MON HOMME-30

Chapter- 30

Kan thil ei tui leh tui loh pawh ka hre nek lo,ka hawi chhuah apiangin Darian-a mit thim raihin min lo en run tih ka hmu nghal zat zela,ka insangmar teuh reng bawk nen ka hah hluah hluah zawk.Emily lahin intitatu zetin a kuah deuh chawta,a titi kar lakah pawh a ta anih zia a tilang sek bawk.Ka luak an ti chhuak hlui in ka hre mai.Hetiang thil hi Movie velah en ila a hmuhnawm viau ang,mahse a taka han tawn meuh chuan a nawm loh dan sawi maia fiah chi a ni lo.Thil pakhat erawh ka chiang leh ta sauh,engtiklaimahin Darian-a hi ka chhungril atangin ka lo la paihchhuak tak tak ngai miah lo,chutih ahnekin ka huatna pawh kha ka Hmangaih vang zawk bawk.Huizz,nun hi a fair lo a ni e,min hmangaih miah lo tu hmangaih tlat te hi chunglam pawh hian min duan dan niin ka ring tawh lo.Mahse, a reh ngawt thei der si lo.

'Enteh,diktak chuan Emily hi ka cousin nimahse kan thian hoah hian a tel ve tho a,zanin erawh kha chu a rawn phaa,mahse an lo kal leh ta tho anih hi..' ka beng bulah a rawn ti sa sa.

'A pawi lo,engmah a pawina a awm hleinem..' ka ti a,ka nui lui sak bawk.

'Ok,ka tihpalh tak tak..' a ti leh a.

'A ho lutuk,pasal hlui a nimaia,a pawi hleinem'

'Um,mahse tu emaw hmelah saw chuan a pawi hmel ka ti,en nghal kher lo la..' a nui hak..Ka samah a rawn fawp zauh bawk,mak ti zetin ka en a.A mit a siai zauh,a tilui tih ka hrethiam nghal vek bawk.

'Toiletah ka va kal lawk ang' a ti leh a,ka bu nghauh.Kan thil eina vel an rawn seng fela,a then wash room lamah an kala,kan inhnawh tawt ka hlauh avangin kei erawh ka thutna ngaiah ka la thu thung.

Ka hawi kuala,Darian-a thutna lam ka melh zawka, a lo awm lo.A kalsawn lai ka hre miah lo,ka enkuala,a awm lo..Engvanga zawng ngawt nge ka nih ka hre nek lo,a awm loh chuan hahdam huai zawk awm tak ka nih laiin ka hahdam chuang der lo.Emily nen khawimaw laiah an kal angem? Enge an tih ang? Ka ngaihtuahna duh loin ka lu ka thing nak ringawt.

Hmingthana a rawn leta,midang ho an rawn let tawh hlawm bawk.Wash room lam ka pan ve ta chauh.Tumah an lo awm lo.Ka kut ka sila,ka hmaa Darthlalang lian zet awma ka thla lo lang chu ka thlir vang vang,tun hnaiah ka mu tha lo zuala,hlauhthawnnain min tuam reng bawk nen tlemin ka lang cher tih ka hmu theia,ka dang deuh bawk.Ka biang ka dawm vang vang,ka kun hniama,ka hmai ka tihuha,Darthlalanga in en tumin ka dingmara,mahse ka hnunga lo ding ka hmuh rualin ka phu vak.Za lo zetin a then suk bawk.

'A tawpah chuan ka hmu fal thei ta hram che alawm' a ti nghut bawk. Ngaipawimawh lo hmel zetin ka hmai ka hrua,ka bag atangin Lipstick ka phawrha,ka inhnawih nghal bawk.

Kalchhuah tumin kawngkhar lam ka pana,mahse ka hmaah tak a rawn ding ta zawk.

'Kal sawn rawh' ka ti chang fal mai.

'Ka be duh che..' ka sawi a haider hmiah.

'Keiin ka be duh lo che..'

'Ida-i....'

'Inah a awm,angaihtuahawm loh...' ka ti nghat.

'Nuapang kum 5 pawh la tling lo,awmpuite kuta daha Party thei nu hi eng nu nge ni ngai?”

'Nu ka ni a, Pa ka ni bawk.Ka fanu hi zantin ka chhuahsan tihna a ni lo a, zankhat lek kalsan hi thil dik lo niin ka hre lo,bakah Chhuani kutah hian a him tawk ang tih ka chiang' ka ti hmak.

'Animahna,mahse a Nu zawk hi ngaihtuah ngai leh ven ngai i niin ka hria..' a ti nghut.

'Ka lawm e,mahse i ngaihtuah ngai loin midang ngaihtuah tu tur an awm tih i hmuh kha..' ka then lui sak.

'Nia,a hmuhnawm khawp mai..' a sawi zawh rualin ka kawngah a rawn kuaha,amah si chetin min pawt hnai nghal rawk,a awmah ka nema.Mahse, min kuah nghet zual salh,ka tukhum samah a rawn thama,enge thleng pawh ka ngaihtuah chian hmain a hmui hnawng deuh chapin ka hmui a rawn si nghal zat,ka hamhaih lutuka,chet mai nachang pawh ka hre lo.

Ka hmui thip zawkah ka harhfim ta chauh,ka tal phat,a hmui a phawia.Mahse, min thlah chuang lo,a thawk dan a mumal hek lo.

'Ngatinge khatiang i tih a?” ka aw a khur a,a tham deuh chal bawk.

'Ngatinge ka tih loh ang? Ka ta hi midangin an neih ka phal lo..' a ti hrawiha,ka chalah a chalin a rawn nawr,ka hmui a rawn tuaia.

'Mi an lo kal thut thei ania..' ka ti sap.A then suk ringawt,inlakhran tumin ka kawng a kuahna laksawn sak ka tuma,mahse ka kut a rawn vuan bet leh ta zawk.

'Tu pawn min hmu se pawi ka ti hleinem' a ti sup bawk.

'Ni lo,chutiang ngawt a dik lo...' ka tal laih.

'Che suh,a thi ania..' ka sawi ngaipawimawh lo zetin a ti leh sup,ka inrin hmain ka hmui a rawn liak a,a fawp zui vang vang bawk.A chet dan engkim mai chuan min fana,ka khur dar dar mai.Kum kha lehchen he thil hi ka lo mangphana,a tak ni leh si lo kha ka harh apiangin ka tahpui thin anih kha.Mahse, Emily ta a ni a,hei chu Ida-i a chan duh vang mai a ni.Ka tal phat,ka beisei loh zetin min thlah ve mai bawk.

'Ida-i vangin hetiang hi tih a tul hleinem' ka chhungril na vawng vawng thup nan pawn lamah erawh ka hawisang vah.A dar a tichhing uka,a hmui a petsawi zauh bawk.

'Ida-i vang maw? Ok..Ida-i chu ka duh ngei,mahse min neih leh i remtih phawt chuan...?” a then suk,tun maia min duatna kha khawiah nge a thlawhbo hman ngaihtuah tham tak a ni.

'A tir khan chhanna ka pek loh chhan che chu chhan tlak i nih loh vang zawk,engtiklai pawn Aih tih hi ka chhanna a ni reng...'

A mit a ti zima,a ngaihtuahna engmah a hmelpa leh tak ngul maiah chuan a lang lo.

'Khawngaihin kalsawn rawh..' ka ti leh nghat.

'Tehreng mai...' a ti supa,mahse a din ngaiin a ding ngur tho.Vanneihthlak zetin midang thawm a rawn awm ta hlauh,ka thaw huai bawk.Hreh hmel zetin a tawlhsawn ta nge nge.

'Ka rawn zawng tep che a..' min hmuh veleh Hmingthana'n a lo ti vat.

'Ka hmui ka ti pem palha,chuvang alawm...' ka rilru a lo lang hmasa ber ka sawi ta ngawt.Ka thu thlaa,mak tih hmel zetin min en vung vung thung.

Sana ka en a,dar 9 a lo pel va tawh,tumah haw tum awm in an la awm ta lo cheu.Haw mai ka duh tawh,mahse a titi bawrh bawrh kha hmuh rualin ka inthlahrung leh ta lawi.Darian-a rawn thu leh chu ka mitsirin ka hmu ru kar,en erawh ka en duh der lo thung.

Zu rim leh meizial rim nen a inpawlh vel vek,Boruak thianghlim dawn ka mamawh lutuk,music thawm bengchheng lutuk nen ka lu a na ngut nguta, Darian-a vangin hahdamin ka awm thei hek lo.Kan awmna room atangin ka chhuaka,Light eng dul ruih vangin ka kalchhuak pawh min hmu hlawm lo.

Countera lo thu in min lo nuih var var,Balcony lamah a awm theih leh theih loh ka zawta,a theih thu nuisangin min hrilha,kan thil ei a tui leh tui loh min zawt pah bawk.Balcony lian vak lo ka pana,boruak a vawt raiha, vawt lutuk erawh a ni chuang lo.A nuam takzet,ka thlang lam ka hawithlaa,dil lian tha zet a lo awm chu niin,inchhunglam Light engin a chhun zawngin tui a tle sep sepa,Lawngleng niawm tak a awm bawk.Kan awmna bengchheng leh ri nuaih nuaih ai kha chuan nuam tak a ni ringawt.Railling ka bawha,Pangpar rimtui leh thiang zet rim a nam vang vang bawk.

'Zampui...' ka phu zawka,Tu nge anih ka hmuh hmain min kotu Emily a ni tih ka hria.Chu zawng zawng ai chuan mahni chauha awm duh laia min rawn bawhbuai leh hi ka lawm lo fe zawk.

Ka inher,ka inkuangkuah fel than bawk.a hmel tha zet chu a phelh deuh phanga,kan inrual tih ka hria,mahse a hmelthaa,a pian a nalh bawk,a kum nen inmillo khawpin a la lang naupang thung.

'Eng i duh?” Polite taka biak tul ka ti lem lo.

'Zanin chu i beisei loh takin kan lo lang in ka hria' a thle bak.

'Aaah,beisei lo hran nang..Hmingthana'n a sawi lawk alawm' ngaipawimawh lo hmel zetin ka ti zangkhai vah.

'Wow,a va ropui ve.Ka cousin duhtak hian a lo atchilh tak tak che a ni ngat mai' a nui hak.

'Tehreng mai,i rin aia nasa zawk daih kha aniang' ka then ve sak.

'A lawmawm,mahse nimin khan a nu nen kan inhmu a.Nuthlawi,chu pawh a pasal tihchhiat nana thil tenawm tak titu kha a mo chak vak lo..' intithei hmel a pu bawk.Ka thle bak.

'A va khawngaihthlak ve,ka nei dawn tho sia...' ka ti leh salh.

'I nei lo ang,ka damchhung chuan....' a in control theihna a hloh anih hmel.

'Hahdam rawh,diktak chuan Hmingthana chauh pawh niloin Darian-a pawh hi i ven tel tho angai ania...'Ka mit ka siai zauh.

'Engmaw i sawi?” min rawn hnaih nghal ruak.Tawlhsawn duh loin ka din ngaiin ka ding khawng lah,a mitah tak ka en lui tlat bawk.

'Hmanni khan Officeah khan lo lut ngawt lo la chuan Dawhkan pawh kha a zau thaa,chhuat pawh...i hrethiam em?” ka nui lui hak.

'Tenawm..' a ti that,min rawn bawh titih,mahse ka tawlh zauh,Pot a va bawh chilha,a tla keh chhuai,a rawn inher leh vat,tih let ka tum lo.

'Insum rawh,anih loh chuan kum tamtak neih tuma i lo buaipui tawh sawn i mize hniam lutuk kha a rawn hmu hlauh ange' ka ti dam leh thlap.Min kawka,a kut a khur nasa,a hmeltha zetah chuan huatna bak engmah a lang lo,ka nui lui leh saka,ka inher ta zawk.

Ka pen tan chiah tihin min rawn nem nge ka hre lo,ka tlan dawrha,Balconya rawn chhuah tum ve niawm tak ka va su chawrh bawk.

'Sorry...' tih pahin ka hawichhuaka,Darian-a ka hmuh takah chuan ka chil ka lem khalh ringawt.

'Ngatinge? Oh..Em” a ti chhuak hulh ringawt.Ka hawileta,Emily hmel phelh phang mai chu ka en a,Darian-a a hmuh tak vang nge ka hre lo,a inhnit ta hlap hlap.

'I nupui hual hian min thah a tum aniang,i hawpui vat loh chuan a mualpho mai a hlauhawm' ka ti salh.Darian-a insehruh talh talh chu ka hmu ru kar,a kekawr ipte a zena,Emily a en ngur bawk.

'Em,enge thil awmzia?' a aw a ring lo.

'Min hmusit lutuk..' a insut leha,ka ner nak mai.

'Sawi duh lo mai rawh,ka hmuhsit theih i ni hleinem,mahse thil pakhat.Hmana hmeichhe a ve tak,enge tihtur pawh hre lo kha ka ni tawh lo,Ambie-a hnena ka thilziak tidanglama pe tu kha tu nge anih ka hriaa,min nawr nasat phei chuan Darian-a hi hrilh ka chak zek zek ania' ka ti ta duah.

'Lawk...han sawi nawn leh lawk teh' Darian-an a ti sup.

'Ni lo e,i hre duh tak tak anih chuan zawng ve mai rawh,thil harsa lo ber anih ka ring.Chuan,he hmeichhia hian ka fanu a enkawl ka duh dawn lo bur,ka fanu tan a boruak hap hi a sang lutuk,tur ei tir siin Lungphuchawlin a thi hlauh palh ang,tu pawn ti na se,a au ri ve thei dawn si lo a...' ka ti leh sak sak mai.Ka lo khawl khawm tawh kha a baw hiau hiau a ni ber.

'Hetah i lo awm daih law? Ka zawng che a' kan boruak tang zet hre loin zangkhai vahin Hmingthana'n a rawn ti a,ka bulah a rawn ding nghal bawk.

'Boruak thianghlim dawn ka tuma,mahse...' ka ngawi leh daih.

'Thil dik lo a awm em?” a ti a,min ena,Darian-a leh Emily a en leh bawk.

'Aih,awm lo..Emily hi a nuam vak lo a,chuan keiin haw ka duha,min hruai haw zawk la...'

'Ok,tehreng mai,khawnge i bag?” a ti tha ve mai.

'Hallah..ka va la ang..'

'Lo awmrawh,ka va la zawk ang..' tih leh kal a rual chu a ni der.

'Enge thleng chiah?” kan tlanchhuah hnuah a ti a.

'Engteh vak mah..ngatinge?” ka ti liam puat,pawnlam ka hawi vauh vauha,kan tlan zawngin thli a rawn thaw heuh heuha,ka harh sawng sawngin ka hre bawk.

'Emily kha a tap bawk sia,bakah Darian-a lah khaaa..' a ti leh a.

'A nuam lo ka tih kha..' ka ti sap..

Ka mit ka chhing vang vanga,Darian-a khan engtin nge ka thilsawi kha a ngaih ang ka hre lo,a hre lo der mai mai nge a ngaipawimawh lo lah ka hre hek lo.Kum hei lehchen a liam hnu pawn engmah a la hrechhuak lo tak tak anih chuan hriat a tum lo tawp animai.Darian-a,mi pangngai aia sang leh mi chunga leng tan engmah hriat harsa a awm dawn lo.

Ka muhil thei bau lo,Ida-i muhil thaw ri sak sak ka ngaithla kar.Light On hian ka muhil thei ngai lo kha ania,Ida-i pian hnuah erawh Off in ka mu hleithei ta lo.Ka ngaihtuahna ka kawma,mahse engmah ngaihtuah chhuah ka nei chuang lo.Emily bulah khan ngeiawm takin ka tawng mai kha ania,Hmingthana a zawt anih chuan a lo inchhang buai maithei,mahse khatianga damthlap a hmachhawn kha nuam ka ti tlat lawi.Ambie-a hnena ka Thawnthu ziah chungchang ka sawi erawh engmah hriat ka nei lo.Tihdanglamin a lo pe reng em ka hre lo hulhual.Mahse, amah Darian-a kha chuan ama mualpho theihna kha a pe dawn lo bur.Bakah mak deuh pakhat a la awm ta cheu,Ambie-a khan thil dik tawk lo kha a lo hmu anih pawhin engvangin nge Darian-a hrilh hmasa lo a Fb lamah a dah ngawt? Ka thuchhuak hlawl mai.A tir khan ngaihtuahna chang ka hre miah loa,ka a veka,nun khawchhuah tumin ka fight takmeuh zawk anih kha..

Nuam lo zetin ka tho chhuaka,ka hrawk a thip hlura, chil lem ringawt pawh a harsa talh mai.Ida-i school kal tur ka siam a,Chhuani hnenah Taxi a thlah mai turin ka ti ta nge nge.Engmah ei loin khum lam ka pana,Nachhawkna leh hrtilang damdawi ka ei a,muhil vang vang ila a zia mahna.Ka hnar ping mai bakah ka khua a sik a,ka taksa a na vel vek bawk.Ruatfela hnenah ka kal dawn lo tih msgin ka hrilha.Hritlang khawsik satliah a ni tih ka hrilh tel bawk.

Door bell riah ka harha,tho mai peih loin ka mu lui vang vang,ka phone ka bana,dar zat ka ena,Dar 12 a ri tawh.Ida-i te an lo bang tawh a ni ngei ang.Zia a hnekin ka mut hma ai khan ka rit zual ta sauhin ka hre bawk.

Kawngkhar ka hawnga, Ida-i a rawn zuang lut tharh,tun ang hunah In ka awm ngai lo bawk nen mak ti leh hlim hmel a inkawp vek.Min rawn bawh nghal chang chang mai.

'Awi,i kal lo law?” Chhuani'n min hmuh veleh a ti nghal hliai.Ka bu nghat,ka hrawk na nen ka tawng buai peih lo.

'I van nawm lo hmel ve.Bawihte..I thawmhnaw ka lo thlak ang' a ti nghal zung zung,ka malchung atangin a pawmthlaa,min rawn en a.'Kalchhuak miah suh' a rawn ti a,ka nui a,ka bu nghauh bawk.

Homework ka tihpuia,School lama an thil tih a sawi paha,ka nuam lo bawk nen ka nui lui hram hram a ni ber.Door bell ri ka hriaa,Chhuani hawnsak turin a kal a,tu nge ka ngaihven lem lo.

'Ida..tu nge lo kal?” ka hawichhuak vat.Darian-a ka hmuh takah chuan atthlak zetin thil ka hrechhuak zawk,kan inneih hma khan tiang chiah hian ka dam lo tawha,min awmpui nileng thak kha ania..Ka lu ka thing nak mai.

Ida-in a Pa a hmuh rualin hlim zetin a zuangtho a,tlan chungin a pana,a Pa angaih zia haider theih a ni lo.

Ka bulah a rawn thutthlak puia,Ida-in a pa hnenah eng engemaw a hrilh mial miala,Uluk zetin a ngaithlaa,an nui dun leh rih thul.Hmuhnawm ti lutukin ka en a,a aia hmuhnawm tur hi a awm pawn ka ring lo.Darian-a hmel dam thlup leh a mitmenga a fanu duatna chu ka hmuh hmaih thei lo.

'Le,tunah chuan Homework ti zo phawtla,nakinah in inkawm leh dawn nia' ka ti a,a thle bak,a nur nang mai,A pa lungawi lo hmel nen danglamna a awm lo.

'Okhey,Mama sawi angin kan ti ang,i tih laiin Mama nen kan lo inbe lawk ang aw' a ti a, zaizirin a hrilh pah bawk.Chhuk mai loin a pa nghawngah a kuaha,a beng a khawih saka,Darian-a ka en vat,a beng khawih a ngaithei lo thina,ka tihluih sak fo thin kha ania.Min rawn en a,a then suk,kei ang bawkin a ngaihtuah ve tho tih ka hrethei.

'Officeah ka lo kala...' Ida-i en chungin a ti sup.

'Ngatinge?” ka zawhna atthlak zia ka hre leh hnuhnawh.

'Thil pawimawhah biak che ka duha,mahse I dam lo an lo ti a,i khua a sik em?” min rawn en vut.

'Hritlang khawsik satliah mawle..' ka khuh khauh,ka hrawk a na nghal vawng vawng bawk.

'Satliah chu a ni chiah lo hmel hle mai,Damdawi ka rawn kenga' tih pahin a Jacket ipte a zen a.A rawn phawrhchhuaka.

'Ka ei tawh,angai lo...a zia maiin ka ring' ka ti nghat.

'Ka hria lawm,mahse,hei hi a tha a..Tui ka va la ang' tih pahin a tho nghal vut,koh din pawh ka tum buai peih lo,Tawng rih loh ka duh ber.

Tui nen a rawn let leha,Damdawi ka kutah a rawn daha,ka ei zawh veleh tui min rawn laksaka,a va dah leh thlap,atthlak zetin ka pangchang chak hluah hluah,kan inneih lai khan ka nawm loh deuh chuan a phili nasa thina,hna kal loh ka phal loh vang chauhin a kal thin bawka,mahse tunah chuan ka pasal a ni lo a,lo induat tir emaw lo pangchang chiam tur ka ni lo tih ka hria.

'Hei hi ei leh la...' ka ban ve mai.Ka in pawpa,ka kachhung a hiar nghal mam mam.

'Ida-i hi i nawm loh chhung chu ka lo awmpui rih dawn mi?”

'Aih..' ka chhang rang lutuk mah mah,a then suk ringawt.

'Ok,i thu le,mahse naktuk hi ka pa birthday ania,ka pain hruai turin min ti a...'

'Ka...ka hre lo...mahse, an ngaihdan a lo ni lo theia..' ka ti niah niah.

'Engvangin nge an ngaihdan anih loh ang? Ka nu phei chuan a sawi renga..' a ti sup,ka ,mitthlaah ka nu leh ka pa hmel a lo langa,kan inthen khan engmah an sawi lo.A hnu zelah pawh engtin nge min ngaih ka hre hek lo.Tuman min rawn be zui lo hrim hrim,Ruth-i leh Jared-a pawh vawikhatmah ka hmu nawn hek lo.

'Ka fanu a ni a,tuman an tihnat ka phal dawn lo,min ring rawh..'ka kut a rawn vuana,laksawn ka duh teh nangin ka ui ru tlat lawi.

Mutchhuakin min zem a,ka inthing harh lui hram hram nain ka ti lui thei ta ngang lo.'Ka mutsan lawk mai ang che u,' ka ti ta thlawt,a bu nghut.' I damdawi ei vang anih kha,i harh leh chuan i zia hawk mai ang' a ti supa,Ida-i ka en a.

'Hlauthawng suh,ka lo awmpui ang..' ka ngaihtuahna hria niawm takin a ti leh a,ka bu satliah ringawt,a bula dah kha ka rilru a nuam dawn em ka hre lo,mahse tunah chuan muthilh bawrh bawrh aia duh ka nei lo.

Ka harh leh chuan room chhung a lo thim vek,khua a thim tawh tih ka hrethei mai bawk.Ka inbengkanga,thawm engmah awm loin a reh thap mai.Ida...hmanhmawh zetin ka chhuka,kelawngin Living room ka pan pheia,mahse an pafain Sofaah an lo mu duna,Tv lam hmuhnawm tih hmel zetin an lo thir dun dauh dauh mai,ka thaw nghal huai mai bawk.Tv ka melha,ka then ta sak,Ida-i hmuhnawm tih em em ' Frozen ' an lo en a,vawi tamtak a en tawh,mahse a chhuah apiangin a en peih reng thung.

Door bell riah Darian-a a che hrut,min hmuh hmain roomah ka tawlh lut nghal vat thung,Khum lam ka pan leha,Chhuani pen ri thlak thlak ri ka ngaithla kar bawk.

'Lo thu ru,a muhil a,a rawn tho tep tawh ang' Chhuani'n a ti lang lang.Light ka on a,tu te nge lo kal ka hre lo,ka phone ka dapa,ka ak lo.Khumah ka dah anih ka ringa, ka rin ang ngeiin lukham bulah ka lo dah.Ka hmet enga,Miss call a lo awm nual,min rawn call tu ka en a, Hmingthana leh Ruatfela bakah number ka hriat ngai loh pakhat a awm bawk.

Darthlalangah ka in en vang vang,ka hmel pawrfap leh dang deuh lap chu ka thlira,Ka sam ka chhipah ka tawn tawm chho tawpa,ka mut that loh thin vanga ka mit hnuai val kual raih pawh a lang chiang lehzual.Darian-a sawi ang tak tak khan ka khawsik a reh vek tawh,ka taksa sil thum pawh a zia ta hawk bawk,mahse ka hrawk erawh a zia hret chauh.

Room kawngkhar ka hawn rualin an rawn hawi nghal thap,Ruatfela leh Hmingthana an lo ni a,Darian-a erawh mu tawh loin a thu thluang duaia,amah ngheng chetin Ida-i a thu bawk.

'Enge i an?” Darian-an a ti sup.

'Ka zia lutuk,in va fel ve..' Hmingthana ka en a,a bula thutna awlah ka thu thla nghal zat bawk.

'Fel lam pawh a ni lo,nizan a ka chhuahpui vang che kha aniang ka tia,ka rilru a lo nuam lo a..' a then sak.

'Ni lo tawp ang,tun ang thlasik intan dawn hi chuan a tihdan fo alawm' Darian-a zawkin a rawn ti a,Hmingthana'an a mithmul a tisang awk ringawt.

'A nih chu mawle,thil hriat duh ka neih chuan zawt ziah che ila a tha ang,i hrechiang zawk tak ang' Darian-a en chungin a ti a,ka insangmar nghal teuh thung.

'Lutuk,amah a inhriat chian aia nasain mawle..' a ti supa,pawisak nei lo hmel zetin a hmui a petsawi zauh bawk.A khawsak dan chimawm lutuk chu ka lo haw hluah hluah thung.Kan boruak tang at mai tihdaih tumin Ruatfela a ri ta hlut,nidanga ka la hmuh ngai miah loh Hmingthana hmelah ka hmu ta tlat bawk.Ruatfela tawng bawrh bawrh a chhang zauh zauh nain a thutak ta sawt tih ka hre ru kar thung.Rei pawh awm loin an haw ta vat.An haw hnuah Darian-a haw turin a ding ve ta chauh,Ida-i lahin haw a phal lo a,biak lah a chhang duh hek lo,ka vin tak that hnuah a titau lui ngam ta lo.

Apa haw hnuah Ida-i a tap muhil ta nge nge,Darian-a hian engtin nge a tih a tiang em ema a ngaih tak hi ka hrethiam hlawl lo.Ka phone ka bana,msg a lo awm kalh,min rawn thawntu ka ena,Darian-a..

'I muhil thei dawn em?” tih zawng,engvanga min ngaihtuah ta viau nge anih ka hre lo.Emily nen inneih an tum tih thawm awm lai lehnghal.

'Ka beisei..' tih ringawt ka thawn leta,a rawn reply leh zat.

'A tha..Ida-i a muhil tawh em?” a rawn ti leha,'Aw' tih chauhin ka reply.A reh ta vang vang.

Zingah erawh Ida-i mood a tha leh ta viau,mahse School atangin a pain a hruai dawna,a Pi te bulah a kal dawn tih vawi tam a sawi hman,a phur lutuk chuan min ti thinrim ru teuh thung.Hna kal ngei ngei ka ngaih avangin Ida-i te chhuah hnuah ka inbuala,muangchangin ka insiam leha,ka hrawk na a zia tawha,mahse ka aw a chhang a,ka khuh bur bur bawk.

'Eh,i lo kal alaw?'Mapuii'n min lo ti nghal vat.

'Um,kal zuai ang,ka haw hma ang ka tia' ka ti a, ka khuh nghal bawrh bawrh bawk.

'Awi,i van la nawm loh hmel tak..tih ngei ngei ngai a awm tihna mi?” a ti leh hliai,ka khuh leh hlauin ka bu ta nghat zawk.

Ka roomah ka inkhung chawhma ta thak,ka zawh veleh Hmingthana ka thawn nghala,mahse reife ka nghah hnuah pawh engmah chhanna ka dawng lo,hna hmanhmawhthlak a ni bawk si nen,ka call ta nge nge.Reife a ring hnuah a pick ta hram.

'Hello...' nidang ang bawka zangkhai vahin a rawn ti a.

'Ka rawn thawn che kha aw,i hmanhmawh hmel sia' ka ti a.

'Um,ka lo en ang,tunah tak hi chuan Airportah ka awm meka..' a rawn ti a.

'Khawnge i kal dawn?” ka ti a, ka khuh zui khauh.

'Thil hmanhmawhthlak lutuk a awm,chuvang mawle,kartharah ka rawn let ang..Lawk aw,nakinah ka rawn call ang che' a ti a, ka chhan let hmain a off daih bawk.Eng chu a hria nimaw??Mipa ho mizia hi a in ang vel vek mai hian ka hria.Hei pawh hi hriatthiam har lutuk mai a.

Dar thum velah haw tumin Computer ka offa,vawt ka tih danah ka khua a sik leh dawn anih ka ring ve tawp.Ka nghawng ka tuam luma,ka ngaihtuahnaah Darian-a a lo lang zawk,tunah chuan Ida-i a hruai tawh ngei ang.

'Hello...' a rawn ti sup.Atthlak zetin a aw ka hriat rualin ka awmdan a danglam titih ringawt.

'Ida-i i hruai tawh em?” ka ti sap.

'Um..i be duh mi? Video call i duh chuan?”

'Aih,angai lo mai..i theih chuan lo dah hma la..'

'Ok,ka lo tum ang..'

Phone ka bagah ka thuna,Party naa min fawh atang khan kan inkar mak takin a danglam vek,ka ngaihtuah zawng ringawt pawn ka mur ar ar thei hial bawk.Ka phone a ri leha,ka nui sak mai.Ida-in min biak duh vangin min rawn call let anih ringin phone ka phawrha,mahse Duati zawk..

'Khawnge i awm?”a awah hlauh nei a ang viau.

'Office,ka haw dawn mek'

Mapuii hmanhmawh zeta rawn tlan lut rawk rawk ka hmuh rualin ka mengphar awk,a phone a rawn lek va..Hmui phunin ' enge?” ka ti a,a phone a kawk ringawt thung.

'Fb kha en lawk teh'

'Lawk,ka fb lo...'

'Aaaa,tu emaw ber phoneah khan en vat rawh' a ti leh halh.

'Ok,ka lo en ang,engthil nge?”

'En phawt rawh,ka rawn call leh ang che' a ti a, a off ta daih.

Mapuii lam ka hawia,a rawn pheia,a phone ka hmuh theih turin a rawn leka,enge inziak ka zuk hmuh rualin ka thaw a chham titih..