REVEUSE-7

CHAPTER-7

‘I sawi awmzia ka hre lo,Abel-a bialnu anih chuan ngatinge a u nen an inneih dawn si?” ka ti sapa.

‘Chutah reng chu buaina aw...A thui lutuk,phone a sawi zawh chi a ni lo,natukah ka hrilh ang che’

‘Aaaah,ka hriat kher a tul hleinem’

‘Tul e, tul tak a ni,Nang aiin Abel-a hi ka hrechiang zawk, tunah hian a hnuk lut tawh che, a um zui ngar ngar tawh ang che’

‘Ni lo,engthilmah ani nen inzawmna kan nei lo,a hna ka thawhsak dawn,chu zawng chu..’

‘Ngawi mai teh, nang aiin ka hrechiang ka tihah khian duhtawk rawh,naktukah kan sawi dawn nia’ a rawn ti leh a,ka hmu thei lo nangin a phi cheng nimaiin ka hria.

‘Ok,nia..mahse, engtin nge ka kal tih i hriat a?”

‘Thian ho Groupah ka hmu’ ka ang pham mai..

Ka mu meng kar a,he Abel-a hian enge a duh chiah ni ang? A hmel ka mitthlaah a lo langa,tumah hi hmelchhia ka la tih awm pawh ka hre ngai lo, chutiang bawk chuan ani pawh hmelchhia ka ti lo,a pian a nalh viau,a kamiz hak khan khuh mahse a pian nalh tur zia a hriattheih vek tlat.A mitmeng lian leh mi thunun thei tak kha a nu mit atanga a neih tih hai rual a ni lo,a sam meh pawh a tunlai viau,a bek a kawng a, a chhip lam erawh a buk thung,a hnar ngul a sang tha a,a nu leh pa chhun tur a nei tha tih vawiin khan ka hmu tawh, a nu kha a nulat laiin a hmeltha tawk hle ang,a pa erawh a pa viauin ka ring,Marcus-a kha chuan a nu hmel a ang vak lo,a pa hmel a ang mah zawk .Mahse, Abel-a leh a pa an in ang fe zawk tho.Abel-a chuan a mit leh hnar mai bakah a hmui ah pawh a nu a ang viau,Marcus-a kha chuan a mitah leh a hnarah a pa a ang zawk thung.Engpawhnise a khaikhawmnaah chuan a chhe lo a, tu te emaw tan chuan buai viau na tur Mipa a ni chiang khawp.

An In ka awm chhung khan min Care viau,a tihtur ti ve maiah khan ka ngaia,mahse, Tluangpuii rawn sawi ang khan hnathawktu ni loin a Chhungte hnenah khan a Bialnu angin min hruai tak tak a ni mai angem? Ka thaw haka, ka thu chhuak ta nge nge.Ka phone ka bana, ka hmet enga, dar 12 a ri tep tawh.A duhna tawhah chuan engmah tih hreh a neih loh zia ka hre tawh,mahse, a bialnu anga ngaihtheih tura min hmang tangkai anih teh chuan...Rosanga ni lo, Mipa dang vanga ka muttheih loh hmasak ber a ni hial ang, ka ngaihtuahna vangin ka nui sak ringawt,Rosanga nen ka Compare ngawt pawh ka nuih a za zawk.Khawvar dawn hnaih tawhah ka muhil ta hram.

Ka insiam laiin ka phone a rawn ri a, ka hmaia face cream  nuai mawlh mawlh chungin ka bana, min rawn call tu ka hmuh rualin ka ip chawih mai.Ka pick ang nge Pick lo ang tih ka ngaihtuaha,Tluangpuii thilsawi ka bengah a rawn ri nawn leh nghal zat bawk,mahse..ka pick a tul,kha chu engpawhnise hna kan thawk dun dawn.

‘Hello..’

‘Good Morning’ zawi sup hian a rawn ti a.

‘Morning..’

‘Vawiin hian ka rawn hmu thei che angem?”

‘Eng turin?” ka sawi zawh rualin ka thusawi atthlak zia ka hrechhuak chiah.Hna bak enge ni ang?

‘Ka duh min zawt anih chuan pakhatnaah hna ni se, pahnihnaah Nula leh Tlangval angin’

‘Pakhatna zawk hi ka pawm e’ ka nui lui hak bawk.

‘Kei pawh mawle..mahse, kha chu pawm sa ania,ka lo ngaihtuah zawk chu Inah hian engtikah nge lengah min sawm ang tih zawk?”

‘Oh..’ ka ti chhuak sap ringawt.

‘Ngatinge, i nu khan a fanu puitu hi a hmuh chak ka ring, bakah vawikhat mai ni lo vawihnih lehnghal’

‘Min hrethiam la, ka buai lawka..Chuan, vawiinah chuan Site tlawh ka ngai dawna, Office awmna hun ka neih ka ring lo a, Naktuk lam a remchan chuan kan ti mai dawn nia’

‘Tehreng mai,mahse, ka thilsawi kha chu i nu hnenah i sawi ngei ka beisei ania’a rawn ti leh talh.

Tluangpuii ka lama, Office ka tlawh hmasa dawn lo tih Diki ka hrilh lawk vek a, min hmu duh an lo awm anih pawhin min lo nghak hlawm mai ang chu.Site lam ka pan ding nghala,nikhat lek ka tlawh loh vangin an buai dawn lo tih ka hria, bakah Hmanraw mamawh zawng zawng pawh tunah chuan kan chah thlen hlim a ni a, nitin an thawh mawp mawp bak chu tih theih vak a awm rih lo,mahse tlawh theih chuan tlawh tam an tha,ka duhdan ni lo deuh hleka siam a lo awm anih pawhin a tihdanglam lehnghal mai theih thin,kal khat chuan hmundang an lo thawh laiin an zawh tawh sa vuak thiah leh te a ngaia,hna a sukuk zo vek thei tlat bawk.

‘Le..han sawi la’ ka tlanchhuah veleh ka ti nghala,diktak chuan ka hre duh hluah hluah.

‘Sawi dawn tak ka ni.Nizana thianho groupa in pahnih photo an rawn dah ka hmuh tirh phei kha chuan sa tak mai hi ka nia’ a ti a, a nui var var tho.

‘Engmah a awm lo ka tih chu,an hna ka thawhsak dawna, chumi pah chuan an Inah Lunch ka ei ve nghala, chuzawng chu nimai,ka ti tak tak’ uar fahran hian ka ti leh a.

‘Ka ring che lawm ,mahse, ka ngaihtuah mai mai dan chuan hmalam pan hi i hun tawh ka lo ti che a,Abel-a kher hi ni lo phei se chuan pawi ka ti miah lo’

‘Naaah, i ho lutuk..Mahse, enge ani hi a that loh na?”

‘In mizia a inmil dawn lo,eng lo ania.Marcus-a nupui tur leh Abel-a hi Mumbai ka awm ve tirh pawh hian an lo inkawp tawh,ka zuk zirnaah khan a hmeichhia hi kei aiin kum khatin a lut hmasa zawka,mak deuhin kan inkawmngeih ta phiana,ka awm ve hnu lawkah khan Abel-a flatah a insawn luta,Mizo thiltih nikhua hian an lo lang ve ngai mang lo,Abel-a hian chunglai chuan MBA a zir mek thunga.A awmna a rei tawh bawka mi hriat chu a hlawh tho,a zirna lamah a insawrbing nasa a, tunah pawh a hlawhtlin em hi..Mahse, mak deuhin an inneih kan rin vek laiin an inthen a,Mampuii lah Aizawl lamah hna a rawn thawk ta daiha,ka hriat leh hmasak ber chu Marcus-a leh Mampuii inzui thu a nimai.Engtin nge Abel-a hian a ngaih chu ka hre lo,mahse, Aizawl a haw hnuah an chhungkaw eizawnna awmsa atangin a inlahranga,tunah hian amahin engkim a nei hrang ta anih hi’ a ti ta duah.

‘A u leh Mampuii an lo inkawp leh si avangin In atangin a chhuak maw? Ka ngaihdan chuan ho ka ti’

‘I ngaihdan kha a dik vek kher lo ang,Marcus-a hi a nu hian a duat em ema, Abel-a hi chu  a pain a duat ve thung,mahse, a inlakhran chhan tak hi chu ka hre bik lo,bakah tuman Mampuii nen an inthen chhan kan hre lo vek,a mimal nun hi a thup thiam lutuk a, hriat mai mai theih pawh a ni thin lo,chutih rualin Abel-a hi chuan tun thlengin ngaihzawng bul fuk a la nei lo chu ania,kawp zawng a kawp lawr duah tho nangin’ a ti leh a,an in kawm nasa bawka, a hrechiang hmel khawp e.

‘A va zia lo ve ‘ sawi tur dang hre loin ka ti tawi tak ringawt.

‘Nia, zia lo.Mahse, in in ang ka lo tia’ ngeiawm zet hian a nui hawr hawr bawk.

‘Engah chuan maw?” ka hre reng nangin ka ti hlak tho.

‘Khawvelah hian ka Cousin sual tak chauh Mipa an awm emaw i ti a, tiang chiah chuan Abel-a hian Mampuii chauh hmeichhia an awm emaw a ti bawk..Um,tha dawn lutuk’ a kut ben thak pahin a ti nghal zat.Chhan let enah pawh ka en peih lo law law.

Durtlang kan kal hmasa a, darkar khat dawn kan awm hnuah Zemabawkah kan chhuk leha,Office kan thlen phei meuh chuan Lunch ei a hun titih tawh.

‘Pawn lama ei nge i duh  hetah ka chah mai dawn?” ka ti a.

‘Hetah pawh a pawi lo.Bakah kalna tur ka nei dawna,chuan..naktuk zan kha i hman ang tiraw?” a tih zawm zat.

‘Ka tum ve chu nia.Bakah tunlai chu boruak dang hip ka mamawhin ka hria’ ka ti a, diktak chuan ka chau tawngkhawng niin ka hria,engmah tha takin ka ti thei hlawl lo.

‘A dik reng,hna ngawt ngaihtuah lo hian awm ve zir rawh’ a ti nghata, Eitur kan nghah chhungin a titi siam siama,a chhuk hun a hnai leh tawh bawk nen thianhlui te nen Dineout an rawta, ka hnial loh tum tak a ni bawk.

Tluangpuii haw hnuah hna ka thawka, Bill ka tihfel vek hnuah Abel-a hna lam ka ngaihtuah ta chauh,engmah duhdan a neih a sawi leh ta si lo kha ania,anih si chuan ka siam hmasak zawk kha en nawn leh ila,siamthat ngai a awm leh siamthat mai a awlsam zawk ang tih ka ngaihtuaha, mahse, amah biak hmasak tho angai,atthlak zetin biak lah chu thih hrehin ka hreh bawk.

Reife ka ngaihtuah hnuah ka call ta nge nge,Off leh lo turin ka insum nasa viau.

‘Hello’ nidang ang bawkin a aw a ring lo lehpek.

‘Hun i neih chuan biak lawk che ka duha’

‘Sawi la..’ a ti hmuk ringawt.

‘I hna hi khawih ka tuma, mahse, engmah siamthat kha i ti ta si lo a,ka siamsa hi ka ring mai dawn emawni ka ti a’

‘Ok, i tih dan dan,mahse, chu aia hmanhmawhthlak zawk chu nimin khan i hmuh kha,Ka u in nupui a nei dawna, Kan In lam kha ka nuin khawih hmasak a duh a’

‘Anih chuan nimin khan kan enfel si lo a’

‘Naktukah  hun i nei angem?” nelawm lo zet hian a ti leh hmuk,kan inbiak hmasak kha chuan min chhaih titih ziah kha nia,tuntum chu a mood a fuh lo anih hmel.

‘Chawhma lamah ka theih ka ring’

‘Ok,a that chu,Kan in i hre tawh tho bawka, nangmahin i lo kal thei ang chu’

‘Nia’ ka ti tawi tak ringawt.

Phone ka dah hnuah thil ka ngaihtuah chhuak leh lawi,zinga min rawn call khan naktuka kan inhmuh tur kha kan sawifel tawh reng kha ania, tunah khan a hranpa hlakin kan sawi tha leh a,bakah nimin khan a u nupui tur nen an inbiak danah engmah dik lo ka hmu miah lo,Tluangpuii lah khan dawt a sawi ka ring der bawk si lo.Engtin nge Marcus-a khan a nau bialnu hlui a neih ngawt theih tih kha ngaihtuah tham niin ka hria,a hmain a lo hre lo anih pawhin an inkawp chhung kha chuan hriat ngei ngei tur niawm tak a ni bawk si.Huizz,kei hian ka ngaihtuah loh tawp tur ka ngaihtuah anih hi a.

Zing atangin Abel-a te In ka kal tur ngawt ka ngaihtuah vangin ka awm a nuam thei lo.An In ka panna kawng tluain ka insehruh tluan parh bawk.Diki tal ka hruai lo ka inchhir vawng vawng bawk.

A nuin min lo hmu hmasa ber,an awmpui te niawm tak an awm vea, an chhungkaw member dang tumah ka hmu lo.

‘Abel-a hi a farm lamah buaina a neia, i hriat tho ka ring nangin’ ka rilru hria niawm tak hian a ti a, nimin a ka hmuh ang bawk khan a hmel a nelawmin a lang thar leh sar bawk.

‘Aw,nia..a pawi lo,a awm ve kher angai hleinem’ pangngai thei ang berin ka ti a.

‘Nia,a awm ve pawn engmah a sawi chuang lo ang,bakah ka fate hi an tha ve ania, ka tih ang ang hi an pawm ve mai zela’ tih pahin Inchung panna step lamah a kal a,ka zui ve nghal vat bawk.

Inchungah min hruai chho a,kal pahin an In sak dan vel ka thlek kual dan dana,uluk taka sak a ni tih a chiang reng,bakah an enkawl zo tih a hriat ngawih ngawih bawk.

Room lo awm hmasa ber kan kal pela,a piah leh a room awm chu a hawnga, ngawirengin ka zui lut ve zel bawk.

‘Hei hi Marcus-a room ania, thlathar maiah nupui a nei dawna,a chhung hi khawih kual angai nasa dawna’ tih pahin a hawng kual dan dana, a duhdan engkim a sawi chiang viau,nu zahawm tak anih mai piahlamah a thluak a tha ang tih ka hrethei nghal mai bawk.

‘I hre tawh maitheia, Abel-a hi chuan helai hi nuam a ti ve tlat lo,ka remti lo chungin ama ta turin In a leia, chu pawh a dan ngai te bawkin khawpawnah bawk a ni leha..’

‘Nu...i hrilh vak chuan min Blackmail nan a hmang dawn ania aw’ Abel-a awin a rawn tih rualin aw lo chhuahna lam hawiin ka inher nghal vat a,Kawngkhar biang nghengin a lo dinga, engchena rei nge a lo din tawh ang ka hre lo.

‘Aaah, chutiang mi anih loh hi,ka hrethei mai ania.I lo let leh dawn lo amaw ka tia?” nui chungin a ti a, a fapa a en danah chuan Fapa mai niloin Thian te pawh an ang rum rum zawk.

‘Let lo thei in min ring a mi? Ani kha i hetah a awm tlat a’ hriatthiam har zet hian min rawn en a, a then suk bawk.