STOP-26

Chapter- 26

‘Aw..ngatinge chu chu tunah min zawha?” a aw a dam hle bawk.

‘Ka hre duh’

‘A tir khan ka hrilh che kha, ka pa pawn a hrilh bawk che a..’

‘Nia, min hrilh...’ka ti tawi tuk ringawt.

‘Anih chuan tunah ngatinge min zawh leh a? i ringhlel tihna nge?”

‘Ka hre lo.Ka hre duh mai mai’a mitah ka en ngur bawk.

‘A nau neihni khan Ka pa nen Damdawiinah kan awm ve ve,mahse, min dil angin a ruang erawh an mahni in an la tih pawh i hria’ a ti leh a, ka ngaihbel nge ka hre lo, a aw a khur tlat in ka hre bawk.

‘A that chu, ka rilruah a awm thuta, ka zawt mai mai che,ka kal leh mai dawn’ tih leh din ka ruala.

‘Awww, leng rih la.Mawipuii enge a an a?” a ti leha, Mawipuii nen pawh an in pawh ve thawkhat viau tawh.

‘A tha...anih ka kal’ ka ti a,ka ban ka vai zauh bawk.

Muhil lawk lovin ka let ka let ringawt,nizanah ka muhil tawh lo va, mut ka mamawh tih ka hria.Engvangin nge Anggu-a khan min hrilh kher?ka tlawmna pawh hmu duh lo leh hmu thei lo,Nupa kan nih na aia a thian ngai hlu zawk tu hmeichhia kha ka mamawh lo.

Tukverh ri bur thawmah ka harh zawk mai,Ka tho a, tukverh ka khara,khua a lo eng tan tawh,ruahsur tur intham nge thli tleh ve hrim hrim ka hre lo,ka room bula kuhvarah kung awm chu a chhem che kual lawp lawp bawk.Nizan khan tukverh pawh khar loin ka lo muhil anih hmel,ka muthilh theih pawh ka beisei lo kha ania.Curtain chhah zet inzar lo va a sira in nawr tawm chu ka pawt pharha, ka duh loh tawp thil bawk ka hrechhuak leh nghal zat.Nia..Ruby khan thli a hlau a, khawpui ri kal ruah ruah te, tek tla te nen...Tunah engtin nge a awm ang? Ka lu ka thing nawk mai.

Bawkkhupin ka mu a, ka ngaihtuahna atanga paihchhuah tumin che loin ka awm vang vang bawk,mahse, ka beidawng thak..Ka inleta, chunglam ka melh a, kan inthen hlim ang bawk khan amah mamawhna vangin ka chhungril a sahal leh ta niberin ka hria.Ka tlawma, ka um zuia, mahse, ka tlawmna te kha engatanmah a ngai lo,ka induhtawkna leh chapona zawng zawng ka dahtha veka, ka dik loh ni a ka hriat vangin a duh ang ang a awm ka thei ang ti khawpin ka nawra, mahse, awmzia a awm lo.Hmuh theih loh tura a kalbo hnu pawh khan ka zawnga, ka ngaihven a,kum tel teuhmeuh..Mahse, Mipa ka ni a, a tawk ka tih chin a pelh takah kha chuan a tawp ta vek...Ka thu chhuak ta nge nge,he ngaihtuahna hi....Min kalsan hlen tawh emaw ka ti a, mahse, a chanchin ka hriat rualin avaiin nimin ang chiah a ni leh ta tho.

‘I tha em?” ka hawichhuak vut bawk.

‘Um..ngatinge?” min ngaihtuah hmel zeta min entu chu ka en a,nidang angin hmuh nuam ka ti lo.

‘I tha lo hmel lutuk,bakah ka bia che a,ka sawi engmah i hre lo’

‘Sorry..’ ka ti supa, ka newspaper ken ka dahthla a.

‘A pawi lo,ih..nimin piah pawh khan tiang chiah khan i awm a? engemaw dik lo a awm em?” a ti leh a.

‘Awm lo,Dar thum hma hian Zoa hi a thu miah lo nge?” ka ti a, pawnlama in entir tur te tawng nak nak chu ka hretheia.

‘Aw, a buai thin e lawm..’a ti a.Ka tho a.

‘Motorah ka phone pakhat ka theihnghilh,ka zuk la lawk ang’ka ti a.A bu nghauha,min ngaihtuah hmel zeta min en chu ka hre lo der hmiah thung.

Kawngkhar ka hawnga, ka hawn rual deuhthawin a ri deuh bawpa, Hmeichhe naupang tap ri ka hre zui zat bawk,rang zetin ka dak chhuaka, Kawngkhar ka khar lehnghala.Nu pakhat in hmeichhe naupang tap a lo thlem mek chu ka hmu hmasa ber.Min hnungchhawn zawnga a thut vangin a hmel ka hmu thei lo a, hmeichhe naupang erawh ka hmu thei,a sam a kir veka, a mit a nuai chat chat bawk.

‘Ka tihpalh lutuk,a awm tih ka hre lo...’ ka hmaa Hmeichhia a rawn hawi chhuah takah chuan sawi zo thei loin ka tawp nghal chawt thung.

RUBY...amah a ni..a la ngai reng.

‘A pawi lo,a harh ve lutuk a’ a aw a dam thlapa, min en danah min hre awm in a awm lo.A rawn tho a, Hmeichhe naupang tap deuh feih feih chu a pawm kanga, thutna awl pakhat awm chu a pan puia,Hmeichhe naupang te chuan a dar kar atangin min rawn melh kiau bawk.

‘Jamie...i la kal lo maw?” ka banah a rawn vuana.

‘Oh,kal dawn chiah...ngatinge i lo chhuah a?” ka ti sup ringawt.

‘Hei hi ka leitir lawk dawn mawle, i kal tawh maw ka tia,kal ila’ a ti a, a thil ken ka lo hmu miah lo,Ruby te lam ka hawi leh zawka, min en loin a mal chunga hmeichhe naupang sam kir chiat mai chu tuai sak hauh hauh pahin zawi te tein a be bawk, ka awm ve vanga mangang emaw nuam ti lo lam engmah a lang lo.

‘Thil ka theihnghilh a,tlaiah ka rawn lam leh mai ang che, a pawi em?” step kan chhuah thlak hnuah ka ti ta ngawt.

‘Aih,pawi lo e..’a ti tha ve mai, mahse, a ngaih a that hmel fahran lo.

Anggu-a te in lam ka pan ding nghala,nimin vang khan call ngawt chuan ka insawi kaw zoin ka ring lo,kei ai chuan a nem zawk hle nangin a tih loh lamah chuan tihluih a harsat zia ka hrechiang.Inah a awm leh awm loh ka hre chuang der lo thung.

‘Ehe,nang maw?” Manu-in min hmuh veleh a lo ti nghal vat.

‘Aw, a awm em?” tih pahin ka zui luta.

‘Awm e,lo thu la,nge i han chho ve zawk dawn?” tih pahin inchung lam a kawka.

‘Ka han chho ve mai ang, Roomah nge Inchung zawlah?”

‘Inchungah zawk, ka nu Pangpar dahna tur a siamthat saka’ a ti awlsam leh mai.

Inchung zawl ka thlen chhoh chuan ka hmu mai lo,a nu hian pangpar angaina hle tih a hma tangin ka hre lawksa tawha, inchung zawlah hian Green House lian tha zet a neia, a hralh chhuak nasa hle bawk.

‘I lo kal alaw?” rawn dinchhuah pahin a rawn ti a.

‘Aw, lo kal lawk,enge ber nge i siam a?” ka ti supa, ka pan pheia.

‘Siam tih lemah ka hungrem a ni mah zawk, eng nge a?”

‘Ka lo kal,mak i va ti ve’ ka nui lui suk bawk.

‘Mak ti nang,mahse..ka beisei lo che chu nia lawm’ a ti tha ve mai,Thira siam thutthleng inthen theiah chuan ka thu a.

‘Tak takin lo kal chhan ka nei’

‘Ka ring sa alawm, eng thil nge?”

‘Ruby ka hmu’ ka aw a ring hran lo nangin a hre thei tho tih a awm danah ka hrethei.

‘Maw?” awih lohna a lang chiang viau.

‘Mawipuii te Clinicah’

‘A hmu che em?”

‘Aw...’

‘Anih chuan enge thleng a?” midang an awm leh awm loh en in a hawikual leh rih.

‘Engmah....’ abak sawi tur awm hek lo le.

‘I be lo mi?”

‘Aw,ti ila ka bia,mahse, min hre awmin a awm lo,a fanu ka hmu bawk’

‘Ka sawi kha..I fanu kha a thi lo’

‘Ka hrethiam lo,enge ka tih ang ka hre lo’ ka hmai ka hup vang vang bawk,Ruby hmel ka mithlaah a lo langa, tlemin a lang thau ve ta deuh,a sam kha duhdah zetin a chhipah a tawnkhawma,  a lang upa ve ta deuha, a hmai a lang hriam ta deuh tih loh chu engmah danglamna a awm lo.Kha hmeichhe naupang te kha ka hmuh rualin keimahah dik lo a awm bawk..A fanu ka ti ngawt nangin a fanu a ni em ka hre hauh lo.

‘Pawi i tih loh chuan ka lo be dawn nia..’

‘Maw?”

‘Aw, a number ka nei,mahse, ka la be lo..nimin khan sawi ka tuma, i duh loh em vangin ka sawi ta lo anih kha’ a ti ta duah.

‘Ka be duh em ka hre lo, ka hriat duh zawng chu ka fanu a ni em tih zawng kha animai’

‘Ok...mahse, lo ni ta se?”

‘Ka hre lo,khalam chu ka la ngaihtuah thleng lo..’ka ti leh hrawih a,ka la ngaihtuah lo tak tak,mahse, ka fanu a lo ni anih vaih chuan ka laksak ngei ngei dawn tih ka hria.Tunah a ni emaw ni lo emaw ka theih veleh ka laksak ang, ka theih hma pawn min ngainat nan ka bei dawn tho tho bawk tih ka hrechiang sa nghal vek tawh, ngaihtuah chawp leh angai lo,ka sawi chhuak lo mai zawk.

Clinic ka let leh in an lo awm tawh lo,Mawipuii a lo la hman lo deuh avangin ka nghak leh riha, mahse, engmah ka rilruah a lut lo.

‘Vawiin khan an lo kal leha’ kan tlan chhuah hnu lawkah a ti a,ka melh zawka, pawn lam a en avangin a hmel ka hmu thei lo.

‘Tu te maw?”ka ti nghut a.

‘Hmanni a ka sawi kha, Zoa enkawl lai anni ka tih kha’

‘Um, i va ngaihven ve” ka nui lui hawk bawk.

‘Nia, ka hmuh tirh atangin a chhan hriat si lohin ka ngaihven ka tih kha’

‘Amak hle mai,anih leh a test enge a an a?”

‘A tha lo,mahse, enkawl theih a ni maitheia, chu erawh an test leh anga a chiang ang’

‘A nih chu mawle’ka ti ringawt,tu nge annih ka hre ve lo a, ka hriat zawng chu Ruby leh Hmeichhe naupang sam kir chiat te chauh kha.

‘Nia, vawiin khan i hmu ang ka ring..’a aw ki danglam deuh chu ka hriat hmaih lo.

‘Chutia law?’ ngaihsam hmel zetin ka ti liam puat.

‘Aw,i hmu..’

‘Enge sawi i tum chiah?” a awmdan chu nidang nen a in ang lo,mahse, tiang a thil sawi kual hi ka ngaithei thak lo.

‘I nupui ania lawm’  a aw a khur a.Nghet zetin Steering ka vuan bawk.

‘Ka nupui nge a hlui?”

‘Engpawh nise min bum angai hleinem,nupui i nei tawh tih ka hria,i hmuh leh vanga i awmdan danglam kha ka haider mai thei vek,mahse, min buma i kal chhuak leh i nihna hloh vek khawpa i awm kha mak ka ti’ a ti ta duah.

‘Thildang i sawi thei tawh em?’ ka ti sup ringawt.

‘Aih,ka zak tih sawi ka duh,khatiang khawp khan a lo la effect che tih hria ila chuan’ a ngawi zui daih lawi.

‘Hria la engtin maw?” kawngsir awl laiah Motor ka ti dinga.

‘I chanchin hi ka ngaihven a, i nunhlui ami pawh kha amah hmu lo mahila a hmel ka hria,mahse, ka thik lo..kha chu nunhlui a ni a, ka buai lo....’

‘Chuti anih chuan sawi tawh lo la’

‘Fa i nei tih i sawi lo kha ka thinrim’ a ti leh sapa,ka khawng nghal luh bawk.

‘I sawia ka hre chiah, a tawk em?”

‘Khawngaihin...’

‘I duhtawk em?’ ka ti leh hmuka.Min nawr luih hi a atthlak zia ani pawh hian a hria.

An in kan thlen thlengin tumah mah kan tawng ta miah lo,a thinrim chhan ka hre tho nangin a lungawi nana sawi chiam tur ka hre lo.Bakah ka tum lem lo,Ruby laka ka tlawmna kha Hmeichhe dang lakah chhawm zui ka tum hek lo.

In ka thlen hnu lawkah Anggu-an min rawn calla.

‘Ka be theia,mahse, a awmna a sawi duh tlat lo’ a rawn ti nghal lar lar mai.

‘Ok, a that chu, mahse, amah kha ka duh a ni lo ania, Hmeichhe naupang zawk kha’

‘I chiang em?”

‘Aw, chiang...ani kha chu a tawp vek tawh’

‘Ok,a tha lawm’ ngeiawm zet hian a nui a, ka bulah chuan awmse a nui kher lo ang,ani hi chuan engtik lai pawn Ruby lam a tang ngar ngar zela, kan inthen pawh khan min dema,min tan eih lo.

Ka pa room ka pan ding nghala,mu loin a chairah a lo thu a, Nursein eitur a lo pe mek bawk.

‘I lo tha em?” a bula chair pawh hnaih pahin ka ti a.

‘Aw..ka tha’ harsa tih hmel zet hian a ti a.Pa viak tha leh lu zo vah thin kha tunah chuan buaipui ngai leh mahni pawha insaseng hleithei lo a ni ta chu ania.Khawvel hi a mak teh e.

‘Vawiinah i u a lo kala’ a ti leh a, a kutin Nurse chu kalchhuak turin a ti a.Mahse, chhuak mai ngam loin Nurse chuan min rawn en a.

‘Um,kal rawh, keiman ka lo ti ang,a ei zawh hunah ka lo ko mai ang che’ ka ti a, a nui var var a,a hna mah nise a ninawm ve khawp ang le.

‘Enge ka u chuan a rawn tih a?” a chhuah fel veleh ka ti a, Spoon a dawm tur chu ka pui vat bawk.

‘A lo kal mai mai’ muang zet hian a ti a.

‘Anih chu..E,..vawiinah Ruby ka hmu a’ ka ti supa, che loin min melh reng ringawt,ka tho vata, a darah ka sawia, a spoon ken ka dahthlaa, a kut ka hmet nawk nawk bawk.

‘Ka tha...’ reivak lo ka hmeh hnuah a rawn ti chhuak a, a thaw hawk bawk.

Ka thutna ngaiah ka thu thla leha, tiang hian a chang in a awm leh zauh thina,a thil lak tur la thei lo a ban reng tum te a nei fo bawk.

‘Ruby maw?’ a ti leh a.Ka bu ringawt.

‘Eitur hi dahsawn teh’ a ti leh a, pawn lamah ka nawrchhuaka,Dino-i lo awm hnaih lai tak a ni bawka a kutah ka daha, ka luhsan leh mai,a hmui ka hrukfai saka, tui ka intir leha, mut a duh leh duh loh ka zawta, a lu a thing mai.

‘A dam tha em?” reivak lo tawng loa kan awm hnuah a rawn ti leh ta nge nge.

‘Aw, aa.ka hre lo,kan inbe lo’

‘Anih chu,kal tawh rawh,damdawi min pe turin Nurse kha lo kal rawh se’ a ti leha, ngaihtuah muk tak nei hmel a pu bawk.Hmeichhe naupang chungchang kha zawh ka duh em em a,mahse, ka zawt ta lo.Anggu-an a buaipui meka, chumai bakah kei pawn ka buaipui zui dawn tho tih ka chiang.

‘Hello’ en lo in ka pick a.

‘I buai em?” Mawipuii a lo ni a.

‘Aw, buai ve deuh,mahse, sawi la’ ka ti a, khazan atang khan ni hnih a liam leh tawh, a lung a awi lo hle tih ka hria, mahse, tlawn tumna ka nei lo,a tukah tha takin ka bia a, ani pawn tihtauh awmzia a awm lo tih a hria nge ka hre lo,engmah a ti lang zui lo.

‘I lo kal dawn em?” a rawn ti a, Sana ka melh zawka, dar 5 a lo hnai tawh,Ben-a te Inah chawei tur kan ni a, ka lo hre leh tawh lo.

‘Kal tep, ka lak lawh deuh,mahse, ka rei lo ang’ ka ti a.

‘Ok, ka lo nghak ang che, a hnuhnung ber ka en zo chiaha’a rawn ti a, tihtur kan neih lawk avangin nidanga 20 la thin khan 10 chauh a la tih ka hria.

‘Um,ka rei lo vang’ ka ti a, ka off a, ka hna khawih lai ka khawih zawm leh nghala, ka mimal thilah eng ang pawn buai ila ka hna hi ho lam takin ka kalsan ngai lo..

Ka thlen phei in dar 6 a la ri lo deuh,lut chho loin pawnah ka lo nghak a,a lo chhuk tawh em tih en tumin ka hawi chhuaka, ka tum loh tawpin Ruby leh Hmeichhe naupang rawn inpawm chhuak ka va hmu chiah bawk.

Ka insum hman lo,Motor kawngkhar ka hawng a, an lam panin ka pen phei nghal pawk pawk bawk.

‘Min lo hrethiam lawk..’Taxi a luh a tum mek chu ka va ti a, a kawngkhar ka nem khar zui hmiah bawk.

‘Eng...enge i duh a?” a ti bah nak mai, min beisei lawk lo tih hriat zet hian a hmel a buai nak bawk.

‘Ka pu,angai leh lo e ‘ Taxi Driver hnenah ka ti a, a bu nghata, a tlan zui ve mai bawk.

‘Ka be duh che..’

‘Biakna tur che ka nei lo’ a aw a chang fak bawk.

‘Oh,nei e..’ tih leh a banrekah chelh ka rual nghal zat bawk.

‘Jamie...’Hmeichhe aw hian a rawn ti a, ka inher nghal vut bawk.

Mawipuii a ni tih ka hre sa a, kan hnungah a lo ding reng tawh, a hmai a dang lap bawk.

‘I hman tawh mi?” ka ti supa, Ruby ban ka chelhna ka thlah chuang lo.

‘Aw,mahse...enge i tih kha?” Ruby a melha, min en leh a.

‘I hriat kha, Ruby hi biak lawk ka duha,a rei lo ang, Motorah lo va awm la’ ka ti a, a vawikhat nan ka ngen ve ta hial.

‘Oh...awww,nia’ a ti bah nawk nawk mai..

‘Angai lo, engmah sawi tur kan nei lo’ Ruby in a lo ti ve thung, ka ena, a sawi ka hre lo der hmiah bawk.

‘A rei lo ang’ tih leh pawh kal ka ruala, mahse, ka pawt na lo,min rawn zui nghal dat dat bawk.

‘Ka hriat duh chu pakhat chauh,hei hi...’ Hmeichhe naupang lamah ka thle zauh bawk.

‘Engmah hriattur a awm lo’

‘Ok, nia..mahse, ka hre duh tlat’

‘Khawngaihin...tunah chuan min tilui suh’ a ti tham chala, tap mai tur a ang bawk.A nau pawm zawi deuh hniang mai chu a pawm tha a.

‘A tha lawm,lo kal rawh, ka drop ang che, mahse, naktuk bak ka nghak dawn lo ania’ ka ti leh nghuta.A tang deuh nangin mi kal vel an awm reng bawk nen ka kaih ang angin min zui ta tho.

Motor hnunglam kawngkhar ka hawnsaka, lut mai loin a tawi deuh hrat ringawt.

‘Lut rawh, tihtur ka la nei ania’ ka ti sup a, nem leh nelawm taka biak ka tum lo.

‘Taxi in kan kal theia’Ka kawngkhar hawn sa a nem khar hmak bawk.A inhera, a kal zui nghal nal nal mai.Um zui ka tum thuta, mahse, ka ti ta em lo.

Motorah ka luta, Mawipuii thu ngawi ngar mai chu ka nuih lui hram,a lawm lo tih a hmelah a lang thei reng,ka dem hauh lo, amah zawk hi ka awmdan ang khan awm se ka lawm lo tawp ang, mahse, tunah chuan a tul rih tlat.Ruby neih let leh ka tumna a ni hek lo.

‘A zia lo khawp mai’ ka ti supa, a bu ringawt, Motor ka start a,ka tlanchhuak zui nghal mai bawk.

‘Ruby kha ka buaina a ni lo ania’ ka ti leh a.

‘Anih chuan enge i buaina?”

‘Hmeichhe naupang kha’ ka tum aiin ka aw a chang hret.

‘Oh...a nu anih angin a enkawl thiang a’

‘Ka hria, ka hriat duh chu ka fanu a ni em tih zawng hi a nimai’

‘Maw?” mak tih hmel deuh hian a ti chhuak halh mai.

‘Ka hriat dan chuan ka fa hi a pianhlim in a thi tawh,mahse, tuna kha Naute ka hmuh rual khan rinhlelhna ka nei,chu zawng chu..’

‘Ok..ka hrethiam e’ zawi deuh raih hian a ti a, a hrethiam tak tak em ka hre lo.

Dar 10 pelh hnuah in ka thleng ta chauh,engmah kan sawi zui lo nangin kan boruak a rit churh tho,Anggu-a a lo kal ve a, mahse, inbiak falna hun a awm lo.Ka pa room kawngkhar dimtein ka nem hawnga, light pakhat hi dul deuh in a lo enga, a awm danah a muhil tawh a ang.

Ka inhlip sawk sawka, rei vak lo in chiah ila ka zia deuh ka ring a, vawiin kha ruah a sur lo nangin a uap churha, ka boruak tawn nen ka thawpik tlat bawk.

Bathroom kawngkhar ka hawn rualin ka phone ri tawp lam ka hre hman chiah,ka pan pheia, Number ringawt.Tunge anih ka hre lo,call back tul ka ti lo.A pawimawh chuan a lo call leh mai ang ka ti rilrua, Khumah ka thehthlaa, Inhnuai lamah tui vawt la turin ka chhuk leh rih.

Ka let chho lehnghala, Khumah ka lawna, Light ka off nghal vek bawk.Ka phone ka hmet enga, msg a lo awm.

‘Khawngaihin ka ngen ngawih ngawih che,hahdam takin nun hman kan duh.Min hmuh lo tum tawh lo turin ka ngen che’ number ka ena, mahse, tunge anih hrilhfiah ka ngai lo.

Ka call ta nge nge, a pick lo,ka call nawn leh ta tho,hman ang khan a duh loh tawpah a switch off angem ka hre lo..

‘Hello’’ vawi thum ka call naah a rawn pick ta hram,ka thaw huai thung.

‘I msg hi sawifiahna ka duh’

‘Engmah sawifiah angai lo’

‘Ka hmuh che vanga i nun a hahdam loh lai hi mak ka ti,tin,ka hriat duh chu hmeichhe naupang  kha tu fa nge?” ka ti leh hmuka, a thaw hak ri ka hre zui zat bawk.

‘I hrethiam ve ngai lo vang..mahse, thil pakhat,fanu i nei...chu zawng chu..hemi ka sawi vanga ka tlanchhiat nawn leh angaih loh nan i fanu a thi tawh tih i pawm sa kha lo la pawm zel la ka duh bawk ania’ a rawn ti ta duah..Kei erawh mak tih luat vangin ka insangmar teuha, ka kut ka humruh tlat bawk.