REVEUSE - 14

CHAPTER- 14

‘Na i nei em?” ka ti sepa.

keimah min tlak loin amah zawk hi a tlak nge kan pahnihin min tlak lo ve ve pawh ka hre lo.Min rawn en a..Na nei hmel a pu lo.

‘Ka hre lo,lawk...che lo la,midang an lo thlen hma tal tianga awm hi a tul ania’ a ti leh supa, ka awmah a hmai a rawn phum zui leh mai.

‘Eng maw i sawi?” a sawi awmzia ka hre lo.

‘Tihian awm rih ang,midangin hetianga kan awm lai hi an hmuh ka duh,i hrethiam em?” a ti leh supa,a hawi chhuak chuang lo,mahse a sawi awmzia ka hriat takah chuan ka khawng nghal lah mai.Midang hmuha mawi a lo zawng anih chu,kei lah chuan min chhan a tum ve rengah ka lo ngai hman titih..Hahthlak hian a..

Rei vak lo hnuah hnathawk ho an rawn tlan khawm taktak,min rawn pui ta thuai,Abel-a an kaitho hmasaa,a that leh that loh an zawta, a that thu a sawi awlsam hle nangin a chet zawnga a ner nawk ka hmuh tlat avangin a tha lem lo anih hmel,mahse lemchanna bawk a nih leh maithei.

Thil thlen dan kha a rang tehthut lutuka, rilru fim pawh ka pu hman meuh lo,thutna awl awmah chuan ka thu a,ka sirah Abel-a a thu bawk.Ka hma lawka bungraw dahkhawm,inchung atang rawn tla,darh nuaih mai chu ka en reng bawk.

‘Ceilling siamna tur vel kha nia,mahse nangmah zawk kha delh loin Abel-a zawk kha a delha,a vannei khawp mai,engtin nge engmah na a neih loh theih zawk ni?’ kan hnathawktu pakhatin a ti a.

A delh leh delh loh lam ka lo hre miah lo.Ka lo ngaihtuah zawk chu vawi li na tih daih. Hepa hian ka nunna puih ka ngaih lai takin vawi li min pui ta chu nia.Kan inneihna tur hi tihluihna nimahse engemaw kawng tak chuan ka Pasal tura ruat ve reng angah angaih theih hial ta ve ang.

‘Vawiin kha i na lo tak tak maw?” ka rilru a nuam thei thlawt lo. Mut tawh hnuah ka va zawt ta nge nge.Min reply ka beisei ngam chiah lo,msg type a peih loh zia hre tur khawpin kan inzui ve hman miau a.

‘Ka that leh that loh en turin i lo kal dawn mi niang?” ka beisei loh zetin a rawn reply rang viau.

‘Aih,ka hre duh satliah mai mai’

‘Ok,phat kual chiam angai lo ania.’

‘I that chuan a lawmawm chu.Mangtha le’

‘Ka nupui tur tan ania,a lo na deuh anih pawhin a pawi hleinem’  a rawn ti leha, ka reply ta lo.

Zing ka harh veleh min wishna a lo awm kalh,hetianga tihluihna tel lo a kan inzui lai ka hrechhuak zauh,ka lu ka thing nawk bawk.Khatiang hun lai pawh khan midang laka inthup nan min kawp tih ka lo hre lo mai mai zawkah ka ngai fel hmiah tawh.Mahse,min kuah te,ka bula a awm thin vang te khan ka thlamuang thin tih erawh ka pha thei lo.A zei em em a,min fawh ringawt pawh khan a duhthawh thina,a aia thui min kalpui a tum ngai lo mai zawka, tum lui se chuan ka hmeichhe ngaihsan loh em em te nen khan angkhat kan ni daih tawh ang tih pawh ka chiang.Ka hmui ka khawih a, ka mit ka chhing vang vang bawk.Vawiin hian ka hmu ngei ngei tur a ni.Anih si loh chuan nithum hnuah chuan ka pasal a ni tawh anga, ka chunga a khawsak dan tur engpawh ka pawm vek a tul tawh ang.

‘Vawiinah kan inhmu thei angem?” tih ka thawna, min wishna erawh ka haider hmiah thung.

‘I duh phawt chuan..’ ka beisei ai hian a reply rang thin.

 Inhmuhna tur erawh a hranpa thlang chiam loin a Farm houseah ka hmu ang tih ka hrilha,hnathawh hun a ni tawh lo tih ka hria,mahse kan inneihna a kan mamawh tur zawng zawng ka nu leh Tluangpuii mai bakah ka pa unau nupui te leh ka nu u nupuiin an ngaihtuah kim vel vek.Khawl ang maiin ka khawsaa, tul an tih apiang an lei pawp pawp a ni ber.Fanu mal ka ni a,ka tan engmah harsa a awm lo.Abel-a nu leh pa hian fahrah naupang,Midang enkawl seilen ka ni tih an hria em ka hre lo.An hria anih chuan Rosanga nu ang tho khan min hnawl leh maithei...Chu erawh ka duhthusam a ni tawh zawk ang.

‘Khawnge i kal dawn?” ka nuin min ti a.

‘Abel-a In lamah ka kal lawk ang chu ka tia, tihtur dang a awm ami?” zangkhai thei ang berin ka ti a, a mitmeng fing lutuk erawh en ngam loin ka bagah zawn nei niawm takin ka hai kual rak rak thung.

‘Awm lo,mahse i rawn tlai ange’

‘Tlai lo ang,ka kal aw’ tih leh pen ka ruala.

‘Lawk,lo ding teh’ ka ding chata a rukin thawk ka la a,pangngai thei ang berin ka hawi let nghal bawk.

‘Eng nge?”

‘Thil dik lo awm niin ka hre tlata,mahse, enge anih ka hre miah lo thunga’

‘Chutiang enge awm se i tiha? Ka pasal nei tur min ngai anih kha..’tih pahin ka pan hnaia,min ngaihtuah hmel zeta min en chu en rei ngam loin ka kuah ta zawk.A hrin ka ni hauh lo nangin ka natna te min tawmpui thei khawpin min Hmangaih a,a hmela min ngaihtuahna lang chhuak vang khan tah ngawt ka duh hauh lo.

‘Ni e, ka ngai dawn che tih i hria lawm..’ a aw a lawia, a hnuk a ulh tih ka hria,ka mittui rawn hnai ve nghal chu duh loin ka mit ka chhing vang vang bawk.

Hmun danga peng kawi miah loin Abel-a In ka pan ding nghal nal nal,ka induhtawkna level a san zual lai hian ka duhdan engkim ka sawi angai,tunah chuan duhthlang thei ka nih loh miau avangin engkim a thlen tur ang a thleng fel titih tawh,Biakin kan pan hun bak engmah min dangtu a awm tawh lo,mahse chumi hma ngei chuan ka duhdan engkim ka sawi ngei ngei angai.

Pawna a Jeep lo inhung ka hmuh rualin a thleng tawh tih hrilh hranpa ka ngai lo,a Motor dahna bulah ka Car ka dah vea,ka luh hmain ka thlir kual leh rih,Abel-a duh dan anga Inneih hmaa peih hman chu beisei chi a ni lo tih ka hrechiang tawh.Hna tam zawk zo tawh mah ila loh theih lohna vanga kan luah lui te anih ngawt loh chuan luah luh rih loh a fuh zawk.

‘He lamah lo chho la.’ Ka luh veleh Inchung Step atangin min lo au a.Engmah sawi loin ka pan chho ve nghal mai.

Roomah kan inzui luta, ka kal hmasak ang bawk khan a mutna  vel pawh a ngai ngaiin a lo la awm thlap bawk.Mahse, chuta thut ngai loin Chair a lo awm tel tawh hlauh.Tukverh lian leh sang zet chu a nawr tlawha,thlifim a rawn lut nghal a,Boruak a ti nuam nghal sawng sawng thei.

‘I hmanhmawh em?”

‘Hmanhmawh ve tho mai,bakah tihtur ka nei niala’ dawt ka sawi ta ngawt.

‘Ok, a tha lawm..Ka nuin Zungbun chungchang kha a hre duh a’ a ti leh a,min en loin Pawn lama Eucalyptus kung sang zet, thliin a chhem kur siau siau chu hmuhnawm tih hmel zetin a en vung vung bawk.

‘Engtizawngin?”

‘I ta tur ka siamtir rual khan ka ta tur kan siam teltir nghal ka ti a’

‘Oh...’ ka ti ringawt, diktak chuan ka lo ngaihven miah lo.Mipa zawk zungbun pek ve lam reng rengin ka rilru a lo luah lo.

‘Vawiinah hun i neih chuan en i la’ ka ti ta ngawt.Nuihzatthlak zawk..

‘Aih,ka sawi ang chiah chuan ka ti tawh zawk.Phur taka pasal nei i nih dawn loh avangin thil tamtak hi chu keimah leh keimah ka in ngaihtuah angai dawn tih ka hria alawm’ a ti supa,engmah tihelna lam a lang lo.

‘Ka lawm e’ ka tum loh deuhin ka ti chhuak sap ringawt.

‘A ho lutuk,chulam ai chuan enge min hmuh i duh chhan?’ a ti leh supa.

‘Eng lo...diktak chuan kan inneihna chhan hi kei aiin nangman i hrechiang zawka,hetiang kan nih tak tho thoah chuan Deal siam ka duh a...’ a mitah tak ka en lui ran bawk.A hmel a engemaw danglam deuh lang zawk chu a rei lo hle nangin ka hmu hman tho.

‘Deal...ok..han sawi chhin la...’ a ha var nalh zet langin a then suk bawk.

‘A hmasa berah chuan Khum khatah kan mu lo ang,chuan keima puala Sumdawnna kalpui ka nih angin engkim hi ka pual ni chhunzawm sela, engmah min sawipui suh..I u nupui nen kawng awlsam zawk inneih veleh inthen ka duh bawk...’

‘Chu zawng chu mi?” ngaihsam hmel zet hian a ti nghuta,ka beisei ang he huin a ngaipawimawh tlat lo,chu chuan keimah min tibuai letling..

‘Aw...ni rih,nakinah a dang chu ka la ngaihtuah ang’ ka ti ta ngawt.

‘A tha lawm....’

‘I pawm vek tihna a ni em?”

‘Aih...’

‘Maw?” ka ti sapa, a hmelpa leh ngeng ngulh mai chu ka ena,a hma minute rei lo te a nuihzat hmel taka min entu kha chu midang daih a ni ngei ang.

‘Nupa kan nih dawn tlat avangin Khum kha chu kan intawm ngei ngei ang, mahse, i inpeih thlap hma chuan khawih che ka tum lo ania.Hna chungchang kha chu i thu thu ni rawhse,chuan..Ka u nupui nen kan chungchang kha vawikhatmah sawi nawn leh tawh suh..’ a ti ta duah, a u Nupui nen an chungchang a sawi lai phei kha chuan thinrim insum ri a hriat tel theih titih.

‘Mahse, kha kha min neih i duh chhan anih si chuan...’

‘A tawk...tiang khawp hian i lo a tak tak ami le?”

‘Eng maw? Kei hi ka a a maw?’ ka tum aiin ka au ring hret.

‘Shh...inhnuai lama i nau te khuan kan inhau tih an hriat ka duh hauh lo ania..’

‘Duh lo tawp..’

‘Ka u nupui vanga na ni a min hriat avangin ka nu hi a awm a nuam thei lo,tuemaw tal ka neih vat loh chuan min ngaihtuah reng rengin hun a hmang dawn tih ka hria.Nang nen kan inzui tih a hriat khan nun bul ka tan thaah angaia, a hlim takzet,chu chuan keipawh min tihlim ve bawka, mahse thil ho mai mai vangin nang hian kan inkar i titawpa,tihluihna ka hman angai ta hial anih hi...’ reife a ngawih vang vang hnuah a rawn ti chhuak a,kei erawh ka lo na ve vawng vawng thung.Kha thla khat vel lek pawh kha a nu vangin a lo ti anih chu.Tuemaw vang niloin keimah ka nih vangin min lo kawp hauh lo.Chumai bakah ka tihtawp chhan kha thil ho mai mai ala ti zui bawk.

‘Ngatinge kei kher?’ ka rilru a zawhna lo lang hmasaber ka sawi chhuak nghal pawp..

‘I nalha, i zahpuiawm loh bawka,chumai bakah i rilru a thianghlim em em bawk’ a ngaihtuahna hriat theih miah loh hian min en reng bawk.

‘Hmanrua atan chuan ka tha tawk tih ka hria e...’

‘Ka duh ber chu ka nu rilru damna,ka pa hi chuan Pa anih angin engmah hetiang lam a ngaihven tak tak ngai lo.Bakah nang hian min hnial luih theih hauh lohna tur i thuruk ka kawla,chuan,midang han zawn buai leh vel kha ka peih lo bawka..’ rapthlak ti lutuk hian ka melh tlawk tlawk ringawt,a tawng danah chuan a nupui tur bia ni loin Sumdawnna chungchang sawi nen danglamna pakhatmah a awm lo.

‘Ka kal tawh teh ang’ tih pahin ka tho a, sawi tur dang ka hre hlawl lo.

Tlawm ka inti hluah hluah,mahse bei let turin theihna ka nei lo.Kha thil kha sawichhuak se chuan tunah hian Jailah ka awm angai hial ang.Chu erawh ka thil duh loh ber a ni lawi si.

Kawngkhar hawn tumin Handle ka vuana, mahse, ka rin loh lutuk thil a thlen takah chuan ka insangmar a, ka khawng nghal lah bawk.

‘Enge maw i tih le?” ka kawnga a rawn kuahna phelh tumin ka zuk vuana, mahse, ka zuk vawnna kut a lo man bet leh hmiah.

‘A chang hi chuan phurna mak tak min siamsak hi tihluihna a hman mai chak chang ka nei ve tho asin’ zawi supin a ti a, ka beng a rawn fawp thawi thuaka, zahthlak zetin ka khur zui dar dar mai.

‘Min thlah teh’ ka theihtawp in ka incontrol nangin ka aw a khur dar dar tho mai.

Ka sawi engahmah ngai lo tih hriat zet hian ka beng hnung lam chu a hmui lum thar thar chuan a rawn fawp kual ta dan dan zawk,ka ip chawiha, ka khup a zawi nghal vek bawk.Hetianga awm tur ka ni hauh lo tih ka hrereng chungin a chetdan zei lutuk chu ka la tawn ngai loh thil anih vang nge ka hre lo,ka chhungril thlengin a fan a,kalsan tumna aiin a aia thui kal duhna zawkin min tur a, enge a tih leh zel dawn hriat chakna in ka khat vek.

Kawngkhar kik thawmah ka harh zawk,ka tal phata, a ban lehlam chauha min kuah a ni bawka, ka tal pit zawk a ni ber.A hmel pawh en ngam loin Kawngkhar hawnna ka vuana,mahse tun lawka thil thleng vang khan ka mumal lo,midang hmachhawn thei ka ni em ka hre lo,thawk ka la hawka,ka hawng ta chauh.

Muana a lo ni a,a inthiam lo hmel viau bawk.

‘Phone i pick lo a...’

‘Chuti maw? A ri ka hre miah lo’ tih pahin ka bag ka hawnga, a awm der lo,hreh zetin ka thutna lam ka hawi let a.

Mahse,ka hnung ah a la ding reng emaw ka tih kha tukverh bulah Phone khawih chungin a lo ding daih tawh,engmah thleng lo ang maiin a hmelah danglamna a awm hek lo.

‘Engmaw i zawn?’ min rawn ena,ka lo en ve reng bawk nen kan mit a intawng siah,rang lutukin ka hawisawn nghal vat bawk.

‘Ka phone mawle..Muana hian min lo calla,mahse, ka ak miah lo...’

‘Lawk, kan call ang’ tih pahin a phone a khawih zawm leha, loudspeakerah a daha,a in ring ral ral mai.Mahse, engmah ka hre miah lo.

‘Motorah ka thlauh anih ka ring, Muan,chhuk ila...’ tih pahin Muana ka ena, min chhan letna pawh nghak loin ka chhuaka, Stepah ka tlan thla titih.

Ka rin ang ngeiin Motorah ka lo thlauh tak tak, ka thaw hak mai.Phone bo hi a phone lam ai mah chuan kan thil dahthat te hian a ti uihawm zawk ziah,bakah ka phone ka zawn vangin Abel-a biak leh kher ngai loin ka chhuahsan theih phah bawka,khatiang thil a thlen hnuah phei kha chuan a bul hnaia awm zui ka duh lo bur.Min hmuhsit sa nak laiin ka awmdanah khan a aia hmuhsitawmah ka insiam a ni ringawt.

‘I nalh ka ti’  ka sama thil kai rawn lak pahin ka beng bulah rawn kun hniamin a ti supa,ka chhang lo.

Inneih inkhawm a zo a,thlalakna hun kan hmang mek,ka pheikhawk a sang lutuk lo nangin ka ke a kham a, bakah nizan lamah ka hnar a thi leha, tum dang aiin a rei deuha, mahse reitak erawh a ni lo,kha thil khan min tichau tel bawkin ka hria.

Thla hnih kalta khan a u te Inneihna an buatsaih zo chauha,tunah keini kan ni veleha, mahse, engmah buaina tur an nei lo nge ka hre lo.Engkim ‘ni se’ ka lo tih thin ang chu a ni vel vek, sawisel tur zawn ngat ngat chuan a awm mahna,mahse hei ai baka thaa Inneih buatsaih dan a vangin ka ring,an mahni lamin engmah buaipui loin Wedding Planner kutah an dah tawpa,tul an tih apiang an pe chhuak zar zar tawp.Keini lam pawh kan theihtawp kan chhuah ve tho mai,Hmeichhe awmchhun leh Duat rawn ka ni a, ka tan chuan engpawh an seng huam emaw tih mai turin ka nu te lam bik phei chu an inpe, mahse, ka rilru ti nuam lo tur tingin ka pi leh ka nu an in tah chhawka,min ngaihtuah vang leh lawm vang a tap nimahse keimah ka inkhawngaih lo thei lo nen ka taksa mai pawh ni lo ka chhungril thlengin a chau vel vek.

‘Matty, lo kal lawk teh,i pu ten an chibai duh che ania’ Abel-a nuin a rawn ti a.

Tlai atangin lawi kawr nen ka inthuama, ka ning hluah hluah tawh,chumai bakah ka nuih derna lamah ka biang a kham thum tawh bawk.

Min hruaina lamah ka zui pheia,Putar,kum 80 vel tur hi Mampuii nen an lo thua, kan inneih hma khan Abel-an a chhungte hnai vai deuh inah chuan min kalpui kim vek,mahse tuna kan hmuh hi chu tunge anih ka hre lo.

‘Ka pu, hei Abel-a nupui chu a lo kal aw’ Abel-a nuin a ti a.

Chu putar lu tuak var vau mai leh mitmeng fim tak chuan min rawn en a,engtianga a pu nge ka hre lo.Min chibai turin a kut a rawn phar chhuaka.Ka zuk vuan vata, a kum tam tawh hmel nen min chelh nghet phian bawk.

‘Tu nge i hria em tuna i chibai kha?” kan let leh hnuah Tluangpuii’n a ti a.Ka lu ka thing ringawt.

‘Evelyn-i pu anih kha,a pa pa..’

‘Oh..’ ka ti sep ringawt, vawiin khan Rosanga te Nupa ka hmu ngei, mahse, min biak tum awmin a awm lo a,keipawn awm ve lo ang hmiahin ka ngai lui thei ta bawk.

‘Roomah han chhoh a, thawmhnaw hi han thlak ka duh em mai,a mawi lo viau angem?” ka ti a,ka chau hluah hluah.

‘Mawi lo hran lo ang,chho ang’ a ti awlsam mai,Abel-a leh Amawia erawh pawn lam kawtzawla Party naah an awm a,nuam an ti phian pawh a ni mahna le.

Room kan thlen chhoh veleh kah thlak ang derin khumah ka let tawp a ni ber.Muthilh nghal vang vang ka chak ber.Mahse, muhil ngawt thei ka ni der si lo,ka kut ka lek kanga, ka kutzungtanga inneih zungbun,Abel-a duh ang thlapa design chu ka en a,a lan dan maiah chuan a lang simple viau, mahse enchianin zia a neia, a chhunglamah A&M tih a inchhu kalh bawk.Engtikah tak ngaiah nei ang i maw? Inneih thuchham lai khan ka chhungrilah ka khura,engkim hrechiangtu hian kan Inneih chhan a hrechiang lutuk,Sual thup nana innei kan ni a,ka zah ngawih ngawih.

Midang an haw vek hnuah tih mai tur hre loin ka thu renrawn,ka thawmhnaw pawimawh zual ho  Tluangpuii leh Pantei’n min dahfel pui nual nangin naktuk lama tihzawmah tiin min kalsan,Abel-a lah Amawia te thlah tura a chhuak a lo la let leh lo.

‘I inbual dawn mi?’ Abel-a awin a rawn ti a,ka hawilet vat.Kawngkhar nghengin a dinga,a lo kal lai ka hre lo.A necktie a pawt thawla, a kamiz pawh a ban a thlep chho bawk.

‘Aw...ngatinge?”

‘Engmah ni lo e, keipawh inbual ka duha’ tih pahin a rawn kal pheia.

‘Inbual hmasa la, i inbual zawhah ka inbual mai ang’

‘Aahh,kan inbual dun zawk dawn mi?’ ka en vata, mahse a nui hmel ka hmuh takah chuan min fiam tih ka hrethei nghala, ka thawveng nghal huai bawk.

‘Ka fiam che nih kha, inbual rawh..I inbual zawhah ka inbual mai ang’ amah bawkin a ti leha, Khumah a thu thlaa, a vang zawngin a mu zui zat bawk.

Inbual turin ka luta,zan hun kan la hman tur ka ngaihtuah duh lo law law,khum kan intawm anih chuan Mipa ah pawh pa em em hian min khawih mai angem? Tih luihna hman pawh ngai loin ka tlawm mai ka hlau bawk,anihna takah chuan amah ka hlauhna aiin keimah ka in control zawh loh ka hlauhna a tam zawk.

Ka chhuah leh chuan Room a lo ruak hiau,Sana ka en a,ka inbual rei lem lo.A lo luh thut hlauin ka inthlak sawk sawka,ka ril a tam vang vang bawk.

Minute 10 a liam leh pawn a lo la let ta lo cheu,ka riltam zia lah chu pui tak a ni ringawt, Room kawngkhar ka hawng de de a, Inhnuai lamah tui tal zuk la ila tlemin ka ziawm mahna..Stepah thawm dim zetin ka chhukthlaa, a lo reh thap tawh,ka vawikhat kalna anih loh avangin thil awmna tlangpui chu ka hre ve tawh a,Kitchenah Fridge a awma, muangchangin ka pan pheia, light on na mai tur ka hriat loh avangin ka Phone ka phawrha, Flashlight ka On hman tep tihin thawm ka hre ta tlat,ka pen lai ka tawp chawt bawk.

Kawngkapui dim taka hawng ri leh khar ri a ni chiang lutuk,ka dinna atangin Kawngkhar a hmuh theih loha,mahse inchung panna step erawh a hmuh theih thung.Light engmah in On a awm tawh lo nangin Living room bik chu pawnlam light engin Curtain chungthuahna zawk inzar phui lo atangin a rawn chhun tlanga, thim chhe lutuk a ni lo.Ka dingrei deuh tawh bawk nen ka hmu fiah thei viau tawh bawk.

Ka dinnaah che loin ka dinga, enge thleng dawn ka nghak ta ngawt,tun ang zan rei tawhah tu nge tianga thawm dima lo lut tur awm ang? An chhungkaw zinga mi anih chuan tiang taka dima lo luh kher angai lo tawp ang tih ka chiang.

Chhuat phah chang zeta thawm dim taka kal thawm ka hre leha,ka thaw tha ngam lo,engvanga hlau nge ka nih pawh ka hre tak tak hek lo.Hlimthla a rawn langa,hlimthla neitu in a rawn zui nghal bawk.Mipa a ni a, a thawmhnaw hak rawng ka hrethei lo nangin Abel-a a ni tih ka hria.Ka thaw huai mai,kalsawn tum in ka che a, mahse, midang hlimthla ka hmuh tel takah chuan ka ding leh chawt,Hmeichhia a ni ta thung..

Tu nge anih hrilh ka ngai lo,hrechiang tura va en lah ka mamawh hek lo..