a chanve kha chu ka lo tum ang ka lo ti a’ a rawn ti leha, pawisa hi chu keiman ka pe vek thin.

‘Angai lo ang, a bill ka lo en anga, i ac ah ka lo transfer dawn nia’ ka ti a,Pasal nei tawh a ni a, a enkawl ringawt pawh a buaithlak laia an sum lehzel hmansak tul ka ti lo, an nei lo hauh lo ang tih ka chiang ,mahse, tul ka ti chuang lo.

‘Um,nia...i tih tlat chuan le..Bye phawt’

Inhnuaiah chhuk tawh loin Khumah ka lawn a, ka chau hluah hluah,engmah hna hahthlak ka thawk lo, mahse, nilenga ka mood fuh lo khan min ti chauin ka hria.Room kawngkhar inhawng ri ka hriaa, ka mit ka chhing nghal hmak,dimtein a pawt khar leha, kawngkhar kik miah lo a lo lut tur chu Ruby bak an awm lo.

A rawn pen ri phei thlap thlapa,khum bulah a tawp chat,khum a che zui nghal dat bawk.Ka beisei loh zetin min si chetin a rawn mu zui ve nghal a,mahse, che loin a reh zui nghal vang vang bawk.

Muhil harh hlawl ang thei ber turin ka inlet thawka, a kawngah tihpalh niawm takin ka kuah zui nghal zat bawk,mahse, a insangmar nghal teuh tih hriat zet hian a mu khawng deuh zawt thung.

‘I harh em?” zawi sep hian a ti a.Ka chhang lo..

‘I harh lo tak tak maw?”

‘Um..’a nui nghawr det bawk.

‘Muhil chungin i tawng thei maw?” a nui leh hak bawk.

‘Ka tawngvai aniang’ a samah ka hmai ka phuma.

‘Dar engzatah nge kan kal ang?”

‘Dar 7 ania, tunah dar 6 a la ri lo a, reivak lo mutna hun a la awm’

‘Vawiin chu thil ka ngaihtuaha, Fa hi nei ila boralsan ta si ila tih te ka ngaihtuaha, fa neih loh tawp a tha zawk hial ang ka ti rilru a’

‘Chutiang sawi lo teh’ ka ti hluk.Ngaihtuah pawh ka ngaihtuah peih lo tak tak.

‘Nia, naupang ho khan nu min ti asin’ a ti leh sepa, a insut zui hraih bawk.

‘Min en teh’ ka ti supa.A che sat sata, a rawn inlet thak bawk,ka darah a lu a rawn nghata, min rawn melh chho kar bawk.

‘Ricky-a hi ka thik tih i hria em?” ka ti ta nge nge..

‘Aahhh,ngatinge? Ani te chu ka thian tak tak nia’

‘Ka hria,mahse, ka thik tho..’

‘Engtin nge ka sawi ang? Mahse, i thik chuan...ih...min duh tihna’ a ti chhuak halh bawk.

‘Um,anih ka ring’ ka aw a zawi hle nangin a hria tih ka hre tho.

‘A va mak ve..Remi..’ a hmuiah ka kut ka daha.

‘Ani chu thian,nunhlui duhawm lo zet kan lo nei dun ngeia, mahse, tunah chuan ka engmah a ni lo’

‘Mahse, ngatinge engmah i sawi si loh?” min dem na ri a hriat theih.

‘Mipa ka ni ve a, ka induhtawk ve bawk alawm...’

I rui em?” a ti halh mai.

‘Rui hmel ka pu em?”

‘Aih..’

A tawng leh tum ang ziau chu ka khar zui ta hmak, a ngik faiha, min rawn chhang let ve a, duhthawh zetin ka che zui nghala, a kawr ka zen chho a, bra a hreng lo.A hnute ka thama, ka dim hleithei lo,ka mamawhna nasa lutuk hi mak ka ti zawk..

Ka lehthal thawka, a kawr ka hlim chho pawp bawk, a hnute rawn lang phir thaih mai chu ka fawp nghal chata, a kekawr kawng ka pawt kau zui zat bawk,min hnial eih lo..A kekawr ka nawr thla tur min lo puia, ka Boxer a rawn pawta,ka pui vat bawk, ka kawngah a mal in a rawn kherh a, ka chawikang hreta, ka mipatna ka nawr luh rualin a rum chhuak nghal hak bawk...

‘Ka ti na che em?’ ka ti supa, chau zetin ka chungah a bawk thlar mai.

‘Aih...,mahse, a thleng rang mah mah ka ti’ a nui a..A sam karah ka kut ka rawlh a, kan hmanhmawh dun lutuk kha rapthlak lamah a kal mah zawk in ka hria,kei ang bawkin ani pawh kha a hmanhmawh ve tho,kan inhnaih loh chhung zawng kha rulh let kan tum niberin ka hre bawk.

‘Ehe...tho ang, kan tlai tep ania’a ti hliaia, a thuchhuak nghal zat bawk, Sana ka melha, dar 6 a pel tawh,a chhuk tur ka pawt bet leh rih, nui ar ar chungin min rawn delh leha, ka fawp zui leh vang vang bawk.Ka haw atang khan darkar tam a la liam lo, mahse In ka thlen hlim leh tun hi chu lei leh van ang hlauhin a kar a hla tawh thung.

Party na boruak pawh duhthusam a ni ta zel,ka bulah a awm chawt,a Remkimi lo kal ve pawh ngaimawh thamah a ruat ta lo anih hmel, a hma ang bawkin tha takin a be siam siama, kan staff te leh a titipuia,Company lam a mi te nen pawh an inkawm thei zel mai,ka tum loh tawpin ka lo thlir leh veng veng thin a, min rawn hmu fuh leh zauh thina, a mitmeiin min rawn khap hman ziah bawk.

‘I lo haw hma thei angem?’ Office ka awm laiin a rawn call a.Naktuk tukleh mai hi chriatmas a ni tawha, kan staff thenkhat te pawh chawlh lain an haw tawh bawk,vawiin hi kan kal tawp ni tur anih avangin hna a tam deuh thung.

‘Haw hma tura min duh chuan?” ka fiama.

‘Kha chu i hrereng,eng lo ania, ka thil chei ka zo tak tak tawha,a nalh lutuk’ naupangchhia ang maia phur hian a rawn ti a, ka nui suk bawk.Kan boruak that tak hnuah kan nun hi duhthusam a ni ringawt, Ka u nen an inkar a tha em em a, Ruati lam pawn ka rilru a luah ta meuh lo,Ricky-a lah huat enah ka en tawh lo,nun hi tiang tak hian a nuam tih pawh ka lo hre ngai hek lo.Kan lo inti na tawn vel mai mai tih kan hrechhuak ve ve a ni ber,amah ka duh tih ka hria, ani pawn min duh bawk,ka Hmangaih em ka hre lo, mahse, tun baka Mipa leh Hmeichhia hi in duh leh dan tur chuang awmin ka hre lo.

‘Ka tawng i hrethei em?” a rawn au that mai.

‘Oh,hria e,ka buai lawka,ka lo haw hma ang’

‘Ok, anih chuan bye phawt’ a off zui nghal daih,hei hi chu a habbit a ni ve ah ka ngai tawp tawh.

In ka thlen chuan ka u Motor a lo awm vanga, chaw lo ei tur emaw thil pawimawh dang vanga lo kal pawh a ni mahna..Mahse, inchhung ka lut chiah erawh ka beisei loh tawp ka hmuh avangin ka ding chawt mai.Chhuatah Ruby a lo thu sawp niaiha, a bulah ka u a lo ding bawk, a hmel lah chu thinrim tih hriat em emin a dur khap bawk.Ka pa a awm ve a, ka haw tih a hria ang, mahse, min be lo a, min en hek lo.

‘Engthil nge a?” zawh bik pawh nei loin ka ti hmuka.Ruby ka pana,Min rawn en zawka,mahse,hnuailam a bih lehnghal daih.

‘Engthil nge min zawt maw? I nupui hi zawt zawk teh’ a rawn au a ni ber.

‘Eng maw ka zawh ang?” ka ti leh supa, hlauhthawnna vangin ka lungphu a rang nghal zaih zaih bawk.

‘In thiannu tenawm zet khan Makima fa a paia, in hre ve ve,mahse, in lo zep a’ ka khawng nghal vek.