STOP-21

Chapter- 21

‘Mawh? Ngatinge tah khan i kal?” ka hmaah a rawn dinga, ka mitah tak a en ngar bawk.

‘Hotel..oh,khatah khan an hmu tihna mi?”

‘Engmah zep lo mai rawh, thudik ka hre duh’ a aw a khur dar dar mai,ka kawrlum hak tur ken lai ka ha leh te tea, ka riru lam sahal erawh bengdaih tumin ka bei nasa ngiang thung.

‘Engmah ka zep hauh lo’ ka towel ken khumah ka thehthlaa.

‘Anih chuan engvangin nge kha Hotelah khan i kal si?” a ti leh that.

‘Oh, ka duh duhna a kal turin ka zalen lo tih na ami?” ka kawng ka dawm a, ka melh chhuk run bawk.

‘Aih chu chu ka sawi tum a ni lo,Ruati chetsual ni khan a awmna Hotelah khan i kala, chupawh Ruati an hmuh hma lawkin’ a ti leh zel,tu hrepin nge lo hrilh ka hre lo,ngaihdan pawh ka nei hek lo.A hranpaa ka awmdan lo va chhuizui turin Ruby hi a la kal chhuak miah lo tih ka chiang, kal chhuah a hnekin a tukah kan zin nghala, tunah In kan thleng leh chauh bawk.

‘Chu zawng ka hre hauh lo mai, khami ni khan ka Drop hnuah che Hotelah khan ka thiante tan Room book turin ka kal ngei,mahse, ka book ta lo hlauh thung, ka thlen hnuah ka thiante khan an rawn cancel leh miaua’ dawt pakhat humhim turin dawt engzat nge ka sawi belh la ngai dawn le?

‘Mal, khawngaihin, ka rinna che hi ti chhe suh,nangmahah ka innghat tih i hria’ a ti leh halha, hmana ka hriat thin, hmeichhe induhtawk leh lu zo vah kha a ni leh ta tlat.

‘Engmah chutiang a awm lo’ ka ti sup ringawt.

‘Rin che ka duh,mahse, i kal ngei si alawm..engmah i ti lo tak tak em?”ngenna ri a hriat theih.

‘Tak tak, engmah ka ti lo’

‘A tha lawm,i pha ang tih ka hre sa a, mahse,i ti ka ti chuang lo ania’ a nui lui sak bawk.Ka chhungrilah nuam lo tihna in min thama, ka inhumruh fun bawk.

Kan boruak sawi ngaihna awm lo khawpin a nuam lo,ka pa hmuh lai erawh chuan a awmdanah engmah danglamna a awm lo thung,kan pahniha kan awm erawh chuan ka biak loh phei chuan a tawng lo hrim hrim.

Ruati harh hnu atangin kar a liam tawh, mahse, engmah hmasawnna a nei lo,Ruby a kal nitina, keipawh ka kal ve zauh zauh bawk, Kumthar pawh kumthar a ni satliah mai, a hranpaa han lawm pawh a awm hran lo,Ruby Damdawiin lamah a tap chawta,Ruati lah a harh a ni ringawta, biak tlak loh,mahni a che thei bawk si lo a ni ringawt.Chubakah a lu a tauhna lai kha a ruh a khi tel bawka,khawih chet mai chi a ni lo.

‘Naktukah Ruati a chhuah theih an beisei deuha’ chaw kan ei laiin a ti sapa,ka bu ringawt.

‘Mahse,a Doctor khan phai lam pan turin a ti a’ a ti leh a.

‘Anih chu’ ka ti supa,hawi chhuak chuang loin ka thil ei lai ka ei zawm leh mai. Ka pa, ka ni te inah chawei turin a kala,kan boruak nuam vak lo hi a hria em ka hre lo,a lo hria anih pawhin a tilang ngai lo.

‘Nia,zia lo..mahse,a dam chhuak hlauh hi pawi i ti em?” a ti leh hlaka, ka thil thial lai ka tawp chawt bawk, ka hawi kuala,tumah Dinning roomah an awm ve lo hlauh.Ka plate ka nawr sawna, muangchangin ka ena, min en ve loin a thil ei lai a ei mawlh mawlh thung.

‘Pawi ka ti lo,chuan, i sawi duh tak sawi zawm la a that ka ring’ka tum aiin ka aw a chang lam hret.

‘Sawi angai hleinem,ka sawi tum chu kei aiin i hrechiang zawk’ a mitmeng lian leh zahawm zet chuan min en ran bawk.

‘Ka hre lo aniang ka zawt tlat che’

‘A that chu’ a plate a nawr sawna, a tho zui daih bawk.

Ka u nen kan la inbe leh miah lo,Ruati chanchin min zawt tur takngial pawn min la rawn be leh lo,mak chu ka ti deuh,mahse,min rawn bia se ka ti chuang lo, tunah chuan a thleng tur a thleng zo vek tawh,Ruby nen kan inkar a chhe hlea,ka insawifiah anih loh chuan siamthat harsa zawk buaina pawh a la thleng leh mahna..

Ka phone nghawr dar darin min ti harha, a reh leh mai ringin ka mit ka chhing lui tlat, mahse, a ri ta reng,meng chuang loin ka bana,ka beng bulah ka dah zui nghal bawk.

‘Hello’

‘Dude,Morning..ka rawn ti harh che em?” Ben-a a lo ni a.Ka inleta, mahse, Ruby mutna a lo ruak hiau tawh, nizan khan zu ka in ngheka, ka thawmhnaw hak lai nen ka let tawp anih tak kha..

‘Morning,tiharh lo e..enge ni ta?”

‘Eng ni love,vawiin kha in nupa kan lo beisei dawn che u ania’ a rawn ti a, a u Fapa kum khat tlin lawmna an nei dawn tak, ka lo hre leh tawh lo,Ruby pawh ka la hrilh hek lo.

‘Kan lo tum dawn nia, hun kan nei angem ka hre lo a’ ka ti supa.

‘Hman tum ula,bakah inhmuhkhawm a khat em mai’ a rawn ti leha,Nia, a sawi dik,kan thian ho kan inhmukhawm khat viau.

‘Ok, nia,kan lo tum ang’ ka ti leha, phone ka daha, tho mai loin ka mu deuh vang vang bawk.

Inbual loin ka inphih faia, ka lu na deuh chu tihreh tumin ka mit ka chhing vang vang bawk,chhan dang vang niloin ka zu in vang a ni tih ka hria,mahse, nidang anga na erawh a ni lo hlauh.Inhnuai ka thlen thlak chuan living roomah tumah an lo awm lo, Kitchen lamah erawh thawm a awm thung,ka pan pheia,ka daka, Ruby amahin a lo awma, Apron a ha a,zai rat rat chungin Purun a lo zai mawlh mawlh,ka thawm a hre miah lo anih hmel.Nizan khan zu ka in tih a hria, mahse, min sawisel miah lo,awm ve lo ang hmakin min ngai a ang mah zawk anih kha.

‘Ka pa hi a kal tawh mi?” a phu zawk bawk.

‘Aw’ a tawi tek tawk viau.

‘Tlaiah Ben-a ten an naute Birth day lawmnaah min sawm a,kan kal ve ang chu ka lo ti a’

‘Sawmna nge thupek?” a tawngkam hi a ngeiawm thin,mahse, ka thiam loh zawk anih tlat avangin ka thinrimna ka ti lang ngawt thei lo.

‘A ni ve ve,tunah ka chhuak dawna, dar li velah ka lo haw ang,i lo insiam dawn nia’

‘Um..mahse, engmah i ei dawn lo mi?”

‘Dawn lo..’ ka inhera, ka kal zui nghal daih bawk.

Office hawn a la hun lo,tihtur hre loin ka tlanchhuak tawp a ni mah zawk,Sana ka ena, dar kua a la ri lo,ka Pa dawr lam ka pan ta zawk, an lo buai phian, ka pa in min hmu thut chu min beisei lem lo a nih hmel, mahse, lawm lo hmel erawh a lang lo,ka thu deuh ren rawna, Dawr hawn hun awm velah ka chhuahsan leh a,ka mood fuh lo lutuk hi a hahthlak lam hret chu a ni.

In ka thlenin dar li a la ri lo deuh,room ka pan ding nghala,tumah an awm lo, mahse, Bathroom lamah thawm a awma, tui herh ri karah uak deuh pap pap ri a hriat theih,hlauhthawnna in min rawn fana,ka pan hnai nghal vat bawk.

‘I tha em?’ kawngkhar ka kik a.Tui haw ri a tawp a, uak ri ka hriat pawh a tawp zui nghal hmak bawk.

‘Ruby, i tha em?”

‘Aw..tha..ngatinge?”

‘Aih, eng ni lo..’ ka kal sawna, kan inneih hnuah Ruby hi a damloh awm ka la hre miah lo.

Ka Jumper ka phelha, khumah ka thehthla a, kal hmain Intleuh zuai ka duh,zingah khan ka inbual loh vang nge ka hre lo,ka rit bur mai.Bathroom kawngkhar a ri raka,ka hawi leta, a hmai a dang deuh tih lohah chuan damlo hmel a pu lem lo.

‘I uak in ka hria a’ ka ti hmuka.

‘Aih, i hresual anih chu’ towelin a sam a hru mawlh mawlh bawk.

‘A ni mahna, ka intleuh ve lawk ang,ka rei lo vang’

‘Um,lawk..kal lo ila a pawi viau angem?” a ti leha.

‘Pawi ka tih ka ring,mahse, Problem i neih chuan?”

‘Aih, nei lo,ka lo insiam dawn nia’ a ti leh sapa, dik lo awm hmuh tumin ka en deuh renga, mahse, engmah chutiang awm a awm lo.

Shower hnuaiah ka dinga, tuilum in ka taksa a rawn phuh a, ka harh hawkin ka hre hial mai,ka mit ka chhing vang vang bawk.

‘Mal, i lo chhuak dawn tawh em?” kawngkhar rawn kik a ruala,ka khawng nghal deuh luh bawk, ka inbual lai hi min tibuai khat viau tlat.

‘Aw, ngatinge?”

‘Lo chhuak phawt rawh’ tah chhuak insum ri a ang..Ka intleuh sawk sawka, Bathrobe ka haa, kawngkhar ka hawn rualin ka hmaah tak a rawn ding nghal zat bawk, a awmdan chuan min ti buai ti ila a dik ang.

‘Ih..ih,Ruati..’ a sawi hleithei lo, a mittui a tling pam bawk.

‘Ngatinge?” a kut ka vawn saka,ka pawt hnai nghal bawk.

‘Vawiinah a chhuah theih an beisei kha tunah a buai leh thut a...’ ka awmah a hmai a rawn phuma,a hmaa min rinhlelh vanga a thinrimna kha khawiah nge a awm tak ka hre lo, tunah chuan mangang lutuk puih ngai a ni ringawt tawh.

‘Shh...kan kal nghal ang,tap lo la,thawmhnaw ka ha lawk anga’ ka ti a, a samah ka fawp zauh bawk.

Ka kuahna ka phelha, ka thawmhnaw bawm ka pana, min lo dahchhuahsak a tum ni ngei tur a ni, a lo inhawng sa hiau bawk, ka hmuh hmasak ber ka la chhuaka, ka ha nghal sawk sawka, diktak chuan ka ngaina viau lam ni loin Ruby vang zawkin ka ngaipawimawh ti ila a dik ang.

Kal pahin Ben-a ka calla, Ruati that loh leh thut thu leh kan kal hman ka beisei loh thu ka hrilha,a thaw hak mai.’Kal mai tur chi in a awm em?” a rawn ti a.

‘Kan kal meka,chanchin ka lo hrilh leh ang che’ ka ti a.

‘Um,nia..lo kal ve a tul pawn min hrilh dawn nia,a zia lo hle mai..mahse..Mal,diktak chuan kal se a tha zawk ania’

‘Ka rawn be leh ang che’ tunah sawi a hun miah lo.A sawi kha a dik, kal se a tha zawk, lo harh in emaw biak theih ta se, ka u a talbuai chiam thei,kei ngei pawh ka bang kher lo ang.A tir khan boral nghal se chuan kan buai viau ang tih ka chiang, a phone an check anga, ka u nen an inbiakna an hmuh chuan kan buai ang, mahse, a thi ta lo hlauha, tunah chuan Damdawiinah a awm reng tawha, a thi anih pawn engmah thar thawh leh na tur a awm tawh lo.

Damdawiin kan thlen chuan an lo awm nual tawh, ICU ah an lo dah lut leh tawha,Ruati u hnenah chanchin ka zawt vata, chhun lamah chuan engmah that lohna em em a neih an hre hran lo a, mahse, a khua a sik deuha, nachhawkna an pekin a chhawk mai loh avangin an jectiona, chumi hnuah a buai ta niin a sawia, a mangan hmel takzet,tul lo zetin mahni inthiam lohna bawk in min rawn fan leha, ka lu ka thing nawk bawk.

Darkar hnih dawn kan thu tawh, engmah tih theih a awm lo, nghah tlawk tlawk a nimai,ka bulah Ruby a thu a, a tawng mang lo,ngaihtuah muk tak nei niawm tak hian a en ngai a en reng a, kan thlen tirha ka kut a vawn erawh a la thlah eih lo.

‘Ruby..haw tawh ula, engmah tih theih a awm chuang lo a’ Ruati u in a rawn ti a.

‘Doctor kha i be ta em?” ka ti supa.

‘Aw, bia e..tihngaihna a vang khawp mai,eng lo..Diktakin sawi ta ila, beisei tur a awm lo a ti a’ a ti zuai raih mai,min deng deuh dawt bawk.

‘Ruby..kalsan rawh u, chanchin kan inhrilh zel dawnnia’ Ruby lam a hawi leha, mahse, a la che chuang lo.A kut ka hmer na zauha,a phu deuh zawk bawk.

‘Oh..eng maw? I sawi ka lo hre miah lo’ a ti bah nak bawk.

‘Kal san rawh u,chanchin kan inhrilh zel dawn nia’ a ti nawn leha.

‘Ka riak ve zawk ang chu ka lo ti a’ min rawn en a.

‘Angai lo,hei, Mipa riak tur kan awm teuh alawm, a tha leh mai ang’ min rawn ena, ka bu nghut ringawt.

‘Anih chuan, kan kal mai dawn mi?’ a ti leh lawi.

‘Nia, kan kal mai ang, a tul tak leh min rawn call ula, kan lo kal leh dawn nia’ ka ti supa, ka dinga, ka pawt tho zui ve nghal bawk.

In kan thlen chuan ka pa a lo haw tawha,chanchin min lo zawt vat bawk.A that vak loh thu leh zanah kal leh angaih maitheih thu ka hrilha, Ruby pawn a sawi ve bawk,chawei turin min lo nghaka, Ben-a te ina chaw ei kan tum kha Dino-i ka hrilh lawk vek tawh nangin Damdawiin kan kal leh zawk dawn si tih a hriat khan min lo siam kep vek.

Mumalin Ruby-in a ei lo,keipawn ka ei tam chuang lo,Roomah kan inzui chho a, kawngkhar a hawnga, light a on a, a bag Sofaah a vawmthla thak bawk.

‘Mal,tun chiah ka zawt leh duh che..khami ni khan engmah i ti lo tak tak em?” min rawn ena,a hmel tak ran maiah chuan thinrimna niawm tak a lang thei bawk.

‘I hre duh tak tak em?’ ka ti nghuta, Dressing table nghengin ka dinga.Ka inkuangkuah thun bawk.

‘Hre duh, ring lo reng che a hun hman hi ka duh lo..ka pasal i ni a, nangmaha in nghah ka tum pawn ka ringhlel tlat che a, hei hi ka duh lo’a ti leh duah..Sofaah a thu thla hnak bawk.

‘Nia, ka hria..min ring lo..khami ni khan ka kal ngei, ka u lam turin’

‘Ka u maw? Ngatinge?i thiante i chhuanlam tawha, tunah ka u maw?’ a meng phar ak bawk.

‘Min rawn calla, Motor a ken loh vangin ka ruala haw a duha, chuan a pasal nen an intih thiam loh vangin Hotelah khan a riak bawk’ dawt ka la sawi tel ta talh chu ania.

‘Chu chu thil thleng palh maw?I u hian a hua che a, nau ang pawn a en loh che kha,mahse, a lo call che a, i kal leh tho, I kal hnu lawkah Ruati tah khan an chhar a, chu pawh Hotel kha tu emawin a calla, Ruati a biak tlang theih loh thu a sawia, an han kal chuan thisen nena a lo tlu kha an hmu a...ni lo,thil thleng palh a ni thei lo ang’

‘Ka hre lo, ka hre lo takzet,khami ni khan ka u chu ka va hruai ngei,min haw eng ang mahse unau kan ni tho a, a sawi vang ngawt khan kan inzawmna a chat tihna a ni hek lo,mahse,Ruati chungchang kha chu  ka hre lo tak tak,min ring rawh’ ka ti leh hrawk a,a mitah ka en run bawk,a khap zauha, a hmel buai deuh nakah chuan in ring dawn nge dawn lo a ngaihtuah a ang viau bawk.

‘Chuan i thiante kha chu chhuanlam a ni a, i u chu thudik tihna a ni em?” a ti chhuak leh halh mai.Tawngka a chhang loin ka bu nghuta, min ring se ti lutukin ka melh run bawk.

A rawn tho a, min rawn pana, ka din ngaiin ka ding khawng luh ringawt,a rawn kal hnai zela, ka hmaah tak a rawn dingaEnge tih a tum ka hre lo,.A kut a rawn lek chhuaka, ka hmaah tak a rawn lek hnaia.

‘Min tiam leh rawh, ka ring che anga, ka natna turin engmah i ti lo ang tih leh ka lamah i tang ang tih kha’ a chetdan chuan min thawng lam hret, mahse, ka chhungril a fan rawih rawih thung, a lo tluk ngawt dan kha ka hre lo tak tak, mahse, ka hmu a, ka u chhan ka duh tlat avangin Ben-a chinfel turin ka kalsan anih kha..Mahse, a nat ka duh lo,ka nupui a ni a, keimahah hian innghat se tih aia duh ka nei hek lo.

A kut ka vuana, ka la kanga,ka fawp zui vang vang bawk.

‘Ka tiam che,ka nupui i ni a, i lamah ka tang lo anih chuan tu lamah nge ka tan chuang ang?’ka ti supa, ka pawt hnaia ka kuah bet zui nghal hmiah bawk..Ka awmah a hmai a rawn phuma, a insut zui hraih bawk..A sam uk eng lam deuh chu ka fawpa, kan inkar that loh chhung kha ni tamtak ni lo mahse kum a tling hialin kei chuan ka hre thung,a lawmna tur anih phawt chuan a duh ang apiang tihsak hi ka hreh dawn lo tih lah ka hming ka hriatchian tluk zetin ka hrechiang tawh bawk.

‘Ka mamawh che a,rinchhan che ka duh laiin ka ring thei si lo che, a hma khan hei hi min hrilh ni la chuan tiang khan ka awm lo tur ania’ a ti leh sepa, a rawn hawi chhuaka,min rawn melh chho kiau bawk.

‘Sorry...ka ti leh tawh ngai lo vang’ a sam,a hmai hliah deuh tu chu ka huikian saka, ka kawngah a rawn kuah ve a, ka insum zo lo, ka kun hniama, a hmui tlema kau deuh chu ka zuk si a, dim zetin ka fawpa, mahse, a ngik faiha,amah zawkin duhthawh zetin min rawn fawp leta, ka pawm kang nghal nawlha, ka kawngah a kherha, ka nghawngah a kuah nghal chial bawk..

Khum lam ka pan puia, khumah ka nghata,ka bawh bet zui nghal bawk,hmanhmawh zetin ka kawrlum hak a rawn pawt a,ka dim hleithei lo,a kawr ka nawr hlim chhoa, a bra ka pawt kaua,a hnute hmur lo lang chu ka fawp zui nghal hmak bawk.A eu arh mai..

‘Tawp teh...’ ka samah a rawn thama, ka rum hak mai.

‘Ngatinge?”

‘Kan ti thei lo maithei,ih...’ a hnute hmur ka liah kual leh takah chuan a rak that bawk.

‘Tawp teh..’

‘Nangmah leh tawp teh tih hi a inhmeh tawh ania, min dan han tum chhin la..’ ka ti supa, a kekawr kilhna ka hmet phelh zui nghal zata, a rawn tawng tum chu ka hmuiin ka khar sak nghal hmiah bawk.A tal leh phat mai..

‘Tak tak..ih,ka rai maithei ania aw” ka tawp chawt mai,ka insangmar nghal tawlh tawlh bawk..

‘Maw?!’ ka aw a tham tuak bawk..Fa neih hi ka beisei lo nge ka hre lo,ka lo ngaihtuah ngai lo,oh..hmanni kha chuan vawikhat chauh tak tak chu ka ngaihtuah ve zawk tak e.

‘Ka la chiang bik lo alawm..ka test lo a’ka sam a rawn khawih niap niapa, ka inthlahdula,engmah tisa chakna lam a awm tawh lo, a hnute inkarah ka fawp zauha, ka hmai ka phum zui vang vang bawk.

‘I rit ania aw..’ a nui hak mai...ka hawi chhuaka, a sirah ka letthla nghal thuk bawk..

‘Ruati...’ a sawi zo hman lo, a phone a ri a, a thu chhuak nghal vat bawk, muangchangin ka tho ve a, a che vel chu ka en a, mahse, ka rilruah Ruati lam a lang eih lo,PA ka ni ve maithei...a rik in a ri tlut tlut zawk.

‘Mal...kan kal angai ania’ min rawn en a,a tap tiau bawk..