STOP - 16

Chapter- 16

‘Maw?” ka ti chhuak thei hram,a sawi ka hriat loh vanga zawt ka ni hek lo.Ka hrechiang lutuk mah mah zawk.

‘Hei hi sawifel a tha khawp mai,Mambawih, thu rawh,nangpawh Mama thu la, Ruby..nang pawh’ ka pa aw khauh zet chu hnial lo a zawm mai a hun tih ka hria, mahse thu mai loin Ruby ka pan hnaia, a banah ka chelh a, a tang lo..Ka pawt tho a, min rawn ngheng deuh rawk,amahah chakna engmah a awm lo emaw tih mai turin a zawi vek.

Ka hnaih ber thutthlengah ka thuttir a, thutthleng banah ka thu thung.Ka u lam ka hawia, hreh zetin ka pa bul chairah a thu thla hnawka,a hmel a thinrimna langchhuak chu ka ena,engpawh a ti duh dawn tih ka hai hek lo.

‘Le, engtia rei nge in hriat tawh?’ ka pa bawkin a ti leh a, thinrim awrawl engmah a awm lo, mahse, chu chuan nek luih theih a ni tihna lam a kawk lo,ngawih hle hle emaw a zawhna dik taka chhan bak tih dan tha zawk engmah a awm lo tih ka chiang.

‘Ruati Damdawiin awm zan khan ka hriaa, mahse a ni ngei tih erawh tun thlengin ka la chiang lo thung’ zawi supin ka ti a.Ruby erawh a ngawi ran mai.

‘Ruby..’ ka pain a ti leh hmuka,a hminga ko ri a hriat rualin a phu zawk bawk, a darah ka kuah ta nge nge,a ti dik emaw ti dik lo emaw ka nupui a ni a, a hlau anih chuan kei bak in nghahna tur dang a nei lo.

‘Ka...ka..ka hre bik lo..’a ti bah nawk nawk mai.

‘I hria, i hre lutuk, a vaiin i hria,nangmah emaw tia ka huat em em lai che atang khan i lo hre vek’ ka u a rawn te chhuak ta thung.

‘Aih..ni lo..aw..Min ngaidam rawh’ a aw a khur dar dar bawk.

‘Ka pa, i lo hmu em? Mama,nang pawh i hmu em?’ min rawn ena, ka pa a en leh a.

‘Aw, ka hmu,mahse, engtia tih nge i duh?” mak ti lutukin ka pa ka melh reng ringawt, ka u hian a hma khan Ruby a bei chiam tawh,mahse, khami tum pawh khan ka u thlavang a hauh lo,kan Ina ka hruai haw pawh khan awm reng phal lo tu chu amah hi a ni a, tunah ngatinge ka u tiang zawnga a biak? Ka hrethiam hlawl lo, ka u hian engpawh a ti thei a, khap daih angai thin tih ani aia hrechiang an awm lo ang.

‘Engtin nge ka tih ang maw? Inthen mai rawh se, Pa..hetiang tur niin ka hre lo,chhungkua kan nih anga chhungkaw hlutna pawh hrethiam lo tu hi hetah a awm ka duh lo’

‘Ni lo.kha chu a theih loh” ka insum hman lo, ka kutah Ruby-in a rawn vuana, nghet zetin ka humsak nghala, ka pa hmai sen tawn tawnah chuan a beisei loh lutuk thil a thleng tih a lang reng bawk.

‘Um,sawi zel rawh, i rilru damna tur chuan engpawh i sawi thei alawm,tun tum zawng ka fanu i nih vang ni loin i thinrimna zawk hi a dik tlat avangin i duh sawi turin i zalen ania,mahse thinrim vanga ngaihtuah chiang lo a thiltih pawi zia i hriat kha’ mak ti lutuk in ka melh reng ringawt.A dik emaw dik lo emaw a duh duh sawi  turin a zalen ngawt bik lo.

‘Amah zawk ka rin sual vanga a lo la thinrim reng anih pawhin ngatinge tiang zawnga min tihlet kher? A pasal u ka ni a, ka tana tha tur a ngaihtuah thei lo anih pawhin Mama tal chuan min hrilh turah ka ngaia, mahse, min hrilh chuang lo,hei hi enge a awmzia? Na ka ti lutuk,he nu a lo lan ve chinah hian ngatinge kan buai tak vak? Kal mai rawh se’ a ti leh duah,a tawng zawngin a ban a vai kual chiam bawk.

‘Kan dik lo tih ka pawm e,mahse, nupa inthen chungchang hi chu a hran daihah kei chuan ka ngaia,awlsam lutuka sawi ngawt tur a ni lo’ ka ti hmuka, min rawn ena, a mengphar awk bawk.

‘Mama,engmah lo sawi rih suh, tunah chuan i nupui thiam loh a ni a, i u hian a duh sawi turin zalenna a nei’ a in control nasa hle nangin a thinrim zia haider theih a ni lo.

‘Mahse ka pa..’ a tho nghal hluai mai,ka tawng lai ka tawp chawt bawk.

‘Tunah chuan i lo hausa ta lutuka, i pianna i pa pawh min zah ta lo a, nidangah chuan ka thusawi engpawh i hnial duh anih chuan ka sawi zawh hun i nghak thin,i lo danglam zo ta anih hi..Sawi tur engmah ka nei lo,i u in a duh ti turin a zalen a, nangpawh chutiang bawkin,ka kum a tam tawha, ka fa te hian min mamawh tawh lo tih ka lo hre lo anih hi’ a aw a dam thlap, mahse, a rilru erawh a na tih ka chiang.

‘Pa...’ ka u mangang zeta tho ve nghal chu tih ber tur hre loin ka en ringawt.Ruby lah awm ve lo ang chiahin a ngawi bawk.

‘Mambawih, va haw tawh rawh, sawi ho na hian rah tha a chhuah dawn chuang lo,i duh i sawi anga, ka duh ka sawi bawk anga, Mama te pawn an sawi ve ang chu ka ti a, mahse, i nau hian min zah der thinna kha a kalsan thui ta lutuk anih hi..I duh duh ti mai rawh’ a ti leh a, Room lam pana a kal chu ka ena, ka thaw a tawp dawnin ka hria.Khawvelah hian duh thlang dawn ngat ila chuan ka pa hi ka thlan hmasak ber tur te zinga mi a ni ngei ang.A rilru tihnat ka duh ngai hek lo.Mahse, tunah ka ti ta anih hi..

‘Malsawmtluang, enge i tih hi i hria em? Ka nau i ni a, i ni reng bawk ang,mahse tunah chuan kan inzawmna a tawpah lo ngai phawt mai rawh’thinrimna vangin a aw a khur dawt dawt thei, ka u a ni a, ka zah em em,ka nu ang maiin ka ngai zawk hial thin bawk, mahse, ka hlau ngai lo, engpawh ti dawn se ka tlan khalh zar zar ang tih ka chiang,mahse unau inzawmna a titawp erawh ka ngaithiam lo bur.

‘Chutiang ngawta awlsam a ni si lo alawm le’ ka ti supa, min rawn melha, Ruby a en leha, a mitmeng lian leh zahawm zet chu a sen rum bawk.Tualthah chakna in a khat niberin ka hria.

‘Nia, a awlsam lo ang, Thisen in ang kan ni a, khalam chu a chat thei ngai lo ang, mahse, reilote i neih ai khan min mamawh lo ta zawka, i duh emaw duh lo emaw a tawp ta tho anih hi’ a ti leh nghata, a tawng chhuak a zawi ta deuh.

‘Engpawh sawi la ka u i la ni renga, ka tan chuan ka farnu neihchhun i la ni reng, mahse, a lehlama ding hi ka nupui a ni a, kan dik lo tih kan pawm chunga i chhu chat duh talh anih chuan i thu le’ ka ti chhuak ve ta nge nge.

‘Ka duh talh ni loin in nupa hian a nawr in min nawr zawk anih hi,ngaihtuah ve chhin teh,i nupui hian bialpa nei in fa hial lo pai sela, Anggu-a emaw kei hian hrerengin zep ila engtin nge i hriatchhuah hunah i tih ang?” ka mitah tak a en a, a hmela na tuar hmel chu ka hmu chiang lutuk,a sawi ang chiah hi thleng se chuan ani ai hian ka nasa ang, an damchhuak kher lo ang, ngaihtuah pawh ka ngaihtuah peih lo e.

‘Kal tawh rawh,an lo ngaihtuah ang che” ka ti ta ngawt.

‘Khawi hmunah mah hian ngaihtuah tu ka nei hleinem,ka pasalin a duh duha min lerh bosan lai hian ka natna min hriatthiam puitu tur ka neih chhun te hian tiang hian min ti anih chuan tunge midangin min ngaihtuah se i tih? Ka awmdan hi i hrethiam pha lo ang,bawlhhlawh ang mai niin ka inngai asin’ tap mai tur hmel a pu bawk.A sawi zawng zawng chuan a denin min deng dawt dawt a ni ber,a natna hi ka tawmpui a ni tih tilang turin kuah ka duh ngawih ngawih, mahse ka nupui ka kut vuanin a thu a, ka u lam ka hnaih anih chuan ani zawk ka kalsan dawn tihna a ni a, engtin nge ka tih theih ang??

‘I lamah ka tang thina, ka la tang reng,mahse..’

‘Ka hrethiam che, ka kal ang,mahse engpawh ka ti anih chuan min dan tuma i chet rualin kan unau kan inbei zel tawh ang..tihnat che ka duh ngai lo,mahse, midang erawh chu ka hreh lo tih i hria’ a ti leh a, a bag a la a, kawngka lam pana a kal chu ka ena, ka ruak vekin ka hria, ka pa ka ti lungawi lo a, ka farnu neih chhun ka ti kehchhe leh ta bawk.

‘Min ngaidam rawh’reife kan thut tlawk tlawk hnuah a rawn ti chhuak ta nge nge,ka hawikuala,Dino-i te unau ka hmu lo,kan boruak hi inchhunga kan chenpui te tan haider theih a ni dawn lo tih ka hria, an sawi chhuah erawh ka ring lo.Mahse, hetiang kan inchhunga a thleng ta hi mumang ang rum rumin ka hre zawk,mumang lah a ni der si lo.

Ruby-in meichhemna thuk vel leh Christmas tree a lo chei zawh tawh lam chu ka ena, a nalh thawkhat,min hmuh tir chakin min rawn call hial bawka, mahse, tunah chuan engmah a ni ta lo,hlim takin Christmas kan hmuak anga, kan inah kan chhungte dang nen naktuk zanah Party kan nei leh ang chu tiin engkim ka lo plan fel vek tawh,chu pawh chu a sukuk zo ta vek..

‘Chho ila, intihfai ka mamawha’ a ngaihdam dilna lam chhang loin ka ti ta zawk.

‘Aw, mahse...’

‘Khalam chu Room lamah zawk le, helaiah chuan tun lawka thil thleng kha tawk rih rawh se’ ka ti supa, ka pawt thoa, ka kut lehlamin ka bag ka khaia, a kawngah lehlamin ka kuah thung, min ngheng chungin a kal tawk tawk a ni ber.

Room kan thlen veleh Sofa lam a pana, zawi zetin a thu thla hnak bawk,ka bag ka daha, ka coat ka phelha, khumah ka thehthlaa, ka pheikhawk ka tlawhphelh zui leh nghal zat bawk.

‘I thinrim tiraw?” zawi fiah zet hian a rawn ti chhuak leh ta nge nge.

‘Aih..’

‘Hrehawm ka ti, mahse, i lo haw khan ka thlamuang a’ a ti leh sepa,ka ringhlel lo.

‘Um,a tha lawm,a khawih na che em?” ka ti leha, ka u hian kut thawh mai a harsat lo tih ka hria.

‘Aih, chutiang engmah a awm lo’

‘Chhuatah i lo thu sia, ka zawt mai mai che’

‘Min pawt thu a, mahse ka pain a lo dang alawm’ a ti leh a.

‘A that chu, ka u hi chuan a duh tawhna lamah chuan tih hreh a nei ngai lo a’ ka ti leh sup.

‘Ka hria alawm, i nupui ka nih angin ka lamah i tan angaia, ka dik lo..mahse, engtin nge ka tih chuan ang?”mangang tih hriat zet hian a ban a vai kual a, a thaw haka, beidawn hmel zet hian a mal chungah a dah thla leha, a suih zui than bawk.

‘Ni e, ka nupui i ni a,lehlamah ka u a awm bawk,chuan ka pa nen’ ahma a ka ngaihtuah duh loh ka rilruah a rawn lang nghal zut zut mai,he thilah kher hi chuan Ruby a thiam lo hulhual.

‘Anih chuan i duh lo chung ka lama tang turin ka nawr lui che tihna a ni em?”

‘Ngawi rawh, ngawi hmak rawh...’ ka ti chhuak thawt mai, ka tum reng a ni em ka hre lo, mahse, ka tawt lutuk..Ka awmdan inthlak thu chu a beisei bik lo a ni tih hriat zet hian a phu ve dawrh bawk.

‘Ka dik lo,mahse,Ruati...’

‘A hming kha ka hriat laiin vawikhat pawh lam ri leh teh,i duh aiin a pawi ang’ ka ti chhuak leh hrawiha, a kimki chawih mai.

Ka necktie ka pawt phelh nawk nawka, thinrim zetin chhuatah ka theh thlaa, thil thlen danah hi chuan ka pa leh ka u lama tang tur ka ni,mahse  ka nupui tihsual a ni a, ka nupui anih angin a lamah ka tan angai tlat si hian min ti thawpik lutuk.A tirah khan engkim min hrilh nise tun ai hian kan buai thui lo ang, a sawi hreh anih pawhin keiman ka u ka be thei reng.Mahse, a ti miah lo,Ricky-a nen ‘thuruk’ tiin an zep kuala, engmah hi zep hlen theih a ni tak tak si lo.

‘Sorry...’ lawi rat hian a ti sepa, ka lu ka thing nawka, ka sam ka tuai puata, ka hmai ka hup zui vang vang bawk.

‘Ka lawm lo,lawm lo tak ka ni,hetiang thil lian tham i zep hi rapthlak ka ti che,mahse, enge kan tih tawh chuang ang? I duh i hmu ta bawka, i lawm em?” ka melh run bawk.

‘Aih, chutiang engmah ka duh lo..’

‘I duh si loh chuan i sawi thei, mahse, i zepa,i Ricky-a nen khan vawitamtak thup tumin inbuai anih kha”

‘Ni lo, chutiang a ni lo..hauh pawh ka hau nasa,mahse, Makima zawk hian a tibuaia...’

‘Ouch,a va tha ve.Makima thiam loh vek a lo nih chu a...’ ka ti a, ka nui zui nghek bawk.

‘Chutiang lam sawi ka tum lo.Ih, Ruati hian naute kha a pa ah pawh Makima puh a tum lo, aman neih mawl tawp a tuma’ a ti leha,rapthlak ti lutuk hian ka melh reng ringawt.

‘Mahse, mak deuhin a ti tla leh thuta’a tih zawm leh.

‘Naute kha thla li anih chuan kan inneih hmain a pai tan tawh tihna,LALPA, chu chu hrerengin Bestah i hmang ngam ania,Mihring i ni tak tak em?”

‘Mal...’

‘Min shock tih piahlam a ni,ka u kha ka dem ta lo..’

‘Nia, unau inni miau alawm’a ti leh salha, a tawng dan kher chuan min khei zawk bawk.

‘Dik chiah, unau kan ni,mahse kei chuan ka tihtur hlenin i lamah ka tang tal alawm le’

‘I inchhir chuan i tang lo thei, ka tihsual a ni a, ka tuar mai ang’

‘Tawng tawh suh,ka tih tawh lamah ka tawlh mai mai ngai lo, i lamah ka tang ka tih chuan a tawp thleng a ni ang, mahse,mak ka ti lutuk hi ngaiawh tur chuan hun ka mamawh ang’ ka ti ta thlawt.Ni e, mak ka ti...khawvelah hian thil mak a tam lutuk,midang tan chuan hei hi chu thilmak a ni ve lo mahna,ka tan chuan ka nunna thil thleng mak a tih loh theih loh thung.

‘Anih chuan tangrual turin kan bei thei ang chu, hetianga inhau buai lo hian’ amah zawkin a ti leh sepa,a sawi dik mahna,mahse tunah hi chuan enge dik a dik lo lam ka ngaihtuah thei lo.

Ka beisei loh zetin ka pa te nen chaw erawh kan kil tlang leh ta tho, mahse, a tawng miah lo a tih theih,Ruby nen pawh kan tawng chuang lo,kan vaiin kan ei ngaiin kan ei mawlh mawlh ringawt.Dino-i te unau ti dak mai chuan kan chhungkaw boruak a hril chiang viau, an unau hi an awmrei tawha, an tlangnel thawkhat tawh,mahse, zanin chu kan chawei min vil pawh tihsual neih hlau niawm takin an ti dak mai.

‘Mal,khawnge i awm?” phone ka pick rualin Anggu-an a rawn ti a.

‘Inah,khawnge i awm?”ka ti let ve a, Balconyah keimahin ka thu a,Ka beer can ken lai a tlem la awm chu ka in leh pawpa,ka hmet khawr nawka, Dustbinah lamah ka vawm pheia, a ri deuh raka, ka in zawh tawhna ka hmeh khawr pali lai a let sa ram bawk.

‘Eng ni lo e, Party kha kan thulh leh tak siah chuan kan chhuak dawn mawni ka tia” a rawn ti leha, nia, kan ina Christmas Party,kum tina kan neih thin kha kan thulh ta tlat,kan boruak rit zetah hian eng Party mah a hlawhtling dawn chuang lo a, tihluih talh tul hek lo le.

‘Khawiah maw?” ka ti nghut.

‘Khawchhung an chei te en ve ila,bakah ngatinge nangni nupa hi in tawm renga?” zangkhai zet hian a rawn ti leh.

‘Khawvawt lutuk hian chhuah min ti chak lo anih hi..’ka ti leh nghut.Thim hma deuh atangin Balconyah hian ka thu tawh,Ruby erawh a ni te in lamah a kala, a lo la haw lo, ka pa lah kan Home enkawl lamah a thiante leh a unaute nen Christmas hmanpui turin an kal chhuak daih bawk.Kum dangah chuan Christmas ruaitheh hi kan venga theh loin ruai kan han siamsak thina, mahse riah em chu kan riak ngai lo.Mahse, tun kum chu engmah sawi lawk loin a kal a, chu pawh Christmas hmanpui mai piah lamah riak lut tur lehnghal.Mahse, a mak lo, a kal chhan ka chiang tho, ka hnial vang khan a thinrim a,nidangah pawh ka hnial fo, mahse, ngawi tura min tih hnuah ni loin..chumai bakah ka u ka tihdanah a lawm lo hlawm tawp tih pawh ka hria.Thinrimna an puia ri chiam chi a ni lo a, hetianga ngawirenga a kal hi ka dem lo, tiang taka na hian kan Unau kan la inhau ngai lo tlata,dawnsawn dan a thiam lo anih pawhin ka dem hek lo.

‘J...i  la awm em?” Anggu-a a rawn au leh a, ka ngaihtuhna atangin ka harh zawk bawk.

‘Um, awm e,ka lo kal ang’ ka ti ta zawk, chhuak thawveng ila ka rilru pik lutuk pawh a zia mahna le.

‘Ehe!! Ka iti maw? Ruby pawh a lo kal ve ang chu’mak ti hmel deuh hian a rawn ti leh talh.

‘Nia, amah ka lo zawt ang, a peih a thu le’ ka ti awlsam leh mai.

‘Ok,kan inhmu dawn nia, Bawngkawn lam atangin tan ila,Motor ka keng lo mai ang,ka lo nghak ang che u’ a rawn ti leh duah.

‘Um,i thu thu le’ ka ti nghuta, ka off zui daih bawk.

Darkar khat a liam leh chuan Anggu-a nen Bawngkawn kan thleng phei tawh, Durtlang lam chhoh tumin Jamah kan tang a, Christmas urlawk zan anih mai bakah Kawn chei en kan thahnem deuh bawk nen mihring leh Motor a tawt tlat.Tlan hleihtheih pawh a ni lo.

‘A zia viau hi a,ngati maw in nu chu a lo kal loh a?” a ti a, kan tlan pelh lam a thlek zui leh rih.

‘Ka hre lo, a peih lo’ ka ti tawi tuk, diktak chuan ka be lo hrim hrim zawk,Ani te inah chaw a ei dawn tih Msg a rawn thawna, reply pawh ka reply lo.

‘In boruak a dik lo in ka hria,i sawi hreh chuan a zawt lui lo che a’a ti leh a.

‘Aih,engmah dik lo a awm lo’ ka motor khalh lam ngawt ngaihtuah niawm takin ka hma zawn ka en ngur bawk.

‘Kha khan dik lo awm chu a ti chiang chiah thung alawm’ a nui zui hak bawk.

‘Maw?”

‘Jamie, ka hrechiang che ania, nangpawn min hrechiang, kan tleirawl lai atang khan i tawng tam lo a, i inti pa ka ti dawn nge i zia a cool raih reng tawh, mahse, khavang khan Problem nei lo i ni chuang bik lo a, khatiang hunah khan Problem i neih leh neih loh ka zawh che apiangin rang lutuk lam maha chhanna ka hmuh chuan i chhanna engpawh nise i nunah Problem i nei tih ka hre tawh,min bum lo ang’ a ti ta duah, za lo zetin ka then suk ringawt,hnial ngaihna awm lo khawpin ka awmdan a sawi dik tlat atin ni.

‘Ok, ka tlawm e, mahse, min hrechiang hle anih chuan chu Problem awm chu zanin atan theihnghilh ka duh a, sawi ka duh lo tih pawh ka awm danah i hrethiam ang chu tiraw?” ka ti a, ka melh zawka, a ner nak thung.

‘Ni tehse, englai pawhin i duhdan tih hlawhtlin a ni ziah alawm,anih chuan zanin chu Party dang siam ila...’

‘Eng Party nge niang?”

‘I duh duh, duh leh Aizawl view lamah kan kal anga, Khawpui chhung thlir chungin Drinks lam kan bei nghek mai ang chu’ a nui hawk hawk bawk.Ka nui ve ta nge nge.

‘Nang hi i single tihna mi?’ ka ti leh supa.A hmeichhe kawp ngheh tak nen an inthen hnu khan a kawp kual ta duah,a leu mai mai na hi kum a tling tawh hial ang.

‘Aw...nuam ka ti zawk’

‘Kum 30 i ni tawha, a hun tawh lo ania..’

‘Ka hria, mahse, nuam ka ti...nangmah ang bawkin Problem ka nei ve animai’

‘Ok, kan indraw...anih chuan zanin chu duh duhin awm ang..’ nui chungin ka ti a, ka ti tak tak bawk,engmah hre lova ruih leh tawp ka chak ber.

Durtlangah kan chho a, a de chuai mai, a nalh ka ti lo hran lo, mahse, ka thlir liam vel mai mai,kan inturn a, ka chhuk leh a, chhuk lam chu tlan a sawt ta deuh.

‘Ramhlun ve thleng ve hrim hrim ila, chumi hnuah Heritage emaw Bon Appetite lamah zawk pawh karaoke turin kal ang..’ a ti leh rih,hnial loin Ramhlun lamah ka tlan phei ve mai,St Mart kan thlen chuan tlan ngaina awm lo khawpin a tawt tawh..Kan tawlh bek bek chauh.

‘Helamah hian Motor dahna tur zawng ang, kein kal phei ang’ a la ti ta deuh deuh,hnial loin kan piah deuh kawng sira Motor dahna awl zawn kan thlen chuan ka signala,ka tawlh lut tha ve mai.

Kein kan phei duna, a titi mawlh mawlh bawk,mi an zi huai huaia, zan dar 8 pelh tawh lam mah nise Kum upa deuh leh naupang, tleirawl leh Nau pawm chein kan kim viau ,chhungkua a kal niawm tak lah an tam ngang mai bawk.

‘Eheu..nangni pahnih chu?’ ka bana rawn vawn pahin hmeichhe aw hian a rawn ti a, ka en vuta, Rinky leh Remkimi an lo ni a, an nui dun var var bawk.An inkawma, a chang leh an inmil lo viau lawia,ka hrethiam chiah lo,Remkimi hi kan nupa kar Boruak a that hle hnu khan ka hmu leh ta miah lo.

‘Nangni zawk pawh chu a” ka ti supa.

‘Nia, a nuam reuh tawp,in kal kual nasa em?” Rinky zawkin a ti leh a.

‘Nasa nang, Durtlang lam a ni mai’

‘Keini pawh,engtin nge kan inhmuh loh zawk ni? Aa, a awm tho, mi an tam em mai,zanin Prog in nei em?’ a ti leh zat zat.

‘Aih..nangni zawk?” rang fein Anggu-an a lo ti vat.

‘Nei lo,chuti chu Heritage lamah kan va haps dawn mi niang?”a nui a.

‘In thu thu, mahse..’

‘Zanin chu Nupui leh Bialpa lam kan theihnghilh ang,tak takin Nupui hlau deuh tan chuan a rem lo ang’ a nui leh a, Remkim a nui ve ar ar bawk.

‘Hlau lo e, a phalna thlapa chhuak ka nih hi’ ka nui suk bawk.

Kan kal phei ho ta zel,Thla kan la nual bawk.Heritage lama kal tumin Motor dahna lam kan pan pheia, Rinky nau te nena kal an lo ni a, kan kal ho dawn takah chuan a nau an in kalsan tir a, a nau lah a lawm phian zui.

‘Bawiha, saw saw Ruby te an ni lo mi a?” zawi supin a rawn ti a,a thlekna lam ka hawi vat bawk.

Ruby leh a ni Fapa, amah chhan nana ka hnek kha in hnaih takin an dinga, an bulah Rikcy-a leh Ruati an awm bawk..Ka hriatthiam chiah si loh hian ka na deuh zawk bawk.