STOP-25

Chapter- 25

‘Jamie....hey..’ ka hmai bulah a kut a rawn hmet ri khapa, ka harh deuh zawk mai, ka muhil miah lo tih erawh ka chiang.

Min rawn ko tu chu ka ena,nui sengin min lo melh kiaua,a biang sum a khuar kek bawk,a sam a kir chiata, a dar thleng lo deuhin a tana, a sam dum hlap leh a vun no zet chu a inhmeh takzet.Kum 29 a hmang meka, kei erawh kum 37 ka hmang mek thung,amah hi Doctor a ni a, Ben-a kal tlanga ka hriat a ni bawk,A zirpui thin Doctor pahnih te nen Clinic changtlung tak an dina,Ruh lam thiam bik Doctor lar tak pakhatin a zawm thar veleh takah phei chuan en sen loh khawp Damlo an nei ta reng,Lab an nei tel hian engkim a tih awlsam bik vang pawh a ni thei tho bawk.

 A tir lam chuan ka engahmah a thawk lem lo, mahse, a dawhthei hle a, ka mize nelawm miah lo leh midang tih nat nuam ti tak pawh a palzam mai mai thei tlat bawka, chuvang takin thian atangin tunah chuan ka hmeiche kawp ngheh tak a lo ni ta chiah reng bawk.Ni e. Ka nuna Hmeichhe awmchhun nen kan inzawmna a chah hnu a mumal nei lo tawpa ka nun ka hman lai leh beidawnna ruam min pal tlangpuitu hmeichhia...Hmeichhe zahawm leh chhungkaw zahawm taka seilian ni bawk hi ka tan mualphona a ni ngai lo.Mahse, kum 4 leh tlem a liam hnu pawh hian a biangsum ka hmuh apianga Ruby hmel a phena ka hmuh thin erawh damchhung daih a ni tih ka hria,a thik em ka hre hauh lo nangin a hming sawichhuah a ni ngai lo.Tul ka ti hek lo.

‘Um, lo thu la’ ka ti supa, ka thutna bul ka beng thuk bawk,a nui leh saka, a rawn thu thlaa,  ka mal chungah a ban a rawn daha, min rawn ngheng nghal ar ar bawk.

‘Enge i lo ngaihtuah a?” a ti leha.

‘Eng lem mah, i lo kal har ta sia, i bo anih ka ring mawle’ ka nui a.A nui ve hak hak bawk.

‘Teuh lo,ka rei ang ka tih reng kha,eee, vawiin chu Hmeichhe naupang pakhat an rawn entir ve a, a natna a serious phiana’ a ti leh siam siam a.

‘Chuan?” ka ti supa,a chhan ka hriat si lohin ka chhungrilah engemaw min kam tu a awm tlat bawk.

‘Naktukah MRI an ti leh anga, a result a zirin a awmdan zel tur a hriattheih ka ring’

‘Anih chu mawle’ sawi tur dang hre loin ka ti ringawt.

‘Ka enkawl tur anni chiah lo nangin ka lo hre ve tho a,amak lutuk,damlo dang ang lo takin ka ngaihven riau a’ a ti leh a, a hna hi min share khat viau,mahse, tanpui ngai ngawih ngawih an awm tum hian min hrilh leh zauh thina, ka tanpui tak pawh an awm nual.Mahse, an hriat ka duh ngai thak lo thung.

‘Kan kal dawn mi?”

‘Pawi miah lo, bakah zanin chu haw hma ka duh dawna, dar 8 hmain kan let leh hman  angem?” a ti leh a, ka tho a, ka pawt tho ve nghal bawk.

‘Hman kan tum ang chu’ ka ti supa.

‘Lawk..’ ka pen tan tawh chu ka banah a rawn kuaha.

‘Enge?”

‘I hmel a dik lo, chanchin tha lo a awm em?”

‘Aih..’

‘I pa a tha lo nge?” a ti leh talh, ka pa hi kum hmasa khan a Stroke a, a dam chhuah pawh beiseina kan neih loh laiin a damchhuak ta hlauh,mahse, pawn chhuak a, a dawr lama a duh hun huna a kal thin erawh thil theih loh ang a ni tawh,thla khatah vawikhat pawh a chhuak ta mang lo.

‘A that chu..’a ti sepa, ka rilru a nuam chiah lo, ka tawngkam a bung sa tawh tehreng nen ka mood dik lo vangin ka nelawm lo lehzual tih ka inhria, mahse,engtin ka ti pawh a ni lo a, chhan awm lova tlawn erawh ka tum lo hlawm tawp.

Kan kalna tur kan kal hnuah an Inah ka drop leha, in ka thlen in dar 8 a la ri lo deuh, ka pa room ka pan ding nghala, kawngkhar pawh kik lo in ka nem hawnga ka lut zui nghal mai bawk,ka thawm hriain Hriati a rawn hawi chhuak vata, Ka pa erawh a muhil tawh anih hmel,a mit a chhing a, puan a sin fel vek tawh bawk.

‘A muhil tawh mi?” ka ti a, tihharh ka hlauh avangin khumah thu loin ka ding a.

‘Aw, vawiin chu a chau deuha, mahse, ngaihtuahawm a ni lo’ a ti a, Hriati hi nurse atana ka lak a ni a, ka buai avang leh Inah ka awm mumal hman loh avangin ka ngaihtuah a, nurse lak mai hi tha ka ti a, ka u lah a lo kal nitin thei bik hek lo.

‘Ok,a damdawi a ei kim em?” ka ti leh supa, a bu nghauh ringawt.

‘I kal chhuah dawnah light hi lo off mai la..’ a ti leh a.

‘Aih, ka chhuak nghal dawn a,off nghal mai rawh’ ka ti leh supa, ka kuna, a puansin tlem kau deuh chu ka siamthat saka, a Stroke khan a tawngthlengin a ti muanga, tawng a harsata,Tiang tel loin a kal thei hek lo.

Dino-in chaw ka ei nghal dawn leh dawn loh min lo zawt vat,ka ei tawh tih ka hrilh ta zawk, ka eichak hlawl lo,a bu nghata,kan hnenah a kum tel takmeuh a awm tawha, kan duh zawng leh duh loh zawng engkim a hria,tunah chuan Nu Ruati a lo kal ngai tawh lo bawk nen a kutah engkim Inchhung hi chu a awm vek tawh ti ila a dik hial ang, Hriati hian ka pa in a mamawh lai anih loh chuan a pui ve thin bawk.

Room ka hawng a, Light ka on nghala, ka Jacket ka phelh dawn chiah tihin ka Phone a ri a, ka en leh rih, Anggu-a a lo ni a, an lo haw tawh nge la haw lo pawh ka hre lo.

‘Hello..’ ka ti supa, ka Jacket ka phelh pah mawlh mawlh bawk.Khumah ka thehthlaa.

‘Hei kan lo haw meka,naktuk tlaiah hmuh che ka duh dawn ania’

‘Tlaiah kher lo pawh min rawn hmu la’ bung zet hian ka ti hmuk a.Khumah ka thu thlaa, a vang zawngin ka mu zui zat bawk.

‘Chhunah tihtur ka nei alawm le, bakah Manu-i Pa nen tih lawk tur kan neia’ a rawn ti leh a, ka ner nawk mai,Nupui hlau leh lutuk..

‘Ok, a that chu,innu chu a tha maw?” a ri chuan ka ti ta tho.

‘Tha e,lawk aw..’ a ti a, Naupang tap ri ka hre thei.Ka nui ringawt,Manu-i nen kum thum an innei ve tawha, Manu-i hi MCS a ni a, Thingtlang lamah BDO in a awm a,Anggu-a zawk hian an mimal sumdawnna lam pawh ngaihsak tha hman loin  a dawih zawk ang maiin a zui kual hnu hnu reng bawk.

‘J...naktukah ka rawn bia ang che, lo inring lawk la,mahse, nangmah chauhin nia ka hmuh duh che’ a rawn ti leh a, a sawi tum ka hria, Mawipuii nen hian kan inzui nasa a, tlai lamah chuan a hna kal ka lam kual ziah tih a hre miau a.

Muhil lawk thei loin ka let kual sek mai,ka phone ka hmet enga,dar 1 a pel tawh,ka leh kual na lamah ka taksa a kham thum bawk.Ka thuchhuak ta nge nge, Tv ka on a,en mai tur a la vang phian zui, Khumah ka let leha, Lukhamin ka in kam kanga, en tur zawngin ka hmet kual leh dun duna,a lo lang ka hmuh rualin ka duh loh tawp ka mitthlaah a lo lang nghal zat bawk.Ruby Movie ngainat em em ‘Pretty Woman’ a ni tih ka hria,a en apiang khan min hrilh a, a chang leh a tahpui titih thin bawka, hmuhnawm ka ti ve lem lo nangin a en ngun lutuk vang khan ka hre hneh ve viau tho.

Ka lu ka thing nawk ringawt, amah vanga ka natna te, a tawngkam engkim te kha, kan Inzawmna ber Naute kha a pian ruala a boral nghal avangin ka beiseina chhete neih pawh a thamral ve ta bawk kha ania,min haw em em mahse a fa kha a Pa ka nih tlat avangin kan inkar kha harsa mahse kan siamthat leh ka beisei kha ania, mahse, engmah a ni ta lo.Engkim a hriatchhuah zan khan nikhaw hre loin a tlu a, mahse, a lo harh leh hnu khan ka pa hnenah Inthen a dil ta zawk,engmah sawi tur ka nei lova, Ka pa khan chelh beh a tum hle nangin a chelh bet zo ta bik lo,Ni lo..khang thil zawng zawng a hriat hnu khan chelh lui turin a huaisen tawk lo a ni zawk.

Vawikhat bak kei chuan ka ngen nawn lo,a luhlul zia ka hria a, a duh dan dan in kal mai se,Naute a pian hnuah kan inzawm leh mai ang tiin ka ngaihtuah kha ania, mahse, Naute ber a boral tak miau avangin ka tan engmah beiseina tur awm loin a thamral ta zawk, vawitamtak biakpawh ka tuma, mahse, awmzia a awm lo,an khuaah a awm emaw tiin ka han kal a, a lo awm chuang lo,tumah zawh chhuah theih ka nei hek lo.Ka hmu ngai ta lo,engtik niah nge kha Video kha a tlangzarh ang? Tih zawhna ka inzawt nitin a, mahse, engmah thawm a awm lo,kum a vei ta hial,engmah thawm a awm chuang lo,Ricky-a zawk pawh a reh hmiah,kum 2 a liam a, kum 3 a veia,ka natna te kha a reh ve tial tiala, Beiseina ka neih pawh a bo zo ta bawk,Mawipuii ka nunah a lo lang ta bawk nen ka hrereng ta lo,mahse, ka theihnghilh thak tihna erawh a ni lo..Nitin amah ngaihtuahin hun ka hmang ta lo mai zawk.

Ka muhil ta miah lo,khawvar hnu lawkah ka tho a, ka taksa kham thum tih reh nan Walk turin ka chhuak ta zawk,Kawngpui dung reh ruih maiah muangchangin ka tlana,a la hma bawka mi tawh tur an tam lo.Ka tlan zela,Dawrpui phei ka tlan lai erawh chuan mi dang ka tawk ta nual,ka thlan in ka kawr a ti huh titih tawh,MC kawtah Sumo chhuak tur an lo ding tlar puta,an lo zi nak nak tawh bawk,ka hawi kuala,Zing kar thingpui dawrah chuan ka chawl chak ta tlat,an tam angreng phian bawk.

‘Ka pu, enge i duh ang?” Paratha kang mawlh mawlh chungin nu hang chil chel hian hlim hmel takin a lo ti var bawk.

‘Thingpui ka lo in ang..’ ka ti a, Thutna pakhat a awl chiah bawk.

‘Aw, lo thu la, a in theih nghal alawm’ a ti leh a,engtin nge maw tun ang zing karah hian hlim hmel taka midang a biak bawrh bawrh theih zawk ni?Hmanhmawh vak loin ka in ve a, a tui phian mai.Pawisa ka pe fela, ka tho a, ka kal sawn deuh a, mahse, kal nghal mai lovin mi che vel ka thlir leh rih.Zing karah hian ka chhuak khat viau,Gym kal tura ka chhuak anih pawhin zing dar ruk velah ka kal tlangpuia,mi chevel ka lo chik ngai lem lo.

Nilengin hna lamah ka buaia,zan ka mut loh vang nge ka hre lo,ka mood a dik lo viau thung.

‘Khawnge i awm?” phone ka pick rualin Anggu-an a rawn ti a.

‘Hnaah ka la awm,i lo kal dawn mi?” ka ti nghuta, ka hmaa Laptop lam ka melh reng thung.

‘Kal dawn e,ka lo chhuak nghal nimai,ka rei lo ang’ a rawn ti a.

‘Um, a that chu..’ka ti a, Phone ka off a, ka thil tih lai ka tih zawm leha,enge min hmuh duh chhan tur awm ka hre lo,ka ngaihtuah peih hek lo, a lo thlen hunah ka hre mai ang chu.

A lo thlen chuan Mawipuii ka lo be mek a, kawngkhar pawh kik lem loin a rawn lut tlang pawp bawk,thu turin zaizirin ka bia a.Thu lo in  tukverh a pana, hnuailam a en vung vung bawk.

‘Le...eng nge chuti taka pawimawh chu le?” phone dah thlak pahin ka ti a.

‘Nia, i beisei lem loh thil a ni dawn ania, i hre chak vak lo maithei bawka’ inti thupui fun fe hian a ti a, a khawsak dan vel chuan ka nuih a ti za deuh tlat bawk.

‘Sawi mai mai teh,.’

‘Sawi dawn e, Intur i kawl em?” a ti leh rih.

‘Kawl nang, eng nge i duh a? ka lak tir thei reng lawm’ka ti a.

‘I kawl loh chuan ngai lo mai teh se,Ka in lo rei tawha, ka chak thut mawle’

‘Um, engtik nge in chhoh leh dawn?”

‘Kar thar ah niang, chawlh rei lo te a la a, amahin a chho hmasa ang, kei chu a hnuah’

‘Pasal tha tak ngang hi chu aw’ ka nui a, a nui ve hak hak bawk.

‘Chuan?” ka ti leh supa, Dawhkana Glass mum awm chu ka tuai vir paha.

‘Eng lo ania, Manui bial chhung khaw pakhatah hmanni deuh khan kan kala, an High School lo din ve kha an khaw mi tlawmngai leh nei nung deuh te din ania,an zirtirtu ho nen inkawmna kan neia’ a ngawi leh rih,a sawi tum ka la man chuang lo,enge kei nen a inzawmna tur reng reng ka hre lo bur.

‘An Teacher pakhat erawh kan hmu thei ta lo va, a fanu damlohna vangin Aizawl lamah an kal tih an sawia’amah bawkin a ti leh a.Ka la man chuang lo, tanpui tura min duh te anih ngawt loh chuan?

‘Enge sawi i tum ber a? ‘ ka aw a chang lam hret.

‘Lo ngaithla la, i thinchhe lutuk kha lo control teh..’

‘Anih chuan  i sawi tum sawi vat la’ za lo zetin ka then suk bawk.

‘An zirtirtu kan hmuh ve tak loh chu Ruby tih hmingpu a ni a...’ ka khawng nghal luh mai.

‘Ruby...’ ka ti ve sup ringawt.

‘Aw, Ruby,hming in ang a lo awm ve palh theih takin tiin a photo en ka dila, chhuanlam dawrawm angreng tak ka hmang bawka..’

‘Amah tihna a ni em?” ka ti chhuak hrawih bawk.

‘Aw.Amah...engtin nge khatah khan a awm theih ka hre lo,ka zawh lutuk chuan mak an tih ka hlau a, ka zawt thui ta lo,mahse..Fanu a neia, kum 5 vel bawr, a la tling lo hret maithei an ti bawk,a hrisel lo hle a, a thluak lamah fel lo a awm bawk,chumi check-up tur chuan tunah Aizawlah a awm mek’a ti ta duah.

‘Anih tak chu...’zawi supin ka ti a, mahse ka chhungril erawh engemawin min hnawh a, ka kut ka hum ruh tlat bawk.

‘Engahmah i ngai lo tih sawi  i tum anih chuan i hlawhchham ania’ za lo zet hian a then sawka, ka hmaah chair a rawn pawt hnaia, dawhkan bawh titihin a rawn thu zui zat bawk.

‘Chutiang pawh ka sawi ka hre hleinem’ ka ti leh nghut ringawt.

‘I sawi ka ti lo,chutiang chuan lan tir i tum zawk,Nia..a rei tawha, kum a vei teuh tawh bawka’

‘Anih si chuan engvanga min hrilh nge i nih a?” ka ti leh hmuka, hahdam awm takin ka chair hnunglam ka ngheng ur ur bawk.

‘Nia...amah ka hmuh thu hi hrilh che a tul kher lo maitheia,mahse,Fa kum 5 mi vel a neia, pasal a neih an hre lo,chumai bakah Mipa hrim hrim in an hnaih thei ngai lo,zungbun a bun renga, Pasal sun tawh anih thu a sawi bawk...’ a ti leh a, ka thaw hawk mai,a thusawi chuan min ti mangang ni berin ka hria.

‘Chuan?”

‘Pasal lo nei pawh nise a lo berah a fa chu kum 2 emaw kum thum tal a ni tur ani, in inthen atangin tunah hian kum 4 na tur a kal mek chauh a ni sia’

‘A tawk...ka fa chu a thih kha’ ka tum aiin ka au ring hret.

‘Ka hria,mahse, a thi tih kha i hria a, i hmu lo..a dik em?” a ni pawh a au titih ve tho bawk.

‘Ka hriat kha a tawk’

‘Takzet??’ awih lohna a hmelah a lang chiang ngang mai.

‘Aw.Ka pa ngeiin min hrilha, engmah awih loh tur a awm lo’

‘Yeap,a tha...ka sawi zawng zawng kha ka sawi loah ngai mai teh’

‘Engvangin nge i thinrim a?i nupui pawh ni hlei lo’ ka ti hluka,ka nui chhuak hawk bawk.

‘Oh,Mala,tiang zawng khan maw i lo ngaiha? Ka nupui a ni hauh lo, mahse, i natna te hi ka hmu ve a, chutiang bawkin Ruby tuarna pawh a then chu ka han hria,siamthat theih a ni em tih ka ngaihtuah a..chu pawh thildang vang ni loin Thian kan nih vangin’ a aw a dam ta hle bawk.

‘Engmah siamthat tur a awm lo,a tawp tawh’

‘Ok, i duh dan anih chuan le,mahse, hei chiah ka sawi leh ang, a tawp tawh maithei,amah Ruby pawh hian neih leh che a duh ka ring lo,chutiang mai mai turin thutawp siamin a kalsan lo ang che,ka duh zawk chu in fa enkawl hi in mamawh a, in tangrual thei anih chuan ka ti mai zawk’

‘Ka lawm e, mahse, ka fa a thi tawh..’

‘Nia,a thi tawh..mahse, i hriatreng tur chu i luhlulna vang khan a hma aia na zawk insiam lo la ka duh,ka kal phawt ang’ a ti a,muangchangin a tho a,chelh tumna ka nei lo,kal vat vat se ka ti ru hluah hluah zawk.

Kawngkhar kik thawmah ka phu deuh zawk mai,ka hawi chhuaka, ka room chhung thim deuh ruih tawh chu ka en kuala, Anggu-a chhuah hnu khan engchen nge che loin ka thut ka hre lo,kawngkhar kik thawm bawk a rawn awm leha, ka thu mara, ka thutna bula Switch awm ka hmet nghal bawk.

Lut tura ka tih rualin kan Accountant a rawn daka, a inthlahrun hmel hle bawk.

‘Sir,englo ania..ban a hun tawha, mahse...i la laklawh chuan?’ nuam lo tih hmel zet hian Kawngkhar bulah a ding a.

‘Ka zo chiah e...’

‘Ok,anih chuan ka kal lehnghal mai ang’a ti a.

‘Lawk,nidangah chuan ban hunah ka la awm anih pawhin ban hun pangngaiah in haw mai thin dawn nia,ka mamawh che u chuan ka sawi lawk mai ang, min nghah angai lo ania’ ka ti a.

‘Awle, Sir,ka lawm lutuk’ a ti a.Kawngkhar a rawn nem khar leha,Nidangah hetiang hian ka khawsa ngai lo,midang aia hma hretah ka haw anih loh pawn an rualin ka haw mai thina, mahse, vawiin zet zawng ka awmdan ka hrethiam bik lo.Ni lo,ka hrechiang lutuk zawk, kum 4 lai a liam hnu pawh hian a chanchin ka hriat rualin min la tibuai ta cheu.

In ka thlen hnu lawkah Mawipuii’n min rawn calla, ka pick mai lo,ka be chak hlawl lo, tumah ka be chak lo hrim hrim zawk, mahni a awm ka duh ber.A tawpa, mahse, a rawn ti nawn leh ta tho.

‘Hello’ ka be chak lo tih tihlan loh tumin ka in Control nasa viau.

‘I va la buai awm ve’

‘In ka thleng chiaha,i haw tawh mi?” ka ti a, Tlaiah tihtur ka nei tih ka hrilh lawka,aman Car a nei ve tho bawka,thil harsa a ni lo.

‘Hei ka haw dawn meka,i reh vang vang sia, ka lo call zuai che..’

‘Sorry,ka lu a na deuha, ka inbual anga, ka mu ang chu ka lo ti a..’ ka ti leh supa,a na tak tak hauh lo.

‘Ehe, Damdawi i ei em?” ka rinlawk ang ngeiin a rawn ti nghal chat.

‘Aw, ei..a zia leh mai ang..’

‘Ok,anih ka dah aw..In ka thlen hunah ka lo hrilh dawn che nia’zangkhai tak hian a rawn ti leh a.

‘Um,fimkhur la’ ka ti leh supa, ka off zui nghal mai bawk, Khumah ka thehthlaa, ka hawi kuala, he Roomah hian Ruby kha a awm ve thina, mahse, tunah chuan a awm ve thin tih pawh rin harsa tak a ni.Engmah a sulhnu hmuh tur eih a awm lo.

Anggu-a thusawi bawk ka bengah a rawn ri nawn leha,’Ruby-in fa a neia, kum 5 anih loh pawn a tling tep ang,pasal a neih tuman an hre lo va, mahse, pasal sun ang in a insawi a, a kut zungtangah Inneih zungbun a bun reng bawk’

Khumah ka let thla tawp ringawt.Ka fa kha a thi reng em? A thi anih si chuan tunah engtin nge fa kum 5 mi a neih theih ang? A theih loh bur,midang fa a la tihna a ni em?ka ring lo,engvangin nge a nu leh pa bulah a khawsak mai loh? Zawhna hlir..Na zetin khum ka chum nghek ringawt.

‘Ka be duh che’ ka u in phone a pick veleh ka ti nghal tawng.

‘Aw, hei min biak hi’ a nui kar kar bawk.

‘Ka hria, tunah khawiah nge i awm?”

‘Inah lo khawiah nge niang?’ mak tih hmel zet hian a rawn ti leha.

‘Ka lo kal..’ ka phone ka off nghal hmak,Ruby-in Nau a vei lai khan hna vangin ka zina, ka  awm ve lo,ka u leh ka pa an awm tih ka hria.A thi ngei em tih chu ka pa leh ka u in an  hre tur a ni.

Ka pa roomah ka lut kawi zuaia, Tv a lo thlir dauh dauh a, engmah zawh chi a ni lo tih ka hria,ka kal chhuak lawk dawn tih ka hrilha, a bu satliah ringawt.Ka u te In ka thlen phei chuan dar 8 a la ri lo deuh,ka tlan chak thawkhat, kan in ka chhuahsan khan dar 7 leh a chanve a pel hret kha ania.

‘I va lo thleng rang ve.Ka pa enge a an?’ a lo ti thuaia, an fa te phai lamah an la dah ta zel,Makima erawh a hma ang kha a ni ta lo,zu pawh a in nasa ta lo.

‘A tha,khawnge midang?” ka ti a.

‘An mu tawha, a then an chhuaka’ a ti a, ka u hian kan nupa inthen chhan kha a hrechiang em ema,a inthiam loh vang nge ka hre lo,a hma zawng ai khan min duat lehzual.Mahse, a tih anih loh thu bak ka pa bulah pawh sawitur a nei chuang lo.A tir kha chuan ka haw hluah hluaha, mahse, unau kan ni tlata, kum a vei meuh chuan a thiltih pawi zia kha theihnghilh lo mah ila ka palzam thei ta tial tial a ni zawk.

‘Thil ka zawt duh che’

‘Aw, eng thil nge a? i awmdan a mak riau ania’ za vak lo hian a nui a.

‘Kan naute kha a thi tak tak em?”

A hmai dang deuh lawp leh a mengphar awk chu ka hmuh hmaih hauh lo,mahse, a in control leh vata, a hmela hlauhthawnna niawm tak kha a bo nghal hmak bawk.