MON HOMME- 17

Chapter- 17

'Haw tawh la a tha in ka hria...' reife kan ngawih hnuah ka ti chhuak sep..Inlakhran tumin ka che a,mahse, min kuah nghet sauh..

'Min ngaidam dawn nge dawn lo?” zawi supin a ti a,chhan mai dan tur ka hre lo.

'Ola...' a ti leh a,a awah ngenna niawm tak a hriattheih bawk.

'Min thlah phawt teh' ka ti nghata,diktak chuan nichin lawka thil thleng kha rilru fimin ka la ngaihtuah thei tlat lo.Ka thinrim nge ka kehchhia pawh ka la hre hrang lo..

Min thlaha, khum kil lamah ka let phei nghal vat, ka kawr ka tham khawma,ka mu tawm chaih bawk.

'Kal tawh rawh...' ka ti leh nghat..

'Aih....'

'Darian...' ka aw a chang fak mai..

'Neih che ka duh...' ka mit ka chhing sawk ringawt.

'Kal rawh....'

'Ola,min nei rawh'

'Khawngaihin...' abak engmah ka sawi thei lo,sawi mai tur lah ka hre hek lo.

Kawngkhar ka khar a, ka kalh nghal hmak,mahse kalsawn loin kawngkhar nghengin ka ding a,a Motor start thawm leh a ri zawi tial tial ka ngaithla kar,eng nge ka tih leh ang ka hrethiam lo,ka ngen lai khan keima tana tha tur anih avangin min hniala,khami tum chauh lo pawh a in control thei vek,mahse, engvangin nge zanin khan khatianga a rawn chet ka hrethiam hlawl lo..Min pawngsual anih kha..Hmangaihna a ni thei lo,ama ta ka ni tih tihlan a duh anih chuan engvangin nge thil dangin a lantir mai loh ang? Zawhna hlir...ka thaw hawk bawk..

Ka muhil ta miah lo...Tukverh ka hawn atangin thlifim a rawn thaw heuh heuh a,Darian-a kal hnuah Shower hnuaiah ka dinga,keimaha a sulhnu zawng zawng tlenfai ka tuma, mahse engmah awmzia a awm tawh lo..Anih tur ang a ni vek tawh..

Khawvar veleh ka tho a,ka rit luk tihreh nan walk turin ka chhuak ta ngawt,muangchangin ka kala,zingkar boruak thiang vak mai han dawn takah chuan ka harh hawkin ka hre tak tak,mi kal ve an awm nual,a la hma avangin kal an awm pawh ka beisei loh vei nen,mahse kum upa lam mai pawh ni lo,Thalai leh naupang deuh chenin kan inpel zut zut zawk..

In ka thlen veleh ka inbual sawk sawka,hna kal turin ka insiam nghal vek,juice leh chhang ka ei a,ka duhtawk mai,thildang teh vak ka ei theih ka beisei lo hrim hrim.

Hnaah ka buai nileng ta viau,ka lawm zawk daih bawk,chuti ni lo se Darian-a vanga ka rilru natna in min tibuai anga, ka awm a nuam dawn lo,mahse hnaah buai namen loin kan buaia,Darian-a lam ngaihtuahna hun ka nei ta miah lo..

Scooty dahna pan pahin ka phone ka ena,ka mengphar ak mai,Miss call a tam lutuk,Atei leh Julie-in min rawn calla, a bak 13 te erawh Darian-a vek..Ka ner nawk mai,enge rawn sawi a tum ang ka hre lo,bakah nidang ang chu nise Officeah a lo kal emaw a ni leh ngei ang..Amah call loin Atei ka call ta zawk.

'Khawiah nge i awm a?” ka phone ka beng bul atangin ka lasawn a,ka en vang vang..Engvanga rawn au chiam nge maw a nih le a?

'Officeah...khawiah nge awm se min tih a?” ka ti hlar mai..

'Uh,,a tha nih chu,Darian-an min rawn calla, phone i pick thei lo a..'

'Chuan....?” ka ti nghat ringawt.Engvangin nge ka thiante a lo call kher?

'Chuan a?!..i bialpa ania,phone i pick loh chuan a mangang tihna animai lo mi?”

'Oh...ni ve tho mai...' ngaihsam hmel zetin ka ti liam puat..

'Rozampui,eng nge i hriat a?” a lungawi lo tih a awah a lang reng..

'Nangmah ka hria che a, midang pawh ka hre teuh mai...' ka nui lui hak bawk..

'I chak dawn lo lutuk,buaina innei pawh a ni ang, mahse tiang hian mipa tikual suh,Darian-a leh lek phei chu...' a thaw hak ri ka hrethei..A sawi dik,Darian-a hi tihkual mai mai chi a ni lo, mahse,kei pawh tihkual mai mai tur ka ni bik lo..

'Ka dah phawt,ka tlanchhuak dawn chiaha..' ka ngaihtuahna tilang lo thei ang berin zangkhai takin ka ti ta zawk..

'Aw, dah rawh,zanah ka lo kal ang...'

'Eng vangin maw?” ka ti leh rih..

'Ka lo kal hunah i hre mai ang chu..'

'Lo kal lo mai rawh,ka haw tlang dawn lo a,hmun dangah chaw ka ei dawn a...'

'Daw heh lutuk,a tha lawm,ka tilui leh thei dawn chuang lo che tih ka chiang alawm...' a nui ta hak..

'Um,nia..eee,i thianpa chuan a lo call leh anih chuan ka damtha hle a,phone ka pick peih lo tih i lo hrilh dawn nia'

'Ka ti awm lo em maia' a ti bak hlak...

Nui hak hak chungin ka off a,kan thianho hi kan inpawh veka, mahse Atei leh Duati,Julie te hi chu kan inhmuh ngun vang pawh a ni ang, kan inpawh zual bika,chung zingah pawh Atei hi thil ka hrilh tam ber a ni bawk.

'I phone a ri ania..' Kitchen a ka awm laiin Ate-in a rawn ti a..

'Lo pick rawh,ka kut a berh vek..'

Ka thil tih lai ka tihzawm leh nghala,Nizan lamah dawtsawiin ka hnar tawha, zanin erawh hnar ngaihna an awm lo,an pathumin chaw rawn ei an tuma, an thil ei duh zawng lah an lo kal hmain an la thlang fel vek zui,ei siam hi nuam ka ti a,ka thiam em em vang ni lem loin ka peih ve hrim hrim zawk..Ka thiante hi kum tamtak la kawm lo mah ila an ngainat zawng leh ei duhzawng ka hre hneh viau tawh bawk.

'I be lawk hman em?” ka bula rawn din hnaih pahin a rawn ti a, ka thle bak mai,Tu tak ni maw?

'Tu nge?” hmui phunin ka ti a,a then saka,engmah sawi loin phone ka bengah a rawn hmehbel nghat zat.

'Hello...' ka tum aiin ka aw a chang..

'Zampui,keimah Mka..'

'Oh...eng nge ni ta?” Atei ka en a, a bu nghauh ringawt.

'Naktukah kan inhmu thei angem?”

'Aaah,ka va hre mai lo,engthil nge ni ta?” ka ti a, min hmuh a duh chhan awm ka hrethiam eih lo,Darian-an kan chungchang sawiin a puihna a dil dawn lo tih ka chiang lutuk.A thiantha ber pawh nise midang hnenah tanpuina a dil dawn anih chuan a mimal thil ni loin sumdawnna vang a ni ang.

'Kan inhmuh hunah sawi zawk ila...' a nui hawk hawk..Ka then ve sak ringawt.

'Hun ka neih dawn leh dawn loh ka hre lo' ka ti a.

'Nia,lunch timeah te nimaise'

'Um...nia, ka lo tum ang'

Ate-i hnenah la sawn turin ka mitmeiin ka ti a, hrethiamin a la sawn ve mai,Dawhkanah a daha, a kalchhuak mai dawn emaw ka tih laiin ka hmaah tak a rawn thu a, zawhna a nei tih a hmelah a lang vek.

'Eng nge a sawi?” a ti ta chat..

' Engvakmah..' ka thil tihlai bawk ka tihzawm leh a..

'Ngatinge i danglam viau tak mai le?” a ti nghat...

'Naaa,danglam lo,min hmu danglam anih kha...' ka ti leh a,Nizan atang khan min ringhlel vel vek tawha, engkim hriat ve a duh vek nimaiin ka hria..

'Aih,i danglam,engkim i zep vek maiin ka hria,Mka khan engvangin phone a sawi mai lo a hmuh che a duh kher ang?” min ringhlel laklawh tawh,tun tum chu ka namnul mai mai dawn lo tawp..

'Min hmuh a duh...'..A mitko a tisang ak mai..Mahse, mak ti hmel a pu der lo..

'Ka hria,in tawng danah ka man vek' nur nangin ka en a,eng nge a hriat ka hre lo..

'I hriat chuan min zawh kher angai ami?” ka ti let hlak mai.

'A chhan alawm ka zawh che le..' min melh ran mai..

'Ka hre bik nang mawle...nangpawh hi eng nge i hriat a? Tihsual lianpui nei ang maiin min veh reng a?” ka ti nghauh mai..

' Ah, veh nang,mahse thil i zep tun a, ka zep ve ziah tawh dawn...i thilsiam kha zo vat rawh..ka ril a tam ania' tih pahin a tho a, lei min chhuah khum zauh bawk,he nu tak hi chu a..

'Ding teh...nang hi tu lamah nge i tan?” kitchen a chhuahsan hmain ka ti leh hram,a rawn hawi leta,a mitmeng lian kel kawlin min melha,nichin lawka hmeichhe nghal zet hmel kha a bo hmiah.

'Tun tum chu Darian-a lamah ka tang'

'Oh...' ka ti halh ringawt.Thil thleng tak tak kha hria se atang dawn der si lo..

'A tha lawm..' ka ti ta tho..

'Um,nia,a tha em ka hre lo, mahse inneihna hi kal tlangpui vat tha ka ti..'

'Enga? Eng inneihna maw?”

'Vawi engzat nge Darian-a hian neih a duh che tih a sawi tawh?”

'Hre lo mai teh...' ka ti hlak ringawt.

'Darian-a hi in inkawp hma atangin ka hria, Emily nen an inzui lai pawn ka hre tawh,Mipa ka hmuh tawhah chuan ani aia ze nghet hi ka la hre lo,mahse a luhlula,mahni insawifiah chiam chi a ni lo bawka,khalam chu sawi ka tum lo..,mahse, thil pakhat chiah ka hria,kan Darian-a hian nupui neih a duh tih min hrilh anih chuan za ah za in ka pawmpui a,ka pawmpui vanga nei tur erawh a ni lo tih ka chiang,chu aia pawimawh chu ka thiannu neih a duh a,a neih tur hi a duh satliah lo a, a duh hluah hluah tih ka hre bawk...' a ti ta duah...Sawi ve mai tur ka hre lo,ka ban ka phar hliaia,beidawng zetin ka dahthla leh ringawt..

Duati leh Julie an lo thleng a,muk taka titi na hun a awm ta lo hlauh,nidang ang bawkin kan nui bawk bawka,a tawpah erawh kan tuina ber thuziak chungchang bawkah kan lut leh ta nge nge,an haw meuh chuan dar 11 a hnai thuak tawh.

Muhil thei loin ka let tawn sek,Darian-a hmel ka mitthlaah a lang reng bawk,a hnar ngul a sang leh nalh zet hi a lian lam hret emaw tih tur a ni a, mahse a inhmeh em em tho,a pi nu hi Hnamdang a ni a, a hla tawh viau nangin a hmelah hnamdang an thlahtu teah an tel ve tih a la lang thei,a pian nalh zet ka ngaihtuaha, a dar a hlai hlapa,a kawng a fek leh tho,eng thawmhnaw pawh ha se a inhmeh em em vek,kan inkawp hnu leh ka hriatchian hnuah Jeans kekawr leh T-shirt a ngainaa,kamiz a ha nasa viau bawk tih ka hria.A hmeltha hluak lo a, a ngo lem lo bawk,hang lutuk erawh a ni leh chuang lo,mi zingah a langsar em em ziah,a san bik vang ti dawn ila Mizo zingah sang tak tak an awm teuh tho..Atei thil sawi ka bengah a rawn ri nawn leh a,kei aiin Atei nen an inhre hmasa zawk,ka number a neihna pawh Atei hnen atangin a ni a,Midang hnena a mimal nun share chi a ni lo tih erawh ka hrechiang hman viau...Mahse, min neih a duh tih a lo sawi tlat lawi..

Nihnih chu kan inbe tawh lo,mahse nikhatah vawi engemawzat min lo call hman,ka pick lo mai zawk,msg a rawn dah bawka,eng nge a tum ka hre lo,diktak chuan a msgah ngaihdam dilna lam engmah a rawn sawi ngai lo miaua,zingah min rawn wisha,lunch ka ei leh ei loh min rawn zawt leha,zanah min rawn mangtha leh a,buaina kan neih hmaa a tihdan thin ang vekin a ti a ni ber.Mahse, a lo kal leh miah lo thung..

Ka chunga a thil tih kha ka lawm lo,na ka ti em em bawk,mahse ka chhungril hian a haw tak tak lo tih erawh ka chiang tawh,he nihnih lekah hian ka ngai a,ka mamawh ngawih ngawih bawk,ka luhlulna avang zawkin ka pal tlang lui hram hram a ni tih ka chiang..

'Min lo nghak rei em?” Mka en pahin ka ti a, chair min pawhchhuahsak tuma a rawn ding tur chu zaizirin ka danga.

'Aih,rei lo e.Ka thleng deuh chiah,in va buai awm ve?” a tih zawm zat,nidang ang bawkin a hmel a nelawm lehpek..

'Buai ve tho mai,tunlai chu hunawl pawh a awm mang lo,innu leh naute an tha em?” ka ti ve a.

'Aw,tha,a mu duh khawpa,kan nu pawh hna a zawm leh daih tawh zawka..' a ti a, Waiter a hui zauh bawk.

'A lawmawm nasat chu..' ka ti sapa, min chhang loin Waiter lo kal hnai mek lam a hawia,eitur ka duh zawng min zawt ta zawk.

'Ka tibuai hle ang che tih ka hlau hle mai..' Waiter kalsawn veleh a ti leh a,a inthlahrun hmel viau tak tak.

'Aaah,tibuai lo,hna hi chu buai eng ang pawh ni ila lunch time hi chu kan awl tho tho alawm,mahse, engthil nge ni ta?” ka ti a,a ngaihtuahna hriat tumin ka en uluk viau,mahse a tha emaw chhia emaw engmah han ngaihbel tur awm in a awm tlat lo.

'I rinhriat tho maitheia,Darian-a leh nangma chungchang...' a ngawi leh rih,ka bu nghauha,engmah sawi loin a tawng leh hun nghakin ka thut ngaiin ka thu ngil auh ringawt.

'Tun hnaiah Hospital lamah a buai zuala,nimin khan Atei nen kan inhmua,khawiah nge Palai kal tur tih vel ah...' ka khuh khauh mai..

'I tha em?” a ti vat, ka khuh zui leh khauh khauh,nizan khan engvangin nge Atei khan engmah a sawi duh loh? Hei chiah hi anih hi a lo zep ni?Engmah hre lo niawm takin min zawt chiam anih kha a..

'Aw...aw,tha..khawngaihin sawi zawm rawh..' harsa ti ru zetin ka then lui sak bawk.

'Atei khan i pu te address min pe a, mahse i thu hmu hmasa lo a kal tir ngawt tha kan ti lo thunga..Darian-a ngaihdan chiah a ni bawka..' a ti leha.

Ka pu te ka va tlawhchhuah khan kan thianho Groupah ka sawia, an vaiin thinlung takin min lawmpui vek,ka mal lutuk tawh lo anga, pasal pawh nei dawn ila engmah ngaihtuah buai angai lo ang tih thlengin kan sawi ho anih kha..Mahse, tunah Darian-a nen kan in tibuaia,kan inthen em pawh ka hriat loh laiin engvangin nge Palai a lo kal tir ngawt ang? Mka hian engmah a hre lo tihna a ni em? Ka thaw halh mai..

'Thil ka zawt thei che em?” ka ngaihtuahna buai nuai nuai dah bo in ka ti ta zawk.

'Um,min zawt la...' a ti tha ve mai,tawng tumin ka ang ziaua, mahse kan eitur chawia Waiter lo kal phei ka hmuh takah chuan ka ngawi leh ta zawk..

Dawhkanah eitur a rawn chhawp fela,he restaurant hi ka kal fo,an thilsiam pawh tui ka tiin ka duhzawng tak anni hlawm,mahse vawiin chu engmah ei chakna ka nei miah lo..

'Ka ei phawt dawn nge min zawt dawn?” a nui sun sun bawk..

'Ei phawt la...'

'Tak takin ei chung pawn kan sawi mai ang chu, min zawt la,a pawi hleinem..' a ti a,a thil eitur a en daih bawk.

'Darian-a leh Emily inzawmna ka hre duh...' ka aw a zawi hle nangin a hre phak tho tih ka hria..

'Tunah nge hmanah?”

'A pahnih hnihin..'

'Hmanah chuan a bialnu a ni thina, tunah chuan a sumdawnna pakhata a partner..,i hriat angin Hospital lam chauh ni loin kan thianho sumdawn naah a khaipa ber a ni a...'

'Ka lawm e...' ka ti sepa, mahse ka ngaihtuahna hriat tum niawm takin thil ei thulh meuhin chik zetin min en thung.

'Eng nge thleng chu ka hre miah lo,tun hnaiah in buai niin ka hria,a dik em?” a ti ta nge nge.

'Um,...aaa,ka hre lo..' ka ti bah nawk mai..A then suka,a fork leh spoon a dahthla te te.

'Ka sawi tur a ni chiah lo nain ka sawi tho teh ang,Darian-a hi midang nunna a inrawlh loh ang bawkin a thian ka ni chung hian ka mimal nunah a inrawlh lo,chutiang chiahin a mimal nuna lo tel ve hi a lawm lo ang tih ka hria,Emily nen an inzui rei viau mai,mahse a chhan ka hriat lohin an inthena,Darian-an a tawp a ti anih chuan a tawp animai zela,a chhan hriat ka tum lem lo..Nang i lo langa, nang erawh chuan i thlak danglam nasa viau niin ka lo hmu a..' a ti ta duah,mahse, eng nge sawi a tum ka la man chuang miah lo,Darian-a luhlul zia min sawikhum a tum nimaiin ka hria..

'Hman ni deuh khan T-a nen kan inhmua,tunlai Darian-a thinchhiat zia a sawia,a zaidam ngai lo teh nain Damlo bulah chuan a tilang khat viau,mahse tun hnai chu a mood a fuh lo zual thin aniang,tunkar tir lam khan an hospital nurse pakhatin pasal a neia,khami zan khan dar 2 velah min rawn calla,a rui lutuk a rawn lum lut tawp a ni ber a,engmah a sawi duh miah lo na in khatiang taka a mizia a danglam tum ka hriat chu Jared-a vang khan a ni a,mahse tunah khatiang khan a awm leh a,nangmah vang anih ka ring ta ngawt...A dik em ka hre lo..' a ti leh ta duah..Pehhel takin kan buaina min zawh chhuah a tum tih ka man thiam ta chauh..

Kha zana thil thleng kha,ka mit ka chhing sawk ringawt,a hunlai ang mai khan ka la feel thei hial bawk..

'Ka sawi loh tur ka sawi anih hmel hle mai..' nuam lo tih hmel zetin a nui a,ka lu ka thing nawk thung.

'Aih, chutiang a ni lo..ih,diktak chuan hmanni deuh khan a mizia a thlak thuta,a hnuah ka hre leha,Emily a lo accident a...' ka ti a,anchhe lawh niawm takin a phun hluk,enge a sawi erawh kan inthut hnaih hle nangin ka hre thei lo thung.

'Zampui,i nunah inrawlh ka tum angah ngai lo la,mahse thil pakhat ka ngen duh che,thinrimna emaw rinhlehna engpawh nei la Darian-a hnenah engmah zep loin sawi thin la,a chhanna a nei ngei ngei ang tih ka tiam che....' a awah thupek ni loin min ngen tih ka hrethei..

'Ka lo tum ang,mahse,vawiina min hmuh nachhan,Palai chungchang kha chu amah nen kan lo sawi dun phawt ang...a pawi em?” ka ti ta nge nge..Amah biak ka tum tak tak em ka hre der lo thung.

'Oh,tehreng mai,khami hun kha alawm kan lo nghah...' phur zetin a ti hluai mai..

Thim hnuah inlam ka pan ta chauh,phone khawih lehna hun a awm eih lo.In ka thlen veleh ka inthlak sawk sawk,tumah an lo kal ka ring lem lo bawka kekawrbul tawi te ka haa,T-shirt lianpui,ka kekawrbul khuh pha deuhthaw ka ha bawk..

Insuk tur machineah ka thun saa,ka on a,eitur siam tumin kitchen ka pan leha,Atei ka ngaihtuah chhuak zawk.

'Eng nge?” hello tih that pawh hi a awm lo...

'Hmeli,ka kuk dawn che...' ka ti that mai..

'I duh leh min kuk la,kan awmna a inhlat lutuk..' ngeiawm zetin a rawn ti zawrh zawrh..

'Nizan khan engmah hre lo niawm takin i awm vel a..' ka ti leh nghat..

'Engmah te chu hria e,i zep peih em a ka zep ka tih kha,engtin nge Mka chuan a tih a?” thawveng zetin a rawn ti zat zat..

'Amah zawt mai rawh,ka hriat lohin plan in lo siama,min phatsan aw...'

'I chhe lutuk...' ka thinrim hre lo ang hmakin a nui vak vak bawk..

'Tak takin ka fiamthu lo ania...' ka ti leh that..

'I fiamthu ka ti hleinem,pawi lo,Mka chu ka zawt mai aniang chu..chuan,zaninah Darian-a bia ang che...' ka rum hak mai..Engmah zawh ngai loin Mka nen an lo sawi dun leh vek tawh tih a chiang reng,ni lo se Darian-a ka be dawn tih a hre lul lo ang..

Darian-a ka call ang nge call lo ang tih ka ngaihtuah leh rih,nihnih tawp a call ka pick duh tawh lo a, a msg ka reply hek lo,tunah va bia ila Mk-a sawi ang kha a lo ni lo palh theih..A number ka en vang vang,ka rilru ka thlak leh hmain ka call ta nge nge..Ka inngaihtuah rei chuan ka call lo leh mai ang tih ka chiang..A ring reng,mahse a pick lo...Nia, a pick lo ang,mipa chapo leh luhlul lutuk khan engvang mahin a pick lo tawp ang..

Dawhkanah ka phone ka daha, ka insuk en turin Bathroom lam ka pan a,min rawn call na kha zat ka pick lo a, a msg engmah ka reply lo tih hre mah ila ka call a pick loh vang khan ka lunghnur lo thei chuang lo..

Kawngkhar inkhar thawm niawm tak ka hriaa,ka thil tih lai ka daha, thawm a awm leh takin tiin ka ngaithlaa,mahse engmah thawm a awm lo,inchunglam te kawngkhar khar dawt thawm hi engemaw chang chuan a hriat theih thina, chutiang chu ka hresual a ni maithei..Mahse,ka rilru a nuam lo,kawngkhar ka kalh leh kalh loh ka ngaihtuaha, ka chiang leh ta lo tlat bawk..

Slipper pawh bun loin Bathroom atangin ka chhuaka, mahse, Living room Sofa a hahdam hmel taka lo thu ka hmuh rualin ka ding chawt..A lo kal ka beisei lo satliah pawh ni loin ngaihtuah pawh ka ngaihtuah chhin lo hrim hrim zawk..

'Darian....' ka ti chhuak nghal sap mai..

Muangchangin a rawn thoa,ka hmuh lohna a la rei lo,mahse hnaah a hah lutuk nge ka hre lo,a lang pawr deuh fap,a sam a buk deuha,a hmuihmul pawh ka hmuh hnunhnun ber atang khan a la met lo niawm takin a awm kual raih..Jeans pawl duk leh T-shirt var a haa,a chungah Cotton jacket,chhing lam deuh a taksa phuar deuh a hak hnan bawk.A inhmeh zia sawifiah dan tha ber chu MIPA tih hian a kim vek..Ka ngaihtuahna duh loin ka lu ka thing nawk mai..

'Call i pick lo a...' ngawihreng nuam ti lo zetin ka ti leh a,ka tum aiin ka aw a chhuak mar tha..

'Um,ka pick chuan Phoneah kan sawi zo vek dawna..' a then suk.

'Uh...nia...' ka ti ve sap ringawt..

Min rawn pan hnaia,tawlh hnun ka tum zet nangin ka thulh leh,ka In a ni a, tlanchhiat chhan tur ka nei miah lo..Ka din ngaiin ka dinga, hlau lo niawm takin ka dak vah bawk..

A ding ta chut,ka hamhaih lek lek zawk,ka va hmuh tirh atang khan hmundang a la en eih lo..Ni lo..Lalpa,ka thawmhnaw hak ka hriatchhuah rualin atthlak zetin ka inkuangkuah ta ngawt,ka ngaihtuahna hrethiam tih hriat zetin a nui leh suk bawk..