MON HOMME- 25

Chapter- 25

'I tha em?” ka hmai bulah a kut a rawn vai a,ka phu zawk.

'Aw..aw,tha..enteh,nangman i lo be leh dawn mi niang?” ka theih tawpin ka aw khur tur ka venga, mahse a lawi rat tho mai.

'Sorry,i lo kal hma khan ka be tawh zawka'

'Enga?” ka ti vak..A mengphar awk bawk.

'I lo kal hma khan ka biaa,tlai dar thumah Meeting nei turin min ko a..' ati leha,ka rum hak mai.

'I kal mai dawn nia..'

'I kal ang tih ka lo hrilh tawha,tihtur pawimawh i nei tihna mi?” nichin atang tawh khan a hmelah mak tihna a la lang ta reng.

'Um,thil tih tum sa ka lo neia'

'Mahse...hei hi chu...' ka ban ka vai zauh.

'Ka hria alawm,ka tihtur ngei a ni tih pawh,mahse nangman va hmu phawt la,a tihdan a zirin Duati zawk kan dawr tir dawn nia..' ka ti ta duah,a rilru tih nawm nan ka nui lui var var bawk.

Hna thawh tur ka inchhawp teuh,mahse engmah ka thawk ta chuang lo,hnathawhna Moodah ka awm lo hrim hrim.Ida-i lam turin ka chhuaka, vawiin hi Chhuani'n a mimal thilah kalchhuah nilen angaih dawn avangin Office lamah ka hruai phei a,nidangah pawh a lo kal zauh zauh tawha,ka bulah aiin Ruatfela bulah a awm tam mah zawk zel.

'Hey,Ida...i lo kal alaw?” Ruatfela'n rawn luh pahin a rawn ti a, Ida-i lah hlim zetin a tlan nghal that.A pawmkanga,a vir kualpuia,a fawp nawk nawk bawk.A chet zawngin a sam kir chiat chu a phe dar dar a,a hmeltha takzet.

Pawm chungin ka hmaa Chairah a rawn thu a,ani pawh hian Ida-i biak dan tur engmah thiam loh a nei tawh lo.

'Eng nge chanchin?”

'Ka hmu lo...' a ti hul hak.

'Eng maw? Amah zawkin Meeting a ko a ni lawmni?” ka ti hlak mai.

'Um,ko..a Manager a lo awma,amah a lo chhuak a,hna thilah pawimawh a awm thut a ti a..'

'Hmela chu le(h)...' ka ti hmak,ka insum hman lo.

'A harsa dawn khawpin ka hria,nge Duati kan biak tir law law mai dawn mi?”

'Aih,kan nghak tawp ang,a duh duhin min ti kual ngawt thei hleinem,mahse tunah chuan Inluah tur kan mamawh dawn tih a chiang vek tawha,khawi lam nge kan en kual ang?' ka ti a,ka ipik churh mai bawk.

'Ka hre lo,Zama kha lo ngaihven turin ka ti a,Dama te lam hian an hre mial lo maw?” a ti leh a.Ni dawn tak,Dama ka lo ngaihtuah chhuak miah lo.

'Eh,tha lutuk..Nakinah ka lo bia ang,Hostel tur Floor khat tal awm thei se,abak Office te hi chu kan sawi rem kual mai ang..' ka ti a,tuna kan luah laiah hi chuan Hostel atan Floor khat kan hmanga,Office leh Class room atan kan awmna Floor hi kan hmang thung.

'Ida,i khua a sik leh em?” a ti a, a tawng pahin zaizarin a ti nghal bawk.Ida-i lu thing mat mat leh zawhna eng eng emaw a zawt zawm chu ka thlir dauh dauha,ka en ning thei lo a ni tawp mai.

Kha lehchen kha kan nufain kan nun kan lo hmang tawha,ka hriatrengna atangin paihchhuak ngai lo mah ila kan nuna tel ve turin ka mamawh ngai tawh lo.Mahse, tunah engvangin nge a lo lan thut? Building tamtak zingah he Building kher kher hi engvangin nge a lei? Zawhna hlir mai..Chhanna pe tu tur ber erawh ka nuna pawimawh ber leh ka huat ber DARIAN MAWLSAWMTLUANGA a ni lawi si,thlamuang takin kan nufain kan nun kan hmanga,niminah amah kaihhnawih thil ka tawnga, a lo lan phat atangin buaina bawk..Ka mamawh lo a, ka mamawh ngai lo ang..A duh duh ti rawhse,ka bei let anga, ka tlawm ngai lo ang.

Nidang aia hmain Office ka chhuahsana,vawiin zet zawng eng hna mah ka thawk ta lo.Inchhung mamawh lei ngai a awm nuala,Bazar lamah ka kal kual pui a,ka chhungril ipik hluah hluah tihreh nan a lo tha viau mai,khua a duaia,ruah erawh a sur em lo thung.School lama a mamawh kan lei nual bawk.

In kan thlen veleh a muhil ta bam,ni a la vui zo meuh lo,a men tlang tum a awm zauh zauh chauh.Eirawng ka bawl laiin Chhuani a lo haw a,a rawn ri nghal luam,a kalna chanchin a sawi mawlh mawlha,ka bu liam vel mai mai.Ka rilruah thil dang a leng hlawl lo a ni ber.

Ka beisei loh zetin ka mu tha ta phian,Ida-i tho sat sat thawmah ka harha,ka pawm bet leh rih,a biangah ka fawpa,ka nghawngah a kuah chiala,tuman min laksak ka phal ngai lo ang.Darian-a khan nau ka pai tih a hria em ka hre lo,ka hrilh hman ta lo kha ania.Oh..a hria emaw hre lo emaw ka buaina tur a awm lo.An in atanga min hnawhchhuah ni khan ka tan an thi tawh.Ida-i hi ka ta liau liau a ni a, midang tuman min chuhpui ka rem ti ngai lo ang.

Ruah a tla seng senga,thlasik lai ang maiin khua a vawt vur mai bawk.Ka tlan lohni anih avangin Taxi ka hmanga,traffic lah rapthlak khawpin a jam bawk.Nidangah Office thlen nan darkar chanve pawh ka hmang ngai lo a,vawiin zet chu darkar hnih deuhthaw ka hmang thung.

'Ka rin aiin i tlaia” Office a min rawn zui luh pahin Ruatfela'n a ti a.

'Rapthlak lutuk,Taxi in ka rawn kala,darkar hnih deuhthaw kan rawn tlan mawle,kan tawlh zeuh zeuh chauh...' ka ti hlak..Ka jacket ka hlipa,ka khai a,ka sam hnawng deuh chuap ka tuai mam puat bawk.

'A turu khawp mai,keipawh ka tlan rei alawm..' a ti ve a.

'Coffee ka va la leh rih lawk,a vawt dan hi Coffee in deuh char char na hun anih hi tiraw?” ka nui hak hak.

'Ka va la ang' ka chhan hmain a chhuak nghal nghal chu a ni der.

Computer ka on a,Mail ka checka,ka duh ka hmu nghal chat,ka Open a, ka en kual dan dana,tun hnai ka thil tawnah chuan a hlimawm ber hial ang.Tunah chuan a vawikhat nan Foreignah kan tir chhuak ve thei dawn ta..He sumdawnna kan tan tirh atang khan kan hlawkna chu engpawhnise midang tanpui ni a ka inhriat tlat avangin hlu ka ti a, keiman hlimna ka dawn phah in ka hre bawk.

'I va happy ve a,eng nge?” ka hmaah no a rawn daha.

'Kan duh kha a hlawhtling dawn e,hei mail ka check a..'

'Wow,a va ropui ve..' mahse a hmelah hlimna tak tak a awm tlat lo.

'Dik lo a awm em?” ka ti a, Coffee ka tem hlak bawk.

'A ni ang tih ka hlau khawp mai..' za lo zetin a then sak.

'Eng lam nge? Ka rilru i tinuam lo...'

'In neitu thar khan Meeting neih a duh tih a rawn sawi leh a...'

'Hrep tak hian a...' ka ti hlak..

'Chu pawh nangmah kher kal turin a phut bawk che a..' ka mitah tak a en ran mai.

'Ni lo..aih,engvangin nge keimah kher a tih a? Nangmah nen he Sumdawnnaah hian kan thu neihna a inchen vek a...' ka ban ka phar hliai,beidawng tihngaihna hre lo bawk siin ka dahthla leh riai riai mai.

'Zampui...thil ka zawt thei che angem?” ka melh vak..

'Sawi la...' ka ti ta tho.

'In leitupa hi ka rin a dik em?”

'Eng nge i rin ka hre hleinem..'

'Ida-i Pa ni ta se..'

'Ni lo...pa a nei lo...'

'Sorry....ka tihpalh lutuk..' inthiam lo fein a ti a.A no tlang a tuai hauh hauh mai.

'A pawi lo,eng lo...diktak chuan i sawi kha a dik.Mahse Pa a nei lo...' ka ti bah nak mai.

'Ka hrethiam e..Meeting chu engtin nge niang?” a zi mar ar ar.

'A biakna tur number..ni lo,a Manager zawk biak pawhna tur ka duh ang' ka ti a, amah biak ka tum bau lo.

'Ka nei ang,nimin khan ka laa..' tih pahin a phone a phawrha,a rawn hawi chhuaka.

'Ka rawn thawn dawn che nge?” ka lu ka thing nak.

'Dial rawh,ka lo bia ang...'

Ka lamah phone a rawn lek hnaia,ka bana,mahse Dawhkanah ka dah leha,Loudspeakerah ka dah nghal zat.

'Hello..' hmeichhe aw puam lam hian a rawn ti a..

'Hello, Meeting chungchang sawi turin ka rawn call a' ka ti a, kan Agency hming ka sawi nghal bawk.

'Lawk,kan thunzawm lawk ang aw,Sir Darian-a nge i biak ang Secretary zawk?” a rawn ti zang vah.

'Secretary zawk...'

'Ok,lo nghak lawk..' a ti leh a, ka thaw ham ham mai.Engtin nge a khawsak zui pakhatmah hriat ka nei lo,ka hriat lai kha chuan Personal Secretary a neih pawh ka hre ngai lo,Private Hospital an neia,chumai bakah Contract lian tham tak a khawih bawk anih kha.

'Hello...' mipa awin a awm ti a..Ka biak duhna ka sawi leha,kan Agency hming ka sawi nghal bawk.

'Min lo hrethiam la,hemi chungchangah hi chuan Boss khan nangmah ngei a hmu duh che a,tukina ka rawn sawi ang khan dar 1ah a ti bawka..' a ti ta tlat.Ka ner nawk mai.

'Eng emaw Problem ka neia,mimal thilah.Chuvangin ka thawhpui hi lo kal mai se ka duha..'

'Kei chuan ka hrethiam che alawm,mahse Sir hian nangmah a hmu duh che a...' a ti leh ta tlat.

'Anih chuan ka theih hun atan Meeting kan nei mai dawn mi niang?”

'Engtik hunah nge i theih ang?” a rawn ti a.

'Thla thar lamah anih ka ring..' a thaw hak ri ka hrethei.

'Ka pi,ka ngaihdan chuan kan pu nen inbia ula a thain ka hria,Letterah khan kan pu number chu ka rawn dah tel a..' a ning tan tih a awah ka hrethiam.

'Aih,be lo e..Ka rawn be leh dawn che nia'

'Awle,ka lo ngaichang ang che' a ti a, ka off a, tih leh mai dan tur ka hre lo..Ruatfela ka en a, a dar a tichhing uk ringawt,kan inbiakna kha a vaiin a hre ve veka,sawi mai tur a hre lo nge min nawr luih a hreh zawk ka hrethiam lo.

'Eng nge ka tih ang?” ka ti hlak,ka hmui ka pet a,ka chhungrilah thinrimnain min tur et et bawk.

'Ka hre hauh lo mai..' a mithmul a ti sang zauh.

'Eng nge ti se min duh?” ka ti leha.

'I hria alawm,mahse, nawr luih che ka tum lo..' a nui var var mai.

He sumdawnna kan din dan ka ngaihtuaha,Loan nen,risk takmeuh a ni a,he In pawh hi kan luah dawn khan engkim inremna kan ziak fel sa thlap,chu mai pawh niloin a luah man pawh kan luah luh tirh atangin kumkhat atan zel kan pe a,kumin atan pawh kan pe lawk vek tawh bawk.Kan lo thawhrim tawhna zawng zawng kha ka mimal thil avangin ka tichhe ngawt thei lo,ka ta bik ni loin Ruatfela nen kan intawm a ni lehzel a,midang ka tichhe thei lo.Mahse,eng nge ka sawi ang? Damchhung a ser reh thei tawh lo min pe tu hnenah khan khawngaih ka dil ang maw? Ka lu ka thing nawk ringawt..Ka thei lo a, ka ti ngai bawk lo ang.

'Ka kal ang...' ka ti chhuak ta sap..Phawk lutukin min rawn en a,mahse a hmela lawmna langchhuak erawh ka hmuh hmaih lo.

'I ti tak tak em?” ka kut a rawn vuana.

'Um,tak tak..He sumdawnna nei tura kan thawh rimna zawng zawng kha a bo leh ngawt ka phal dawn hleinem..' ka then sak bawk.

'My Girl..hei hi alawm ka ngainat na che,i hmaa tihtur awm engmah i tlanchhiatsan ngai lo hi.' a nui var var mai.

'Min bawl lo mai teh...tu te emaw anga hmaichhana infak hluah hi ka ngaina lo tih i hriat kha..' ka ti salha,a nui hawk hawk mai.

Ka kal dawn tih hrilh turin ka va call leha,a hmang ang bawka zangkhai vahin min lo chhanga,a hmel ka hmuh hma hauhin ka khawngaih ve ngawt,a mi hrawn mek hi ka hrechiang lutuk,khawngaihna nei miah lo mihring a ni a,thil tamtak tih that ai chuan thil pakhat tihsual palha thehchhuak nghal thin mihring a ni bawk.

Chhuani hnenah Ida-i lam turin ka ti a,khaw nuam lo nen ka ngaihtuah zual viau,mahse, ka lam anih chuan Meeting hun ka tlai ngei dawna,kha tak kha ka duh bau lo.A hun hmaa thlen hman pawh ka duh chuang lo,a hun takah chiah thlen hman ka duh a ni tawp mai.

'I kal thei tak tak ang maw?” Bike a lawn pahin Ruatfela'n a ti leh hram.

'Lutuk,Zampuii ka nih hi..Ida-i nu...' ka then sak..Mahse, ka landan ang hi ni loin ka chhungrilah ka hriatthiam si lohin min fana,duhthlang thei dinhmunah ding ila chuan kal loh aia thlan tur chuang engmah ka hre lo.

'Pi Zampuii i ni em?” Mipa pakhat,kum 26 vel bawr,cher sang zetin min hmuh veleh a ti nghal a,mak ti ru zetin ka mengphar ak mai,mahse ka nih thu ka hrilh a.A nui nghal var var mai.

'A lo nghak tawh che a...' tih pahin Room lamah a thle zauh,ka sana ka en a..Minute 1 ala awm.

'Ka tlai lo chiah chiah e..' ka ti a,ka then lui sak bawk.

'Kal ila...' a ti a, a kal zui nghal mai bawk,a hnungah ka zui a, Room kawngkhar a kik nghal kauh kauh,keimah leh keimah hahdam turin ka hrilh ru mawlh mawlh,mahse,awmzia a awm lo.

'Lut la...' tih pahin kawngkhar a hawnga,amah zawk ka luh nan a tawlhsawn a..Ka hrawk ro halh mai tih hnawn tumin harsa zetin ka chil ka lem a,let leh mai ka duh rum rum bawk.

'Ka lawm e...' min hruaitu pa hnenah ka theih tawpa zangkhaiin ka ti a,a nui var var mai.

Kawngkhar ka nem hawn belha,Office chhungah ka pen lut ta nge nge,mahse, ka beisei loh lutuk lo thu ka hmuh takah chuan ka thaw nghal hak mai.

'T...nang maw?”

'Um,keimah...' nui chungin a ti a,a rawn dingchhuak nghal bawk..

Min rawn pana,a kut a rawn phar chhuaka,ka lo vuan ve mai bawk,kan inthen hnuah khan ani pawh hi vawikhatmah ka hmu leh ta lo.Khatiang tehhrep hnuah kha chuan ani pawh hian min hmuh a chak fahran lo ang tih ka chiang.

'I lang tha hle mai...'

'Maw?”

'I danglam lo ka tihna anih chu..thu la' tih pahin chair a kawka,ani erawh Dawhkan nghengin a ding thung.Ka thu thlaa,ka bag ka ke bulah ka dah bawk.

'Eng nge i ei ang?” amah bawkin a ti leh a.

'Ka rawn ei sa alawm,engmah angai lo..' ka ti a,atthlak zetin Darian-a zawk awm lo a T-a a lo awm hi ka lunghnur ru tlat bawk.

'I vang hle mai..' a ti leh bauh.

'Ka tamna mualah ka tam alawm,tak takin ka lo kal chhan chu i hria anga..' ka ti ta zawk,ka mimal thil engmah sawi zawm ka duh lo bur.

'Um,nia...kha thil kha,niminah Letter chu an rawn daha,engtin nge a rawn kal tak engmah ka hre lo a, a Copy ka en lo a..' a ti awlsam mai.

'Nangma kal tir turah ka lo ngaia..'mak ti fein ka en a.

'Ahh,helaiah hian Boss ka ni lo ania...' a mit a siai zauh.Eng nge maw an awmzia ni hrep ni?

'Um,mahse tupawh chu Boss lo ni se ka hriat kher a tul chuang lo a,ka sawi duh zawk chu kan luahlai Floor hnih hi inremna awm thlapa luah kan ni a.A neitu a inthlak emaw thlak lo emaw ka ngaipawimawh hran lo..' ka ti ta duah.

'Lawk aw..' tih pahin a Phone a la kang a,a pick zui zat.

'Hello..' a ti a, lehlam tawng ngaithlain a ngawi leh rih..'Aw,ka awm e,nia...minute engzat maw? ok..' ati mawlh mawlha,a off lehnghal mai bawk.

'Eng nge kan sawi lai kha?' a nui a, ka ngaihdan a pel tan titih,ka tana pawimawh em em hi ani hian fiamthu nan a hmang ni berin ka hre tawh mai.

'In chungchang...chuan ka...'Kawngkhar a ri rak,rang zetin ka hawi pheia,Darian-a rawn lut mek ka hmuh takah chuan ka thu ngil nghal auh,ka thisen zam kal vel an chawl thuap nimaiin ka hre bawk.

'Ka tlai tih ka hria alawm' a ti supa,min en loin T-a a en bawk,a rawn kal pheia,min rawn kal pela,Dawhkan a kal huala,Chairah a thu thla nghal zat,ka hmuh hnuhnun ber lai nen khan danglamna vak a nei lo,a lang upa ta deuh zawka,a nelawm lo lehzual tih mai loh chu a la ngai vek.

'A pawi lo,kan sawi tan dawn chiah..Chuan,hei hi Zampuii..' ka lamah a rawn bu zauh,min en loin a bu liam satliah ringawt.Ka thutna chair ban nghet lutukin ka vuana,ka insangmar teuh bawk.

'Sawi zawm ula...' a ti leh nghut,a Chair hnunglam a ngheng a,phone a en zui daih bawk.

'Um..Zampui,engtin maw i tih kha? Inremna chungchang kha..' T-an a ti a.

'Kan luah dawnin inremna kan siama,kan chhuak dawn emaw min chhuah tir dawn anih chuan a rei lo berah thla hnih hmalamah inhrilh hre turin..' ka ti dam thlap.

'Ok..ok..ka hria,a neitu hmasa khan a sawi alawm,mahse in inremna chu keini chuan kan hriatpui lo che u a,kan lei fela,kan ta a ni tawha,Office hi rawn sawn kan duh dawna,thla thar atangin an rawn khawih tan ang...' a ti duah..Ka zamzia thup nan ka aw ka thian hmasa te te a,helaiah hian ka pasal hlui leh a thianpa hmu tura kal ka ni lo a,ka eizawnna chungchang thil pawimawha kal ka ni tih ka inhrilh nawn mawlh mawlh bawk.

'I thlirna atang chuan a dik alawm,mahse chutiang ngawta innawr chhuah theih a ni lo..Kumin atan luahman pawh kan dah lawk leh vek tawh,kan luah tirh atanga kan inremna angin..' ka ti dam leh thlap.

'I Ac number dah rawh,i pek tawh zawng kan rawn dah let ang..' ka hresual emaw ka ti zawk.Mahse, ka hresual hauh lo.

Muangchangin Darian-a lam ka hawi ta nge nge,hnunglam a nghenga,hahdam hmel takin a thu a,min en ngur bawk,ka tim deuh chawiha,mahse ka huaisenna zawng zawng sawmkhawmin a mitah tak ka en ve ngar mai.

'Min lo hrethiam la,ka dah dawn hauh lo.' ka aw damthlap chuan a ti hamhaih nge ka hre lo,a hmui a petsawi zauha,a then suk bawk.

'Ok,anih chuan i chan vek dawn anih chu..' a mit a siai zauh bawk.Ngaipaimawh lo hmel fe in ka dar ka ti chhing ak a,ka nui lui leh sak.

'Tum chhin la,kan en ang chu..' tih pahin ka tho a,ka bang ka la nghal bawk.

'Zampui...' T-an a rawn ti a,a mangan hmel phian bawk.

'Kan sawi zo tawhin ka hria,anih phawt u.Pawimawh dang a awm anih chuan kan ukil in lo be mai dawn nia' ka ti a, Darian-a lam ka hawia, ka bu nghauh a,ka inher a,dak vahin kawngkhar ka pan nghal daih bawk.

Kawngkhar hawn tumin ka ban a, mahse a rawn inhawng a,Emily nen kan inhmachhawn ta ran mai.Thlahrang a hmu ta emaw tih mai turin a hmel a danglam nghal vek.

'I dam maw Emily?” ka zangkhai ta riau leh pawisak ka nei lo thar ta tlat hi keipawn ka inhrethiam bik lo.Mahse, pawi ka tih loh zawng tak a ni thung.

'Nang...nang...aw..' a ti sep a,a hmeltha tak thin kha a la ngai reng,min hmuh thut avanga a dang lap tih mai loh chu..

'Aw,keimah Zampuii,min la hria ang chu ka ti mai a' ka nui ri hak mai.

'Aw...hria e..' tlemin a hmel a pangngai ta deuh.Ka pan hnaia,ka kut ka phar chhuak va bawk,tim daiin a kut a rawn lek chhuaka,ka vuan chat..Ka kun hniam leh salh.

'Ka kalsan phawt mai ang che u,eeee...i che nalh thlawt..' zawi sapin ka ti a, a sen nghal tawn tawn a,hlauh nei a ang ka ti ber.

Pawn ka thlen hnuah erawh ka insehruh nasat zia ka hrechhuak ta chauh,ka hriat loh lai khan ka lo tang ngang aniang,ka inthlah dul takah chuan ka chau hnawk thei.

'Eng nge chanchin?” office ka thlen veleh Ruatfela'n a ti vat.Ka chairah ka thu thla hnak.

'Engmah...' ka ti hul hak ringawt.

'Eng maw? In inbiakna bik ania ka tih' a ti leh a,Darian-a chungchang ka sawi nek lo tih khum nghek ka chak zawk.

'Kan inbiakna alawm ka sawi,engmah ka ang bik lo..Thla thar atangin rawn awm tan an tuma,mahse chei that phawt an duh a' ka ti a,ka thaw halh mai.

'Nimin pawn tiang chiah chuan a sawia,hmm...eng chu kan ti dawn chu ni maw?” a ti vang vang.

'Lungngai lo phawt ang,Duati ka bia anga,tihdan a hre mai ang..' ka ti ta ngawt,diktak chuan engmah a tih theih ka ring chuang lo.Kan inremna a bawhchhia tiin khing mah ila awmzia a nei thui teh vakin ka ring lo.

Ruatfela chhuah hnuah che loin tukverh bulah ka ding renga,ka hnuai kawnga Motor tawlh dul dul chu ka thlira,beidawnna sawi thiam loh khawpa nasain min tuama, tui tla,vawn tur nei lo a leng vel ka in chan ber,an Office chhungah kha chuan Hmeichhe huaisen leh induhtawk tak,pawisak nei miah lo ang mai khan ka khawsa a,mahse tunah chuan ka kehchhe nawn leh a ni ta ber.Ka chau hluah hluah bawk.

Duati ka biaa,ka rin ang ngeiin engmah tih theih tehchiam tur a awm lo,tu nge a leitu min rawn zawta,atthlak zetin ka sawi hreh tlat pek,ka la hrechiang lo tih ka sawi ta ngawt,'A leitu thar te nen chuan inbiakna mumal deuh awm thei se,an mahni an pawimawh ber anih chu' a ti ve tho mai.

Inah erawh Ida-i hmuh laia rilru hahna nei awma awm ka duh loh avangin ka in control hram hrama,an School lama an thil tawn min hrilha,kei hi chuan zaizir ringawta be loin ka sawi tum hi zaizira tih pahin ka tawng tel kher thina,Ida-i pawh hian ka hmui a en kar zel bawk.

'Good morning...' tih pahin Ida-i thu tlum kak ka fawp zauh,min rawn kuaha,ka biangah a rawn fawp ve a,'Ka hmangaih che' a ti zauh bawk..

A hnar tereuhte,nalh zetah ka piai zauh,ka rilruah thil dang a lo langa.Niminah a Pa ka hmu a,mahse kan boruak a tha lo takzeta,a nupui tur pawh ka hmu tel bawk tih hria se engtin nge min tih ang? Ka hrilh har avangin min sawisel maithei,ka thawmhnaw tur pawh a duhzawng a tam tawh miaua.Engtikah nge a Pa chanchin min zawh ang ka hre lo..Thleng lo tawp se ka ti fo bawk.

Ida-i te Teacherin min hmuh a duh avangin a rualin ka kal ve a,a hnuah Officeah ka tlang ta chauh,tlai lamah Entir leh hun anih avangin In a haw loin Office a rawn kal tlang law law turin Chhuani ka chah bawk.

'U Zampui..' Mapuii a rawn daka..

'Um,lo lut la..' ka ti a,mahse Computer lam ka en san leh mai.

'Ida-i i lam dawn lo mi?” a rawn thu a.

'Aih, tlaiah entir leh angai dawna..hetah an lo kal tlang ang,tihtur hmanhmawhthlak ka nei em?” ka tih zawm zat.

'Aih,nei lo..Mahse,buaina...'

'Ka lawm e, ka mamawh loh lai tak ' za lo zetin ka nui lui hak mai.A then ve saka,mahse a mitmeng thutak ran maiah chuan a nuih a za miah lo tih ka hmu thei nghal tho.

'Ka uang anih kha,eng thil nge?” thutak zawkin ka ti a.

'Nimin piaha nu nasa deuh khan buaina a chawk chhuak nasa viau dawn mai..' a ti leh a.

'Maw?” ka ti sap ringawt.

'Hei en la..' tih pahin a phone a rawn lek hnaia,ka en rualin ka mitthlaah thil kal tawh a rawn lang nghal zut zut..

'Min hrethiam la,chhiar ri zawk mai teh,ka mit a chiang lo lutuk a' ka ti ta thlawt. A la let a,ka hriat turin a chhiar a,ka mit ka chhing ta ngawt..

A vawi hnih nan Social Media hmang bawkin ka mualpho nawn leh ta.Tun tumah erawh a tir phat atangin engkim ka hre ta thunga,ka bei let ang..Mi a ang maiin ka tuar tlawk tlawk tawh dawn hauh lo..Mahse, thudik a lanchhuah hmain Dawtin kawng thui tak a lo zawh hman tawh ang tih erawh ka chiang.Engpawh thleng rawh se, Kha nu nasa zet khan Vantlang hmaah ngei hian ngaihdam dilna a post leh ngei ngei bawk ang.

Ka thiante hnen atangin call ka dawng nghal pawp pawp mai,a hma a ka lo tuar tawh kha tuman an la theihnghilh lo,an vaiin min hnem tuma min rawn call anni vek bawk.Mahse, tun tum chu an vaiin dam thlapin ka sawipui tluan parh thei ta thung.

'Ka lo lut thei em?” rang lutukin ka hawichhuak nghal vat.Kawngka biang nghenga Darian-a lo ding run ka hmuh rualin ka insangmar nghal talh talh bawk.Kekawr thui nalh zet a haa,Kamiz pawl tak zet chungah Jacket a hak hnan bawk.

'Lo lut rawh..' ka chhungril sahal huam huam thup nan ka ti dam thlap.

Muangchangin a rawn luta,ka office tet sa nak laiin a rawn awm ve takah chuan a ti lang chep zo vekin ka hre hial bawk.

'Thu rawh..' tih pahin ka hma zawna Chair ka kawk zauha,mahse thu mai loin Office chhung a thlek kual dun duna,eng nge hmuh a tum ka hre lo.

'A nawm loh hran loh hi...' reife kan ngawih hnuah a tichhuak sup.

'Ka lawm e,sawm loh a lo kal ini a,intur ka pek che i beisei ka ring lem lo a...' ka ti leh salh.A mit hmul a ti sang uk a,a ha var nalh zet langin a then suk bawk.

'Inleng biak dan zir that i la ngai anih hmel hle mai' a ti duh lek..

Chhan tumin ka ang ziau,mahse eng nge thleng ta hi..Kawngka a rawn inhawng rawpa,Ida-i a rawn zuang lut nghal tharh bawk..Mahse, a hriat ngai loh a hmuh takah chuan a ding zum nghal zat mai.

Ni lo...ni lo...a hun thlawt lo...Ka mit ka chhing ta ngawt.