REVEUSE - 15

CHAPTER- 15

Ka thaw tha ngam lo,thilsual titu ka ni lo nangin min hmuh ka hlau hluah hluah zawk.Inchung panna stepa thawm nei lo a an inzui chho chu ka ena, ka rap zawk hial.Vawilehkhatah luak chhuakin min rawn hnawha, ka hmui ka hup vat bawk.Ka ten lutuk hi a ni tawp.Ka thu thla hnawka,ka biang rawn lum thla pap chu  ka han khawiha, ka mittui a tla tih ka hre ta chauh,engvanga rawn tla ngawt nge ka nih ka hre lo.

Thawm rawn awm leh Living Room light rawn eng ta atah chuan ka phu deuh zawk,ka tho vata,rang lutukin Kitchen ka pan vat,Living room a en tak vangin a thim lutuk ta lo,Ka awmna lama pen thawm rawn hnai tial tial chu ka ngaithla kar a, engtia lo hmachhawn tur nge ka hre lo,tu nge anih ka hre hek lo.

Tui ka la chhuaka, Fridge ka khar leh hmain a ri khapa a eng leh ta at.

‘Matty...’ Hmeichhe aw hian a rawn ti a, ka hawi chhuak vat bawk.Ka beisei loh zetin Mampuii nen kan inmelh ta ran mai.

‘Tui ka la lawka’ tih pahin ka tui bottle ken ka lekchhuak a,a hmel buai deuh nak chu ka hmuh hmaih hauh lo.

Nia, a buai ang chu.Tuna a lo kal leh nichin a ka hmuh dan kha chu inpersan tak ani, tihsual nei lo niawm takin Room atanga lo kal anga ngaih theih turin  thawm pawh a dim lem lo,Room pawh a han thleng hman meuh dawn mawni??mahse kei ka lo awm tih a hmuh rualin mak a ti lo thei ta lo,hlauh pawh a hlau mahna.An lo luh leh a lo chhuk leh inkarah hian kei hi helai thlen hman ngaihna a awm lo tih mi a let tawp lo chuan an ngaihtuah thiam ang chu..Ka luak chhuak bawkin min rawn nawr leh..Ka hmui ka hup vat bawk.

‘I tha em?” min ngaihtuah hmel fe hian a ti leh a.Ka bu ringawt.

‘Ka’n chho ange,mangtha phawt’ ka ti a,a bula ka awm reng chuan ka luak thei tak tak mai dawnin ka hria.

Room ka luh hreh zia chu pui tak a ni,chumai bakah Abel-a ka hmu peih lo,ani pawh Mampuii ang bawkin ka ten a, ani phei kha chu ka haw tel bawk.

‘Khawnge i kal?” ka luh rualin min lo ti nghal a, min melh ngur bawk.

‘Tui ka la,ngatinge?” ngaihsam hmel fein ka kal pheia, khum bula Cabinet hniam chen chawn leh nalh zet chungah chuan ka hung a.

‘Tun ang hunah hian maw?” a ti leh hmuka.

‘Aw, a tlai tawh nangin tui ka zuk la,a pawi a mi?’ a mitah tak ka en lui ngar bawk.

‘Aih..chutiang zawngin ka sawi lo’

‘Ok, hlau suh..mahse, Inchhungah hi chuan fimkhur ta ula a tha ngawt ang’ ka nui lui hak bawk.

‘Eng maw i sawi?” a kut a kuangkuaha,a hmel rum ulah chuan engmah pawisak nei lo tih a lang chiang viau.

‘Aaah, ka awm tan dawn chauha,in lo hmanhmawh lutuk ang tih ka hlau a’

‘Tawng tawh suh’ a ti tuara, chutiang teh vaka a au ka lo beisei lo lutuka ka phu dawrh bawk.

‘Mangtha le’ tih pahin Khumah ka lawna, ka inkhuh nghal hmak bawk,diktak chuan kan zan hun hman tur atan kan inhau hi a tha hle zawk.

Ka mengchhuaka,ka awmna ka hai rum rum bawk.Ka inlet tur chu ka kawngah tuemawin min lo kuah a,tu nge anih en ka ngai lo.Nizan khan ka chau ngang aniang ka mut veleh khan mak takin ka muhil nghal anih hmel.A lo mut ve lai pawh ka hre lo.

Che loin ka mu deuh vang vanga, tih harh ka duh hauh lo,dimtein ka kawng a kuahna ban ka dahsawn saka,ka tawlh hla zui nghal bawk.Vanneihthlak zetin a harh lo hlauh,khum atangin ka chhuka, kalsawn mai loin a muhil hmel chu ka en leh rih..T-shirt dum a haa, a mithmul dum chhah tha tak leh a hnar ngul sang tha tak te,a sam dum hlap mai hnawk deuh niaih te chu ka ena,hei hi a nihna pangngai reng nimahse a muthilh vang nge a landan a danglam vek thung.Hahdam takin a muhil a,a kawng chin chunglam chu puanin a khuh ve lo.A ban lehlam a khama,lehlam erawh ka mutna lamah min kuah dan ang ang khan a la awm.Ka Pasal tak tak nise tih ka rilruah a lo lut zauh,ka lu ka thing nawk ringawt.Engtikahmah chutiang a thleng ngai lo ang.

Ka inphihfaia, ka chhuah leh pawn a lo la muhil ta tho,dimtakin Room kawngkhar ka hawnga,inhnuai lamah tunge awm ka hre lo,Dar 7 a hnai tawha, an tho hma thin nge tho hma lem lo ka hre si lo,mahnia zuk hmachhawn ka hreh viau, Nupa in an zan hmasa berah enge an tih thin tih tumah puitling chin chu hrilh kan ngai lo vek,engmah thleng hauh lo mahse an rin dan chu an rindan a ni tho,mahse tihngaihna a awm chuang lo.

‘Morning...i mu thei maw?’ Abel-a nuin min lo hmu hmasa ber, an lo tho tawh hlawma, an lo buai mam mam tawh zawk.

‘Aw..Good morning le’ ka ti let ve a,Mampuii hmel ka hmu hauh lo,enge ka tih pui ve dawn pawh ka hre chuang lo.

‘Rami,Matty hi Thingpui a duh ang, tuemaw khan rawn laksak ula’ tih pahin Kitchen lam a awm te a aua.

‘Ah,keimahin ka inbuaipui ve mai ang’ ka ti a, keima thingpui in tur lehzel midang kut atanga dawn nuam ka ti lo.

Kan Inah pawh awmpui nen kan khawsa ve renga,ka hriattirh atangin Awmpui neih loh lai kan nei ngai lo, mahse, ka nuin engkim a buaipuia, kei ngei pawn inchhung khawsak engkim ka tihpui hman phawt chuan ka tihpui vek.

‘Kan Inneih tirh chuan i awmdan ang chiah khan ka awm alawm,mahse i Pa hi a strict khawp a maw’ min ena, Abel-a pa a en leha, Abel-a pa nui ruh ruh chuan min ti nui hak mai.

‘In in ang khawp hian ka hre mai,in khawsak dan leh inzia pawh hi,i ngainat lutuk chuan i fapa a lawm lo ange.’a ti ve boh a,a nui vur vur bawk.

‘Dik chiah,I fapa lah hian a chhun khawp mai che..taka, tlaiah I nu te kha an vaiin chaw rawn ei se la aw’ a ti leha.Ka bu ringawt.

‘Lawk,an number min lo pe la,keiman ka lo be dawn nia..’ a ti leha,Tleirawl pakhatin Thingpui an siam zo tih min rawn hrilha,ka tang leh nghal teuh ringawt.

Abel-a a rawn chhuk ve meuh chuan midang nen tihtur ang ang tiin kan lo buai laih laih tawh, a lo chhuk tih pawh ka lo hre mai lo zawk,ka thawh hnuah Mampuii a rawn tho vea, ka mitthlaah nizan bawk kha a rawn lang leh zat, kei aiin thla hnih velin a mo hmasa zawka, a upa zawk nupui a ni bawk nen engkimah thu a nei turah ka ngai hmiah,mahse a thu thu a awm erawh a tulna ka hre chuang lo.

‘Ka chhuak lawk dawn ania’ ka thutna bula rawn din pahin a rawn ti a.

‘Um..’ ka ti satliah ringawt.

‘Tluangpuii a lo kal meka,i phone roomah i dah bawk ania’ ati leh a, ka bu leh ringawt, mahse, Tluangpuii a lo kal tih ka hriat takah chuan ka thawveng nghal hawk tho.

Amawia leh Tluangpuii an lo thleng ruala,inchhung chet vel tihpui tawh lo tur leh inremfel zawk turin Abel-a nuin min ti ta hlauh,engmah ka la remfel mumal lo,nizan khan a tul zual tak tak kan dah fela.Ka thil chhawm luh tamzawk chu a ngai ngaiin a la awm vek.Mahse, ka thawmhnaw tam zawk erawh nizan khan ka keng lut lo,Awmtei’n ‘nakinah in In lamah i la kal duh ang,chhuanlam tel lo a mahni In lam kal fo hi a dik lo a, chuvangin i chhuanlamah a la tangkai ang’ a ti a, ka pawm zawng tak.

‘Puan vel kha i pe fel tawh em?’ khuma ka thawmhnaw vawmchhuah thleh fel mawlh mawlh pahin min ti a.

‘Nizanah khan Abel-a nu kutah ka dah vek alawm,an mahni khan pek tur an hre zawk dawna’ ka ti a.

‘Um,nitak..Abel-a nu ti loin ka nu ti vat rawh,i hrehawm mai mai,Mampuii ta tur leh Rosalind-i ta tur kha i hrilh nghal tiraw?” a tih zawm leh a, ka bu ringawt.Abel-a pa ta turin Shawl ka ken saka, a Nu leh a nau bakah Mampuii ta tur puan chhawm dang te zingah ni lo a hranin ka ken saka, Marcus-a ta tur thildang ka kensak bawk.

‘Enge nizan  chu?” min rawn nek pahin a ti leh a.

‘Eng maw?”

‘Hre lo der lo mai teh,ka hre chak alawm le’ a nui a.

‘I chhe lutuk’ tih pahin ka lei ka chhuah khum a, a nuih a za zual sauh.

‘Kei chu i hriat kha, na ka ti rap mawle’ a ti leha,ani hi chuan engmah hi a zep tak tak lo,mahse, mi zawng zawng bulah a mimal chanchin a sawi tihna erawh a ni chuang lo.

‘Ho lutuk lo thin teh,room pawnah mi awm pawh an awm maithei ania’ ka ti hlaka.Rang zetin kawngkhar lam a hawia, a thle bak bawk.

‘A ho em maia,Marcus-a nen an chungchang kha i la hrilh lo tiraw?” a ti leha, a aw a ti zawi sauh bawk.

‘Eng ber kha?”

‘Unau tak tak anni lo tih kha.’

‘Aih,sawi tulah ka ngai lo,bakah an duh lo ang’

‘Nia, an duh dawn lo ania...Mahse, mak deuh chu maw In inneih hma khan ka Cousin ten Abel-a leh Mampuii inhau thawm an hria a’ a ti leha, ka thiltih lai ka chawl data,nghet zetin ka thil ken ka hum bawk.

‘Sawi loh ka duh zawk...’

‘Aih, sawi ang,ka Cousin tih khan tunge anih i hria ang chu, nizanah Rosanga’n min rawn be hlawla,Farmah an va kala,an va thlen lai hian an lo inhau a ni awm e,mak ka ti mai maia,Bakah ngatinge Farmah a kal ve tih te ka ngaihtuaha, in Innei tawh tho nangin ngatinge anni kha an lo la inhauh le? bakah rei pawh in inzui hmain in Inneia,a tir atang khan ka rilru a nuam lo saa, ka sawi miah lo nangin nizana chutiang ka hriat leh takah chuan ka rilru a nuam lo zuala’ a ti ta duah,sawi mai tur hre loin ka hmu ka peta, ka hrilh mai dawn nge ka hrilh lo zawk ang tih ka ngaihtuaha, ka rilru a buai vel vek.

‘Sorry..i rilru nat nana sawi ka ni lo ania’ ka ngawih tak rengah chuan inthiam lo hmel zet hian a ti leh a.

‘Chutiang a ni lo,nangin min hrilh loh in tunge min hrilh ang? Mahse, an pahnih lam chu engmah hriat belh ka duh lo.Nunhlui nei dun annia,a pasal ni se mihrang ni loin a U a ni bawka, inhauh na tur pawh a tam ang chu.Chuan,kan inzui rei lo chunga kan innei mai te chu kei aiin Abel-a i hrechiang alawm’ ka ti a, ka nui lui hak hak bawk.

‘Nia...ka hrechiang viau mai..’ nuam la ti lo hmel zet hian a ti a, a che sek bawk.

‘Hahdam rawh,nun bul ka tan naah hian hlim taka ka awm theih nan min tawngtaisak reng zawk dawn nia’ ka ti leha,a bu nghat ringawt.

A hnu lawkah Abel-a leh Amawia an rawn inzui luta,thildang kan lo sawi hman hlauh.

‘Chaw ei ila,nakinah kha chu tihzwm mai ru’ rawn kal hnaih pahin a rawn ti a, ka thawmhnaw khai ho chu a enkual dun dun bawk.

‘Nia,ka ril a tam lutuk’ tih pahin a thil khawih lai a daha,a tho zui nghal tharh bawk.Abel-a te nen an inhriatna a rei tawha, a tan nel tum a ngai lo.Engpawh a duhzawng chu a sawi pawp mai zel.

‘Chhuk ila...’ min rawn en ta nge nge.

Chaw an lo ei tan tawh,Marcus-a leh Mampuii an lo awm bawk,ka insangmar lehnghal teuh tho mai.

Nilengin Tluangpuii nen ka thil remfelin kan buai ta char char,Abel-a leh Amawia erawh chuan an thiante dang lo kal nen dahfel ngai ang ang an dah fela,Farm lam atangin Abel-a nau te an lo kal nual,an Dawr atangin bawlhhlawh paih turin Pik-up pakhat a lo chhuk bawka,Dawr erawh an khar chuang lo anih hmel.A awm viau tho,In atangin an dawr awmna a hlaa,nimin an khar tawh bawka,vawiin lehzel khar kher a tulna a awm lo.

Ka nu te lo thlen in Inbual pawh ka la inbual hman lo,September kan chuangkai tawh nangin han chet tak tak chuan khua a la lum viau.Ka inbual hmain Abel-a a rawn inbuala,Tluangpuii leh Midang erawh Poola chen an duh avangin an chhuk ta dial.Pool hi inhnung lamah an neia,Room tin atangin a kal theih vek,Inchunglam Room ho hian Balcony an nei veka,chuta tang chuan Pool lam panna Step, thira siam a awm thla vek bawk.An pool hi kan inkawp ve zawk lai khan ka hmu tawha, a Pa hian In a sak tirh atanga a siam tir nghal anih thu leh tlema an khawih danglam tawh thu Abel-a khan min hrilh bawk.

Ka hmaia kut vawt thlarin a rawn khawih rualin ka harh zawk,ka hawi chhuaka..Abel-a nen kan in en chiah bawk.

Inbual zo hlim tih hriat zet hian a sam a huh chapa,kekawrbul dum,a khup thleng lo deuh a haa,kawr a ha lo thung,a dar pharh hlai hlap leh a kawng fek leh rat lawi si te chuan sumdawng hausa satliah ni loin Infiammi a ti ang zawk.Ka tum loh tawpin ka en thla dan dana, dul phiar fatah chuan ka mit a fu ta chat,a lai hnuaiah hmul tlem a awma, a kekawr kawngah a lut thlaa, ka tum loh tawpin ka chil ka lem khalh mai..Zah vangin ka hmai a sa nghal hat hat bawk.

‘A zahthlak miah lo ania..’ ka awmdan hrethiam tih hriat zetin a ti supa,ka thutna chair ban tawn tawn vuanin a rawn kun hniam zui zat, hnai fahranin ka mitah tak a en run bawk.

‘Ka’n inbual ve ang’ ka ti ta ngawt,ka aw a la lawi rat zui..hahthlak hian a.

‘Ok, i chau anih kha..inbual la,i harh hawk mai ang..’ a ti supa,mahse, a kalsawn chuang lo.

‘Kal sawn la..’

‘Ok..’ a ti a,a la che chuang lo.Muangchangin a rawn kun hniama.

‘Enge i tih a?” ka awah Manganna a lang thei.

‘Shh...awm mai mai rawh’ a ti leh supa,a kut lehlamin ka bekah a rawn dawma,mak tih vanga ka Hmui kau deuhah chuan a hmui hnawng leh lum ham ham chuan a rawn bawhthuah zui zat.Chhan letna chang hreloin ka thu khawng lah thung.

‘Ka nghawngah hian kuah la...’ a hmui phawi pahin ka beng bulah a ti leh supa, ka beng kawm a liak kual zai zai bawk.

A chet dan chuan min tibuai vek,ka lungphu  a rang nghal zaih zaiha,hlauhna a ni em ka hre lo, ka taksaah ka hriatthiam chiah si loh nawmna niawm tak hian min fan nghal rawih rawih bawk.

‘Min kuah rawh,lehlam Room tukverh atanga min entu sawn min en uluk viau ania’ sehchilh nak hian a ti leha.

A thusawi chuan min nghawr dawt thung.Midang hmuh atan bawk !! ,Tlawm ka intihna zawkin min fan ta zawk,mawl ka inti em em bawk.Mahse,muangchangin ka ban ka lek chhuaka,a nghawngah ka kuah ta tho,ka tim dai bawk.

‘A tawk e...’ rei vak lo hnuah a ti leh a,rang zetin ka ban ka la sawn vat bawk.

A kalsawn nghal zat,hmanhmawh zetin Bathroom lam ka pan ve thung,engmah thawmhnaw thlakna tur keng loin Bathrobe chauh ka la keng zui bawk.Hahthlak hian a,Shower hnuaiah ka dinga,ka mitthlaah Abel-a a rawn lang lehnghal,a kalsawn khan ka en hauh lo nangin amahah khan engmah effect a nei lo tih a hriat ngawih ngawih tho, kei lah khan atthlak zetin engemaw awm turah ka lo ngai hman titih..Ka mit ka chhing leh riha,tiang em em hian ka mawl tih ka lo inhre ngai lo,nizan lawkah pawh Mampuii nen ka hmu duna, engtin nge tunah kei min mamawh ang? Amah ka hlauh angai hauh lo tih ka hre tawh, keimah leh keimah hi ka inven a tul hluah hluah zawk.

‘I haw tawh em?” hna ka khawih mawlh mawlh laiin Abel-an min rawn call a.

‘Aih,enge ni ta?” ka ti tha ve mai.

Kan Inneih atangin karhnih a liam tawh,kan inhau lo a, kan inneih zan bak kan mu dun hek lo.Kan Room chhunga Thutthleng awmah kan inneih tuk zan atangin a insawna,sawisel ka tum lo.Ka thawl hawk zawk.Nitin hna kal turin ka chhuaka,ani pawh Farm lamah a kal deuh ziah bawka,intihbuai leh inhnial em pawh kan nei ngai lo,engtiklai pawn ri deuh rap turin ka inring renga,mahse engmah a thlen tak loah chuan a khawharthlak lam ta mah zawk.

‘Motor i keng si lo a ka rawn lam dawn che mi?” a rawn ti leha, ka Motor a chian loh avangin ka keng lo,nidangah chuan ka keng ziah thung.

‘Angai lo ang,Marcus-a te khan Office rawn tlawh an tuma”

‘Amahin maw?”

‘Ni lo ang’

‘Ka rawn lam ang che,nangmah chauhin ka u bulah awm suh ka tih che kha’ khauh zet hian a rawn ti leh hmuk,a hma khan min hrilh tawh,mahse ka lo hre tawh hauh lo.

‘An nupain anih ka ring,an lo thleng tep ang.Lo kal buai duh lo mai rawh’ ka ti leh a.Min chhan let hmain ka off daih bawk.

An nupain an lo kal dawn leh dawn loh ka hre hauh lo,mahse a chhan awm si lo a a U hnaih a phal lo hi ka duh zawng a ni lo.A rukin a nupui nen nuam tawlin an hmanhlela,chutichung chuan a u hi thiam lo zawk angin engvangin nge a lantir talh ka hrethiam hek lo.An lo in hmangaih thin anih pawhin tunah chuan midang ta a ni tawh,chu pawh a u lehnghal...Ka ngaihtuah zawng pawn ka luak a chhuak lehnghal titih.

Marcus-a lo thlenin haw turin ka lo inpeih fel deuh chiah,amah chauh a lo ni a,kan Office min la hmuhpui loh vanga min rawn sawm haw paha rawn tlawh a ni a, Abel-a tan engmah han ngaih huat ngawtna tur a awm lo.

In kan thlen thlengin pangngai takin kan ti ti kawng tluan,Abel-a bula awm nen chuan Lei leh Van ang hlauha danglam a ni tawp mai,a nelawm em em a,a tawng duha,mi pawisawi zawnga tawngduh erawh a ni si lo.Mampuii hian Abel-a aia a thlang hi thilmak a ni hauh lo tih te ka ngaihtuah ta rum rum.Mahse, kei hi chuan duhthlang thei dinhmunah ding ila chuan sualin tenawm em em mahse Abel-a ka thlan ka ring zawk..Ka ngaihtuahna vangin ka ner sak mai.

In kan thlen hnu lawkah Abel-a a rawn thleng ve a, Verandaah Marcus-a te nupa nen kan lo titi a, ka nu leh ka pa erawh an lo la haw lo thung,Motor kawngkhar a khar ri dawt leh a hmel rum ul maiah chuan Farm lamah engemaw dik lo a awm anih ka ring ve ngawt.

‘Ka rawn lam kual che a’ ka bula rawn din pahin a ti nghuta.

‘Oh..Marcus-a a lo kal dawn ka tih kha,i lo kal pawh ka lo ring lo a’

‘A tha lawm..a lawmawm’ a ti leh nghuta,a awkiah tih elna a lang chiang viau.

Chhan let mai na tur hre loin ka bu satliah ringawt,Inchhung lam pana a kal chu zui tumin ka tho a, kan pahnih tan chuan engmah ni lo mahse midang tan chuan Nupa kan ni tlata,ka duh emaw duh lo emaw ka pasal ka ngaihven ngei ngei a tul tlat bawk.

‘Matty...i hnar kha a thi lo maw?” Mampuiin a ti a,ka ding chat,ka han khawiha,a sawi dik tih ka hre nghal..Mahse, ngatinge engmah ka hriat lawk miah loh??

Rang zetin ka daka,tuemaw hian ka kut a rawn vuana,Abel-a anih ka ring mai,ka hnar thi in engtia tih tur nge a hre chiang tawk tawh.A darah ka lu ka nghat a, ka mit ka chhing zui nghal hmak bawk.

‘Mampui,a hnar hnawhna tur hian Cotton min lo laksak lawk mai ta che, chuan...keiman ka lo buaipui dawn mi?” Abel-a aw nghet churh ka hriat rualin ka meng chhuak nghal zawk...

Min vuantu hi Abel-a a ni hauh lo, chuti anih chuan Marcus-a zawk a ni tih a chiang..Engthil nge maw ka tih tak le???