MON HOMME-29

Chapter- 29

'Ka hresa alawm,in dam maw?” zangkhai vahin ka ti a, Darian-a hmel rul ul mai chu ka en a, ka nui lui leh sak bawk.

'Oh,chutia law? ' tih pahin Hmingthana'n min rawn en a, ka bu nghat ringawt.

'Nia..kan inhre sa alawm,ih..Eric-a nupui hi a nau ania...' Emily'in a ti nghauh.

'Eheu,a va han hriat loh theih ve..engpawhnise kan kal phawt ang,In lamah Naute kan kalsan a ' a ti leh a,Darian-a hmel rum zual sauh chu ka hmu ru kar,mahse ka hmu lo der hmiah thung.

'Um,keini pawh kan kal dawn..Chuan,i chhuk hmain mo kan lawm hman ang chu tiraw?” Emily-in a ti leh salh.

'Ka hre lo le,ka thu lo viau rih tunah chuan...' Hmingthana'n a ti tha ve mai bawk.

Kan tlanchhuah hnuah Emily te nen an inchhun dan vel sawiin a titi bawrh bawrha, kan boruak tang lutuk kha a hre lo a ni chek ang,ka chanchin chhe lutuk kha Mizo zingah hian hre lo an awm lo emaw ka lo ti a, mahse ani hi chuan a hre lo anih hmel viau.Chuti taka lar ka ni lo aniang tih ka ngaihtuah a,ka thawveng deuh hawk bawk.Mi zawng zawng hmuh ka lo hreh te kha a lo tul lo tawp pawh a ni mahna.

'Zampui..' ka darah a rawn khawiha,ka phu zawk.Ka en vat,mak tih hmel deuhin min lo enreng tawh,,Motor lah tlan loin a ding bawk.

'Sorry,min bia tih ka lo hre lo a' ka ti niah niah.

'A pawi lo,kan thleng a...' a ti a,a then sak.ka hawi chhuaka,kan In kawtah kan lo awm reng tawh.Ka ngaihtuahna ka kawm tui lutuk mah mah anih chiah hi a.

'Ka lo in ngaihtuah veng veng peka,lo lut la..' inthiam chiah loin ka nui lui sak.

'Ida-i a mu tawh angem?” a ti a,Ida-i hi kan Office a lo kalin a hmu zauh zauha,a la rei loh nen a ngaina ta viau anih hmel.

'Ka ring chiah lo,nidang ang chu nise a mut a hun tawha, mahse naktuk School an kal dawn lo a,Weekend hi chuan a mengrei deuh thina' ka ti a, a thle bak.

'Anih chuan lo lut ila a that dawn chu..' a ti a,ka bu nghauh ringawt.

'Lawk...' chhuk tumin Kawngkhar hawnna ka vuan hman tawh tihin a rawn ti leh thut.Ka hawi leta,ngaihtuah muk hmel zetin a hmui a pet a,min en run bawk.

'Kia??” ka ti sap.

'Ka rin hi a dik em?” a ti a,a sawi awmzia ka hre lo.

'Eng nge i rin ka hriat loh chuan a dik leh dik loh phei chu ka hre lo tawp ang' ka nui hak bawk.Mahse, a nui ve hauh lo.

'Ka uang lo ania..' thutak zetin a ti leh a.Ka nui tawp nghal hmak.

'Anih chuan sawi la...' ka ti ta zawk.

'Darian-a nen khan engvangin nge in inthen a?” ka khawng nghal lah mai.A hmain Pasal ka neia, kan inthen leh tawh tih ka hrilh daih tawha, mahse tu nge ka pasal ni a,khawia mi nge anih erawh ka hrilh lo,min zawt bik bawk hek lo.

'Chhan a harsat chuan ka zawt lui lo che ania..' amah bawkin a ti leh a.

'Aih,ih..diktak chuan i hre reng tih ka hre miah lo a..” ka ti bah nak mai.

'Hmm,hria e,diktak chuan Zanin pawh khan tanpui i ngai anih ka ring zawka..Chuvang ania ka Bialnu anga ka lan tir che...' a ti ta duah,a hma pawh khan a thusawiin min thawng tawh ania,tunah phei chuan min thawng mai pawh a ni lo,min deng sawk ni berin ka hria.

'Diktak chuan...eng nge ka sawi ang?” ka ti leh lawi.A then suk..

'I inpeih hunah min hrilh dawn nia,ka hriat thin Zampuii kha i la danglam lo anih chuan i Problem awlsam takin midang i share dawn lo tih ka hria ania,chumi hun thleng chu ka nghak thei mai ang ka ring” ngainatawm takin a nui var var bawk.

'Enteh,ka kuah thei che angem?” ka ti ta thlawt.

'Lutuk'

A ban a phara,ka tawlh pheia,a kawngah ka kuaha,nghet zetin min kuah ve a,ka hnungah a beng thak thak bawk,chu chuan min ngaizawng lo a, ka lakah rilru tha lo pu loin Thian tha ber angin min en zawk tih a lang chiang em em bawk.

Ida-i a lo la menga, Tv a lo ena,hmuhnawm a ti ngang anianga bulah ka thu thlaa,min rawn kuaha,ka biangah a fawp zauha,a thut ngaiin a thua Tv a en zawm lehnghal daih bawk.

Office ka thlen hnu lawkah Hmingthana a rawn thleng ve a,Ruatfela nen kan pathumin kan hna tur kan en ho a,Sumdawng chhungkuaa seilian a ni bawka,Sumdawnna lam na na na chu a hre hneh hmel ngang mai,phaiah sumdawnna a kalpuia,a nu leh pa sum mamawh lem loin a khawsakna tur tawk aia tam a nei tih a hmain ka hre vek tawh,amah hi chuan chutiang lam engmah min hrilh lo thung.

'U Zampui, i phone i keng lo a, a ri char char' Lunch kan ei zawha kan let lehin Mapuii'n a lo ti vat.

'Ka charge a,chuvang alawm..i pick lo mi?” ka ti a.

'Aih,pick lo..a vawihnihnaah khan ka va kala,mahse a tawp hmana' a ti leh mai.

'Ok,ka'n en ange' tih pahin ka room ka pan a,Ruatfela leh Hmingthana erawh thildang tiht tur an neih avangin Lunch kan eina atangin anlo let ve lo thung.

Ka phone ka lakanga,min rawn call tu ka en a, Duati a lo ni a,engtak ni ang maw?

'Ngatinge i pick theih miah loh a?” Hello tih that pawh awm loin a rawn ti nghal chiam.Ka phone ka beng bul atangin ka la sawna, ka melh nghek ringawt.

'Sorry..Sorry...ka charge alawm..' tlawn pah ti tihin ka ti a,ka nui hak bawk.

'Hmanhmawh laia pick lo hi a buaithlak ka tih zawng tak' a ti leh hmak,a la lungawi kim chiah lo anih hmel viau.

'Ok,ka pick ziah tawh ang..Tunah chuan chuti taka pawimawh chu enge sawi la..'

'Vawiinah an sawi ka hre ru a,Darian-an engemaw tak tih a nei ania'

'Enga? Engmaw a tih?” ka ti that mai.

'Ka la chiang bik lo..Mahse, Ida-i kha a rawn chuh dawn chiang lutuk' ka thaw a chham titih.

'Mahse...lawk..Nakinah ka lo bia ang che' ka ti ta zawk.

Darian-a number ka zawnga, ka hmuh veleh ka dial nghala,ka chhungril thinrimna avangin ka khup a sai dar dar thei hial bawk.

'Hello..' a rawn ti sup,a aw ka hriat rualin ka thinrim zual sauh bawk.

'Hmuh che ka duh,khawiah nge ka lo kal ang?” ka thinrimna thup tumin ka insum nasat angai viau.

'I sawi tum ka hria.I duh chuan ka Ukil i hmu thei ang” a off nghal hmiah.Ka phone ka dahthla chawrha,au vak lo turin ka hmui ka peta,Dawhkan tlang ka hmer ngat ngat bawk.

Ka rilru buai nuaih nuaih tihfim tumin ka mit ka chhinga, thawk ka la vang vang bawk,a hma khan a duh duh ti turin ka ti a, mahse engmah a ti lo,Ida-i a rawn hmu fo a, School atangin a hruai zauh zauh bawk,lakhran tumna nei awmin a awm ngai lo,mahse,tunah a tum leh ta thuta.Ida-i lahin a duh thlang dawn se tu nge a thlan ang ka chiang tawh lo...Ni lo,ka lu ka thing nawk ringawt.A thleng lo ang,ka remti ngai dawn lo..

Duati ka call leha,a Ukil lo hriat tum turin ka ngena,reiloteah min rawn call backa.A ukil tu nge anih ka hriat takah chuan ka mur ur ur in ka hre mai,khapa,Tualthat reng pawh that lo a chhuahtir thei tu kha a lo ni a,engtin ka chak theih tehlul ang??Ka thu thla chawrh,ka beidawnga, ka chau zual hluah hluah,zing lamah khan chuan kan hna thar tur vangin ka hlima,nuam ti takin ka awm kha ania, tunah chuan chhumdum chhah lutukin min tuam niberin ka hre tawh.

Ngaituah chhuah ka nei,ka Blazer khai ka la thlaa,ka ha nghal mawlh mawlh,tunah chuan tihtur pakhat chiah ka hria,Officeah kal chilh ila a tha ber,a lo awm lo anih pawn a awmna tal min hrilh thei ang chu.

'Darian-a rawn hmuh ka tum a..'a Room luhna tur bula thu,tlangval ria thel thawl hnenah ka ti mawl tawp.

'I be sa tawh mi?” a ti tha ve mai bawk.

'Nichin khan ka biaa,a chhuak maithei a ti a..' awihawm takin ka nui lui var var bawk.

'Aih,la chhuak lo..I duh chuan lut nghal mai la..' a ti ta hlauh.Lawmthu ka hrilha,ka kut a thlan dap dap mai,nghet zetin ka bag hrui ka vuana,ka chhungrila zamna hi hmuh tir kher a tulna a awm miah lo tih ka chiang.

Kawngkhar ka kika,lut tura min tih ri ka hriat rualin ka insehruh nasa zual sauh,Kawgkhar ka hawnga,min hmuh vanga makti hmel a pu lo,hahdam hmel zetin a Chair hnung lam a nghenga,ka kal hun a lo nghak a ang mah zawk.

'Thu la...engemaw intur i duh em?” a ti sup,ka lu ka thinga,engtin nge thil ei leh in thei turah min ngaih zawk ni a?

'I thil tih mek hi tih kher a tul em?” ka ti nghat.A hmui a tisawi zauh.

'A tul loh chuan ka ti nang,bakah a hma khan ka duh duh tih phalna kha min pe a..' a ti nghut,a rawn thu ngila,min melh run bawk.A suit thim lam hak leh a hmelpa zet chu a inhmeh vel vek,Ni lo..engemaw ka ngaihtuah thin ni?

'Ida-i tan hian hetiang boruak hi a mamawh loh ber a ni tih i hria ang chu”

'Um,a dik.A mamawh miah lo,mahse nakina tih ai chuan tunah hian ti ila a pawm thiam zawk ang'nghet churhin a ti leh a,ka lu ka thing nak mai.

'Ni lo,a pawm tak tak dawn lo..' ka aw a khur titih.

'Ok,a pawm dawn emaw dawn lo emaw ka fanu hian a pa huatna nen a thanlen ka duh hleinem'

'Maw?”

'Ida-i hi ka lakhran i duh loh chuan min neih mai a ngai anih chu...' a then suk.Ka awih thei lo zawk.

'Darian,innei leh thei kan ni tawh lo tih nang aia hrechiang an awm lo..' ka hmui ka pet a.

'Aih,ka hrechiang miah lo..'

'Inneihnaah hian pahnih kan ni tur a ni a, mahse nang chuan hmei i nei a' ka insum hman lo.

'Hmei,anih chuan kalsan chein Hmeichhe dang ka mutpui i tihna a ni em? Aih...ka mutpui lo,nang ang lo takin ka mutpui lo hlauh' a ner nawk bawk.

'Keiin ka mutpui a maw?”

'Ida-i hi ka fanu a ni em tih ka inzawh fo a tul asin...'

'Anih chuan i fanu a ni lo angah ngai mai rawh'

'Teuh lo,ka fanu a ni tih ka chiang' lehlawi si chuan a..

'I thusawiin awmzia engmah a nei lo ania,nakinah a len hunah a duh ala thlang mai ang,tunah chuan tihian awm mai mai rawhse' ka ti leh a,a thle buk.

'Tunah a Pa ka ni tih a hriaa,a nuin mipa dang neih tuma a melh lai pawha ka fanu hi awmpui ka tum lo anih chuan nakinah a zawhna ka chhang thei nang,a ni lawmni?' a thle buk,kei erawh sawi leh mai tur hre loin ka thu ngil auh ringawt.

'I pa tak i hre lo a,a chhungten an ngaihven lo che ang bawk khan i fanu hi rilru hliamin thanlen tir tum suh..' a ti leh nghuta,kei erawh vuak sawk nen ka awmdan a danglam kher lo ang.

'Kha thil kha...Engvangin nge i sawi chhuah a?” ka au a ni ber.

'Aaaah,hahdam rawh.Ka fanu chunga thleng thei ka ngaihtuah lawk mai ania,bakah a nu ang bawk khan a Pahrawnin...'sawi zo duh loin a ngawi leh daih,mahse enge a sawi tum ka hria.

Ka che ta phat,Dawhkan chungah ka bawk phei rawk,a hmaia ham tumin ka ban nghal zat bawk,ka khawhmuh a thim veka, tunah tak hi chuan thih mai pawitihna pakhatmah ka nei lo.Ka thiltum hre lawk ang hrimin a thle zauh,mahse ka ham hman tho,a rum hawk bawk.Ka ban leh zat,mi a ang maiin ka vai buan buana,ka pet a,ka khawih theihna lai laiah ka chum a, seh ka tum bawk..Ka kut a rawn man beta,ka hnung lamah a herh kuala,min pawm bet ta tlat.

'A tawk...' a ti supa,mahse ka tal leh phat,a hma aia nghet zawkin min kuah beta, min pawm kang nghal nawlh,bangah min nawr beta,a hmaia ham tumin ka ban ka vai leh nghala,mahse a thle zel,au tur pawn aw ka nei em ka hre tawh lo,ani erawh chuan min ti let ve loin a indang zel thung.

'Le...a tawk,a tawk e' a ti leh sup,ka chet theih loh rak thlengin min kuah beta,diktak chuan engtin nge Dawhkan atang khan a thutna lamah ka chhuk hman ka hre lo.Ka thil tih kha mumalin engmah hriat ka nei lo zawk.

'Ka haw lutuk che..' ka sawi zawh rualin ka hmui a rawn hup nghal hmak.

'Chil in chhak kher hi chu nangma tih pawh nise pawmzam har ka ti tih i hriat kha...' a ti nghut,ka thiltum a lo hre lawk vek,ka hmui hup lo se chuan a hmaiah ka chhak ngei ngei dawn tih ka chiang.

'Darian,i hman tawh em?” Kawngkhar hawn pahin Emily-i awin a rawn ti zangkhai vah,ka melh vat.Min rawn hmu ve nghal chiah,kan awmdan mak lutuk a hmuh rualin a mengphar vak bawk.

'Ngatinge? Darian..” mak tihna leh tahchhuak aw a inpawlh vek,Darian-a ka en a,min rawn en ve chiah bawk.Muangchangin ka hmui a hupna a lasawna,mahse ka kawnga a kuahna a lasawn chuang lo.

'Darian...' a ti leh that..

'Em,ka beng a ngawng lo ania' nelawmna pakhatmah tel loin a ti hmuk.

'Mahse...'

'I hmuh ang hi animai,Zampuii nen hian thil pawimawh kan lo ti meka...' a nui hawk bawk,mahse nuihzat vanga nui a ni lo tih a lang chiang viau.

Ka kawng a kuahna a thlaha,a kalsawna,a Chaira thu loin Dawhkan tlangah a thu ta zawk,ka thawk dan mumal lo lutuk tih ziawm tumin ka mit ka chhinga,boruak thianghlim kham khawp hmu lo ang maiin ka hip kawk kawk bawk.

'Ngatinge i hmai kha?” Emily bawkin a ti leh a,tlemin a aw a pangngai leh ta bawk.Hmeichhe a a ni lo a, a tir khan a shock teh nain mawl taka khawsak zui a duh hauh lo ang tih ka chiang.

'Zawhtein a ham a...'

'Zawhte a? Hetah Zawhte i dah ngai si lo a...'a ti leh chiam.

'Em,zawhna leh chhanna hun i hawng dawn anih chuan a moodah ka awm miah lo mai' Darian-an a ti hmuk,a aw a ring lo,mahse nekluih loh a him tih mi a lo tan chuan a hriattheih vek.

'A thi bawk si,khawi damdawi ka lo hnawih ang..' dam thlapin a ti ta zawk.

'Angai lo,nakinah ka ti mai ang..midang an hman tawh em?” a ti leh hmuk.

Ka awm ve na tur a ni lo tih ka hria,ka dinna atangin dawhkan bula ka bag awmna lam ka pana,Emily- in huatna nen min melh reng tih ka hria,Darian-a erawh ka en duh lo law law,ngawirengin ka bag ka laa,Kawngkhar lam ka pana,ka lu a hai rum rumin ka hre mai,Kawngkhar ka hawnga,ka rin ang chiahin min dang lo.Nia,min dang lo ang..Min dan nachhan tur engmah a nei reng reng lo.

Officeah ka let leha,mahse, ka leng hlawl lo,khawimaw laiah kal ila,au vak vak ila ka zia hawk mahna..Mapuii hnenah tihtur pawimawh ka nei tih sawiin ban hun hmain ka chhuaka,kal na tur ber pawh hre loin ka inkhalh chhuak mawp.Thim dawnah inlam ka pan ta chauh.Ka khua a sik nge ka hre lo,ka chhungrilah vawt tihnain min mana,ka khur dar dar,ka awm a nuam lo nghulh bawk.Inchhung ka luh hmain ka ding leh vang vang phawt,Ida-in ka awmdanah dik lo a awm tih a hriat ka duh lo,hmeichhe naupang fing tak a ni a, a hriat awm loh tak pawh a lo hre leh mai thin.

Ida-i ka hmu mai lo,Kitchen lamah thawm a awm,ka pan pheia,Chhuani amahin a lo awma,a zai rat rat bawk.

'Khawnge Ida-i a awm a?” ka ti a, a phu zawk.

'Awi,ka phu nasa lutuk,engtin maw i tih?” inthiam lo hmel fein a ti a.

'Ida-i....'

'Eh,i hria emaw ka tia sin...' a mengphawk hra mai.

'Engmaw ka hriat ang?”

'A Pa a lo kala,bakah nidangah pawh a lo kal fo a...'

'Lawk..lawk,an chhuahna a rei tawh em?” hlauhthawnna avangin ka chhungril a vawt vek.

'Rei ve tawh tho,Ih..an Inah chaw a ei pui dawn a ti a,thil dik lo a awm em?” hlauhthawn hmel zetin a ti a,ka rum hawk thung.Tawngkam mawi lo hmang lo turin ka inthunun leh riha,a sawi ang chiah hian nidangah pawh a lo kala,engmah ka sawisel lo a,atan chuan hruai lo phal loh ngawt kha thil tihawm a ni tlat lo.

'Tunah chuan apawi lo nimai rawhse, mahse,nidangah chuan tupawn hruaichhuah tum se min rawn call hmasa tawh dawn nia' ka theihtawpa pangngaiin ka ti a,a bu nghauh.A hmela zawhna awm erawh ka hai der hmiah thung.

Khumah ka thu a,Darian-a ka calla,a pick thei tlat lo,vawi thum lai ka call hnuah pawh a pick thei lo,Call nawn leh ka tum lai takin a rawn call back ta thung.

'Khawnge Ida-i?” ka ti nghal tawng.

'Zampui,keimah Emily zawk...” Emily-i aw ka hriat takah chuan ka thu mar auh mai.

'Darian-a ka lo be lawk ang...'

'A chhuak lawka,enteh..i fanu hi a hmeltha khawp mai..' ngeiawm zetin a nui hak hak,ka tim sawk thung.

'Lo ti na miah suh ang che,anih loh chuan Darian-a khan...' a nui riah ka tawnglai ka tawp chawt.

'Darian-an engtinmah min ti lo ang,ka tinat leh nat loh a hre dawn hleinem' ka ip chawih mai,rapthlak ka ti lutuk.

'Emily..Naupang anih kha,i pawi engmah a sawi lo..' ka ti a,ka aw dam thlap mai chu keipawn mak ka ti zawk.

'Enteh,he naupang hian a nu ang chiahin ka pawi a sawi'

'Anih chuan Darian-a kha hrilh mai rawh,anih loh chuan a bula awm turin lak a tuma,a buai viau ania..' ka nui hak mai.A thaw hak ri ka hre thei thung.

'Tehreng mai,ka lo hrilh dawn nia,bakah...nang hian i thil tawn tawh te avang pawh khan Darian-a hi hnaih tawh lo tur i ni asin,i fanu hmang hian rawn hnaih leh i tuma,mahse i thei lo ang,ka ta anih hi..' a tawng a sehchilh rap rap mai.

'Ka hria e,i thiltih tak zawng zawng te avanga ka tawrhna pawh hi ka lawm tho ania,engtikniah emaw chuan Darian-a pawh khan a la hre ve chek anga, insawifiah tur i ngah ve viau in ka ring,chuan,tunah ka fanu ka rawn hruai dawna,i lo hrilh dawn nia' ka phone ka off nghal hmiah.

Chhuani hnenah Ida-i ka hruai lawk dawn tih ka hrilha,a hmelah mak tihna a lang lehnghal zat.Mahse, engmah min zawt ngam lo nge ka hre lo,engmah min zawt ta chuang lo.Scooty ka start dawn chiah tihin ka phone a ri a, ka en vat,Darian-a..ka thawh hak mai.

'Hello...'

'I rawn call em?”

'Aw...Khawnge Ida-i?” ka aw a vawt raih bawk.

'Ka rawn dah dawn chiah...'

'Ok,a tha lawm,rawn lam ka tum a..' a thaw hawk ri ka hrethei.

'Angai lo,ka lo chhuak dawn chiah' a rawn ti dam thlup.

An lo thlen hma chu ka lut ta lo law law,kawtah ka vei sek a,an lo thleng tawh em tih enin ka hawi kual sek bawk.Sana ka en a,ka inbiak atangin minute 15 a liam tawh,a lo dah ang tih a sawi ka ring ngawt kha a ka inti tha leh hluah hluah tawh zawk,min laksak tumin a buaia,engvangin nge maw a thusawi ka lo rin ngawt ni? Atthlak lutuk hian a...

Ka phone ka phawrha,call tumin ka dial dawn chiah tihin ka bulah Motor a rawn ding ve chiah,ka en vata,Ida-i a rawn nui var var mai.Rang lutukin ka pan hnaia,kawngkhar ka hawn saka,Seat belt phelhsak tumin Darian-a a rawn kun hnai ve chiaha,a hmui leh ka beng a insi titih.Ka ding mar nghal auh,Darian-an min rawn en vuta,a then suk bawk.

'Ka lo lut lo mai ang aw...' tih pahin Ida-i chalah a fawpa,Ida-in a Kawrlumah a vuan tang bawk.Min rawn en leha,a hmaia ka hamna hnu lang riak chuan ka mit a la chat.

Ka lawm e' ka ti sep ringawt,engvanga lawmthu hrilh nge ka nih erawh ka hre der lo thung.Ida-i him taka a rawn dah let vang pawh a ni mahna le.

Ida-in a Pa nen an kalna leh an thil ei a sawi char char,khawngaihna mitin ka en lo thei lo,tawng thei se,nuam a tihzia kut zaizir ringawt lo hian han sawi ve thei se tih ka ngaihtuaha,ka na vawng vawng.

Muhil thei loin ka mu meng kar,Ida-i muhil hmel ka thlira,a Pa nen an in an rualin a Ni a ang takzet zawk.A mithmul sei er tan leh a hmui sen siah te,a khabe dawh lam lek lekte,a vaiin kei aiin a ni leh a Pa a ang zawk vek.

Ka phone a ri kauh,ka en vat,Ka beisei loh lutukin Darian-a a lo ni a,ka Open nghal zat.'Ida-i rilru hliamsak loh dan tha ber chu min neih ka tih kha,tunkar hun ka pe ang che,engmah ka ti zui lo ang..' ka chhiar zawh rualin ka thaw hak mai.Ka Phone ka dahthlaa,reply tumna ka nei lo.

Vawiin Monday a ni a,kartluanin hun ka nei,mahse ka chhanna tur erawh ka chiang nghal vek.' Ka duh lo' a ni tawp mai.Naktukah Duati ka hmu anga, enge ka tih theih ka zawn angai,engemaw tal chu ka ti thei mahna..Vawiin thil thleng kha,engtinmah min ti let loin min dang satliah ringawt anih kha..

'Hey...' ka dawhkan rawn kik pahin Hmingthana'n a rawn ti thut.Ka en vat bawk.Nidang ang bawkin a incheina a inhmeh lehpek.

'I va hma ve..' ka ti a,Chair lamah ka thle zauh bawk.

'Hma satliah,i ngaihawm alawm..' a mit a siai zauh bawk.

'I va han tenawm tak,i lo kal fo chuan tu emaw ber hian an atphah ngei ngei ang' ka ti a, ka nui hak hak bawk.Dawhkan a rawn bawha,ka thil tihlai a rawn en ve a.

'Nangin i at phah dawn der si lo a tiraw?” ka nui hak mai.

'Dawn lo tawp mai,Eee,hei hi han ti fel lawk teh,chuan i tih laiin Coffee ka lo la ang' tih pahin ka tho a,ka thil tih dik theih loh ka kawhhmuh nghal zat bawk.

'Ok..i tih te chuan..i lo let hunah thil ka dil dawn che' a ti a, ka Chairah a thu thlaa.

'Eng? I mamawh zawng ka nei dawn lo chiang em mai'

'Kal phawt rawh,i lo let hunah'

Coffee nen ka let leha,uluk zetin Monitor a lo thlek a,a ti thei bik lo anih ka ring ve ngawt.

'Kha le,i ti thei em?' ka ti a.

'Done..theih loh ka nei hleinem' a ha var rual that langin a nui sang bawk.

'Enge min dil dawn sawi la..'

'Zaninah Party naah min kalpui rawh..'

'Enga?' ka ti that mai.

'Party,ka thianten ka lo haw hi Dinner Party neih an phut tlata..'a ti a, Coffee a in pah a.

'Enteh,Fanu ka neia,Party na tih vela kal rual ka ni pawn ka hre tawh lo..'

'Fanu i neih avang khan kei aiin i upa ta sawt chuang hleinem,Mawh,min kalpui la' a ti leh a.

'Ka lo ngaihtuah dawn nia..'

'Yess,Lunch ei turin ka lo kal leh ang,tah chuan min hrilh dawn nia'

Duati hnenah Hmingthana min sawmna ka hrilha,ka beisei loh lutukin a rawn phur ngang mai,kal ngei ngei turin min rawn ti a,Ida-i lo awmpui pawh a huam thu nen lam a rawn sawi nghal duah.Eng chu a hria ni maw?

Dar 7ah min rawn lama,Ida-i hnenah ka kalna tur ka hrilha,a nur deuh dawna,mahse Chhuani'n engtin tin emaw a thlem lungawi thei ta mai.Ka insiam laiin ka rilru a nuam lo leh rih,nu tling,chu pawh mahnia Fanu enkawl lai neiin Party naa han kal chu thil awm lo tak niin ka hre leh lawia,mahse Hmingthana ka tana a that zia ka ngaihtuaha,thil engmah min dil ngai loa,a thil min dil chhun han tih sak loh niin ka hre thei chuang lo.

'Hey,Hmingthan...' kan luh veleh Hmeichhe nalh zet in a lo ti vat.Hmingthana nen an inchibaia,min rawn chibai ve bawk.Room chhung ka enkuala,mahse Dawhkan bula Darian-a lo ding run ka hmuh takah chuan ka phu zawk,ka insangmar nghal teuh bawk.