REVEUSE - 17

CHAPTER- 17

Horn ri tuarah ka phu zawka, ka hmalam ka en a,ka hma a ding a lo tawlh hman tawh chu niin.Rang zetin ka tawlh ve nghala,thui erawh ka tlan hlei lo a, ka hawi let leha,tumah ka hmu ta lo.Ka hriatthiam chiah si lohin ka ni deuh nghulha,kei min kalpui hman leh lo si khan engtin nge tunah,ka in check-up hun nena hun in ang rengah hian Mampuii nen an inhmuh leh si? Ni lo...ni lo,ka ngaihtuahna a thilawm duh loin ka lu ka thing nawk mai..Thikna...He mihring rapthlak leh tenawm lutuk hian kei aia Hmeichhe dang ngaihsak a neih avangin ka na ang maw? ...a teuh lo lutuk.

Evelyn-i ka hmu thei nghal hlauh,a hmaa kan test bawk kha test leh turin min lo ti a,a hmanhmawh avangin a thiante min biaksak nghal bawk.Rosanga nen kan lo inkawp tawh thin tih hi a hria em ka hre lo,mahse min en danah Abel-a nupui ka nihna bak engmah thildang a awm hmel loh.Huatna pawh a awm chuang lo.

‘Amak hle mai, i tha vek bawk sia..’ tih pahin ka test result ho a en kual dan dana, a nur nang bawk.

‘Nia, ka lu a hai tel tlat zel a’ ka ti tha ve mai.

‘Um,Abel-a pawh khan a sawia, i chau thin a ti bawka’ a ti leh a.

‘A dik alawm,a hmain ka chau ngai lo,tunah chuan ka mit te a vai rum rum zela’

‘Engmah resultah tha lo a awm si loa,engpawh nise i damdawi ei lai hi lo ei zawm leh la,a thi leh veleh min rawn call nghal dawn nia’ a ti leha,ka bu nghat nangin Call pawh ni ila engmah test Resultah pawh a lang lo anih chuan enge a hriattheih chuang ang tih ka ngaihtuah daih thung.

In ka thlenin khua a thim titih tawh,vawikhatmah ka chanchin ngaihvenin Abel-an min rawn call lo,mahse nidangah pawh min call ziah chuang hleinem,engvangin nge tunah chu chu ka ngaihpawimawh tak viau kher ang??

Ka nu leh Ka pa an lo awma, midang tumah ka hmu lo thung,thilmak erawh a ni lo.Room tin hi an khawvel emaw tih mai turin Roomah an inkhung nasa,bakah ka nu leh ka pa hian an fate mimal nun an dah pawimawh em ema,engtin pawh awm se an sawisel lo thei viau aniang,an fa te an hauh awm pawh ka la hre lo.Hauh ngai em em an ni hek lo,mahse,Ka la awm rei lo deuh pawh a ni mahna le.

Room ka pan chhoa,mahse a lo ruak hiau.Abel-a a haw tawh tih pawn lama Motor awmah khan ka hrechiang, mahse a awm lawi si lo,Bathroom lamah a awm anih ringin dimtein ka pan hnaia,ka beng si chetin ka ngaithlaa,engmah thawm awm loin a reh thiap tho.

‘Min zawng tihna ni em?” ka hnung lam atangin a rawn ti a, ka phu nasa viau bawk.

‘Aih,zawng lo..I awm leh awm loh en ka tum a’ ka ti bah nak mai.

‘Anih chuan min zawng tihna anih chiah chu’ a ti leh hmuka.

‘Zawng lo, Bathroomah hian luh ka tum a,i awm leh awm loh en ka tum zawk’

‘Ok, khang i Office kalna lama i bag ken zawng zawng nen khan maw?’ ka bag a rawn kawk zauha,a nui suk bawk.

‘Oh..’ ka ti hap ringawt.

‘Ni lo...nia, ka hmu mai lo chea, ka enkual ngei e’ ka ti ta nge nge.

‘Uh...min zawng ngei anih chu’ a ti leh supa, chhan enah pawh ka en ta lo law law.

Tv a ona, Khumah a lawn a, Lukhamin a inkamkanga, a thu mu titih.Mak takin nidang ka ang thei der lo,min kalpui hman si loin Mampuii nen ka hmu dun leh si kha ka la na viau tak tak nge mawni? Ni lul suh se.

‘Engtin nge a tih che a?” min en loin a ti leh supa.

‘Ka tha...’ tih pahin ka thawmhnaw bawm ka hawnga, hak tur ka en kual dan dan bawk.

‘Test tur a pe leh che em?” a ti leh supa.

‘A hma ami ang bawk kha ka test a, mahse, ka tha vek..’

‘I chiang em?” a ti leh kher.Ka sa phat..

‘I awih loh chuan nangman va zawt la nimai lawm..’ ka tum aiin ka aw a chang hret.

‘Aaah, i thinrimna tur a sawi ka ni lo ania, min hrilh hreh i lo neih takin ka ti zawk” a ti leh a.

‘Ok..anih chuan ngatinge i lo kal ve mai loh?”

‘Thil pawimawh a awm thut ka tih kha...’

‘Nia, ka hmu che lawm..’ ka thilsawi ka hriatchhuah rualin ka inchhir nghal,mahse ka sawi zo vek tawh.

‘Min hmu maw? Khawiah maw?”

‘Hmu nang, ka hria tih ka tum anih kha...’ awlsam hmel zet hian ka ti liam puata, min rawn melh run bawk nen tihngaihna hre lo zetin ka nui lui ta hak..

‘Um,ee, Sunday kha i nu te In lamah kan phei dawn mawni?” a ti leh nghuta, a hmel thutak zetah chuan ka hmuh tak tak hlauh vanga nuam lo ti emaw hlau hmel hmuh ka tuma,mahse engmah a awm lo.

Nia, a awm lo tawp ang,ka hmu tih ka sawi danah khan engmah ka sawichiang tlat lo, ka thil khawih lai ka tawp chat bawk.Ka nu thilsawi kha ka hrechhuaka,engmah ti tawh lo tura ka hrilh ngei ngei angai.

‘Enge kan tih ang?” ka ti hmasa te te.

‘Eh..kan tlawh ang chu,i kal khat in ka hria’ min en tih ka mitsirin ka hmu theia, mahse ka hawi let duh lo.Nidang ang lo takin a awm laia inthlak lah ka hreh tlat bawk.Huizzz,khua a var lo teh e.

‘Thil ngen duh che ka nei..’

‘Sawi la” a ti awlsam mai..Muangchangin ka inhera,Tv lam a lo en leh daih tawh bawk, ka Thawmhnaw bawm ka khar leh te te, ka kawr hak tur ka keng bawk.

‘Engmah ti tawh suh, Ka chhungte lo ngaihsak emaw lo hnaih tum viau pawh a tul ka ti lo.Kan nih ang ang hian awm tawp zawk ang’ ka aw a ring lo nangin ka inrintawk hmel viau.

‘Engmah ka ti hleinem...’ min rawn melh zawka.

‘I ti, ka pa Damdawi tur i lo leisak ang chi te kha ka duh hauh lo.Midang te anga inzawm kan nih ve loh hi’ ka ti leh nghata.A thu mara, min rawn en a.A hmel chang zetah chuan min thin hrep chak hmel a pu bawk.

‘Mihring ka ni ve tih hi i ngaihtuah ngai em?” ka beisei loh zet a sawi takah chuan ka en reng ringawt.

‘Enge dik lohna ka neih? Nangmah ka tih dan che dik tawk lo vang pawh hian i nu leh pa ngaihsak hi ka duh ve tho asin,nge lemchan vek hmuhin i lo hmu zawk?” a ti leh nghut nguta, na tuar a ang phian bawk. Ni lo,ani  lul hian na a hre hauh lo ang.

‘Ka hmuh dan che min zawt anih chuan Bawlhhlawh hlawm angin ka hmu che,i thiltih apiang hi i hlawkna tur a ni ziah bawk,chuvangin keimah min hman tangkai hi duhtawk la,ka nu leh pa hi chu i lemchan hmang khan hnaih suh...’

‘ I sawi zo tawh em?” a rawn tho chhuak zui nghal bawk.

‘Aih, sawi zo lo.Ka ten chea,chuan...ngatinge i Pian ve tih pawh hi ka hrethiam lo..chuan...’ min rawn hnaih chilh takah chuan ka sawi zawm thei ta lo,a hmel Dur khup leh Pawisak nei miah lo hmel chuan ka chhungril a fana, hlauhna vangin ka ding khawng lah bawk..Ka awmdan pawh hi thil thar bawk.A hma khan hetiang khawp hian ka la hlau ngai lo.

Min si deuhthawin a dinga, min en chhuk run chungin a inpetruh fun bawk,tihngaihna hre lo zetin ka mit ka chhing a, kut min thlak hun tur ka nghak ta ngawt..Rei lo teah a ri pawpa, ka nghing lawih bawk,mahse, keimah ka ni lo...ka mengchhuaka,a rawn kun hniam ve chiah bawk..Keimah min beng dawn emaw ka tih laiin ka lu chung lam zawk na zetin a chum anih hmel..Ka khabeah a rawn dawma,min kuai daka,hnialna chang hre loin ka ding mar at ringawt.

‘Mihring ka ni a, na ka hrethei ve a,chuan ka thiltih hi nangmah tihluihna a ka nei che tih loh chu engmah dik lo a awm lo..A pawimawh ber chu engvang mahin ka chan dawn lo che...eng ang pawn min Dodal mahla ka chan lohna tur chein ka bei tho ang,hrereng ang che’ nghet churh hian a ti ta duah,eng anga  dawnsawn tur nge anih ka hre lo.Fiamthu mai mai sawi a ni lo tih a chiang,mahse ngatinge min chan loh a duh? Engmah ka hrethiam lo.

Min thlah thuta,a inhera, Kawngkhar a pana.Chet mai na chang hreloin a che vel ka melh ngawt ngawt ringawt.Handle a vuana, mahse a rawn hawi leh thut..

‘In tilum rawh,i hritlang hlauh ange’ a ti leh hmuka,kawngkhar a hawnga a chhuak zui chu animai.Dimtein Kawngkhar a rawn nem khar leh bawk.

Chhuatah ka thu thla hnawk mai,a thusawi mal tin te kha a vaiin ka bengah a rawn ri nawn leha.Ka la hrethiam chuang lo.Mampuii nen an Nihna thup turin min nei tih amah ngeiin min hrilha,engvangin nge min chan a duh loh? Damchhungin a u nupui kawp a tum tihna a ni mai em? Chuti anih chuan ka lo awm ve hi a tul hluah hluah,ngaihtha taka an fanu a kuta an dah ngamna turin Ka nu leh pa lakah that a chhuah bawka...Ka nui hawk mai..Mahse, nuihzat vang erawh a ni lo..Thil nithei awm ka ngaihtuah chhuah tak vangin awmze nei lo tawpin ka nui a ni zawk.Ka biang a rawn lum thla papa, ka mittui a tla tih ka hria..Tah hi ka thil duh loh ber a ni thin,mahse tun tum chu lo tla mai mai tehse,ka dinhmun chep lutuk,lan chhuahtir dan awm chuang si lo hi ka mittuiah changin ngawirengin a rawn luang chhuak a nimai.

‘Matty, i tha em?’ ka nuin min ti a, ka hawichhuak vat bawk.

‘Aw...aw,tha e...’ ka ti a, ka hawi kuala, Abel-a tih loh chuan min en vek.Za lo zetin ka nui lui sak ringawt. Ka in ngaihtuah ngut ngut thin hi ka sim angai takzet..Ka inhau ru mawlh mawlh bawk.

‘Engmah i ei mumal lo a,chuvang ania..’ a ti leha.

‘Ka lo haw dawn tep khan thil kan ei peka..chuvang aniang’ ka ti leh ngawt, diktak chuan Lunchah Momo tlem ka ei bak engmah ka ei miah lo.

Engmah kan sawi zawm ta lo,ka Thlenga thil inchhawp sa tihluihnain ka ei zo hram,ka luak lo chauh bawk..Ka tum loh tawpin Mampuii leh Abel-a ka melh ru leh zauh thina, an awmdanah engmah danglam a awm lo.Tihsual nei lo ang maiin an awm a,an inbiak danah lah dik lo a awm hek lo.Marcus-a ka melh leh a,vei nei hmel a pu lo.Ka khawngaih leh ngawt bawk.Keichuan engkim ka hria a, ani hi chuan engmah a hre der si lo.

Inchung zau tak,thla engin a chhun en ruaiah keimahin ka lo awm a,tiang hian hmanah khan ka awm tawh tih ka ngaihtuah naah a lo lut a,helaia ka awm chhan pawh ka la hre reng,ka thiante ri nuaih nuaih thawm ka nin avangin ka putchhuaka,tuman min hmu lo..Van lam ka thlir vang vang,Arsi an phe neuh neuha,ka nun a hlim veng veng bawk.Mahse, ka inrin hmain tuemawin ka hnung lam atangin min rawn kuaha,ka phu vak bawk..

‘Tu nge iniha?” tih leh a kut phelhsak ka ruala,ka inher nghala,kan Class a mi Biakthana a lo ni a,hlauhnain min rawn thama, ani hi chu a thi daih tawh..Heta ka awm lai ngei hian a thi, chu pawh tuna a chet dan ang chiah khan a rawn che bawka..

‘Ka lo kal beiseiin i awm tih ka hria lawm’ tih pahin min rawn ban leha,hlau lutukin ka petek dawrh mai,a rawn phar du a,a nui then thu bawk,ka ban rekah a rawn mana,rak tuar chungin ka theihtawpin ka nem ve thung..A eu awrha,inchung hungna Railling sang vakloah chuan a liamthla zawk bawk..Chet mai nachang hre loin ka ding ren rawn,mahse thawm a awm takah chuan ka tlan vata,ka va biha,inchung atanga Rod lawrah a lo uai tanga,khur hlawk hlawkin ka zuk ban a,a kut ka zuk si hman thuak..hmanah khan ka chhan hman lo a,tunah chuan ka chhan hman maithei asin..Khur zawih zawih chungin ka zuk bana,mahse ka vawn ngheh hmain a phar leh dawrha,mangang lutuka a mengphar vak leh a hnuai tui chhe paihna lama a tla thla leh a ban vai chu ka hmuh chhun a ni leh ta mai,Ni lo...vawi tamtak chhan ka tum thin alawm,ka mumanga ka hmuh apiangin chhan ka tum ziah alawm..

Tum dang ang bawkin hlau em emin ka tawlh hnunga,tuemaw zuk koh ka duh,mahse kan pahnih chauhin kan awm tih an hriat chuan ka nem thlak a ni tih an hria anga min Man tir ang..chu erawh ka duh lo..Ka beng bulah chuan tuemaw hian min nuihsawh ri ka hre leh bawk...Hei pawh angai bawk..

Hlau lutukin an awmkhawmnaah ka zuk chhuk ve leha, Tluangpuii nu leh pa awm loh lai anih avangin tupawh an zalena, an rui hlawm vek,ka lut pawh tuman min en lo,Kil khatah ka thu khur hlawk hlawk ringawt.

Thawk lehkhatah a thim mupa, ka awmna a lo in thlak vek tawh..Vawi tamtak min tibuai tu ka mangchhia a ni tih pawh ka harh miah lo chungin ka hrethiam nghal vek.In tih harh tumin ka ke tih chet ka tuma, ka thei lo..Ka hmai bulah a rawn lum pupa,Mitmu chhuak pur leh Lu hek huam bawk in Biakthana ngei chuan  min rawn nuih a...

‘Kal bo rawh..’ ka theih tawpa ringin ka au nghek bawk.

‘I tha em?’ chiang lo ruaiin ka harha,ka luah tuemawnin a rawn khawih leha.

‘Ih...ih...’  ka thlanin min bual huh titih..

‘Shhh...engmah sawi duh rih suh..a tha vek ang’ tih pahin a rawn lawna,rawn mut ve pahin min rawn kuaha,ka taksa khur hlawk hlawk tihreh nan ti niawm takin ka hnungah a chul hauh hauha, ka samah a fawp vang vang bawk.

Kum tamtak ka lo phum bo tawh khan ka mumangah min rawn tibuai leh ta,ka mumangah hmuh ka hlauh lutuk avangin ngaihtuah pawh ka ngaihtuah ngam ngai loa,mahse a hlimchhawnah kha chuan a theih loh..Zan tamtak muhil ngam loin ka tlaivar thina,ka chera, ka dawldang em em bawk..Ka nu leh ka pa khan ka harsatna hriatchhuah tumin an bei nasa,mahse an beidawng thak..a tawpah erawh chuan Depression ka neih nasat lutuk vangah an puh thlu ta nge nge kha ania,mahse a dik lo chuang lo.Kha thil vang khan nasa takin Depression ka nei miau si alawm le.

Ka theihnghilh ve tial tiala, ka nun atangin zawi zawin ka paihchhuaka, ka phumbo thei titih ta hial,mahse tunah hian hailanin a awm leh ta tho.Abel-a hian khawi atangin nge a hriat ka hre lo..

‘Tumah ka that lo’  ka aw a ri chang chang..

‘Ka hria alawm,hahdam rawh’ ka samah a hmai a rawn phuma.

‘Engtin nge ka tih ang?’ ka aw a lawi vek bawk.

‘Theihnghilh rih la..um..’

‘Ka theihnghilh tawh kha nangman min hriachhuah nawn tir leh si alawm’

‘Sorry...’

Hnung lam atangin min kuaha, a lungphu nghawr dat dat ka hrethei,zankhuain min thawhsan ta lo,min kuahna a la sawn hek lo.Tal hran ka tum chuang bik lo,diktak chuan tuemaw min chhan tu tur ka mamawh ngawih ngawih zawk.Engmah sawi loin kan mu dun a,a ban rawn dah phei chu ka khama,a kut lehlamin min kuaha,ka kut zungtang karah a kut a rawn rawlha, a hum bet tlat bawk.Che loa reife kan mut hnuin a thawk danah a muhil tih ka hrethei,kei erawh khawvar hnuah ka muhil ta chauh.

Thawm dim taka che vel thawmin min tiharha,mahse che mai loin ka mut dan ngaiin ka mu leh rih,nizan thil thleng kha..Diktak chuan Abel-a hmuh ka huphurh hluah hluah,a thil hriat sa reng ka sawi chhuaka,chu pawh a vawikhatnan..Ani bulah ai chuan ka nu bulah tal lo sawi hmasa ila a tha tur,Hmeichhe luhlul leh pawisak nei lo em em thin kha Puih ngai leh Der dep em em angin ka in lantir ta chu ania..

Khawngkhar inhawng thawm leh inkhar leh thawm ka hriat takah chuan ka let thaka,Sana ka en a..LALPA..dar 11  a kawk va tawh..Engtin nge tiang chen chen ka mut theih?

Rang lutukin ka tho chhuaka, ka kekawrbul hak leh ka T-shirt lian zet hak chu ka phelh sawk sawka,Bathroomah ka inphihfaia, mahse Inhnuai lam ka pan tur erawh ka tim leh hnuhnawh,tu nge awm ang ka hre lo,nidang ang anih chuan Chhungkaw member pangngai tumah an awm tawh lo ang.

‘I lo tho alaw? Ka tiharh che mi?” Dawngi’n phawk zetin min lo ti nghal a,a sawi awmzia hre loin ka hawi buai nak bawk.

‘Maw? “ ka ti sap ringawt,ka rin ang ngeiin tumah an awm lo.Kitchen lama thawm ri rak rak bak thawm dang a awm hek lo.

‘U Abel-a khan tiharh lo tur chein min ti sia,mahse i mut that leh that loh en turin min tira,tun lawk khan ka lo kala...min hau ang a” nuam lo tih hmel zet hian min ena, a che sek bawk..Mahse, kei erawh chuan ka rilruah thildang daih ka lo ngaihtuah thung.

‘Min tiharh hleinem,mi dangin in rawn call a’ ka ti ta ngawt.Ka pum ri raih raihah chuan ka riltam zia ka hrechhuak chiah,nizan khan engmah tih tham ka ei tlat lo.

Thil ka ei fel meuh chuan dar 12 a hnai thuak tawh, Office kal loh mai ka chaka, nizan ka mut that loh luat vangin ka rit luk bawk nen mut nilen mai mai ka chak ber, mahse ka thulh ngawt thei lo.Rinpuia nen inhmuh ngei ngei kan ngai..

‘Bawihi,i kal chhuak dawn a mi?” Nu Rami’n ka chhuak tur min rawn um zuia.

‘Aw,,Office kal ngei ngei ka ngaia..’

‘Mahse, Tea khan chhuah tir lo tur chein min chah a’ ka chil ka haka, ka khuh khauh mai..Engemaw a hriat hrep ni??

‘Aih,ka be mai ang.Kal chhuah ngei ngei ngai ania, ka rei lo ang’

‘Anih leh le,amah pawh khan i kal lui talh ang tih a ring aniang, vawi hnih ngawt min chah asin le’ a ti leh a,Abel-a te unauin Nu Rami an en dan ka hria,tlang taka ka chhuah a duh lo tih a lo chah mai hi mak ka ti lem lo.

Ka tlanchhuah dawnin ka phone ka en ta chauh,ka thawh hlim atang khan ka la en miah lo,ka phone Lock ka phelh rualin Msg thawn chhuah loh a lo in type sa that a..Mak ti zet hian ka en hnaia..

‘Good Morning ..kal chhuak suh ang che,ka lo haw hma ang..’  engtin nge ka phone lock a hawn theih? Oh...nidawn tak..Finger lock a ni miau.Ka tum loh tawpin ka nui chhuak hak mai..

Office ka thlen hmain Rinpuia ka call lawk tawha, Office ka thlen hnu lawkah a rawn thleng ve nghal deuh mai bawk.Awmtei’n min hmuh veleh a lo ri hluai.

‘Ngatinge i lo kal talh duha? Nawm vak loh chuan chawlh rih mai tur che lawm’ min lo ti nghal bawrh bawrh,engmah ka hrilh der si lo.

‘Ka tha reng,bakah Rinpuia nen inbiak ngei ngei kan ngaih kha,i kutah ka dah lo laklawh sia..’ ka ti a.

‘Talh che hian,Abel-an min rawn call reng alawm mawle..luhlul viau thin lo teh’ a ti leh hmak hmaka,tihngaihna hre lo zetin ka nui ta ngawt.He Abel-a hian enge a hriat tak ni?Min ngaihtuaha, min Care ta thuta,thil hrehawm lah a ni hauh lo, Mahse min ngaihtuah lutuk lo se ka duh zawk tih erawh ka chiang.

Rinpuia nen kan hna kan khawih zawh veleh rei awm loin Office ka chhuahsana, Darkar khat zenzawn chu Officeah ka awm hman tho mai.Jeffrey-a te dawrah thil lei kual ka duh a, bakah amah hmuh ka duh hrim hrim bawk.Ka lut min hmuh rualin min rawn pana, nidang ang bawkin a hmel a hlim a, a thar sar mai..Ka rilruah TUAI tih a lo lang a,a awm ang lo lutuk chu ka nuih a za zawk mah.

‘I hnar a thi ania..’ a rawn ti thut.Rang fe hian ka daka, mahse nidang ang lo takin a tam lo.

A nau te zinga pakhatin Tissue Paper min rawn pe a,ka hnawha,ka awm pangngaiin ka awm zui thei mai..Mahse, Evelyn-i call tho tha ka ti a,nimin khan a number ka la a,nidang angin thi nasa lo mahse nidang a an loh vang zawk takin ka rilru a nuam lo.

‘Kei pawh ka kal chhuak dawn tho a, ka rualin kal mai rawh,chuan ka rawn lam leh ang che’ Jeffrey-an a ti a,ka hnial lem lo.Motor khalh chakna ka nei loa,bakah tun ang hunah chuan Motor dahna tur a vang thin,Mc ah pawh nise an khat hneh viau zel.

Ka tum aiin In ka thleng har ta viau.Mahse, tumah an lo la haw lo thung,Rooma tawmreng peih loin Nu Rami bulah bawk ka tawlh leh pek,a haw hmain engkim a siam peih thlapa, ka nu hi dar 4 velah a haw tlangpuia,mahse nitin a kal chhuak lem lo,ka nu haw hnuah ani a haw ve chauh thin.Ka nu kal chhuah loh ni erawh chuan dar 3 vel bawrah a haw thin thung.

‘Vawiinah khawiah nge i kal?” Abel-an a ti supa,Kan room chhung Sofaah hahdam hmel zetin a thu thluang duai bawk.A thawmhnaw engmah a la thlak lo.

‘Office...eng lo nia,kal ngei ngei ka ngaia’

‘Hmundangah ania ka tih?”

‘Hmundang....ee,Evelyn-i ka hmu leha,ka hnar a thi leh chuan call turin min ti a, tlem a thi a, ka call a, ka va hmu ta law law a..’

‘Ka hria...mahse, ngatinge min rawn ko mai loin kha Tuai kha i kalpui kher?’ a ti tuara, ka phu nasa lutuk...

‘Abel...’ ka ti chhuak sep ringawt..Engvangin nge a thinrim em em ka hrethiam lo.

A rawn ding chhuaka,min rawn pana, ka tawlhhnung hrat thung..Mahse, Khumin min lo dan takah chuan beidawng zetin ka ding ta ngawt.Ka khabeah a rawn dawma,amah en thei turin min kuai dak a..Min dim lo ngang mai bawk..Mahse, engmah ka sawi ngam lo,ka chesawn ngam hek lo..Engvanga dawih ta viau nge ka nih ka hre hek lo..

‘Min en rawh,keimah Abel-a..i pasal ka nih hi..Khapa nen khan ka hmu dun leh che u anih chuan i thuruk kha mi zawng zawngin an hre tawh ang...’  a ti supa, a sawi ring lo..Mahse ka hrechiang lutuk mah mah...Ka thidang mai dawnin ka inhre hial bawk..