REVEUSE - 16

CHAPTER- 16

Ka lu ka ti kanga, Abel-a hmel tur zet ka hmu nghal, chumi rual deuhthaw chuan ka hnar atangin a rawn baw chhuak hawk a, ka lu a hai a, ka mit a vai ram ram bawk.

‘Lo kal rawh le....’ ka kut rawn vawn pahin a ti nghuta,kut lawngin ka hnar a rawn hupa,min kuai dak nghal bawk.

Gate a Motor rawn tlan lut thawm leh Mampuii tawng ri lawng lawng chu ka mang hriat titih..Ka kawngah a ban lehlamin a kuaha,ka hnar a hup bawk.Nidang ang lo takin ka thidang dawna inhriatna ka nei tlat bawk.

‘A tha vek ania,hahdam la...ka thu dawn ania,lo che duh suh..Min ring tawp mai rawh’ ka beng bulah zawitein a ti leh a.

Muangchangin a chea, tuemawin ka darah min rawn vuana,Abel-a thu hniam riai riai chu ka meng lo nangin ka hre thei vek..A mal chungah ka thu thlaa,a darah ka lu ka nghata,ka mit ka chhing tlat bawk.

Minute 10 a liam leh chuan a reh fel hman vek tawh,mi te pawh an hnar a thi thin tho ang, mahse, kei chu a thi apiang hian ka chau titih ta zel maia,a tir lam kha chuan keimah ka inbuaipui thei vek zel kha nia,tunah chuan ka lu a haia, ka mit a vai tel ta ziah..Tun tum bik phei chu ka thidang dawn maw tih turin ka awma, in entir leh ka tum tawh lo nangin ka rilru a nuam lo.

‘Eve-i ka be tawh, naktuk tlaiah kan kal ang’ ka ngaihtuahna hria niawm takin Abel-an a rawn ti a.

Ka hawi chhuaka, ngaihtuah muk tak nei niawm tak hian min lo melh reng,rang zetin ka hawi sawna.

‘Kal leh pawh ka lo tum hleinem’ ka ti nghata, ka hnar hnawhna ka phawia,engmah a kai tawh lo.Khum bula Dustbin lian vak lo ka chhawpah chuan ka vawm lut zauh bawk.

‘Kan kal ang..’  a ti leh hmuka, hnial ka tum ziau nangin ka thulh leh ta zawk.Han hnial viau chakna pawh ka nei lem lo.

Chawei tura kan chhuk thlak veleh ka nuin ka that leh that loh min lo zawt vata, ka that thu ka sawia, mahse,a fapa ang chiah khan min ring tawk lo hmel a pu tho.Abel-an naktuka Evelyn-i kan hmuh tur thu a lo sawi ve a, ka nu thaw deuh huai ka hmuh takah chuan ka rin aiin min lo ngaihtuah anih hmel.

‘I phone kha a ri a,ka pick duh lem lo nih kha..’ Bath room atanga ka chhuah veleh min lo ti a.Khumah thu mu chungin Tv a en a,en tur hre lo niawm takin a hmet kual sek bawk.

Ka phone charge ka la kanga,min lo call tu ka ena,ka beisei loh zetin Jeffrey-a a lo ni a, kan Inneih ni bak ka la hmu leh lo,A pa damlohna vangin a zin tih ka hria a, an dawr ka kal khat ta deuh bawk nen an chanchin ka lo ngaihven miah lo.Ka call back nghal..A ring ral rala, a pick dawn lo maw ka tih hnuah a pick ta hram.

‘Hey....nge i pick loh a?” Hello tih pawh a awm lo.

‘Bathroomah ka lo awma,hei ka lo call back che hi’ ka nui a..

‘Ok..engtikah nge ka lo len ang tih rawn zawh che ka tuma”

‘Engtiklai pawn nang te chu welcome sa lawm i nih,lawk..I lo haw tihna mi?’ ka zawt leh rih.

‘Um,haw chiah vawiinah...ka hmu chak hle che ania’

‘Kei pawh mawle,enge min lo hawn? I pa chu a tha chiang tawh em?” ka ti leh duah.

‘Tha nimai..engmah ka lo hawn lo che,keimah nimai..’

‘Ha...tenawm lo mai teh,tak takin i duh hun hunah lo kal rawh’ ka ti leha.

‘Anih,naktuk tlaiah ka lo kal dawn sin’ a rawn ti a.

‘Ahh,chu chu a theih loh ka ring, Prog duansa kan lo neia..chhunah Officeah lo kal zawk la..’ ka ti leha.

‘I Office te chu ka hmu ngun alawm mawle, Inah khan lo kal ka duh zawka, bakah i pasal kha ka hmu ve duh hranpa..’ a ti leh’i pasal’ tih chuan min deng deuh dawt in ka hre bawk.

‘A hmuhnawm awm loh e’ ka ti sapa, ka nui hak bawk.Abel-a lam ka melh zauha,Tv lam chu hmuhnawm tih hmel zetin a thlir dauh dauha,ka awm leh awm loh ngaipawimawh hmel a pu lem lo.

‘A hmuhnawm dawn loh tih te chu ka hresa lawm,mahse ka neih theih loh neitu ania,ka ngaisang ve hrim hrim’ a nui a..

‘Dah teh,Sunday lamah lo len i tum zawk dawn nia’ ka ti a, nui hawk hawk chungin min Mangtha a, kei pawh ka off hnu thlengin ka la nui sang mai.He pa hi chu a ngainatawm mai bakah a bulah hian  rilru muang thlapin ka awm thei thin a, ka ngaina hle tih pawh ka pha hek lo.

‘Tu nge a?” ka hnung mai atangin a rawn ti thuta, a lo kal hnai thawm ka hre miah lo.Ka phu nasa viau bawk.

‘Thawm te hi nei ve thin teh..Min ti phu lawm mawle’ ka ti nghata,khum lam ka pan nghal daih bawk.

‘Tu nge ka tia lawm?”

‘Jeffrey-a..ngatinge?”

‘I office thlang Tuai kha maw?’ a ti leh hluka, ka sa zak mai.Tuman tuai an la ti ngai lo.A tuai na ka hre hek lo.

‘Vanduaithlak takin Tuai a ni lo hlauh’ ka aw a nem lo viau.

‘I va hrechiang awm ve..’

‘Tehreng mai,a zawng zawngin...’ runluih chakna ka chhungrilah a rawn awm thut.Engatanmah a ngaih phei chu ka ring lem hlei lo a.

‘Zawng zawng..anih chuan ka hriat tur chauh a ka ngaih hi a lo hre hmasa tihna mi?” a ti leh nghuta, Ka pheikhawk bawm nghengin a ding mar ut bawk.

‘A ni maithei,zawng zawng tih chuan a huam thui thei viau in ka ring’ pawisak nei lo niawm tak hian ka ti leh salh a.

‘A lawmawm anih chu,mahse Rosanga ai chuan a thleng thui tihna a va nih hmel ve’ a hmui a petsawi zauha, ten hmel zet hian a ner zui nawk bawk.

‘Nia..a thleng thui zawk ang’ ka chhungrila thinrimna rawn awm thup tumin ka ti awlsam leh mai.Diktak chuan ka bialpa ang hrima Jeffrey-a ka chhuah hi amah chuan hria se a lawm lo nasa ngawt ang tih ka chiang.

‘Anih chuan keipawn ka hriat ve a tul dawn anih chu..’ ka beisei loh zet a sawi takah chuan sawi leh mai tur hre loin ka ang pham ringawt.

A rawn kal phei chu ka melh reng ringawt.A hmel nelawm lo zetah chuan enge a ngaihtuah engmah a lang lo,a thinrim nge rim lo pawh a hriat theih chuang lo.Bakah,enge a thinrim ngawt ang? Inhmangaih taka innei pawh kan ni hleinem.

‘Enge i tih a?” Khuma a rawn mut takah chuan ka ti ta nge nge.

‘I hmuh ang hian ka mu’

‘Ok,hetah i riak dawn chu a ni lo ang maw?” ka hlauhthawn rukna ti lang lo turin ka insum nasa viau.

‘Ngatinge ka riah loh ang? Ka room ania, ka khum a ni bawka’ thatchhe hmel zet hian  ti leh supa,a kut a khama,a mit a chhing zui daih bawk.Tihngaihna hre lo zetin ka melh a,a bula mut tumna ka nei bau lo.

Khum atangin ka chhuka,mahse, ka kalsawn hmain ka kawngah a rawn mana, hneh zetin min phih let nawk a,enge a tih pawh ka ngaihtuah hman hmain min bawhbet zui leh hmiah.

‘Eng...enge maw i tih le?’ ka ti that mai..

‘Ka sawi kha i hre tawh na nge? Ka hriat tur awm zawng zawng ka hre vek dawn ka tih kha..’ a ti hmuka, a sawi zawh rual deuhthawin a rawn kuna,ka nghawngah a hmuiin a rawn nawr zui leh hmiah.

Chet mai nachang ka hre lo.Ka kawr chhana ka hnute a rawn khawih takah chuan ka tal phat mai,a lo inring chiah bik lo nge ka let sawn vata, mahse ka chhuk hman hmain min rawn man bet leha,ka tlawh tur chu a bawp sei zet chuan ka mal a rawn kherh bet leh hmiah,a sam a keh ka tum na ka ban pahnih pawh hneh zetin a rawn hmer kawpa,ka lu chung lamah a nem bet chho leh daih bawk..

‘Min thlah rawh..’ ka aw a khur dar dar mai.

‘Aih..teuh lo mai’ a ti nghuta, a rawn kun hniama, rang lutukin ka thle sawn nghal vat bawk.

Ka tal laih laih nangin awmzia erawh a awm lo,kan inlen hleih lam hret,mahse tlawm ka tum chuang der lo.A duh dan dana min khawih turin ka awm dawn hauh lo.

Ka bengah a rawn fawp thawi titih,chutak chu ka duh lo.Mipa leh Hmeichhia kan ni a, a hmaa min khawih a ka feel dan kha pakhatmah ka la theihnghilh lo,chuvang takin engtinmah khawih theih loha ka awm angai tihna a nimai.Ka tal sek avangin a duh angin min khawih thei bik lo,mahse rei ka tang peih dawn tawh lo tih ka inhre ru kar thung.Tlaia ka hnar thi khan min ti chaua,chumai bakah tha tawpa tang ka ni a, ka chau lo thei lo.

‘Awm mai mai teh..hetiang ti tur hian phalna ka nei ania’ a sehchilh nak mai.

‘Ka haw lutuk che..’

‘Thil thar a ni hleinem’ ngaipawimawh lo zet hian a ti duh lek,a rawn kun hnai leh chu seh ka tum ta thung,mahse a hre lawk amaw tih mai turin ka seh phak loh turin a awm zela, ka taksa nem lai a fawp kual dun dun bawk.

‘Tihluihna i hmang dawn lo tih i sawi lawk kha...’ ka ti leh a.

‘Ka rilru ka thlak leh tawh,keima rules siam te chu keimah bawkin ka Cancel leh mai ang,a har lo’ a rawn hawi chhuaka,mahse  light hliah zawnga a awm avangin a hmel ka hmu chiang thei lo.

‘Mi tenawm,i Hmei hian i duhkhawp a pe na che nge?”

‘Tawng suh...’ a aw a ring lo,mahse ngawih hun a ni tih hriat loh chi a ni chuang lo.

A tho kang deuha, min thlah dawn emaw ka ti hman,mahse chutiang a thleng lo,ka beisei loh zetin ka kawr chhanah ka hnute a rawn fawpa,a lei lum thar thar chuan a liak kuala,ka ip chawih a, ka thaw a chham titih..Enge ka tih ang? a ti lui zel anih chuan Mipa leh Hmeichhia kan nih angin ka inControl thei lo thuai dawn tih ka chiang,mahse...engvangin nge ka hlutna hmu thiam lo tu hnenah hian nuam ti taka ka inpek ngawt ang.

Engahmah ngai lo thei ang berin ka awm ngaiin ka awm lui a,ka chhungrila nuam tihna rawn tho tan mek chu hrereng mahila Thingtum ang maiin ka awm ngaiin ka awm lui tlat bawk

‘I duhtawk thei tawh em?” ka awki damthlap maiah chuan ninna niawm tak a lang tel thei,ka ning hauh lo nangin ka duhdan ang taka ka aw a rik chhuah takah chuan ka lawm veng veng lawi.

Engmah sawi loin ka awmah hmai a rawn phuma, a thinrimna a Control vel pawh a nimahna..Hmeichhia zawng zawng hian an hnar thei lo emaw a inti thin mahna,mahse ka entir ta ngei alawm..Ka hnar theia, engmah ka taksa chungah a chet velna khan a thlen lo.Mahse, a thlen ngei..Hmuh tir ka tum lo mai zawk.

‘Sorry...’ a ti supa,ka chung atangin a let thlaa,a hmai a hup zui vang vang bawk.

Ka awmdan dik lo Control tumin thawk ka la vang vanga,ka him ta chu ania,mahse khatiang thil kha sawi nawn ka tum tawh lo,khatianga che tur khan a thinrimna cho chhuah kher ka duh lo.

Muhil lawk loin ka let kuala,Abel-a erawh thutthlengah bawk a mu leh tawh.A mut tirh atangin thawm engmah a nei zui lo,a muhil nghal nge ka hre hek lo,en tura thawh kan kha tlawmah ka la tlat bawk.

Ka Phone nghawr dar darah ka harh ta chauh,ka pick hmain Sana ka thlek hmasaa,dar 7 a la ri lo deuh,thawh hun pangngai chu a ni tho mai.Abel-a mutna lam ka en leh hram,a lo awm tawh lo.Engmah sulhnu a awm lo hrim hrim zawk.

‘Aw..Nu..’ Hello pawh ti loin ka ti a, ka mit ka chhing leh rih.

‘I la tho na nge?”

‘Tho dawn chiah,enge?”

‘I tho tlai lutuk ange,thawh tlai lutuk hi buaina bul ania’ a rawn ti leh rih.

‘Tlai lo ang,enge tunah min lo call a?’ ka ti nawn leh.

‘Eng ni lo e,min rawn tlawh khat em a,i tha em tih ka hre duh a’

‘Aw, tha e..ka hman lo thin lawm,bakah mahni In lamah kal sek loh tur ka pain a tih kha..’

‘Akhai,tlawh sek tur pawn i lo kal ngai lo zawka,Nimin piah lah kha Abel-a chauh a lo kala’ a ti leha, ka mengchhuak zawk mai.

‘Maw? Enge a lo tih a?”

‘Enge a lo tih anga?ani hi chuan min rawn tlawh zauh zauh reng alawm,bakah i Pa Damdawi a rawn daha’ a ti leha,mak tihna vangin ka ang phiau ringawt.

Ka pa hi kal pakhat chauh nei a ni tawha,chumai bakah Bp sang leh Sugar nei kawp bawk a ni a, Damdawi nghei thei miah lo a ni bawk.Mahse, a damdawi hi chu ka nu mai bakah kei emaw ka u te pawn kan ngaihtuah sak vek zela, midang an tel ve angai ngai lo.

‘Ngatinge ani in a rawn daha? I lei hman loh pawn keimah min rawn hrilh mai la’ ka ti hlak ringawt.A tak niawm fahrana ka chhungte a lo va ngaihven ka duh hauh lo.

‘A thianten Damdawi tha deuh mai an lo hrilha, chu chu a lo chah saka, i hriatpui emaw tia’ ta deuh deuh chuan a...

‘Aih...engmah a sawi lo’

‘A that chu,i pa lah a lawm nasa ania..Sundayah chaw rawn ei ula,in hman thei angem? Abel-a ka rawn be leh zawk dawn nge?” a rawn ti leh a.

‘Angai lo,ka lo sawipui mai ang..’

Kan inbiak zawh hnuah tho mai loin ka mu leh rih,a thiltih hi ka duhzawng a ni hauh lo,a tak a an poh leh kan buai tam ting zawk.Engmah ti lo se a tha fe zawk bawk,amah ka biak ngei ngei a tul.Mahse, tunah chuan a chhuak leh daih tawh ang tih ka chiang.

Kitchen lamah Nu Rami eirawngbawl ka puia,puih hi a duh lem lo nangin ka tihpui ziah tho,ka fel em em vang lam niloin In lama ka lo tih than tawh thil anih avangin bansan ngawt ka tum lo,Room a tawm reng lah ka thil peih loh zawng tak a ni bawk.

Zing karah a chang chuan Ka nu leh ka pa an kal rual thina, mahse ka nu hi chawei khama a kal chhuah tum a tam zawk.Tumah a phut ngai lo emaw tihtur khawpin a taimaa,Ka pa hian a en danah a duh zia hi ka hmu thei hial thin.A duat em em tih pawh ka la awm rei hauh lo nangin ka hre chiang hle tawh bawk.Pa tawng duh tak a ni lo nangin Ka nu hi a chhaiha,a fiam fo thung.

Nu Rami hi Ka nu leh ka pa Inneih hma atanga awm tawh a ni a,awmpui ang pawn a awm tawh lem lo.Zing karah a lo kala,chawhnu lam dar 3-4 inkarah a haw tlangpui,A kutah inchhung khawsak a in nghat nasa a, chutih rualin tleirawl pakhat lang kal leh Mipa,tlema Hmeichhe lam hnaih deuh hlek pakhat In a awm nghal an awm bawka,an pahnihin Nu Rami hian a enkawl ve ve a,tihtur engkim a hrilh vek zel bawk.Ka nu hian Laizawn ang maiin a en a,ani pawh hian ‘Pi’ ti loin a U mai bawk.

Dar 8 velah Abel-a a rawn hawa, Marcus-a erawh a chhuak tawh thung.A inkhel tih a dressah a hriattheih nghal mai,Racquet bawm a ak bawk.A  kawr hak thlanin a tihuh avangin a taksaah a bet deuh thlara, a pian nalh zet a lang chiang viau,ka thiltih lai dahin Roomah ka zui chhoa, Thutthlengah a Bag a daha,engmah sawi loin a che vel ka en mawl tawp thung.

A kawr hak a phelha,ka hawi sawn nghal daih.A kekawr a phelh leha, a pheikhawk a tlawh thlawna, a vaiin a awmna hmunah a kalsan vek.Engmah sawi loin Bathroom a pana,a luh fel hnuah ka tho a, a thawmhnaw ho suk turah ka dah sak a,a Bag pawh a dahna hmunah ka dahsak thlap bawk.Mipa che fel leh invawng thlip thlep a ni bik lo a,mipa dang te ang bawkin a thawmhnaw bal suk tura dah te chu hnai lo tak a ni,a inthlakna te pawh a awmna hmunah a kalsan mai mai.A thawmhnaw bawm atangin a hak tur ka dahchhuah saka,inhnuaiah ka chhuk san zui leh mai bawk.

Chaw kan ei dawnah a rawn chhuk thla ta chauh,ka thawmhnaw dah chhuah ha loin a dang a rawn ha tih ka hmu kar, mahse ngaipawimawh awmin ka awm duh chuang lo,a duh leh ha se, a duh loh leh ha lo se pawi ka ti lo,mahse, ka tihtur a ka ngaih tlat avangin ka ti lui zel tho ang.A huat zawng apiang tih hi ka tan a tha ting a nimai.

‘I phone kha a ri nia..’ hmui phunin Awmte’in a rawn ti a.

Headphone ka vuah vangin ka lo hre lo hrim hrim..Ka la kanga, Abel-a a lo ni a, ka pick lo teuh viau,mahse thil pawimawh a awm loh chuan min lo call hauh lo ang tih ka chiang.

‘Hello..’

‘Tlai kha ka hman dawn lo a, nangmahin lo va kal mai rawh’ nidang ang bawkin a aw a nem lo viau.Mahse ngaiah ka nei titih tawh.

‘Ka kal hman lo maithei’

‘Kal ang che,ka tih vang niloin i hriselna vang zawkin’ tlemin a awm a nem ta deuh.Bakah a sawi dik chiah,amah vang niloin keimah leh keimah ka in ngaihpawimawh vangin ka kal a tul.

‘Ok,ka kal dawn nia’ ka ti ta nge nge.

‘A tha e,dar li velah lo thleng hman se a ti che a’

‘Ok..ka buai lawka’

‘Bye’ ka chhan let hmain a off zui nghal hmak bawk.

Phone ka dahthlaa,Headphone ka beng bulah ka lek chho lehnghala, Awmtei’n min melh reng tih ka hria,mahse ka haider lui tlat thung.Ka buai lo a, hna atana pawimawh Laptopah ka en a, chu bak engmah ka ti lo chungin ka buai thu ka sawia,Awmtei tan chuan zawhna a tam khawp ang le.Zawhna pumpelh dan tha ber chu hriat loh der a nimai.

Dar li rik hmain Office ka chhuahsana,Traffic jamah ka tlan sawt lo ngang mai,a tawn tawnin kan in line puta,kan tawlh bek bek chauh.School ban lai leh Office ban hun a ni lo ve ve chungin a tawt em em tho..

Ka hmalam ka en renga, tawlh mai thei turin ka inring ran bawk,chutih lai tak chuan Mampuii’n kawng a rawn tan tlanga,ka Motor hmaah tak a rawn kal tlang chu ka hmua,koh tumin ka dak hman tep,mahse thlang lamah chak zetin a chhuk thlaa,thlang lam Dawr kawta Abel-a ding ka zuk hmu nghal bawk..