MON HOMME- 20

Chapter- 20

Ka thil mamawh ber pawh la loin Room lam ka pan ta ngawt,ka rilru a buai vel vek,kha Jared-a ah khan eng nge thildang la awm cheu? Duati ka ngaihtuaha,biak ka duh,engemaw tal a hre mahna..Sana ka en a, Office kal tura insiam a hun tawh lutuk..Hmanhmawh zetin ka insiam sawk sawka,Libraryah bawk ka lut thla leha,ka thil mamawh ka zawng tha leha,a zawn rei ngai loin ka hmu nghal hlauh bawk..

'Eng nge?” Hello tih that pawh hi a awm thin lo..

'Khawnge i awm?” ka ti hlaka,ka bagah ka thil ken tur ka thun pah mawlh mawlh bawk.

'Ka insiam mek,min ngai ami?” a nui hak hak..Ka ner nak ringawt.

'Ka ngaih vang che ni loin biak duhna che ka neia,Lunch ka treat ang che...i hman dawn em?”

'Aaaa,vawiin hi High Court ka kal angai maitheia,ka lo hrilh leh zawk ang che,inhmuh chu ka chak over a..' a rawn ti zat zat..

'Ok..ok,min lo hrilh leh vat dawn nia..a pawimawh aw..' ka bag ka khai nawlh..

'Lutuk,mahse,i rai tihna mi?” a rawn ti leh hram..

'I va han ninawm tak,thutak pai teh..' ka ti hlar mai..

Nui hawk hawk chungin a daha,kei pawh ka nui ve var var tho,engtiklai mai pawh hian a zangkhai vah renga,thian nih a tlin em em bawk,mahse,ka rai leh rai loh min zawt anih kha..Ka period hun a hnai tawh,invenna kan hmang ngai miah lo chungin rai lam ka lo ngaihtuah miah lo..

Office ka thlen hnu feah Duati'n min rawn call a,hun a nei dawn tih a rawn sawia, ka thaw huai mai..Eng ber nge ka zawh ang ka hre lo nangin engemaw tal ka hriat belh theih ka ring ru deuh tlat lawi..

'Khawnge Boss hi?” Dama hnenah ka ti a,dar 11 a ri tawha, a lo la thleng lo..Nidangah dar 10 a pel anih pawn a pel tam ngai tlat lo.

'A chawl dawn,a nuam vak lo a..' a ti a,min en loin a hmaa Computer lam a en bawk.

'Anih chu,a va zia lo ve..Eng nge na a?” ka ti leha.

'A khua sik an tia..Annu in min rawn call a,biak duhna i nei mi?” min rawn en a..

'Aih,a lo kal loh vangin ka zawt mai mai che,lunch ka thiannu nen kan ei dawna, ka rei hret maithei aw..' ka ti leh a.

'A pawi lo,mahse vawiin chu ka birthday ania,min treat ang chu ka lo ti sin le..' a nui var var..

'Aaaa,ka hre miah lo,nimin khan ngatinge i sawi loh a?” ka ti ve thung..

'Nikumah pawh ka treat che a, I hrechhuak ve mai ang chu ka ti mawle..' a nui ta lo,a hmel thutak zet chu ka en a,kan inneih zan khan tiang hmel chiah hian ka hmu tawh bawk..

'Sorry...ka hriatrengna aiin hriatreng lohna a chak zawk tih i hria alawm..'

'Ngaihdam i ni e..mahse,naktukah min treat ang”

'Sure...' ka then sak..

Lunch eina hmun tur ka thlen hnu lawkah Duati a lo thleng ve nghal a,karkhat vel chauh kan inhmu lo a, mahse kum khat aia tam inhmu tawh lo ang hrimin a ri chel chul mai..

'Eng nge a? Han sawi la...' kan thil ei tur kan nghah laiin a ti a..

'Eeee,kha kha maw...engtin nge ka sawi tan ang ka hrethiam lo a..' ka thle bak mai.

'I van hahthlak tak,engthil tha lo nge niang tih ka ngaihtuah mek ania,ka awm i ti nuam lo..'

'Chutiang a ni lo..Puih ka ngai dawn..'

'Naah,ka tihtheih bak piahlam anih chuan min dil hlek suh..' a ti nghal hlar mai.Ka hna ka zawm hnu lawkah hian risk sang zet min laksak turin ka ngen lui tawha,kan la theihnghilh lo ve ve..

'Khatiang lam tho kha...'

'Noo...ka ti dawn tawh lo tih i hria alawm..' a ti nghal vat.

'Ka fiam che anih kha..tak takin thildang zawk,hmana Jared-a chungchang kha kim chang thei ang ber ka hre duh a..' ka ti ta nge nge..A hnar a tum dat mai..

'A tlangpui chu i hriat sa kha,mipui hriat bak kha thildanglam vak a awm lo..'

'Ka ring che alawm,ka sawi awmzia tak chu Medical test emaw Police lam kha tu nge kha buainaah khan inrawlh tih te..An mahni hriat dan a awm angem?”

'Um..awm ang,mahse ka hai chhuah leh vek angai anga, chumai bakah khatiang thil kha mipui hriat tura tlangzarh a ni ngai lo tih i hria anga,ka tan pawh a pawi thei tho bawk..tharthawh leh i tum tihna a ni em?” a mengphawk hra mai..

'Teuh lo..hriatchian ka duh mai mai mawle,hlauthawng suh..'a rilru tihnawm tumin ka nui lui var var bawk..

'Um,mahse,thil kal daih tawh a ni a, a ral titih tawha,i buaipui thar riau hi ka hlauthawng lo thei lo..' a ti leh halh,ka dem miah lo..Kei pawh hian engvangin nge ka buaipui chiam ka hre bik lo..Darian-a thil thup hriat tumin ka buai em em a, hriat ka mamawh miah loh thil a ni ve thei tho bawk..

Office ka let leh in Seni a lo phi buai viau,mitmeiin a chhan ka zawt a,min rawn din hnaiha,a thaw hlawp hlawp bawk..

'Dama a chhuak chiah,Boss a zual an rawn ti a' ka mengphawk hra mai..

'Eh...engtin nge awm a?”

'Tunah ICU ah an dah lut an ti a..Dama a nupuiin a lo calla,a tlanchhuak nghala,mahse keini chu kan kal ve thei chuang lo a..Hna hlir,enteh..tuna lo lut mek saw khawngaihin lo buaipui teh,ka hna a ni tih ka hre nangin ka be peih lo lutuk..' a ti zui duah,chhan pawh ka chhan hmain Toilet lam a pan nghal daih bawk..

Kawngkhar lam ka hawia,ka then sak mai..Kan Office a lo leng lut ngun tak,pa tawhkhirh em em mai a ni a, Seni nen hian an indawr ziaha,a kal hnuah Seni a ang nasa thin..

Nidang ang bawkin a khirh lehpek,Seni lah Toilet a awm hlen tum niawm takin a awm veng veng mai,Darkar chanve aia tam mah kan indawr chhungin a lo chhuak lo tluan parh..Toilet kawngkhar ka kik a,a kal tawh tih leh a lo chhuak thei tih ka hrilh a,a rawn hawng a,min ring lo niawm fahranin a bih kual hmasa te te..A awm lo tih a chian hnuah a lo chhuak ta chauh..

'I va han tawm thei ve,i taima ka ti..' ka then sak..

'Ka mood leh khapa biak kha a in mil lo,eee..Boss chu a khua a sik vak a,a pum a na bawk an ti..' a tih zawm leh zat..

'A van mak..Khawi damdawiinah nge an daha?” ka ti a, an dahna hmun a sawia,zanah haw pahin kan luh theih tho ka ringa,kal kual nghal ka duh..

Ka tlan loh ni anih avangin Driverin min thlaha,mahse inlamtir leh kher ka tum lo,bakah Seni'n Scooty a keng thoa,a rualin Damdawiin ka kal anga,haw na tur chu Taxi pawh a tam.Fur lai a ni a,khua a nuam lo thin viau.Office kan chhuahsan lai pawn a hmi seng seng,rain coat spare a lo pai hlauh,Darian-a hnenah Seni nen damdawiin kan kal tlang dawn tih msgin ka hrilh a,kan kalna chhan tur min zawt loin a rawn 'ok' ve mai bawk..Vawiin hi chu inzaini anih avangin a buai nileng ang tih ka chiang..Zanah pawh a lo haw hma dawn lo tih pawh ka hre sa vek tawh bawk.Darian-a nu erawh call in ka hrilh thung.

An lo awm thap,Dama'n min hmuh veleh min rawn pan hnaia,midang lo awm ve ten thutna min kian hlawm..Chanchin ka zawta,amah a harh tha tawha, mahse a chau hle niin a sawia,a natna ka zawta,Rannung seh a ni tih an sawia, mak ka ti viau..Mahse, ka awmhran tirh khan kan thawhpui pakhat,Pumna nasa lutuk,an beidawn titih na kha Rannung seh a ni tih an hrechhuak leh a,a damchhuak leh ta hlauh a..Khatiang nen khan a in ang turah ka ngai ve hmiah..

'Zampui,taxi lak mai i hreh em? Haw tlang nghal ka ngai dawn a..' Sen'in inthlahrun hmel takin min ti a.

'Hreh nang,ka lo tum sa alawm..' ka ti awlsam et.Tihtheih vak a awm lo bawk nen haw turin min ti a,ka hnial lem lo..

'Engmaw insawi?' rawn thut ve pahin Dama'n a rawn ti a.

'Haw dan tur mawle...'

'Eee,vawiin i tlan loh ni tak maw? Pawi lo,ka drop mai ang che,keipawh ka haw dawn lawm..' a ti nghal zat.

'Ngai lo,Taxi tam lutuk.A hrim hrimin i riak dawn lo mi?” ka ti a..Boss nen an inpawh zia kan hre vek.

'Dawn e, mahse inah chaw ei hmasak te ka duh a...'

'Ok,a that chu, i hman nghal ami?”

'Um,hman animai..mahse,i va hmanhmawh ve..' a ti a..

'Pasal nei ka nih hi,bakah mo thar..' ka nui a.A ner nak ringawt.

Step atangin ka chho thei ka ti a, mahse a tlan tlanga, kan kawt thleng min thlah ta law law,ka mangthaa,chanchin danglam a awm apiangin Groupa sawi zel turin ka chah bawk..A tlan liam hnuah ka lut ta chauh..

'Eng nge a an a?” ka nuin min hmuh veleh a lo ti nghal vat.

A awmdan tlangpui ka hrilha,inchung lamah thawmhnaw thlak turin ka chhohsana.Ka pa erawh chuan min be lem lo thung,mak ka ti chuang lo,Pa tawngduh lo em em mai a ni a,chhungkaw thil tul tak tak anih lem loh chuan fiamthu han thawha rik bawrh bawrh ang hi a neih awm pawh ka la hre lo.Mahse, a sual tihna erawh a ni chuang lo..Darian-a nen muk takin Sumdawnna chungchang an sawi dun fo a,pa fa ang ni loin Sumdawnna a indawr,mi hrang hlak an ang ka ti ru ziah thung.

Room kawngkhar ka hawn rualin Darian-a khuma lo thu mu ka hmu nghal zat,ka beisei lo bawk nen ka phu deuh zawk..Hmuhnawm tih hmel zetin Tv a thlir vung vunga, ka lut thawm pawh hreawmin a awm lo..

'I va haw hma ve..' a rawi hawi chhuak vut..

'I duh aiin ka haw hma tihna mi?” za lo zetin a then suk..

'Aih..chutiang lam ka sawi tum a ni lo...eng lo..' ka sawi zawh hmain ka banrekah a rawn mana,min pawt paha,ka zuk bawh titih..

'I sawi tum ka hria,sawi lo mai rawh...' a ti supa, chhan tumin ka ang hman ziau,mahse a hnui chhap deuh tap leh fawh nuam zetin a rawn khar ta zawk..

Ka kawr a rawn zena,mahse ka man bet ta zawk,thinrim niawm takin a rum nghut..Ka inlahranga, a mit thim deuh mak chu ka en a,a duh ka hria..

'A hun lo...tunah chuan intihfai ka mamawha,chuan Chawei pawh...'

'Thil engkim hunbi neih tir tum hi a.... 'a ti hluk....Ka nui hak mai..

'Chutiang a ni lo,ka ril a tam alawm..' ka ti a, a khabe ruh kual lian leh nalh zet ka chul kuai zai zai bawk.

'I ril a tama,keipawh a tam..mahse chaw lam a ni lo a...' a mit a de sawr sawr,ka lei ka chhuah khum zauh ringawt..

Thawhsan tumin ka inbengkang a, mahse min pawt hnai leha,min fawp leh vang vang phawt..Keipawn ka hnial lo,ka ngaia,ka thlahlel hlauh hluah tho..Ka sam ka bengah a zepa,hmuhnawm tih hmel zetin min en vung vung..Ka tum loh tawpin ka hmai a sa nghal hat hat thung.

'Ka intifai zuai ang aw..' zahzelah ka ti leh ta ngawt,a mitko a ti sang uk..

'Ok,Boss..'

'I sual e a..'

'Sual nang,nang aia min Control kual tu an awm hleinem..'

'Lawm tur nge thinrim tur?” ka ti nghat..

'Lawm la a that ka ring,Ola...i danglam alawm..' a ti chhuak sup..Ka insum hman lo,zah pawh ka zak peih tawh lo,ka kun hniama,a hmui ka zuk si de de..A rum hawk,duhthawh lutukin min rawn fawp let nghal zat...

Midangin chaw an lo la ei bik lo,kan vaiin kan ei rual vek,nidang ang bawkin tawng mang loin kan ei mawlh mawlh hlawma,ka awm tirh kha chuan hrehawm ka ti ve lek lek,ka khawsak dan nen a in ang lo lutuk,mahse thla a vei meuh chuan ka insiamrem chu a ni leh mai..Mahni a khawsak kha chuan engkim a awlsam veka,mahse chhungkua han nih takah chuan midang ngaihchan a lo ngaia,mahni thu thua khawsak ngawt theih a ni lo,ka awmdan ka siamrem anih si loh chuan ka pasala chhungte an insiamrem ngawt dawn hauh lo,a fintu zawk ka ni a, keimah ka insiamrem angai tih ka chianga,kan inneih hmaa ka thiante leh ka pi leh pu min hrilh tam ber a ni bawk.

'Eng in nge ilo haw?” kan pahniha room a kan awmlaiin a ti thut.

'Dama'n min rawn thlah a..' ngaihtuah mang loin ka ti liam puat..

'Tu in maw thlah che?” a ti nghut,ka en vat..mahse, Tv lam a lo thlir thung,a hriat loh tak tak vanga min zawt nge anih a min zawt nawn hrim hrim ka hre lo..

'Dama,ih..a haw dawn tho a, Taxi koh ai chuan min rawn...' a ban a vai zauh..

'Ok..a tha nih chu,sawi kual duah angai lo ania..'a ti leh ngut.

'I thinrim lo tak tak maw?” ka ti sepa, ka rilru a nuam lo ringawt bawk.

'Ahh,rim nang,ngatinge?” min rawn en ta nge nge.

'Ka..ka hre chiah lo..' ka tum loh tawpin ka ti bah nak mai.

'Anih chuan rim lo..' Tv lam bawk a en leha, mahse a mood a thlak leh vek tawh tih ka hre tho.

Hna khawih tur tlem ka hawn ka khawih leh a,min be loin Tv lam ngawt a en thung,darkar khat liamta kha chuan engmah daltu awm loin kan inpawh kha ania, tunah chuan eng nge anih ka hriat si loh in min dal tlat,ka melh zauha, a Tv enin a ti thinrim emaw tih mai turin biak a chakawm lo ngang mai bawk.

Ka hna khawih lai ka dah fela,hmai phih tumin Bathroomah ka lut a,ka chevel thawm ngaihven awm pawn a awm lo.A chhan hriat si lohin ka titau rilru deuh tlat bawk..

'I phone hi ka lo pick dawn em?” kawngkhar kik pahin a rawn ti a.

'Tu nge?”

'Duati...ka pick dawn nge dawn lo?”

'Lo pick la,nakinah ka be mai ang..' ka ti a, mahse ka thluak a vir zawk a ni ber.Ka ngaihtuah chian hmain ka chhuak fel der,mak tih hmel zetin min lo en a,ka pan hnai ruak..

'Ka lo bia ang...' tih pahin ka bana,min pek fel pawh nghak tha hman loin ka pawhthlaksak titih.

'Duat...nakinah ka lo bia ang che...' ka ti nghal zat.

'Um,mahse, i hre chak lo mi?”

'Nakinah,eee,naktukah ka lo kal zawk ang..' ka ti leh a..

'I tih dan dan..lawk,i va hlauhthawn hmel em em ve..'

'Bye..' ka off nghal hmak..Darian-an thil kal tawh ka buaipui tih a hriat ka duh bau lo..

Khumah ka phone ka thehthlaa,Bathroom pan tumin ka pen lehnghal zat,mahse ka hmaah tak Darian-a a rawn ding ta chut.Ka melh chho vat,hriatthiam har zetin min lo en chhuk ve run bawk.

'Eng nge a?” ka ti nghat.

'I sawi ang chu...'

'Eng chu maw ka sawi ang?” ka ti let ve thung.

'Duati ka biak i hlauh chhan kha mawle..' a ti hmuk,a mit dum fiah zet chuan ka ngiahtuahna a hmu tlang ang tih hlauin a mitah ka en let rei ngam lo..

'Hlau nang,ngatinge ka hlauh ang?” ngaihsam hmel fein ka dar ka tichhing ak bawk..Min en vung vung a,a bu nghuta, a kalsawn ta zawk..Ka thaw huai thung..

Rooma ka let leh chuan a lo muhil hman tawh,a chau ngang aniang ka chevel pawn a tiharh zo lo..Light off mai loin a hmelpa zet chu ka thlira,hahdam takin a muhila,a hnar sak sak bawk,ka rilruah inthiam lohna a rawn lut thut,engvangin nge ka pasal bulah zawt mai lo a ka chhui kual vel kher? Ka tidik lo hulhual...Mahse, engtin nge ka tih chuan ang? A tir phat atangin amah zawkin thudik chanve chauh min hrilh a, chuti anih si chuan keimaha ka zawn chhuah a tul tihna nimai..

Duati'n office a kal chilh a duh lo,keipawn ka tum tak tak hek lo..Hnaah kan buai viau nain Lunch ei tura rei deuh hlek chhuah ka mamawh tih Dama ka hrilha,nidang ang bawkin min hnial lo..An office thlang a Restaurant lian lo teah ka lo nghaka,a rawn thleng zui ve mai bawk..A kil lamah kan thu duna,ven thawn nei hmel a pu bawk..

'I hre thei ta em?” kun hnaih pahin ka ti a..A bu nghauh..

'Sawi vat the,hna kan buai a,let leh vat ka ngai ania...' keimah bawkin ka ti leh a..Sawi mai loin a hawikual leh rih.

'Thil ka zawt hmasa dawn che...' ka beisei lawk loh a ni nain ka bu nghat tho.

'Engvangin nge he thil hi i buaipui chiam chiam a?” a ti sapa,a mitmeng fing zetin ka ngaihtuahna hriat tum tih hriat takin min melh kar bawk.

'Niminah ka sawi tawh kha,engmah thil tha lo ka ti dawn lo..'

'Ka zawhna i chhang lo...' a ti let khauh..

'Naaa,eng nge i hriat tak thut a?” ka ti hlak mai.

'A chhan ka hre duh,chu zawng chu...'

'Ok...thil engemaw hriat thawi ka neia,chu erawh ka hrilh thei lo che..' ka ti ta nge nge.

'A tha lawm,eng nge i hriat thawi chu ka hre maithei,i pasal nen inzawmna nei thil anih vangin i phe buai tih ka hria,mahse, he thil hian i pasal tan a tha zawngin engmah a thlen dawn miah si lo lai hi ania ka buaina...' a ti ta duah..

Ka hmaa Computer Screenah eng nge inziak awm hmu miah loin ka en reng ringawt,ka bengah Duati thilsawi kha a ri nawn tlut tlut a,ka duh ber chhanna hmu lo mah ila ka tan chuan engkim a kawh a in ang vel vek..

'Kha thila Jared-a Doctor kha Darian-a hmelhriat tha tak a ni a,bakah khami zan khan Darian-a a awm ve tih sawi a awma,chu erawh chhui chhuah a ni ta miah lo a..A chhan hriat si lohin a tawp hmiah ka tihna anih chu,Darian-a lan ve theihna chi lam reng reng chu a tawp nghal vek..Tuman a hming an sawi nawn lo tihna ania,i pasal hian eng nge tel ve na a neih lam chu ka lo buaipui tur a ni loa,mahse zaah 50 in kha thil kha a hre ve a,an bulah a awm ve ngei bawk ang tih ka sawi ngam...' a ti anih kha...

'A that chu i tha maw?” ka hmai bula kut rawn hmeh rih pahin Dama'n a rawn ti a,ka thu mar nghal auh mai.

'Tha e,ngatinge?”

'I lo let tirh atang khan i thut ngaiin i thu char chara,i en ngai i en reng bawka..' ka dawhkanah a rawn thu a.

'Ka pum a nuam chiah lo a..' ka rilru a lo lang hmasa ber ka sawi ta ngawt.

'Ehe,i thil ei aniang..Restaurant satliah lutukah hian chawlh loh hram a tha asin..' a ti nghal vat.Chhang loin ka bu ringawt..

In ka thlenin Darian-a a lo la haw lo,ka haw khalh tum a tam zawk hrim hrim,ka mood chhe lutuk tih ziawm nan room ka tifai chiam a,chhuat ka nawt nghek bawk.Ka zia hawk..Khumah thu mu chungin Tv ka en a,mahse a hmuhnawm leh hmuhnawm loh pawh ka hre chuang der lo..Kawngkhar inhawng ri ka hriat rualin ka hawi vat,Darian-a a rawn lut a,Sofaah a bag a thleh thlaa,a mood a fuh lem lo a nih hmel..Nidang ang lo takin biak mai na tur ka hre miah lo bawk..

'Vawiinah khawiah nge i kal?” min rawn pan hnaih pahin a ti hmuk,zu rim ka hriat rualin ka ner nak mai..

'Khawiah nge ka kal ang? Officeah bak..'

'Duati hmu tura i kal na kha ania ka tih...” ka nghing lawih thei..Engtin nge a hriat ka hre lo..

'Lunch ei turin kan chhuak dun a...' ka hlauhthawnna thup ka tum teh nangin ka aw a khur titih.

'I thiltihlai hi bansan rawh,anih loh chuan pawn i chhuah ka phal dawn lo ania..' ka hresual emaw tiin ka melh vat,mahse a hmel thutak run mai ka hmuh rualin ka hresual lo tih ka chiang nghal vek..

'Eng...eng nge ka tih a?” harsa zetin ka chil ka lem thei hram.

'I thil tih pawh hre lo khawpin i thluak a buai tihna mi?” a ner nawk bawk..

'Darian...engmah thil dik lo ka ti lo..'

'Anih chuan a that chu,bansan ang che,ka sawi nawn dawn lo ania..' a ti leh hmuk.

'Thil zawh che ka duh..' ka huaisenna zawng zawng sawmkhawmin ka ti chhuak halh.

'Sawi rawh...' a ti nghut..

'Jared-a te chungchang i ziahna kha ka hmu a...'

'Ngawi rawh,a hming kha vawikhatmah sawi lang tawh suh..' a ti thawt,ka phu zawk bawk.

'Mahse,..'

'Ola...a tawk ka tih kha..' kawngkhar a pana,na zetin a rawn nam khar bur bawk.

Ka mu meng kar mai,chawei kham hnuah Darian-a a kalchhuaka,a kalna tur engmah a sawi lo..A lo haw hlima kan inbiak bak vawikhatmah kan inbe leh hek lo..Reilote chhungin kan awmdan a inthlak nghal hlawk..Engtin nge kha thil kha ka buaipui tih a hriat ka hre lo,chumai bakah engvangin nge ka buaipui tih a hriat ruala a thinrim em em kher?

'Hey...min va thawng ve...' Office ka luh rualin Seni'n a lo ti nghal chiam..Ka ding chawt bawk..

'Eng nge a? Min ti hlau alawm mawle..' ka ti a,ka ner khum nak mai.Ka Dawhkan ka pana,Chair ka pawtchhuaka, ka thu thla nghal hnak.

'I tum tak tak em?” a ti leh hliai,a sawi engmah ka hrethiam lo..

'Eng maw?” ka phone en pahin ka ti a..

'Tun thla bak chu i bang tawh dawn tih kha mawle..A bak eng nge ni vak ang?” ka melh vat..A hresual anih ringin ka melh reng..

Darian...engthil nge maw a tih tak le???