MON HOMME- 24

Chapter- 24

'Ka lo lut thei em?” kawngkhar lam atangin Mipa awin a rawn ti a, ka hawiphei vat,nui var var chungin Ruatfela a lo ding vang mai.

'Lo lut thei chiang e' nui chungin ka ti ve a,a hmel nelawm zetah chuan nidang ang lo takin thutak hmel a pu ve tlat bawk.

Ka hma zawna Chairah a rawn thu thlaa,a kut a elh ri pap pap bawk,engmah sawi loin a hawi kual leh rih.Ka Office zau lem lo tak mai chu ka thlir kual thuak,ka Dawhkan leh Chair bakah Lehkhabu dahna chhuar ,lian vak lo pakhat a awm tela,chu zawng chu.Mahse, ka mamawhna nen a inmil tawk chiaha,hei aia lian a tulna a awm lo.Bakah a rualin inleng pali lai pawh an thu theia,a tawk reng.

'Zanin Meeting kha i kal thei dawn em?” ka ti a,amah en loin ka hmaa Paper awm ho ka en daih bawk.

'Kal thei ang,i kal dawn lo mi?”

'Ka hre mai lo,diktak chuan nizanah a khua a sik leh a..' ka ner nak bawk.

'I entir ta em?”

'Tlaiah hian kan kal dawna, chuvang ania ka hman ka rin loh..Mahse, kan sawi tur kha thil tangkai lutuk ni pawn ka hre lo,tu nge hruai i duh ang?” ka tih zawm zat.

'Ka hre chuang nang,Zama pawh a awma,mahse...' a sawi zawh hmain ka nui hak mai.

'Ok..ok,Zama pawh a awm a,Zama bul chiah dawhkanah khan Mapuii dawhkan a awm bawka..'

'I va han nghal tak..'

'Ka nghal hleinem,i hruai duh zawk ka hresa renga' a nui ve ta nge nge.

Dar 3ah Office ka chhuahsana,kan Office atangin kan Doctor hmuh tur awmna hi kein minute 10 vel kal a ni a,Motor hunna buaithlak nen ke a kal mai a awlsam zawk.Kal pahin kan nula ka phone a, an thleng fel tawh tih min rawn hrilha,ka thaw huai mai.

Doctor lo nghahna tur room ka thlen chhoh veleh ka hawi kuala,ka zawn ka hmuh takah chuan ka thaw nghal hak mai,pan phei mai loin ka thlir leh te te.A sam buang lam lek lek,kir chiat leh a hmai tung lam deuh te,a pa hnar ang maia hnar nalh a neia,a mitmeng lian kel kawl leh mithmul sei er nalh zet pawh a pa atanga a chhawm bawk,min chhunna awm ve chu a vun ngo fai par chauh a ni maiin ka hria.Ka mitah hian midang te ang bawkin ka fanu aia hmeichhe naupang hmeltha an awm lo,ka khawvel a ni a, ka damchhan chu amah chauh a ni bawk.

A bula naupang dang chevel chu hmuhnawm tih hmel takin a thlir deuh deuha,vawitamtak chunglam ka lo dem tawh thina,tunah pawh ka dem leh ta nge nge,engvangin nge ka fanu hi a tawng ve theih loh? Mi te pawn thla sarihah an hring ve tho,nau tha leh pangngai tak anni leh mai,mahse ka fanu,Ida Lalpekhlui erawh a tawng ve thei lo.Ka lam a rawn hawia,min hmuh rualin a ban a rawn vaia,a nui ver ver bawk.Ka mittui rawn tla tur duh loin ka khap sak sak mai.

Hritlang khawsik satliah a lo ni a,mahse enkawl uluk turin min chah ngun viau tho,Sik leh sa inthen hun lai anih avangin natna a tam em ema,Ida-i ngat phei hi chu natna engpawh,tlang hrileng zawng zawng a kai ve zel ti ila a dik ber,mahse na chhia leh bet chawt khawp erawh a ni ngai lo hlauh zel thung.

Ida-i muthilh hnuah Ruatfela ka call a,meeting chungchang kan sawi duna,ka rinlawk ang chiahin thil pawimawh engmah a awm lem lo.Khum lam ka pana,ka fanu muhil hmel chu ka en a,tun atangin a tihmawh em em a,a rilru a liana,a duhzawng tawh chu neih tumin a bei ngat ngat zel bawk.A pianhlima ka hmuh tura an rawm pawm khan engtikahmah ka nun atangin Darian Malsawmtluanga ka paihchhuak thei dawn lo tih ka pawm nghal thlap bawk.

A chalah ka fawh saka,ka mu ve a,chunglam ka melh vang vang bawk.Ka mit ka chhinga, ka mit ka chhin rualin angai te bawkin ka mitthlaah Darian-a hmel a lo lang lehnghal zat.Kan inthen atangin kum 5 dawn a liam tawh.Eng nge a tihzui taka engtin nge a khawsak zui engmah ka hre lo,ka duh phawt chuan minute tlemte chhungin ka hre thei ang tih ka chiang,mahse hriat belh ka duh lo,ka duh ber chu a tawngkam na tak leh min huatna nena min enna mitmeng hlauhawm tak te kha anni zawk.Khang thil te khan hmalam pan turin min nawr kala,mihring pangngai ni a ka nun pangngai nei leh tura Fight turin min pui zawk tlat.

'Darian,engmah ka ti lo...engvangin nge ka tih ang?”

'I ti lova, mahse Ambie-a hnenah engtin nge a thlen theih?”

'Ka hre lo,mahse ka tih a ni lo..'

'Ok..i tih a ni lo..a tha' a nui nghek,mahse nuihzat vanga nui niloin thinrim lutuk vanga nui a ni zawk.

Engkim mai a thleng ta vut vut,mumang ang ruai nimaiin ka hre bawk anih kha,ka pu Fapa upa berin min rawn hruaia,tu nge lo va call ka hre lo,zing kara hlim taka ka nuihna hmun atang ngei khan zanah hnawhchhuah ka ni ta thung.

Ka thuchhuak ta nge nge,kha thil pawi lutuk kha engtin nge ka tih anga a chhuah theih ka la hrethiam chuang miah lo,ka lehkhabu turah khan Darian-a nen kan nun dan tlem chu ka thailang ngei,mahse chu pawh nupa inkar a thleng thin satliah ang chauh a ni bawk.

'Darian-a tan a pawi hle ang,kha lehchen an lo thup tawh kha a puakkeh ta thut a.' ka pu fapain a ti a,mahse ka piin ka hriat hlauin zawitein a khak nghal vat,ka hriat laiin vawikhatmah Darian-a chungchang sawichhuah a ni nawn leh ta lo.

Thla engemawzat chhung kha mi a ang maiin ka khawsa zuia,nau ka pai tih pawh ka theihnghilh titih bawk,mumal ka nei lo a, keimahin Roomah ka inkhung ngawt ngawta,tumah ka hmu peih lo a,engmah ka ei chak hek lo,Social media lam hrim hrim ka en peih lo a,khawvel nen kan inthlunzawm theihna lam engmah ka duh lo vek,mahse ka chhungte mai bakah ka thiante ka tan an awmrenga,thiantha hlutzia ka hmuchiang em em bawk.Anni awm lo se chuan hetianga hmalam pan tur hi ka awm tawh lo ang,nungreng chungin ka thi a,engman min tiphur zo lo a,nitin ka rawp tial tial a,mahse ka dul a lian tual tual thung.

Ida-i a thla 7ah a pianga,ka nunphung pawh a ni telin hma a sawn tial tial bawk,ka fanu nen kan thanglian rual a tih loh theih loh.Ka thiante leh ka pu fate puihna a zarah Ida-i kum a tlin veleh hna ka thawk leh tana,ka piin a lo awm mai thina,hun a kal zela,tuna ka sumdawnna lo ni ta hi Ruatfela nen kan din dun leh a,mahnia eizawnna ka neih takah chuan ka pute rem ti lo chung ka insawn chhuaka,mahse, ka tlawh reng thung.Nau awmtur nula fel tak,awmchilh nghal thei ka la a,tunah chuan Darian-a nena kan nun pawh nunhlui a ni a,hmalam ka pan tak tak tawh bawk.Mahse,tun thlengin facebook leh Ig ka khawih leh ta lo.Whatsapp erawh ka eizawnna nen a tul ngang a,ka khawih hram chauh.

Peih lo zetin ka mengchhuaka,khua a lo eng iar tawh,ka inleta,Ida-i a lo awm tawh lo.Mut hi ka harsat em em ta zel,ka chau over te anih loh chuan dar 1 hi chu ngei ngei a ni ringawt.Ka inphihfaia,Kitchen lam ka pana,Ida-i Dinning Table kilin a lo thu khara,Chhuani eirawngbawl uluk fein a lo thlir dauh dauh mai.

'Good morning..' a bianga fawh pahin ka ti a,min rawn kuaha,ka biangah a fawp ve a,a nui sen sen bawk.

Kum hnih a tlin hnuah pawh tawng tum awmin a awm lo a,Doctor hnenah ka hruai ta ngawt,ka beisei loh lutuk ka hriat takah kha chuan tah pawh ka tap thei lo hial anih kha.' Zampui,i fanu hi a tawng theih aiin tawngtheih loh ka rinna a tam zawk,mahse beidawng lo la...Kan tih theih zawng zawng kan ti vek ang' dam thlapin a ti a,ka kehchhe nawn leh hi a ni ringawt.

'A beng a ngawng tihna mi?” ka tichhuak thei hram.

'Aih,ngawng lo,mahse a lei hi a che thei lo a,duh duha kan tiche ang hian.i hrethiam em?” ka bu liam mai mai..Kum a veia,kum thum anih meuh chuan keimah zawkin ka pawm angai tih ka hrethiam a,Zaizira inbiak dan ka zira,helam kawnga min pui thei apiang ka pan ruak ruak a ni ber.

Dawhkan kik kauh kauh thawmah ka ngaihtuahna atangin ka harh zawk,Ida-i ka en vat bawk,a lo nui senga, zawhna min zawt hmel a pu reuh bawk.Ka lu ka thinga,a tha vek tih entirnan ka kut ka lek zauh bawk.Hmeichhe naupang,kum li leh thlakhat na hmang mek a ni a,a kum phu lohin a finga,mi mitmei a man em em bawk.

Office kal hmain Schoolah ka dah hmasa te te a,Chhuani'n a lam loh pawn Office atangin lam turin keimah ka kal mai zel,ka hman loh tawpkhawkah lo chuan midang ka lam tir ngai lo.

'Good morning..' rawn luh pahin Ruatfela'n a rawn ti a,thu rawh tih pawh nghak loin a thu nghal zat bawk.

'Morning..i va tho fuh hmel ve..nizan i kalpui fuh deuh a ni maw?” ka ti a, ka nuia,a hmui a ti sawi zauh.

'Mapuii nen kan kala,a fuh leh fuh loh chu i hria ang chu' a nui ve hak mai.

'Um,a fuh ang..eng lo,i chhuah pahin nimina rawn lut thar kha a Bio-data min lo pek tir lawk la' ka ti a,Dawhkana file awm ho ka keu nghal bawk.

'Um,ka rawn dah tir ang..Eee,engemaw sawi thawm ka hria asin' a ti leh a.Ka melh zawk.

'Eng thawm maw? I nupui neih tur thawm maw?” ka nui leh hak.

'Thutak teh,mahni nupui neih tur thawm hriat angai ngai ami? Ka neih dawn chuan keiman thawm ka siam ang chu mawle..'

'Oh,Sorry...nupui neih i peih lo tak,tuemaw i nghak anih tak kha..' ka mit ka siai zauh,tur zetin min en thung.

'I va han chimawm e aw..Thutak teh'

'Sawi la...' ka file keu ka khup a.

'Building hi an lei maithei an ti a..' ka beisei loh lam daih.

'Enga? Hemi building hi maw?”

'Aw,nizan khan Dika khan a sawi thawi zauha,ka zawtchiang ang ka tia, ka la zawt ta lo a..'

'Ok,lo hriatchian tum la,mahse,tupawn lei se Agreement kan neih sa hi an pal zut ngawt thei nang..'

'Nia,a dik reng..hriatchian ka lo tum ang..' tih pahin a tho a.

'Min hrilh leh dawn nia,ee..ka thil chah che chu aw' ka ti leha,a bu nghauh.

Zam-an ka thil chah a rawn daha,ka en thuak thuaka,hna dang ka khawih leh ta zawk.Buai viau ni a awm a,buai lem loh ni pawh a awm tho bawk,vawiinah pahnih rawn lam tur an awma,an kal dawn hian keimah ngeiin thlah ka duh ziah bawk.Ida-i ka lama,inah ka dropa,ka tlanchhuah leh hmain Ruatfela'n min rawn calla,ka kalchhuak tih a hrereng sia,ka phun hlak mai.

'Eng nge?”

'I rawn let dawn tawh em?” a aw a dik tlat lo.

'Aw,thil dik lo a awm em?”

'Lo let phawt la...'

'Ok..'

Office ka thlena min lo hmuak tu erawh a hlimawm fahran lo,ka hmuh rualin ka ner nak mai.

'Zampui,eng nge a awmzia ni ang? Tiang mai mai tur hian pawisa kan seng hleinem' a lo ti nghal chiam.

Chair ka pawtchhuaka,keimah leh keimah hahdam turin ka inhrilh mawlh mawlh,sumdawng tura thin nel tul zia hi hre reng mah ila ka tlin lo fo mai.

'A bul atangin khawngaihin min hrilh thei em?” ka ti dam thlap.

A sawi ta par para,a tawp lamah phei chuan sawi satliah loin a au a ni ta mah mah,a thinrimna ka hriatthiampui em em rualin kan tan chuan kan tihtheih piahlam a ni tlat thung.

'Engtianga tih tur nge?” a mit lianpuiin min melh kuau.

'Police koh i duh em?” ka ti sap,hei pawh mi a tih melhin min melh vak.

'Engatan nge Police ka tih anga?” a ti hmuk.

'In thil a ru a,i pasal nena an inzawmna kha chu engpawhnise i thilbo tal i hmuh let chuan a tha ang chu' nghet charhin ka ti leh a.

'Ka duh lo hulhual,khawi lam mi nge anih ka hre duh,bakah ngahnge khatiang mi laktlak loh lutuk min pek ni” a ti leh tun tun,Ruatfela insehruh fan mai chu ka mitmeiin ka khap vat.

'Ka pi,kan pek che a ni loa,i thlan a ni a.Tin,helaiah hian hna duhin an lo kala,training kan pe a,kan theihtawka ulukin kan zirtira,mahse an hnathawhna tur an pan hnuah chuan engmah kan kut a ni tawh lo.Hei hi chu nangma duhthlanna thlap a ti kan nih kha..' ka theihtawpa nemin ka ti leh a,hawisawn duh loin a mit lianpui leh hnawih dum kulh chu ka melh ve ran bawk.

'Anih chuan kumkhat atan kan ti a, kum chanve chauh a awma,a bak min pe let mai aniang chu,..'

'Ka pi,khawngaihin kan inremna kha i chhiarchiang leh thei angem?” ka ti chang ta fak.

'Chhiar chian tur a awm em ni? Ka pawisa ania,nangni lo ei mai mai tur a ni hleinem..'

'Kan ei mai mai lo tawp,a tirah kan dan engkim kan hrilh che a,nangmah ngeiin amah kha chan loh i hlauh luatah kan dan kalpelin advance i dah anih kha..'ka insum theihna a bo tan mek tih ka hria.

'Amah khan pawisa a mamawha,chuvangin ka pe che u a,tunah kut in sil leh daiha,eng Agency nge ni ngai?” in melh hian thih theih se chuan vawi 10 aia tam ka thi hman tawhin ka ring.

'Sawrkar hriatpuina leh dan dik thlapa Agency hi kalpui a ni,eng nge hriat duh dang i la neih?”

'Hmeichhe chapo leh luhlul lutuk mai,nang hi a ni lawmni hman kuma mahni pasal te sum eisak duh vanga timualpho kha?” ka nghing lawih thei.

'Khawngaihin chhuak rawh, i duh leh min khing la..i duh duh tirawh'' ka insum hman tawh lo.

'Ka khing khawp ang che u,tiang mai mai...'

'Saw lamah sawn kawngka a awm' kawngkhar lamah ka ban ka phar va bawk.

'I tha em?” Ruatfela'n ka dara rawn vawn pahin a rawn ti a,harsa ti lutukin ka nui lui sak.

'Ka tha...'

'Tui in la..' tih pahin a kalsawna,reivakloah tui Bottle nen a rawn leta,inhawng sain ka kutah a rawn hmehbela,ka in nghal khawlh khawlh mai.

'I tha takmeuh em?” a ti leh a,ka bu nghauh ringawt.

'Anih chuan nangmahin i awm thei angem? Mapuii te tihtur ka hrilha,an zo tawh em ka zuk en ang' ka bu leh nghat,diktak chuan mahni a awm aia duh ka nei rih lo.

'Pawisa duh vanga mahni pasal te timualpho tu'

Ka bengah a ri nawn tlut tlut a,beidawng thinrim lutukin ka beng ka hup ta ngawt,awmzia a awm der lo.Ka chair hnunglam ka ngheng a,ka mit ka chhing a,khanu khan khatiang thil kha risk lain a sawi dawn miah lo,a sawi ang kha ka lardan anih teh chuan..?? mahse, kha thil vang khan enge hlawkna ka hmuh? Ka pasalin min hnawtchhuaka,mi a ang maiin ka nun ka hmang bawk anih kha..

Kawngkhar an rawn kika,ka mood chhe lutuk tih pangngai tumin thawk ka la leh vang vang phawt,a hnuah lut turin ka ti ta chauh, Mapuii a lo ni a,a rawn kal pheia.

'I phone i pick lo a..' inthlahrun hmel zetin a ti a, a phone a lek kang zauh bawk.

'Um,sawi la..' ka tum aiin ka aw a pangngai.

'Aih,an be duh zawk che..' tih pahin a phone a rawn lek hnaia,mak ti fein ka ena,mahse ka ban ta tho.

'Hello..' zangkhai thei ang berin ka ti a.

'I phone i pick thei lo a..' Duati a lo ni a, ka thaw hak mai.

'Nia,ka lo hre lo a,khawnge i awm?'

'Ka lo kal kual ang chu ka tia,chuan Ida-i ka ngai tawh lutuka' a nui hak hak.

'Ka rawn call ang che..' ka ti ta zawk.Ka off a, Mapuii ka pe a,dawhkana ka phone ka dah ka bana,mak tih hmel fein min melh reng tih ka mitsirin ka hmu thei a,a demawm lem loh.Dawhkana awmreng ka pick lo kha thil pangngai ni hek lo le.Sawi duh nei niawm takin a tawi khawmuang a.

'Sawi la...' ka ti ta zawk

'Eng lo..nichina lo kal kha engtia tih zui tur nge? Ka sawi awmzia chu...' ka ban ka vai zauh.

'Ka hrethiam alawm,lo nghah tawp bak engmah tihtheih kan nei lo.A duh duh a ti anga, kan duh duh kan ti ve anga..a tha em?” ka nui lui leh sak bawk.

'I tih dan apiang ka pawm thlap,chuan maw..i tha ber” a nui var vara,ka nuih let sak bawk.

Ka thiante hoin pasal an nei fur tawh,Duati hian a la nei lo a, mahse ani pawh hian uluk taka zui a nei a,a hlat vak a rinawm tawh lo.Hun harsa lutuk ka paltlang lai khan anni ho hian min pui nasa em em a, tuna ka eizawnna pawh hi an puihna vang a ni ka ti lo thei lo.

Ruatfela hi kan inthen hnua ka thawh leh hmasak berna Private School a ka thawhpui a ni a, kei aiin a kum a tlem hret nain a puitling khek khawk viau,Hmeithai fa niin harsa taka nun hmang ve thin a ni bawk nen kan inhmuh tirh phat atangin kan inmil nghal thlap.Kan sumdawnna hi loan in bul kan tana,risk takmeuh a ni bawk,mahse rin phak bakin a hlawhtling ta tlat,Kum tling chin,mahni duhthu ngeia mi hnena inhlawh duh te kan hnenah kan laluta,Hostel kan pe a,mi ina awmdan leh khawsak phung engkim kan zirtir theih chin chin kan zirtir vek a,tawng lamah pawh a bo lo tawk turin kan zirtir bawk.A tir lamah chuan hlut a hlawh tehchiam lo,mahse Batch hmasa ber te an awm darh atanga reiloteah kan lar ta hluai,thlahnih tal training la thin kha thlakhat lek an awm hman tihin an rawn hauh fai nghal titih ta zel.chanchinbu lamah Advertisement kan chhuah bawka.Thla hmasa atangin rampawna kal tur kan buaipui leh tana,mahse ka fimkhur ngang mai thung.

Duati lo thlen hnu lawkah haw turin kan inzui chhuak a,khanu rapthlak zet kal hnu khan engmah ka thawk zawm ta lo hrim hrim.Kan veng leh kan veng thenawm inrina,tlema kawng fal lai ka thlen rualin ka ngaihtuahnaah thil a rawn lut thut,signal ka pe a,ka ding zui nghal bawk.

'Ngatinge?” Duati'n rawn din ve pahin a rawn ti a.

'Ding lawk ang..' Scooty atangin ka chhuka,ni tla tur sen phut lam hawiin ka ding vang vang bawk.

'A va nalh ve...' tih pahin a rawn ding ve a,chhunah khan ruah a sura, tunah chuan awihawm loh khawpin khua a thianga,ni tla tur a eng sen phut bawk.

'Thil zawh che ka duh a..' ka ti sap.

'Eng? I van serious ve a..' a nui hak mai.

'Um..serious tho..eng lo,ka hmachhawn a hun tawh in ka hria..' ka ti leh sap.Ka en a,angaihna hre lo tih hriat zetin a dar a tichhing ak bawk.

'Darian...' ka hrawkah engemawin min hnawha,ka khuh khauh bawk.

'Darian-a chunga thil thleng kha eng nge anih tunah hian min hrilh thei angem?” keimah bawkin ka ti leh sapa,a hmel danglam nghal vek chu ka hmuh hmaih hauh lo..A mak hran lo,ka huat tluk zetin an haw ve miaua.

'Darling,i tha em?” ka banah a rawn vuana,mangang hmel a pu deuh bawk.

'Tha...ka tha vek e,i sawi theih chuan ka lawm ngawt ang..' ka chhungril chau hluah hluah thup nan ka nui lui leh sak mai.

'Eng ber nge ka sawi ang?” mahni inrin tawkna nei lo hmel zetin min en a,ka thil sawiin a thawn zia a lang reng bawk.

'I duh duh,khami tlaia thil thleng te,engtin nge Fbah khan an ziah tih te,chuan Darian-a a effect dan te pawh...' ka ti ta duah.

'I chiang chiah em? Engmah thil kal tawh sawi hian thatna a nei dawn lo ania..' a ti leh halh.

'Ka hria alawm,vawiinah hmeichhe pakhat a lo kala..'

'Ngatinge? Eng nge a sawi?” rang zetin a ti vat.

'Pasal te sum duh avanga timualpho tih lam zawngin a tawng a...' a tawp lam a zuih ral titih,a chek tlaka,anchhe lawh ri ka hre zui zat bawk.

'A va ngam zawk ve.ngatinge engmah i sawi loh a?” a ti hmak bawk.

'A pawi lo,a tha zawk,a sawi avang khan thil kal tawh pawh hre turin ka huaisen alawm'

'Ni lo,ka haw lutuk...' thinrim zetin a ti leh hmak.

'A pawi lo ka tih kha,nakinah engtin nge a pa chanchin Ida-i hnenah ka sawi ang tih ka ngaihtuah fo tawha,tunah engkim hriat a hun tawh alawm' ka ti damthlap mai.

'I thawnthu ziah thar turah khan Jared-a leh a bialnu awmdun laiin Darian-a kha a awmve a,mahse mi in thil thleng an hriat danah chuan a vaiin Jared-a vek an puh thung,kha Jared-a pawh khan engmah a sawi duh lo a, engvange tih lam hawiin a inziaka,hmeichhe chhungte kha Darian-a thup mawi tum na an nei tih lam a lang bawka...' a ngawi leh rih...

'Chuan,kha thil khan karkhat lai mipui titi a luaha,mahse a hnu a an sawi zui tak chu Thawnthu ziaktu kha a nupui a ni a, a thuziak tih lar zual nana kha thil kha dawt phuahchawp tiin an sawi ta daiha...' ka insum hman lo,ka rum chhuak hak mai.

'Ka ziah tak tak i ring em?” reife kan ngawih vang vang hnuah ka tichhuak ta sap.

'Aih,ring lo..chutiang khawpa lar khel i ni hleinem,bakah khatiang zawnga rawn ti leh tu kha tudang ni loin Emily a ni a' rang zetin ka en a.

'Emily..' ka ti nawn ve sap ringawt.

'Um,Emily...tunah phei chuan an innei dawn tih thawm a awm a..' a hmui a hup vat.

'Pawi ti suh,ka tan chuan mithi mai a ni tawh alawm' ka then sak bawk,mahse,keimah ngei pawn ka thilsawi kha Dawt a ni tih ka hrechiang lutuk.

In kan thlen veleh hlim zetin Ida-in min lo lawma,Duati a bawh chang chang mai,a ngaina em em a, a lo kal khat deuh chuan angai hman viau zel.Chhuani leh Ida-i an awm ve ta bawka,kan boruak rit lutuk pawh a ziawm ta viau,chaw a ei ve nghala,a haw meuh chuan Ida-i a muhil tlan tawh.

Ka lehkual naah ka taksa a kham thum tawh,Ida-i tihharh hlau zetin ka tho tham thama,Tukverh ka hawnga, Balcony lian lo te awmah ka chhuak a,railing bawhin ka ding vang vanga,ka dinna ral lehlam eng phe tuar chu ka thlir vang vang bawk.Zanah hi chuan Aizawl khawpui hi a nalh takzet.

Ka ngaihtuahna a mumal thei lo,Duati thusawi zawng zawng te kha ka ngaihtuaha,kum 5 dawn liam tawh mahse min thawn dan erawh a la ngai ta reng,a hlimchhawnah khan hre ta ila chuan beih pawh ka bei let mahna,mahse, eng nge ni chuang ang?ka hneh lo anga,ka mualpho nasa lehzual maithei.

Ka mit ka chhinga, khami ni a thil thleng kha engmah ka la theihnghilh lo,zing karah Darian-an ka thuziak ho min dila,ka ziahsa pahnih leh ka ziah lai mek Pendriveah ka daha,Darian-a bagah keiman ka dah thlap..Khang ka thuziakah khan an sawi chiam chiam Darian-a leh Jared-a chungchang engmah ka ziak miah lo tih ka chiang lutuk,mahse...Ambie-a hnenah khan ka ziah angin a thleng tlat..Emily..khami ni khan Darian-a nen an inhmu em ka hre lo,insawifiahna hun pawh pek ka ni lo hrim hrim zawk anih tak kha..

'Hei en ve teh' Ruatfela'an a rawn ti a, Dawhkanah Envelope a rawn theh thla thak bawk.

Thu loin chak fein a vei kual a,a awmdanah thil tha lo engemaw a thleng dawn tih ka hrethiam nghal vek.Nizan ka mu tha lo a ka lu a na a,ka rit luk bawk.Zing tangin ka mood a chhe saa,kal pahin mi Motor ka tauh sak bawk, thil tha lo dang thlen belh ka mamawh hlawl lo.

Envelope ka hawnga,Lehkha ka lachhuaka,eng nge inziak ka hmuh takah chuan ka thaw hak mai.

'Hei hi engtika lo thleng nge?” ka tum aiin ka aw a chang lam hret.

'Ka thlen veleh Zama'n min lo pe..'

'A ni thei lo,engtin nge tianga an tih ka hrethiam bau lo..Tunah in neitupa ka biak angai..' ka ti hmak,ka phone ka bana.Mahse, ngaihtuahna dang ka nei leh rih.Ruatfela ka en a.

'Tu nge a leitu hi i hria em?”

'Lehkhaah khan a inziak ang chu..' a ti tawi tak..

Lehkha bawk ka ban leha,a tawpa in neitu thar Contact na tur number awm chu ka zuk en a,ni lo...ka hmusual emaw tiin ka en nawn leh a..A ni thei lo..