REVEUSE - 12

CHAPTER- 12

‘Nang...nang..’ Rosanga’n a ti nawk nawk mai.

‘Aw, keimah.Chuan, i thlah thei em..? tih pahin min vawnna kut chu a rawn melh a,rang zet hian min thlah nghal vut bawk.Ka thaw huai mai.

‘Sorry...mahse, Martha- i hi hmeichhe tha a ni lo ania’

‘Khalam chu ka lo buaipui mai ang,bakah Eve-in a hriat i duh ka ring chiah lo’ a ti leh hmuka.

‘Oh..nia..’

‘Kal tawh zawk rawh, a zawng nghe nghe che in ka hria’ a ti leh supa.

Rosanga kal sawn thawm reh tial tial chu ka ngaithla kara,Abel-a ka melh zawka,Collar t-shirt dum a ha,Cotton jeans dum bawk,a thawmhnaw rawng nen inmil fahranin a hmel a nelawm loh bawk, min rawn chhan avangin lawm tur ka ni chiah em ka hre lo,mahse, him zawng ka him ngeia, bakah  min puih vawithumna a ni ta chiah bawk.

‘Ka lawm e, anih leh phawt’ tih leh inher ka ruala.Ka in ngaihtuah vak chuan lawmthu sawi ka duh dawn lo tih ka chiang.

‘A hrechiang hmel khawp mai che’

‘Enga?”

‘Rosanga khan ka hriat ve aia tam fe a hria anih hmel ka ti anih chu’ a ti leh nghuta,nidanga ka hmuh tawh thin dan ai khan a nelawm ta lo hle zawk.

‘Ka ngaipawimawh hran lo e’ ka ti nghata,engahmah ka ngai  lo tih tilang thei ang ber turin ka dak vah bawk.

‘A tha lawm, keipawn ka ngaipawimawh lem lo’ ngeiawm zetin a then suk bawk.

Ka inhera, biak zuina tur ka nei lo.Bakah a awm ve tih ka hriat takah phei hi chuan haw vang vang ka duh zawk.Ka rin ang ngeiin min dan emaw tumna a nei lo.Diki ka zawnga, ka hmuh veleh haw ka duh tih ka hrilha, mahse a thian lo awm ve khan thlah mai a lo hreh lo bawka ka hawsan ta zawk.

Awmtei’n hna a rawn zawm leh tawha, tunah chuan ka buai lutuk pawh a zia ta deuh,ka tum ang ngeiin Abel-a hna pawh Muana ka khawih tel tira, Rinpuia ka ti zet nangin an chhiat tawk nen Muana kutah ka dah ta zawk,ka kal ve zauh zauh tho nangin vawikhatmah Abel-a ka hmu lo.Party na atang khan ka la hmu nawn leh miah lo,Marcus-a te Inneihni pawn ka kal ta bawk hek lo.Ka ngaihtuah zawng ngawt pawn Marcus-a ka khawngaih,nitin an Inchhungah bum a tawk reng mai dawn chu a ni sia.

Site lamah Bungrua lo thleng a awm avangin ka en kuala, zan dang aiin ka haw tlai fe,dar 11 vel bawrah In ka thleng chauh.Tumah an lo meng tawh lo,ka intifai sawk sawka, ka mu thlawpa, ka chau ngang aniang ka muhil nghal titih.Zingah pawh chawei dawnah ka Nu in min rawn kaitho ta chauh.

‘Nizanah inleng kan neia,mahse, khatiang thil kha chu sawi lawk a tha ania’ ka pain a ti boh a.

 Ka ngaihven lem lo.Chhungkaw thil lamah hian ka hriat ve pawn ka ngaihven lutuk ngai lo.Naupang ber ka ni bawka ka u te hian min kep zo lutuk tlat.

‘Eng inleng nge a?” kan upa ber dawtin a ti a, kei erawh ka ei ngaiin ka ei zawm mawlh mawlh thung.

‘Abel-a palai kan hmu a,Matty pawh sawilawk tur ania’

‘Enga !?’ ka thil hmuam lai ka haka,ka khuh zui bawrh bawrh mai.

‘Engmah hre lo te pawh i ang alawm mawle,karleh lamah lo kal leh turin kan ti anih kha’ a ti leh boha.

‘Wow,a va pui dawn ve,a che rang hle mai’ ka u  in a ti a, min ena, a nui tut tut bawk.

Ka chawei chakna a tawp vek,ka pa ten an sawi zui danah ka mumang a ni lo tih a chiang lutuk,mahse, engtin nge a tih ngawt theih? Ka biak ngei ngei angai.

‘Inbiak kan ngai’ phone a pick veleh ka ti nghal thawr.

‘Tehreng mai, ka beisei aiin i rawn call har zawk’ zawi sup hian a rawn ti a.Phone ka melh vak ringawt.

‘Khawiah nge ka rawn hmuh ang che?” ka ti leh hmaka,ka thinrimna ka thup hleithei lo.

‘I office ti ila’

‘A teuh lo lutuk’  a nui hawk ri ka hre zui zat.

‘Ok,Cocoah,dar 1ah nirawhse’ a ti leh supa.Chhan pawh chhang let loin ka off a, khumah ka vawm thla zui daih bawk.

Hnaah ka rilru ka pe thei lo tluan ta thak,ka ngaihtuahna a luah tlat,engtin nge a tih ngam zawk? Hmanlai nula leh Tlangval ang maia duh duh neih tuma Palai tirh hi thil tih chi a ni lo tih te a hrethiam lo nge a hre ngai lo zawk? Thla hmasa lawkah a u in nupui a neia,Inah an pahniha nuam an chen theih nan kei hi min hman nawn leh a tum tihna a ni ngei ang.Ka’n en ang chu.

Motor dahna tur a buaithlak thin avangin Taxi ka hmang ta zawk,kal lawkna tur ka neih thu chauh Awmtei ka hrilha,ka awmdan danglam deuh kha thup ka tum hle nangin a hre tho mai thei,Mahse, eng ang pawn zep ila chhungkua kan ni miaua, a hre dawn tho tho.Vawiina kan inbiak dan atangin hrilh dan tur a hriat theih mai ang chu.

Ka thlen chuan a lo thleng fel tawh,Waiter smart leh hmuhnuam tak mai hian a lo awmna Cabinah min hruai pheia,ka lut thawm hriain a rawn hawi chhuak vut bawk.Thlakhat zen zawn ka hmu tawh lo,mahse, amahah engmah danglam a awm lo.A hmelpa leh tihmawh hmel zet pawh a la pangngai,a hair style pawh  a la ngai vek.

Chair ka pawt chhuaka, engmah sawi loin ka chevel chu min thlira, inlawm derna lam pawh engmah a awm lo.Ka beisei hek lo.

‘Eitur ka chah hmasa dawn mi niang?’

‘I thu thu le’

‘Ok,nakinah chuan i ei thei lo maithei nia’ a then suka, chhan pawh chhang loin ka melh reng ringawt.

Eitur an rawn dah hma chuan engmah  kan sawi ta lo,kan phone ve ve kan khala,thawm ri hlek pawh a awm lo.

‘Le,sawi la...’ a plate nawr sawn pahin a ti a.

‘I thiltih hi enge a awmzia ka hre duh?” ka hmui ka hru zauh bawk.

‘A awmzia chu mi a nileng lo chuan i hria ang chu’

‘Ka a anih ka ring, ka hre lo tlat ’

‘Tlangval hian nula hnenah Palai a tir anih chuan Nupui atan a duh tihna a ni mai em?” a thutna hnunglam a nghenga, hahdam hmel zet hian min en a.A hmelah engmah a ngaihtuah awm a lang lo.

‘Thil nihdan tur chu ania,mahse, kei leh nangah hi chuan a ni ve lo’

‘Enge anih ve loh na tur?”

‘Kan inkawp tawh lo a, bakah kan inmil lo tih kei ang bawkin i hrechiang,chuan..a pawimawh berah chuan i tihsual thup nana hman tur atan chuan ka fing lutuk’ ka thaw hak mai.

‘Enge ka tihsual a?” ka sawi engmah khan a hmel a ti danglam eih lo.A khawsak dan chuan min ti thinrim hlur bawk.

‘I hre zawk ang chu,Palai lo kal leh hmain kal angai tawh lo tih i lo sawi dawn nia’ ka ti hmaka.Ka thil eina bill Menu karah ka zepa,mahse, ka thawh hmain ka chair a rawn nem beta, ka hnungah a rawn ding zui nghal hmak bawk.

‘Tha takin awm la a that ka ring’ ka beng bulah a rawn ti supa, a thupe aw ngawih ngawih bawk.

‘Hetiang chuan min ti thei lo ang,bakah i mualpho hle zawk mai ang’ ka ti leh a, ka aw a khurh loh nan ka insum nasa viau bawk.

‘He Dawr neitu te hi ka thiante anni a, diktak chuan Hmangaihna pawh chen pui che ila a tawp thlengin tumah an lo kal lo ang’ rapthlak ti zet hian ka melh reng ringawt.

‘Ka haw lutuk che’ a dang engmah sawi tur ka hre lo.

‘Ka hria lawm,mahse kei chuan ka nei duh thung che a.Ka fel i ti viau lo maw?” a mit thim khap chu ka ena,min chhaihfiam nge min tihel ka hre thei chuang lo.

‘Hmeichhe duh lo chung neih luih hi thil tha lo a ni tih i hria em? Bakah a tlawm thlak bawka’

‘Ka duh neih nan chuan ka um thin ve bawk ka tih kha,bakah i sawi ang chiah khan inthup nan nang hi ka hmang duh che,chumi atan chuan ni reilote ka bialnu i lo nih tawhna kha a tawk em em bawk’

Engmah sawi tur ka hre lo,ka hrawk ro lutuk tih ziawm nan ka chil ka lema,ka lo rin dan sa nimahse a sawi ngei han hriat chu a mi den dan dang tak a ni.

‘Min nei tur hian ka tilui ngawt thei bik lo che tih keipawn ka hria,chumi vang tak chuan hmanrua ka zawng a,ka duhthusama tha ka hmu ta renga’

‘I sual hle mai...’

‘Aahhh, nia..ka fel vak lo.Tunah pawh ka u nupui nen kan nihna thup turin ka nei dawn che ania’a ner nawk bawk.

‘A tawp nan ka hrilh leh ang che, ka nei duh lo che’

‘Sawi nawn sek duh suh,ka hria.I duh loh theih lohna tur hmanrua ka zawng ka tih kha’

‘Engmah i nei lo,vau zam mai mai rual ka ni lo ania’ ka ti ve thung.

‘Sawi chhuah kher hi i duh tak tak em?”

Ka rilruah thil pakhat a lo lang zawk,mahse, engmah a hre lo ang.Kha thil kha chu keima thuruk anih thin kha,ka thuruk tamtak min hriatpuitu Awmtei leh ka nu mai bakah Tluangpuii pawn an hre ve lo,ani hian a lo hriat ngawt na tur a awm miah lo bawk.

‘Tehreng mai, khatianga invau ngawt lo khan sawi zawk la,chuan ka hmanhmawh viau bawk ania’ ka chhungrila hlauhna hnawhbo tumin thaw loin Boruak ka hip lut vang vang bawk.

‘Hman deuh khan school pakhata thianho hian  Teacher’s day zanah an thiannu Birthday an lawma,chutah chuan Tleirawl hmeltha pangngai tak hi a tel ve a...Mak tak maiin an zinga pakhat chu inchung atangin a tla a,vanduaithlak takin a hmunah a thi nghal nghe nghe bawka,Ka sawi zawm dawn em?” Ka khawng vek, ka tawng dawna ka tawng ri thei lo,ka lu ka thing ta ngawt.

‘Anih chuan kha thil kha tuman an hriat i duh ka ring lo,chuti anih chuan engmah harsatna a awm lo turah ka ngai ania’

A chhuak thawm leh a pen thawm zawi tial tial chu ka ngaithla kara, ka beng ka hup ta ngawt.Beidawng tih hian ka awmdan hi a sawifiah zo lo,Engtin nge ani khan a lo hriatchhuah theih? Tuman an hre lo a,ka thuruk a ni bawk.A hre ve tu awmchhun lah a thi tawh bawk si.Mahse, thil pakhat erawh chiang em em a awm,thil dik lo hi engmah zep hlen theih a lo ni lo.

‘Hmeli,engtikah nge min hrilh i tum a?” phone ka pick veleh Tluangpuii’n a rawn ti nghal that mai.

‘Sorry, ka buai deuh a.Tlaiah ka hrilh ang che ka lo ti a’ ka pha ta ngawt.

Nizan khan ka pasal neih tur engkim a chiang tawh,tumah ka hrilh lo a.Hrilh tumna ka nei hek lo,ka nun a ruak vek,ka phone pawh ka on peih lo,Abel-a nen kan inbiak hnu atang khan pangngai takin ka mu leh ta hek lo,kum tamtak ka lo phum bo tawh Mangchhia kha a bul atangin a rawn let leha, ka muhil thei lo chu engpawh nise, ka muhil ngam lo a ni mah zawk.

‘Mat..i la awm em?’ a rawn ti leh vau vau,ka harh zawk bawk.

‘Aw, awm e..i lo haw angai dawn tihna nih chu’ ka ti sapa, ka chhungril ipik lutuk a hriat loh hram ka beisei takzet.

‘Tak tak? Yess, ka thinrimna kha a bo nghal vek,thla thar veleh ka lo thlawk haw nghal ang’ hlim zet hian a rawn ti leh a,tihluihna a ka nui hmel a hmu pha lo ka lawm zia chu pui tak a ni.

Palai lo len nawn leh hmain ka pain ka duh leh duh loh min zawta, chhanna tur dang a awm.’In thu thu’ tih zawng bak,mahse, hun erawh a fan ta deuh,Marcus-a nupui neih atangin a la rei lo a, kan innei ve leh tur hian an chhungkua a nghawng ve deuh nge a Ni tura kan duh kan sawi pawh an pawm hmiah.

‘Thil min hrilh duh i nei em?" Awmtei’n min rawn ti thut,ka phu zawk mai.Ka en vata, uluk fe in min lo en dauh dauh,ka hawisawna, ka hmaa Computer lam ka melh leh rih.

‘Eng nge hrilh che ila i duh deuha?” ka thawpik zia ti lang lo turin ka nui lui hak bawk.

‘Ka hre lo,mahse,Mat..engemaw dik lo awm ni hian ka hria.I awmdan hi a dik lo’

‘Engti dik loh in maw?” ka en a.

‘Chutak chu ka hre lo,mahse a dik lo’

‘Aaaa, i ngaihdan mai mai anih chu...i zo tawh mi?” thildang sawi hnan tumin ka ti a.

‘Zo tawh..Lawk, ka la sawi zo lo.Tuna rawn be tu che kha Tluangpuii a ni tiraw?’

‘Um,nih kha...’ zangkhai thei ang berin ka ti a.

‘Khatah pawh khan phur hmel i pu lo,diktak chuan an Vui dawn che emaw tihtur zawkin i hmel a hlim lo a,kei te chu Pasal ka neih dawn khan ka hlimzia i hriat kha’ a tih zawm leh duah.

‘Inah Duat rawn ka ni tih i hria alawm,In chhuahsan hi ka hreh ngawih ngawih” ka mit ka chhinga, ka thaw hawk bawk.

‘Oh..Ka hrethiam che,chutiang ka lo ngaihtuah lo a..Ih,diktak chuan in Inthen tawh maw ka tih laiin inneih in sawi leh ta thut sia, i hlim lo thin bawk nen ka rilru a lo nuam lo a, i rilru natnan ka sawi lo ania’ a mangan hmel phian bawk.

‘Chutiang lam engmah a awm lo..Hahdam rawh’ a rilru tihnawn tumin ka nui lui hak hak bawk.

Nitin ka nun angai reng, Thla a thara, Tluangpuii a lo haw a,engmah rinhlelhna a nei ve lem lo anih hmel.Inneih kawr tur min thlanpuia, engmah duhzawng ka nei lo.Ka lo suangtuah thin Inneihna kha puitlin a ni ngai dawn lo a, Nupa te inneih chhan ni a ka lo ngaih thin Hmangaihna lah sawi pawh zahthlak khawpin a tel hek lo.Abel-a nen erawh kan inhmu zing lo thei lo,kan Inah a lo kal fo a,kan chhuah dun angaih tum a awm fo bawk.Mi zingah chuan Mipa tha leh duhthusam a ni a, kan pahniha kan awm erawh chuan hmelhriat loh a ni leh mai.

‘U Matty, i phone kha a ri char char ania’ Toilet atanga ka chhuah veleh Diki’n min lo ti a.

‘A khawi zawk?” ka kut hruk pahin ka ti a.

‘Kha  zawk kha’ tih pahin ka Private number ka vuahna zawk a kawka.

Ka phone ka lakanga,miss call 3 lai a lo awm,number ngai vek..Mahse, ka list ami a ni lo thung.Printera ka thil print ho lak pahin ka call backa,nidangah hi chuan Miss Call pakhat lek hi chu ka call back kher ngai lem lo.Mahse, tun tum hi chu ka Private numberah zawk a lo calla, chu pawh vawi thum lai,a pawimawh thawkhat turah ka ngai.

‘Hello..’ Mipa aw hian a rawn ti a.Tu nge anih ka man mai lo.

‘Hemi number tang hian miss call ka lo hmu a’ ka ti a.

‘Aw, keimah Marcus-a,hun i neih chuan ka hmu lawk duh che a’ a rawn ti a.

‘Um,Officeah i lo kal thei angem? Nge ban hunah zawk ni ang?” zangkhai fe hian ka ti a.Ka pasal nimai tur u a ni a, ka mood fuh loh leh ka mimal buaina a bulah ka tilang ngawt thiang lo.

‘I ban hunah a remchuan ti zawk ang’

‘Ok,dar 4 vel atangin ka free a,khawiah nge niang?’ ka ti leha, inhmuhna hmun tur a rawn sawia,engthilah nge min biak duh erawh a sawi lo.

Darli pelh hretah Office ka chhuahsana, ka kalna tur leh ka hmuh tur Awmtei ka hrilh bawk,kan inhmuhna tur hmun ka thlen chuan a lo awm tawh, min lo ko vata,muangchangin ka pan pheia,Abel-a nen an hmel a in ang viau,mahse hmelah chuan Marcus-a a tha zawk,pian leh mizia erawh chu Abel-a mize pa leh ngeng ngulh mai hian hmeichhia a hip zawk ang tih ka chiang.Kei tiam lo in..Ka ngaituah zawng ringawt pawn ka ner nak mai.

‘Eitur i duh angem?” ati a.

‘Aih, ka lawm...’ tih pahin a hmel ngainatawm zet chu ka ena, tiang em ema unau in ang lo hi ka la hmu ngai lo.

‘Drinks lam te..’ tih pahin a Beer Bottle ken a lek zauh bawk,ka lu ka thing mai.

‘Ok,in inbuatsaih nasa tawh em?”a ti leh a,thiantha inkawm satliah kan ang viau.

‘A pangngai..’ ka then sak bawk.

‘Ka nau hi i hriatthiam fo angai dawn ania,a mizia hi a danglam khawpa..’ a ti leh a,ka bu ringawt.

‘Enge kan sawi dawn le?” pangngai takin ka ti a.

‘Sawi tur a ni em ka hre lo,mahse hria la a that ka ring thunga..’ midang an awm hnaih leh hnaih loh en niawm tak hian a hawi kuala.

‘Ka nupui leh Tea hi an inkawp thin tih mi sawi i hre maithei..’ Ka beisei loh lutuk a sawi takah chuan ka thu khawng nghal lah mai.

‘Thil kal tawh nimahse i hriat a tha a’ rawn kun hnaih deuh pahin a ti leh a.

‘Thil hlui ka ngaipawimawh lo,tupawn nunhlui kan nei vek alawm’

‘A dik chiah, mahse, thil hlui hi a hlui lo fo thina,a bikin...oh..nang maw?” tih hluai pahin ka hnunglam a en daih bawk.

Ka inher ve vata, ka beisei loh zeta ka hnunga Abel-a lo ding ka hmuh takah chuan ka thaw hak mai.Engchen nge a lo din tawh ang ka hre lo, reitak erawh anih ka ring lo.

‘Hetiang hi i tih leh ka lo beisei ngai lo asin’ a aw a ring lo, mahse a chiang tawk viau,min en loin a u a melh ngur bawk.

‘Engmah ka ti lo...hrilhfiah ka tum mai ania’ a beer bottle lek san zauh pahin a ti awlsam mai.

‘I hrihfiah anga, a hma ang bawk khan min laksak leh anga tiraw? Huh...a ropui hle mai’ a thinrim zia a awah a lang theia, a tawng danah chuan tualthah pawh hreh lo tih a hriat ngawih ngawih bawk.