MON HOMME-22

Chapter- 22

'Ka duh lo a tih kha i hre na nge?” Dama hnenah a ti nghuta,a then suk bawk.Mahse, a nuihzat vanga nui a ni lo tih ka chiang ngang mai thung.

'Darian...' ka ti chhuak halh mai..

Min rawn melh zawk,a hmel hlauhawm lutuk ka hmuh rualin ka ip chawih,Dama lam bawk a en lehnghala,kan Dinna bul kawnga kal ho thil awmzia hriat tumin an rawn ding hnai tuau tuau bawk.

'Kal ang...' ka ti leh sepa,mahse a che chuang lo.

Dama thei leh thei lo a rawn tho taih taih chu a en run a,a hmelah pawisak nei lo hmel a lang chiang em em bawk.

'Kal ang le...' a ti nghuta, ka chhan let pawh nghak loin a kal nghal vut,a bawp sei zeta a pen pawk pawk chu ka uma,a kal chak bawk nen ka tlan deuh dat dat mai,mahse min nghah tum awm pawn a awm chuang lo.

Motor bulah a lo dinga, ka thlen veleh Motor kawngkhar min hawnsaka,ka luh fel rualin a rawn nem khar chawrh bawk.Ka thu ngil at mai,ka thiam lohna engmah a awm lo tih ka hre chung pawn ka chhungrilah hlauhna in min mana,ka khur ru dar dar mai.

A rawn thu luta,Motor a starta,a dawkchhuak nghal zawk a ni ber,chak lutuka tlan hi ka hlau thin tih a hriaa,nidangah chuan tiang hian a tlan ngai lo,mahse tunah kher hi chuan ka hlau tih sawi lan na hun a

ni lo tih ka hria,nghet zetin ka thutna seat ka vuana,ka mit ka chhing tlat bawk.

'Kan thleng...' a ti nghut..

Ka mengchhuak a,kan In kawtah kan lo awm tawh.Kawng tluanin kan inbe eih lo.Ka melh zawka,a lo inpet ruh fun mai,biak a huphurhawm ngawih ngawih.Kawngkhar ka hawng a,ka chhuka, Gate a lut mai loin Gate ka vuana,Darian-a erawh inhnuai lamah a tlan thla thung,hlauhna vanga ka khup sai dar dar mai tihreh tumin thawk ka la vang vang a,awmzia erawh a awm tam hlei lo a.

Vuli chauh a lo awma,hmuhnawm tih hmel zetin Tv a lo en dauh dauh,ka lut thawm pawh a hre lo.Kawngkhar a inkhar ri dawta,Kawngkhar thawm a hriat veleh Vuli a rawn hawi chhuak ta chauh,min en zawk,ka hnung lam a en leh a,inthiam lo hmel deuhin a nui seng bawk.

'In lo haw tih ka hre miah lo a...' thawh chhuah pahin a ti a.

'In i nghaka,thawm ngaihven tha tawh rawh..'Darian-a tawngkam hriatnuam lo zet ka hriat rualin ka mit ka chhing sawk ringawt.Nuam lo tih hmel zeta Vuli ding chu a rilru tihnawm nan ka nuih lui var var bawk.

'Ka han inthlak lawk ange,chaw in ei tawh em?” zangkhai takin ka ti a,a bu nghauh..Darian-a Room lama pana Stepa a pen chho pawk pawk chu ka melh zauha,a mood fuh lo mahse Vuli lehzel khatianga a ti kha tul ka ti lo bur.

'U Zampui..' ka hawi let leh rih.

'Um..eng nge?” ka ti a.

'U Darian-a kha chaw a ei ve nghal em?” a ti a,a ti dak mai.

'Aih,kei chu ka kalna a hrana,mahse lo siam duh suh,ka rawn tihsak mai ang,Inbual hmasak a duh ang' ka ti a,diktak chuan a ei leh ei loh ka hre bik miah lo.

Room kawngkhar ka hawnga,a lo ruak hiau..Darian-a thawmhnaw chhuatah a lo awma,a pheikhawk pawh a kalsan tawp bawk,a awmna zawn buai ngai loin a inbual tih ka hrethei mai bawk.Ka inthlak sawk sawka,thlasik la intan chiah lo mahse boruak a vawt lam lek lek tawh.Pyjama zangkhai tak leh T-shirt lian lam ka haa,ka tihdan thin ang bawkin ka Bra ka hlip daih bawk.Mut dawn hnaih,midang fin leh tur ka nih lem loh chuan ka ha ngai mang lo.A thawmhnaw kalsan ho balbawmah ka dah luta,a pheikhawk a bawmah ka dah lut bawk,a thawmhnaw hak tur ka dahchhuah saka,a tlangpuiin a thawmhnaw hak hi a ha nawn meuh lo.Hna kalnaa a hak ngat phei chu suk lohin a ha nawn ngai lo.

Zing lama ka insuk ho thleh fel sain Sofaah Vuli'n a lo dah vek,ka thliar hranga,mahse, hahdam takin ka awm thei der lo,engemaw tha lo tak thleng tur ang maiin ka tang teuh reng a,keimah leh keimah hahdam turin ka inhrilh thul..Awmzia a awm bau lo.

Bathroom kawngkhar a ri rak,ka hawilet a,Boxer nen chauh a rawn chhuaka,Towelin a lu a rawn hru chhuak mawlh mawlh bawk,nichin ai kha chuan a mood a zia hmel ta deuh,ka thaw huai mai.

'Chaw i ei nghal duh em?” zangkhai vahin ka ti a.

'Ka ei tawh..'

'Maw?”

'Ka ei tawh' a ti leh hmuk.

'Khaw nge i ei a?”

'Engkim hriat tum lo teh' rang zetin ka en a.

'Sorry...' ka ti sep ringawt.

'Engvangin nge Dawt min hrilh a?” nelawmna pakhatmah tel loin a ti leh hmuk.

'Eng...enge dawt ka hrilh che a?” a sawi awmzia ka man mai lo.

'In thian hoah engtiklaiin nge kha mihring kha a lo tel ve a?” a au titih,ka beisei lo bawk nen ka phu zawk.

'Tu? Dama maw?” harsa ti ru zetin ka chil ka lem thei hram.

'Dama..Dama...' a thutna bul a beng dawt.

'A tel lo...'

'Oh...a va ropui ve,anih chuan ka hnek thluk kha midang aniang a?” ngeiawm lutukin a nui hawk.

'Ni lo,an thian dangte nen an lo kal ve a,kan kal ho lo..Bakah..' a ban a vai zauh.

'Sawifiah duh suh..' a ti hmuk,a tho a,Kawngkhar a pana,mahse ka che phat,Kawngkhar ka thlen khalha,ka ngheng hmak..

'Sawi fiah ka duh,khatiang thil dik lo a in puh ka duh lo' a mitah tak ka en lui ngar bawk.

'Engmah sawi angai lo,mahse i bulah ka hmu leh anih chuan....' sawi zo loin a ngawi leh daih.

'I hmu leh anih chuan engmaw? Min that ang tihna mi?”

'Maithei,chu aia nasa pawh' a then suk,ka tim sawk thung.Mahse, ka huaisenna zawng zawng sawmkhawmin a mitah tak ka en a,ka hawisawn duh lo.

'Kalsawn rawh..'

'Aih' luhlul hmel zetin ka ti hmak.

'I thianpa duh tak kha ruh tliak a nei em tih te i zawt duh lo mi?” thil tenawm lutuk chanchin sawi ang maiin a ner nawk bawk.

'Ka hna ka ban hnu khan zanin kha ka hmuh lehna hmasa ber,biak pawh ka be ngai lo,bakah zanin pawh khan tihpalh thil a inhmu kan ni a...' ka thaw ham ham mai.

'A ropui hle mai,anih chuan heihi eng nge?” ka hmai bulah a phone a rawn lek hnaia..Ka meng zau kawk mai,Dama nen kan thu duna,lu insi deuhthawin phone kan en dun bawk..LALPA,engtin nge he thil hi a hnenah a thlen theih? Darian-a ka en a,a hmelpa zet leh thinrimna vanga dur khup mai chuan min ti khur nghal dar dar mai.

'Hei hi...engtin nge i hnenah a lo thlen theih?” ka ti bah nak,ka tum loh tawpin ka aw a khur dar dar zui bawk.

'A pawimawh miah lo...Mahse, tun chiah ka sawi ang,ka nupui hian mipa dang a lo mamawh anih pawhin mi hmuh loh laiin ni se,a chhanchu mi mai mai nupui ni loin ka nupui a ni a,mualpho hi ka duh miah lo,ka hnung lamah ka nupuiin ngaihzawng a nei tih sawia min nuihzat ka duh lo bur bawk.Fimkhur ang che u..' a ti ta duah,sawi leh mai tur hre loin ka din ngaiin ka ding mar at a,ka hrawk a ro halh bawk.

'Pawmsawn kher i phut te anih loh chuan?” amah bawkin a ti leh nghuta,kawngkhar a kawk zauh bawk.

Tim daiin ka tawlhsawn a,Kawnghar a pawt hawnga, dimtein a rawn nem khar leha,ka ruak nghal ngawih ngawihin ka hre bawk.

Khum ka pana,ka thil tihlai tihzawm tumna pawh ka nei lo,ka mu ta zawk,Darian-a thinrim nachhan kha Dama'n min pawh luih vang emaw ka ti kha ania,mahse a lo ni miah si lo.Nikhat lekah kan kar a hla a,engkim a inthlak danglam ta vek.Pen thawm ka hriat rualin ka mit ka chhing nghal hmiah,muhil tawhah min ngai se ka duh ber.A tei vel thawm ka ngaithla kar,khum bulah a pen thawm a tawp chata, chet pawh ka che ngam lo.,mak takin ka delhna lam ka taksa a kham nghal ut ut bawk.

'Muthilh der kher a tul lo ania,ka rawn mut i hlau anih chuan ka mu dawn lo,Room hranah ka awm ang' a ti hmuk,mahse, ka che chuang lo,a thilsawiin min thawn nat zia tihlan ka duh lo bur.

Khumah ka thu a,Light ka off vek bawk,ka ngaihtuahna buai nuaih nuaih tihfim tumin ka mit ka chhing a, mahse engmah ka ngaihtuah fel thei chuang lo.Engtin nge kha photo kha a hnen a thlen ngaihtuah ngaihna ka la hre chuang hek lo.Duati emaw Atei zawk pawh zawh ka tum zeta, mahse ka thulh leh,engmah tih theih an neih ka ring chuang lo.Tul lo tawpah kan nupa kar buai ka hrilh hria a ni lek ang tih ka hlau zawk.

Ka harh leh chuan khua a lo eng at tawh,thawm ngaithlain ka mut ngaiin ka mu vang vang,mahse thawm engmah awm loin a reh thiap.Ka thuchhuaka,Darian-a sulhnu engmah hmuh tur a awm lo.

Ka inphihfai hnuah inhnuaiah ka chhuk thlaa,Vuli zai rat rat thawm bak engmah thawm dang a awm lo,kan nula pahnih hi langa lo kal a ni a,Pakhat zawk phei chu kumin bak chu Singapore lama awm tum a ni bawk.Zuala tih loh Driver pakhat zawk pawh langa lo kal ve bawk a ni a, tlaiah Darian-an a hruai chhuak emaw anih loh chuan dar 5 velah a haw mai zel.

Kitchenah ka lut pheia,a tih thin dan pangngaiin a beng lehlam ear phone a a lo hnawh lehpek.Fridge ka hawnga, tui ka la chhuaka,Stool ka pana,a rawn inhera,min hmu thuta,a phu zuk bawk.

'Awi,ka phu nasa lutuk..I lo luh lai ka hre lo reng reng' a ti nghal hliai.

'Thawm ka dim alawm,tak takin i thil ngaihthlak kha a ring lutuk aniang,keipawn ka hrethei ania..' ka ti a,ka then sak,a chetdan engkim a felfaia,hauh ngaiin a khawsak ngai pawh ka hre lo,mahse, he thilah kher hi chuan ka nuin a khak ngun viau.

'Lehlam chauh ka vuaha,thingpui i duh em?” a ti a, a beng atangin a earphone a la thla ta tho.

'Duh lo mai,Darian-a hi a chhuak tawh em?” ka ti a.

'Um,chhuak tawh, nizanah i mu tha lo a tia, i thawh hunah lo hrilh tur chein min ti a, chuan chaw pawh pawn lamah a ei dawn a..' a ti zat zat,ka bu nghat ringawt.

'Enteh,u Darian-a kha a mak tawp,zingah khan Zuala a vin vak a,nizan khan min hau bawk sia..' a ti leh niah niah.

'Hna lamah engemaw problem a nei a, chuvangin a thin a chhe deuh anih kha' ka ti a, ka thle bak.

'Um,nia..ka awm tirh atangin min hauh ka hriat vawikhatna,Jared-a hi chuan min hau fo a, u Ruth-i pawn min hau zeuh zeuha,mahse u Darian-a hi chuan min hau ngai miah lo a,aaa.Min be vak ngai lo zawk' a ti leh duah.

Nilengin a lo let ta miah lo,tihtur hre loin Library bawk ka bel leh ta nge nge,Chairah ka thu tawm kaka,Lehkhabu ka chhiar a,ka beisei loh zetin ka chhiar tui ta zek.

Ka phone riin ka thil chhiar mood a ka cheng veng veng a la peng ta hlauh,ka bana,min rawn call tu ka en a,number ringawt.Ka lehkhabu chhiar lai ka chhinchhiah leh te te hnuah ka pick ta chauh.

'Hello..'

'Zampui,keimah Seni..' a aw zangkhai zet ka hriat rualin ka then sak mai.

'Eh,number thar i lo nei lehpek tawh law?” ka ti a.

'Nia,kan zinna lamah Airtel hi a thawk lo thina,chuvang mawle..eng nge i tih a?” a rawn ti leh zat zat.

'Inah ka awm,enge min lo call chhan te chu han sawi la...'

'Ka number thar hi ka lo hrilh duh che a'

'Um..i fel e' ka nui hak hak mai.

'Kei te chu ka fel sa reng alawm' a nui ve a.

'Dik chiah,mahse min lo tlawh duh miah lo a.Chaw lo ei la'

'I chhungte ka zah e a' a ti ve thung.

'An awm lo,ka nu leh ka pa an zin alawm,chuti ni lose ka sawm ngam nang che,Mo zak thei lo nih ka duh hleinem' ka nui leh hak..

'I va han chhe tak,tak takin ka chak tawp,naktuk tlaiah a rem chuan ka lo ei ang..Kan pa nen aw'

'Tehreng mai' ka ti a,a bialpa hi kan thawh ho lai khan ka hre tawha, palian vak lo,sa nghet lam a ni a,a fel viau bawk.

'Ka dah dawn,eee..Dama hi nizanah an insual aniang,a hmui a vung veka' zawi tein a rawn ti sa sa..Ka tang nghal teuh ringawt.

'A va zia lo,a nat hmel viau em?” pangngai takin ka ti thei hram,ka hmel a hmu thei lo ka lawmzia chu pui tak a ni ringawt.

'Nat hmel ve tho,Mask a hmanga, ka en luih saka..' a nui kar kar mai.

'A nih chu mawle,lo dam rawh se' ka ti leh a..

'A rui nawi in ngam loh a tawng tih hriat reng..oh...a lo kal,ka dah..' chhan pawh ka chhan let hmain a off zui nghal daih bawk.

Ka thutna chair hnunglam ka nghenga,nizana thil thleng a mal malin ka ngaihtuah let a,Dama thiante kha tumah ka hriat ngai anni lo vek,bakah kan thut dun lai khan tuman thla an lak pawh ka hre lo,mahse, Darian-a photo min en tirah kha chuan kan pahnih lak tum ngar ngar tu an awm tih a chiang em em lawi.Ka thiante zinga mi in khatiang an ti dawn lo tih ka chiang.Dama thiante lahin an tih ka ring hek lo,bakah thla lo la dun tehreng pawh nise tuman Darian-a an thawn dawn lo.Huizz,engthil nge maw thleng ta hi le a?

Lehkhabu inremna chhuar chunglam ka melh a,tlema thawl deuh bikin ka mit a la ta chat,ka tho sawk sawka,Leihlawn ka dawha,ka lawn chho a,hmanni khan helaiah hian Darian-a note bu kha ka hmu a,mahse ka lasawn lo.Lehkhabu ka la thlaa,ka bih a,ka thilzawn a awm miah lo.Ka hmuhna ka hai emaw tiin Lehkhabu dang pahnih ka lak thlak belh leha,mahse a awm chuang lo.Tu nge la ta ang? Ni tak,Darian-a hnenah ka la tih ka hrilh leh si,a dahsawn tih a chiang,a inziak kha chhiar pawh ka chhiar zo ta lo kha ania..

Ka phone riin ka ngaihtuahna atangin min ti harh zawk,engchen nge leihlawnah ka din hman pawh ka hre lo,ka lehkhabu ken ka dah a,ka chhuka,ka phone ka laa,Atei.

'Aw, thiannu...'

'Darling,nizanah i pasal khan hmuhnawm a chhuah ami a?” ka mengphar awk..

'Tu nge hrilh che a?”

'Awi, tak tak ami a?” a rawn ti nghal hliai.

'Um,mahse hre awm takin i lo sawi bawk sia' ka ti hlak.

'Ka hria alawm,kan kalna kha ka thiannu te ta tho ania,an hmu che u a' a rawn ti leha,nidawn tak.An dawra inhmuhkhawm tum kan nia,aman hmundang a duh vanga a thiante Hotelah kal kan nih tak kha a.

'Dama mawle,a rui nawi khan min Drop talh a tum a' ka ti ta sap.

'A va han ho e aw,tha taka sawi mai awm..Hm,i pasal hi chu a pa ve bawk atin ni' a nui hak mai.

'Sawi lo teha,kan inhauh phah alawm mawle' ka ti sap.

'Maw? Awi,a va zia lo tak..A rui em bawk anih kha mawle' pawi tih hmel zetin a ti vang vang.

'Nia,mahse a tha leh mai ang,a khawih na viau em pawh ka hre lo' ka ti leh a.

'I zawt lo mi?”

'Ka be lo reng reng'

'Be ta che,i thianpa ania.Bakah a lo na viau thei asin'

'Um,nia tiraw' ka ti sap ringawt.Mahse, biak tumna ka nei lem lo,Darian-a nen kan inhauh phaha,bakah a chetdan kha a mawi lo lutuk bawk nen biak chakna ka nei lo hrim hrim.

Sana ka en zauh,dar 8 a ri tawh,Darian-a a lo la haw ta lo cheu,ka pum a ri raih raiha,ka ril tam zia ka hrechhuak chiah bawk.Zingah khan engmah tihtham ka ei lo a, chhunah lah engmah ka ei hek lo.Hmundangah chaw a ei dawn tih engmah a rawn sawi bawk si lo nen ei san ngawt duh loin ka nghak ta zawk.

Thu mu chungin Tv ka ena,en tur ber hre loin ka hmet kual sek,Kawngkhar inkhar ri niawm tak ka hriat rualin ka thu mar a,Inhnuai lamah vek Motor dahna a awm avangin an lo haw leh haw loh hriat mai theih a ni thin lo.Rei vak loah Room pawnah pen thawm a rawn ri a,a lo haw ngei tih a chiang.Engtia lo hmachhawn tur nge ka hre mai lo pek.

Kawngkhar a rawn inhawnga,a hmel ka hmuh rualin zu a in tih ka hrethei nghal mai,ka ner ru nak bawk.Sofaah a bag a thlehthlaa,sawi mai tur ka hre lo.

'Vawiinah khawiah nge i kal?” amah zawkin a ti hmuk.Sofaah chauh hmel zetin a thu thla hnawk bawk.

'Khawiahmah..ngatinge?”

'Zawhna satliah,Chuan,khawiah nge ka Note bu i dah?” min rawn en a.A mitmeng hlauhawm lutuk chu ka en tha ngam lo.

'Eng note bu?”

'Zawhna hi chhanna hmuh hmain zawhna bawkin a let ziah mai..' a ti nghut,hnunglam a ngheng chawrh a.Chunglam a melh vung vung bawk.

'Sorry..i inbual hmasa dawn nge chaw kan ei phawt dawn?” thildang sawi tumin ka ti a.

'Ka ei tawh..'

'Oh..' ka ti sap ringawt.

'Nupui tha ber ang maiin min lo nghak tihna mi?' a nui hawk,a nui riah tielna a lang chiang ngang mai bawk.

'Darian,nizan chungchang kha...'

'Engmah ka ngaithla peih lo..Ka sawi ang khan fimkhur ula a tawk mai' a ti hmuk,a thu mara min rawn en a,a hmelpa zetah chuan pawisak nei miah lo hmel a lang thei bawk.

'Engmah fimkhur ngaihna a awm lo a,i thil hmuh kha a mak ka ti zawk,chuan...'

'A tawk,khapa hming kha ka hriatah sawi miah suh..Min tih thinrim hi a nuam lo thei viau tih i hriat kha' a ti leh duah. Mahse, mak takin ka thinrim ve ta phat,thawklehkhatah ka hlauhna a kiang duak bawk.

'Eng nge ka tih dik loh a? Engmah i ngaithla duh lo a..Eng nge ka tih dik loh sawi rawh' ka chhan let dan teh thut chu a beisei lawk lo tih a awm danah ka hre thei.

'Engmah sawi fiahna ka mamawh lo...' a ti nghut.

'A tha,anih chuan keipawn engmah ka tisual bik lo..'

'Min nawr lui miah suh..'

'Ka nawrlui lo che..'

'Ola..'

'Ka duh duh ka ti anga, nangpawn i duh duh ti bawk la,min ring ngai miah lo tu bulah that chhuah ka tum buai peih tawh lo..' ka ti ta duah,ka tho a..Kawngkhar ka pan a,mahse min thlen khalh hman ta tho.

'Khawiah nge kal i tum?” min melh chhuk run bawk.

'Ka duh duh naah..' ka ti hmak,diktak chuan kalna tur ka hre miah lo zawk.

'I Bialpa nen nuamchen turin ka thlah zalen ang che maw? Huh..' a ner nawk..

'Ka hria alawm,min thlah zalen lo ang..I thian tha ber pawh i hmeichhe Hmangaih thin a tih nat avangin mualpho thei ang berin i lan tir duh a ni lawmni? Jared-a kha i that,nangman i that”

'Eng maw i sawi?” a ti sup..A hriat loh tak tak vanga min zawt a ni lo tih a hmelah a lang vek.

Ka thilsawi ka ngaihtuah let a,ka hmui ka hup ta ngawt,mahse ka sawi zo vek tawh.Engmah awmzia a awm tawh lo..

'Ola...sawi nawn leh teh..' a tawng ring lo,mahse min ngen lo a, Thupek a ni tih hre tur khawpin a ring tawk tho.

'Ka..ka...' ka tawngchhuak hleithei lo..

A che thut,ka hrawkah a rawn rek a..A mitmeng a ruai maiah chuan min thah mai pawi a ti dawn miah lo tih a lang thei vek..