MON HOMME-28

Chapter- 28

Zan atangin Ida-i khua a sik hluah,Chhuani lah niminah an khaw lamah loh theih lohin a haw a,a rei lo berah thla khat lai a awm ala ngai dawn zui.Hna ka kal dawn lo tih Ruatfela ka hrilha,Ida-i a dam lo tih ka sawi rualin a rawn phili nghal titih,mahse khawsik satliah a ni tih ka hrilh a,ngaihtuahawm a ni lo tih ka hrilh bawk.Kan inpawm deuh chawt,a nawm loh avangin a pangchang thar riau bawk.Pawn lamah ruah a sur tlawrh tlawrha,Fur chhe lutuk zawh a hun tawh,,mahse kumin chu fur hian tawp a tum lo emaw tih mai tuin Ber thlaah pawh a la sur ta tluk tluk mai.A chal ka deka,a khawsik a ziaawm tawh,a damdawi eiin a hneh deuh bawk aniang a muhil bama,a sam a hnawk niaih bawk..Dimtein ka pawm thaa,Khuma mut tumin khum lam ka pan puia,khumah ka mut a,ka mutthla ve a,nizan ka mu tha lo bawk nen a muthilh laia muhthilh ve vang vang ka duh.

Door bell riah chiang lo ruaiin ka harha,ka hresual emaw tiin tho mai loin ka mu leh rih,mahse a rawn ri leh a,ka thu chhuaka,Tukverh atangin pawnlam ka ena,ruah sur nasa lutuk kha a ziaawm ta deuh anih hmel,thenawmte inchung ruah in a nan rik pawh a zia tawh.Ida-i ka melh zawka, tui zetin a lo la muhil tlan,a chalah ka zuk fawpa,a khawsik engmah a awm tawh lo..Door bell bawk..

Kawngkhar ka hawnga,ka beisei loh zetin Darian-a a lo ding run,a huh deuh phung bawk,ka thaw hak mai.

'Enge i duh?” ka ti nghat,Damdawiina ka hmuh atangin ni thum a liam tawh.

'Ka lo lut thei em?” a ti sup,a sam a tuai puat bawk.Hreh zetin ka tawlh sawna,min rawn kalpela,Living room lam a pana,kal pahin a Jacket a phelh pah bawk.

'Towel i duh em?” ka ti ta nge nge.Tihngaihna dang a awm lo,a huh tlat hek.

'A lawmawm ngawt ang..' a then suk bawk.

Roomah ka lut pheia,Towel ka laa,Ida-i ka thlek leh zawk,a la muhil tui ngang mai bawk,Living roomah ka let pheia,mahse ka thil hmuh avangin ka pen lai ka tawp chawt.Min hnungchhawn zawngin a dinga,a Jacket mai pawh ni loin a T-shirt hak a lo phelh mek,a pian nalh zet chu en loh dawn pawn en loh a harsa,a dar a hlai hlapa,a kawng a fek leh rat lawi..Thau chhia awm loin a phiar fata,tenawm khawp Sek a ni leh chuang hauh lo.Hmanah kha chuan a pian nalh lutuk hi Hmeichhe dang ta ni loin ka ta bik liau liau leh keimah chauhin ka hmuh tur emaw ka lo ti thina,he Taksa nalh lutuk neitu nen hian Hmangaihna kan chen duna,tawp chin awm lo khawpin..A rawn inher thut,rang lutukin ka hawisawna,mahse a nuih suk danah ka en tih a hria.Mawl inti lutukin ka inhau ru mawlh mawlh,awmzia a awm tawh der lo.

'Kha...' tih pahin Towel ka pe a,ka hmai a sa hat hat mai.

'A sur duh hle mai' a ti satliah,a san hnawng deuh chap a hru nghal mawlh mawlh,chhang loin ka kalsawna,ka thu fel ta than.Ka ep zawnga thutthleng awmah a rawn thu thla ve a, Towel a darah a bata,a ban vel a hru pah mawlh mawlh,hahdam tak anga lan tumin hnunglam ka nghenga,mahse, chhungrilah ka tang ru teuha,inthlahdul ka tum pawn ka beidawng a ni ber.

'Ida-i a muhil a...enteh,rawn hmu fo lo la ka duh,naupang a ni a, tulloah beiseina siamsak lo ang' reife kan ngawih hnuah ka ti chhuak ta nge nge.A hmui a peisawi zauha,hriatthiam har zetin min en run bawk,kawr a ha bawk si lo nen ka awm a nuam thei hlawl lo.

'Ida-i vanga lo kal ka ni lo ti ta ila...'a thle buk,hnunglam a ngheng a,mahse,a hawi sawn chuang lo.

'Ida-i vang anih loh chuan hna lam chu Officeah kan sawi thei a..' ka ti nghat.

'Um,dik chiah..'a ti sup.

'I kawr ha teh,mi lo kal palh se ngaihdan tuihnai lo zet an neih ka duh lo ania' ka ti leh hmak.

'Ahh,ngaihdan tuihnai lo chu enge ni ang? Nupui hlui bula kawr ha lo a awm chu a tha lam aniang chu..' ngaipawimawh lo zetin a ti liam puat.

'I Emily a lawm vak lo tawp ang...' ka then sak.

'Ka Emily anih pawh ka lo hre hleinem,bakah Hmeichhe ho hian in duh chu Sum vek nimaiin ka hria' a thle buk bawk.

'Ka ni ve lo hlauh mai..' ka then lui leh sak.

'Um,ka hria alawm,chuti ni lo se kei aiin Dama i thlang nang”

'Dik chiah..' hnial ka tum zet nangin ka ti ta zawk,a duh duh ring se la,a duh duh sawi bawk sela,eng nge buaina tur awm? A dik chu kei leh Dama mai bakah Dama nupui pawn a hrechiang lutuk tlat.

'Ida-i enkawl phalna ka dila...'

'Enga?”

'I beng a ngawng loh kha...nge ka sawi nawn leh hrim hrim dawn?” ngeiawm lutukin a nui hawk bawk.

'Ka haw lutuk che' engmah sawi tur dang ka hre lo.

'Yeap..ka hria alawm,mahse min haw mahla i fanu anih ang bawkin ka fanu a ni ve,ka thisen..ka ta...' sawi mai tur ka hre lo,hei hi Duati hlauh ber kha a ni a, 'engmah min hrilh loin a thukru tiin an rawn khing ang che tih ka hlau ber,kan tan chance a chhe dawn lutuk' tiin a sawi lawk vek.

'Ni lo....i ti thei lo ang,bakah Ida-i pawn a duh lo ang' ka hrawk ro lutuk tih hnawn nan harsa zetin ka chil ka lem a.A hmel tihmawlh leh ngeng ngulh mai chu ka en ran bawk.

'Lungngai suh,chuti lutuka nain ka ti lo ang che,ka laksak satliah ringawt ang che..'

'Darian...' ka ti that mai.Ngaipawimawh lo hmel zetin a mithmul a ti sang zauh duh lek.

'Thil pakhat tihdan a awm,laksak che i duh loh chuan min neih leh mai angai tihna anih chu..' ka hresual emaw tiin ka melh reng ringawt.A nui suk,beidawng thinrim lutukin ka nui chhuak ve hawk tho mai.

'Naupang hian a duhna a thlang thei,keima bula awm a thlang ang'

'Maithei,mahse a thlang lo maithei bawk,hmanni khan Pa neih a duh tih a sawia..' ka ang pham mai.Vawikhatmah ka bulah Pa neih a duh thu a la sawi ngai lo.

'Ka...ni lo,chutiang a sawi lo tawp ang...' ka ti bah nawk nawk mai.

'Ah,Ola..sawi chiang e,ka fanu hian Pa neih a duh anih phawt chuan keimah ngei ka ni ang,ka ni sa reng bawka,kha Mi tenawm Dama kha ni loin..' a sawi tawp lamah thinrim aw a hriat tel theih.

'Dama...ni lo...engtin nge i sawi theih zawk?”

'Oh...engtin nge ka sawi theih maw? Ka nupui khan ka bula Hmangaihna a chen ang chiah khan khapa bulah khan a lo chen ve thin a..' Ashtray a thlawk phei fua,a thle zauha,bang a va fuh dawta, a kehchuai bawk.

'Chhuak rawh...Chhuak rawh' ka te zui nghek,ka hmuh leh hmasak ber atang khan Cool takin ka hmachhawn theia, tunah chuan ka thei tawh lo..Ka lo insum ve hram hramna te kha a puakkeh ta vek.

A rawn dingchhuaka,ka che phat,Kawngkhawr lam ka pana,mahse ka tlai hret,min thlen khalha,kawngkhar a ngheng bet nghal hmiah.

'Chhuak rawh,hei hi ka in anih hi..' ka ti leh tuar. Mahse, min rawn pawt thuta,a taksa lianpui si chetin ka bet nghal rawk.A chetdan ka lo beisei lawk lo bawk nen talchhuah mai nachang hreloin ka din ngaiin ka dinga, a taksa lumnain min ur ham ham pawh ka hrethei hial bawk.

'Min en rawh..' tih pahin ka tukkhum samah a rawn thama,amah en thei turin min kuai dak nghal hmiah bawk.

'Min thlah rawh..' ka tal laih,mahse ka sawi hre lo niawm takin ka sam a thamna a nghet sauh thung.A mitmeng nelawm lo zet chu ka en a,thinrimna vangin a thim khap bawk.

'Fanu ka nei tih thup ngei khawpin enge tihsual ka neih?”

'Ka haw lutuk che...'

'Ka hria,mahse ka zawhna che i la chhang lo..'

'Ka beiseina zawng zawng tichhiaa,mi a ang maia khawsa tura min thehchhuah hnuah pawh i la hre lo amaw?” ka tum loh lutukin ka mittui a rawn tlaa,ka biangah a lum thla pap pap bawk.

'Oh...' a ti sup.

A kutzungpuiin ka biang a rawn tuaia,ka lungchhe zual sauh,ka hrehawmna zawng zawng kha avaiin a rawn let leh nimaiin ka hria.Mahse, tu vang nge? Amah hi a ni lawm ni khatiang khawpa naa min siam tu kha...Ka tal leh phat,min thlah ve mai bawk.Ka mit ka hru zauha,ka aw ka thian khauh bawk,huaisenna ka mamawh,keimah leh keimah ka inkhawngaihna hi tunah tihlan hun a ni bau lo.

'I hre lo ang,a chhanchu hriat i tum ngai lo hrim hrim,tunah chuan a tawp vek tawha, engmah sawichhuah leh a tul tawh lo..' keimah ngai kha ka ni leh ta,ka aw a dam leh thlap tawha,mahse min hrechiang anih chuan min nek luih zel a fuh lo tih a hria ang chu.

'Lawk..' min rawn ban leha,ka tawlhhnung nghal dawrh,a ban a phar hluaia,beidawn hmel zetin a dahthla leh ruai ruai bawk.

'Ka sawi nawn leh ang,Ida-i hi ka fanu a ni a, engvang mahin chan ka tum lo,i duh duh ti la keipawn ka duh duh ka ti ang,achiang em?”

'Ok,khalam chu engpawhnise ka zawhna i la chhang lo..' teh fo chuan a..Ka pan hnai ta thung,kan insanhleih bawk nen a hmel en turin ka dak ha mai.

'I nupui thusawi aia midang thusawi i ring zawk khan i nihna a tilang,chuan,insawifiahna hun min pe tura ka ngen lai che khan i ngaithla lo,tunah chuan engmah sawifiah tur ka nei tawh lo,ka engmah i ni lo a, i engmah ka ni bawk lo a,tun achinah min hre lo angin awm la,Ida-i hmuh i duh anih pawhin insum mai rawh,thla tlemte chauh i la hriaa,hmangaih chiam a tul lo ang,Pa a mamawh i ti tiraw? Keiman a pa tur chu ka zawng thei,Ahhh....zawn pawh ngai loin a awmsa reng...Ka nunah lo inrawlh tawh lo la,i nihna hria ang che...'a lo lang hmasa apiang ka sawi chhuak nghal pawp pawp a ni ber, mahse ka sawi zawh meuh chuan ka thawl huai thung.

Kawngkhar hawnna ka vuana,mahse min rawn pawt let nawk,ka kawngah a rawn kuaha,a mitmeng a alh a ni hrim mai,ka ip chawih thei hial bawk,minute khat lek liamta kha chuan hlauhna pakhatmah ka nei lo kha ania,tunah chuan Jared-a chungchang ka sawichhuah tuma a hmel pawisak nei lo ang chiah khan a awm leh tawh,hlauhna vangin ka tiril a khur a,mahse hriattir ka tum hauh lo.

'I duh duh i sawi anga ka pawm mai ang maw? Teuh lo,Ida-i Pa ka ni a, ka ni reng bawk ang..Chuan,ka theihtawpin ka tihsual siamthat tumin ka bei a,nang hian Mipa tupawh i hnaih anih chuan Jared-a chan kha an chan tur animai,chan che ka tum tawh hleinem' a aw vawt ruih mai chuan ka kawchhung thlengin a fan chhuak vek a ni ber.

Chhan tumin ka ang ziau,mahse Room lam atanga thawm lo chhuakah kan hawi rual thawt,Slipper pawh bun loin Ida-i a lo ding reng tawh,a Teddy bear ngainat ber a pawm ran bawk.A hmel tha takah chuan zawhna nei hmel a pu a,min en tawn sek.LALPA..Mak a ti ang chu, inhmatawnin kan dinga, ka kawngah Darian-an a kuah bawk.

Ka che phat,mahse, min thlah a hnekin min kuah nghet sauh,thinrim lutukin ka en chho ha,a mit a siai zauh,a rawn kun hniama 'Tal vak suh,a nu leh pa a hmachhawn a hun tawh' a ti nghut,Ida-i awm laia intihbuai ka duh loh zia a hrechiang lutuk.Harsa zetin ka nui lui thei hram,duhthlang thei ka ni lo,ka bu ta nge nge.

Min thlaha,Ida-i ka pan hmain amah zawkin a pan pheia,a hmaah a thu hniama,a kut a vawn saka,Kawr a la ha bawk si lo,Towel a bat a,Ida-i a biaa,ka lo thaw dep dep ringawt.Dimtein a pawt hnaia,a kuah a,Ida-i pawn a nghawngah a kuah ve chial bawk.

'Lo kal la,i din reng khan a ti thlabar mai mai ania' a ti sup.Thutthleng lam a pan puia,Ida-i lahin a pa Dar kar atangin min rawn melh kiau bawk.Awmgnaihna hlawl ka hre lo,ka Din mekna chhuat hi rawn inhawng thut se, tla pil vang vang ila ka duh ber.

'I kawr kha ha phawt mai teh' ka ti ta ngawt,a thle buk.

'A huh hi,engtin nge ka hak ngawt theih ang?” a then suk bawk.

'Ha mai the''

'Tehreng mai' ngei lutukin ka melh vak,mahse Ida-in min rawn hui takah chuan ka nui lui ta sak,ka pan pheia,Darian-a erawhin a kawr hak tumin a kawr a la ve thung.

'I ril a tam em?' ka ti a, a lu a thing nar nar,a chalah ka khawiha,a lo lum leh tan tawh.

'Bawihte,Damdawi ka va la lawk ang..' tih pahin thawh ka tuma, mahse ka kutah a rawn vuan ta tlat.Angaihna hre lo zetin ka en a,a hma ang bawk khan zawhna nei hmel a pu leh tawh.

'Ok..lo kal la,kan pahnihin kan kal dawn nia' ka ti a,min rawn kuaha,ka pawm kang nawlh.

'A dam lo ami?” Darian-an a rawn ti sup,kawr a lo ha fel vek tawh.

'A khua a sik' ka ti tawi tak..A bu nghuta,Ida-i chal a rawn khawiha.Eng damdawi nge ka pek min zawta,ka sawia, a bu nghut.

Roomah ka pawm luta, Khumah ka thuttira,Damdawi ka laa,a tet lai atangin Damdawi ei tir a harsa ngai lo hi ka vanneihna pakhat,tlang hrileng a man thei em em a,Doctor kan hmu zawn zut bawk nen Damdawi ei harsat phei se chuan a buaithlak dan tur ka ngaihtuah thiam lo zawk.

Damdawi ka ei tir zawhah tui tlem ka pe a,a tui Bottle ka dah tha tur ka kutah a man bet leh ta tlat,zawhna nei hmel bawk a la pu ta reng..Ka thu hniama,a khupah ka vuana.

'Enge? Sawi la...' ka ti sep,a biang tai deuh hlar chu ka tuai zauh bawk.

'Amah saw apa a ni dawn em?” ka khawng lah mai..Ka aw ka thian te te,chhan mai dan tur ka hre lo.Ka chhanna nghakin min melh kiau a,a vawikhat nan ka fanu hmel en harsa ka ti ve ta hial mai.

'I pe zo tawh em?” Darian-an hnung lam atangin a rawn ti a, ka thaw huai.

'Aw, ka pe tawh..' ka hawi leta,a rawn kal pheia,Khumah a rawn thu a, Ida-i kut a vuan nghal chat.Kalsawn tumin ka tho a, mahse ka kut a rawn vuan leh ta tlat.

'Thil dik lo a awm em?” Darian-a bawkin a ti leh a, min en a,Ida-i a en leha,Ida-i hnenah na a neih leh neih loh a zawta,a lu a thing nar nar ringawt..

'A pa i nih dawn leh dawn loh min zawt a...' ka aw a ri chang chang,mahse a hmelah a hre thei tho tih ka hmu thei.

'Ka lo ti fel ang...Min ring rawh' a ti sup,engvangin nge ka rin tehlul ang? Mahse, enge ka tih chuan ang?

'Eitur ka va siam ang' ka ti sep.Room atangin ka chhuaka,Kitchen ka pana,Noodles leh Pasta chhum tur ka phawrh chhuaka,Electric kettle ka on nghal bawk.

Reivaklo hnuah an rawn inpawm chhuaka,enge Ida-i hnenah a sawi ka hre lo,engmah min zawt nawn ta miah lo.Kan pathumin lunch kan eia,nidang zawng aiin Ida-in thil a ei tha zawk.A pa kawr ro lo hak a ngaithei tlat lo,vawihnih lai a sawi hnuah ka kawr zinga lian ber,mut naa ka hak thin ka hak tir ta nge nge.

Kan thil eina ka tihfai hnuah insuk tur awm ho ka su leh a,eng ang pawn duh lo mah ila Darian-a awmchhung chuan ka lahrang thei dawn chuang lo tih ka hria,an bula awm ve reng ai chuan tihtur ka neih ang ang lo tih mai a finthlak zawk.Darian-a thawmhnaw ka su tel ta law law.Ka insuk zawh veleh Verandaah ka zar lehnghal vek,Room ka tifai a,ka awm ve lo tih Ida-in hreawm pawn a awm lo,an Pahnihin an thu duna,Phone an en duna,thawm nei loin an in awm a ni ber.A awm nileng ta thak,chawhma lam a muhil bawk nen Ida-i pawn mut lam a ngaihven hek lo.

A awm nileng ta thak,thim dawnah a hawa,a lo kal leh hun tur Ida-in a zawta,ka phal hun hun a tih avangin Ida-in min rawn en a,tihngaihna a awm lo..' A duh duh hunah a lo kal the' ka ti leh ta nge nge.A kal hnuah Ida-i a ham ta bai bai.Eitur ka pe sawk sawka,nidangah chuan chaw ka hrai ngai tawh lo,tun tum chu a muthilh hma ngeia pek zawh hman ka duh.

'Hey...Zampui...' ka dara rawn khawih pahin Mipa awin a rawn ti a.Ka en chho vat.Tu nge anih ka hmu takah chuan lawm zetin ka nui chhuak hak mai.

'Hey,Hmingthan...nang maw?” lawm zetin ka ti nghal hliai bawk.Hmingthana hi kan College kalpui thin a ni a,an khawsa theia,a luck thei em em bawk,kan inkawm ho vek thina,mahse ka nu te hnen atanga ka chhuah hnu khan College a ka kawm thin te tumah han pawh leh ka nei ta lo.Tun hnaiah kan class ho khan Whatsapp lamah Group an rawn siam thara,tah chuan kan inkawm tha leh ta hlawm,Re-union hun tur pawh an rel fel tawh bawk.

'Aw, ka nih hi..i dam em? Groupah lah i active lo si'

'Um,dam..lo thu ve rawh,i hmanhmawh em?” ka ti a, a lu a thinga, ka thutna ep chiaha Chair a pawtchhuaka,a rawn thu thla ve nghal zat.

'Enge hetah i tih a?” a ti leh a.

'Hna thilah hmuh tur ka neia,dik tak chuan ka thawhpuipa hmuh tur zawk ania,a hman leh lo thuta' ka ti a, ka nui var var bawk.

'I thawhpui chu Ruatfela a ni mial em?” mak ti zetin ka mengphawk hra mai.

'Um,ni chiang.I hria tihna mi?”

'Amah hmu turin ka lo kala,anih chuan kan inhmu dawn tihna a va ni awm ve' a nui leh suk.

'Anih chiah chu,anih chuan kan thawhpui tur hi nangni inni dawn tihna a ni maw?” ka ti leha,Ruatfela'an a thianpain sumdawnna dang tihpuiah a sawm thu a sawia, kan en dun hnuah tha kan ti a,chumi atan chuan vawiin hian kan thawhpui tur Ruatfela thianpa hmu turin ka kala,Hmingthana hi a lo nih chuan ka pawm nghal thlap dawn tih ka chiang.

Haw turin kan inzui chhuaka,kan titi pah mawlh mawlh bawk,Nupui a la neih loh chhan ka zawta, a nui liam mai mai,a ngaipawimawh lo ngang mai bawk.

'Office i kal kual leh dawn nge i haw tlang dawn?” a ti a.

'Officeah ka let leh ang,min rawn tlawh la,i hman em?” ka ti a,ka beisei loh zetin a lo aw ve mai bawk.

'Eng in nge i kal?” a ti leh a.

'Taxi...ngatinge?”

'Eng ni lo e,Bike ka ken alawm,ka thlah nghal che a rem hlauh anih chu..'

'Um..tha lutuk..' ka ti tha ve mai.

Darian-a a lo kal ngun ta viau,a lo kal apiangin Ida-in nuam a lo ti em em ziah bawk,hnial enah pawh ka en ta meuh lo.Diktak chuan keipawh hian a lo kal ngun tak hnu hian pawi tihna ka nei lo tial tial a,a lo kal ka apiangin nuam ka ti tih ka inhre ru kar,ka nuna mipa awmchhun a ni a, ka haw em em chung hian ka chhungrila ka Hmangaihna hi a la thi fel lo tih ka chiang tial tial bawk.Tu mah mahin Ida-i chan tumna lam kan sawi lang leh ta miah lo,min laksak tum awmin a awm lo a,mahse Ida-in a ngainat tawh zia erawh ka haider thei chuang lo.Chhuani a lo haw leh tawha,thla khat lai awm tum a ni nain thla chanve velah a lo haw thei ta hlauh.

'Vawiiah i lo kal dawn em?”a form ka hak tir laiin a ti a, vawiin hi Parent's day a ni a,kal ngei ngei angai a ni tawp mai.Ka bu nghat.

'Anih leh Apa...?” ka thaw hak..Ka hrilh miah lo chung pawn a pa tiin a lo pawm fel vek tawh.

'Ka hre lo...' ka ti a, ka nui lui sak bawk.A tum biaua,a lungawi lo tih a hmelah a lang thei a,Darian-a hrilh tur a ni em ka hre lo,a lo kal hnuhnun ber khan hna thilah a zin dawn tih a sawia, a lo haw tawh em ka hre lo.

Kan nufain kan kala,midang te pawh an nu leh pa an kal kher chuang lo,a thiante nen an han inhmuh takah chuan a theihnghilh zui nghal mai bawk,Naupang ngang a ni a, Puitling angin engmah vei ren run a awm ve lo.Tlai lamah kan Class ho re-union neih tur a ni a,chu lam chuan ka rilru a luah hnem mah zawk.

Kal dawn ruaiah ka Scooty a nuar ta tlat,Taxi in kal ila haw na tur chu a awm maithei,Sana ka en a,a tlai tawh lutuk..Scooty Start tumin ka bei leha,buai nak laiin phone a rawn ri zui bawk,ka thinrum ru teuh mai.Ka phone ka phawrha,min rawn call tu ka en a,Hmingthana..

'Hello...'

'I chhuak tawh em?”

'Aih..ka scooty a nuar pek alawm mawle' ka ti a,a nui hawk.

'A that hlauh chu,ka rawn sawm ang che..'

'Aaa,tunah khawnge i awm a?” ka ti a.

'Ka dinna hi inveng area anih ka ring..' a dinna a rawn sawia,kan inchhak lawk a lo la ni zui.

Kan thlenin an lo thleng tawh hlawm,hun rei tak hnua inhmukhawm kan ni bawka kam ri chel chul a, tawng kan inchuh nawk nawk hlawm bawk,a then Pastor annih laiin a then Sawrkar hnathawk leh sumdawng kan ni nawk mai.Kan college kal lai ang bawk khan a chungnung ber chu Hmingthana bawk a ni leh ta tho.

Haw kan tum meuh chuan dar riat a kawk va tawh.Mipa hoin chawiekhawm leh an rawt thlu titih bawk.

'Lawk aw,ka hmelhriat te ka hmu tlat...' Hmingthana'an a ti a, a hawina lam ka hawi ve a,mahse ka beisei loh zetin Emily leh Darian-a te lo chhuak mek ka hmu va hmua,ka hawi sawn nghal vat.

'Hey,Em..' Hmingthana'n a tih riah ka dingkhawng nghal lah mai.

'Hmingthan..ehe..engtikin nge i lo haw a?” Emily-in a rawn ti ve a, muangchangin ka hawileta, Emily-in min rawn hmu ve chiah,Darian-a erawh ka en duh lo lui tlat thung.

'Thla khat vel chu ka awm tawh,eee.Zampui,hei Emily nih hi,ka Cousin ania..chuan,Em..Hei hi Zampuii' ka ban rekah a rawn vuana,muangchangin Emily ka en a,ka nui lui sang bawk.