MON HOMME-26

Chapter- 26

'Hey,Ida...i lo bang tawh law?” Ruatfela awin a rawn ti a, ka mengchhuak nghal vat..Ka thaw nghal huai mai bawk.

Ida-i lam ka hawia,min rawn en a, Darian-a a en leha,ka lo ip chawih ringawt,mahse, Ruatfela'an a pawm kang ta nawlh.

'Lo awmpui lawk mai la,inleng ka nei laklawk sia...' ka aw khur hrep pawh chu a..

'Tehreng,lawk..Anu fawp phawt la..' tih pahin a rawn pawm pheia,ka ding nghal vat,ka nghawngah a rawn kuaha,ka biangah a fawp zauh bawk,ka fawp let ve a,Ruatfela bula lo awm turin ka hrilha,a bu nghat,Darian-a a melh leh zawka,mahse Ruatfela lam a ngaihven ta zawk.An inpawmchhuah takah chuan ka thawveng nghal huai bawk.

Ka thu leh te tea,Darian-a lam ka en ta chauh,mahse min en loin Kawngkhar lam a lo thlir vung vung,Eng nge a ngaihtuah ang? Ida-i ni lo hram tehse.

'Min hrethiam la,i rawn thu dawn nge i kal leh zawk dawn?” ka ti a,ka aw a chang fak bawk.Min rawn en a,engmah sawi loin a bu nghut a,a rawn kal pheia,ka hma zawna Chairah a rawn thu thla a,mahse tawng tum awm pawn a awm chuang lo.

'Kan sawi tan dawn a mi niang?” ka ti leh nghat.

'Maw?” min rawn en a.

'I lo kal chhan kha ania ka tih?” ka ti leh hmaka,ka thle bak bawk.

'Oh,nia..lawk,naute kha i fanu tihna mi?” a ti ta sup,ka insehruh nghal teuh bawk.

'Aw,ka fanu anih kha...' alangah erawh ka ti dam thlap.

'Tu nge a pa?” a ti leh tawng,a la ngaireng,a hriat duh zawng pehhel lo a zawh pawp a la ching ta reng.

'I hmuh kha...' engvangin nge a pa angah Ruatfela ka chhuah ngawt keipawn ka hre bik lo.Mahse, tunah chuan a aia tha chhuanlam tur ka hre lo,a thi tawh tiin chhang ila chuan khawvelah kei aia mawl an awm kher lo ang.

'Takzet...' a ti supa,ka ngaihtuahna hriat tum niawm takin min en run bawk.

'I lo kal chhan lam zawk kha kan sawi tur niin ka hria,i lo hria em ka hre lo a,buaina dang pawh ka nei a..' ka dar ka tichhing ak bawk.

'Nimina kan sawi ang khan i ti duh lo anih chuan min khing thei anga,anih loh chuan Deal kan siam thei..' a ti ta nge nge.

'Deal...min hrethiam la,nangni nen Deal siam kan mamawh na ka hre hauh lo mai'

'Aahh,keini chuan kan mamawh lem lo,mahse hmundang inzawn chhung atan deal siam induh chuan ka ti mai zawk' a ti leh nghuta,a sawi dik tih ka hria,eng dan pawh hmang dawn ila tunah chuan a neitu a ni a, chak ngaihna eih a awm lo.Deal min siampui an duh anih chuan lawm hle tur kan ni zawk ang,mahse...ani nen kher chuan ni lo lul rawh se.

'A neitu hmasa nen kan inbiakna kha min pawmsak zawk la kan lawm ngawt ang' ka ti ta zawk.Mamawhtu ka ni tih ka hria,mahse mamawh lo thei a awm ka duha,chu chu hmuh tir ka duh ber bawk.

'A neitu hmasa chu theihnghilh ta zawk la a finthlak in ka hria,tunah chuan a neitu ka ni a..'

'Engvangin nge he Khawpui chhungah hian Building tamtak a awma,he Building kher hi i mamawh a?” ka insum hman lo.Mahse, a then suk ka hmuh rualin ka thusawi khan ka landan damthlap phenah ka mangang tih a tilang vek.Mahse,ka sawi zo vek tawh..Awmzia a awm lo.

'A hmun hi a rem a,nangin i hlawkpui ang chiahin ka hlawkpui bawk dawn a..' a ti a,a hmelah nuihzatna niawm tak a lang thei bawk.

'A tha alawm,nia..i ta a ni tih ka hria,midang ka lo rawn dawn nia..' ka ti ta nge nge.

'Ok..a tha..naktukah lunch ei pahin kan sawi fel thei ang chu..' a ti a,ka bu nghat ringawt.

'I tawmbo thei hle mai' a ti leh thut.Phawk zetin ka en a,a hmel tak run maiah chuan nichin lawka a hmela nuihzatna niawm tak kha pakhatmah hmuh tur a awm tawh lo.

'Min hrethiam la...' tih pahin ka tho a.a thusawi ka haider hmiah.

'Ok..chuan,Fanu i nei hmeltha takzet..' thawh pahin a ti leh sup,harsa zetin ka then lui sak ringawt.

A kal hnuah ka thu thla hnawk,ka chau zual hluah hluahin ka hre mai,a hmain ka lo ngaihtuah lawk vek tawh,a fanu a ni tih a hriat ka duh ngai lo ang,min chuhpui dawn miah lo tih ka hrereng chungin tuman min laksak ka phal lo ang ka,mahse..a fanu a ni tih a hre lo tih a taka ka hmuh takah chuan atthlak lutukin ka na leh lawi si..

Ruatfela nen kan inbiakna chungchang kan sawi dun a,a sawi lang chiah lo nain ani chuan Deal neih a duh tih ka hmu thiam tho.Ka pasal hlui a ni a, Ida-i pa a ni bawk tih a hria,chuvang taka min nawrlui duh lo a ni ngei bawk anga,bakah kan inthenna boruak chhe lutuk kha kum kal daih tawh nimahse hriat pawh a hre mahna le.

Ida-i Doctor kan hmu a, kan haw kawngah a muhil ta tlan,ka pawm beta,ka khawngaih hluah hluah,engtikniah emaw chuan Pa neih a la duh ve ngei ang,mahse a pain a hre lo a,pa a nei ve ngai dawn lo tih a hriatthiam hunah chuan a pa huatna nen a nun a hmang hial maithei,apa ang chiaha luhlul leh rilru lian a ni a,thilawmzia engkim hrilh tlak anih hunah eng nge thleng ang ka ngaihtuah ngam lo zawk.

In kan thlen hnuah Dama min rawn call tumna ka hmu ta chauh,ka call back nghala,ani tal hian In luah tur lo hria se ka ti ngawih ngawih.

'Hello...ka rawn call che a' a pick veleh a rawn ti nghal lar lar,tunah chuan nupui neiin fa pakhat an nei ve tawha,ka thian tha tak a ni zui ta zel.

'Ka lo hre lo a,i hmu ta em?” ka ti nghal zat.

'Hmu ti ila vawiinah Chanchinbu a chhuah turin an rawn daha,Advertisement a tam deuh avangin naktuk tuklehah kan dah thei dawn chauha,chumi hma chuan naktuk lamah i va en dawn ami ka ti” a rawn ti duah.

'A va tha em? Khawi hmunah nge?” ka ti a, an veng a rawn sawia,duh ai chuan a penhleh deuh nain duhthlan tur dang ka nei chuang lo a,pawi ka ti lo.

'Ok,a lawmawm lutuk,min kalpui hman nge hman lo?” ka ti leh a.

'Hman ka lo tum ang,chuan,tlai lam kha kal in tum em?”a rawn ti a.

'Eng nge tlai lam?” ka ti ha mai.

'Seni man eina kha..'

'Oh..ni tak' ka ti hliai,ka lo theihnghilh hmin hmak.

'Chawhnu lamah kal ila,kan kalna tur atang khan Seni te in a hnai tho a..kan tlang nghal anga nimai lawm tiraw?” a rawn ti leh zung zung a.Ka bu nghat,mahse min hmu thei lo tih ka ngaihtuaha,ka nui sak ringawt.

Duati ka call leha,kha nu rapthlak zetin min tihmualpho a tumna lam kha engtia hmalak tur nge tih kan sawi duna,a duhdan chuan aman a lo be phawt anga,a lo tih dan a zirin sawi zui leh turin a ti a,a tuk lama beihzui turin kan ti bawk.

'Lawk,khanu khan ka ngaihdan pel thil a ti anih chuan a chhe ber thleng ka huam ania' a rawn ti leh a.

'Engti zawngin?” ka ti sapa,ka hrethiam chiah lo.

'Comment engmah i chhiar dawn lo tih ka hria,Comment naah khan Fake Ac pakhat hian Darian-a chungchang vel kha a rawn sawia..' ka thaw hak mai.

'Ngatinge mi hi an sual em em le tiraw?” sawi tur dang ka hre hlawl lo.

'Dik chiah,an tana tangkai si lo hi an sawi zela,mahse lo hahdam rawh,ka khalh fal meka,amah ka hrethei vat ang,khanu chhung hnai kha a nih chuan ka che na hle ang..I thiante hi tumah kan la thi em hleinem' a rawn ti leh hmak hmak mai,a ti ngei ngei dawn bawk tih ka chiang nghal vek.

Ka mumang a buai nuaih nuaih mai,muhil leh lawk ngam loin ka mu meng kara,Ida-i sam ka khawih niap niapa,ka rilru a buai vel vek.Kha thil kal liam tawh emaw ka tih khan engchen tak min la tibuai ang maw?tunah pawh ka eizawnna chungchangah mualphona ka tawk meka,mahse chutah mai chuan an duhtawk lo,Darian-a nen kan chungchang nen lam an sawi chhuak tha leha,thlamuang taka kan Eizawnna hmun lah chhuahsan a tul bawk..Huizz,engvangin nge ka nun hi tluang taka ka hman theih miah loh ka hrethiam hlawl lo.Mahse, tunah chuan ka puitling lehzual tawh,engpawh ti ila keima tan ni loin Ida-i tan zel a ni a,engmah hi tuar mai mai ka tum tawh lo.Ka chak loh ruala chak lo ve nghal tur,ka nun chanve anih ang bawka a nun chanve ka nihna ka fanu vang hian ka tluk sawp a thiang lo a, ka chak loh a thiang hek lo.Ka hmaah tu pawh ding rawh se, Darian-a a ni emaw Emily pawh ni rawhse, ka nun an tihchhiat man an hmuh ngei ngei angai,an tih tawh bak kha pen khat pawh an pen a thiang lo bur.

Office ka thlen veleh Darian-a te Office lam atanga Lunch ei paha inbiak an duh thu ka dawng nghal zat,ka then sak mai,kal tumna ka nei eih lo.Ruatfela a kal ang,mahse a kal hmain kan duhdan engkim kan sawi dun hmasa vek.Thla hnih atan kan duh lo a, a reilo berah thla 3 a ni tur a ni a,anni lamin enge duh an neih dawn erawh kan hre lo.Kan Sumdawnna tereuhteah hian anni tan engmah han awh tur a awm tlat lo.

Dar 12 pelh hretah Dama'n min rawn lama,nimin lam ang lo takin khua a thiang vuka,ni a sa vawl vawl bawk.Kan ti ti phei bawrh bawrha,hna chungchang kan sawi dun a,a hnuah kan fate chungchangah kan pakai leh a,thlathar maiah an fa pahnihna a piang dawna,an nu hi nu lian leh hmeltha tak,rilru zau em em mai a ni a, kan inkawm thei viau bawk.Ida-i aiin kumhnihin a nau zawka,Ida-i thawmhnaw hak tawk tawh loh zawng zawng pawh anni hian an khawm vel vek.

Ka beisei loh lutukin In neitu te nen kan inbe fel titih ta tlat,Office pangngai ni theise an duh a,mahse keini in Hostel atan Floor khat leh Office leh class room atan floor khat kan mamawh ve thung a,an nupa a awm anni a,Kawngpui atangin a hla deuh tih mai loh chu han sawisel na tur a awm lo.A tuk lamah kan duhdan te sawia inbe fel turin kan thlaha,Adveritsement pawh dah lo law law turin kan ti ta bawk..Ka thaw huai huai mai..Tunah chuan pakhat chu a fel ta phawt.

'Ka la zawt miah lo che a,in building luahlai chu tu nge lei reng reng a?” thil kan ei laiin Dama'n a ti thut.Ka thil ei ka hak a,ka khuh nghal bawrh bawrh thung.Tui min rawn pe a,ka ban vat..

'Ngatinge a?” tih pahin ka hnungah a rawn chum dat dat bawk.

'Ka hak...' ka khuh leh rih..

'Ka hria alawm mawle,ka sawi zawk chu tu fakauin nge in chu lei a?” a ti leh a,a thutnaah a thu leh a,a thil ei lai a eizawm leh nghal zat.

'Ka...eng lo,Darian-a' a hak ve ta thung..

'Zawng chu le(h)..' a tawngchhuah theih veleh a ti nghal hlak mai.Ka dem lo,a huatzia ka hrechiang ve tawk.

'Engvangin nge a lei a?” a ti leh hmuk.

'Ka hre bik lo..a mamawh aniang' ka ti sap ringawt.

'A mamawh hlawl lo ang,a sual vang anih chu,khatiang khawpa i tuar tawhna kha a la duhtawk lo aniang chu” a ti leh a,a eiturin a ti thinrim emaw tih mai tuin Forkin a hawlh sawk sawk bawk.

'Enteh..i ei tur kha Darian-a a ni lo ania..' ka nuih a za lo thei lo.

'Ka nuih a za miah lo,tak tak..i hmu tawh em amah?” thutak zetin a ti leh nghauh.Tawngkaa chhang loin ka bu ringawt.Na zetin plateah Fork a dahthla chawrh.A rawn kun hnaia.

'Ida-i a hmu em?” zawi tein a ti a,ka ngaihtuah ang tho a ngaihtuah ve tih ka hrethiam mai bawk.

'Aw..mahse..a hre lo ang' ka nui lui sak.

'Enge a hre lo tih chu a awmzia?”

'A fanu tih mawle..' ka ti sap.

'A lawmawm nasat chu,mahse a hrechhuak tho ang' min bia ni loin amah leh amah a inbia a ni mah zawk.

'Kan kal tawh dawn ami?” ka ti ta zawk.Diktak chuan Ida-i leh Darian-a chungchang sawi zawm tumna hrim hrim hi ka ngaithla peih lo bur.

Chaw kan ei laiin Office atangin min rawn calla,ka kal hma khan ka let tawh dawn lo tih ka sawi sa vek.

'U Zampui..' Mapuii awin a rawn ti a.

'Aw, Mapui,pawimawh a awm ami?” ka ti a.

'Aw...awm animai,inleng i nei a”

'Vawiinah chuan ka lo let tawh lo ang ka tih kha,lo hrilh la..Naktuk lamah lo kal mai se' ka ti a.

'Ka hrilh alawm,mahse a pawimawh lutuk a ti a..'

'Tu nge?' ka ti hlak mai.

'In neitu thar te lam atang khan ania..'

'Ok,ka lo let tawh lo ang..Bakah hlau vak suh,in thar kan hmu e' ka nui hak bawk.

Mahse,ka tum loh dana awm angai leh ta lawi,Officeah Ida-i thil tur ka lei ka theihnghilh a, kal leh ngei ngei ka ngai,Bakah Scooty pawh Officeah ka la dah daih hrim hrim,ka nui hak mai.Dama ka hrilh ve a, a nui ve hawk hawk bawk.

'A kal chiah' Mapui'n min hmuh veleh a lo ti a,hlauh nei hmel a pu deuh bawk.

'A that chu,thil ka theihnghilh a, bakah Scooty pawh hetah ka daha' Zama a nui hak mai.

'Tu nge lo kal hrim hrim? Nimina lo kal kha a ni em?”

'Aw...' Dama ka en a,ka thle bak..

'A kal hman hlauh chu a tha anih chu..Naktukah In chu kan va kal nawn leh anga, thlathar hlimah kan

lut thei maithei,tunah thla ala tir bawka,an chei nghal char char chuan an zo mai ang' ka ti leh a.Ruatfela a rawn lut ve leha,ka sawi ngai bawk ka sawi nawn leha,mahse a bu liam satliah mai mai niin ka hre thung.

Dama kal hnuah Ruatfela nen ka Officeah kan inzui luta,a mood a tha lem lo anih hmel viau.In thar kan hmuh thu ka sawi pawh khan a lawm hmel vak chuang tlat lo.

'Hey,tu nge hau che a?” nui chungin ka ti a.

'Tuman...' a ti tawi tak mai.

'Tak takin i nuam vak lo mi? Nge keima thuin In ka lo be fel titih kha i lawm vak lo zawk?” ka ti leh a.

'Aih,chutiang engmah a awm lo,diktak chuan ka lawm zawk.Deal kha engmah kan siam ta miah lo a..'

'Maw? Ngatinge?” ka ti ha mai.

'A duh leh lo...' teh tawp chuan a..Ka lo tum dan kha chuan Deal engkim an lo siamfel anga, mahse engmah sawi loin ka pal zut ang ka lo ti kha ania.

'Ngatinge? A chhan a sawi em?” a lang erawh chuan ka ti dam thlap.

'Aih,sawi lo..rei pawh a thu lo,a Manager zawk nen lunch pawh kan ei a' a ti a, ka thaw hak mai.Eng chu a hria ni maw?

'A pawi loah ngai mai ang,vawiina kan biak kha kan tum anga a fel nghal vek chuan thla thar hlimah kan lut thei ang,mahse kan pawisa erawh kan chan dawn anih hmel..' ka hmui ka pet a,thla khat luah man pawh a tlem lo..Mahse, engmah tih theih ka nei chuang lo.

'Engtin nge Facebook lam kha ni dawn ta?” a ti leha.

'Ka hre lo,Duati kutah ka dah vek,kan zawt ang..' ka ti a, ka phone ka bana,mahse, ngaihtuahna thar ka nei leh ta zawk.

'Zanah ka be zawk mai ang,tunah chuan a tlai tawh sia..'ka ti a, ka sana ka en zauha,Dar 5 leh a chanve a pel tawh.

'Um,nia..kha a zia lo hle mai,thil hlui pui pui an sawi chhuak vak maia..Inah awm zawk la a tha angem te ka lo ti a” a ti leh duah.Ka thle baka,ka nui sak ringawt.

'Ka ti tak tak,i tan chhuah vel a nuam lo angem ka ti deuha..' a ti leh talh.

'Aih,khawiah pawh awm ila an sawi reng dawn,chu ai chuan hre lo der hmak ila,,Nun phung tibuai lo se a tha animai,mahse kan Agency a tih mualpho man erawh a pek angai ang' ka sawi tawp lamah ka tum aiin ka aw a chang lam hret.

Zanah Ida-i ka mutpui laiin Duati'n min rawn calla,a rawn thinrim ngang mai bawk.

'Enteh,i hria em ka hre lo a, mahse kha Ramhuai sual kha Emily ni anih kha...' a rawn ti hlar mai.

'Chutia law? Lehzel chuan a...' ka ti sap ringawt.

'Ka la be lo,kha Fake ac kha Apuia'n a lo ena,a hre thei,kha Pitar fanu kha a lo nia..Mimal intihhmingchhiat tumna tiin FIR i dah mai dawn mi niang?” a rawn ti leh hmarh hmarh.

'Aih,ngai lo..an duh duh sawi phawt mai rawhse,naktukah In luah tur kha kan biaa,kan biak fel theih chuan keiman ka lo hmu dawn nia'ka ti dam thlap.

'Ka lo kal ve ang..'

'Ok,tehreng mai..Sawm che ka lo tum sa alawm'

Buaina lah hi a lo thlen chuan a mal mala lo kal loin a rualin a lo thleng pup pupa,ka eizawnna mai bakah ka nunah Darian-a a lo lang leh ta bawk.Dama thinrim zia ka ngaihtuaha,ka dem hlawl lo..Mahse, a sawi ang khan a hriatchhuah hunah engtin nge hma a lak ang ka hre lo.Kha lehchen kha fanu a nei tih a lo hre miah lo tak tak angem? An in atanga min hnawhchhuah zan khan hlim em emin nau ka pai tih hrilh tumin ka lo nghaka,mahse ka tum lawk loh,mumangah pawh ka man chhin ngai loh angin thil a thlenga, In ka chhuahsana,an nun atangin min paihchhuak bawk.Khami zan atang khan nung reng chungin ka thi a,mi pangngai anga ka nun lehna chu ka fanu pian hnuah chauh,mahse ka tan chuan Darian-a erawh mithi a ni ta thung. Mahse,vawi engzat nge amah ngaihtuah chunga ka muthilh ka hre seng lo,theinghilh tum tak takna ka nei em pawh ka hre chuang hek lo.Ka chhungril hmun kil khatah hian tuma hawn theih loh turin kan pahniha hun kan hman dun zawng zawng te kha ka kalh hnan vek a,a reh tak tak ka phal lo zawk a ni mai angem?

'A lo kal leh...' Office ka luh rual rualin Mapuii'n a lo ti nghal a,a thusawi ka man mai lo.

'Tu maw lo kal?” ka ti a, ka rain coat phelh tumin a kilhna ka phelh a.

'Nimin a mi kha..ih..In neitu thar..' zawi te bawkin a ti leh sap.

'Enga? Ngatinge a hmain min hrilh lawk loh a?”

'Ka rawn call che a, i pick lo lawm..i Officeah a awm' a ti leh sa sa.

'A pawi lo..Min be duh aniang,eee.In luah tur kan biak chungchang kha tuman hre rih lo se, ka tih awmzia chu keimahni bak hian aw..' ka ti a,a bu nghat..

Ka rain coat ka khai fela,Coffee ka thli leh te te,diktak chuan hmuh chakna pakhatmah ka nei lo.Amah ka hmuh rualin ka natna zawng zawng kha a lo let leh vekin ka hre miaua.Mahse, helaiah hian a lo kal fo loh nan engemaw ka tih angai.

Kawngkhar ka hawnga, Tukverh bulah kekawr ipte zen tut chungin a lo dinga,ka thawm hraiin a rawn hawi vut,Cotton Jeans dum a haa,T-shirt nghawng kual tawp a dum bawk a haa,a chungah Jacket a hak hnan leha,a hmel nelawm lo zet leh a thawmhnaw dum hak chu a inhmeh vel vek.A thawmhmaw hakin a taksa a phuar deuh tanga,a pian nalh zet kha a la ngai reng.Ka ngaihtuahna duh loin ka lu ka thing nak mai.

Engmah sawi loin ka chair ka pana,ka chevel min enzui reng tih ka hria,ka bag leh Coffee no dawhkanah ka daha,Computer ka on nghal bawk.

'Sawm loh inleng neih hi ka duh vak lo...' ngawihreng nuam ti lo in ka ti nghat..mahse ka en chuang lo.

'Anih chuan nimin khan engvangin nge i lo kal loh?” a ti hmuk.A mood a tha tehchiam lo a ang.

'Nimin a ka lo kal loh vanga helaiah i lo kal a tul tih ka lo hre hleinem' ngeiawm zetin ka nui lui hak bawk.

'Ka biak duh a lo kal loh chuan ka kal angai, I theihnghilh tawh a ni maithei,ka duh chu ka nei ziah thin ,eng kawng pawhin...'nghet churhin a ti hmuk..'ka hria..engmah ka la theihnghilh lo ' tihkhum nghek ka chak zek zek.

'Ka lo kal ngai loin midang an lo kal alawm' alangah erawh chuan ka ti awlsam et.

'I ai kal kha ka mamawh lem lo..' bung zetin a ti leh nghut.

'Eng nge i duh?” ka ti ta hmak.

'Ahh,eng nge helaiah hian han duh tur dang vak awma?” ka en ta nge nge,mahse min lo en reng chu niin,kan mit a intawng saka,rang zetin Computer lam ka en lehnghal vat.

'Min hrethiam la,helaiah hian lo kal tawh lo la ka duh khawp mai..Mi in thil ni lo lo an sawi fo hi ka duh vak lo...'ka aw a dam thlap nangin nelawmna a tel lo.

'Enge sawi tur awm a? A nupui hlui a tlawh leh tih bak...'

'Chhuak rawh...' adang sawi tur ka hre lo.Mahse, ngaipawimawh lo zetin a dar a tichhing uk duh chauh.Dawhkan a rawn pan pheia, thu loin a kut pahnihin a rawn nema,a run kun hniam du bawk.

'Ka lo kal leh ang,nangmah ni loin ka fanu hmu turin...' engmah ka sawi thei lo,ka khawng vek nimaiin ka hria..a dingmar a,a inher a,Kawngkhar lam a pan chu ka thlir mawl tawp.Ka mawl huih a ni ber.

Ka phone riah ka phu zawk,engchen nge ka thut ngaiin ka thut ka hre lo,ka bag atangin ka lachhuaka,Dama..

'Hello...'

'Officeah i awm tawh em?” a rawn ti lawng lawng.

'Um,awm e..khawnge i awm?”

'Ka lo chhuak dawn chiaha,ruah a tla reng bawk sia,Taxi in kan kal mai dawn mi?” a rawn ti leh a.

'I tih dan dan,ka lo nghak ang che'

'I va that loh hmel ve' a rawn ti ta chat. Ka ngaihtuahna buai nuaih nuaih thup ka tum teh nangin a hre ta chat tho.

'Tha,ka lu a nuam lo deuh mawle..' ka ti ta zawk.

'Ok..ka rei lo ang,damdawi te lo ei la..'

In neitu te hnenah kan kal dawn tih phone in ka hrilh lawka,an nupain an lo awm ve ve,kan luah dan tur leh a man engkim kan ziak fel veka,a hma a ka tawn ang tawn leh ka hlauh zia ka sawi nawn ngun viau,mahse an mahni floor chung bera awm anni a, an hralh phal dawn lo tih an sawi ve thung.

Duati ka calla,tlai chaw ei turin ka sawm nghal zat,a lo phur phian zui bawk.kan inluah thar tur chungchang Ruatfela nen kan sawi duna,kan pawisa hmanna tur vel kan en dun nghal bawk.Khanu nasa zet kha ka calla,a la pick duh lo zui,ruah sur a zia deuh veleh ka inkhalh chhuaka,call pick duh lo eng ang mahse an In ka hriaa,buaina a awm lo.An in ka chhuahsan atanga darkar khat a ral hmain Facebookah ngaihdam dilna post a awm thu Mapuii'n phur fahranin min rawn hrilha,ka nui var var mai.Mahse,a thil tih avanga ka kalsan tawh thil hlui ka nuna lo let leh erawh a ngaihdam dilna khan a ti reh thei dawn lo tih ka chiang.

'Zampui'

Hmeichhe awin ka hnung lam atangin a rawn ti a,ka hawichhuak vat,Emily nen kan inhmachhawn leh ta ran mai,ka hmuh hmasak zawk kha chuan min hmuh vangin a hamhaih kha ania, tunah chuan khatiang engmah a lang ta lo.Ka hriat thin Emily,induhtawk leh lu zo vah,hmeltha leh nalh tak kha a ni leh tawh.

'Min ko em?” ka ti dam thlap.A rawn kal hnaia.

'Aw, ko e..Office thar tur i hmu tih ka lo hriaa' a ti leha,ka bu nghat..

'I hre dik anih chu..' ngaihsam hmel fein ka ti liam puata,ka thil tihlai ka tihzawm lehnghal zat.

'Eee, thil pakhat,fanu i lo nei reng a ni maw?” a ti leh a,a hmui nalh zet a pet zauh bawk.

'Aw,nei..eng nge i duh?” ka laptop ka khup a,ka dingchhuak nghal bawk.

'Aaah,eng duh lo e,Darian-a hian fanu a lo nei reng tih a inhrechhuak a...' ngeiawm zetin a nui hak bawk.

'A fa a ni lo..' ka aw a ring lo..

'Oh,nia...khatiang Hmeichhe naupang dawldang leh tawngthei lo kha a fa a ni lo tawp ang...'

Engmah ka sawi thei lo,Dawhkana lam ka en thla a,Glass bur tung nalh zetah Pangpar a inkhawia,a chanve aia sang hret tuiin a chim bawk,Pangpar ka phih chhuaka,ka ding mar leha,a hmaiah ka theh ta zawk.A rak thawt bawk..

'Em..ngatinge?” Darian-a a rawn thleng ve chiah nge ka hmu chiah ka hre lo.Engpawhnise pawi ka ti hek lo.

'He nu hian tuiin min theha...' a inhnit zui hlap hlap mai.

'Dik chiah,a aia tam kha awm se chuan theh lo in i chhip atang khan ka leih ang che.Chuan hei hi hre rawh,ka fanu chungchang hi tawngkam khat pawn i sawi leh anih chuan i lei ka pawt dawk ang...'

Ka bag ka laa,ka Laptop ka pawma,hawi let eih loin ka kal nghal nal nal bawk.