MON HOMME- 2

Chapter-1

Kawngkawia Motor rawn lang ka hmuh rualin ka kawi zawka, chak zetin min tlan pel fuaa,kei erawh ka balance a buaia, kawng sir, Metal loh chinah ka thal der.

Eng nge thleng tih ngaihtuah in ka mu deuh vang vang,ka thih teuh zia ka ngaihtuaha,ka khur zui nghal dar dar mai.

Kha Motor kha,ni lo..keima thiam loh zawk,Scooty ka khalh tih ngaihtuah lek loin ka rilru kawmin ka tlana, mi tlawhpawh tam loh lam kawng nimahse Motor tawk thut thei reng ka ni a, mahse chutiang lam ngaihtuah loin ka rilru ka kawm a,a rawn lan thut khan ka buai ta der.Scooty ka khalh ve atangin kum 4 dawn a ni tawha,ka vawikhat accident na erawh a ni hauh lo.

Ka hlauhthawn zualpui a reh a, muangchangin ka tho a, ka sira ka Scooty let ngat chu ka tung a,vanneihthlak zetin a rang nin nian tih loh chu chhiatna nei hmel a pu lem lo.Ka in dap a,ka kiu thip deuh vang vang leh tlema ka khup na deuh tih mai loh chu engmah hliam na ka nei lo.

Scooty ka start a,a nung thei hlauh,vanduai vannei tak chu ka ni tho mai.Duati sawi dan kha chuan ka kal tumna ka thleng hnai tawh in ka ring, ka hawi kuala,ka thlang deuha kawng peng niawm tak awm ka zuk hmu theia,helai hi an huan thenawmte ram a tih kalna kha a ni ngei ang.

‘I tlan char char anga, darkar khat vel i tlan hnuah kawngpeng a lo awm anga, kha kha kan ri te annia, khami thlangah khan kan huan peng a lo awm leh ang,Motor a lut phei thei veka, mahse, kan kal khat deuh a, a hnim viau maitheia, Scooty aiin kein kal la a nuam ang’ a ti anih kha.Chuti nih chuan Aizawl ka chhuahsan atang leh Highway ka pensan hnunah hei hi huan peng niawm ka hmuh hmasak ber a ni a,anih chuan a thlang lawkah Duati te huan chu a awm tihna a ni ang.

Minute hnih vel lek ka tlan leh hnuah a sawi ang ngeiin huan Peng ka hmu nghal a, ka Scooty tan tlan luh luih a atthlak dawn tih ka hmuthiam nghal bawk.Ka chhuka, ka nawr pheia,kawngah kal an awm anih pawhin an hmuh mai lohna tur laiah ka dah a,ka lock thlap bawk.

An kal khat satliah pawh a ang lo,kum hnih vel lai tlawh pawh tawh loh a ang zawk.A hnim bur a,mihring sulhnu hmuh tur a awm lo.Kawng a awm thin tih a hriattheiha,mahse hnimin a zar hliah deuh vek,a pawi chuang lo.Engkim hre sa veka kal ka ni a, Chem ka pai sa thlap.

Ka chem ka phawrha, ka kalna tur ka vai kaw chawpa,chho awm loin a zawl phei vek.Sah fai that chu nise a nuam hle ang tih a lang thei ruak.

Darkar chanve dawn ka kal hnuah ka tum loh lutuk hmunah ka chuang chhuak ta hlawl,ka thaw hak mai.Ka inhai kuak na lamah ka chau a,chumai piah lamah ka hmalam zawl duai,phul hniam te te to khat vek chuan min Barakhaih takzet bawk.

Duati khan hetiang hmun nuam lutuk hi an huan chhungah a awm tih a sawi hauh lo.Min Surprise a lo tum sa a ni mahna,ka hawi kuala,mahse a sawi..Thlam leh thildang engmah ka hmu hauh lo.Hmun dikloah ka kal ti dawn ila a sawi ang chiah khan peng hmasaber dawtah ka penga, enkawl loh tih hriat em emin a hnim  bawk.

Ka kal pheia,a sir tawp thlengin ka kala, a zau over lo,siamluih niawm takin Thing in a sir tawn tawnah a huala, thlanglam ka hawi thlaa, awihawm loh khawpin a awih thla vut thung.Ka let leha,thlam awmna han zawn kual leh vel ka peih tawh lo,mamawh pawh ka mamawh hran lo.He phul hmun hi ka hmuh tirh atangin  nuam ti takin ka nileng thei ang tih ka chiang sa thlap tawh zawk.

Ka bag atangin thatchhe puan ka ken ka phawrha,ka phaha,eitur tlem ka pai leh Laptop ka phawrh leh a,Laptop hi ka hna nen thui tak inzawmna a neih avangin kalna apianga ken ngaiah ka nei tawh.Bag lukhamin ka mu zangthala,Van thiang kuk lam ka thlira, chhum engmah a awm lo,Mu niawm tak a thlawk kual vel a, thli thawin thingkung a chhem rik bak engmah thawm dang awm loin a reh vawng vawng a,ka duh ka hmu tih ka hria..Ni e.Thlamuanna, engmah vei nei lo a nun kha ka chak a ni lawmni?

Ka mit ka chhinga, mahse ka duh loh tawpin ka nu hmel ka mitthlaah a lo lang nghal zat.

Kum 15 ka tlin kumah ka pa hi ka pa tak a ni lo tih ka hrechhuaka,na ka tihzia leh hrehawm ka tihzia sawi ngaihna a awm lo.Ka naupan lai ka hriat theih tirh atangin Pa dang ka neih awm ka hre ngai lo,mahse ka pa Boral hian ka la naupanga,engmah hre rual ka ni lo a,tuna ka pa nen hian ka nu hi an lo innei zui leh mai niawm in an sawia, ka Pa tak tu nge anih ka hre lo.Min hrilhtu lahin tu nge ka pa a hre bik hek lo.Tihpalh thil takzeta sawichhuak a ni ve tho bawk.Mahse, an mahni tana hrehawmna thlen ka duh loh avangin Pangngai thei ang berin ka nun ka hmang luia,ka zirna erawh chuan a tuar ta tho.

‘Ngatinge i mark a va chhe em em ve?’ ka nuin min ti a,nu invawng fel leh Strict tak mai,nalh thlarh reng mai a ni a,Ka pa pawh hian a ngam meuh lo ni a hriat chang ka nei fo.Mahse, mi hmuh danah chuan ka nu aia Pasal te chawimawi thiam an awm ka ring lo thung.

‘Biak hian min chhang thin rawh, engemaw i hriat ni? Tunlai i awmdan hi ka duh lo tawp mai’ a ti leh hmarh hmarh a.

‘Eng maw i sawi?’ a sawi ka hre lo tak tak pawh a ni lo.

‘Zir tha nasa ang che,School fee mai pawh niloin Tuition i kal bawka,mahse i mark hi enteh,i Pa a sa hle ang’ a ti leh a.

‘Anih chuan min vaw dawn tihna mi?”

‘A vaw tawh che mi? mahse, chuvang ngawt chuan i pa hi nawrlui miah suh,chutilochu…” a ngawi leh daih..

‘Ka nawrluih chuan a fa tak ka nih loh vangin min hnawtchhuak dawn tihna mi?” ka tum reng vanga sawi pawh ka ni lo.

‘Eng maw?” a ti thawta, ka phu zawk.

Rang fein ka nu ka ena, a hmai dang lap maiah chuan ka thilsawiin a thawng nat zia ka hmu a, chumi rual chuan tak tak ni lo se ti a ka lo ngaihtuah thin kha a tak anih zia a lang chiang nghal vek.

‘Ka rindan hi a dik tihna mi?” ka huaisenna  zawng zawng sawmkhawmin ka ti leh a.

‘Eng …eng?’ a lu a thing nawk nawk ringawt.

‘Tu nge ka pa?”

‘Ngawi rawh, ngawi hmak ang che’ a ti leh nghek.

Tawng tumin ka ang ziaua, mahse kawngka lama thawm a rawn awm takah chuan ka ngawi ta zawk.Tu nge lo haw en tumin ka hawi pheia,ka pa leh ka nau,kei aia kum 5 laia naupang rawn inzui lut chu ka va hmu a,ka pa a ni ve lo tih ka hriat atangin thla li lai a liam tawh,nilose tiin ka ngaihtuah zantina, mahse engmah awmzia a awm ngai lo.Ka ngaihtuah na vang ngawtin engmah a danglam chuang hek lo.

Engmah zep theih a ni ta lo tih an hria nge ka hre lo,an pahnihin Roomah min ko luta, engkim an sawi faita vek,ka Pa boral hian kum pawh ka la tling lo a, ka pa ni a ka lo hriat hi ka nu te khuaah Sawrkar hna thawkin a awm a,Nupui sun ve bawk a ni a,rei pawh anih hmain dinhmun in ang chu an lo in ngaina chhoa,an tlan dun ta a.Ka nu chhungten ka nu an tuithlara, min hringtu ka pa chhungte phei chuan thi se an ti zawk niin a sawi.

Hun rei tak chu ka pa chhungte pawn ka nu an pawm mai thei bik lo,mahse hun a kal zela,kum tel a vei takah chuan chhungkua intihchhiat reng theih ni hek lo.An inzawm khawm leh ta nge nge,ka nau a lo piang ve leha,tuman ka nu leh pa inneih dan leh fa tak ka ni ve lo tih an sawi ngai ta loa, ka nu hmingchhiatna pawh khuhin a awm ta bawk.

Engkim ka hriat hnuah ka thawl huai dawn emaw ka ti a, mahse ka thawl chuang miah lo.A hma angin ka pa ka nel thei tawh lo a,a suala, min endan a danglam ka ti lo,keimah ka inthlahrung a ni ber mai.,Mahse, ani erawh chuan min endan angai renga, min duat dan ngai rengin min la duat tho.Pa tha tak chu a ni…Ni lo,min pawngsual tuma min beih hma khan Pa tha tak angin a lang zawk.Kum kha lehchen kan awm ho a, ka tleirawl tirh atangin dik lo zawnga min khawih ka hre ngai lo,kum 20 ka tlin hnuah ka nu a dam tha lo a,ka pain zu rawn nam haw a nei ta zauh zauh,ka nu lah that tak tak awm loin a nun a hmanga, nupa nun hman lamah harsatna an neih vanga kha thil tenawm lutuk kha ka chungah tih a tum ta a ni em ka hre lo,mahse ka awmzui thei dawn lo tih hriain lehkha ka hnutchhiaha,ngaihtuahawm ka ni lo tih ziakin ka thilneih zinga ka duhzual ka kenga, ka pawisa khawl sa tlem bakah ka nu Purse ami ka hmuh theih ang ang bang awm loin ka la fai pak bawk,nun tumin ka beia,tunah chuan khang hun te kha chu mumang ang mai anni ta zawk.

Ka thiante puihnain Mi in hnuai man tlawm thei ang ber ka luaha, Dawrah ka thawka,ka eikhawp tawk tawk chu ka thawkchhuak ve mai.Vanneihthlak takin ka Graduate hman hlauh a,tunah chuan ka Dawr thawhna thin te puihna a zarah hna pangngai tak ka nei ve ta a.Ka khua a har thina,ka nun mal ngawih ngawihnain a hrin chhuah,Thuziak lamah ka inhmang nasaa,Facebook lahin ka tan kawng a hawng tha em em lehzel.Tunah chuan ka nitin thawh hlawh leh ka Thuziak a ka hlawh hmuh atangin Pawisa lamah chuan ka lungngai ta lo.

 Mahse,sum lamah engmah harsatna lian nei loin nitin ka hna thawk thei mah ila ka nun a ruaka, ka nu hian tuna ka awmdan hria se engtin nge a awm ang?ka tlanbosan hnuah khan min ngaihven nasa tih hre mah ila ka bihruk sana, ama tana nat belhna nih ka duh loh vangin a hmuh phakah ka awm lo.A pasalin min beisei tih ka sawi thei lo a,ka let leh thei hek lo.A fanu hi ka puitling tawk tih hria se a lawm ve ka ring em em thung.

Ka naupanlai thian leh ka best in Pasal a nei tawha, tunah chuan ka tuina kawnga tui ve,Hmeichhe fel tak tak Panga thian ka neia, ka engkim,ka chhungte,ka thuruk vawngtu, ka nihna ang anga ka lanchhuahna te anni a,ka neih hlu ber te anni bawk.Chung zinga pakhat chu Duati a ni a, ka ipik na hriain vawiin hian awmdan tur min plan puia,keimaha awm ka duh ringin helai hmun hi min kawhhmuh a, a tisual lo nasa.

Ka thuchhuak ta nge nge,mahni a awm ka duha, ka awm ta ngei,mahse ka ipik dan angai reng,vawiin hi ka nu boral atangin karkhatna cham chiah a ni a.A hma pawn ka bulah a awm chuang miah lo nangin ka neihchhun a ni a, a thih thu ka hriat rualin mal intihna avangin awm ngaihna ka hre lo.Nun hi a ruaka,engtik niah emaw kan la inhmu ang ti a ka suangtuah thinna te kha a thlawn a,tumah neih nei loin ka mal ngawih ngawih tih ka ngaihtuaha, tah ka duha, ka tap thei chuang si lo.

Duati nen kan kal ve ngei,mahse a ruang pawh ka kil ngam lo.Mikhual ang maiin midang te hriatchhuah hlauin ka awma, ka tlanchhuah danah khan pasal um niawm ang hiala sawi ka nih avangin tumah kan chhungte thin hmuh ka duh lo.

Van lam ka ena,ka beidawng,nun hi eng nge a hlutna? Hetiang a mal tur hian ngatinge ka pian?

Ka au chhuak nghek,ka inring hman lo,mahse…keimahah danglam a awm,phurna niawm takin min fana,ka awmdan a danglam..Ka au ri hre tur an awm lo tih hrereng chungin ka hawi kuala, ka rin ang ngeiin tumah an awm lo..Ka ban ka phara,ka theih tawpa ringin ka au leh nghek,ka au zel a..Pathian ka chhuahchhala, ka nu ka ko a..Ka chhungrila ka lo vei ngawih ngawih te ka auchhuahpui ta vek…

Chau zetin ka thu thla hnawk,mahse ka zangkhai thung..Khatianga duhtawka au chhuah kha ka lo mamawh em em tih ka chiang ngang mai bawk.Thlanglam atanga thli rawn thawin ka sam chhawlleng a rawn chhem a,ka mit ka chhing vang vang bawk.

‘A ring hle mai a…’  ka phu nghek,rang lutukin aw lo chhuahna lam ka hawi nghal zawk bawk.

Mipa pakhat inkuangkuahin a lo ding reng tawh,nichin mai kha chuan tumah ka hmu hauh lo,Nizanah Jial tang tlanchhuak emaw tualthat tlanbo emaw an awm em tih ka ngaihtuah vata, chutiang tumah an awm lo,awm nise kei aia hre hma tur chuang an awm bik lo.Ka hna kaihhnawih anih tlat avangin.

Che miah loin kan inmelh ren rawn,ka chin than dan ngai bawkin a lang thei chin ka hmu kim leh nghal viau.Kekawr uk a haa,a tlang lam erawh Ramvah Boot niawm tak chhungah a thun lut ve ve.T-shirt dum,rawngdal lam a  haa,a nghawng kir danah a rei thawkhat tawh ang tih a rin hriat theih mai bawk.A sam buk zet chu enkawl loh tih hriat fahranin a ther deuh huang a,khabe hmul pawh a zuah vek..A hnar sang tha zet leh a mitmeng nelawm lo lutuk chuan Mizo ni loin hnamdang a pawl zawk mah,mahse Mizotawng kha a pai hauh lo.Thlahpawlh pawh a ni mahna..

‘Tu nge i nih?” ka tawngchhuak hmasa ta nge nge.

‘Ka zawh tur zawk che niin ka hria..’ bung zetin a ti hmuk.

‘Helai hi ka thiannu te ram a ni a, ka kal dawn tih pawh a hresa vek a…’

‘Eh,chutia law?’ ngaipawimawh lo zet hian a ti duh lek.

‘Aw, nang tu nge i nih? Midang an awm dawn tih a sawi si lo’

‘Che suh…’

‘Eng..eng maw?”

‘Che suh…’ a hma aia zawi zawkin a ti leh supa.

A che zauha, thawm nei mang lo khawpa rangin ka bul a rawn thleng chilh nghal,hamhaih lutukin a che zia ka thlir mawl tawp.A in thazo lutuk kha a awihawm loh hial zawk.Khatiang khawpa thawm nei lo kha mihring ni awm lo hial zawk a ni.

A thu hniam ruai ruaia,a kut a phe zawka, eng ngemaw a khai kanga,na zetin phul vuak nan a hmang nghal dawp bawk,ka phu leh vak thung.A vaw nawn leha, a rawn ding chhuaka,a thil ken ka hmuh takah chuan ka ip chawiha, ka thaw a chham lo chauh bawk.

‘Hei hi,i ngainat vak ka ring lo deuh..’ ka lamah a rawn lek hnai zauha, ka petek nawk thung.

Engtin nge ka hmuh loh theih? Bawkvaka kal chi engmah ka ngaina lo,a bik takin Rul leh lek phei chu,Khawvela an lo awm ve chhan hi ka hrethiam lo zawk.Tvah pawh ka en duh lo hlawl.

Thlang lam a pana, khamah a theh thlaa,a rawn let leh a, ka tawlh hnung hrat thung,amah chawp chawpin ka rap zo vek.Mahse, ka nunna chu min chhan sak tho mai,rul a rawn manna kha ka awmna atangin feet tam a ni lo.

‘Ka lawm e aw..’ ka ti sep ringawt.

‘Engvangin maw?”

‘Kha rul vang khan mawle.’

‘Um,mahse i tana that ka ni lo.Helaia ani nen khan chen dun ka duh lo mai zawk’

‘Enga?”

‘Zawhna i ngah ve hrim hrim thin nge i beng a tha vak lo zawk?’ ngei lutukin ka melh reng ringawt.

‘Min hrethiam teh,zawhna ka ngah hran lo.Ka zawh chhun che pawh a tul vang a ni tih i hria,bakah helai hi Duati te ram a ni a,a enkawltu atan an dah che anih pawhin Polite takin awm mai rawh.Ka kal dawn tih a hre lawk saa,I lo ngeiawm kual viau kha a tul lo ang’ ka ti ta duah,mahse mak takin a dar a ti sang uk duh chauh.Haw hmel pawh a pu chuang lo.

December 17, 2018

MON HOMME- 2

CHAPTER- 2

‘Haw tawh rawh’ teh daih chuan a!!

‘Ka duh hun hunah ka haw ang’ ka ti hmaka, ngaipawimawh lo hmel zetin ka puan phah ka pana, ka thu zui hmiah bawk.Mi ka vawikhat hmuhnaah tiang em em a ka ngei hi ka la hre ngai lo.

‘Ok,I thu thu le,mahse thil pakhat…saw saw en la,nichin khan i hlau tih ka hria ania..i awm duh leh i thu thu’ tih pahin a kawk zauha, a kawhna lam ka hawi vat.Ka ding chhuak nghal zawk thung,ka ke hnuai a za uai uai bawk.

Tangkawng nge Awke pawh ka hre hrang lo,kan piah hla deuhah a bawk vung mai.Ka lu ka thing nawk bawk,ka awmzui duh hauh lo.Thei phei ila chuan ka Scooty awmnaah mitkhapkar lek chhunga awm nghal ka duh hial zawk.

‘Lo kal rawh le..’a tawng ri ka hriat veleh ka meng a, a hma ang bawk khan hriatthiam har zetin a mit meng nelawm lo zet in min lo melh leh run tawh, a kekawr ipte a zen tut bawk.

Engtinmah ka chhang lo,ka thu hniama, ka bagah ka thil ken ho ka khung a,Tangkawng niawm tak awmna lam melh lo turin ka insum hram hram bawk,diktak chuan hlau em em mah ila min rawn hnaih em tih en ka chak na in a turin min tur tlat lawi.

Ka khung zawh veleh ka ding chhuaka,ka kalna kawng lama let turin ka pen tan nghal chu a ni mai,mahse eng nge thleng leh ta? Ka banrekah tak a rawn vuana, ka ding chawt bawk,rang zetin ka hawi leta..

‘Eng nge ni leh ta?”

‘Khawiah nge I kal dawn?”

‘Oh,haw turin min ti emaw ka tia,ka haw ang chu ka ti’ ka thle baka,ka kut a vawnna ka melh zauh bawk, hrethiam niawm takin a thlah ve mai bawk.

‘Kha lam kha kawng a ni lo,i thleng har awm em mai’ a ti leh nghuta, ka hrethiam chiah lo.

‘Ka lo kal lam pawn ka lo kala…’ ka sawi zawh hmain a ner nawka, a phun sup bawk.A sawi erawh ka hrechiang thei lo thung.

‘Kawnghlui atangin i lo kal anih chu,helam atang hian kal la,ruah sur hmain i hawna tur i thleng hman zawk ang’ ka hmuh tirh atangin tun hi tawngkam dam dap a hman vawikhatna.

Chhan tumin ka ang hman ziau,mahse ka banrek a rawn vawn leh rualin ka chip leh hmak,min pawt kal zui chu a ni der.Hnial pawh tum ila awmzia a nei dawn chuang lo tih ka hria,hnial buai loin min kaih ang angin ka zui ta zawk,a bawp a sei bawk nen ka tlan deuh dat dat mai.

Phul hmun kan paltlanga,thing hmun thui lo te kan kal leha,kan chhuak ta hlawl,vawiina a vawihnihna atan mak tih vangin ka thaw leh ta hak mai..Kan hma lam ram awmdan chu ka beisei loh lutuk bawk a ni leh ta..Kawng zawh ngun tih hriat tak,lung phah vek hi a awm phei raiha, chu chuan thlam ti ila In lian pangngai tak,thing veka sak niawm tak a pawh phei a,Jeep,a chung khuhna awm lo a dinga,kawng sir tawn tawnah Saron uluk zeta cut insi vekin a awm phei bawk.

Mahse,Duati min hrilh dan kha chuan tiang hian an huan a awm lo,Assam type thlam lian tak a awm anga, a bulah thutchawlhna tur thinga siam a awm ang a ti anih kha,tuna mi hi chu chutiang a ni lo..A zawl veka,Thing In lian tak a awma, a piaha Thingkung upa tawh hmel tak ding luahah chuan Pipu a insuih a, thli thawt zawngin a then lauh lauh bawk..Ka mumang anih ringin ka mit ka chhinga,ka meng leha, a la ngai reng,khawimaw lai Lasi thawnthu a an ram nimai awm a mawi a ni.

‘I tha em?” a rawn ti supa, ka en vat.

‘Aw…aw,tha e….’

‘A that chu,kal ila…’ a ti a. Ka ban a vawnna a thlaha,ka chhan let pawh nghak chuang loin a kal zui chu a ni mai.

Muangchangin ka zuia, kal pahin ka hmuh theih apiang ka thlir kual a,hetiang hmun nuam neitu chu tu tak ni ang maw? Ka ta chu nise kar tluan tluanin ka awm duh ngei ang tih ka chiang.

‘Enteh, min lo hrethiam lawk..’

‘Um…’ a rawn hawi zawka, a kal a chawl chuang lo.

‘Duati i hria em?”

‘Ka hre lo aniang”

“Helai ka lo kal dawn hian ka thiannu te ram anih vanga lo kal ka nia..’

‘Nichin pawn i sawi tawh kha..’

‘Nia,mahse a sawi ang engmah ka hmu lo a..Engtik atangin nge huan i enkawl tan?”

‘A rei tawh mai..’

‘Anih chuan In saw engtikah nge in sak?”

‘Kum 10 vel a ni tawh ang…’

‘A ni thei lo,ka thiannu sawi dan chuan kawng peng hmasa ber dawtah i peng ang a ti a, ka penga,mahse engmah a sawi ang a awm lo a, min bum dawn der lo tih ka chiang” amah bia pawh ka ni chiah lo.

‘Ka ring e’

‘Eng maw i rin?”

“A bum lo ang che”

‘Anih si chuan zankhat thilthuah a lo danglam thut tihna mi?”

‘Danglam lo…’

‘Anih si chuan…’ a ding thuta, ka va su chawrh bawk..Ka tum loh tawpin ka rak that mai.

‘A na em?” a rawn ti vuta, a hmel nelawm lo zet kha tlemin a lang nelawm ta deuh.

‘Aih,mahse ngatinge i din thut a?”

A tawlhsawn rualin a din thut chhan ka hmu ta chauh.Gate a lo awm chu niin,a rinawm hmel ngang mai bawk.Ka hawi kual leh chiam pek,Gate ban Concrete rinawm zet ringa huan hungna Brick inrem chu ka hmu chawpchilh,huan hung nana hman chi,thing hling neiin a zar hliah deuh vek avangin ka lo hmu lo mai mai anih hmel e.An gate lah chu tawn tlang mai mai chi a nih hmel loh,chutiang bawkin a hungna bang pawh a sang tha.

A kekawr ipte a zena, chahbi bawr tam fe a phawrh chhuaka,Tala lian zet inkhai chu a herh hawnga,zau vak loin a nem kaua,chhuak turin min ti tih hriat zetin a thle zauh bawk.

Muangchangin ka kal pela, Gate a nem kau saah ka chhuaka,atthlak zetin a huan lang iar chu ka ena, ka lung a leng titih ringawt pek.

‘Minute nga vel i kal hunah Kawngpui i pawh mai ang,chuan a thlang lamah i kal hret anga, ilo kal na kawngpeng i tih kha i hmu bawk ang”

‘ Engtin nge i hriat?’

‘Helaiah hian ka seilian alawm..’

‘Oh…engpawhnise ka lawm e,Zampuii ka nia…’ engvanga ka hming hrilh ngawt nge ka nih ka hre lo.Chumai bakah a tir lama sawi awm tak tunah ka sawi chut pek  bawk.Huizz,ka sawi zo vek tawh,nimai mai tehse.

‘Engvangin nge lawmthu min hrilh ka hre lo nangin keipawh ka lawm e ka ti mai ang,tu nge ka nih i hriat duh ka ring lem lo a..’ a vawi khat nan a nui ta suk,a ha var rual nalh zet ka lo hmu hman leh pek.

‘Dik chiah mai..hre duh…’

‘Ook,ka ti mai mai nih kha, Jared tiin min ko thei ang..’ ka ner nak mai,ka hmu leh tawhin ka ring lo.mahse,ka bu ta ngauh tho.

In ka thlenin khua a thim chiang tawh viau,ruah a sur mai dawn maw ka tih laiin a sur ta lo hlauh bawk,ka Accident na lah kha a tirah engmah na em em awm lo mahse tunah chuan ka taksa a na vel vek tawh thung.Tuilum sa ver vawrin ka inbuala,ka riltam ngang loh avangin Cup noodles ka ei ta ngawt.

Ka phone a ri a.Duati,ka pick hmain ka thil ei lai Side tableah ka dah leh te te phawt.

‘Um…’ Hello pawh ka ti lo.

‘I thleng tawh mi?”

‘Khawiah?”

‘Khawiah nge ni ang? Inah bak” ka nui hak hak mai.

‘Thleng tawh e,ka inbuala, Tv ka en leh mai mai tawh zawk.

‘Anih chuan a tha,eng nge i zuk kalna lam te?”

‘Anuam,abak han sawi tur teh vak a awm lo,na vak loin ka tlu tih nen…’ ka nui lui hak bawk.

‘Ka tlu a? amak thei, chuti chu i khup a men belh leh kur dawn anih chu..’ a nui ve a.

‘Dik chiah,tak takin engmah ka sawh na lo.Ka khup pawh a him.’

‘Ok,a lawmawm anih chu,chuan eng nge a ram awmdan te? I hlau em lo maw?”

‘Kha thil kha..I sawina hmunah ngei ka penga, mahse i sawi ang engmah a awm lo’

‘Eng nge i sawi awmzia?”

‘Zankhat thilthuah engkim a danglam thut anih ka ring,thlam awm lah chu i sawi ang a ni lo a, huan lah peng pangngai zawk a fai awm rengin a dangah min kaltir a,chuan huan enkawltu a awm dawn tih pawh i sawi hek lo…’ ka tawng hnem lutuk a, ka sawi zawh rualin ka thaw hawk thei..

‘Lawk…engmah i sawi awmzia ka hre lo’

‘I beng a ngawng a mi?” ka sawi zawh rualin vawiina ka hmuh,Palian leh nelawm lo zet, sam hreu bum mai kha ka mitthlaah a lo lang nghal zat bawk.

‘Ngawng nang,hunah tumah enkawltu an awm lo,a awm thin te pawh nikum, kum tir khan an bang daih tawh…’

‘Maw?”

‘Aw..aw..Thlam chu a bo tihna mi?”

‘Bo nang,enteh,peng pahnihnaah ka penga, chuan phul hmunah ka chhuaka,chuan….’ Sawi zawm loin ka ngawi leh daih,kha pa kha ka hmu a ka be bawk tih sawi tel kher tul ka ti lo leh tlat lawi.

‘Chuan…?” a rawn ti ve thung.

‘Thlam chu ka hmu lo re re,mahse Phulah khan ka awma,a nuam tho bawka’

‘Ok,nia phul kha a nuam thei lutuk,mahse Phul bul maiah khan thlam chu a awm a, bakah han hmuh phak loh tur a ni miah lo a..’ a tih zawm leha..

Phul hmun kan sawi ve ve a, mahse kan sawi a in ang lo anih ka ring ta.Kei kha ka kal lohna tur hmunah ka kal chiang em em bawk.

‘Kan huan thlen hmaa mi kha TLAU ho huan ania,I kal hma khan ka hrilh duh lo che nih kha’ a rawn ti leh a.

‘Min hrilh emaw hrilh lo emaw eng nge a danglamna tur?”

‘Aaaa, kha hmana lar vak Jared Tlau kha I hria em?”

‘Aw….eee, hre leh si…’ ka khur lo chauh.Vawiin khan engtin nge ka hriatchhuah loh theih? Mahse, a mak vak lo.A hmel kha danglam hneh lutuk.

‘I hlau ang tih ka hlau mawle,huanah khan a awm em ka hre lo nangin’

‘Um,min hrilh hmasa la chuan ka kal dawn loh tawp chu, mahse hei him takin ka lo let tawha,engkim a tha alawm’ pangngai thei ang berin ka ti a,ka nui lui hak hak bawk.

‘Nia,i hmuh ka beisei chuang lo nangin hmuh chakawm tak a ni lo ve alawm tiraw?’

Ka muthilh mai ka rin nen ka harh kar reng mai,ka mut atangin darkar a liam fe tawh.Muthilh ka tumna lamah ka mit a kham thum tawh.Ka taska lah a sil thum bawk.October thla tan tir a ni tawha, a vawt lutuk lo a, a lum bawk si lo..Tukverh ka hawn atangin thli a rawn thaw lut a, ka thosilen a chhem leng dar dar bawk.

Ka mitthlaah vawiina ka hmuh bawk kha a lo lang leha,amah khan JARED inti lo se chuan a ni tih miin sawi mahse ka awih kher lo ang.Kum hnih lai a liam tawha,Chanchinbu lama ka thawh ve hma thil nimahse Mizoram nghawr nghing lawih thil anih avangin hriat loh theih a ni lo.

A bialnu thihnaah inhnamhnawihna neia puh a ni a, mahse mi langsar leh thil tithei chhungkua annih avangin man a tawk loa,thiam changa chhuah tir a ni ta thung.Tuman eng nge thudik kan hre lo a,amah leh a bialnu chauh khan an hria ang chu. Facebook leh Whatsapp lamah Jared-a demna thu leh tawngkam chhe tinreng bak a hun lai khan hmuh tur a awm lo.An chhungkaw chanchin chhe lai zawng zawng an lip se sak veka,thil tha ti ngai miah lo ang maiin an chhuah bawk.

Mipuiin dikna duhin na takin an nawra,mahse chak taka hmalak vut vut theih loh thil anih avangin a case an chinfel meuh kha chuan mipui tam zawkin kan theihnghilh hman vek.An tawpna lah chu Jared-a thiam changin a chhuaka,hmeichhe chhungte erawh an thawm hriat tur awm loin an reh zui vang vang.Engpawh chu nise Jared-a erawh khang thil te avang leh mipui anchhia kha a phur nge ka hre lo,a future a chhe ta vek tih an sawi ka hria,dik pawh a dik mahna.Tunah phei chuan huanah khan a hun tam zawk a hmang tawh niin a lang miaua.

Sil deuh thumin ka tho a, ka muthilh har vangin ka mit a kham urh bawk.Hna ka thlenin Staff dang pakhat chauh a lo la thlenga,hna hi ka kal tlai khat viau.He hna ka thawh tan tirh atangin tum khat chauh ka tlai ka la hria.Inah keimaha khawsa ka ni a, ka tan chet a awlsam bik ti dawn ila staff thenkhat hi mahni a inluah an awm ve tho a, an kal tlai ziah zawk..Mahni kan pawimawh bera, hna kan ngaipawimawh ber anih chuan a tlai loh theih viau tih hi ka pawm dan a ni tawh.

‘Morning, i tha maw? ‘ ka sam rawn tuai zauh pahin Dama’n a rawn ti a.Thian han tih em tur ni lo mahse ka ngaina viau.

‘Tha lawm,nimin lam in buai em?”

‘Buai ka tih chuan hrehawm i ti leh awm sia,tak takin kan ti thei viau e..’

‘Ka va lawm tak,anih vawiin lam hi eng nge hmanhmawhthlak ber?”

‘Engmah hmanhmawh na tur a awm pawh ka hre lo,mahse Programme thar kha i host dawn niawm tak ania.

‘Noooo,ka thei lo bur,fiamthu pawn sawi tawh lo teh a’

‘Ah,ka fiamthu miah lo..mahse…nakinah kan sawi dawn nia’ tih pahin a thutna lam a pana.

Ka hawi pheia. Kawngkhar, Darthlalang a siamah chuan kan Boss,Palian lem lo tak, thau lam hret,amah phu lo a nupui nei hmeltha si rawn lut mek ka va hmu a, Dama nen hian Pu leh Staff ang niloin thian an nih avangin an in nel viau.Mahse, Dama hian a ti zahawm thiam em em thung.

Kan wish sap sapa,nidang ang bawkin a Office lut tlang loin ka piaha chairah a thu hmasa leh te te a, a hmel a nelawm leh em em bawk.

‘Zampui,eng nge i an a?’ a Coffee no ban pahin a ti a.

‘Ka tha alawm,mahse in buai ka hlaua,ka inthlahrung ve reng mai’

‘Aaah, i awm loh chuan i hna midangin an khawih thei lo tih i hria alawm, mahse nikhat lek chu i tel lo a awm kan zir a, kan tih ve theih mai kha maw,bakah i tel lo a awm kan zir zel a la ngai dawn a’ a ti ta duah.

A sawi awmzia hre lo zetin ka melha, min ban dawn nge ni ang? Dama ka en leha, tifuh inti hmel fahranin a bu nghauh mai,a nui sawng bawk.

‘Sir, i sawi tum ka man lo,min ban dawn tihna ni em?” ka rilru a lang hi thilpawi tak anih lem loh chuan ka thup si se vak ngai lo.

‘Ni nang,Dama khan a hrilh tawh che em? Hrilh che a chak viau emaw tia?’ a nui vur vur bawk.

‘Hrilh chiah lo,nakinah nangman i hrilh ang chu ka lo tia, kei chuan sawi mah ila a awih leh lo tawp ang’ chimawm zetin a hmel a siam a,ka melh nghek ringawt.

‘Ni dawn tak,a pawi lo..Midang lo kal se,an lo kal kim hunah Meeting kan nei dawn nia, sawi lawk awm lo mahse kan ti chawp lawk mai ang, rei tak a ni lo ang’ a ti leh a.Ka bu ringawt.

Thla hnih dawn Mizoram pum huap Reality show neih tur kan buaipui tawha,kan pu te hian  Chanchinbu mai lo pawh eizawnna an neih avangin chulamah chuan vawi tamtak kei pawh ka kal tawha,ka kawp chiah lo nangin ka hre ve nual,News chhuah tur an neih te pawh buaipui mai tur an awm loh chuan ka buatsaih sak tum a awm zauh zauh bawk.

Ka lo beisei lawk reng reng lohin Host tura an biak fel tawh khan engemaw harsatna a neia,a tawp lam chauh a host thei dawna,a tih theih hma zawng lo Host turin min ti a.A remchang lo ta zel anih phei chuan ka khawih tluan dawn a ang.Kan Officeah pawh kei aia ti mi zawk an awm laia engvanga kei min tih tir tum tlat nge an nih ka hrethiam lo,hnialna ka neih leh neih loh min zawt ngeia, ka hnial ngei bawk.Mahse, kan puin tihtur a tih chu tihmai a that zia hretute zinga mi ka ni a,a rilru a siam fel tawh avangin ka duh leh duh lohin awmzia a nei lo ang tih ka hria,a thleng ta reng bawk.

‘I ti thei ang tih ka hria alawm’ ka hma zawn taka rawn thut pahin Julie’n a ti a,a nui var var bawk.

‘Chutiang ngawta awlsam a ni lo ania aw’ ka ti hmaka, ka nuih a za lo ngang mai bawk.

‘Aaaa,thil hi huphurh vak zel suh,mi in ti thei turah an ngai che anih chuan i tha tawk tihna nimaia,bakah milar nihna chance tha lutuk anih chu’ a ti leh a,Bowla eitur inchhawp a hmawm zauh bawk.

Milar nih hi ka chak lo,ka chhungte lak atangin ka tlanboa,ka inthukru a.Mi hriat hlawh nih ka duh lo bur.

‘Milar..huh,lar chu eng nge ni vak? Bus chuan zak tawk vel a lar nih ka duh bau lo ania,a hrim hrimin tuna ka lar dan hi ka duhtawk chiah’ a lang erawh chuan ka ti ta zawk.Ka thiantha tak tak te niin thiltamtak share thin mahila tupawn thuruk kan nei vek lo thei lo.

‘Hm,Bus chuan i zah vang ni loin Scooty i neia, chuan i mamawh lo ve hranpa sa alawm,chuan,i thuziak chhiar thin te hian thildang pawh i thiam tel tih an hre bawk ang’ a ti leh a.

‘Awww, engpawhnise ka duh lo,eng chu ka ti dawn ni maw? Ngatinge a hman loh kher kher ni?”

‘I ho aw,i ti thei ang ka tih chu,bakah Atei phei chuan khatianga i awm kha a hmuh chuan a hau nasa khawp ang che.’

A sawi dik,kan thianho hi kan tuina in an vanga inkawmkhawm mai mah ni ila kan inzawmna hi a thuka, a tul anih chuan na tak takin kan inhau mai a,lawmna lam nise rilru tak takin kan in lawmpui leh mai bawk.Ka thatna duhtu te vek annih ang bawkin an thatna ka duh ve bawk.

Keimaha awm ka nih avang leh mitmei ven tur awm lo na na na chu ka Inah kan awmkhawm tam ber,duh hun hunah chaw an rawn eia, ka tan lah mahni chauha awm ai chuan a nuam zawk bawk si.Mahse, kum hei leh chen mahniin ka khawsa tawha, ka thian bik te hi an lo kal anih lem loh chuan inleng ka nei mang mang lo.Mipa hi ka tleirawl laia ngaihzawng ve angreng ka neih bak tumah tiang zawngin ka hnimhnai leh ta lo.Ka pa hrawn vang khan Mipa hi ka ten ti ila a dik ber ang.

Tu Inah mah ka leng hran lo a, ka thenawm hnai leh kan buildinga awm ve te nen pawh karkhat chuang inhmuh loh tum kan nei fo mai.Kan inhaw hran lo a, mahse kan inluh pawh thlazen lo ti ila a dik ber ang.

‘Eng nge chawhmeh lei sa i neih a?’ thawh pahin a ti a, Fridge a pana, chawhmeh siam tur a enkuala.

‘Naktuk Saturday a ni tawha, engmah leisa vak a awm tawh lo ang’ ka ti tha ve mai.

A hawng rak raka, Sausage a rawn lek chhuaka,engtiklai pawh Sausage hi chu ka kawl ti ila ka sawisual kher lo ang.Mahnia awm chuan siam awlsam sam siam mai tum a tam miau a.

‘Hei a awma,Dal kan tur a awm chuan Duati khan Bai tur a lo lei dawn kha,a tawk lutuk’

‘I tih dan dan le,ka inthlak lawk teh ang’ ka ti a, ka thutna chair ka nawr tawlha, ka bag ka khaia, ka rilruah karthara ka thil tih tur hmachhawp bak engmah a awm lo,ka awm a nuam lo a, min ti chau vekin ka hre bawk.Weekend nuam lo tak chu a va ni dawn chiang tak.

Ka inthlak lain Duati tawng lawng lawng ri ka hre theia, ani hi chu a awmna chin a hriat ram ram zel,ka nui sak mai.An pahnihin min tan rawn anga,an awmchhung chu engmah dang sawi hleithei loin min kap leh ngei ang.

‘Vawiin chu hna lamah kan  buai lutuka, ka Boss in vawithum min ban hman in ka hria’ a lo ti mek.Chairah zawhte ang maiin a lo thu kual deuh rama,Ka ner khum vak ringawt.

‘Inbuai nitin emaw tia,eng nge chuti taka buai thar ngai chu ni a?”

‘A tam mai,eee,mak intih deuh tur ka hria sin..’a rawn thu chhuaka.

‘Hman kuma a bialnu that tihvela lar vak kha in la hria em?’ amah bawkin a ti leha, ka beng a verh zak mai.

‘Tu? Jared-a kha maw? A hming ka sawi dik em?” Julie’in rang zetin a rawn ti nghal.

‘Aw,khapa kha,vawiinah ka thil zawnna lamah file ka hmu chhuaka,mak deuh ka hria asin’

‘Sawi vat la nih chu a..’ ka ti hlaka, ka chhungrila hriatchian chakna chuan a turin min tur a ni ber.

‘Ka sawi dawn reng alawm mawle,kan pu pakhat, tuna kan Boss pu leh chhawng hian an Case kha a khawih saka, enteh, a landanah chuan engmah khapa khan a tisual miah lo’

‘Naaaaa,chungte chu hriatsa,dik lohna nei lo a ni tiin zalen takin a leng reng alawm’ Julie’in a ti hlak.

‘Um,nia..Mahse, case an buaipui tantirh a mi in an sawisa tih vel thawm in hria em? a thluak a buai an ti asin’ a ti leh a.

Ka mitthlaah nimin lawka ka hmuh,Samsei deuh leh mitmeng nelawm lo tak,pawisak nei tlem hmel tak kha a lo lang leha, mahse a hmel landan nelawm lo tak ang kha ni loin min tanpuia,rilru lamah buaina nei hmel a pu hek lo.

‘Sawi chu a awm kha,mahse, eng ngemaw thup tumna mai mai an tih kha’

‘I ninawm,’an ti’ tihah lo buai lo teh,kei chu ka ngaihdan ka thlak ta riau asin,mi dik tir kan tum luih talh hi Rorelna dik niin ka hre thei lo re re,kha Caseah pawh khan mi zawng zawngin a thah niin kan ngaia,Jail atan kha Dikna kan ti sa nghal runa,Dan hian chutiang zawngin a thlir miah si lo a’ a ti ta duah.

‘Hmmmm,kha bak bak,an pahnih chauha awm dun annia’

‘An pahnih chauha an awm lai nge a hnulam tuman kan hre lo’

‘Huh,anih chuan vawiinah eng emaw i hmu a, i tan leh si tihna mi?” ngei hmel deuhin a melh a,ka nui hak hak mai..

‘Tan animai,ti ila tan lo a dikna ka tan a ni mai ang chu,khatiang lai vel kha chuan Jared-a te kha ka ngei tawpa,i ngaih ang chiah khan ka ngai bawka,tunah ka tan tihna a ni chuang lo a, mahse intih mualpho tumna a ang dawn dawnin ka hre ta mai’ a ti leh a.

‘An tih mualpho ngai loin a mualpho sa alawm mawle’ Julie’n a ti leh hlar.A tang ulh lutuk chu ka nuih a lo za ve em em thung.

‘Duhtawk tawh teh u,tunah chuan thiam changin a nun a hmang tawha, tuman sawi pawh an sawi peih tawh loh laia nangni pahnih lo inhnial kha a tul lo em maia’ an boruak tih daih tumin ka ti a, ka aw a dam thlap bawk.

‘Ni chiah mai,Julie hi lawm,eng nge maw a lo thinrim ve ngawt ni?’ a nui ta kar kar.

‘Ah,ka thinrim pawh a ni lo..thil lang reng,hausak vanga ni lo zawnga her kual hi ka ning tlat alawm’ a la ti talh.

‘Hausa tih lah hi insawi mawlha,a hmeichhia te kha an hausa ve tawk hle tih pawh hre tel tal teh’

‘Ka hria alawm,mahse Jared-a te kha chu hausa satliah an ni lo a, an hluna, hmelhriat an ngaha,an tan engkim a easy alawm.Mahse,diktak chuan kha Jared-a kha chu kan sawisel luai luai lai pawh khan a chhe mawlh lo tih chu phat rual a ni lo’ a lei a chhuah zauh a, kan nui hak mai.

‘Chhe lo,hmm,nia a chhe lo alawm tiraw?” min rawn en pahin Duati’n a ti a.

‘A nelawm lo hmel ka ti, a sam a thur bawk sia…’

‘Enga?!” Julie rawn au vak rualin ka sawi sual tih ka hrechhuak nghal zat.

‘Aih,ka sawi awmzia tak zawk chu…eng lo,tha ka tih zawng a ni lo tih ka tum a..’ ka nui lui a,mahse Duati mitmeng fing zetah chuan ka sawi a awih hauh lo tih a lang reng.

December 19, 2018

MON HOMME- 4

Chapter- 4

Ka sawi zo vek tawh,engvangin nge maw ka rilrua awm te ngaihtuah miah loha ka sawichhuah ngawt le? Keimah leh keimah ka inhau ru mawlh mawlh,awmzia a awm tawh der si lo.

‘Engpawhnise a nupui nih a chakawm loh em mai, eng ang pawn thiamchang se tualthattu a ni reng tawh dawna’ Julie bawkin a ti leh a, ka bu nghauh a,Duati pawn engtinmah a chhang bik lo.

Kan pathumin eirawng kan bawla,Jared-a chanchin lam engmah kan sawi zawm ta lo.Nidang ang bawkin kan tuina ber Thuziah chungchang bawkah kan lut leh ta nge nge,ka rin lawk angin ka Programme host tur pawh kan sawi zui nasa ta lo hlauh.

Dar 10 velah an haw a,Nula, naupang chhia tawh lo ve ve leh mahni inenkawl thei tawh anni a, an chhungte pawn an ngaihtuah dan a zia.Kan inkawm nasat avangin an chhungte nen pawh kan inhre pawh tha em em bawk.Ka mut hnuah Duati hnen atanga zawhna chhan chakawm loh tak dawng mai turin ka inring renga, ka chhanna tur pawh ka ngaihtuah fel vek.Mahse, engmah min rawn zawt ta lo hlauh.

Sunday a zoa,diktak chuan chawhma bak ka inkhawm meuh lo,ka hna hi a full time em em a,Kohhran leh khawtlanga inhman hi duh mah ila hun ka nei thin lo a, ka neihchhunah pawh ka tel ta lo law law.

Phur lo zetin ka insiama,Monday hi chu ni nghahhlelhawm tak ni lo mahse vawiin ang em em a peih loh hi ka nei ngai lo.Vawiin a liam anga, naktuk atang chuan ka huphurh em em ka tih ngei angai dawn a,Julie sawi ang kha nih ka duh,mahse ka thei lo.Ka nun khawchhuah nan ka bei nasa a, engmah hi ka hlau lo emaw ka lo ti thina, mahse mipui hmaa din chakna ka nei lo.Hei hi ka lo hlau chu anih hi..Ka thuziak te avangin Facebook khawvelah chuan ka hriat ngai loh tur te ka hre teuh mai.Mahse,Mizo mipui zingah za ah 10 pawh an ni pha lo ang,min ngaihlu der ve tu te ka zah lo a ka ngaipawimawh lo ni loin a aia tam lehzual hmaa in pholan hi ka chak lo.

Office ka thlen hnu lawkah kan Programme neih na tur lamah inbuatsaih lawk angaih avangin kan chhuak lehnghala,nilengin kan buai ta char char.

‘Zampui,naktuk kha dar hnihah aw..tunah chuan kan Dinner tur lo thlen hma chu i chawl ang u’ Bossin a ti a.Diktak chuan ka Lunch tur pawh kha kan buai lutuk vangin ka ei ta lo.

‘Ok.A hma vak lo a, a lawmawm’

‘Ngatinge?”

‘Thawk lakna hun ka mamawh,ka mumang nise ka la ti alawm’ ka ner nak bawk.

‘Zampuii i ni a,harsa ti deuh mahla i paltlang ang tih ka hria ania’ nghet charhin a ti leha,min fak der nge ka hreh lutuk min hnem pawh ka hre lo.

‘Ka lawm e’ a ri erawh chuan ka ti ta tho.

‘Ka la sawi lo in ka hria,Ni lo..I bulah ka la sawi lo,hna i rawn thawh tirh atang khan nangmahah hian theihna a awm tih ka hmu a,a tir lam kha chuan staff zinga Senior deuh hi chuan i lakah lawm lohna tur an hmu zauh zauh,mahse i thawhrim zia leh i tih tak takna hian thil tha a la thlen ka ring tlata, an sawiselna che ka haider a,tunah chuan ka duh chu ka hmu chiang tawh lutuk…’ a ti ta duah…

Kei erawh ka mur ar ar mai,fakna hi dawn a nuam em em tih zawng ka hre tawh,mahse kan Boss,midang fakna chhakchhuak khat em em hnen atanga fakna thu han dawn chu a mi deh dan a dang lo thei lo..

Kan veng panin muangchangin ka tlana,dar 11 a hnai thuak tawh bawka, Motor veivak an awm mang tawh lo.Chak zet zeta Car leh Bikein a khat tawka min rawn tlan pel leh fua thin bak chu han tawh em em tur pawh an awm lo.

Chanmari ka thlen phei hma deuhin Motor an lo ding teuh,tlan tlang pawh tum ila mihring ding khawm  nen angaihna a awm lo,tun ang zan rei tawhah eng tak ni ang maw? Kawngsir deuhah Scooty ka hung rema, Mi ding khawm lam ka pan pheia,ka va ding mawl ve ngawt.

‘Accident an awm alaw?” thuphungin ka ti a.

‘Aw…Bike hian he laia Bungraw unload mek Truck hi a su a..’

‘Ehe,an na em?” ka ti a.Engvanga Motor ding lai te han su ngawt nge maw anih ni?

‘Pakhat a thi a, pakhat a na viau an ti a,thisuk ka nei roha, ka en hnai ve ta lo mai’ a ti leha..An rui anih a rinthu a sawi zawm leh mawlh mawlh bawk.

Minute 10 vel kan din hnuah Motor kal tlang theihin Police lamin an rawn siamfel ta hlauh,ka thaw huai mai,Mahse an chhungte beidawn dan tur ka lo ngaihtuah fe hman.Dam tha reng kha an ruangin In a deng ta mai chu a nia, a beidawnthlak dawn em mai.

Ri bur ka hriat rualin ka nghing lawiha, ka Scooty nen kan tlu lo chauh bawk.’Fimkhur ta che’ hmeichhe aw fiak thak ri ka hre zui zat.

Ka hawipheia,ka Scooty back chhuak tur khan an Car ka va tauh sak nge ni a an rawn tlanin min su zawk ka hre tawh bik lo,mahse ka back dawn khan an Car an start ve tawh tho tih ka hrechiang.

Scooty atangin ka chhuka,an Car en hmasa loin ka Scooty ka ena,engmah chhia a awm lo,an Car hmalam ka en leha,a rang deuh nian thung.

‘A zia lo hle mai..ka tihpalh lutuk’

‘Khalh ringawt thiamho hi an buaithlak…’ a ti leh kher,ka sa ve ta zak..Ka Scooty awmna nen hian ka thiam loh a ni thei lo,ka nghing lawih anih kha.Min su zawk tih chiang reng.

‘Eng maw i sawi?” ka ti ve ta salh.

‘Enga? Min bia mi?” a hmui sen zet a seh zauh bawk.

‘Ka bia che chu anih hi,thupha ka chawi tawha, I duhtawk thei tawh em?”

‘I nasa reuh hle mai’ a ti hmaka, Car kawngkhar a rawn hawnga, na zetin a khar sawk bawk.

Min rawn din hnaiha,kei aiin a sang lo,kan inchen tawk vel viau..A hmeltha viau nge Make-up hman a thiam viau ka hre lo..Tunlai mi chu an hmel tak hmuh a har thin miaua.

‘I back chhuah dawn khan kan Car i rawn tauha,fimkhur turin ka ti mai che a,tu nge i nih a? khatianga min han tih let chu le..’ a aw a min tham lohna ri ka hriat hmaih hauh lo..

‘Ka tauh hauh lo,i rawn tawlh hma zawk a,min rawn su anih kha,tu nge ka nih i hre duh maw? chu chuan eng nge i tan pawimawhna a neiha?” ka ti hmaka, ka melh lui ngar bawk,hawi sawn ka tum eih lo.

‘Em,eng nge a?” Mipa aw hian a rawn ti a, a hawi vat,muangchangin a hawina lam ka hawi ve a, Mipa pakhat lo kal hnai mek chu ka va hmu a,Jacket fual lam deuh a haa,Lukhum phiar,a beng khuhna niawm tak uai awm a khum bawk.

A rawn ding hnaia,ka chhoh en ha mai.He nu nena inkawp hi an nih ngat chuan an mizia a in hlat lo tawp ang..

‘Darian,he nu hian Car hi a rawn tauha,ka haua, hei a zam lo khawp mai…’ a bana kuah pahin a ti nghal zat zat.

Engmah sawi loin Car lam a en a,a rawn hawi lehnghal,min rawn en a.

‘Kan tibuai che anih chuan pawi ka ti khawp mai..’ ka beisei loh lutuk a sawi takah chuan ka hamhaih letling.

‘Eng nge i tih a? Car hi a tauh alawm’

‘Ok,ka hria alawm,mahse engmah a chhe lo a..Kal tawh rawh se’ hnial chi loh khawpa khauhin a ti hmuk.

Lawmthu sawi ka tum zeta, ka thulh leh,min tih khawtlai man leh helai hnaia hmuhnawm min siampui avang pawn ngaihdam dil ka ba lo.Ka inher a,Scooty lam ka pana,Scooty ka starta, chak zetin ka tlanchhuak nghal daih.

In ka thlen veleh ka in tleuh sawk sawka, muthilh vang vang tumin khumah ka lawn nghal thak,zing dar 10 hma chuan ka tho hauh lo ang,mahse ka muhil mai thei lo,kan Programme tur ka ngaihtuaha, ka zam tha leh a ni ber,ka nun kal kual dan chingchivet tak te ka ngaihtuah kual zel a…Zanina ka hmuh kha tu nge ni ang? Khawiah emaw hmuh tawhna neiin ka inhria a,mahse tu nge anih ka hrechhuak zo chuang lo.

Tul lo tawpin ka hmuhna awm ka ngaihtuah kual ta chiam,ka hrechhuak zo chuang lo.A tawng dan khan an a nei..Jared..dik chiah,mahse an hmel a in ang lo,an san zawng a inchen vel viau maitheia, mahse zanin ami kha a sa a that zawk hmel,a thawmhnaw hak vang pawh a ni thei tho.Kha hmeichhe nasa zet khan a hmingin a ko tak,eng nge a hming kha? Common lo leh amah nena inhmeh fahran chu anih kha mawle..

DARIAN…ni dawn tak,reife ka ngaihtuah leh hnuah ka hrechhuak hlawl.Mizoah tiang hmingpu ka la hre ngai lo.Fbah ka lut a, eng ang mi nge anih ka hrechak tlat.Darian tih ka search  a,a rawn lang nual,mahse zanin ka hmuh kha chu anni lo zel.Bakah Mizo an ni hlawm lo,Pakhat, engmah  Photo pawh awm lo a awma, chu erawh Mizo a ni thung.Ig lamah ka lut leh ta zawk, Darian tih bawk ka search leha, a rawn lang that. Ka duh ka zuk hmu nghal chat bawk..

‘Darian_Malsawma’ ka ti chhuak sep..Tul ti lo chungin ka Stalk ta nghek.Zanina hmeichhe chapo zet kha Emily a lo ni a, an in ngaizawng anih loh vek pawn a teuh viau ang..An pahnih photo a tam lam mah a ni e.

Ka alarm riin min ti harh a, ka off a, tho mai loin ka mu leh rih.Hun ka la ngah tawk tih ka hriaa,chuti taka hmanhmawh angai lo.Minute 10 vel ka mut leh ren rawn hnuah ka tho a, tuilum ka in hmasaa, ka inbual leha,ka insiam peih meuh chuan dar 12 a pel va tawh,mahse, ka hmanhmawh phah chuang lo.Kawnga ka thang chhung nen chuan ka hun neih a tawk vel viau in ka ring.

Vanneihthlak takin ka vawikhat tihna mai mah nise ka che chhe lutuk lo tlat,Thla chanve lai kan hmang zo tawha, ka beisei aiin nuam ka ti ta phian lawi chu ania,mahse In ka thlen hnuah erawh ka chauh zia ka hre chhuak chauh zel.

Hmanhmawh zetin Scooty ka parka,Staff zawng zawng tan kan Bossin Dinner Party a buatsaiha,Office ka tlawh kawi zawk hnuah Inah ka hawa, ka chau deuh nen ka inbual zo ka lo muhila,ka harh leh chuan a lo tlai tawh lutuk,hmanhmawh phelenga insiam ka ngaih phah ta bawk.

Sana ka en zauha,kan Party neihna tur hmun Hotel chung ber lam pan turin hmanhmawh ru fein Lift lam ka pana, mahse chunglamah a lo chho hman chiah.Step ah kal mai tumin ka inhera,ka pen tan chiah tihin min rawn ko an awm avangin ka ding chawt.

‘Puite…’ a rawn ti nawn leha, ka khur nghal dar dar mai.Hetiang hian mi pakhat chauhin min ko thin,amah kha…Kum tamtak ka pa emaw ti a ka lo chenpui thin kha..

December 20, 2018

MON HOMME- 5

Chapter- 5

Mizoram hi a zau lo,Aizawl phei chu a zim lehzual,mahse khang kum kalta chhung zawng khan ka chhungte min hmuh lohna turin ka bibo thei tho.Min zawng nasa tawk lo zawk pawh a nimahna.Mahse, vawi tamtak ka nu ka bihruksana,inthup thei ang ber turin hna pawh ka thawk anih kha.A rei hnu kha chuan min ngaihven peih ta lo pawh a ni ang, chumai bakah Pasal um anga ka tlangthan chiam kha a chhan hre lo mah ila ka nu leh kan chhungte pawh khan an awih ve ta pawh a ni ang.

Ka mit ka chhinga, ka chhungril khur hlawk hlawk tih reh nan thaw loin ka awm vang vang bawk,engvangin nge tunah kher? Mi hmaa ka dinchhuah phat atangin hlauthawng rengin nun ka hmanga, mahse engmah a thlen tak loah chuan ka rilru a lo nuam leh hman tawh,Ka damchhungin ka bibo thei dawn lo tih inhre mah ila ka chhungte hmu tur hian ka la inpeih lo,ani leh lek phei hi chu ka beisei lo lehzual.

Muangchangin ka hawi leta,ka hmu ta.Ka nu thihni khan ka hmu a,mahse tiang a hnai hian a ni lo.A lo lang upa ve ta,a thau ta zawk bawk.An chanchin hre lo tawp ka ni loa,ka hmu duh lo mai zawk.

‘Puite,I dam tha em?” amah bawkin a ti leha,ka chhang mai dawna ka aw a chhuak thei lo.

‘I nu boral khan ka lo beisei che a…’ chhan tumin ka ang hman ziau,mahse eng nge thleng ta hi??

Tu emawin ka kawngah a rawn kuaha,amah si chetin min pawt hnai nghal salh bawk,rang lutukin min kuah tu ka en a,tu nge anih ka hre mai lo.Mahse, ka hmu tawh..A ha var nalh zet langin a then suka, LALPA,amah kha a ni chiang lutuk..

‘Eng…eng nge i tih a?!!” ka hamhaih lutuk, tun minute reilote chhung hian Lungphuchawla thihna ngei ngei tur  vawi hnih lai ka paltlang ni berin ka hria.

‘Tu nge a? min hmelhriattir dawn na nge?”  amah bawkin a ti leha.A mit a siai zauh bawk.

‘Eng maw? ‘ ka landan tur ka ngaihtuah ngam lo,ka chhaw hmel dawn in ka hre lutuk.

‘Eng nge ni ang? Amah hi mawle,ka la hmu ngai si lo a,I chhungte zinga mi a ni em?” a ti leha, Ka pa lamah a thle buk bawk.

‘Oh…aw…Ka..ka..’ ka sawi mai thei thlawt lo.Ka pa han tih dawn khan ka chhungrilah ka tim a ni ber.

‘A pa ka ni e,nang tu nge i nih a?” Ka pa zawkin a rawn ti a.Ka mit ka chhingsawk thung.

‘Awww,anih chu..Darian-a ka nia,a thianpa..reivak loah chuan thian tih ngawt loh pawh kan sawi ngam tawh ang chu..’ ka ip nasa lutuk.Engvanga tianga rawn khawsa nge anih ka hrethiam lo,ka thian a ni loa,inzawmna engmah kan nei hek lo.

‘Anih chu mawle’ Ka pain a ti tawi tak mai.

‘Kan la inhmu leh dawn nia, ka hmanhmawh deuha’ Darian -a bawkin a ti leha,engmah ka sawi ve lo.

Harsa zetin ka pa ka nuih lui hrama, Darian-a min kuah ang angin ka awm tawp.Stepah min kuah chhoa, 2^nd floor kan thlen hnuah min thlah ta chauh.

‘Tu nge i nih?” engmah dang sawi tur ka hre lo.Ka hriat loh tak tak vanga zawt ka ni lo hek lo.Ani hi chuan min hre lo tih ka hria,kei erawh chuan khami zan atang khan ka hre tawh.Ka hmuh vawihnihna chauh mah nise amah kha a ni tih ka hre thei nghal mai.

‘Eh,nichin khan ka sawi tawh kha.Darian..’ a hmui hnuai lam a pet sawi zauh bawk.

‘Ka hria..ka hria,engvangin nge khatianga i rawn tih ka hre duh’

‘Wow,nula hmeltha tak,mangang lutuk hmel si kha ka rawn chhan himah ka ngaia’ a dar a tichhing uk bawk.Kei erawh a sawi dik lutuk vangin ka lo tim ru sawk thung.

‘Ok..engpawhnise ka lawm e..’ ka ti ta ngawt.

‘Kei pawh….chuan,a bul atangin aw..Darian-a ,nang chu Puitei” min kawk zauh.

‘Ni lo,khatiang khan min ko miah suh…’ ka tum aiin ka aw a chang lam hret,Stepa Hotel hnathawk lo chhuk mek chuan mak tih hmel zetin min rawn melh zak zak mai.

‘Sorry,khatiang khan i pa khan a ko che sia  ..’

‘Zampuii…anih phawt,ka hmanhmawh deuha..’

‘Ok,mahse kan la inhmu leh in ka ring..’ a nui suka, tihngaihna hre lo zetin ka en a,ka nui ve ta nge nge.

Kan Party na tur ka thlen chhoh meuh chuan hah vangin ka thaw hlawp hlawp mai,an lo kim titih tawha, mahse vanneihthlak lutukin Boss a lo la thleng lo anih hmel,Dama’n min hmuh veleh min rawn pana,Beer can a keng vang bawk.

‘Ka rawn call dawn chiah chea,I tha maw?” ka hmaa rawn din pahin a  rawn ti a.

‘Ka lo muhil alawm mawle,mahse Boss a lo la thleng lo nge ka hmu lo” ka ti a.

‘Jamah a tang..Thu ila,Beer i duh dawn bawk si lo a, Juice i in duh em?”

‘Aih, ka lawm,eee.Tui kha lo la la.’ Tih pahin Dawhkan ruak awmchhun ka pana,min rawn zui leh zui loh pawh ka ngaihven lo.

Kan chawei boruak a hahdamthlak viau rualin ka tang tluanchhuak zak.Ka pa vang nge kha Darian-a vang zawk pawh kha ka hre nek lo.Jared-a nen an tawngdan leh chezia kha a danglamna a tlem lutuk,a awm lo hial zawkin ka hria.Mahse, an hming a in ang lawi si lo.Bakah an hmel landan pawh a danglam,ti ila Darian-a a inmetfai a, Jared-a a inzuah buk mai mai zawk ni?

‘Hey, eng nge i hriat a?” ka hmai bulah Sen-in a kut a rawn vaia, ka phu zawk bawk.

‘Sorry,min bia mi?” hamhaih zetin ka en hau mai.

‘Be chiang,i rualin ka haw thei em tih vawithum ka zawt tawh che” mak tih hmel zetin min melh ran mai.

‘Awi, thildang daih ka lo ngaihtuaha,haw thei tehreng mai,i duh leh duh loh nimai..’ ka then sak bawk.

‘Yess, a that hlauh chu..Dar engzatah nge niang?”

‘I tih hun hunah..Kei chu ka haw duh reng, mut ka chak lutuk’ ka ti a, ka ti tak tak.Tunthla chho chu ka hah zual ve ngang aniang khum ka thlen rualin ka muhil a ni nghal deuh zel.

 Dar 12 rik dawnah In ka thleng ta chauh,ka inthlak sawk sawka, ka hmai ka phiha,ka mu ta than.Muhil nghal mai loin ka Phone ka khawih leh rih.Rei erawh ka khawih peih lem hlei lo a.

Ka muhil dawn siar siar tihin ka phone a nghawr data, en ka tum lo zeta pawimawh a awm takin tiin peih lo fein ka meng leha, ka hmet enga,Whatsapp msg a lo ni a, ka Opena.

‘Engvangmahin i biru thei tawh lo ang,i nau hmangin ka rawn zawng hmu dawn tho che’

Min rawn thawn tu ka ena, a number ka Contact list ami a ni lo.Dpah engmah a dah hek lo.Mahse, tu nge anih ka rinhriat thei nghal tho…Hlauhna vangin ka khur nghal dar dar mai.Engtin nge ka number a neih? Min zawn hmuh kher enge a tulna? Zawhna hlir, engmah chhanna awm chuang si lo..

He msg hi ka nu hnen atanga ka dawn nise chuan ka lawm dawn ngei,mahse Ka pa,Pa anga ka lo en,tenawm taka min beisei tu kha ka rap.Ka awmlohsan hnu khan ka nu mai bakah ka nau ka ngai ngawih ngawih thina, hun remchang ka neih apiangin an school bulah amah hmuh tumin ka kal chang lah a tam,a zawhna chhanna tur ka neih dawn si loh avangin inhmuh tir ka duh ngai lo thung.

Men pawh meng loin ka phone ka bana,nizan khan Khawvar dawn lamah ka muthilh chauh avangin ka tho peih lo.

‘Hello…’

‘Hey,Darling..i la tho lo tih ka hria ania..’ Atei a ni tih a rawn tawng danah ka hre nghal mai.

‘Um,la tho lo..eng nge?” ka bawkkhup a.

‘Zanin i lo kal thei dawn em? I free tawh tiraw?”

‘Khawiah maw?”

‘Ehe,i va theihnghilh hma ve.Zanin hi Rala ten en kan Dine out hun tur anih kha..’ ka hrechhuak chiah.

Thuziah lama tui ve tak,kan thianho tih a tel ve chiah lo,mahse kan kawmngeih tak mai a awma, a hming pangngai Muankima a ni a, Atei hian uangthuangin ‘Rala’ a ti a, kan thianho in kan ko hlen ta tak tak.

‘Sorry….tunlai ka buai phili deuh thina ka lo theihnghilh pek a..’ ka ti sapa,a chek tlak tlak ri ka hre thei.

‘Ok,a pawi lo…A hunah i lo thlen chuan a tawk mai in ka ring.Mahse, Tlai miah suh’ a nui a,ka then ve sak mai.Amah hi khawiah pawh kal dawn apianga nghah ngai a ni a.Ka hau nasa thina,min rawn ti el tih ka hria.

Ka huphurh em em hna ka zo a,kan Boss rin aiin ka ti tha aniang,midang hnenah pawh min lo fak lehpek.Vawiin pawh Weekdays a la ni nangin ka hnathawh vanga lawmthusawi nan chawlh min pe a.Nitin hnathawka chhuak thang ka ni a,Sunday anih lemloh chuan ka chawl mai mai ngai lo bawk nen eng nge ka tih ang ka hrethiam lo.Ka mu nileng mai ang chu.

Zan dar 7 pelh hretah in atangin ka chhuak ta chauh.Christmas thlen nan nitam a awm tawh lo,kum dang zawng aiin khua a vawt na dawn tih a hriattheih a,zanin pawh khua a vawt tha tawh var var viau.Coat dum fual ka haa, Leather Boot,ka khup thleng lo hret a sei ka bun a,Ka Coat hnuaiah kawrlum phiar ka haa, Mufler ka awrh bawk.Ka thlen huna ka khum tur Lukhum phiar ,a chhipa pehbuk awm ka Bagah ka ak tel hram bawk.Glove erawh ka bun hian ka buai thin avangin vawt ti deuh pawn ka bun meuh lo.

Atei te dawr ka thlenin dar 8 a la ri lo,Khawpui chhung Jamah ka tang rei viau,nidangah chuan kan In atangin Minute 15 velah ka tlan thleng tlangpuia,zanin chu darkar chanve aiin hun ka hmang tam mah.Hunpui lai lo pawha an buai thin nen Christmas dawn a ni tawha, Parking an nei tha viau nangin a lo khat deuh vek.Chhuk loin dahna tur ka thlek kual dak daka,piah deuha Creta silver rawng bul awl ka va hmu ta hlauh.Phur zetin ka start a, ka tlan pheia,mahse Engmah Signal pawh awm loin Creta silver rawng bul ka thleng chiah tihin a rawn back chhuak thuta, ka Scooty a ri bura, eng nge thleng pawh ka hriat chian hmain ka thal der.

Motor kawngkhawr inkhar ri dawp ka hriaa,kei erawh ka Scootyin min delh beh avangin ka tho mai thei lo..

‘I na em? ‘ mipa aw hian a rawn ti a.Ka hawi chhuaka, tu nge anih ka hmuh takah chuan ka mengphar awk mai,ani pawn min hre ve tho tih a hmelah a hriattheih bawk.

Ka mit ka chhing ta ngawt,ka hmuh hmasak ber tum khan a bialnu niawm tak, nasa zet nen kan inhniala,chu pawh Motor vangin,a vawihnihnaah lah khan min rawn chhana,tunah Motor vangin  kan intibuai leh dawn a ang..Engvangin nge tunlai hi ka chetchhiat em em reng mai ka hrethiam lo..

‘Zampui,Nang maw?’ a awah mak tihna niawm tak a hriattheih.

Ka chhanna pawh nghak chuang loin a rawn kuna,ka Scooty la nung hlat hlat chu a rawn Offa,hnehsawh zetin a tunga,thawh mai nachang pawh hre loin min rawn pan lehnghal chu ka en mawl tawp.Mahse, mak takin ka hming a la hria khan ka chhungrilah lawmna min pe tlat.

Min kaihthawh tumin a kut a rawn phar chhuaka,atthlak zetin ka tim deuh tlat,mak ti hmel deuha a mithmul a tihsan awk rualin muhil harh ang maiin ka harh zawka, ka vuan ta nge nge.Dim zetin min pawt thoa,mahse ka ding fel awrh tihah ka khup a na zawka, ka thu sawp thla leh hnawk,ka tum loh tawpin ka rak that bawk..

‘Che tawh suh..’ tih sup pahin a rawn thu hniam ve a,ka bu ringawt, tawngkaa chhang tur pawn ka thei rih lo.Ka khup na lutuk vangin ka then chak chak mai..

Ka Phone a ri zui lehnghal,ka bag lah Scootyah ka khai daih bawk.

‘Khawngaihin ka Phone min laksak thei angem?” ka ti ta nge nge.

‘Oh,tehreng mai…’ tih pahin Scooty lam a pana, ka Bag zipper a pawt hawnga, ka Phone a phawrhchhuaka, min rawn en a..

‘Atei…’

‘Aw, ka thiannu…Restaurant neitu nu hi..’

Min rawn pe dawn emaw ka tih laiin aman a pick ta zawk.

‘Ate,keimah  Darian-a.Zampuii  hi Parkingah a chesual palha…aih,ngai lo..Keiman ka rawn hruai mai ang..’ a off nghal daih bawk.

Min rawn pan hnai leha,kaihthawh kher ngai tawh loa ka thawh theih mai ringin thawh ka tuma,mahse a rawn thleng chawpchilh chu a ni der.

‘Lo tum buai duh suh..’ rawn thut hniam pahin a rawn ti leha.

‘Ka tho thei ang…’

‘Luhlul chhuah lo mai zawk la a tha in ka hria..’

Chhan tumin ka ang hman ziau,mahse ka beisei loh lutuka min rawn pawm kan takah chuan ka rak thata, tlak hlauin a nghawngah ka kuah zui nghal zat bawk

CHAPTER- 6

'Tha deuh khan awm mai mai teh.I tlak vaih chuan a na dawn ania' a ti hluka, rihna ka nei ta lo emaw tih mai tura awlsamin min kalpui bawk.Hnial tumin ka ang ziaua, mahse Atei hmanhmawh zeta lo kal hlawk hlawk ka hmuh rualin ka chip leh hmak,ka mit ka chhing ta zawk.

'Awii,Darian..i lo awm hlauh chu a va tihzia em? I na viau em?” a rawn ti nghal mawlh mawlh.

'A khup hi a na anih hmel,Cabin kha a awl em?” Darian-an a ti a.

'Aw,eeee,awl lo..Pawi lo,ka Room lamah animai' hah vanga thaw hlap hlap chungin a ti a,harsa ti zetin ka nuih lui hrama,Darian-an min pawm kang ul bawk si nen ka awm a nuam lo hluah hluah,ka khup na lam pawn rilru a luah meuh lo.

'Te,Kawngkhar dang a awm em?” miin min hmuh ka duh lo.

'Khawia kal turin maw?” mak tih hmel deuhin a ti ha mai.

'I room kal turin mawle,mi zawng zawng hmuh laia tianga awm te chu..'

'Ha..a ho..A pawmtu chein a pawm peih mah che kha lawm teh' Darian-a a ena, ngeiawm zetin a nui pawt pawt bawk.

'Min nghat la, keimah pawn ka kal thei ang, ka rinchhan mai ang che u..' Darian-a ka en a.

'Chuti maw? A va tha dawn ve' awlsam zetin a ti liam puat,min nghah tum na a nei lo tih hriat zetin a kal ngaiin a kal hmiah hmiah mai bawk.

Stepah min pawm chhoa,Atei'n hma a hruaia, engtin nge Darian-a nen an inhriat ka hre lo,mahse an Restaurant hi kei ka ni inti chin chuan an tlawh nasa a,mi nawlpui dawng zo vek mahse mi nawlpui chuan an tlawh vak lo zawk.

'Darian...ngatinge a?” hmeichhe aw thawp lam hian a rawn ti a, amah en tumin aw lo chhuahna lam ka hawi vat.Awiii,khanu chapo zet kha.Mahse, amak lem lo,helaiah Darian-a a awm anih chuan ani kha chu awm ve ngei ngei tura rin mai kha a finthlak zawk hrim hrim.

'A scooty ka taulh palha,a inhliam anih hi...' Darian-an a ti supa.Emily a hmuh vanga min dahthlak tumna nei awm pawn a awm chuang lo.

'A kal thei miah lo tihna mi?” a tawngdan chuan min khei zak mai.

'Kal thei se pawm angai dawn ami? Em,thil tul lo sawi hi bansan thin teh..' chhaih pah deuh niawm tak hian a ti a, a nui hawk bawk.Mahse, Emily hmel thutak zet leh min melh ngar maiah chuan a nuih a za miah lo tih a lang treng.

'He lamah aw Darian...' Atei'n tih pahin Room kawngkhar a hawnga,kei erawh zah vangin ka hmai a sa hut hut thung.Restaurant chhunga mi zawng zawngin min hmu lo mahse ka zahna tur khawp ka hmu tho tho.

Khumah min nghata,mu loin ka thu a,leiah ka ke dahthlak mai ka tuma, Rang zetin Darian-an min rawn dang vut,ka mengphawk hra mai.

'Dahthla rih lo zawk la a that ka ring..' a ti sup bawk.

'Nia, Darling,dah thla lo mai rawh.Engtin nge kan tih dawn?” a tih zawm zat.

'Tui leh Lapua lo la la,ka lo en dawn nia..' awlsam zetin a ti liam puat,a kalsawna, Khum piaha Air Sofa niawm takah chuan a thu a,ngaihtuah muk hmel zetin min rawn tlhir vung vung bawk.

'Enteh,keimah pawn ka inbuaipui thei vek ania,helai min hruai thlenga, ka lawm tawk tawh lutuk..' Atei chhuah veleh ka ti a,min chhang loin a mitko a ti sang uk duh chauh.

Minute reilote hnuah Atei a rawn let leha,Julie-i leh Duati'n an rawn zui ve ta bawk.

'I kekawr hi iphelh thei angem?” rawn thut hnaih pahin a ti a,ka mengphar vak ringawt.

'Enga? Ngatinge ka phelh ang?” a a ta emaw ka ti zawk.

'I khup na lai kha ka en duha, ok..kan zai thler mai ang chu..' za lo zetin a ner suk bawk.

'Bawihi,phelh mai la a that ka ring, chuan Darian-a hi Ortho Specialist a ni tih te pawh ka sawi tel nghal law law mai ang..' ka ang pham ringawt.Julie ka ena, ngaihngam hmel fein min buk khum ngauh bawk.

'Lo pui ula,ka lo let leh dawn nia' dinchhuah pahin a ti a, kan chhanna pawh nghak chuangloin a chhuak nghal vut bawk.

A chhuah veleh khumah Duati leh Julie an rawn thu kaia,an rim a dik leh tawh pek,kan intihpalh dan min zawta, tawng an inchuh a ni leh ta ber.Atei-in a khak hnuah an ngawi ta chauh,ka kekawr hlip tur min puia, Ka kekawr harsa deuh takin kan pawtthla thei hram,Atei Kekawr bul ka ha leha,ka chet zawngin ka khup a na zawk zawka, a pilh sen deuh duai bawk nen a thip tha ngang ngang viau bawk.A thip ka ti ngawta, a sa hum hum zawkin ka hre mah,nasa vak loin a thi tuam tuam bawk.

'Khapa kha tihbuai kher angai tawh lo e,naktukah Damdawiinah kal mai ka duh zawk' ka ti a.

'Naaa, a ho e.A tauh zawk che ania buaipui che kha a tihtur alawm' Julie-in awlsam fein a ti liam puat.

'Chutiang ngawt pawh a ni lo,a nuam miah lo ania...' ka ti leh a.

'Nuam i tih vangin a buaipui nang che, bakah anni pawh kha a Bialnu Birthday party neih tuma lo kal annia,i vanduai vangin a hun i pawt hek ve teuh ania' Ate-in min ti a, ka inthlahrung lehzual..

'A hrehawm e...,mahse...' a lo lut ka hmuh rualin ka tawp nghal hmak.Amah kan sawi tih a hriat ka duh bau lo.

A chetna tur kianin an tho ta dial,a rawn thu hniam a, a kutzungtang sei thlur mai chuan ka khup a rawn khawiha,a lum thur thur chuan mak takin min fan raih raih mai.Thawk pawh thaw tha ngam loin eng nge a tih leh dawn ka nghak mawl tawp.Ruh tliak a awm leh awm loh a hmet kual dun duna,na ka tih leh tih loh min zawt reng bawk,engmah han nat belh chiam a hmeh vangin a awm lo.Mahse a pilh lai a tihsik palh chuan ka tek chhawk thei...

'I ruh hi a tliak lo niin ka hria, mahse khi a lo awm palh takin naktukah x-ray i la dawn nia,chuan i theih leh Clinicah lo kal la..Doctor dang duh i neih chuan chu tah pawh i kal thei a...' a ti a.Ka bu ringawt.

A pilh lai a tifai veka,Atei ten Betadine an lo kawl hlauh bawka, a hnawih nghal veka,ka tih chet tam loh a that tur thu a sawi tel bawk.

Kan Dineout tur boruak ka chawk chhe ta vek.Mahse,a hmun ka thleng hman hlauha a ziaawm tho mai.Atei te Driverin min thlah hawa,ka scooty erawh a ran belh tih mai loh chu engmah chhia a awm lo a, Julie-in a khalh haw thung.

'I ngaihtuahawm loh tak tak ang maw?” min hawsan dawnah Duati'n a ti a.

'Teh nang, che thei lo tawp pawh ka nih loh hi,min kalsan ru..' ka ti a.A rilru tihnawn tumin ka nui lui var var bawk.

'Ok,anih chuan kan kal ang,naktuk zingah lo kal ka tum dawn nia,ka thlen hunah Ruata ka lo bia anga, naktuk zing hma deuh hlekah X-ray min tihsak turin ka lo hrilh ang' a ti a.

Ruata hi Duati Cousin a ni a,an hman hming chawiin Laboratory a siama, Sawrkar hnuaiah a thawk bawk nen amah tak erawh a awm khat viau.

Ka harh leh chuan Tukverhah ni a lo lut iar tawh,ka In hi chhuah chhawng a ni bawka, ni chhuah hlim atangin kan hmu nghal a ni bera,mut rei viau a harsa.Nidang ang bawkin thawh mai ka tuma, mahse ka khup a na zawk.Nizan thil thleng ka ngaihtuah chhuak nghal zawk bawk.Ka thu chhuaka,ka khup ka en a,nizan ai khan a nat hmel tawh zawk mah,a tui deuh hluama,a sen hlur bawk.Ka ner nak mai,vawiin chawlh min pe tel tawh si lo a, tuemaw ber hnenah ka chawlh a tul tih ka hrilh angai.

'I tho tawh em?” Phone a pick veleh ka ti a.

'Tho chiah,eng nge ni ta?”

'Vawiin ka chawlh angai dawna,in buai viau em?” ka inthlahrung tak tak.

'Buai lutuk lo e,mahse ti nge? I dam lo mi?”

'Dam e,ti ila nizanah ka tlu peka..' ka sawi zawh rualin a nui huk mai,ka tlu ngun lutuk hi min fiam nan a hmang nasa thina, Traffic police laka ka chetchhiat theih zia lah a hrechiang tu ber a ni bawk.

'Khawi lai nge i sawha?” nuihza insum tih hriat zet hian a rawn ti a.

'Angai bawk,vawiinah x-ray te ka va tihtir ang chu ka tia'

'Eh,nidang aiin a nasa elaw? Nang meuhin chutiang tih ve i tum taka?” a rawn ti leh chiam,mahse a demawm loh.Damdawiin lam pan ka peih lo zia a hre ve tlat.

'Nasa over lo e,ruh khi a awm takin tih thuah mawle,upat lamah hi chuan in enkawl uluk angaia' ka nui s.

'Kalpui i ngai angem?”

'Aih, ngai lo ang.Mahse, Boss hnenah min lo sawisak mai aw..chuan Leave letter pawh min lo ziahsak mai la,ka lo kal veleh ka sign mai ang' ka ti ta duah.

Dar 8 rik hmain Duati a lo thlenga, Ruata a biak sa tawh thu a sawia, a hmasa berah min tihsak thei dawn tih a sawi bawka,a sawi ang ngeiin kan thlen hnu lawkah min tihsak nghala,Ruata bawkin a thianpa,Ortho Doctor min lo biaksak vek bawka,kan pan lehnghala,vanneihthlak takin engmah khi a lo awm lo hlauh.Mahse, ani pawn Darian-a ang chiahin indim turin min chah ngun viau tho mai.

'Darian-a kha pan leh i duh zawk em ka hre loa,mahse Ruata khan a thianpa zingah a thu dawn tih a sawi tho sia, chuvang ania' In kan thlen hnuah a ti a.

'Duh chuang nang,tihian a fel nghal veka, a awlsam zawk daih..' ka ti a,a eirawngbawl che vel ka thlir vang vang bawk.

'Nia, mahse Darian-a te chu a tha fal e...'

'Maw?!”

'Mizo zingah te chuan Darian-a tluk an awm lo ka ti kei chu..'

'Eee,nia...aniang' ka ti bah nawk ringawt.

Diktak chuan eng anga Doctor tha nge anih ka hre miah lo zawk.A lar viau tih phei chu ka hre lo lehzual.Ig lamah lah khan a hna kaihhnawih engmah a pholang lo a,mi hausa fapa, a nu leh pa hausakna chen anih loh pawn Sumdawnna ngelnghet sa nei ni turah ka ngai ve tawp zawk.

'Amah kha i hre sa em? Nge hre miah lo zawk?”

'A hming te chu ka ralkhat hriata,mahse amah kha a ni tih ka hre lo' awlsam zetin ka ti a.

'I mak ve ngawt mai, i hna nen pawh hian mizo zinga challang deuh chu i hriat vek hi a inhmeh nen hian ka rin aiin i hre lo thin,engpawhnise pa tha tak chu niin ka hria..' a ti leh duah.

'Engvang chuan maw?” ka ti ve thung.

'Nizan pawh khan a buaipui peih che em kha, a bialnu Birthday party pawt khawtlai vekin anih kha a buaipui che...'

'Aaaa, khang te chu ama min tauh thluk ania..'

'Ni ve tho mai..Kei chu amah kha ka hriatna a rei tawh, a hmain ka pi kha min enkawlsak tawha,mahse nizan kha chuan min hre hmel pawh a pu chuang lo a,ka insawi duh lo a...'

'Hriat chat che chu a harsa ve ngawt ang,mi an enkawl nasa mai bawk si'

'Um,dik chiah..kan ei dawn mi niang?”

'Pawi miah lo,ka ril a tam rapthlak..'

Karkhat dawn chu ka chhuak ta lo.Kan thawhpuite hoin min rawn kan liam liama, Boss erawh a lo kal ve lo thung, ka beisei hek lo.Julie leh Duati an lo kal deuh renga,Atei erawh a hman lo bawka vawikhat a lo kala, a lo la lang leh lo,ka na lutuk pawh a ni lo a, tuman min kan lo mahse ka vui hek lo.

'I phone kha a ri seka..' Toilet atanga ka letin Juile-in a lo ti a.Tlaiah a lo kala, chaw a ei nghala,thatchhe zetin Sofaah a mu a, Tv a en pah bawk.

'I lo chhang mai lo nih chu..' tih pahin ka phone ka la kanga,ka en a,ka contact list a mi a ni lo.

'Chhang peih lo,i lo chhuah hunah i chhang mai ang chu ka ti..' awlsam zetin a ti then.

Vawi hnih ngawt a rawn call avangin call back ka tuma, mahse ka call hmain Whatsappah msg a rawn lut leh rih.

'Keimah,Darian..eng nge i an?” ka lungphu a rang nghal titih ngawt pek.Hahthlak hian a..

'Ka tha tawh e...' reply loh ka tum zet nangin ka ti ta zawk.

'Tu nge a?” a puansin thehhlim pahin a rawn ti a, a tho a.

'Ka hre bik lo,min lo call leh mai ang,a pawimawh chuan..” ka ti a, atthlak zetin Darian-a tih sawi ka hreh deuh tlat.

'Nia,kal mai ka duh,ka mut laklawh chuan thawh a peihawm dawn loh tlat..'

'Riak mai la..'

'Aih,riahchhuah kher hi chu ka pain a ngaina lo tih i hriat kha..' kan nui dun hak hak mai.

Chriatmas thlen nan karkhat chiah a awm tawh,zanin ang hi kan thianho in kan tih thin dan angin kum tluana kan pawisa khawl ve atanga tanpui ngai te tanpuina hun kan hman thin zan a ni a,chuti ni lo se kalchhuah ka peih lo hlawm tawp.Mahse, mi tana kan theih tawka luanchhuah ve hi a hlu em a,kal ngei ngei ka tum ruh viau thung.

Dar 7 velah min rawn lama, Atei-i pawn buai tak chungin hun remchang a rawn insiama,an Motor a rawn thawhchhuahpui bawk.Kum dang ang chu nise Scootyin kan kal leh mai ang,mahse keimah min ngaihtuah avangin Motorin kan kal ta zawk.

' Zampui,ka zawt ang che ka tia, Darian-an a rawn bia che em?” min rawn en zauh pahin a ti a.

'Bia ti ila ka that zel dan min rawn zawt a..'

'Engtikah nge a lo biak che? I va zep thei si em?” Duati'n phur zetin a rawn ti nghal zat.

'A rei leh deuh tawh..eng nge i lo over viau a..' ka ti hlak mai.

'Aaaa, ka over pawh ka hre lo e a,min ngai Over aniang' a nui a.Ka nuih a za ve miah lo.

'Dik chiah mai, I ngai Over aniang..tak takin Darian-a hi chu a fel ve thlawt.Doctor nih hi a inhmeh hluah hluah' atih zawm leha, ka bu nghat ringawt.

Kum dang aiin kan pawisa khawl ve a tam a,kum danga chhungkaw pali kan tanpui thin kha tunkum chu paruk lai kan tanpui ve thei.A pe tu nge a dawngtu lawm ang ka ti hial thin,mittui tla zawih zawiha an han dawng te hian hlimna ril lutuk,sawifiah thiam si loh min pe a, keimahni a pe tu lamah hian nasa zawkin hlimna a lo thleng nimaiin ka hre thin.

An Motor lan theih chhung ka thlir a,ka In pan thlakna bulah ka dinga,van lam ka thlira, Arsi an pe at mai.Muangchangin Stepah ka chhuk thlaa,Gate hawn tumin chahbi ka lachhuaka, mahse ka hawichhuah ruala ka hmaa ding ka hmuh takah chuan ka phu nasa lutuk. Thla chu nei ila ka thlawk hla viauin ka ring.Ka chahbi bawr ken ka thlauh daih bawk.

'Darian,nang maw?” ka aw a lawi rat mai.Ka that leh that loh Msg a min rawn zawh bak kha engmah a chanchin hriatzui ka nei lo a, min rawn be nawk hek lo..Ni lo,zantin ka Stalk ziah..Hei erawh ka pha thei lo.

'Um,keimah...' a ti sup a.

A rawn kal hnaia,ka hmuh hmasak ber tum ang bawk khan Lukhum phiar a khuma,Bomber Jacket a haa,Kekawr dum a ha bawk.A lang lian zual sawtin ka hria.Ka chahbi thlauh a chhara,min rawn pe a,ka la ve mai bawk.

'Ka phu nasa lutuk..' sawi tur ka haihchham tlat.

'Sorry..min hmu emaw ka tia..' a ti tha ve mai.

'Pawi lo,min nghak tih ka hre lo a..' ka ti leha,tul lo zetin ka che sek bawk.

'Dik chiah,mahse hrilhlawk ai chuan lo kal tawp kha a fuh ka ringa..' a hmui a ti sawi zauh bawk.Sawi tur hre loin ka nui ta ngawt.

'Lo lut la...' hreh ru zetin ka ti ta nge nge.

Gate ka hawnga, In ka hawng leha,a vawikhatnan ka inleng vangin chhungkaw pangngai nih ka chak ve ta hial.

'Lo thu la,thingpui i duh angem?” ka ti a.Uluk zetin inchhung a thlek kual dun duna,nidangah ka in hi te ka la ti ngai lo,zanin zet chu amah a lian bawk nen a lang chep ngawih ngawihin ka hre mai.

'A lawmawm ngawt ang chu' a ti a,muangchangin a kal pheia,Chairah a thu a,hnung lam a ngheng ur ur bawk.

Darian-a a lo kal tih Atei hrilh ka tum zeta ka thulh leh,eng nge phili chiam a tulna?mahse ka phili chu anih hi a..Tiang hian ka la awm ngai miah lo tih ka chiang.Kitchen atanga ka let lehin a thutna ngaiah a lo la thu a, a phone a lo en a,ka thawm hriaiin a rawn hawi chhuak vut bawk.

'I tha chiang tawh em?” a no lak pahin a ti a, a kut zungtang sei thlurh chuan ka no a ti lang te zo vek.

'Um,ka tha..engmah tliak leh khi a awm lo a..'

'A tha lawm' a ti supa, sawi leh mai tur hre loin kan ngawi dun leh ren rawn.

'Eng ber nge i lo kal chhan? Ka puih theihna awm che ka hre lo eee' reife kan ngawih hnuah ka ti chhuak ta nge nge,Ngawihreng a nuam hlawl lo.

'Maw?” min rawn en a,ka ip chawih ringawt.

'Min hmu tura i lo kal chhan mawle..'

'Nula hmu tura tlangval a kal anih chuan eng nge chhan dang awm ang?” Ka nui hak mai,mahse a hmel thu tak zetah chuan fiamthu hmel a lang eih lo.

'Chutiang lam ka lo ngaihtuah lo a...'

'Ok,a pawi miah lo..Mahse, nidangah chuan ngaihtuah ve deuh angai dawn anih chu'

Muhil thei loin ka mu mengkar mai.Darian-a haw veleh ka mu nghala, Darkar hnih vel lai a ni tawh.A hmelpa zet kha ka mitthlaah a chama,mipa hi hetiang hian ka buaipui ang tih ka ring ngai lo.Mahse, ani kha chu engemaw danglam a awm tlat.Pa tawng duh tak a ni dawn hauh lo,a sual hmel viau em pawh ka hre chuang lo a, mahse nek luih harsa tak tur niin ka hre thung.

Ka duh aiin Darian-a ka hmu ngun ta,tihpalh nge tihluih pawh ka hre nek lo e.Office kan chawl tawha, vawiin chu Bazar lamah kal ve ka duh,Chritmas dawna eng emaw tal thil thar neih hi nuam ka ti a, ka retheih zual tak tak lai tih loah chuan lei loh ka nei ngai lo.

Ka insiam mawlh mawlh laiin ka phone a ri a, tu nge anih la kang chuang loin ka zuk ena,ka beisei loh lutukin Darian-a..Ka thil tih lai ka chawl hmak.Ka la ang nge la lo ang tih ka ngaihtuaha,ka inhau leh rih.Thil pawimawhah lo chuan min lo call awm lek si lo..

'Hello...' zangkhai thei ang berin ka ti a.

'Pawnah ka awm a...'

'Eh...khawnge i kal dawn?” rum hak ri ka hre zui zat.

'Min luh tir dawn nge dawn lo?” khauh zet hian a rawn ti a.Mawl inti lutukin ka inhau leh rih.Khawiah pawh kal se ka In pawnah a awm tih a sawi chuan a lo kal duh tihna a ni mai ang chu mawle.Mawl thlak lutuk a...

'Ok..lo nghak lawk rawh' ka ti a, min chhan leh hmain ka Off a, ka hmaa Darthlalangah ka in en leh rih.

Verandaah a lo ding run tawh,Kawngkhar ka hawng zaua,a rawn luta,a Perfume rimin ka hnar a verh zak mai.

'Kal chhuah i tum ami?” a ti a.Uluk zetin min melh run bawk.

'Aw, vawiin chu ka Bazar ve ang chu ka tia,khawnge i kal a?”

'In inpiahah khian Dam lo ka tlawh a..I inpeih tawh mi?” a ti leha, thu loin a ding ngura, min melh chhuk run bawk.

'Eng maw?”

'Chhuak turin i inpeih tawh mi ka ti” nin hmel fe in a dar a ti chhing uk bawk.

'Aw,inpeih chu nimai..Ngatinge?”

'Vawiin chu kan chhuak dun mai mai dawn mi?”

'Enga? Aih,ni lo e...kalpui tur ka nei..' mangang ru zetin ka ti bah nawk nawk mai..

Chapter- 7

Ka ngaihtuahna hriat tum niawm takin min melh deuh vung vunga, ka chhungril thlengin a hmu tlang nimaiin ka hria,ka lungphu dut dut chu a hriat ka ring hial bawk.

'Ok,a tha lawm...' ka thaw huai mai.

'Lo thu la,kan chhuak rual dawn nia..' pangngai thei ang berin ka ti a.Tawngkaa min chhang loin a bu nghut ringawt.

Rang fahranin roomah ka luta, che leh mai loin kawngkhar ka nghenga, ka mit ka chhing vang vang mai.Ka awmdan kha a dik lehpek tawh lo.Engvangin nge hepa bulah hian ka nervous em em ziah mai ka hrethiam lo.Dama pawh ka kawma, engemaw changa min han kuah nawk nawk tum pawh a awm fo,ka engahmah a thawk si lo.Ani hi chuan min kuah chu sawi loh ka bula a din ngawt pawn ka zam em em mai chu anih hi maw..Huizz,thawnthu emaw mumang ramah ka cheng pawh a lo ni reng mahna..

Ka chhuah leh chuan Tukverh bulah pawn lam thlirin a lo dinga, ka thawm hriaiin a rawn hawi chhuak vut.Hriatthiam har zetin min melha, a hmel nelawm lo lutukah hian enge a ngaihtuah ang tih hi rin hriat mai mai a theih pawn ka ring lo.A mood fuh leh fuh loh pawh a hriat theih ka ring tawh lo.

'Kal ila...' ka ti a.

Engmah sawi loin a rawn kal pheia, min kal pela, Kawngkhar a hawnga,ka zui ve vat.

'Zampui,lo kal ka tum a..' ka inluahna neitu te farnu a lo ni a, Kum 50 vel zet zawt a ni tawha, Pasal erawh a la nei chhin miah lo.A neih pawh a rinawm tawh hek lo.

'Aw, eng nge ni ta?” Gate hawn pahin ka ti a.Ka hnunga Darian-a ding run chuan ka awm a ti nuam lo.

'Thil engemaw sawipui lawk che ka tum mai mai mawle,pawi lo.Zanah nimai rawhse'

'A hmanhmawhthlak em?”

'Aih..a pawi lo..' ati leha, keimah min en loin Darian-a a en a.

'Um,anih chuan ka haw pahin ka lo lut kawi dawn nia'

Kan pathumin Stepah kan inzui chhoa,thildang sawiin a tawng zawm mawlh mawlha, Darian-a erawh a ngawi ngul thung.

'Khawnge Scooty i daha?” Darian-an a ti a.Ka hawi kuala, kan in sira a Car ding ka va hmu nghal.

'In neitu te Garrage hi ka tawm ve mai'

'Um,a remchan khawp chu.Khawi chahbi?”

'Enga?”

'Chahbi' tih leh sup pahin a kut a rawn dawh hnaia.

'Keimahin ka la chhuak thei alawm,kal tawh zawk rawh..'

'Chahbi...” a thle buk ringawt.

Ka pe leh ta nge nge,hepa hi ka hriattirh phat atangin ka hnial na piangah ka la chak lo ngar ngar.

Garrageah ka zui luta,kan Building a cheng te hi mahnia Lirthei nei deuh vek kan nih avangin dah hmasa nih chuan kan tang thuk thei viau.

Ka Scooty ka kawhhmuha,nizanah ka haw hma lem lo bawka midang min dah thuah an awm lo hlauh.

'Lawk....' ka ti a, ka pan hnaia, ka thaw hak mai.

'A ke a thep vek anih hi...' beidawng ru zetin ka ti leha,nizan kha chuan engmah dik lo a awm miah si lo.

'Helai hnaiah siamna tur a awm em?”

'Aih....'

'Ok,kan thlawn anga, Motorah kan hlang anga,kal pahin kan siam tir mai ang chu...'

'Angai lo,nakinah keiman ka ti mai ang,kal tawh rawh'

'Vawiin chu ka free ve alawm..A herh na tur engemaw tal i kawl em?” hnial tumin ka ang ziaua, ka hnial hneh leh dawn chuang lo tih ka hriat chian lutuk avangin ka sawi tum ka thulh leh ta zawk.

'A seat hnuaiah khan ka dah...' ka ti a, ka siam thiam lua lo nangin a tul zualpui chu ka ti ve thei vek tawha,hmanrua pawh ka theih ang ang chu ka kawl ve thlap.

Awlsam zetin a thlawna, engmah tih ve tur hre loin ka lo en vel mai mai.Motor hnungah a hlanga,ka duh emaw duh lo emaw vawiin chu kan chhuak dun dawn tih a chiang ta,engamah hmain ka tang leh nghal teuh ringawt.Huizzz, engtin nge tiang te chuan nilengin a bulah hun ka hman theih ang ni?

'Ka tibuai hle mai che...' kan tlan chhuah hnuah ka ti ta nge nge.

'Engtizawngin?” min rawn melh zawka, hmalam a en leh nghal mai.

'A vai khan...'

'Nuam ka lo ti viau zawk asin...' ring vak loin a nui hawk bawk.Kei erawh ka hmai a sa nghal hat hat mai.

'I free tak tak maw? In buai nileng thin viau ang ka lo tia,Clinic i nei tel bawk si..'

'Um,dik tak chuan buai ve thin'

'Clinic in khar tawh tihna mi?” ka ti leha, ka rilruah engvangin nge hetiang khawpa Doctor tha hi Sawrkar hnuaia thawk loa Pvt hospitalah a thawh ka hrethiam lo.A duh anih chuan hna hmuh loh a awm ka ring lo bur bawk.

'Um,kumin atan chuan kan khara,kum thar hlimah kan hawng leh chauh ang' a ti tha ve mai.

'Anih chuan Damdawiin lam te”

'Chulam pawh chu ka chawlhsan rih...'

'Maw?” mak ti deuhin ka en a.Min en lo in a Motor khalh laiah chauh rilru a pe niawm takin hmalam uluk zetin a en ngur thung.

'Kum tharah kan Hospital tur kan hawn hman hmela,in bah hnawk tawh loh ka duh..'

Nidawn tak,hei hi chu hmanni deuhah ka hre tawh,a pu hming chawia din Damdawiin hawng turin an kalpui meka,amah mai ni loin a pu tu leh fa te zawng zawng tangkhawmin an tih a ni a, mahse an chhungkaw zingah Darian-a hian thu a nei fal hle tih an sawi tel bawk tak kha.

'Eee, ka hre leh si' ka ti sep ringawt.

'Um, nangmah lam sawi ve thung la” min rawn en a, ka lo en ve bawk si nen rang lutukin ka hawisawn vat bawk..

'Engmah han sawi vak tur a awm lo..'

'Ka ring chiah lo,anih chuan Dama kha i eng nge anih?”

'Maw?”

'Dama kha i bialpa a ni em ka ti anih chu..'

'Teuh lo lutuk..' ka ti nghek,mahse ka sawi zawh rualin ka chhanna atthlak zia ka hrechhuak lehnghal zat thung.

'Ok,ka hrethiam e...diktak chuan hmeichhia ka ngaihven dawn anih chuan hriat hmasak ka duh thina' timna nei map loin a ti leha,a sawi dan frank lutuk chuan engemaw ti takin min fana,sawi mai tur ka hre tlat lo.

'Khawnge kan kal dawn a?” phawk hra in ka en a, ka nervous kual vel lutuk khan kan kalna lam ka lo ngaihtuah lo reng reng.

'Scooty ke kha a siam tirnaah kan siamtir phawt anga, chumi hnuah Motor Inah kan dah leh anga, Bike in kan chhuak ang...' hmeichhe thian emaw bialnu hnena tihtur sawi ang ni loin a hnuaia thawk tu emaw ber hnenah a hun neih dan a sawi a ang zawk.

'Inah maw? Ni lo e,Taxi in ka haw pahin ka lam kual thei reng a..Min buaipui duh tawh suh'

'Atei khan inhnial i hrat lem lo a ti a, mahse a sawi sual in ka hria' tehdaih chuan a..

'Engtin maw a tih?”

'Ka hriat hmasak ber che atang khan min la hnial ta ngar ngar,i ning ve lo ami?”

'Oh...' ka ti chhuak halh mai...A bak engmah sawi zawm leh tur hre loin ka chip hmaka, pawn lam ka hawi daih bawk.

'Pawi ti suh,a hlimawm ka ti zawk ania...'

Chhan enah pawh ka en lo,a chimawm dan hi a satliah lo lutuk,bakah a khawsak danah hian hnial loh a harsa lutuka, engmah duhthlang thei lo niawm fahranin ama thu te a min awmtir a tum ziah dan te hi a inhre lo chu a ni phawt ang...

'Tenawm..'

'Keimah maw?”!

LALPA,ka rilruin ka sawi mai emaw ka tih kha ka sawi chhuak chiang lutuk,engatinge he pa bulah hian naupang chhia ang maia ka nawi niaih zel mai ni ang aw? Mahni induhtawk leh lu zo ve tak,midang mamawh lo inti ve em em siin ka zam em em ziah chu a ni sia, engtia han tih chi tak ni ang maw?

'Inah chuan kal kher angai ami?” ka ti a,pawisa lo niawm taka lan ka tum nangin ka ti hleithei meuh lo.

'Motor hi Khawpui chhungah tlan luh a buaithlak em a,kan veng lamah chuan a tlan luh theih mai a,NO VEHICLE ZONE hman lai a ni sia'

'Ni dawn tak...' ka ti leh halh ringawt, dik tak chuan eng ang chhungkua nge annih ka hre lo a, an in chhung va dai ngawt turin ka engmah a ni hek lo.Bakah kha nu Emily kha ka inhauhpui chak loh ber a ni hial ang.

An veng awmna ka hria,an In awmna lai erawh ka hre lo thung,engmah kan sawi zui ta lo ve ve.Kan rilru ve ve kan kawma, kan ngaihtuahna erawh a in ang lo nasa hle ta ve ang.

'Kan thleng e...'minute 20 vel kan tlan leh hnuah a ti supa, rang zetin ka hawi chhuaka,kan hmaa In ding ka hmuh rualin ka thaw hak mai.

'Lo chhuk la,Inhnuaiah Motor ka zuk dah fel lawk ang' amah bawkin a ti leha,hnial loin ka chhuk a.

Inhnuai kalna,Motor tlan luh theih tura siam,Thir Gate rinawm hmel zet awm chu Mipa,la tleirawl angreng tak hian a rawn hawnsaka,ka hawi kuala,an In chuan min hip nghal ngawt pek,an In luhna turah Thir bawkin Gate an siama,kawtzawl zau lem lo tak a awma, a laiah Lung an phaha,a sirah Phul lem nge a tak ka hre lo, an hring dap mai.Thir thutthleng then thei a awma,Pipu a awm tel bawk.Aizawl khawpui tawt lutuk,mi zawng zawng insi thep thupa kan awmna hmunah chuan hetiang a insak tluka tha a awm lo ang tih ka chiang,anni pawh hi an thenawm te nen an insi lo chauh,mahse pawn lam atang ngawt pawn an In a nawm hmel ngawih ngawih.

'Lut ila...' ka bul mai atangin a rawn ti a, ka phu nasa lutuk..A lo let chhoh lai ka hre der lo.

'Tah hian ka lo awm zawk ang...'

'Bike an lo hmanga, nghah lawk kan ngai ang...'

A tawpah chuan ka zui leh ta nge nge.Kawngkhar a nem hawnga,engmah thawm awm loin a reh thiap mai.Amah chauha cheng a nih ka ring lo,nu leh pa a neia, unau a nei bawk tih a hmain Atei khan a sawi tawh tlat.

'Lo thu la,nge Roomah zawk?”

'Aih,tah hian ka lo thu ang' ka chhang rang lutuk,ani pawn a hria tih hriat zetin a then ve suka, ka hmai a sa nghal hat hat mai.

'Ok,thingpui i duh em?”

'Aih,ka lawm...'

'Anih chuan lo thu lawk aw,roomah ka'n chho lawk ang' a ti a, Inchung panna Step lian tha hem hawm zet chu a kawk zauh bawk.

'Eee, ilo hlauhthawn takin,ka chhungte tumah an awm lo ania...' ka ngaituahna hre thei niawm takin a rawn ti a, ka chil ka lem khalh ringawt.

'A pawi lo...ka lo thu ang' ka nui lui sak a,engmah ngai thupui lo niawm takin ka dak deuh vah bawk.

'Ok, ka rei lo ang..'

Ka hma zawna Thlalak chi hrang hrang intar chu enchian ka chak ta tlat,ka tho a, ka pan hnaia,Darian-a leh hmeichhe pakhat,unau anni tih a hriat theih nghal mai.An nu leh pa tih hriat tak an awm tel bawk.Thil hriat chhuah ka nei,Darian-a hi Jared-a nen an in ang lutuk,Jared-a kha a inzuah buk vek avangin a hmel hmuh chian a harsa a,a sam lah a ther huang bawk,Darian-a erawh hi chu a sam chhip lam a seia, ka huat zawng tak hair style a pu thung,mahse a inhmeh ngang mai.Jared-a kha a cher hmel zawk mah,Darian-a hi chu min pawm tum khan a cher lem lo tih ka hre tawh.An san zawng erawh a in ang hmel viau,a sang zawk an awm anih pawhin a tam lo hle ang.

'A va hmuhnawm awm ve..' ka bul mai atangin a rawn ti a, ka phu nasa lutuk,kan inhnaih dawn lutuk tih ka hretheia, ka hawi let mai ngam der lo bawk.

'Ka lo thlir kual mai mai...' pangngai thei ang berin ka ti a, ka awm ngaiin ka awm lui ngar bawk.

'khawi ber nge i en ka hre lo a,kha kha ka u ania, ka nu leh pa...' ka hawi let hauh lo nangin min rawn din hnaih leh tih ka hrethei,ka hnung zang a mur nghal ar ar thei hial bawk.

'Um...' ka ti ringawt.

Vanneihthlak zetin a kal sawn ta hlauh,ka thaw nghal huai mai.Muangchangin ka hawi leta, mahse, min lo en reng tih ka hmuh rualin ka ip nghal chawih.

'Kan kal thei tawh em?”

'Kal thei tawh,Bike an rawn dah let chiaha'

'A that hlauh chu...' ka ti sep ringawt.

'Ka nu leh ka pa hi Huan lamah an riaka, ka u erawh kha chuan nikum hmasa khan pasal a nei tawha,ka nau hi chuan thlalak angaina lo...'tawng mai dan tur hre loin ka bu nghauh ringawt.Bakah ka rilruah Jared-a ngawt a lang tlat bawk.

'Chuan ,nau mipa pakhat ka neia,ani erawh hetah a cheng ve lo thunga...'amah bawkin a ti leha,Zawh chi a ni em ka hre lo,mahse unau ni turin ka ring thei lo,tuman unau anni tih an sawi ngai lo.Ni se chuan ani pawh hi a mualpho ve hle tho ang.Mahse, Atei emaw ka thiante dang pawn tuman Jared-a nen unau anni tih an sawi ngai lo.

'Nupui a nei tawh tihna mi?” ka ngaihtuahna ti lang lo turin ka insum nasa viau.

'Aih,nei lo e...zaninah i hmu theiin ka ring..'

'Zanin a?!” ka mengphawh hra mai.Eng nge a sawi tum ka man lo.

'Aw, tiang zanah hian ka nu leh pa hian an thiante leh chhungte sawmin hun an hmang thina, min rawn hmanpui turin ka sawm ang che ka ti a...' mak ti lutukin ka melh reng ringawt.

'Ka..ka...Sorry,ka thei lo ang..'

'Hun a la tam alawm,tunah chuan kal chhuak tawh ila,bakah ka nu list min pek hi a tlem lo viau ania..' a tih zawm leha, engmah ka hrethiam lo.A nu tan kan bazar sak dawn tihna nge pawh ka hre nek lo.

'Khawi lamah nge kan kal hmasak ang?” Helmet khum pahin a ti a.

' Ka hre lo,enteh..keima mimal thil lei tura kal tum ka nia, I nu mamawh lam khawm tur ni loin..'

'Ok,mahse engtik laiin nge ka nu mamawh lamkhawm rawh ka tih che a?” a tia,eng nge a ngaihtuah hriatthiam harsa zetin min melh run bawk.

'Nichin khan i sawi kha?”

'Ka nu list min pek a tlem lo ka ti mai alawm,engmah lei angai lo.Haw pahin a mamawh ho hi a awmna Dawrah list ka dah ringawt ang,an siam zawh hunah Driverin a lam khawm ang' a ti ta duah,nuam lo ka ti ngang mai thung.

Amah hlat thei ang berin ka thu a,sik loh hram hram ka tum teh nangin a harsa lam hret.Ka tang nasa lutuka Bike a chuang e ti loin ka na vek in ka hre bawk.Motor kal theihna chinah Bike a daha,ke in Bazar kan pan thlaa,diktak chuan ka bialpa leh thianpa a ni lo nangin a bula kal hreawm zawk zawk a ni lo.Mi zingah pawh a langsar vuah thei tlat.

Darkar khat vel zet kan vah kual hnuah engmah lei loin kan let leh ta ngawt, mipui innek luih luih kha a hahthlak lutuk,bakah ka duhzawng engmah ka hmu lo.

'I ril a tam em?” tlema hmun thawl deuh kan thlen hnuah a ti a.Ka lu ka thing ringawt.

'Anih chuan kan haw leh mai dawn mi niang? Ka nu thil mamawh ho kha hun kan neih chuan enkual sak ila..'

'A pawi hleinem..' ka ti tha ve mai.Bike awmna lam kan pana,Motor awm bawk si lo nen mitin maiin nuam kan ti niberin ka hria.

Dawr lian zet kawtah kan dinga, he dawr hi vawi li vel chu ka kal ve tawh, mamawh nawlpui chu a kim vek ti ila a dik hial ang.

'Darian,i dam maw?” Counter lo nghak tu,nu thau lamin Darian-a a hmuh veleh a lo ti nghal chul.

'Ka tha lawm,nang zawk?” Darian-an a ti ve a.A hmel a nelawm hle bawk.

'Um,tha e..Mahse, I pi I rawn tlawh lo a, a vui nasa tawh ania' a ti leha,an chhungte an ni leh zawk emawni?

'Tunah tlawh ka tum alawm,ka nu mamawh ho rawn siamfel tir che u angaia..'

'E,nitak,zingah khan min lo call asin,khawnge list?”

'Hei...lo dahkhawm se, in zawh hunah Taxi in emaw lo han dah tir mai la,Driver pakhat chauh a awm riha' a ti leh a.A bu nghuta, an nau te a ko a, Darian-a nu list a pe nghal bawk.

'An lo dah chho tawp mai dawn nia,a kim lo a awm leh lo sawi leh mai ula..'

'Ok,eee..Nute, hei hi Zampuii ania,chuan Zampui, hei hi ka pa nau nupui,ka Nutei anih hi..' min hmelhriattir ka lo beisei lo bawk nen hamhaih zetin ka nui lui sak ringawt.

'Zampuii,i hming a va nalh ve, ka hriattheih tur tak lehnghal..'a nui hak haka, min chibai tumin a kut chum biang mai a rawn phar chhuaka,tim daiin ka vuana.

'Ka lawm e..' ka theih tawpa zangkhai in ka ti sap bawk.

Nghet zetin min vuana,nui chungin min ena,min zirchiang a ang.Min thlaha,min endanah khan huatna emaw mitmei kawi engmah a awm lo.Mahse, engvangin nge Darian-a khan min hmelhriattir kher ka hrethiam bau lo.

'Inah chuan zuk kal lawk ula,Zampuii pawh hi i pi chuan a hmu ve duh ang...' nui chung bawkin a ti leha, ka biang sa nghal hat hatah chuan a sen nasat tur zia ka hrethei.

'Um kan zuk kal lawk ang.Kal ila...' min rawn ena,ka inrin hmain kan banrekah a rawn vuana,min kai kal nghal chu a ni der.

Dawr atangin kan chhuaka,hmundangah kan kal dawn emaw ka tih laiin In sira inhnuai panna Step awmah chuan kan chhukthlaa,an mahni Building anih hmel viau.

'Min thlah teh,a nuam lo ania..'

'Eng chu maw?” pawisak nei lo hmel zet hian a hmui a ti sawi zauh bawk.

'Hei hi mawle, min kaih kher angai hleinem..'

Min hnial leh dawn emaw ka tih laiin a thlah ve ta mai, atthlak zetin ruak deuh huaiin ka inhre leh lawi.Eng ka ti ta nge mawni?

Kum 40 bawr vel,hmeichhe pakhatin kawngkhar min lo hawn saka, a pi muthilh leh muthilh loh a zawta, 'u' ti a a koh avangin an chhungkaw zinga mi ni loin an awmpui anih ka ring ve ngawt.Tu pawh chu nise ka tan hriar kher a pawimawh lo.Ka kal nawn leh dawn pawh ni hlei lo.

A piin Darian-a a hmuh veleh hlim zetin a ri chel chul mai,Pitar nitawh mahse a vang laiin nu lian tha tak a ni ang tih a hriattheih.A hma ang bawkin Darian-an a pi nen min inhmelhriattir leha,a Nutei ang bawk khan min lawm tak tak niawm in a awm ve leh tho mai.Darian-a hian hmeichhe thian a hruai lut ngun lutuk anga,ngaiah an nei tawh zawk pawh a ni maithei.

'Mama,i lo kal elaw?” Putar samtuak var vek hian a rawn ti a,ani pawh a zang a kul deuh tawh nangin a vanglai chuan Mizo zingah a sang pawl a ni ngei ang.Hei vang hian anih dawn hi Darian-a a lo len em em ka ti rilru ta.

'Aw,lo kal zuai,Dawrah ka lo kala,Ka pi a dam tha lo tih Nutei'n a lo sawia..'

'Nia, a hritlang hi a dam mai thei lo..Eeee, I nu te engtik nge an lo let ang?'

'Tlaiah,zanin pawh in lo tel peih dawn lo tihna ni maw?” Darian-an a ti a.Engtiang taka hun hman tum chu nimaw?

'Tel peih lo tawp ang,Jared-a hi lo haw a tum em?”

Ka hresual emaw tiin rang lutukin Darian-a ka ena, min lo en ve chiah,a hmel dur deuh khap chuan mak takin ka thauah min mana,ka tiril a khur nghal dar dar mai.Amah hi Jared-a a ni lo.Mahse, unau anni chiang lutuk..

Chapter- 8

'A lo haw tawh,ka nu te nen Huan lamah an kala' a pu en pahin a ti a.Ka chil ka lem khawlh mai,an Ina thlalak intarah khan a nau thlalak a awm leh awm loh ka lo en miah lo.An chhungkaw thlalak intar ka enah khan a awm tel miah lo tih erawh ka chiang.

'A that chu,min rawn tlawh a tum lo lehpek aniang maw?” a ti leh chuar chuara.

'Tlawh ang,mahse a chhuk leh hma dawna...' ka hrethiam chiah lo.Jared-a anih chuan khawiah vak nge a kal ang? Huan a kal a hmanhmawhthlak awm tawp si lo.

'Min lo tlawh rawh se,enteh..Bawhi,kan Jared-a hi chuan min ti buai hneh thin teh ania,mahse Darian-a ai chuan a la zia...' a nui a..

'Pi,kan kal mai angai dawn tlat...' a pi a ena, a hmel dam thluam mai chu ka la hmuh ngai loh a ni bawk.

'Aaah,kal mai rih lo ang, nge Zampui,i hmanhmawh zawk?”

'Aih,hmanhmawh lo e..'

'Anih a hnu,kal lo ang,Thingpui pawh in la in lo'

'Ok,kan awm ang.Mahse, thil ho deuh i sawi leh chuan kan kal ang' a Pi en leh pahin a ti a.

'Sawi tawh lo ang, mahse ,Zampui,Darian-a vang hian dawt ka sawi hnem tawh ania...' a nui a.Darian-a ka en a, nui chungin a dar a ti chhing uk ringawt.

Thingpui an rawn daha,a pi leh pu bula Darian-a khawsak dan engkim mai chu ka rin bak piahlam vek,a duat zia haider theih a ni lo.A pi leh pu lahin an thlahlel ngawih ngawih tih a chiang reng.Mahse, Jared-a kha...Ramhnuaia ka hmuh kha ka mitthlaah a lo lang leh a.Darian-a ka en a,an chezia engkim mai a in ang lutuk,mahse ka bula awm mek,thlamuang taka titi hi Darian-a a ni a,ani kha chu Jared-a a ni lawi si..Engmah ka hrethiam lo..

'I tha em?”

Ka phu zawk zui,tihngaihna hre loin ka nui lui sak bawk,Darian-a ke ena, a hmel tak ngul maiah chuan ka hriatthiam chiah si loh a lang zawka, mahse a reh leh vat.

'Aw...aw,tha e..'

'Ka pi in a bia che a..' rawn kun hnaih pahin a ti supa,min rawn hnaih chilh lutuk.

'Sorry,thildang ka lo ngaihtuaha...' insiamrem niawm takin ka thu thaa,ka inlahrang a ni tih a hmel chimawm zetah chuan a hria tih a lang thei,a hmui nalh zet a petsawi zauh bawk.

'A pawi lo,mahse i nuam lo anih ka ring,kan kal mai dawn mi?” min ngaihtuah tak tak niawm takin a ti leh supa, a mit a lasawn eih lo.

'Aih,ka tha..'A pi ka en a.Harsa ti zetin ka then lui a.Nuih luih hi ka thil harsat ber anih vei nen hepa ka hriat atang hian ka nui lui ta fo mai.

'Thil pawimawh ka sawi lo,kal tawh mai ru,i nawm loh hmel tak tak ania' ani pawn min ngaihtuah tak tak ang maiin a ti ve leh.

'Nizanah ka mengrei deuha, chuvang aniang..' ka ti ta ngawt.

'I tha takzet maw?” Bike a lawn mai loin a ti leh a,a Pi te bula kan awm lai ang tho khan a hmel a lang dam thlup tho.

'Um..tha...kal tawh zawk ang, Scooty ke lam ka la ngai dawn bawk si'

'Ni dawn tak...lawn la' ati supa.

Kal lam ang bawkin ka tang tluanchhuak zak,an In kan thlen meuh chuan ka thaw huai mai.

'Zanin kha ka ti tak tak ania' a ti a,ka chhanna pawh nghak chuang loin Scooty ke lak thlak tumin Motor hnung a hawng zui daih.

'Min hrethiam la.Ka sawi tawh kha,tihtur ka neia' na zetin Motor hnung kawngkhar a nem khar dawt, ka phu zawk bawk.

'A rei lo ang, Darkar khat a ni tlangpui'

'Ni lo,ka....'

'Dar 7ah ka rawn lam ang che...'

'Darian...'

'Yeap...'

'Ngatinge ka sawi i awih duh miah loh a? Tihtur ka nei...'

'Ka beng a ngawng rih tlat..' a mit a siai zauha,min rawn pan hnaia, rang zetin ka tawlhhnung ve thung.Mahse, Ban in min lo dal takah chuan ka nghenga,beidawng zetin ka melh reng ringawt.

'Eng nge tih i tum a...?” ka tum loh tawpin ka aw a khur dar dar bawk.

A kut lehlamin Scooty ke a kenga, lehlam a rawn lek chhuaka, ka mit ka chhinga, eng nge thleng tur ka nghak ta ngawt,a kut lum thur thurin ka khabe a rawn si a,dimtein a tuaia, ka thaw tha ngam lo.

'A fai tawh e..' a aw pa zetin a tih rualin ka mengchhuaka,amah ka en ngam lo.

A kalsawna, Scooty awmna a pana,kei erawh ka thawk dan mumal lo lutuk tihreh tumin ka che lawk lo..

A vuah zawh hnuah lo lut tawh loin a haw ta hram,chau zetin Sofaah ka thu a,eng berin nge min ti chau pawh ka hre lo.Nileng khan hna hahthlak engmah ka thawk miah lo,mahse ka insangmar teuh reng kha ka chauhpui a ni mahna..Ka rilruah zanin chungchang a lo lang zawk,hreh em em mah ila kal ka duh,kha Jared-a kha ka hmu tal ang chu.Ka phone ka phawrha, tu emaw tal ka hrilh angai.

'Eng nge?” phone a pick veleh a rawn ti lar lar.He nu tak hi chu a...

'Khawiah nge i awm?” ka ti a.

'Dawrah,min rawn pui dawn ami?” a nui a.

'Teuh lo,biak che ka duh'

'Min biak reng hi..' phone ka la sawna, ka melh nghek.Ka beng bulah ka dah hnai leha.

'Nghal viau lo mai the..Enteh,eng lo...'

'Nang hi,i va nervous ve a..' ka tawng bah nawk nawk tawh chuan engemaw pawimawh,min kap tlat tu a awm thin tih a hrechiang viau.

'Darian-a..englo ania, zaninah an family Programme hmanpui turin min sawma..'

'Wow....engtin maw? Ka mumang a ni em?” a au nghek..

'I va han nasa tak...' ka ti hlak thung.

'Chutiang a ni lo.Ka thiannu em em hi mipa vanga a dang a awk ta hial hi a nuam alawm..'

'I chhe mai e a..'

'Nia, ka chhia.Tunah chuan engpawh sawi la ka pawm viau vek ang.Chuan engtin maw?” a rawn ti leh zat zat.

'Zaninah an Familyin Programme an nei dawna, min sawm a..Ih,sawm satliah lo deuhin..'

'Kal ang che, I hria em? Kal ang che'

'Vak vak a che...kal chu ka duha, mahse eng chhungkua nge tih tal hriat hmasak ka duh alawm mawle..'ka ti a, a phur the hawrh lutuk chuan min ti thinrim deuh tlat bawk.

'U hmeichhia a nei,Pasal a nei tawh,nau Mipa a neia,tlemin a naupang fal deuh..chuan ,chhungkaw hung leh zahawm tak anni...'

'Ok,.ok...a tawk,ka dah dawn ania' ka ti a,heng te chu chhunah khan Darian-a hnen atangin ka hre vek tawh.Oh,a nau mipa kha a naupang fal a ti anih kha,chuti anih chuan Jared-a a ni thei lo tawp ang.Mahse, a hming kha Jared-a an ti tlat lawi.Huizz, hemi te chhungkua ngawt pawh chu ka buaipui tak ni a.

'Hey,i la awm em?” a rawn ti vau vau..

'Aw,eng nge?”

'I va han thinchhe tak,chuan,Darian-a chuan a lo lam dawn che tihna mi?”

'Ka ring..'

'Ok,a va han tha si em..Che nawi hlek suh ang che,i hria em?” a rawn ti leha, ka nui hak mai.

Hmanah an thianpa pakhat min tihpui an tuma,ka duh loh thu ka sawi chiam pawn a ngaipawimawh lo leh lutuka, kan inhmuh hmasak berah atthlak zetin ka chea, min hmu nawn lo chiang lutuk,kha kha a la hre ve reng tih a tawng danah ka hrethei bawk.

Teuh lo,an zahawm hmel si..Enteh,Idea i nei thei em? Kei min sawm teh tlata, kha Emily emawni kha ka hlau deuh a..' za vak loin ka nui a.

'Oh,ni dawn tak.Mahse,an inthen an tiin ka hria'

'Maw?!” ka tum aiin ka aw a ring lam hret.

'Ka chiang bik lo.Engpawhnise khalam chu a pawimawh lo,zaninah tha takin i tihtur hlen la,hmalam pan ang che' thutak zetin a rawn ti a..

Nun khawchhuah nana ka beih nasat zia hre tu a ni a, mipa ka ngainat loh zia lah a hrechiang em em bawk,chutih laia Mipa vanga zawhna ka zawt anih chuan a lo lawm viau hi a demawm miah lo.Mahse...engvangin nge kan lo phur viau ngawt ang? Min ngaizawng pawh a ni lo a, an Family Programme hmanpui turin min sawm a nimai.

A sawi ang ngeiin Dar 7ah chiah a rawn thleng ta tak tak,mahse, ka lo la insiam miah lo thung.

'I la insiam lo maw?” thut pahin a ti a,a mitmeng nelawm lo zetin min melh run bawk.

'I hmuh ang hian...' ka ban ka phar zauha, ka nui lui sak bawk.

'Um,nia..A pawi lo,a la hma alawm, dar 8 a kan thlen hman chuan a tha'

'Enteh,min hrethiam la...min sawm hi ka lawm rualin ka kal chak lo a ni ber e' ka ti ta hlawl.

'Mahse, keiin lo kal ngei la ka duh thung a' ka sawi engahmah ngai lo zetin a ti liam vut.

'Ngatinge Emily kha i sawm mai loh ang?” ka insum hman lo...

'Emily...'

'Aw, Emily kha..Dik tak chuan Mipa,hmeichhe dang nena langsar taka inzawmna nei hi ka hnaih chak zawng an ni ngai miah lo..'

'Anih chuan keiin ka hnaih chak tlat ti ta ila...'

'Min hmu hniam hleah ka ngai ang..' ka ti leh hmak.Sofaah ka mal ka hlang chhoa,zahzelah ka kekawr tlang ka sik niap niap bawk.

'Um,mahse chutiang a ni lo tlat,Atei khan a hrilh che em ka hre lo nangin ka duhzawng neih nan chuan mi ngaihdan tih vel mai mai hi ka Care lem lo' chhan mai dan tur hre loin ka hmui ka peta,Atei khan chutiang chiah chuan a sawi lo nangin a duhzawng neih ngei ngei tum mi a ni tih erawh a sawi.

'Inhnial chiam ai chuan insiam tawh zawk la...' amah bawkin a ti leha, ngenna ni loin thupek a anng zawk mah.

'Ngatinge engmah i hriatthiam duh loh le?” luhlul zetin ka thut ngaiin ka thu lui tlat bawk.

'Anih chuan a tha lawm,tihian kan awm mai ang chu..Hrehawm zawk zawk a ni lo tawp ang' a mit a tizim a,hahdam hmel zetin a thuthluang duai bawk.

Darkar chanve a liam leh meuh chuan Darian-a te in kan thleng fel der tawh.An misawm dang te pawhan lo thleng tawh hlawm,Kal ka tum loh chuan kal a tum loh miau avangin tihngaihna a awm bau lo.Ka luhlul ve hle emaw ka ti a, a luhlul na chanve pawh ka nei in ka hre tawh lo.

'Mama,i lo let maw? Oh,hei hi mi Zampuii chu?” min rawn en a, ka mengphar ak thung.Rang zetin Darian-a ka ena, a bu nghut ringawt.Engtin nge min hriat ka hre lo..

'Aw, anih hi,chuan,Zampui,hei hi ka nu ania..Chuan,Stepa lo chhuk mek khi ka nau Jared-a..' rang lutukin Step lam ka melha,ka ang pham mai...

'Dik lo a awm em?” Jared-a nuin ngaihthat loh hmel zetin a rawn ti a.Ka in control leh vat.Nui chungin ka lu ka thinga, mahse ka nuih zat vanga nui erawh ka ni lo.

'Lo kal la,helamah hian lo thu rawh,Mama hi ka be lawk duha' tih pahin ka awmna hnai ber thutthleng min kawhhmuha,rang fahranin ka pana, ka thu fel nghal than.Vawt tih vang pawh ni loin ka khup a sai dar dar mai.

Ka hmuh tum Jared-a a ni hauh lo.Tuna min kawhhmuh kha chu a sang ve tho nangin a upa berah kum 25 bak a ni thei lo.Bakah a hawiher a zangkhai vaha, engmah rilru hahna hre ngai lo a ang bawk.Ka lo hmuh tum kha chu hetiang a ni lo.Ze zawi leh dam thlap,tawngkam nelawm lem lo tak leh inzuah buk bawk si kha ania,mahse tuna mi hi chu a ni hauh lo.

Reivakloah Darian-a a rawn let leha,ka bulah a rawn thu thla ve nghal a, ka insangmar lehnghal teuh mai.Programme an tan nghala,Ka lo beisei lawk ang engmah a thleng lo.Sawmbik 20 vel chauh kan ni a,an vaiin an chhungkaw thianhnai leh an Cousin te ni turah ka lo ngaia, a ni hauh lo.Fahrah,nu leh pa nei lo an enkawl thin te an lo ni zawka,Lehkha an zirtira, phai lamah a then an daha,a then chu nupui fanau neia chhungkaw pangngai din tawh te an ni nawk mai..

'Ka lawm e aw..' Motor kawngkhar hawn tumin ka vuan zui nghal zat.Mahse, ka hawn hmain a banrekah a rawn vuana,amah ngheng deuhthawin min pawt let rawk bawk..

'Engthil...' ka ti hman,ka hmui a rawn hupa,min kuah bet zui nghal hmak bawk.

'Tihian awm rih lawk ang..' a ti sup bawk.

Motor horn ri thatah ka phu zawka, inlakhran tumin ka che nghal phat,min thlah ve mai bawk,engchen nge khatiang khan kan awm ka hre lo.

'Mangtha le..' tih pahin Kawngkhar hawnna ka vuan lehnghala,mahse tun tum chu engmah a thleng ta lo.

Ka hawnga, ka chhuaka, hawi let miah loin in lam ka pan thlaa,mahse, Gate kalhna ka hawn hmain min zui tih ka hnunga pen ri atangin ka hre thei.

'Min hrethiam la...' ka hawi leta, mahse min zuitu hi Darian-a a ni lo...Ka chahbi ka thlauh nghal daih bawk.

Chapter- 9

'U....' a ti sepa, chhan mai ka tuma, ka tawngchhuak zo lo.Beidawng lutukin ka lu ka thing ta ngawt.

'Ka lo nghak char char che a..' amah bawkin a ti leh a.

'Mate..' abak engmah sawi tur ka la hre chuang lo.Vawitamtak Fbah leh Igah ka stalk thina, mahse atakah ka hmu ngam ngai lo.

'Zawhna zawh tur che ka neia..'

'Lo lut la..' midang awm leh awm loh enkual niawm takin a hawi kuala, ka hawi kual ve ngawt, tumah kan bul hnaiah an awm lo.

'Aih,tah hian sawi ka duh,engvangin nge ka nu rilru natna turin Ka pa nen khan in lo inkawp? Engvang nge?” ka khawng vek.Ka hresual emaw tiin ka en ngawt ngawt,mahse a hmel a min huatna lang chiang lutuk chuan ka hresual lo tih a tichiang em em thung.

'Thil hi hriatchian loh chuan sawi lo ila a tha in ka hria' rang lutukin kan hawi rual thawt.

'Darian...' a kal ve nghal emaw ka tia, a lo la awm tih ka hre miah lo.Tun maiah pawh khan ka hmu hek lo.

'Aw,keimah..lut ila a tha lo maw?” a rawn kal hnaia, ka kawngah a rawn kuaha,ka chalah a rawn fawp zauh bawk.

A chetdan tehthut chuan min thawng lutuk,mahse tunah kher chuan pawi ka ti rih lo.Nasa takin min chhan zawk.

'Tu..tu nge i nih?” ka nau mitmeng ling hlar mai chu ka melh zawka, ka en rei ngam lo.Darian-a rinchhanin ka ding tawk tawk a ni ber zawk.

'I pa hnenah khan ka hrilh tawh kha,i u Bialpa,Darian-a' ka melh chho vat, mahse min en loin Hazel-i a en run thung.

'Ka kal rih phawt ang, mahse i chhanna ka hre duh a nia' min rawn melha.Ka ip chawih mai.

'Mate....thil hriatsual i nei..”

'Dawtsawi suh..ka nu ngeiin min hrilh vek...chuti ni lo se i biru lo anga, i tlanbo bawk lo ang' min rawn hnaih leh hrat,mahse Darian-a rawn tawng leh chuan a titim tih hriat takin a ding leh rih.

'Kal tawh la a thain ka hria...Bakah thudik chu i zawn ve angai anih kha, midang kan tlansan hian kan dik loh vang leh kan hlauh vang a ni vek kher lo ania,kan hriat hmasak hi a dik vek kher lo thei tih te pawh hre ta bawk la...' a aw a ring lo ,mahse mi a let tawp tan lo chuan nek luih chi a ni loh zia hai theih a ni lo.

'I tha em?” ka khabeah a rawn dawma, amah en thei turin min kuai daka.A hmelpa leh tihmawh zet thin kha a lang dam thlup mai.

'Aw...aw..tha'

'Ok,Chahbi ka'n chhar phawt anga, In chhungah kan sawi dawn nia,Coffee sa ver vawr in la i zia mai ang' a ti leh supa,tawngkaa chhang loin ka bu liam satliah ringawt.

Inchhungah min kai luta, engmah sawi nachang hreloin mi a ang maiin ka awm a ni ber,Chairah min thut tira,Kitchen lamah a lut pheia, rei vak loah a rawn let leha, ka kutah No a rawn hmehbela,Coffee rim tak tha zet chuan ka hnar a verh nghal zar bawk.

'In rawh le..' a ti supa, a kalsawn dawn emaw ka tih laiin ka hmaah a rawn thu hniama, ka in leh in loh en tum niawm takin min en vung vung bawk.

Tlem ka tema,nuam ti taka in ni ila chuan Coffee tui tak a ni dawn chiang, mahse tunah chuan ka lem liam vel mai mai.

'Ka lawm e aw'

'Shhh...in zo phawt rawh..' min duatna ri ka hriat rualin ka tum loh lutukin ka mittui a rawn baw zawih mai.

'Oh..' a ti supa, ka no min rawn laksaka.side tableah a dah a,a rawn let leha,min pawt tho a.Amah zawk a thua, a malchungah min pawt thua,amah si chetin min pawt hnaia,min kuah beta.Engmah hnialna ka nei lo.Tunah rih chuan ka duhtawka tah ka mamawh lutuk.

'Tap rawh le...' a ti leh supa, ka samah a rawn fawp nghal vang vang bawk.

Engchen nge ka tah ka hre lo,ka taksa khur hlawk hlawk a reh tial tiala, ka tah chhung zawng khan engmah sawi loin ka hnungah a chul hauh hauha, ka samah a fawp a, ka kut lehlam zungtang karah a kut zungtang sei thlurh a rawn rawlh luta, a hum bet tlat bawk.

'A zia lo hle mai..' ka ti sepa, ka tahna vangin ka aw a lawi rat bawk.

'A pawi hleinem...'a ti supa, ka sam karah a kut a rawn rawlha, ka tukhumah a rawn vuana,amah en thei turin min kuai daka..

'Min hrilh i duh em?” amah bawkin a ti leha,a aw a dam hle bawk.

'Ka..ka hre lo..'

'Ok,sawi kher angai miah lo ania, i sawi duh chuan ka ti mai zawk..' a rawn kuna,ka chalah a hmui lum thur thurin a rawn fawp leh vang vang bawk.

'Diktak chuan i hriat kha engmah a dik lo..'

'Ka hria alawm..'

'Maw?”

'Nang hian khatiang thil tenawm i ti dawn lo tih ka hria alawm,bakah i pa nen ka hmuh dun tum che u khan i hlau tih ka hria...' ka mitah tak a en a, ka en rei ngam lo..

'Um...eng lo..ka pa... ni lo,ka pa hrawn khan min...min..sual …'

'Shhh...a tawk...ka tawng leh hmain a hmuiin ka hmui a rawn si a, a rawn khar zui hmiah..Ka hamhaih lutuk...Ka mit ka chhing a, chhan let nachang ka hre lo,bakah ka thiam lo..

Dimtein a rawn nawr leha,ka hmui hnuailam a rawn fawp a...awmngaihna ka hre lo..Ka awmdan ka sawithiam lo zawk pawh a nimahna..

'Min enteh..' a hmui a phawi rualin a ti supa, a kutzungpuiin ka hmui hnuailam a rawn tawka,a awmzei nei zetin a tuai kual dun dun bawk.

Muangchangin ka mengchhuaka,a mit thiam raih chu ka ena,diktak chuan hepa hi ka nuna a vawikhat nan ka duh tih ka pawm angai tih chiang takin ka hria..Mahse,eng nge ka tih ang?

'I bula awm turin min duh em?”

'Ka hre lo...'

'I duh phawt chuan...' ka biangah dimtein a rawn khawiha..

'A chang chuan ka hlau thina...'

'Ka hria alawm,pawnlama kawlh tak anga lang siin i chhungril a nem a,i mit nalh zetah hian chu chu ka hmu thei alawm..'

'Tumah ka nei lo a, ka nu chauh kha a ni a...' ka mittui tla tur khap kir tumin ka khap sek sek bawk.

'Tunah ani pawh a awm tawh lo a..'

'Um..' ka inring hman lo,ka mittui a rawn tla a,ka mit ka chhing ta ngawt,ka hmui ka pet fan fan bawk.

Muangchangin a rawn kun hniama,ka mitah a rawn fawpa,ka bianga ka mittui luangthla fawh hul tum niawm takin a fawp leh dun dun bawk..

'Hlau ngai tawh suh ang che,i bulah ka awm reng tawh ang..Kal tura min tih pawn ka kal lo ang...' a aw nghet churh chuan a ti ngei ang tih min rin tir thlap.

Christmas leh kumthar kan hmang zo a,a sawi lawk ang ngeiin Darian-an min kalsan meuh lo.A riak lo a,zing lamah chaw a ei ve lo tih bak chu a awm deuh chawt,thianho a hun hmanna tur kan neihah pawh a lo kal ve zela, karkhat emaw lek a la ni chungin a tel lo a awm ka huphurh hluah hluah tawh.

'Zampui,hmanni kha i lo kal ta si lo a..' kan inneitu farnuin min lo au a.A sawi awmzia ka man lo thelh,mahse ka ngaihtuah chhuak lehnghal mai thung.

'Eh,nia..ka lo manghilh daih,tunah min hrilh la a pawi em?” ka ti a.

'A ho lutuk,hmanni deuh khan Hmeichhe tleirawl pakhat ti ila nula a nimah zawk,a lo kala,helaiah i chen leh chen loh a rawn zawt a..'

'Tu nge niang le?” ngaihdan ka nei mai lo.

'Hazel-i a inti a' ka lungphu a rang nghal zaih zaih mai.

'Aw,anih chu mawle..eng chungchang nge a sawi em?” pangngai thei ang berin ka ti a.

'Aih, sawi miah lo.Ka sawi tum zawk tak chu a tukah khan Pa upa lamin a rawn zawng leh bawk che a,chupawh a chhan sawi lo bawkin,englo ania, ka ngaihtuah ta riau che a..' uluk zetin min en a.

'A va mak dawn ve mawle,engatan nge min tih an sawi lo ve ve bawk sia'

'Um,chutak chu mawle,mahse hei an lo la kal leh miah lo aniang,ka la hmu leh lo a' a ti awlsam leh mai.Keimah hian engvanga min rawn zawng nge annih ka hrechiang,Hazel-i pawn min rawn hmu tawh.

'Nia,a pawimawh chuan an lo kal leh mai ang,ka han inzar lawk ange' harsa fe in ka nui lui a, ka insuk zar tur ka kawk zauh bawk.

Darian-a hrilh tur a ni em tih ka ngaihtuaha, mahse hrilh loh mai tha zawkin ka hre leh,bakah eng nge hrilh dawn pawh ni ila ka sawi ang ka hre lo.Hazel-i khan engtin nge khatianga a sawi theih ka hre lo.Ka nu hnenah kha mi tenawmpa khan tiang zawng chuan a lo sawi a ni mai angem? Chuvangin ka nau pawh hian min hmuh chakna a nei lo a ni angem? Ka chhuahsan hnuah ka nau hian ka ngaih angin min ngai ve em ka hre lo,mahse ka nu Boral pawh khan a fate hmingah ka lang ve lo a.chuti anih chuan chhungkaw zing atang khan ka tlanbo vang ni loin min lo paih fel reng zawk a ni mai angem? Zawhna hlir...Ka nu kha a damlai khan vawikhat tal lo hmu ila chuan engkim ka sawi thei zawk mahna,mahse a tlai tawh,chu bakah a pasal khan khatiang zawnga a lo hrilh anih chuan ka sawiin awmzia a nei tawh lo ang, a rilru a siamfel vek tawh ang.

Kawngka kik thawmah ka ngaihtuahna tangin ka harh zawk,insuk ka zar zawh hnuah ka thutna ngaiah ka la thu ta reng,thawh pahin sana ka melh zauha,tlai lam dar 2 a ri tawh.LALPA, Darian-a a ni tawh ngei ang,a thianpa te In thar lawmnaa kal tur kan ni a,hunserh dar 3 a la ni zui.

'Eh,thil dik lo a awm em?” rawn luh pahin a ti a.Uluk zetin min en bawk.

'Aih,awm lo..mahse, ka la insiam miah lo a..'

'Ka hmu lawm,chuvang takin 'aih' i tih kha ka pawm lo ania..'

'Awm lo tak tak..' ka nui lui sak bawk.

'Ka'n insiam lawk ang,ka rei lo ang..' ka ti leha,Room lam pan tumin ka inhera, mahse ka kal hmain ka banrekah a rawn vuana, amah si chetin min pawt leta, ka en hau mai.

'Sawi rawh le,i bum tum hi Darian-a a ni tih hrereng la..' a mit a siai zauh bawk.

'Darian...' beidawng zetin ka ti halh ringawt.Han sawi tur em em a awm miau si lo.

'Yes,sawi la...'

'Engtin nge ka sawi ang ka hre lo alawm..'

'Ok,tihdan ka hria,i hriat ang ang sawi tawp mai la..'

'Hmanni a kan inneitu in min hmuh a duh kha i la hria em?”

'Aih..ee,ka hre leh si e..chuan?” a tih zawm zat.Ka ban a kutzungtangin a rin zai zai bawk.

'Ka nau leh Ka..ka pa in hetah ka awm leh awm loh an lo zawt a,mahse tu te nge annih a hre lo a..'

'Chuan...?” a ti leh sup.

'Ka awm tih a lo hrilh aniang chu,Hazel-i kha a lo kal kha,ka insawn mai dawn mi niang?”

'Eng nge i duh?” hriatthiam har zetin min en a,a thinrim a ang viau bawk.Mahse, enge a thinrim chhan tur ka hre lawi si lo.

'Ka hre lo,mahse..mahse, lo kal thut se, i awm si loh chuan...” a tawp lam a zuih ral a ni ber.

'Min nei mai rawh..' a fiamthu anih ringin ka en a, mahse a hmel thutak lutukah chuan eng fiamthu mah a sawi lo tih a chiang.

'Tunah fiamthu thawh lo la...' ka ti chhuak halh mai.

'Ka fiamthu hleinem'

'Ni lo,Darian,a la hma lutuk tih nangpawn i hria alawm' ka ti leha,kan inhriat atangin thla hnih a liam tawh,mahse tihtak zeta kan inzuina erawh thla khat em pawh a la ni lo.

'A rei leh a rei lohah ka buai hleinem,ka duh ka hrechiang a ka duhtawk mai..'

'Nakinah sawi leh zawk ila..' ka ti ta ngawt.A hmel a dur deuh khupa, min hnial dawn emaw ka ti hman,mahse a bu ta nghut.

In kan chhuahsanin Dar hnih leh a chanve a pel tawh,thupha ka chawi a, mahse a nui suk duh chauh,thlen ngei ngei ngai nimahse a ngaipawimawh lo nge pawh ka hrethiam lo.

'Hey,Darian...i tha em?” Mipa pakhat hian a lo ti a,Darian-a nen an inrual loh chuan a upatna a tam lo hle ang.

'Aw, ka tha lawm,nangni zawk?” tih pahin an inchibaia.

'Um, kan tha,Kan nu pawh a lo kal alawm,chuan min hmelhriattir dawn nge keiman ka zawt dawn?” min rawn en a, ngainatawm takin a nui sun sun bawk.

'Ahh,lo phur vak lo teh,tak takin Zampuii anih hi,chuan Zampui,hei hi ka thianpa,a tak Muankima anih hi..' a nui hawk bawk.

'Ekhai,a tak han tih kher,engpawhnise Zampui,ka hmu che chu ka lawm hle mai,ka zin bo rei deuha ka hmu har ta hret cheah ka ngai ania, tunah chuan kan inhmu zing viau ang' a ti a, a nui hak hak mai.

Kan inchibaia,a vawikhat nan Darian-a thian ka hmuhna a ni a, ka ngainat tur chi tak a la ni zui bawk. Kan thut fel hnuah a nupui a rawn hruai leha, ani pawh ka ngainat tur chi bawk,kumthara fa nei mai tur anni a, a puar lian viau tawh.Dar thuma thlen hman loh pawi a tih loh chhan kan thlen hnuah ka hmu ta chauh,kan thlen khan Muankima te nupa bak tumah an lo la thleng lo.Kan thlen hnuah vek an lo thlenga, an thian ho,Mipa pali leh an kawppui te theuh an lo thlen belha,kan vaiin mi 10 rual vel chauh kan ni a, an felfai thehthawh bawka, keipawn ka beisei ai takin nuam ka ti ta.

'Zampuii,i ni tiraw?” keimaha Balconya ka din laiin hmeichhe pakhat hian a rawn ti a, ka en vat.An thianho zinga mi bialnu kha a ni tih ka hre nghala, an lo thlen tirh atangin a hmui sen lutuk vangin ka enbik kha ania,a hming erawh ka hre tawh lo.

'Aw, ni e..min hrethiam la,ka ko mai thei tlat lo che” nuam ti lo zetin ka nui lui sak bawk.

'Seni...in la haw dawn lo mi?” a tihzawm zat.A rawn kal hnaia,a thil in rimin ka hnar a verh zak mai.

'Ka hre lo le,Darian-a tih hun hun a nimai'

'Um,keini pawh..enteh,ka lo ngaihtuah mai maia,Darian-a hi a che rang hle mai'a ti a, a hmui sen zet chu a petsawi zauh bawk.

'Min lo hrethiam la,i sawi awmzia ka man lo..'

'Sorry,ka sawi tum tak chu Emily lo thlen hunah engtin nge i awm ang ka hre chak mawle” ngeiawm lutukin a nui hak mai.

'Emily...' ka ti nawn ve sep ringawt.

'Um,Emily..Darian-a bialnu kha..'

'Bialnu hlui ti ta zawk la....' ka insum hman lo.

'Yeah...chutiang chuan a lo hrilh che em ni?”

'I lo buai lohna turah i buaiin ka hria' ka ti let salh thung.

'Dik chiah,mahse Darian-a ka bialpa thian anih na aiin Emily ka thian anihna a thuk zawk'

'Oh,anih chu mawle' ka ti nghata, a mitah tak ka en lui ngar bawk.

'I duh phawt chuan tunah pawh i en thei ang chu” inchhung lamah a thle zauh bawk.

'Ka luhsan phawt mai ang che,eee..thil pakhat ka hrilh ang che,a duh miah suh.Kum 5 lai an inzui tawha, hun khawhralna nih i duh ka ring lo ania' ngeiawm zetin a nui a, ka chhanna pawh nghak chuang loin inchhung lam a pan zui daih bawk.

Thawk ka la vang vanga, ka lungphu tih pangngai tumin ka mit ka chhing vang vang bawk.Ni tlemte chauh Darian-a nen kan la inkawpa,ka lo ring hma lutuk a ni mai angem? Muangchangin inchhung lam ka pana,an lo tawng ring tawh hlawm ngang mai.Ka hawi kuala, Darian-a ka hmu hauh lo.

'Darian-a i zawng anih chuan inchung lamah a chho a..' Muankima'n a rawn ti a, ka bu nghauh ringawt.

'Han chho ve mai rawh, In pawh i la enkual loh kha,kan pa nen an awm ang' kan kalna in neitu,Ma-lawmi'n a lo ti ve a.

'Nia, ka han chho ve ange,ka enkual vek dawn ania aw' ka ti a.a bu ngauha, a nui var var bawk.

Room ho ka enkual dan dana, engkim mai duhthusam a ni tawp mai,an nupain Doctor anni a,Sawrkara thawk ve ve annih mai bakah a hranin Clinic an nei bawk.Room awm zawng zawng ka enkual hnuah pawh Darian-a ka hmu hauh lo.Room dang ka enkual lai khan inhnuaiah a lo chhuk hman pawh a nimahna le.Chhuk ve mai ka tum zeta, mahse inchung zawl panna Step ka hmuh lam chuan ka mit a la ta zawk.

Step tawite ka zawh chhoa, kawngkhar kalhna hawn tumin ka bana, mahse a lo inkalh lo..Ka nem hawnga, inchungzawl, Thla engin a chhun en ruai maiah chuan ka pen chhuaka, thli vawt var maiin ka hmai a rawn chhema, ka harh sawng sawngin ka hre bawk.

Kal leh mai ka tum laiin zawitea tawngri ka hre ta tlat,a sawi tak erawh ka hre thei lo.ka hawi kuala, ka dinna piah lawka mipa leh hmeichhia ding ka va hmu a,thla eng mahse tu te nge annih ka hre mai thei lo...Thil pawimawh tak sawi an ang viau mai.

Inhnuai lama chhuk leh mai tumin ka inhera, ka pen tan chiah tihin ka ding leh chawt.Tah chhuak insum taka insut ri a hriattheiha,ka hriatthiam chiah si loh in ka awm a nuam lo nghal nghulh bawk.

'Darian, kan inhmangaih kha..khawngaihin min ngaidam rawh' tap insut ri satliah a ni ta lo.

Ka khawng nghal lah mai,tu nge anih en kher ka mamawh lo,an inhmangaih anih chuan tu nge ni chuang ang? A lo kal lai hre lo mah ila Emily a lo kal tih ka mita ka hmuh kher ka mamawh hek lo.

Chapter- 10

'I tha em?” Muankima'n min lo ti a,tawngkaa chhang loin ka bu nghata, harsa zetin ka nui lui thei hram bawk.

Darian-a khan engtinmah a chhang lo nge ka kal hnuah a chhang ka hre lo,mi kara tlazep ni a ka inhriatna in min fana, Darian-a chan tura ka in ngaihtuah zawngin ka na nge ka hrethiam lo,ka awm a nuam lo ngawih ngawih bawk.

'Ka zawng che a' Darian-a awin a rawn ti a, rang zetin ka hawi chhuak vat,a hnunga ding ka hmuh rualin ka luak a chhuak nghal hlui thei.Engtik laiin nge an lo chhuk ka hre lo,tunah an lo chhuk chauh pawh a nimahna..

'Ngatinge?” ka ngiahtuahna tilang lo turin pangngai thei ang berin ka ti zangkhai vah.

'Oh,ka hmu lo chea..'

Keiin ka hmu che u alawm tih khum nghek ka chak zek zek,mahse atthlak lutuk a che turin ka a lo,ka rilru a fim vek bawk.

'Um,tunah min hmu tawh lawm..' ka then lui sak.

'Yeap,ee,Mate,hei hi Emily,Em..Zampuii anih hi..' rawn thutthlak pahin a ti a, inti ta tu zetin ka kut a rawn vuana, ka kawngah a kuah nghal zat bawk.Kei erawh ka khawng nghal lah thung.

'Ka hmu che chu ka lawm hle mai' tih pahin a kut a rawn phar chhuaka, a hmeltha zetah chuan a hmain min hmu tawh tih a hria em hriat tumin ka ena,mahse engmah chutiang awm a awm lo.

Tho chuang loin ka kut ka pea, ka vuan zawka, ka thlah lehnghal vat.A mithmul er nalh zet a tisang zauha, min tham lo hmel a lang zauh bawk.

'Kei pawh ka lawm' ka nui lui leh a.

'Kan inhmu leh dawn nia,Seni ka'n zawng lawk' tihpahin Darian-a a en a,ka tim sawk thung.

'Haw mai ka duh' a kalsawn veleh ka ti a, ka kut a vawnna ka phelh saka, ka kut pahnih ka suih daih bawk.

'Midang an la haw si lo a...ok,a pawi lo,kal ang..Kan pahniha awm ka duh'

Engmah sawi loin ka dinga,kawngkhar lam ka pana, Malawmi lo kal phei mek chu ka nuih lui hram hram a ni ber.

'In kal mai dawn mi?” a rawn ti a.

'Um, kal mai ang,Nuam ka ti lutuk,In in nei nuam si,kan puar bawk nen... ka ti a.

'Engtikah nge in lo kal leh ang?” a ti ve thung.

'Ka hre lo..' diktak chuan ka kal nawn leh ka ring lo.

'Zampui'n a duh phawt chuan kan lo kal leh har lo ang' ka beisei loh zetin Darian-an a rawn ti a.

'Aw, tha lutuk,i lo kal leh ngei angai dawn,i Driver hi i thu thu anih hmel tlat' a nui hawk hawk bawk,ka nui hleithei der lo thung.

'Eng nge dik lo awm?” kan tlanchhuah hnuah a ti supa.

'Engmah..ngatinge?”

'Min bum tum thin lo teh..' ka kut a rawn vuana,ka thingthla chak lutuk,mahse a ngaihthat loh zual nan engthilmah tih ka duh lo.

'Engmah a awm lo...'

'Khawngaihin Mate...' ngengawl zetin a ti leha.

'Engmah a awm lo,ka nuam lo a nih ka ring' hnunglam ka ngheng a, ka mit ka chhing vang vang bawk.

'I khua a sik em?”

'Aih...'

'Ok, in kan thlen veleh i mu nghal vat dawn nia' a ti leh supa,a tawng dan chu In khata cheng dun kan ang zawk.

'Kan thleng e...' ka mengchhuaka,kan In kawtah kan lo awm tawh.

'Mangtha le...' ka ti sepa, kawngkhar ka hawnga, mahse ka chhuk hmain a rawn pawt khar leha,a lock nghal daih bawk.

'Ngatinge?” phawk deuhin ka en a..Hriatthiam har zetin min en thung.

'Sawi rawh...'

'Eng?”

'I Mood thlak vekna kha ka hre duh..'

'Chutiang a awm lo, ka nuam lo ka tih kha...'

'Emily vang a ni em?”

'Aih' ka chhang rang lutuk mah mah.

'Emily vang kha anih chuan ka sawifiah thei..'

'Ni lo...bakah sawifiah turin i eng nge ka nih?”

'Engmaw i sawi?”

'Engmah sawifiah suh,bakah kal tawh rawh,a tlai tawh...' engahmah ngai lo niawm takin ka thle bak bawk.

'Thu rawh...' thupe aw lutukin a ti leh a,a aw a ring lo nangin a fiah ngang mai thung.

'Darian,khawngaihin...' ka hawi let chuang lo.

'Ok,kal rawh,mahse keipawh ka lo kal ang..'

'Ni lo...'

'Min hnial suh..'

Hnial awmzia a awm leh dawn chuang lo tih ka chiang,amah zawk a chhuk hmasa a,ka thutna lam kawngkhar a rawn hawng leha,engmah sawi loin Inchhungah kan inzui luta,tawng chakna pakhatmah ka nei lo.

'Thingpui i duh em?” pangngai thei ang berin ka ti a.Bakah ngawihreng nuam ka ti lo.Ka ipik vek.

'I nuam lo tih ka hria lawm,keiman ka lo siam ang'

'Ok..' hnial ka tum zet nangin ka ti ta zawk.

Ka kawngah a rawn kuah rualin ka insang mar nghal teuh mai,a lo kal hnaih lai ka hre lo,a lo let leh thawm emaw no a dah ri pawh engmah ka hre lo.

'Enge i ngaihtuah?” zawi supin a ti a, ka bengkawm a fawp dun dun bawk.

'Engmah...' min kuahna phelh tumin a kut ka zuk vuana, mahse awlsam zetin a pahnihin a vuan bet nghal hmak.

'Engmah...engmah..nichin atang khan tiang ringawt hian min chhang a,a chhan ka hre duh ania..' khauh furin a ti leh a,amah en thei turin min kuai hera, ka Khabeah a rawn dawm a,hreh zetin ka en ta nge nge.

'Le,enge ka tih dik loh sawi la?” amah bawkin a ti leh a.Thlek sawn tumin ka lu ka ti che a, mahse ka tukhhumah a rawn vuan bet leh ta tlat.Hawisawn ngaihna a awm lo.

'Kalsawn phawt teh..'

'Oh,ka kalsawn dawn lo tih kei aiin i hrechiang alawm..' a hmui a petsawi zauh bawk.

'Ka hrechiang che amaw?' ngeiawm zetin ka nui lui hak mai.A hmel a danglam zawka, mahse a pangngai lehnghal vat.

'Min hrechiang lo anih chuan i thiam loh a ni ang chu...' a awah thinrimna niawm tak a hriat tel theih ta bawk.

'Aw, hrechiang lo.Nangpawn min hrechiang chuang hleinem..min thlah teh..'

'Ni lo e,Emily lo kal khaiI duh lo anih chuan ka sawm a ni lo..'

'Emily,eee..Ni tak,i bialnu kumhlun kha...

'Tawng fimkhur la a tha in ka ring' a aw a ring lo,mahse a chiang kek kawk viau.

'Oh,Sorry,a chanchin ka sawi i phal lo tih ka lo hre lo a'atthlak zetin ka na nghal zawk bawk.

'Hrep tak hian, chutiang zawngin ka sawi lo ania' a thaw hawk mai.

'Kum tamtak inkawp hnuah chuan then a harsa ngawt ang,mahse kei chu hmeichhe mawl ka ni lo,amah i fawhna hmui pawh a hul hmaa min fawh leh ka duh tawh dawn lo,i duh leh mutpui la,in tan thilthar a ni lo...mahse..' ka sawi zawh hmain ka hmui a rawn khar hmak,ka hamhaih lutuk,hnialna chang hre loin ka ding khawng lah mai.

Ka hmui a thip zawk rualin ka che nghal phat mai,a lo inthlahdul ve bawk nge ka hre lo,ka kut a vawn ka tal pita,ka kut a phe zawk,a hmaiah na zetin ka hama,lehlamin a awmah ka nem nghek bawk.Ka chet dan tehthut chuan ani pawh a thawng niawm takin a in la hranga, a rum hawk bawk.

' Kawl reuh lutuk mai...' tih sup pahin a rawn tawlhnai dawrha,bangah min nawr bet nghal rawk bawk.

'Mi tenawmpa,ka haw lutuk che...' ka aw a chhuak hleithei lo,thinur lutuk vangin ka khur dar dar bawk.

'Tenawm,tenawm..engtiang chiaha tenawm nge ka nih i hmu dawn alawm...' a ti hmuka, ka inrin hmain min pawm kang nawlha,a darah min bata, min pu a ni mah zawk.

'Engthil nge i tih a? Min thlah rawh...' ka ti nghek,a hnungah ka chuma,mahse, engahmah angai chuang lo.

Room kawngkhar a darin a nek hawnga,tal thlak tuma ka beih nasat poh leh a nghet sauh zel a ni ber.Kawngkhar a tlawh khara,Light engmah a in On lo nangin Parda inzar phui lo atangin thenawmte eng a rawn luta, thim lutuk a ni lo.

Khumah min dah thlaa, a kut lehlamin hneh zetin ka kut pahnih a hmer kawpa,lehlamin a Jacket haklai a phelh pah bawk.Ka tlawha, mahse ka tih tum hre lawk niawm takin amah a in veng zela, ka duh angin ka tlawh fuh thei der lo thung.

'Thlawk bo rawh,ka hua che ka tih kha i hre lo ami?” ka ti leh that,eng ang pawn te ring ila ka inchungten thawm an hre dawn lo,Living room lam chu nise an hre mahna,Room lam hi chu thawm hriat mai mai theih a ni lo.

Engtinmah min chhang loin min rawn delha, ka tal leh phat,mahse ka bawkkhup thei tih bak engmah min thlahdul chuang lo,min rawn thut titiha, ka kut hnunglamah a hmer kawp tlat,kan inlen hleih bawk nen ka che hleithei lo chu a ni der,bakah ka talna lamah ka chau tan tih ka inhre bawk.

A rawn kun hniama,ka bengah a rawn fawpa,a lei lum ham ham chuan a liak kual zai zai bawk.

'Ti suh,i inchhir ang...'

'Oh,ka phur zawng tak a ni tlat thung..'

'Misual tak i ni...' abak sawi mai tur ka hre tawh lo.

'That ka chhuah chung pawn sual min ti tih ka hria,engtia awm tur nge ka zirtir dawn che alawm..' a ti leh nghuta,a nui hawk bawk.Mahse, a nui ri khan nuihzat lam ni loin tihelna lam a pawl zawk.

'Duhtawk teh''

'Teuh lo mai...' a ti leh hmuka, hneh zetin ka kawngah a chawi kang nawlha,zangthal zawngin min nem bet leha,min rawn bawhbet zui nghal zat bawk..

Ka Coat hak Living roomah ka phelh tawha,a hnuaia kawrlum phiar,taksa phuar deuh ka hak bak a hnuaiah engmah ka ha tawh lo,hnehsawh zetin ka kawr a rawn zena,ka bra a nawr chho pawpa,ka hnute a rawn hum nghal chat,hlauhna sawfiah theih loh khawpa nasain min rawn fana,ka khur nghal hlawk hlawk thei hial bawk..

Tal turin engmah chakna ka nei tawh lo,ka mitthlaah ka pahrawn a lo langa, min khawih luih a tum lai kha angai ngaiin ka hriatrengnaah a rawn let leh nghal vek..

'Darian...' ka aw a ri em ka hre lo..

'Ka hlau ania..' a thil tih mek a chawlh takah chuan ka tawng ri tih ka hrethiam nghal mai,amah leh amah in Control tum niawm takin ka awmah a hmai a phum vang vang bawk

Ka chung atangin a letthlaa,amah hnaih turin min pawt a,a dar hlai hlap mai ka khama,min kuah bet tlat bawk.

'Mate, Sorry aw,a thleng nawn leh tawh ngai lo ang...' tham tuakin a ti a,ka tlanbo mai hlau niawm takin min pawm nghet zual sauha,a lungphu ri dat dat ka hrethei a,mak takin chu chuan min ti thlamuang huai in ka hre tlat bawk.

'I sual em mai...' reife ngawirenga kan mut hnuah ka ti chhuak hlawl.

'Ka hria alawm,mahse khatiang a thleng leh tawh lo ang ka tih kha' a ti supa, ka kut a la kanga, a fawp vang vang bawk.

'Kal tawh rawh...'

'Riah mai ka duh zawk..'

'Aih,kal tawh rawh..' ka inlahranga,min dang loin min kuahna a lasawn ve mai bawk.

Khum atangin ka chhuka, Light ka ona,Darian-a erawh a bawkkhup zawngin a lo mu leh tawh thung.

'Tho la...' ka ti leh a..Kan inchaina lamah khan khum a hnawk nuaih a,a Jacket chhuatah a awm bawk.

'Thil pakhat chiah,ngatinge tiang khan I awm?” a rawn inleta, a ban a khama,ka ngiahtuahna hriattum niawm takin min melh vung vung bawk.

'Darian....'

'Khawngaihin,nidangah khatianga thinrima siam che kha ka duh tawh lo..'

'Inchungah khan Emily nen ka hmu che u a...' ka aw a ri chang chang,thu loin ka ding ngar bawk.

'Chuan...?” a rawn tho a.

Min rawn pana,ka tawlh let hrat thung,mahse a rawn kal hnai zel,Bangin min lo dan takah chuan beidawng zetin ka ding a, ka thaw hak mai..A rawn kal hnaia, ka lu zawn bang a kut pahnihin a nem a, min en chhuk run bawk.

'Emily kha a lo tapa,ih,diktak chuan enthlak tum che u pawh ka ni miah lo,In kha ka enkuala..chuan...' ka hmuiah a kut a rawn daha, a nui suk bawk.Engvanga nui nge anih ka hre lo,ka thilsawiah khan nuihna tur engmah a awm ka hre hek lo.

'A tah vang khan I lo thinrim tihna mi?”

'Aih...aw..aniang..' ka ti bah nawk nawk mai.

'I hriatreng tur ka hrilh ang che,kawng tih loh chu ka kalsan tawhah ka let leh ngai lo,a chiang em?” nghet churh in a ti a, chhan mai dan tur ka hre lo.

'Ok,engpawhnise,tunah chuan ka hmaia zawhte sual deuh hamna hi a ser loh nan buaipui hmasak angai in ka hria...' ka hnar a rawn khawiha, min chhaih tih a aw a nuihzatna ri chuan a ti chiang viau bawk.

'I sual anih mai chu a...' ka ti hlaka, ka hmai a sa hat hat bawk.

Min chhang loin a rawn kun hniama, a ban lehlamin ka kawngah a rawn kuaha,amah si chetin min kuah beta,ka samah a rawn fawp vang vang bawk.

Engkim a pangngain a kal leh ta vek, diktak chuan khami zan khan keipawn ka lawm lohna sawi duh si loin ka nawr lui nasa ve tho tih ka ngaihtuaha,nuam ka ti bik lo.Ka pa leh Hazel-i hmuh leh mai inring rengin ka awm, mahse an reh leh daih lawi.Mahse, vawi tamtak ka ngaihtuah,engvangin nge khatiang zawhna atthlak kha Hazel-i khan min zawh ka la hrethiam thei chuang miah lo.

Ka phone nghawr dar darin min ti harha, peih lo zetin ka bana,February thla tir a ni tawha,khua a vawt thei bawk nen zing thawh a peihawm loh thin takzet,mahse hna kal ka ngaih avangin rei tak erawh mut theih a ni chuang lo.Ka phone ka en a,Julie a lo ni a,tun ang hunah engtak rawn sawi ang maw??

'Hello... ' ka ti a, ka puansin ka pawtkhawm sauh sauh bawk.

'I tho tawh em?”tho phang aw pawh a awm lo.Mak tak a ni,a mut rei thin vanga a chhungten an hauh nasat thin nen..

'Min rawn tiharh,ka la tho chuang lo,eng nge?” ka mit ka chhing a..

'Vawiinah hna in buai dawn em?”

'Ka hre nang, kal phawt loh te chuan..'

'Hria la ka van ti tak,inbuai ka ringa, bakah nizanah Groupah khan ka sawi thoa, I read miah lo a...' a rawn ti leha.

Ka ngaihtuaha,nizanah ka muhil hma lutuk,Darian-a a buai dawn avangin a lo leng lo a,ka mu zal mai maia, ka lo muhil tlang daih.A msg pawh dar 2 velah ka hmu chauh.

'Ka muhil hma lutuk,Gruopa luh leh rih ai chuan tihian min hrilh mai the..' ka ti a.

'Script ka ziahsak te khan min rawn biaa,vanneihthlak deuhin pakhatna anni a,lawmna neih an tuma..' a rawn ti a, a awah a phur zia a hriattheih,ka dem hauh lo.Script ziah harsat zia hre tu ka ni a,a hlawhtlinna ka lawmpui takzet.

'Wow,a va ropui ve,ka lawmpui che aw...'

'Thnx,mahse min kalpui thei dawn em?”

'Ka chiang lo e,Duati i bia em?” ka ti a.

'Um,a hman hlawl lo,ama sawi dan anih chu,Atei a lo la haw bawk si lo a..'

'Ni dawn tak, Duati chu hna lamah an buai viau mi?”

'Anih ka ring,nizanah pawh dar 7 dawnah ka haw a ti a,min kalpui la,mawh...Dar 6ah tur nia, Floriaah' ani hi kan thianho zinga naupang bik a ni lo nangin mak takin kan vaiin kan duat rawn vek,hauh lah kan hau nasa bawk,amah pawh hian a hriaa, a pangchang thei viau ziah.

'Ok,ka kal phawt anga, kan tum dawn nia..mahse, Promise lo aw..'

Office ka thlen in Dama a lo thleng tawh mial,ani leh ni lo ang takin hnaah a lo bur ngar ngar tawh bawk.

'Hey,i va kal hma ve' ka Table pan pahin ka ti a.

'Nimin khan Bossin tihtur a sawi pakhat ka theihnghilh daih lawm,eee..I hna tur pawh nizanah min rawn hrilha, Mail kha lo check the aw' a tih zawm zat.

Computer ka on a,Mail ka checka, ka chek tlak tlak mai,he hna ka thawh tirh phat atangin he thil kher hi chu nuam ka ti ngai miah lo.Mahse, kei kher min tih tir ziah thung.

'Lunch i ei dawn lo mi?” ka dawhkan tlanga rawn thut pahin Dama'n a rawn ti a.

Ka thlen hnuah ka la tho sawn leh ta miah lo,chutichung chuan a chanve pawh ka la zo chuang lo.

'Ei lo mai ang,eee,Tlai lam hi ka chhuak hma thei angem?” Julie ka hrechhuak leh chauh bawk.

'Dar engzatah nge chhuah I duh a?” a phone en pahin a ti liam puat.

'Dar 5:30 vel ni thei se..'

'Ka hre lo le, tlaiah khan Boss khan Meeting neih tur kha atia,bakah vawiin hi Meeting pangngai neih hun pawh a ni bawk hrim hrima' a ti a.Nidawn tak,Karkhatah vawikhat tal Meeting kan nei ziaha,vawiin hi a hun a ni leh tawh,engtin nge ka theihnghilh theih zawk ni!!

'Meeting hun a sawn hma theih loh mi?” beisei nei zetin ka en a.Ani hi kan Boss pakhat zawk a ni a,a bula thil sawi hian awmzia a nei viau ziah.

'Thei lo ang,aaa, ka hre lo,tinge a?”

'Kalna tur pawimawh ka neia..Sawn hma tum hram the..' ka nuih tlawna.

'I ze phakar kha chhuah hlek suh,tak takin kan Doctor duhtaka chuan khawiah nge hruai che a tum a?” a nui a,Darian-a nen kan inkawp tih an hre vek tawh.Amah lah a lo kal fo bawk.

Zanin chu ani nen a ni lo..'

'Um,a that chu...'

'Enga?” phawk zetin ka en a.

'Aih, engmah,Boss ka lo be dawn nia' a ti ta nge nge.

A sawi ang tak takin Lunch zawh hnu lawkah Meeting kan neia, ka thaw huai mai,kan Boss hian Meeting tel loh hi a duh loh zawng tak anih avangin tuman chhuanlam kan nei ngam ngai lo.

Dar 5: 30 vel chiahah Office ka chhuahsana, Darian-a a buai dawn tih ka hriat lawk avangin Msgin ka kalna tur ka hrilha, mahse engmah a rawn reply lo,a read miah lo bawk.Lunch ka ei leh ei loh kha min rawn zawta, tlai lamah tihtur a nei tih a rawn sawi bawk,enge anih erawh ka zawt lo thung..Diktak chuan hnaah a buai thina, An Hospital thar tur,karthar maia hawn tur anih avangin hmuh pawh kan inhmu khat deuh.Hna vang anih avangin sawisel erawh ka tum bau lo.

Floria leh kan Office inkar a hla hran lo a,mahse haw tlang tawh tur ka nih avangin Scooty ka keng nghal a,ka dahfel laiin Julie-in kawtah min nghak tawh tih a rawn sawia.Sana ka en a, minute 10 a la awma,ka tlai lem lo tih ka hriaa,ka hmahmawh phah lem hlei lo a.

'Enteh,Darian-a te an kal ve dawn tih i sawi si lo a...' rawn kun hnaih pahin Julie-in a ti a,phawk zetin a hawina lam ka hawi ve vat.

Darian-a leh Emily Kawngkhara lut mek ka hmuh ve takah chuan ka vawt nghal raih raih mai.Hei hi anih chiah hi anih hi,a pawimawh em avanga Msg pawh a en hman loh na chu..Hrep tak hian a..

Chapter- 11

'Enteh,kan tlai dawn ania..' ka bana rawn vawn pahin Julie-in a rawn ti a, ka bulah ding an awm tih pawh ka hre leh tawh lo.Darian-a te lam ka va hawi leha, mahse an lo awm tawh lo.

Hmanhmawh fein kan luta, mahse ka ngaihtuahnaah Darian-a te bak an lang lo,hmuh nawn leh erawh ka duh lo bur.

Rin aiin kan rei ta phian,a hlimawm viau bawk..Dar 8 dawnah Hotel kan chhuahsana,Julie-in Scooty a ken ve tho avangin min hawsana,ka Scooty dahna ka pan pheia,ka rilruah Darian-a te bawk an lo lang leha,Hotel kan awmchhung khan vawikhatmah min rawn be lo a, msg lah a read hek lo.Pawi tawp lo..

Scooty ka start dawna,a ri phurha, a nung thei lo.Plug tihmawm ka hlauh avangin ka Main standa, ka kick a, a nung thei chuang lo.Tiang hian a awm ngai lo bawk nen ka thinrim ru teuh bawk.Reife ka beih hnuah pawh a nung thei der lo.Ka rilruah Dama a lo langa, nidang ang chu nise Darian-a ka call ang,mahse tunah chuan biak chakna ka nei lo,bakah a buai lutuk..Ka ngaihtuah zawng pawn ka ner nawk thei..

'Hello..' vawikhat chauh a ring hman tihin a rawn pick nghal vat.

'Khawnge i awm?”

'Inah..i la haw lo mi?”

'Aw.Dawrpuiah ka la awm,ka Scooty hi a nung thei tlat lo a..Hawsan ngawt ka duh bawk si lo a..'

'Ka lo kal dawn mi?” a rawn ti nghal zat.

' I theih chuan...?”

'Ok,chuvangin min lo call tih ka hria alawm,ka lo kal ang..' a rawn ti nghal a,an veng atangin a hla lem lo bawka,nghah rei angai dawn lo tih ka hria.

Minute sawm vel ka nghah hnuah a lo thlenga,an thenawm hnaia Mechanic pakhat a rawn hruai tel hlauh bawk.An han en vela,englai ber nge chhia pawh ka hre ve lo,rei pawh siam loin a tha thei ta hlauh.Dama nen kan inphura, a rawn hruai zawkin test pahin ka Scooty a khalh thung.In thleng min thlaha,lut turin ka sawm ngial a, mahse a rawn kalpui in a hnial deuh tlat avangin an haw ta zawk.An kal hnuah lawmthu pawh ka hrilh mumal lo tih ka hrechhuak chauh,pawi lo,naktukah ka hrilh mai ang.Anih loh pawn msgin ni tawh mai.

Ka intifai sawk sawka, chhun lama ka Download sa,Turkish Serial en tumin khumah Laptop nen ka lawn a,hetianga awm hi nuam ka tih em em thin a ni a, Darian-a ka nuna a lo lan hnuah erawh ka ti ta meuh lo.Darian..nitak,Laptop ka dahsawna,ka phone ka en leh rih,msg engmah a awm lo,Read chu a read vek lawi.Thinrim zetin ka dahthlaa,engvangin nge tianga a awm ka hrethiam hlawl lo.

Ka entui hlawl lo,ka dah ta nge nge,ka muhil thei dawn chuang lo tih ka chiang,mahse Darian-a biak hmasak ka tum tawh lo bur.Ig lamah ka lut kual ta mai mai,mahse engmah ka enrei peih leh chuang lo.Ka thuchuak leh ta nge nge,ka Laptop bawk ka bana,hna lam kan buai avangin thla 3 dawn engmah ka ziak ta loa,tlem tal ziak ila a tha mahna..

Ka mut meuh chuan zinglam dar 2 a ri der tawh,ka beisei loh tawpin ka ziak tui ta phian,engtikah nge ka tihchhuah ang ka hre lo nangin a vawikhatnan ka ziak lawk ve ta hrim hrim chu ania.

Ka alram riin min tiharha,peih lo zetin ka bana, ka Off a tho mai loin ka bawkhup leh rih.Nizan khan ka men chhung khan Darian-an engmah a la rawn sawi chuang miah lo.Ni tak,ka phone ka bana,engmah a awm chuang lo,ka ner nawk ringawt,a tha..a duh duh chen min be lo rawhse,ka pawi ti chai lo e.

'Morning...' Office ka thlein Dama'n a lo ti a,kei aiin a kal hma ve tlat.

'Morning,i va hma ve' ka ti a, ka chair ka pana, ka thu thla hnak bawk.

'Nia,hma ve deuh,i nuam meuh na nge?” min ti a,ka en a, chik zetin min lo en ve bawk.

'Aih,nuam e...nizan ka muhil lawk lo a' ka nui lui sak bawk.

'Um,anih ka ring, i hmel a dik chiah lo,dam lo i ang' a ti leha.

'Ni lo e,ka mut kham lo anih hi..Nimin a file ka dah kha i hmu em?” ka ti a.Ka thu mara, ka chet zawngin ka taksa nat zia ka hrechhuak nghal zat.Nia, zing ka thawh hlim atang khan mak takin ka taksa a na vek.

'Um,hmu..Lawk...' a rawn tho a, min rawn pan hnaia, ka inrin hmain ka chal a rawn khawiha, mahse a kut a la let lehnghal vat.

'Enge a?”

'I khua a sik leh sik loh ka en mawle,a sik chiang bawka..'

'Naaa, ka hre lo...'

'Haw mai rawh, vawiin chu hna hmanhmawhthlak engmah a awm lo..Boss hnenah ka lo sawi mai dawn nia'

'Nimin ka haw hma tawh bawk sia..' nuam ka ti chiah lo..

'Aaah,ho lutuk,Scooty i khalh peih em?”

'Ka keng lo,ka tlan ni a ni loa'

'Ok,tho la,ka thlah mai ang che..' a ti leh zel.

'Angai lo, Taxi a tam alawm,ka haw thei,ka haw leh bawk si chuan Boss lo kal hunah a hmuh loh chein a lungawi lo ang..' ka ti a, ka ti tak tak tih hria se ka duh takzet.

'Ngaipawimawh suh,Boss chu Boss ania, kei chu Dama..hrethiam em?” a nui a, ka nui ve hak mai,Boss nen an inkar that zia tuman kan hai lo miaua,a duh anih phawt chuan ani hi chuan a nawrlui thei ziah.

In ka thlen veleh Damdawi ka ei a, Khumah ka lawn nghal a, muthilh nghal vang vang ka chak ber. Ka hrawk a na vek a,chil lem zawng pawn a na em em bawk.Vawt ka tihdan lah a vawt satliah lo,ka khur hlawk hlawk a ni ber,ka hnar a ping nghal vek bawk,ka Blanket sin lai duhkhawp loin a dang ka phawrh belha, chutichung pawn ka khur a reh hleithei lo..

Kawngkhar kik thawmah ka harha,ka thuchhuaka, room a lo thim vek,ka mu nileng chiang khawp e.Hriat loh der mai ka duh avangin che loin ka thu deuh vang vanga,mahse a rawn kik leha,tunah phei chuan kik satliah pawh ni loin a chumin a chum a ni ber tawh.Hreptak hian..tu tehlul nge mawni??!!

'Ka lo kal ….' tih sep pahin khum atangin ka chhuka.Light ka on nghal vek.Kawngkhar ka hawnga,tu nge rawn kik tu ka hmuh rualin khar leh mai tumin ka pawta,mahse ka tlai hret,a pheikhawkin a rawn dal a,a pawt kaua,a rawn inzep luta,a kalh nghal hmak bawk.

'Khawiah nge a awm?” tih pahin Room lam a pana,a sawi awmzia ka hre lo,tih mai tur hreloin a che vel ka zui ve zel bawk.

Room kawngkhar a hawnga, a luta,Blanket a thehhlim vek,a kalsawna, Curtain a pawt hawnga,a rawn let leha, chak zein min kal pela,ka um dat dat mai.Kitchenah a luta, a rawn chhuak leha, Bathroom kawngkhar a hawnga, a awmdan a mak lutuk tihbak engmah ka hrethiam lo.

'Darian...' Living Roomah ka dinga,ka ban ka phar hliai bawk.

'Khawiah nge a awm?”

'Enga? “

'Khawiah nge mi tenawmpa chu i bihruk tira?”

'Eng...tu maw? Engmah i sawi ka hrethiam lo..' ka tawng zawngin ka hrawk a thip lutuk,harsa zetin ka chil ka lem leha.

'Khawiah nge? ' a au nghek,ka phu zawk bawk.

Min rawn pan hnaia, Sakawlh a ang berin ka hria,hlau zetin ka tawlhhnung hrat ringawt.

'Khawiah maw a awm?” amah bawkin a ti leha,a aw a ring ta lo,mahse a hmelpa zet,thinrimna vanga dur khup mai chu ka en a,a lo luh tirh atang khan engmah ka hrethiam lo.

'Kal tawh la a thain ka hria..' ka sawi zawh rualin min rawn hnaih nghal ruak thung.

'Ka kal ang maw? Teuh lo' na zetin Sofa a beng dawt,ka zuang zawk lo chauh bawk.

'Enge i hriat a?” ka hrawk na hrep pawh chu a..Ka aw ka thian khauh mai.

'Nizanah khawiah nge i kal?” min rawn hnaiha,min melh chhuk run bawk.

'Ka sawi kha..'

'Tu nen?”

'Darian...'

'Chhanna ka duh..'

'Kal tawh rawh...'

'Ka duh ka hmuh hma chuan ka tawpsan ngai lo tih i hriat kha..' a aw a nem ta deuh.

'Min hrethiam rawh,hetah hian tu nge i rawn zawn ka hre lo a, mahse Emily ka ni lo ania..' ka insum hman lo.

'Emily i ni ka tih ka hre miah lo..'

'Ti lo,mahse Emily hnena i duh duh a i awm ang khan hetah chuan i awm thei lo ang'

'Nizan khan ka hmu che a,i buai lutuk a...'

'Khawiah?” a ti hmuk..

'Kan kalna Hotel a in ang anih hmel..'

'Ok,nia..Meeting ka nei..'

'A tha lawm..'

'I awih loh chuan Emily tunah ka call thei reng..'

'Ahh,i sawi dik lo a awm ngai hleinem..' ka nui lui hak bawk.

'Chutiang zawngin ka sawi lo,mahse i hriat tur chu Emily te nen hian sumdawnna pakhatah kan invest ho vek,kan inhmuh fo angai bawk ang,mahse hna chauh...'

'Um..' ka ti sep ringawt.

'Min en rawh...' ka khabeah a rawn vuana, amah en thei turin min kuai dak nghala,hawi sawn tumin ka thle dawna, mahse min vuan nghet lutuk.

'Vawiin ngatinge Office i kal loh?” a ti leh daih.

'Ka peih lo...' ka ti tawi tak ringawt.

'I dam lo tiraw?” ka chalah a rawn khawiha,ka mit ka chhing sawk thung.

'Ka tha tawh..'

'Aih, i tha miah lo...' ka kut a rawn laa,min kaia,Sofa min panpuia,thuawih zetin ka zui ve mai bawk.

A bula thut ka tuma,mahse amal chungah min pawt thu ta zawk, a awmdan danglam thu thut thin hi ka hrethiam thin lo,tun lawkah pawh thinrim em emin a awma, tunah lem min duatna bak engmah a lang leh tawh si lo.

Ka kawngah a kuaha,ka kut a hum vang vang bawk.

' Nizan ka haw dawnin khapa nen khan in inphur chhuak chiah ka hmu che a,vawiinah pawh..' a awah na tuar a la ang phian zui..

'Ka Scooty a chhiaa..'

'Keimah min call thei lo tihna mi?”

'Ih,eng lo...Emily nen khan...'

'Hrep tak hian..' a ti hluk ringawt.

'Emily nen khan ka hmu che u ka tih kha..'

'Sorry...engmah ka hrilh lo che a,nimin kha chu ka buai lutuka,bakah khapa nen khan ka hmu leh che a,ka mood a dik lo vek,tukin thlengin min be miah lo a...'min demna niawm tak a hriat tel theih bawk.

'Um..' ka ti sep ringawt.

'A pawi lo,Emily nen min hmu tih ka hre lo a..'

'Vawiin in la buai viau em?” ka ti ta zawk,a sawi kha a dik em ka hre lo a, dik lo pawh nise tunah chuan inhnial ka peih rih lo.

'A zia,phone i pick theih loh vangin ka lo kala..mahse office i kal lo an lo ti a..tunah engtin nge i awm?”

'Ka tha,mahse ka hrawk a na..'

'Damdawi enge i ei?”

Ka damdawi ei ka sawia,a bu nghut,ka chal a khawih leha,ka khua a sik leh tan tawh tih ka hria,vawt tih vangin ka khur a,ka lu a na ngut ngut bawk.Ka insum zo lo,a darah ka lu ka nghata,ka mit ka chhing vang vang bawk.

'Mu leh phawt la,thil i ei tawh em?” ka biang a rawn khawiha.

'Aih,ei lo,mahse ka ril a tam lo...' harsa zetin ka chil ka lema, ka ner nawk bawk.

'Damdawi ei hmain thil engemaw tal i ei angai..'

Engmah sawi loin a mal chung atangin chhuk ka tuma, mahse min pawm chungin a tho ta zawk,ka hnial buai peih lo law law,a nghawngah ka kuaha,ka meng peih hlawl lo,ka lu a na lutuk.

Khumah dimtein min nghata,puan min rawn sin tira, a rawn kun hniama,ka chalah a rawn fawp vang vang bawk.Atthlak zetin a chetdan chuan min fana,ka mittui a hnai kuar mai.

'Eitur ka va siam ang, i ei zawh veleh Damdawi i ei lehnghal anga, i muhil vang vang dawn nia..' a ti supa,ka chalah a rawn fawp leh zauha,a ding mara, Room kawngkhar a pana,dimtein kawngkhar a rawn nem khara,ka mit ka chhing nghal hmiah thung.A duh duh ti tehse, engmah ka ngaihtuah peih rih lo.

Tray nen a rawn let leha,eitur ka hmuh ringawt pawn ka luak a tichhuak hluah hluah.Mahse, Khumah a rawn thu khaia,ka malchungah Tray a rawn daha,Soup sat hmel zet chu ka en a,ka ner nawk mai.

'Ka ti thei tawh lo...' ka en a.Tihtham ka ei lo,ka hrawk na vangin ka lem thei meuh lo.

'Ok,a pawi lo..i ei hrim hrim kha a tha..' tray a rawn laa,a chhuahpuia,ka mu tha lehnghal than thung.

Reivakloah a rawn let leha,Damdawi ei tur leh tui a rawn keng ta thung.

'Eng Damdawi nge?” lak pahin ka ti a.

'Ei tawp phawt mai rawh,chuan naktuk zing thleng i muhil thei ang' a then suk bawk.Hnial buai loin ka laa,tui min rawn pek ka bana,Doctor a ni a, kei aiin a hrechiang zawk dawn tih ka hria,ani in tha a ti anih chuan ei mai a pawi hauh lo ang.

'Kal phawt la, kawngkhar ka kalh fel anga, ka mu ang..'

'Kal ka tum hleinem'

'Maw?”

'Khatiang dinhmunah chuan ka kalsan thei lo ang che..'

'Darian,hritlang khawsik satliah anih hi..'

'Shhh..inhnial kha chu i damthat hun atan dah ang,um...tunah chuan mu phawt ang' Khumah a rawn lawna,Blanket a rawn pawt kaua,amah si chetin min pawt hnaia,a taksa lumna in min rawn ur ham ham bawk.

Ka alarm riin min tiharha,off tumin ka ban mai dawna,mahse tuemawin ka kawngah min kuah a,min khan bet tlat...Darian..nidawn tak,nizan khan a haw ta miah lo,kei lah a sawi ang chiahin zankhuain ka harh miah lo bawk..Dimtein a ban dahsawn sak tumin ka zuk vuana,mahse a che hruta,ka awmdan ngaiin ka awm leh vat,ka rin loh deuhin amah zawk dimtein a tho a,Alarm a off a,a rawn mu leha,ka hnung lam atangin min rawn kuaha, ka nghawngah a hmui lum thur thurin a rawn nawr a,a thawk danah a muhil lehnghal a ang viau bawk.

Ka harh leh chuan a kiaua inbengkang chungin min lo thlir vung vung tawh,a sam tlemin a thur deuha,a khabe hmul a to siar siar bawk..

'Good ,morning...' ka chala rawn fawh pahin a ti sup bawk.

'Morning..i harhna a rei tawh em?”

'Aih,mahse ka hmuh chak ber ka hmu hman tho..'

'Engmaw?” hrethiam lo zetin ka ti a.

'Engtin nge i muthilh laiin i hmel a awm ang tih ka ngaihtuah thina,ka dream ang chiah...'

'I va ho tak...' ka biang a sa nghal hat hat bawk.

'I zak tihna maw? Naupangchhia reuh lutuk,ok..eng nge i an?”

'Ka tha in ka hria...' ka ti a,nia..ka tha tak tak,ka hrawk thip leh ka hnar ping a zia hawk.

'Tha lutuk...mahse, hna kal suh ang che..'

'Maw?”

'I kal dawn lo...'

'Darian...'

'A tan leh dawn e..Inhnial hi a nuam viau tihna a ni em?”

'Kei chauh ka ni lo,nangman i tan ziah anih kha..'

'Ok..ok,ka tlawm,mahse i kal chuang lo ang..' a mit a siai zauh bawk.

'Nilenga in a awm ka peih lo,bakah hna ka ngah lutuk'

'Bang mai rawh..'

'Teuh lo....' ka ti ngheka, thawh tumin ka puansin ka tlawhhlima, mahse ka thawh hmain ka kawngah a rawn kuaha, hneh zetin min pawt let nawk,ka rak that bawk.

'Tihian awm nilen mai ka duh...ka biang a kutzungpuiin a tuai hauh hauh bawk.

'Hna i tlai ang,tho tawh rawh...' ka ti sepa, mahse keipawn a bula nilenga awm ka duh,duh satliah mai pawh ka ni lo...Ka thlahlel ngawih ngawih,rei tak la ni lo mahse amah hi keimah chanve a lo ni reng tawh tih ka chiang lutuk,mahse ka hriattir ngai lo ang.

'Hna chuan min la nghak thei,mahse kal tura min duh chuan ka kal ang..'

'Ka hre lo...'

'Aw nge aih' ka mitah tak a en run bawk.

'Kal turin ka duh che,mahse ka duh lo tho bawk che..' ka thaw hak mai.

'Okk,ka kal lo ang..' a rawn kun hniama,a tihtum ka hria,dimtein ka hmui a rawn fawpa,ka chhanglet mai lo..Ngengawl zawkin a rawn fawp leha,ka chhang let ve ta nge nge,ka chhan let takah chuan a rum hawk bawk.

Nilengin khawiahmah kan chhuak ta lo.Eitur kan pahnihin kan siama,kan eizawh hnuah Movie kan en leha,a chang leh kan muhil a..Mahse, Vawikhatmah sex lam hawiin min khawih lo thung..

'Zampui,kha kha lo la lawk mai teh' Darian-a nuin min ti a..Ka dinna bula Bakcheh a kawk zauh bawk.

Naktuk hi Darian-a te Hospital hawn hun a ni tawha, inbuatsaihna a vawrtawp a thleng a ni ber,keipawh chawhma lam chauh hna ka kala,Darian-an Driver a rawn tira,chawhnu lam chu kan buai ta char char,kan inkawp tih zep theih a ni tawh lo.Darian-a lahin a zep hek lo.Fahrah ka nih avanga ka lo hlauhthawn angin engmah min duh lohna an tilang miah lo..

'Khawnge Mama hi?” Darian-a u in a rawn ti a.

'Ka hre miah lo..'

'Van buaithlak tak,ka calla, a pick thei miah lo a..Pawi lo,engtik nge haw i tum?” a tih zawm leha, Dinning table a Grape an dah a hmawh zauh bawk.

'Kal mai ka duh tawh a'

'Um,mahse Mama pawh kan hmu bawk si lo a..' a ti leh a.Darian-a ang bawkin a liana, Mizo hmeichiaah chuan a sang pawl a ni ngei ang,a hmeltha hluak lo nangin a hmel a zahawm a,mi hneh theihna riau a nei tlat bawk.A pasal te lah an chhungkaw milpui bawk,mi hlun chhungkua ami a ni a,mo ang pawn a awm meuh lo.Fanu a ang mah zawk.

'Hetah law in lo awm? U min zawng ami?” rawn luh pahin Darian-an a rawn ti a.A rawn kal hnai mek chu ka en a,tunhnai an buai bawk nen a hmel a lang cher deuha,a mu tha lo bawk aniang chau hmel a pu bawk.

'Aw,ka pu in a be duh che..'

'Ok,ka lo be dawn nia..Eng nge i lo tih ve thunga?”min rawn pan hnaia,a ban pahnihin ka thutna sir tawn tawn a rawn nem a,a hmelpa zetah chuan min duatna a lang thei bawk.

'Eng tehvak mah..' a u a awm ve renga, ka duh aiin min hnaih mah mah,ka mitmeiin kalsawn turin ka ti a, a kun a, a nui hawk mai,mahse a kalsawn ta tho.Ka thaw huai mai.Ruth-i ka melh zawka, a lo nui var var thung.

'Biak theihnghilh suh aw,buaina a chhuak mai ang,naupang kan ngaihven lawk..' a ban a vai zauh a,kan chhan let hmain Living room lam a pan zui chu a nider.

'I ti zahthlak thei em mai...' a chhuah fel veleh ka ti hlak..Min rawn en a.

'Zahthlak,eng lai ber maw?” a nui suk duh lek..Tihngaihna hre loin ngeizetin ka melh a, ka lei ka chhuah khum zauh bawk.

'Kal ka duh tawh a...'

'Ok,ka thlah dawn che nia, mahse chumi hmain ka pu biak hmasak phawt angai,a mizia i hriat kha..' a mit a siai zauh bawk.

'Um,pawi lo..'

'Kan be lawk ang..' tih pahin a tho a, a phone zawngin a in dapa,a hmu mai lo.

'Roomah ka charge daih tak,ka han chho lawk ang' a ti a, ka bu nghauh ringawt.

Ka bag ka laa,pawnlam ka pana,Living room lamah an la awm laih laih,tuman ka chhuak lai pawh min hmu lo.Pawn a thir thutthleng then theiah ka thu a,khua a thim vek tawh,Van lam ka thlir dauh dauh a,ka nun hman dan ka ngaihtuah let a,Darian-a ka tawn hnuah engkim a danglam vek tih ka hria.Mahse, keimaha in enkawl thei,lu zo tak thin kha,amah ka tawn hnuah ka derdep ta sawt tih erawh ka pawm angai thung..Ka phone a rawn nghawr dar dar,tu nge anih ka hmuh rualin ka nui sak bawk.

'Hello...Sen..' ka ti a.Ani hi kan Office a ka thawhpuiah chuan Dama nen ka kawm nasat ber anni a,a fela, a rintlak em em bawk.

'Khawiah nge i awm?”

'Hei,angaiah..Darian-a te Inah..'

'Eee,chu chu nia ka lo call che, an Inbul chiahah hian pu hna kan buaipui lawka,kan haw tawh dawna,Dama hian min thlah nghal a tum tho a' a rawn ti ta duah..

'Min rawn sawm tihna mi?”

'Um,ni deuh tho.Scooty kha i keng si lo a,i lo haw ve nghal duh takin..'

'Duh tho mai,Darian-a te hi an buai lutuka,Dama chu a hmanhmawh viau em?”

“Hmanhmawh over lo e,i hman nghal chuan a tha hlei hleia'a rawn ti leha.

'Um,Darian-a kan zawt lawk ang aw..' ka phone ka Off a, inchhung lam pan tumin ka tho a, mahse ka hnungah Darian-a a lo ding reng tawh,a lo kal lai ka hre miah lo thung.Phul chung anih vangin thawm a nei lo a ni mahna..

'Rawn zawn che ka lo tuma,min thlah lo mai rawh,Dama te kha sawlai lawkah sawn hna thilah an lo kala...'a ban vaiin ka thusawi lai min tihtawpsak hmiah.

'Tu maw?” nichin lawka min duatna hmel kha a bo vek,tunah chuan pawisak nei lo hmel a lang ta thung.

'Dama te,Seni nen an nia..'

'Ok,i kal lo ang..'

'Inbuai sia,an ruala haw theih kha chuan a awlsam ka ti mawle..'

'A tha lawm...' lehlawi a..Mahse a hmela thinrimna erawh a la ngai reng,engvanga thinrim nge anih ka hre bau lo thung.

'Thil dik lo a awm em?”

'Aih,kal tawh rawh..Ka lo thlah lo mai ang che..' a ban a vai zauha, a kekawr ipte a zena, Inchhung lam a pan zui daih bawk.Eng chu a hria ni maw? Thil tha lo a awm zawk nge mawni?

In ka thlen hnuah ka thleng tawh tih msg ka thawna, a reply lo..Ka rilru a nuam thei thlawt lo,ka call ta nge nge,a pick dawn lo emaw ka ti hman.

'Hello..' ka phone ka lasawna, ka melh nghek ringawt.

'In la buai em?”

'Ka mu tawh..' biakna chin chiah bak engmah sawi belh tumna a nei eih lo emawni?

'Ok,enteh,engemaw tihsual ka nei em?”

'Aih..ngatinge?”

'Ka hre chiah lo,mahse i lungawi lo in ka hria..'

'Aih,engmah chutiang a awm lo..Mangtha phawt..'

'Darian...'

'Um..' sawi leh mai tur ka hre lo.

'Tihdik loh ka neih chuan...?”

'Chutiang a awm lo ka tih kha,chuan,naktuk kha ka rawn lam hman dawn lo chea,Zuala a rawn kal ang'

'Ok...'

'Mangtha...'

Beidawng zetin phone ka thlehthla thaka,enge anih ka hre lo,mahse, dik lo a awm..

Dar 11ah Officeah Zuala'n min rawn lama,Darian-a te in lama kal tawh loin an Hospital lam kan pan nghala,kan thlen chuan mi an lo awm teuh tawh,Aizawl daia awm a ni a, Damdawiin tura atir atanga buatsaih a ni bawka, Parking a thaa,a hmun engkim duhthusam a ni tawp mai..Kan thlen hnu lawkah Atei leh Julie an lo thleng ve leha,Duati erawh a zin lai a ni thung..

'Khawnge Darian-a hi?” Julie-in a ti a,a hawi kual vat vat bawk.

'Vawiin chu a buai lehzual a,Zuala zawkin min lo lama..'

'Ehh,hetiang anga Caring hi nei ve dawn ila chuan ka neih zawng zawng ka dahkham ngam zan..' a nui a, ka nui ve hak ringawt.

'Lawk,saw saw Darian-a chu ni lo mi?” a kawhna lam ka hawia,ka chil ka lem khalh ringawt.

A car bulah a dinga, a Car Front seat atangin Emily a rawn chhuk meka, a nghak anih hmel..Muangchangin ka hawileta,harsa zetin ka nui lui sak bawk..

Chapter- 12

Min hruai hman lo a, mahse Emily erawh a hruai hman thung,a hma khan hna vang a ti ngei,mahse he Damdawiiah hi chuan Darian-a te Cousin ho bak an inrawlh miah lo tih ka hria...Emily lah a cousin a ni lo hulhual bawk..

'Zampui, i tha em?” ka hmai bulah Atei-in a kut a rawn vaia, ka phu zawk..

'Tha e,ngatinge?”

'I hmai a dang vek alawm,saw,an tan dawn ania,phei ang u..' a ti leh a,ka bu nghauha,engmah sawi loin an hnungah ka zuia, ka awmdan a dik lo..Mahse, tihlan erawh ka tum lo.

Hawnna Programme hman chhung zawng vawikhatmah ka bul hnaiah Darian-a a awm lo,awm turin ka duh em ka hre hek lo.Emily leh Seni an awm duna,Seni theuh theuh hi an lo in ang lo thei ngawt mai tih ka ngaihtuaha,Office a ka thawhpui a fel em em a,Emily thiannu Seni ve thung hi chu engtiklai pawn min hmuh veleh min tihnat a chak ni berin ka hria.

'Zampui,helamah i lo awm daih elaw?” Muankima'n a rawn ti a.Kan thutna bula chair a rawn pawtchhuaka, a thu ve nghal bawk.

'Um,innu ka hmu lo.A lo kal ve lo mi?” ka ti a.

'Kal lo,nei thei reng dinhmunah kan ding roha..' a nui vur vur bawk.

'Ni dawn tak,amah a tha zel em?” ka ti ve leha.

'Aw, tha e..Ate,in tha maw?” tih pahin Atei a en a.

Darian-a nen kan inkawp hnuah Atei te dawrah an thian dangte nen Dine out turin kan kal tawha,vawikhat chauh a la ni nangin an inhre pawh nghal vek.

'Vawiin chu Darian-a a buai zar zar hle mai,biak pawh kan la inbe mumal lo..zan lam Party kal i tum em?” dawhkan tlang kik rih kauh kauh pahin a ti a,kei erawh a sawi awmzia ka man mai lo..

'Party...ka man chiah lo..' nui chungin ka en a,a hmel buai deuh nak chu a rei lo hle nangin ka hmu hman tho.

'Darian-an a la hrilh lo che anih ka ring...'

'Aw, hrilh lo,i lo hrilh chuan a lawmawm' ka hnung lam atangin Darian-a awin a rawn ti a,Muankima a hawi vat,kei erawh hawi let lo turin ka insum tang tang thung.

Ka veilama thutna awl awmah a rawn thu thlaa,a necktie a pawt thawla,a kamiz hak ban a thlep chho bawk.A hmel nelawm lo zet chu ka melh zawka, hriatthiam har zetin min lo melh run thung,ka hawisawn nghal vat.Engtin nge tiang khawpa hmel nelawm lo hi Doctor tha anih ka hrethiam lo thin.

'Darian,kal mai ka duh..' Muankima'n thawh pahin a ti a.

'Um,thil i ei tawh em?”Muankima a en a.

'Ei e,Party lah kha ka rawn tel theih hmel loh,kan nu hi kal chhuahsan loh a him rih a' a nui a.

'A tha lawm,kal ve thei la chu a tha..Mahse a pawi lo..' a ti leh nghuta,hahdam hmel zetin hnunglam a ngheng ur ur bawk.

'Nia,nangpawh tiang hun hi i la nei ve dawn tho alawm,tiraw Zampui' ka darah a rawn khawih zauha, a nui leh hawk hawk bawk,za lo zetin ka then lui sak ringawt.

'Muankima khan a hrilh che in ka hria,nizan khan ka buai deuha' Muankima kal hnuah a ti supa.

'A pawi lo..kal mai keini pawn kan duh a..' Atei ka en a, kal ka duh tih hrethiam se ka ti ngawih ngawih.Tunah rih hi chuan Darian-a hnaih chakna ka nei miah lo.

'Ka hman tep,ka thlah dawn che nia...'

'Angai lo,inbuai bawk si..Ate-in Motor a kenga, kal kawina tur pawh kan neia'

'Nia,pawi i tih loh chuan kalna tur kan lo neia' Atei'n a rawn ti ta hlauh,ka thaw huai mai.

'A tha lawm,Ate,zanin kha Party a awm dawna..in lo kal thei ang chu tiraw?” Atei a en a.Atei'n min rawn en ve thung,rang zetin ka lu ka thing nawk mai.

'Kal theih pawh ka ring lo,kan kal tumna hi zan lam thleng awh tur ania,Dear,engmah i sawi lawk si lo a..' min rawn en a, a mit a siai zauh bawk.

'Sorry,Party lam engmah ka lo ngaihtuah tawh lo a..' ka chil ka lem khalh mai.

'Ok,a pawi lo..'thawh pahin Darian-an a ti a..Min rawn en a.

'Zanah ka rawn be dawn che nia..' a ti supa, a kekawr ipte a zena,midang fin turin a kal zui nghal daih..Mak takin min rawn biak ka ring miah lo.

Juile titi siam siam chu ka ngaithla liam vel mai mai,kan tlanpelh lam thlirin pawn lam ka hawi dauh dauha, engmah ka hmu lem hlei lo a..Vawiin hi engmah beisei lawk angin a awm lo,nimin atang khan enge ka tihsual ka hre lo,engvangin nge Darian-a kha a danglam vek ka hre lo lehzual..

'Julie,kan Drop hmasa dawn che mi?” Atei'n a ti a.

'Pawi miah lo..eee,mahse Darian-a hnenah khan kalna tur kan nei i ti sia' a ti a.Atei ka melh ringawt.

'Nei e..mahse ka mimal thil ni loin Zampuii ka pain a be duha..'

'Eeee,nih chu,mahse zan party kha kal ka chak asin le...' a ti leha.

'I kal loh zan animai,Zampuii kan inah chaw a ei nghal dawn sia,i lo ei ve nghal mai dawn mi?” a ti a,ka ei nghal dawn tih engmah kan sawi lawk lo,mahse min biak a duh anih loh pawn Julie-i hriat ve atan a duh loh thil a awm tihna nimai.

'Aih,ei lo ang..min Drop ula...zanah keipawh tihtur ka nei'a ti leh a,ka thaw hak ringawt.

Julie kan thlaha,kan tlanchhuah leh hmain ngaihtuahna thar ka nei zawk.

'Inah min drop mai teh,mut hahdam ka mamawh in ka hria' ka ti a,min en vang vanga, min en danah min khawngaih a ang viau.

'Ook,tunah chuan engmah zawh che ka tum lo,mahse nangmaha awm turin i tha tawk em tih ka ngaihtuaha” a ti a,ka thle bak mai.

'Ka tha lutuk,mut hahchawlh ka mamawh,chuan,min chhan vangin ka lawm ania' ka ti a.Ka nui lui sak bawk.

'Ka hrechiang che a,min mamawh tih ka hria alawm..tunah chuan Inah ka thlah che anga, mahse thil atthlak engmah ti suh ang che'

'Tehreng mai,min ring rawh,Engmah thil tha lo ka ti lo ang'

In ka thlen veleh ka inphihfai sawk sawka,engmah ka ei peih ka rin loh avangin eitur siam loin khum lam ka pana,tunah chuan inngaihtuah ka mamawh.Ka phone ka off a,side tableah ka daha, muthilh tumin ka mit ka chhing nghal hmiah.

Party maw? Muankima khan min hrilh lo se ani khan min hrilh kher angem? Min hrilh lo tawp ang,engvangin nge khatiang in Darian-an min tih? Ahma khan min zahpui ngai lo a, mahse vawiinah min zahpui thar leh ta tihna a ni mai em? Ka tho ta nge nge...Ka kalsan ang,tunah hian ka kalsan anih chuan ka tan a tha ber,ka nat lutuk hmaa ka kal anih chuan keima tan pawh a tha zawk,Emily nen ngaihzawng intawm ka duh hek lo.

Sana ka ena,khua a thim hnai tawh,tumah an lo kal ka ring lo bawka,kekawrbul tawite ka haa,t-shirt lian hnek hnawk ka ha bawk,Chaw pangngai ei chakna ka nei lo,Pasta ka siama,ka serial film download thar en chungin ka ei a,hei hi ka nih dan thin kha a ni a, tumah ka mamawh lo,keimah leh keimah ka in enkawl thei,Darian-a nen kan inzui vang maiin ka nihn ka lo theihnghilh hman a lo ni..

Ka beisei loh zetin ka entui ta phian,kawngkhar kik riah ka phu zawk..Sana ka ena, dar 7 a pel va tawh.Tu nge tun ang hunah lo kal ang? Darian..teuh lo..Party na lamah Emily nen an buai viau tawh ang chu.

Kawngkhar ka pana,ka hawn hmain tu nge anih ka bih hmasa te te,Dama a lo ni a, ka thaw huai mai.Kawngkhar ka hawnga,min hmuh rualin sa mitko a ti sang ak mai.

'Lo lut rawh..' ka ti a, min rawn zui luta, kei erawh Roomah ka luta, thatchhe puan ka va bih leh rih.

Ka chhuah leh chuan living roomah a lo thu fel than tawh,amah ep zawngin ka thu thla ve a.

'Eng nge i lo tih dawn a?” ka ti a,ka Laptop ka malchungah ka dah lehnghal zat bawk.

'I va han chiang lo tak,nula inah tlangval an kal chuan eng nge an tih vak ang?' a nui hawk hawk.

'Naaa, lutuk che hian a..kei te chu Tlangval ka nia lawm..' ka nui ve a..a nui nasa zual sauh thung.

'Darian-a hian a vanneihna hi a hmu thiam lo anih chuan a a let tawp aniang' thutak zetin a ti leha,ka nui lui hak nangin ani erawh chuan thutak zetin min en thung.

'I ninawm em maia,thingpui i in duh em?” ka ti a.

'Tehreng mai,chu chu lawm ka lo kal chhan...' Dama pangngai kha a ni leh tawh.

Dar 10 rik dawnah a haw ta chauh,Bike dahna thleng ka thlah chhoa,a hlim reng mai hi a bula awm a nuam thin,sas nghet a neia,mahse tun hnaiah an inkar a tha vak bik lo a,chuvangin kan inpawh zual in ka hre bawk.

'I phone en teh' Julie-in min rawn ti a, ka chhan let hmain a dah leh daih.Eng chu a hria nimaw?

Lunch ei hma chu hna lamah kan buai ta ngar ngar,thlen hlim atangin thildang engmah ngaihtuahna hun a awm lo,a pawi ka ti lo.Darian-a ngaihtuahna hun ka nei lo a ka lawm zawk.

Ka plate ka nawrsawn a,ka phone ka en a,mahse ka hmuh rualin ka nuam lo nghal nghulh..Darian-a leh Emily photo a lo ni a, nizan lama an party na a mi tih ka hrethei mai bawk.Ig lamah ka lut nghal vat,Darian-an engmah a post lo,mahse Emily erawhin a post nual..Caption hrep pawh chu a..Nizan khan ka rinlawk ang ngeiin min rawn be ta miah lo,keipawn biak ka tum bik hek lo,tunah chuan kan tawp ta tak tak tih ka pawm angai..

'I tha em?” Office ka lut veleh Dama'n min lo ti a, ka bu nghauh ringawt.Ka chair ka pana,ka purse ka dahfela, hna khawih tumin Laptop ka On a, mahse ka khawih hmain Dama'n a rawn chawisawn daih..

'Eng nge a?” ka tum aiin ka aw a chang hret.

'I va kalna lamah dik lo a awm em?” chik zetin min melh en a.

'Aih,awm nang...khaw maw Laptop kha' tih pahin ka bana.

'I tawngchhuak leh i hmel a inmil miah lo ania...' a ti leh a,Laptop Seni Tableah a dah phei ta deuh deuh.

'Khawngaihin,hna ka ngah ania...' ka tho a,Seni dawhkan lam ka pana,ka mood leh infiamkual a inmil lo..

'Ok,Sorry,buaina nei i ang em a..' a ti a, nuam tih loh hmel zetin a thutna lam a pana.

'Engmah chutiang a awm lo..hna ka ngah lutuk hi ka buai anih hi..' ka nui lui hram,ani erawh min en loin a hmaa Computer a en daih bawk.

Hna ka thawh mawlh mawlh laiin ka phone a rawn ri a,Duati a lo ni a, henu hi karkhat aia tam ka hmu tawh lo.

'Hey,i va reh ve...' Hello pawh ka ti lo..

'Nia, hei in Office kawtah ka awma, i haw hman dawn tawh em?' a rawn ti lar lar.

'Hman tep, lo lut la,kan haw rual dawn nia' ka ti a.

'Ok,chu chu nia..ka lo lut ang...' a ti a.

Duati nen kan inphur hawa,nidang ang bawkin a tawng leh siam siam mai,ani hi chu tlemin kan thianhoah a thu tak deuh ber a ni a,thil a ti mai mai lo viau ziah..

'Chaw lo ei la,ka thlah haw mai ang che' ka ti a..A lo duh ve mai bawk.

Eirawng kan bawl duna,an zinna lam chanchin a sawia, a nui leh hak hak thina,a hna hi a hahthlak a,thuruk tamtak zep ngai a nei bawk nen a chang chuan ka dinhmun aia tha ni mahse ka khawngaih fo tho mai.

'Enteh,hmana ka sawi kha i la hria em?” chawei laiin a ti hliai.

'Eng ber? i sawi hnem e' ka nui a..

'Jared-a case tih vel kha..' ka beng a verh zak mai.

'Um,hria,ngatinge?” ngaihven lo niawm takin ka ti liam puat.

'Engmah tharthawh leh chu a awm lo a,mahse thilmak deuh,Darian-a nen hian inzawmna an nei niin ka hria...' ka insum hman lo,ka thil ei lai ka haka, ka khuh bawrh bawrh mai..

'Ngatinge?” tui min rawn pek pahin a ti a,ka in hmasa te te.

'Ka thil ei ka hak'' ka khuh leh rih,a plate a nawrsawna,uluk fein min en a.

'Darian-a nen hian an inkawm nasa lutuk an ti a,mahse khatiang thil velah khan an inbat buaia,Darian-a hian a support lo lutuk an ti a, bakah kha hmeichhia kha Jared-a bialnu a ni nangin Darian-a nen hian sawi a awm bawk...' a ti ta duah,ka thaw hleithei lo..

'Chuan..?” ka ti thei hram..

' Darian-a thiannu,a Best hi ania,mahse Jared-a kha Darian-a nen pawh inkawmngeih lutuk anni bawka..Khatiang boruak a awm hnu khan Jared-a nen hian an in mihran hmiah an ti a..' a ti leha,kha huana ka mipa hmuh,sang leh bawrchhawr tak,a hmel hriat har khawpa inzuah buk kha Jared-a chu a ni ngei ang,mahse engtin nge Darian-a nen an chezia engkim mai hi a in an theih?

'I tha em?” ka hmai bulah a kut a rawn vaia, ka phu zawk bawk.

'Aw, tha e..tlemin min thawng ve a..' harsa zetin ka ner sak bawk.

'Nia, ka ring alawm.Mahse,engmah hi a chiang lo a..Amah Darian-a leh Jared-a hian an hrechiang ber ang' a ti leh a,tawngkaa chhang loin ka bu nghat ringawt,tawng dawn pawh ni ila sawi tur ka hre kher pawn ka ring lo.

'Tunlai Darian-a nen intha vak lo mi?”

'Ka hre lo...' ka thle bak,diktak chuan ka hre lo tak tak..

'Nimin khan kan Office a mi pakhatin a sawia,Emily nen an inzui leh zauh zauh tawh a ti a...' a ti leh a.

'Ka hre lo,enge dik lo ka hre lo a, mahse kan inbe lo ve tawp'

'A van mak,chutiang mai maia khawsa chi anih ka rin loh nen' a ti hap..

'Ka hrethiam bik lo..mahse,kan in mil lo niin ka hria'

'Aih,teuh lo,in inmil lutuk' rang zetin a ti a,ka then nak ringawt.

Ka mu meng kar mai,engmah ka ngaihtuah mumal thei lo,Darian-a ka mitthlaah a lo langa, huana ka hmuh pa kha a lo lang leha,Darian-a ai chuan a cher zawk maithei,mahse thil tamtakah an chetzia a in ang em em kha thil mak tawpkhawk a ni thung.An aw a in an leh an loh hre turin huana mi kha a tawng tlem lulai lutuk,a aw pawh ka hre chhuak mai thei tawh lo.Ni lo,Darian-a leh Jared-a engtin nge mipakhat annih theih ang? A hma ang kha chu nise ka zawt thei ang,mahse tunah chuan biak takngial pawh kan inbe ngai loa,ka awm ve leh awm ve loh hre lo ang maiin a khawsa bawk si..

Thlakhat zet kan inbe ta miah lo,biak hmasak tumna ka nei hek lo.Min mamawh lo tu mamawh hi ka tum bau lo,mahse ka tah muthilh tum a tam lutuk,Officeah midang bulah hlim awm taka khawsak a harsa lo,mahse,In ka thlen hnuah,keimah chauha ka hun ka hman veleh Darian-a bawk ka ngaihtuah lo thei thin lo..Thla rei lote chhung khan amahah ka lo in nghat nasa hman lutuka,a tel lo a khawsak leh tum chu thil rapthlak a ni tawp mai.Mahse, ka tuarchhuak em em ang..

Ka phone riin ka ngaihtuahna a la peng ta hram,ka bana,min rawn call tu ka ena,ka mengphar ak mai..Muankima...Eng vanga min lo call tak ni ang maw?

'Hello...'

'Zampui,keimah MKA..' zangkhai vahin a rawn ti a..

'Um,enge ni ta hlawla?”

'Naute kan neia,Mipa ania,i rawn en har kan ti khawp maia..' ka mit ka chhinga, Darian-a nen chuan la inzui ila ka kal daih tawh ang..

'Sorry...hna lamah kan buai ve deuh alawm,ka lo kal ang..Inah nge Damdawiinah in la awm?”

'Niminah kan haw tawh..'

'Um,an tha ve ve em?'

'Tha e..mahse a tir lamah kan nu hi a chiang vak lo a, chuvangin kan awm rei mai mai' a ti leha,ka ngaihtuaha,kan inhmuh hnuhnun ber khan nei mai thei anni tawh a ti kha ania,thla khat aiin a tam tawh..

Office bul lawka naute mamawh zawrhnaah kentur ka leia.A chhan ka hriat si lohin Muankima te ina mahni a kal ka hreh riau,mahse tu nge ka hruai ang? Atei a zin lai a ni a, Julie lah ka duh bau lo.Duati lah Court lamah an buai nasa dawn tih nizanah a sawi lawk vek..

Min hmuh veleh an lo ri nghal chul mai,an Inah hian Darian-a nen vawi tam kan kal hmana,fapa mal a ni a, a nu leh pa an fel bawk nen inthlahrun na tur a awm lem lo.An naute lah a tha em em bawk nen ka lawmpui takzet.

'Thil ka zawt ang che ka tia...' Muankima chhuah veleh annu in a ti a.

'Um...min zawt la' zangkhai thei ang berin ka ti a,ka naute pawm ka pawm tha pah bawk.

'Darian-a awmdan hi i hria em ?' phawk zetin ka en a.

'Maw? i sawi awmzia ka man chiah lo...' ka ti a..

'In inthen leh then loh lam kha chu sawi ka tum lo a,mahse Darian-a hi Hospital an hawn hnuah thla khat dawn hna a chawl tawha..' ka ngaihtuahna hriat tum niawm takin ka mitah tak a en ran bawk.

'Chutiang ka hre miah lo.Ngatinge a?” Pangngai thei ang berin ka ti a.

'Ka hre bik lo,kan pain hmanni khan a sawia, I lo kal har ka tih vangin ka zawta, in inthen anih a rin thu vel a sawia..chuan,Darian-a zin bo thu vel te...' a ti leh duah.Engmah ka hre lo tih khum nghek ka chak..

'Engmah ka hre miah lo,hna thilah mi a zin a?' a langah chuan ka ti ta zawk.

'Aih..huanah a awm char char a ti a' ta deuh deuh chuan a..

'Anih chu mawle...' ka ti sep ringawt,engemaw tak chu Darian-a lam min zawt ang tih ka ring lawk saa,mahse tiang lam zawng chu ka beisei lo,..

'In inthen chhan ka zawt thei che angem?” a ti ta nge nge.

'Thei e,mahse i duh ang chhanna ka pe thei lo ang che tih ka hlau khawp mai..'

'OK,a harsat chuan min chhang duh suh,ka inrawlhna tur a ni lo ania' inthlahrun hmel fein a ti leha, a rilru tihnawm nan ka nui lui var var thung.

'Chutiang lam a ni lo,ih...eng lo ania, diktak chuan engvanga inthen nge kan nih kei pawn ka hre bik lo..'

'Maw?” mak tih hmel zet hian a ti hau mai..

'Um,kan inbe lo tawp..Tunah chuan Emily nen an inzui leh tawha,hunawl hnawhkhahna atan min hmang maiah ka ngai..' ka then saka,ka thiante bulah pawh ka sawi loh ka sawichhuaka,ka sawisual em ka hre hek lo, mahse ka sawi zawng pawh khan ka chhungril a na vawng vawng thung.

'Chutiang a ni lo ang,Darian-an a lo hruai hmasak ber che atang khan a duh zia che ka hmu nghal vek..'

'Ni lo,reitak a lo kawp tawh kha chu a thlah thei lo ang,mahse ka haw miah lo..' ka ti leh a.

'Ka hre lo le,hemi kawngah kher hi chuan ka hnial tlat dawn che,Darian-a hi ka hrechianga,kan pa thianpa ber a ni a, mi rilru nghet leh luhlul lutuk a ni a, engmah a ti mai mai ngai lo,chu ai chuan enge harsatna a neih i hriatpui zawk em?” a ti leh duah..

'Aih,engmah chutiang lam ka lo ngaihtuah lo..'

'A biak loh hnuah che i be tawh em?”

'Aih...'

'Huizzz,amah ang bawka Luhlul a tawng che anih hmel.Thil pakhat ka ngen ang che, vawikhat tal biak pawh tum teh...' ngenna nen min ena,ka bu ta nge nge.Mahse, thil pakhat hriatchhuah ka nei..

'Thil ka zawt duh che..' ka ti a.

'Tehreng...' a ti awlsam mai bawk.

'Jared-a hi i hrechiang ve tho em?” a hmelah danglam a awm leh awm loh ka ena, engmah danglam a awm lo.

'Jared...hmanna lar deuh kha ni em i sawi tum?” a ti a, ka bu nghauh ringawt..

'Hrechiang animai ang chu..Kan pa leh Darian-a te nen hian an inzui nasaa,mahse kan pa ai chuan Darian-a a close zawk..eng lai ber nge i hriat duh?” a ti leh a..

'Tunah engtin nge a khawsak tak ka ti mawle..'

'Chu erawh Darian-a zawt la a thain ka ring..Pawi ka ti lutuk..' nuam lo tih hmel zetin a nui sak bawk.

Huanh khan kal leh ka duh,ka hmuh pa kha hmuh leh ngei ngei ka duh,Darian-a leh Jared-ah hian enge thil inphum ru ka hre duh,ka ngaihtuah nasa lutuk a, ka a mai dawnin ka hre hial bawk.

Ka hna ka zawm tirh atanga a vawikhatnan damlohna chhuanlama hmangin chawlh ka la ta nge nge,Duati hnenah ka kalna tur hrilh ka tum zeta, mahse ka thulh leh,riaka kal tur pawh ka ni lo a, bakah anni an kal ngai chuang lo a, hrilh kher khan thil a pawi zo vek thei,a hma khan min ringhlel niin ka hre bawk nen,sawi loh ka duh leh ta zawk.Bakah an huanah ni loin ka kal tumna zawk lah TLAU ho huan a ni bawk.

Ka kal hmasaka ka Scooty dahnaah bawk Scooty ka dah leha,an mahni huan peng atang kha chuan kal mah ila ka lut thei dawn lo tih ka hria,ka kal hmasak khan Gate rinawm zia ka hmu vek tawha,ka la theihnghilh lo..

Phul hmunah ka chuang chhuak leh ta hlawl,engkim ala ngai vek,thal lai a ni a,ni a sa hle tih loh chu danglam a la awm lo,ka hawikuala,rul ka hmuh mai ka hlau a ni ber, mahse chutiang lam engmah hmuh ka nei lo..Thawm dim thei ang berin phul hmun ka paltlanga,ahmaa min luhpuina thinghmunah ka lut pheia,kawng a awm lo..kan kal hmasak kha chuan kha mihring nelawm lo zet khan min kai chungin min kalpuia, kawngbo palh hlauhna pawh nei hman loin huanah khan min hruai lut anih kha..

Ka chuang chhuak ta hlawl,ka thaw huai bawk.Mahse, tuna ka chhuahna hi chu a hmaa ka chhuahna chhaklam a ni ta thung,kal mai loin ka hmalam hmun nawm hmel zet chu ka thlira, ka kal hmasak zawka Jeep ka hmuh kha a awm ta lo tih mai loh chu engmah a la danglam lo.

Minung awm lo niawm takin a reh vawng vawng,Pangpar an vul chuka,thlam thlanga Terraceah vaimim niawm tak an chinga, enge hmuh ka tum chiah ka inzawta,Jared-a nge Darian-a zawk? Lo awm ve ve emaw tu emaw zawk zawk lo awm ta se enge ka sawi ang? Mahse, an awm lo ve ve thei a,an awm ve ve thei bawk..

Thing hlanga sak thlam lam ka pan pheia,sava hram nak nak leh thli thawin thing a chhem rik bak engmah thawm dang a awm lo..Ni a sa vawl vawla,In chhaka Pipu an suih pawh thliin a chhem zawngin a then lauh lauh bawk.

In kawtah ka ding ren rawn, inchhungah thawm a awm leh awm loh ka ngaithlaa,engmah thawm awm loin a reh vawng vawng..Tim daiin kawngkhar hawnna Handle ka vuana,mahse,ka hawn hmain ka hnung lama aw thian khauh thawm avangin ka vir zawk..

Ka kal hmasak zawka ka hmuh pa kha a lo ding reng tawh,a lo kal hnaih lai ka hre lo,uluk zetin ka en a,a hma ang em kha chuan a sam a sei lutuk lo, mask,a hnar hnuai lam zawng hliah chi a vuaha,hnathawhnaa bun chi rubber kutkawr a bun bawk.

'I dam em?” sawi tur dang hre loin ka ti chhuak halh ringawt.

'Um..dam alawm..'

'Darian...' ni e,Darian-a a ni..

A thle buka,a hmai tuamna a phelha...

'I duh chuan Jared tih pawn min ko thei ang....' a mit a siai zauha, a then suk bawk..

Chapter- 13

Ka khawng vek,ka thisen kal zawng zawng an tawpa,ka thi riai riai niberin ka hria..

'I tha em?” ka dara rawn dawm pahin a rawn ti a, ka phu zawk,rang lutukin a kut ka paih nawka, ka tawlhhnung dawrh bawk.

'Tu...tu nge i nih?” ka aw a chhuak hleithei lo..

'Keimah...'

'Keimah chu tu nge? ...Darian-a nge i nih Jared-a?' ka au a ni ta ber,.

'Hahdam phawt teh...' zawi supin a ti a,rapthlak ti lutukin ka melh reng thung,engtin nge tun ang hunah hian hahdam thei tura min beisei ngam zawk hrep ni?

'Ka haw lutuk che..'

'Vawi hnih nge vawi thum i sawina chiah...' a then suka, mahse nuihzat vanga nui a ni lo tih a hmel tak ngul maiah chuan a chiang.

'Vawi sangtamtak sawi nawn ka duh,ka haw lutuk che' ka ti leh nghek.

'Ka hria,mahse tunah chuan hahdam phawt la..'

'Tenawm...' ka chil ka chhak pharh mai.

'Dik chiah,tenawm...' a ti nawn ve supa, mahse a tir phat atang khan a hmelah thinrimna awm ala lang chuang miah lo,a nelawm lo hle a. Ka hriat thin Darian-a kha a bo hmiaha,he huana ka hmuh,Mipa nelawm lo zet Jared inti kha a ni tlat bawk.

'Tun chiah ka zawt leh ang che,Tu nge i nih?” ka aw a khur titih..

'Inchhungah khan kan lut phawt dawn mi niang?” ka sawi a haider hmiah.

'Ka duh lo..' luhlul chhuahin ka din ngaiin ka ding khawng lah..

'Ok,i thu thu le..' tih pahin a inhera..

'Khawiah nge i kal dawn? Ka zawhna i la chhang lo ania...' a ding chuta, a rawn hawi leta..A sam ther deuh huang chu thliin a chhem che dar dar bawk.

'Tah hian ka thu ang chu ka ti,Inchhunga luh i duh si lo a..' a piah Thinga thutna an siam a kawk zauh bawk.Kei erawh beidawnna vangin ka thaw hak thung.

A kal phei chu ka en a,ka zui mai loh chuan ka zawhna chhanna ka hmu dawn miah lo tih ka hming ka hriatchian tlukin ka chiang,muangchangin ka zui phei ta nge nge.Hahdam hmel zetin a thu thluang duaia, a kutkawr a hlipa,leiah a theh thlaa,a ban a thutna hnung lamah a phar duai bawk.

'Thu la...'

'Aih..'

'Ok...' a then leh suk,engvanga nui ziah nge maw a nih tehchai ni?!!

'Helaiah hian tu nge ka nih min zawt turin i lo kal tihna nia” a ti leh supa, chik zetin min en ngur bawk.

'Chhanna ka duh...'

'Darian-a ka ni a, Jared-a ka ni bawka...' a hmui a petsawi zauh.

'Takzet,Ok..mahni bialnu thata dawihzep lutuka tlanbo kha i lo nih chiah hi...' ka ner nawk mai.

'Tawng fimkhur la a tha lo maw?”

'Ahhh,eng chungchangah maw? i hmel hi kha Jared-a kha a ni miah loa,in hausak em avangin i hmaiah khan Surgery tiin i hmel i thlak tihna a ni em? ha...a ropui lutuk..' ka ban ka phar hliaia,mahse beidawng zetin ka dahthla leh a, ka thaw hawk bawk.

'Duhtawk rawh..' ka beisei loh lutuk in a rawn ti nghek,ka phu zawk bawk..

'Enge sawi turin min duh? Ka tana a mak tur zia hi i hmu thiam lo tihna nge i hmu duh lo?” ka thinrim nge ka rilru a na zawk pawh ka hre tawh lo.Ka tah a chhuak hluah hluah..

'I rilru ka hrethiam alawm,kei hi Jared-a ka ni lo a, i hmuh ang hian Darian-a ka nih hi..' sawi chhuah harsa a la tih hmel phian zui.

'Anih si chuan ngatinge Jared-a i intih si?” ka ti ve thung.

'Ni ila ka ti asin,mahse ka ni miah si lo..i au vak vak hma khan engvangin nge tianga ka khawsak hi hriat i tum ngai em?” min demna niawm tak a hriat tel theih..

'Aih..ni lo.enge ka hriat chuan ang?”

'Thla khat liamta khan Jared-a a boral tih i hria em?” a aw a zawi lutuk..

'Maw?!' ka mengphawk vak bawk.

'A awm tawh lo...' a thaw huaia,a hmai a hup zui vang vang bawk..

Tuman an sawi lo,ngatinge Muankima te nupa pawh khan an sawi miah loh? An thianpa anih si chuan sawi enge a harsatna tur? Muankima nupui khan Darian-a zawt turin min ti a,a boral tawh tih kha sawi a harsa si lo..

'Muangchangin ka pan hnaia,thutthlengah ka bag ka daha,ka thu thla ve a,enge ka tih ang ka hrethiam lo,a awmdanah hian na tak tuar a ang a,amah vanga ka natna engmah ka hre chang tawh lo,tunah chuan hnem ka duh ber..

Ka ban de de a, a luah ka khawiha,a darah ka lu ka nghat bawk..Thli thaw in min rawn chhem heuh heuha,thawmdang awm loin a reh thiap bawk..Vawilehkhatah a rum deuh hawka,a taksa lianpui chu a khur nghal dur dur bawk,ka thu ngil vata, ka ena, mahse a hmai a lo la hup ta reng..LALPA,a tap chiang lutuk..Ka hmuh tirh atanga mipa induhtawk lutuk hi a tap anih chuan a chhungrilah a kehchhia a ni ang tih a chiang.

Ka tho a, hnunglamah ka kal kuala,ka kun hniama,ka zuk kuaha,a nghawng hnunglamah ka fawp vang vang bawk,ka tihtur a ni em ka hre lo,chhan awm miah loin min kalsana,amah vanga ka tah muthilh tum lah a tam,natna tamtak min siamsak tu a ni bawk,mahse tunah chuan hnemtu a mamawha,a bulah ka awm bawka,ka hnem lo anih chuan ka damchhungin ka inthiam thei tawh ngai lo ang,ka inchhir leh dawn tih hre mah ila nakin atan ni phawt rawh se.

Engchen nge awm ngaiin kan awm ka hre lo,ka kut a rawn vuana,a hmui lamah a pawt hnaia, a pahnihin a fawp vang vang bawk..Muangchangin min rawn en a,a mitah tak ka en ve ran bawk..

'Ka lawm e aw...' zawi supin a ti a,ka nui var var thung.

A bulah ka thu thlaa,min la hmu ngai lo emaw tih mai turin ka lak atangin a mit a la sawn eih lo.

'Le.i duh duh sawi la, ka lo ngaithla ang' ka thu rema,ka ke lehlam ka hlangchhoa,ka khupah ka khabe ka nghata, amah ka en bawk.

'College ka kal laiin kan intawnga, kan zirlai erawh a in ang lo,ani kha chu sumdawnna lamah a tui a, kei erawh ka pa duhdan zawmin Doctor nih ka tum thunga,kan inhmuh tirh phat atangin kan inmil nghal ti ila a dik ang,Muankima erawh hi chu ka naupanlai atanga ka kawm a ni a, kan inkawmngeih em em chungin ani ai chuan Jared-a nen kawng tamtakah kan inmil zawk...' hmanlai hunah a cheng ta niawm takin hmalam a en vung vung bawk.

'A bialnu kha ka thiannu a ni a,reivak lo chu thian aia thuk zawk inzawmna kan lo nei dun tawh bawka,mahse Jared-a nen an inkawp kha chuan ka thiantha tak a lo ni hman tawh,engmah thikna ka nei lo..Kha thil thlen zan khan an bulah ka awm lo a,tun thlengin enge thleng ka la hre bik lo..Jared-a thil awmzia ka zawta, mahse chhanna engmah ka dawng lo,ka support tha tawk lo ni a in ngaiin ka lakah an lawm lo tawn ve ve a,diktak chuan enge tih tur ka hre lo a ni zawk,a ni telin Jared-a dinhmun a tlahniam zela,vawi tamtak Doctor ka panpuia,mahse kum a vei meuh kha chuan mi a let tawp a ni hman tawh...' ati leha,sawi ve tur reng reng ka hre lo.

'Helaia ka lo kal khan engvangin nge Jared tiin i insawi?” reife kan ngawih reng hnuah ka ti chhuak halh..

'Um,ka lo ngaihtuah dan chuan khatianga ka insawi khan min hlau hmel i put leh put loh en ka duh a...”

'Ahh...' ka ti ringawt..

'Mi zawng zawng khan Jared-a kha an hua niin ka hriaa..' a ti leha.

'Maithei..aaa, ka hre lo..' ka ti bah nak mai..

'Khatianga Jared-a a awm tak hnu khan an mualpho nasa si, a nu leh pa ngenna in huan hi ka leisaka, mahse tuman an hre lo..An chhungkuain an hun tam zawk chu Shillong lamah an hmang ta a,ka thawpik chang apiangin helai hmunah hian kalin Jared-a nen kan khawsak dun thin angin keimahin ka khawsa thin..I lo kal ni pawh khan min hmuh kha...' a ti leha,muk zetin min en vung vung bawk.

'Ngatinge chutianga i tih kher?”

'Ka hre lo,mahse nuam ka ti thin..chuan,khami ni a hlau miah lo a min entu hmeichhia kha zanah khan ka hmu leh chea,ka umzui ta ngar ngar a...' a then suk..

'Darian...' engmah sawi tur ka hre lo..

'Ka duh ka neih hma chu ka um thin ka tih kha' a ti leh a.Ka thle bak ringawt.

'Engvangin nge chuti si min kalsan a? Engmah chhan awm si loin?' ka tawng zawi hle nangin a hre tho tih a hmel nelawm lo zetah chuan ka hmu thei.

'Khami zan khan Jared-a a tha lo tih min rawn hrilha,mahse a tukah khan kan Hospital hawn ni a ni a...' a hmai a tuai pawk..

'Ka bulah i sawi thei lo tihna mi?”

'Sorry...ka thei lo,keima mimal thil ni lo leh mi zawng zawngin an huat rawn ni bawk vangin rilru nuam lo a dah che ka duh lo,mahse nihnih lek liam hnuah a boral dawn tih hrelawk ila chuan Hospital hawnna kha ka ngaipawimawh lo ang..'

'Ka hrethiam che..' ka ti a, mahse enge ka hriatthiam na tur ka man eih lo..

'Zanah khan Party na atangin ka lo hawa,ka awmdan vangin i rilru a nuam lo tih ka hriaa' a ti leh sup.

'Party kha a awm dawn tih ka hre miah lo a...' ka tum aiin ka aw a chang lam hret.

'Um, diktak chuan Party pawh kha hrilh loh che tum ka ni lo,ka hrilh che anga, mahse kal lo in i bula awm ka duha,nangpawn rem i tih ka ringa,mahse Muankima khan a lo hrilh hman che a' a ti a.

'Diktak chuan midang hnen atanga hriat kha a nuam lo ve lutuk..' ka nui lui hak..

'Ka hrethiam alawm,zanah khan ka hrilh ang che ka ti a, mahse khapa ruala haw i duh vang khan ka thinrim a..zanah Jared-a nuin min rawn call leh a'

'A dam lo zual tih hrilh tur chein maw?”

'Aw,Emily pawn a lo hre ve bawka..'

'Emily...' ka ti sep..

'Kan inzui rei tih i hria alawm,ka thiante a hre hmana'

'Chuvang ami khami ni khan kei min hruai hman loin Emily i hruai?”

'Ka hruai hleinem,ka car an hmang zawk anih kha..bakah ka bula awm tura ka duh chu ani ni loin nangmah zawk i ni a,zanah khan Party naah i kal duh loh vangin chhuanlam i siam tih ka hriaa,i inah ka lo kala,mahse kha pa kha i lo thlah meka...'

Ka thaw hak mai,a lo kal awm ka hmu miah lo,khami zan khan Dama lo leng kha dar 10 bawr velah a bike dahna thleng ka thlah ngei kha ania..

'Ngatinge tunah i sawi chauh a?” ka ti hlak,amah dem reng rengin ka hun ka hmang kha ania..

'Sawi ka tum fo,mahse min mamawh miah lo niawm takin i awma.. khapa hrep lah kha i bulah ka hmu ziaha' a ti hmuk..

Ka tawlh hnaia,tim daiin a kut ka zuk vuana, min rawn ena, a mit dum fiah zetah chuan na tihna niawm tak ka hmu thei bawk.Keimah chauh ka lo in ngaihtuah lai khan ka hriat phak miah loh thil tamtak a lo tuara,chu pawh amah chauh lehnghalin..

'Ka thawhpui a ni a, ka thian tha tak a ni bawka...' ka ti a..

'Um..mahse, i bula awma,kei aia hnaih tu che an awm ka duh lo..'

'Anih chuan Emily hi ka hmu duh bik lo ti ta ila...'

'Ka hrilh tawh che kha, ka kalsan tawhah ka let ngai lo.,mahse,ka nuna i lo telve hnuah hian ka tih ngai loh ka ti ta fo chu ania...' ka thle bak ringawt, lawm tur ka ni em ka hre lo..mahse,atthlak zetin ka hlim chu anih hi a..

'Eitur i pai em?” tehdaih chuan a...

'Aw,ka bagah...' tih pahin ka bag dahna lamah ka thle zauh bawk.

A tho vuta, min pawt tho ve a, a kut lehlamin ka bag a khai nawlh bawk.In lam panin min kai zela, ka kal hmasak zawk tum kha ka mitthlaah a lo lang zut zuta,mi zawng zawng hian ze hnih kan nei veka,kan tihlan tam zawk zia hi a awm theuh nimaiin ka hre ta.He ramhnuaiah hian Jared-a angin a khawsaa,Darian-a erawh Ortho Doctor tha ber pawl a ni thung..Engpawh ni rawhse, Jared emaw Darian ka tan an danglam lo,a nihna ang ang hian ka duh a ni tawp mai..Chu aia hriatchian ka nei rih lo a, neih ka duh hek lo.

Kawngkhar a hawnga, inchhungah ka zui luta, inchhung ka hmuh rualin ka thaw hak mai..Engkim mai duhthusam a ni ringawt,Farm house chhung ka lo mitthla thin,awm se ka tih ang zawng zawng a awm kim a ni ber..

'Lo thu la...' tihpahin thutthlengah a kawk zauha.Thing dawhkan,sei leh hnum hluau mai awm zui chu a pana,ka bag a daha..

Thu loin inchhung ka thlek kuala,bang hrulah inchung panna step a awma,inchung lamah room a awm anih hmel..A chhung chei dan engkim mai chuan ka mit an la hluah hluah.

'Engtikah nge lo let i tum ang?” ka thil eina plate nawrsawn pahin ka ti a.

'Lo let turin min duh chuan....?” a mit a siai zauh bawk..

'Ngal em maia..' ka ti hlak ringawt..Ka hmai a sa hat hat bawk.

'Ka ti tak tak..'

'Um,lo let la chu ka ti..'

'Ok,anih chuan naktukah ka lo let ang..'

'I awm loh char char hian hna a buai dawn lo mi?” ka ti leh a..A plate nawrsawn te te..

'Buai e,buai tak a ni..Mahse,tunah chuan engkim a pangngai tawh alawm..'

'I tha tak tak em?”

'Ka beisei..ka bula i awm char char dawn chuan..”

'Aw...aih,ka hre lo..'

Muangchangin a rawn tho a,tihmai tur hre loin ka en mawl tawp.ka thutna bulah a rawn thu hniama,ka kut a rawn vuana..ka thaw tha ngam lo...

'Haw suh,khawngaihin..'

'Darian...'

'Ka bula awm turin ka duh che,engmah i natna tur ka ti ngai lo ang..'

'A hma pawh khan...' ka sawi zawh hmain ka hmui a rawn khawiha..A hmelpa zet chu ka ena,ngenna alang chiang em em bawk.

'Ok..ka awm ang,mahse,khatiang kha ti tawh ngai suh..ka ngaidam thei tawh lo ang che..' ka ti ta nge nge..

Pawn lamah kan chhuak leha,Thing hnuaia thutna an siamah kan thu a,Jared-a nen an chanchin tamzawk ka hriat belh leh bawk..A naupanlai hun te, lehkha a zir lai te,engmah daidanna awm loin kan titi a,amah nghengin ka thu a,thlakhat lai inbe tawh lo ni loin nupa hlim tak kan ang zawk mah ang..Nupa...ka lu ka thing nawka, ka nui sak bawk..

'Khawiah nge ka mut ang?”

'Ka bulah...' tur zetin ka en a,a nui ka hmuh rualin min chhaih tih ka hrethei a, ka nui ve hak mai.

'Lo kal rawh,inchung lamah room a awm alawm..' a ti leha,stepah ka zui chhoa,a sawi ang ngeiin room pahnih a lo awma,pakhat zawk Darian-an a hmanga,pakhat zawk ka hmang dawn thung.

Ri thuaiah ka harh zawk,ka awmna ka hai thelh bawk,mahse pawn lama thli thaw vuk vuk ka hriat rualin ka thu tawm chawih mai,thal tawp lam a ni tawha,ruah sur hun a hnai tawh tih ka hria,mahse zaninah ber kher chuan ka beisei lo lutuk.

Ka nu te bula ka chen lai khan ka hlau ngai lo,hlau tur pawn thli tleh kha kan Inah thawm a hriat vak ngai loh hrim hrim,mahse, keimaha ka awm hnu khan ka Inluah thli a na a,ka inluah piah lawka in pakhat,thliin a chhem chhiat ah pakhat a boral zui bawk nen,khata tang khan thli tleh leh ruahsur te hi ka hlau tawp thei ta lo.In pangngai ka luah hnuah pawh hian ka hlauhna a nep thei tawh lo.

Ngam leh ngam loin khum atangin ka chhuka, light ka on a,tukverh inhawng khar tumin ka pan pheia,ka mut dawn khan a lum avangin ka hawnga, Bar a awm tha vek tho a ka hlau lem lo kha ania..lo khar hle hle ila ka ti tawh ngang mai bawk..

Ka khar fel chiah tihin kawl a phe zawka, a ri thuaia, Current a thim nghal hmiah,ka tum loh tawpin ka te vak bawk..Ka beng ka hupa,ka awmna atanga kalsawn tur pawn ka che ngam tawh lo..

Tuemaw in min rawn kuaha, ka phu zawka, ka tal nghal laih bawk..

'Mate,keimah...' Darian-a aw ka hriat rualin ka thaw huai mai..Ka kuah let a, a awmah ka hmai ka phum zui hmak bawk..

Ka kut a rawn vuana,khum lam panin min kaia,engmah hnialna ka nei lo..Puan min sin tira, a rawn mu vea,a dar hlai hlapah ka lu ka nghata,a mal sei thlurh chuan min kherh bet chial bawk,a awmah ka kut ka daha,a lungphu dat dat ka hre leh ta bawk..A che hruta,ka beng a kut lehlamin a rawn hupa,ka samah a fawp vang vang bawk.

'Muhil rawh le...' a ti sup a, ka mit ka chhinga, Thli thaw thawm reh tial tial chu ka ngaithlaa,mahse ruah a sur tan ta thung..

'Darian...'

'Um..' a lo la muhil bik lo..

'Thil ka ziak thin a...'

'Ka hria lawm..'

'Tak tak?” ka inbengkanga,mahse a thim vek avangin a hmel ka hmu chiang thei lo..Ruah sur baw tlawrh tlawrh kha a ziaa,tunah chuan mut ti nuam tawk vel lekin a sur tawh.

'Tak tak,mahse ka la chhiar lo..diktak chuan thil chhiar hi ka thatchhiatna lam ania' a nui hawk bawk..

'A pawi lo,ka sawi tum tak chu...ih,Jared-a nen inchanchin ka ziak chak..'

'Shh...ni lul lo e,mi in mi a ang maia min en tur hi ka duh lo ania..'

'An hre dawn hleinem...'

'Ni lo e,khawngaihin...' ka hmai a rawn khawiha,a kutzungpuiin ka hmai a tuai hauh hauh bawk.

Ok,mahse, a ngaihnawm viau ang...'

'Ka chanchin engkim hi nangmah i hriat chuan ka duhtawk reng' a ti leh supa,min pawt hnaia,ka hmui a rawn tuaia,ka tawng leh hmain a hmui lum ham hamin a rawn bawhthuah chat.

Ka kawr a rawn zena,ka hnute a rawn khawiha, a samah ka tham nghet sauh thung,min rawn delha,a kut zungtang sei thlurh chuan ka hnute hmur a rawn chep hruala,ka thaw a chham titih...A tawlh hniama, ka kawr a rawn nem chho a,enge a tihdawn ka hriat hmain ka hnute hmur a rawn hmuama,ka kang awk mai...Nghet zetin a samah ka tham ngat ngat bawk..

Ka kekawr kawng a rawn khawiah,ka ip chawiha, ka mal ka chip tlat,mahse awlsam zetin a rawn nem kaua,a rawn zen lut nghal zet,ka panty chhanah a rawn khawiha,ka khawng nghal lah mai..Hlauhna...

'Darian...' ka aw a ri chang chang..

'Sorry...' a ti supa, mahse,che zui loin ka awmah a hmai a rawn phuma, a chakna thunun tum a ang viau..

'Ih...Darian,ka thei lo...'

'Ka ti tawh lo ang,ka tihpalh lutuk...'

'Aih,ni lo..min paltlang pui zawk rawh...' enge ka sawi tak? Mahse paltlang ka duh,Darian-a nena inzawmna thuk zawk neih ka duh..

Chapter- 14

'I chiang em?” a ti supa, ka biang tawn tawnah a rawn vuana,a chalin ka chal a rawn ti si bawk.

'Ka hre lo,mahse hlauhna hi hneh ka duh...'

'Um,mahse,nakina i inchhir lehna tur tihpui che ka duh lo..' a ti sup,ka kawr a pawtthlaa,ka kawr chhannah ka hnute a kutzungtangin a tuai hauh hauh bawk.

'Mahse,Darian....'

'Shh,min thlem miah suh,thlem miah loh pawn harsa ka tihzia tur i hria alawm' za lo zetin a nui hawk bawk.

'Engtik niah emaw chuan ka ta ila ni dawn tho a,chumi hma chuan hrehawm i tihna tur engmah siamsak che ka tum lo..tunah chuan thli tleh pawh a reh tawha,muhil tawh rawh le..' a ti supa,a inlahranga,a tho zui nghal zat..

'Khawiah nge i kal dawn?” ka huaisenna zawng zawng sawmkhawmin ka ti leh hram.

'Ka roomah aniang chu..'

'Um...' ka ti sep ringawt.

Muhil thei loin ka mu meng kar mai,nichin lawka thil thleng kha..ka hmai a sa nghal hut hut mai,ka zak hluah hluah,mihur ang hrimin ka ngen vel anih kha..Engtin nge zingah ka hmuh ngam ang? Ka mitthlaah thildang a lo lang zut zut,thil tamtak min hrilhfiah nangin engemaw inthup la awm niin ka hre leh lawi.Jared-a kha mi a hlawmtawp anih si chuan engvangin nge helaiah Jared-a ang hrima a khawsak kher? A lunglen vang a ti anih kha,ni lo...a dik lo,ka kal hmasak zawka a mizia kha ka ngaihtuah leta,Darian-a nen hian enge danglamna a neih? Amah tho a ni a, enge danglam vak ang? Mahse, a danglam..Vawiin khan inhawng takin min hrilh mahse min hrilh tel loh thil a la nei niin ka hre tlat..Enge ni ang tih ka ngaihtuah chiam pawn engmah ka ngaihtuah chhuak thei chuang lo..

'Khawiah nge i awm?” phone ka pick veleh Duati'n a rawn ti vau vau.

'Inah...enge?” ka bagah ka note bu ka khung paha.

'Zanin kha,i hman tiraw?”

'Eng...?” ka hrechhuak mai thei lo..

'Amak,Group kha en teh..' a rawn ti hlar mai,ka nui hak thung.

'Ok,ok,ka lo en dawn nia..'

'Thulh hlek suh ang che..' a rawn ti leh a,ka bu nghat ringawt, min hmu thei lo tih ka ngaihtuah a, ka nui sak bawk.

Kal mai loin kan thianho groupah ka lut leh rih,vawiin Friday a ni a,chuti anih chuan enge sawi lawk kan neih ka en a,ni dawn tak..Atei te Dawrah Dinner ei turin kan sawi lawk tak anih hi a..Ka thle bak ringawt, kal lo vaih ila chuan ka nasa lo hle ang tih ka chiang.

Nilengin hnaah kan buai ta ngar ngar,Lunch ei tura ka thawh zawk bak ka tho sawn meuh lo.Dama a zina,a thawh ai thawhsak vek angai bawk nen buai a na takzet.Darian-an a ngaithei lo tih ka hriat tawh avangin ka theih chin chinah ka hel zar zar, mahse hmun khata thawk ho nih chuan hel reng theih a ni chuang hauh lo.A chang hi chuan ka ngaihbel nge ka hre lo nangin thian mai lo deuh anga min en chang a nei niin ka hre fo,mahse Darian-an a ngaitheih loh vangin ka ngaihbel lui mai mai pawh a ni mahna.

Dar 5 pelh hretah ka haw hman ta chauh,haw pahin eitur leh inchhung mamawh lei tumin Vishalah ka kal kual leh rih,thla khatah tam deuh tak ka lei a,chhe mai thei lo tur ang chi chu thlakhat daih deuhthaw ka lei mai zel.

Dar 7ah in ka chhuahsan leha,ka kal hmain vawithum ngawt min rawn call hman,ka thlen chuan an lo kim thap tawh.Ka beisei loh zetin Mawipuii a lo awm tel vea,a lo haw tih ka hre miah lo..

'Hey...i lo haw tih ka hre miah lo a..' a bula thut thlak pahin ka ti a.

'Surprise che u ka duh alawm,Atei chiah ka hrilha..' a nui var var mai.

'Um,i hlawhtling chiang lutuk,engtik nge i chhuk leh ang?”

'A la hla deuh ang,thla hnih dawn chawlh ka neia,enteh...a changtupa a lo kal ve dawn maw ka ti a?”

'Naah,thianho chauh tih ania,midang tel loin..' ka ti ve thung.

'Dik chiah mai,bakah Zampuii hi Darian-a nen an inzui hnuah a inlahrang a,a ninawm' Julie-in a rawn ti lawng lawng,rum deuhin ka en a,mahse ka nui leh ta nge nge.

'Ka inlahrang lo aw..a re rein nang hi i reh lutuk'

'Reh lo,groupah pawh i lang tha duh lo a,ka la pen khawp ang che' a ti leh a,midang an nui hawk hawk thung.

Kan boruak a nuam takzet,an bulah hi chuan engmah han insumkar a awm lem lo a,kei ang bawkin midang anni ve vek bawk nen,a nawmdan hi a dang lo thei lo.

In ka thlen hnu lawkah Darian-an min rawn calla,in ka thlen tawh leh tawh loh min rawn zawta,ka thlen tawh thu ka hrilha,diktak chuan msg type neuh neuh hi a peih lem lo,achang chuan min rawn be tho nangin a tam zawkah chuan call a ni deuh zel.Social media lam hawi hrim hrim hi a lawm lo ti ila a dik viau bawk.

Mut ka tum lai takin kawngkhar an rawn kika,tun ang hunah tu tak lo kal ang maw? Darian...ka thensak ringawt..Hei vang hi a ni ngei ang ka haw tawh leh tawh loh min rawn zawh ni??

'Ngatinge tunah i lo....” kawngkhar bula lo ding ka hmuh rualin ka tawng tawp chawt.Darian-a ni loin ka Pahrawn zawk..Ka ding khawng laha, chil ka lem thei hram bawk.

'I awm leh awm loh rawn zawh lawk che chuan i awm duh dawn si lo a' a ti dam thluama, a nui vur vur bawk.

'Eng nge i duh?” ka zamzia thup tum the mah ila ka hlawhchham chiang viau.

'Ka fanu tlawh tur hian enge chhan dang ka mamawh ang? ' a ti leh a.Hman ang kha chu nise ngai takin ka kuah maithei,a thusawi dan pawh hian min tilawm ang,mahse...a chhungril tenawm zia ka hria..

'I fanu ka ni lo...' ka aw a chang beng bawng viau,mahse ngaipawimawh awmin a awm chuang miah lo.

'Awle,engpawhnise ka lo lut thei angem?” a ti leha,a thinrim duh chuang hauh lo.

'Thei lo...'

'Puite..”

'Ti khan min ko miah suh..'

'Awle,thil pawimawh tak sawipui duh che ka neih vang ania,a pawi lo.Min hmuh chak lemloh pawn nakinah i rilru i thlak leh chuan min rawn be dawn nia,hmana ka number kha a la ngai reng' a ti leh duah.Ka mit ka chhingsawk thung.

'Mangtha le...' ka ti hmaka, kawngkhar pawh khar tumin ka vuana, mahse a rawn pawt kau leh..

'I nau chungchang a ni a,i ngaipawimawh hram dawn nia' a ti leha,ka chhang lo.A kut a laksawn rualin na zetin ka pawtkhar bura, ka kalh nghal hmak bawk.

Kawngkhar ka nghenga,ka lungphu ri dawt dawt tih ziawm tumin ka awm ka dawma, duhthawh zetin boruak ka hip kawk kawk bawk.A number ala ngai a ti anih kha, Mobile phone awmtirh khan a nei hmasa pawl a ni a, BSNL chauh a awma, a number kha ka hriat hmasak anih angin tunah pawh ka la theinghilh lo.Chutiang bawkin ka nu number pawh,ka pa phoneah khan games ho tak pakhat a awma, Hazel-i nen kan khel nasa thin..

Hazel...eng nge a chungah thleng ang? Hman zana a lo kal khan engmah that lohna nei hmel a pu si lo,Pasal neih a duh anih chuan a nei thei tawh reng,naupangchhia a ni tawh lo,pasal a nei dawn tihna a ni angem? Ka hre duh anih chuan keiman ka zawn angai dawn phawt chu ania.Mahse, ka pa kher zawng ka be hauh lo ang.

Muhil thei loin ka mu meng kar mai,ka duh emaw duh lo emaw ka nau ka mitthlaah a lang reng bawk,biak pawh na tur a number ka nei lo,mahse tum tak tak ila chuan tihdan tur a tam ang.Darian-a biak ka tum zeta,mahse ka thulh leh ta zawk,engmah tihtheih a neih ka ring chuang lo,keiman ka biak pawh duh leh duh loh a ni tlat.

'Good Morning...' Office ka thlen veleh Sen'in a lo ti a,ka mengphar vak thung,tun ang hunah Officeah a thleng ngai lo..

'Morning,ngatinge?” ka ti a,a nui hek hek..

'Ngati vak mah.Vawiinah Dama nen chhuah kan ngaia,nimina mi kha ka zo hman lo a..' a hnar a ti vang a,a bula file a kawk zauh bawk.

'Aw, anih chu mawle,kei ka kal ve angai dawn em?”

'Ka hre miah lo,zingah Dama'n min rawn calla, a call ve loh che chuan i kal angai lo tihna niang” a ti leha,min en loin a hmaa Computer a ena,rang zetin engemaw a type pah bawk.

'A that hlauh chu..hna ka ngah lutuk,kal chhuak chi ka ni lo' ka ti halha,ka chairah chau zetin ka thu thla hnak bawk.

'I tha em?” rang zetin ka en a.Uluk fein min lo en ve bawk.

'Tha e,ngatinge?” ka then lui sak.

'Ka hre chiah lo,i chauh hmel ka ti..'

'Nizanah ka...'

'E...i Story tihchhuah tur kha engtikah nge? Kha kha i buaipui tak tiraw?” ati leha,a phur hmel phian bawk.

'Tihchhuah tih lemah ka blogah ka dah ang,i chhiar duh mi?” ka ti tha ve mai,ka Thilziah vanga mu thei loah min ngai tih ka hre bawk,pawi ka ti lo.

'Chhiar duh ve e,Love story lam te chu chhiar a nuam alawm,mahni luck vak loh pawn....' a nui leh a.Ka nui ve hak ringawt.

Dar 11 velah Dama leh Seni an chhuaka,ka buai zawm ta char char,nidang ang lo takin ka hna a tluang hlawl lo,a khat tawkin Bossin min ko renga,Printer lah a nuara,ka thil print tawhsa tam zawk a fiah tawk loh avangin tih that leh vek angaia,ka chair bula Dustbin ka vawm khat hneh lutuk tawh.Ka thinrim hlur bawk.

'Zampui,ka kal dawn asin..' ka dawhkan bulah Boss a rawn dinga,

'Um,nia..keipawh ka kal dawn tep ang..' ka ti a..

'Dama te kha an lo haw har hmela,lo nghak duh lo mai rawh,Inah an haw tlang mai ang' a ti leh a.Ka bu ngauh ringawt.

Office ka chhuahsanin dar 7 a hnai thuak tawh,Security bak tumah an awm tawh lo.Ka Scooty dahna pan thlak pahin Darian-a ka call paha,a pick dawn lo emaw ka tih hnuah a pick ta hram..

'Hello...' hmeichhe aw hian a rawn ti a.ka mengphar vak ringawt.

'Darian-a ka be lawk duha..' pangngai takin ka ti ta tho.

'Lo nghak lawk a..' a ti a,an tawng nak nak thawm ka hre thei.

'Sir,an be duh che a..' hmeichhe awin a tih ri ka hre theia..

'Tu nge?” Darian-a..

'Miss ola...' ka hming a save dan tehhrep pawh chu a..a ri leh nak naka..

'Hello..ola..' Darian-a aw ka hriat rualin mak takin ka tah a chhuak ringawt pek.

'I la buai em?” ka ti a, ka aw ka thian khauh bawk.

'Emergency a zai tur kan neia,ka la lut lo deuha...'

'Um,ka lo be mai mai che..'

'Lawk,Mate, i tha em?” min duatna a hriat tel theih..

'Aw.aih...ka hre lo...' ka tha em ka hre lo tak tak,ka lu a na ngut nguta,ka buai bakah nizan ka mu tha lo nen ka awm a nuam lo..

'Ok,tun ami hi ka zawh chuan ka free a, ka lo kal ang..' zawi supin a rawn ti a..

'A tlai lutuk chuan lo kal duh lo mai rawh,a hahthlak lutuk ang...' ka ti a,mahse ka chhungril erawh chuan lo kal se a ti hluah hluah thung.

'Ahh,ni hnih hi a rei ania aw..' ring vak loin a nui hawk bawk.

In ka thlen veleh thawmhnaw pawh thlak loin khumah ka lawn nghal a,Office chhung ac vek a ni nangin ka phe buai lutuk kha nge pawh ka hre lo, thlan vangin ka hnawng chuap tho.Kawngkhar kik thawmah ka harha, darkar khat aia tam mah ka lo muhil hman tih sana ka en rualin ka hre nghal mai.

Kawngkhar ka hawn hmain pawna awm ka en hmasa te te,nizan vang khan ka hlauthawng zo vek tawh,mahse Darian-a a ni tih ka hmuh takah chuan ka thaw huai thung.

'I va lo thleng hma leh si ve...' ka ti a,min chhang loin a rawn luta,kawngkhar a kalh nghal hmak..

Living room lam pan tumin ka inhera, mahse ka kal hmain ka ban rekah a rawn mana, amah si chetin min pawt hnaia,min kuah bet zui nghal zata, ka sam chhanah ka nghawng a rawn fawp vang vang bawk..

'I zia deuh tawh em?” reife ngawirenga kan din dun hnuah a ti supa.

'Um,ka muhil a...'

Min kuahna a phelha, ka biang tawn tawnah a rawn vuana,a kawngah ka kuah thung,.'Nihnih hi kum hnih emaw ka tiin ka hria' a ti leh supa,ka chhan hmain a rawn kun hniama,a hmui chhah deuh tapin ka hmui a rawn si a, a dimin a dam hle bawk..Ka kawr a rawn zen chhoa, ka bra chhanah ka hnute a rawn khawiha, duhtawk a hun tih ka hria..

'Darian...'

A kut che a tawpa, ka kawr chhung atangin a la chhuaka,a chalin ka chal a rawn nawra,a rum hawk bawk..

'Tawp tura intih ziah hi ka ning tan riau ania...' a aw pa zetah chuan harsa a tihzia a hriat tel theih hial bawk.

'Sorry....' ka ti sep ringawt..

'Ok,a pawi lo..mahse,ka nupui ni tawh la ka duh ania...' a aw nghet churh chuan a ti mai mai lo tih a tichiang viau..Mahse, kei hian pasal nei dawn ila khawiah nge Palai ka kal tir ang? Chhungte nei miah lo hian engtin nge pasal ka neih ang?

'I tha em?” ka sam ka benga zep pahin a ti nghuta, ka ngaihtuahna atangin ka harh zawk.

'Um,tha..ih,diktak chuan ka ril a tama..' ka nui lui var var bawk..

'Ok...eitur I siam ka ring lo a...a dik em?”

'Aw...'

'Motorah ka theihnghilh..ka han la ang...' a ti a, mahse a inlahrang chuang der lo..

'Anih chuan kal la...' ka kuahna ka phelha...

'Kal dawn e...mahse, kal hmain...engtikah nge min neih ang?” ka melh zawka,thutak zeta min en na ka en rei ngam lo..

'A hunah animai..thil ei phawt ang..'

'Phakhar reuh lutuk,i duh duh hian min tir kual a..' a nui hawka, mahse min thlah ta tho..

Eitur a rawn keng nual,Soup a siam belh leha,engmah a tihngai ka rin loh nen a siam thiam viau tlat.Inbe mang loin kan ei dun mawlh mawlh..

'Lo dah rawh,ka lo tifel ang..' ka ti a..A nui mai,min sengfel pui veka, ka thleng sil sa a lo hru leh vek bawk..

'Ka nu in a hmu duh che asin le..' Living room a kan thut hnuah a ti a.Atthlak zetin ka hlauthawng ringawt pek.

'Ngatinge min hmuh duh a?” pangngai thei ang berin ka ti a.

'Inneih chungchang anih ka ring...'

'Darian...eng lo...' sawi zo loin ka ngawi leh rih.Min rawn en a,a hmelpa leh tihhar hmel zetah chuan a ngaihtuahawm engmah a hriat theih loh..

'Sawi la....' a ti nghut..

'Eng lo...diktak chuan inneih hi ka duh lo pawh a ni lo a...'

'Chuan...?” a ti supa, a thu ngila,min en run bawk,ka ngaihtuahna zawng zawng nen a hmu tlang vek nimaiin ka hria..

'Chhungte ka nei lo tih i chhungte hian an hria em?”

'Um...'

'Anih chuan khawiah nge Palai an kal ang?”

'Ka ngaihtuah mai ang..' a a ta emaw tiin ka melh vak ringawt.

'Nangin engtin nge i ngaihtuah anga?”

'I pa chhungte awmna ka zawng mai ang,Ok...ka zawn tir mek..' mak ti lutukin ka ang pham mai..

'Ni lo...' ka ti sep ringawt.

A rawn thoa, ka thutna a rawn pan a,ka hmai ka hup ta ngawt,ka nu khan a hmain a sawi tawh,ka nu laka an lawm loh avangin ka pa tak tak te hian kei hi min pawm lo.An inneih laia piang ka ni nangin an fa ka ni lo niin an ngai leh hnuhnawh a ti anih kha..Chuvang takin ka nu te hnen atanga ka chhuah hnuah pawh ka zawng lo a, pan tumna ka nei lo anih kha..

Min rawn kuaha,ka samah a rawn fawp vang vang mai.

'Min nei lo mai rawh...' ka insum hman lo,ka mittui a rawn tla a, ka insut hraih bawk..

'Shh..i chhungte ka nei dawn lo a, nangmah alawm ka neih dawn che..' a ti supa,min kuah bet a,min hnem nan ka hnungah a chul hauh hauh bawk.

Dar 11 velah a haw ta chauh.A kal rualin ka ruak nghal hawkin ka hre bawk,mahse, ka beisei loh zetin ka mutui ta phian..

'Vawiin chu Dama nen inchhuah angai dawn ania aw..' hna ka thlen veleh Bossin min lo ti a,ani pawh min kal khalh ve tlat..

'Khawi lamah nge?” ka ti a, kan kalna tur lam a sawia, nimin lama an thawh zawh loh tihzawm angai a lo ni a, pawi ka ti lem lo,office a thut nilen ai chuan chhuah thawven a nuam zawk mahna..

Darian-a msgin ka kalna tur ka hrilha,vawiin a buai dawn tih a sawi lawk avangin a reply mai ka beisei lem lo..Ka rin ang chiahin Lunch ei dawnah pawh engmah a rawn sawi lo..

'I phone kha a ri char char ania..' Bathroom atanga ka let veleh Duati'n a lo ti a,ka haw hnu lawkah a ni a lo kal hlauha,ka haw tlai bawk nen eitur min siamsaka,ei ve nghal law law turin ka ti a, a hnial lo hlauh.

'I pick lo mi?” ka phone dahna pan pahin ka ti a.

'Aih,Darian-a niin ka hria..'

'Lo pick mai awm che..' ka ti hlaka,ka phone ka en a, Darian-a a lo ni ngei..Ka call back nghal zat bawk.

'Hello...'

'Ka lo inbuala,i haw tawh mi?”

'Aih,haw dawn tep..eng lo ania,naktuk hi ka u fanu Birth day ania'

'Um...dar engzatah nge?”

'Dar khat hunserh ania..'a ti a, an lawmna hmun tur min hrilh nghal bawk.

'Anih chuan hman ka lo tum dawn nia..' ka ti a..

'Ok,ka chhuak dawn chiaha,in ka thlen hunah ka rawn bia ang che' a ti a..

Duati haw veleh ka mu nghala,ka chau ngang aniang Darian-a min lo call pawh ka hre tawh lo,a msg pawh min mangtha na leh Morning wishna ka chhiar rual...

Kan thlen chuan an lo awm nual tawh..mahse, Emily ka hmuh rualin ka insangmar nghal teuh ringawt.Emily hi Darian-a bialnu hlui a ni nangin Darian-a u nen an inkawm nasa viau tih a hmain ka hre tawha, mahse Darian-a u hi chuan min ngaithei lo leh Emily tan zawk angin vawikhatmah ka bulah a la lantir ngai lo.

'Zampui,i tha maw?” ka hnung lam atangin hmeichhe awin a rawn ti a..Tu nge anih ka hria..Muangchangin ka hawi leta,Emily nen kan inhmachhawn ta siah..A hmeltha zetah chuan nui hmel a langa, mahse a mit lian kel kawlah chuan huatna niawm tak a lang thung..

'Tha lawm,nang zawk?” ka nui lui sang bawk.

'Um..lutuk.....' ka hawi kuala, Darian-a ka hmu mai lo..

'Zawng duh suh,Mipa ho chu roomah an awm..' zangkhai zetin a ti leh halh..

'Biak lawk ka duha,min hrethiam la..' tih pahin zahzelah ka phone ka lek kang zauh bawk..

'Tehreng mai...ee,leh lawk,nimin khan tihpalh thilthu in i pa ka hmu a...' ka pen lai ka tawp chawt..

Ka mit ka chhinga, boruak ka hip lut vang vang bawk..Muangchangin ka hawi leta, ka zamzia ti lang lo turin ka nui lui sang bawk..

'Ka nau hian nupui a nei dawna...' amah bawkin a ti leh nghauh.

'Kei nen inzawmna a neih awm ka va hre lo...' ka ti nghat..Ka nui lui hak bawk.

'Ahh,zawm tehreng mai,a nupui tur chu i nau ania...mahse, a mil vak lo che anih hmel...a mil loh chhan che chu i hriat ka ring a' a chek tlak tlak mai.. Kei erawh ka lungphu a rang nghal dawt dawt thung..

Min rawn pan hnaia,hmuhsitna nen min en a,a hmeltha zetah chuan min tihnat duh na bak engmah a lang lo.a rawn kun hnai leh sauh..

'Darian-a hi ka ta a ni a,duh aiin i kal thui tawh, ani hian i chanchin hi a ni chuan a ngaipawimawh lo pawh a ni thei,mahse a nu leh pa hi chuan an ngaipawimawh khawp in ka ring,Oh..A u pawh hian...' ngeiawm zetin a mit a siai zauh bawk...

Chapter- 15

Min kalsana,kei erawh chet sawn nachang hre loin ka ding khawng lah mai,engvangin nge ani berkher in a lo hriat? Hazel-i pawn engvangin nge a thil hriat dik tawk lo chu a lo sawichhuah kher? A vawikhat nan ka nau huatna thinlung ka pu ta hial mai..

Reife hnuah ka lut ta chauh,Darian-a rawn chhuak tur nen kan intawk chiah bawk,min rawn din hnaiha..

'Ka rawn zawng dawn che a,lawk..enge dik lo awm?” a ti nghuta,chik zetin min melh run bawk..

'Aih,engmah...' ka lu ka thing nak bawk.

'Takzet?” a hmui a petsawi zauh mai..

'Aw,engmah dik lo a awm lo,ngatinge?” a mitah tak ka en ve a.A dar a ti chhing uka, a thle buk bawk.

Dinning hallah kan inzui luta,a then chuan an lo ei tan tawh.Darian-a nu leh pa bakah a nutei te nupain Dawhkan pakhat an lo kila, Darian-a nen kan eitur chawia kan kalphei min hmuh veleh an nui var var mai,kei erawh ka ip chawiha, ka rilru a nuam hlawl lo..Hre ta se enge thleng tur ka hria,tuna min nuih ang khan min nuih miah lo ang.An nun atanga min paihchhuah lawng lawng an duh hial ta ve ang.

'Ola,engmah i ei lo ania...' rawn kun hnaih pahin Darian-an a ti supa,ka chaw thleng ka ena,a sawi dik chiah,Ei loin ka lo hawlh kual vel mai mai..

'Ih,ka ril a tam lo lutuk a..' ka ti sepa,a rilru tihnawm nan ka nui lui sak bawk..

'Ok,a pawi lo..' a ti supa, a hmel tak ngulah chuan ka thusawi a awih lem lo tih a lang thei thung..

Engmah tihtham ka ei ta lo,ka tilui thei ngang lo..Ka hawi chhuah apiangin Emily hmela hnehtu intihna ka hmu hmasa ber ziah,kan eikham hnuah ka tilui thei ta ngang lo,Darian-a hnenah ka nuam lo tih sawiin min hawpui turin ka ngen ta nge nge.

'I lo lut dawn em?”

'Lut tura min duh chuan....” a thle buk bawk.

'Ka duh in ka ring,thilsawipui duh che ka neia..'

'Ok..'a ti supa, ka thutna kawngkhar rawn hawn tumin a rawn kun hnaia,ka thu mar auh thung.

'Thu la,ka inthlak lawk ang,ka kekawr hak hi ka ning tawh lutuk' ka ti a,min chhan pawh nghak chuang loin room lam ka pana,light ka on a, kawngkhar khar tuma ka hawilet rualin ka hnunga Darian-a lo ding ka hmu ta chauh,ka phu vak bawk..Min zui tih ka hre der lo..

'Ngatinge?” ka ti nghata, ka bag khumah ka thehthla a..

'Ka lo kal ve duh mawle...'

'Khawngaihin Darian...'

'Ok,tak takin i nawm loh chuan Khuma mu chungin titi ta zawk ila...' ka dar ka tichhing ak ringawt, mahse ka bu leh ta nge nge..

Lukham nghengin a thu mu a, amah nghengin ka thu ve thung.a kutzungtang sei thlurin ka kut a hum a,ka chhip samah a fawp vang vang bawk..

'Vawiin khan Emily nen kan inbiaa...' sawi tan mai dan tur ka hre lo..

'Chuan...?” a ti sup ringawt..

'A nauin nupui a nei dawna,a nupui tur i hria em?”

'Hre lo,min en teh' thuawih zetin ka en ve mai bawk..

'Emily hi tunah chuan sumdawnna pakhata ka thian leh partner ve mai a ni ka tih kha,a mimal nun lam hi ka ngaihven lem lo,ka hnaah buaina tamtak ka neia,midang ka care dawn anih chuan nangmah i awma,a tawk reng...i chiang em?” thutak zetin min en ngur bawk..

'Aw...aw,ka hria alawm,ka sawi tum tak zawk chu,a nau nupui tur kha Hazel-i ania,ka nau kha..' a hmelah engmah danglam a awm lo..

'Anih chuan enge?” a mithmul a ti sang zauh ringawt.

'A sawi dan chuan Hazel-in thil a lo hrilh anih ka ring,i chhungte hnena sawi tum angin a tawnga...'

'Oh..hreptak hian...' a ti hmuka,a rawn kun hniama,ka biang a kut zungpuiin a tuai hauh hauh bawk.

'Engtin nge kan tih ang?”

'Buaina tur a awm lo..'

'Nilo,buaina tur vek zawk,i chhungten min pawm ngai lo ang..'

'Ka chhungte hian ka nupui turah engmah thu an nei lo ang..'

'Chutiang ngawt a ni lo..i ngai awlsam em mai...' inlakhran tumin ka che a, mahse min kuah nghet sauh thung.

'Ka ngai awlsam lo,mahse ka nu leh pa hi ka hrechiang lutuk,bakah tihtur kan nei,midang ka atanga thudik tawk lo an hriat ai chuan engvangin nge keimahniin kan hrilh mai loh ang?” ka ang pham mai..

'I rui em?” ka ti ta ngawt..Engtin nge hrilh ngam se min tih ka hre lo..

'Ahh,rui nang,in i phal loh kha...' a ner nawk bawk..

'Ka thian tu emaw hrilh tur ni ila ka ngam mai ang, mahse i nu leh pa anni a'

'Min ring em?”

'Ka hre lo,mahse rin che ka duh..'

'Anih chuan ka kutah dah rawh,Sundayah hun kan nei ang,tah chuan kan sawi mai ang chu..'

'Ka thei lo....' ka ti tham chal mai..

'Oh..i thei,i bulah ka awm reng dawna,min rinchhan thei ang ka tih kha..' a ti leh supa,ni e..rin ka duh,vawi tamtak ka harsatnaah min pui tawh thina, kan inkawp tirh atangin min la phatsan miah lo..

Darian-a sawi ang tak takin engkim a thleng ta vek,ka bulah a awm renga,a nu leh pa leh a u nen kan inbiak chhung zawng ka kut a vawn a thlah miah lo..A tawp lamah phei chuan Darian-a nu in mittui nen min kuah ta zawk..Ka lo hlauhthawn rukna kha engmah lo a ni ta zawk,Darian-a sawi ang ngeiin an fapa nupui turah engmah sawi an tum lo,bakah ka chungchang engkim tlang taka sawi lan mai kha an lo duh zawk hle a, an puitling em em mai tih ka chiang em em bawk.A rang thei ang bera inneih na tihfel an duh bawk.Engmah hnialna ka nei lo,ka tan chuan Darian-a bul tluka thlamuanna a awm lo tih ka chiang tawh.

Door bell ka hmet a,kawngkhar an rawn hawn hun thinphu dep depin ka nghak ran mai,reivak loah a rawn inhawnga,hmeichhia, kum 50 vela upa a ni a.Min hmuh rualin mak tihna vangin a mengphawk hra mai..

'Bawihi...nang maw?” a ti halha,min huatna hmuh tumin ka en a, mahse chutiang lam engmah a awm lo.

'Aw, Pi,ka pu a awm em?” ka ti a,ka nu ka mitthlaah a lo langa, ka mittui a hnai kuar bawk.

'Aw..aw,awm e,lo lut rawh,ngah nge i din reng?” harhchhuah thut niawm takin a ti sawt sawt.

Anni hi ka naupan lai atangin ka nu u tak tak emaw ka ti thina,ka len hnuah ka nu hnampui,unau anga a vawn te anni tih ka hre chauh,mahse unau piang hmun ang maiin an inzawmna a ngheta,ka ngaina em em bawk.Ka nu hnen atanga ka tlanchhuah hnu khan ka tlawh ta miah lo..Min zawt anga, a chhan ka sawi lo thei dawn si lo a, chuvangin ka hel ta ngar ngar zawk.

Inchhungah kan inzui luta,ka pu in amahin inkhel a lo en a,an fate engtin nge an khawsak ka hre zui tawh lo.Ka hriat lai kha chuan an vaiin lehkha an la zir vek kha ania..

'Pa-a,tu nge lo kal hi han en teh' ka piin a ti a, kan thawm hraiin ka pu a rawn hawi chhuaka,ani pawh ka pi ang bawk khan mak tihna vangin a mengphawk ve hra tho mai..

'Ekhai...Mampui,i dam em?” a ti hluaia, a rawn tho a..Min rawn pana,min chibai tumin a kut a rawn pharchhuaka,a lo lang upa ve ta,pa lian a sawi tur a ni ngai lo,mahse, engtiklai pawha pa inchei fel thlap reng mai a ni thin,tunah a lang upa ta deuh nangin a la in uluk hle tih erawh a lang thei reng..

Ka kut ka phar chhuaka, nghet zetin ka kut a rawn vuana,min pawt hnaia,min kuah ta zawk..Ka mittui tla tur dankir tumin ka khap sak sak mai.

'LALPA hi a tha mang e,kan tawngtai chhanna a lo lang ta alawm..' ka piin a ti mial mial mai..Engvang a sawi nge anih erawh ka hre lo.

'Thu ang u,khawiah nge i kal vang vang tih te pawh ka zawt duh che ania' ka puin min thlah pahin a ti a, ka dar tawn tawnah a vuana, min hriatchian lehzual tum niawm takin min en vang vang bawk.

An pahnihin min kar cheha,sawi tan mai tur ka hre lo,ka tlawhchhuah chhan tak zawk chu anni tal hian thudik hria se ka duh a,chu bakah min lo pawm thei anih hlauh chuan Darian-a te Palai pawh an kal thei mahna..

'Hman deuh khan Tvah kan hmu che a,i number neih tumin kan buai zak zaka,mahse, i pa khan a be tawh che tih a sawi avang khan kan lo lawm viaua..' ka piin a ti a,ka bu ngauh ringawt..

'Kan biak duh chhan tak zawk che chu,i nu khan a thih dawn hnaih khan engemaw min hrilh a neia..' a ti leha, ka lungphu a rang nghal dawt dawt mai..

'Thingpui va lum la,in phawt ila,kan sawi zawm ang chu..Naupang ho pawn an hmu chak khawp ang che' ka puin a ti a,hnial loin ka pi a tho a.Ka beisei angin min lo dawngsawng lo hian min ti hamhaih letling zawk..Thehchhuah inhuam rana kal ka ni a,mahse chutiang engmah awm loin lawm em em in min lo dawngsawng ta zawk tlat.

Ka khawsak dan te min zawta, a tlangpui zawr zawr ka hrilha,ka hrehawmna zawng zawng te erawh sawi ka tum lo bur,tunah tumah mamawh loin ka in enkawl thei tih hria se an tan hriat a nuam zawk ang tih ka chiang,ka pi thingpui nen a rawn let leha,an sawi hmangin an fa te hna an nei vek tawha,an fapa upa ber, kei aia kum 5 a upa in nupui a neia, Champhaiah hna vangin an chhungin an awm tih an sawi bawk.

'Ka tlawh chhuah lawk loh vang che u in hrehawm ka ti lutuk' ka ti sapa, no tlang ka tuai hauh hauh bawk.

'Uh..um,pawi ti mah ta che,i tan a harsat tur zia chu kan hre tawh alawm' ka puin a ti boh..

'Ni e,i nu khan a kal dawn khan min hrilha,mahse tumah kan hrilh lo,i tuar tur ang ang i tuar vek tawha, tul miah lo tharthawh leh kan duh lo mai a ni' ka pi zawkin a ti ve leha,sawi mai tur ka hre lo.

'A boral hma ni khan a bula awm turin i pu nen min ti a,i chhuah khan a zawng tho nang chein a zawng nasa lem lo che,hmuh tum tak tak che nise a hmu ang che,mak ka tih vangin ka zawta,i pa nen inzawmna in lo neih thu kha a sawia, i pu phei chu a thinrim khawpa,i chungah ni lo i nu chungah zawk,khatiang thil i ti reng reng lo ang a ti a,mahse, i nu khan i pa a ni lo tih i hriat hnua i awmdan inthlak nasat zia sawiin a tang ve tlat..kum a veia,kan theihnghilh che ni loin kan hriatrengna i luah tlem tial tiala,mahse i nu boral dawn a a thilsawi te avang khan kan ngaihven leh chea..kan fate hnenah chuan kan sawi ta a,Tv a kan hmuh che khan biakpawh che tumin i unau te an buaia, mahse i pa zawkin a hmu tawh chea, engkim a tha veka,i awmhran laklawh vangin i haw duh lo mai zawk niin a sawia...' a ti ta duah...

'Eng nge ka nu chuan a sawi?” reife kan ngawih hnuah ka ti chhuak halh mai..A sawi tak zawng zawng te kha chu thildanglam a awm lo,pawnlama tha anga lang thin ka pahrawn a che a nimai.

'I pa hriat a duh lo a,bakah amah khan a lo tuar nasa viau mai bawka,a tir lam chuan i chungchang kha a lo awih tak taka, mahse a damloh lai khan an awmpui nula leh i pa khawsa dun a hmu ru ta zauh zauha,mualpho lo thei ang ber tura ngaiin i pa a biaa, mahse a pha zel,a mit ngeia hmu anih avangin pha mahse a hrechiang a, khata tang khan i laka i pa thilsawi te kha a ringhlel ta a...hmuh miah loh tura i bo vang vang mai te kha a rinhlelh zualna a lo ni ta a...mahse, zawng tur chein hun a nei tawh lo..I ngaihdamna a duha, a mamawh ngawih ngawih bawka...' a sawi zo thei lo...kei pawh ka mittui a tla ve bawk...

'Tunah chuan kan inhmu ta a, i pa i hnaih ngai reng reng loin nangmah i in enkawl theia,chhungkua i duh anih leh keini kan awm renga,i duh hun hunah i lo let theia...' ka puin a ti dam thluama,ka piin ka kut a chelh ran bawk..

'Ka lawm lutuk,mahse tunah chuan keimahin ka awm rei tawha, awm rih ka duh,mahse ka lo kal ngun hlein ka ring' ka ti a,min hnial lo.

'Naupang ho an lo haw dawn hnai tawhin ka ring,kal loin tlaiah chaw ei ang che..' ka piin a ti sarh sarh,mahse vawiin hi Julie Birthday a ni a,zan lamah Party tenau deuh a siam dawna,Darian-a nen kal tum kan ni a,thulh ngawt theih a ni lo..

'Zanah kalna tur ka neia,ka ei lo mai ang,ka lo kal leh veleh ka ei dawn nia..' inthlahrung zetin ka ti a.

'Awhaw,a va pawi tak,mahse, i lo kal leh veleh i ei ngei ngei dawn nia,eee..Hazel-i khan pasal neih a tum niawm tak ania' ka piin a ti a,an hriatpui lo a ang viau.

'Nia, ka hre thawi vuai e..'

'Hazel-i hi chu a danglam khawpa, min ngaina lo a, keini pawn kan ngaina lo a ni ber mai...' ka piin a ti leh hlak..Ka puin a lo khap thuai nangin a ngaipawimawh hmel lem lo..

'Pu..engemaw ka sawipui duh che a...' ka ti leh rih..

'Han sawi la...keimah chauh hriat chi em ni?”

'Ni lo,in pahnihin..' ka pi tho uaih tawh a thu leh..

'Eng lo....ih,pasal neih ka duha,palai kal tirna tur ka hre lo a...' a tawp lam a zuihral titih..

'Ekhai...i va han a em em ve,ngah nge kal tirna tur i hriat loh ang? Hetah lo kal rawh se...' phur em emin a ti nghal hluai mai..Ka kal pawh leh hmasak bera han sawi nghal pawp ka inthlahrun vei nen,ka beisei loh lam zawng hlirin engkim a kal vek..

'Tu nge anih? Khawi lam mi nge?” ka piin phur em emin a lo ti ve thuai thuai bawk.

Darian-a chanchin ka hrilha,Doctor anih thu leh an mahni chhungkaw ta Damdawiin a enkawl mek tih te ka sawia, vanneihthlak zetin ka pi a lo zai tawha, ka pi duhzawng em em a lo ni lehzel..Hazel-i pasal neih tur chungchang engmah an lo hrilh lo a, an inneih sawmna card an dawn ni a an lawm loh zia an sawi leh nual..Ka hrethiam takzet,ka nu la dam nise ka pu aia pawimawh tur an awm dawn loh nen...

Ka haw pahin ka nu thlan ka tlawha,ka chhuahsan hnuah thlamuang takin ka nu bulah ka titi thei ta,amah tak awm loin a thlan mai nimahse pawi ka ti lo,engmah thudik hre chhuak hman lo mahse ka dik tih tal a ring tho a, ka duhtawk lutuk..Nitla turin ka awmna a rawn chhun eng ruiha,fur lai nimahse vawiin chu khua a thiang vuka,ka tan chuan ni duhawm ber a ni lo thei lo..

In ka thlen hnu lawkah Darian-an min rawn calla,ka then sak mai,engmah ka la hrilh lo nangin a hriat hunah a lawm ve tho ang tih ka chiang..

'Hello...' zangkhai vahin ka ti a...tukverh atangin pawn lam ka thlir vang vang bawk.

'Hey,Ola...i haw tawh em?” a awpa zet ka hriat rualin ka mit ka chhing a..

'Um,hrilh tur che ka nei a..'

'Sorry,mahse,tunah chuan hun ka nei lo,chuan,zanin kha ka cancel angai dawn tlat mai..' ka mengchhuaka..

'Thil tha lo thleng a awm em?” ka ngaih a tha lo nghal ringawt.

'Aih, awm lo..mahse, meeting hmanhmawhthlakah ka tel angaia..'

'Oh...' ka ti sep ringawt..

'Julie hnenah chuan min lo phatsak mai dawn nia..pawi ka ti ' a ti leh nghut a,a mood a tha lem lo bawk a ang viau..

'Ok,ka lo hrilh dawn nia..'

'Nih phawt aw..ka hman veleh ka rawn bia ang che'

Ka nguai deuh rawih thei,mahse, ka thiante pawh single ve tho tur an ni a, chuti tak chuan a hrehawm lem lo ang,tu tu nge a sawm ka hre lo a,bakah tu pawh sawm se ka care chuang lo.Ka naupang tawh lo a, kawm theih loh ka nei tehchiam lo..Thian tak tak neih leh erawh thil harsa tak a ni tawh thung.

'Hey,khawnge Darian-a?” ka thlen veleh Atei'n a lo ti nghal chat.

'A lo kal hman dawn lo a,hna lamah buaina an nei a..'

'Uh,Julie hnenah insawifiah chiam angai dawn anih chu...' a then sak,ka nui ve hak bawk..Julie mizia kan hre ve ve,a duh anga thil a kal loh chuan a thinrim nasa thin tih kan hrechiang dun viau.

Ka rin ang ngeiin a lungawi lo ta ngei,min hauh chhung zawng ngawi rengin ka ngaithla liam vel mai mai,a thinrim rei leh dawn chuang lo tih ka chiang lutuk.Rin aiin mi a sawm tam phian,a hnathawhna lam a mi te bakah an venga a thian thenkhat leh a cousin te an ni nawk mai..

'Zampui...' ka hawi chhuak vat, Dama ka hmuh takah chuan lawm zetin ka thaw hak mai..

'Hey,nang maw?”

'Um..ka hmuh che ka ring lo a..' tih pahin a rawn thu thla ve nghala,Beer bottle a keng ran bawk.

'Julie hi ka thiannu ania lawm..'

'Maw? A va hriat loh theih ve,ka thianpa cousin ania..' a ti ve thung.

Zu lam hi ka in ngai lem lo a, mahse a in duh te erawh an nun a ni a, sawisel ka tum bau lo,ka thiante hi chuan ka lawm lo tih an hriat avangin ka awm lai chuan in enah pawh an en vak tawh lo zawk,mahse,Beer erawh an in fo tho..

'Toiletah ka va kal lawk ang aw,ka bag hi min lo en lawk mai..' Dama a hnenah ka ti a,a bu nghauh.

Toilet ka pana,music thawm bengchheng lutuk bakah an zu in rim leh meizial khu vangin ka lu a na bur tawh,hawsan ngawt dawn ila an sa nasa dawn lutuk tih ka chiang.

Ka let leh in Dama leh Julie an lo inbe lawng lawng,an kai ve ve tawh bawk nen an rawl a ring ngang mai bawk,mahse an bula awm tumah in ngaihsak hmel an pu chuang hlei lo a..

'Haw mai ka duh tawh' Julie en pahin ka ti a.

'Aaah,a la hma em mai,hei Dama hian a lo sawia, in lo thawk ho tih ka hre reng reng lo' a ti nghal zat zat.

'Thawk ho e,i lo kal laiin a awm lo thin aniang' ka ti awlsam et.

'Aniang,bakah i sawi ngai lo alawm' a ti leh..

'Nia, a sawi lo tawp ang,tu emaw hi a hlauhawm em alawm' Dama'n min rawn en pahin a ti a, ka ner khum nak ringawt.

'Dik chiah mai,nelawm loh si,tawng tlem bawk si...aaaa, mahse a chhe lo tho alawm' Julie'n nui ar ar chungin a ti a, ka mit ka siai zauh ringawt.

Dar 11 pelh hnuah In ka thleng ta chauh,ka intifai sawk sawka, ka mu nghal thak,ka phone ka en a, engmah Darian-an a la rawn sawi lo,ka pu te nen kan inbiakna chungchang hrilh ka chak zek zek tawh.Mahse, a hman huna min rawn biak tur thu a sawia, a la buai emaw in a la thleng lo pawh a ni theia, lo biak hmasak ka duh lo..

Ka alarm riin min ti harha,peih lo zetin ka mengchhuaka,thil hriatchhuah ka nei,nizanah Darian-an min rawn be miah lo.Ka phone ka en a,engmah a awm lo..Engvangin nge Goodnight msg pawh a dah loh? Nidangah a dah lo ngai si lo...Ka wishna ka thawn ta tho..

Office kal tura ka insiam laiin ka phone a ri a, rang zetin ka bana, mahse min rawn call tu ka hmuh rualin ka nek nak mai..

'Hello...' ka mood fuh zat lo tilang duh loin ka ti zangkhai vah..

'I kal dawn tawh em?” Dama'n a rawn ti a.

'Aw,ka insiam mek,nge?”

'Ka tlan loh ni ania,i rualin ka kal thei em ka ti mawle”

'Enga? Ngatinge? Inveng lamah ka rawn tlan dawn hleinem..' ka ti hlak,an veng lam kal turin kan Office tlan pelh angai..

'In vengah zingah chaw ka rawn ei a..'

'Ahh,a tha lawm,khawiah nge i lo awm ang?' ka ti tha ve mai..

'Ka lo chhuk ang, I in chhak lawkah lawm..'

'Ok,lo kal rawh,ka insiam zo tep,i lo thlen hunah i lo sawi leh mai dawn nia' ka ti a, ka phone ka daha, ka rilruah Darian-a bak engmah a lang lo..

Office ka thlen hnuah Darian-a msg ka hmu ta chauh, chu pawh morning wishna tawite,thinrim zetin ka bagah ka phone ka hnawh lut a,hna thawh tumin Computer ka on a,mahse, hnathawhna moodah ka awm hlawl lo..

Lunch ei dawnah erawh ka insum zo ta ngang lo a,Darian-a ka call ta nge nge,a pick dawn lo emaw ka tih hnuah a pick ta hram..

'Hello...' a rawn ti hmuk..Ka phone ka lasawna, ka melh vak ringawt..

'I la buai em?” pangngai thei ang berin ka ti a..

'Buai tho mai,nakinah ka rawn bia ang che..'

'Um,ee,Darian...' ka ti hman chauh..

'Sorry,zanah ka lo kal ang...' ka chhan let hmain a phone a off hmak..Tihngaihna hre lo beidawng zetin ka phone ka melh reng ringawt.

Office ka chhuahsanin khua a thim titih tawh,Darian-an vawikhatmah min rawn be ta chuang lo,an hna hi a buaithlak tih ka hria, mahse nidangah tiang hian a awm ngai lo,tihsual ka neih leh neih loh ka ngaihtuaha,engmah ka tihsual awm ka hre lo..

'Zampui...' ka Scooty dahna ka thlen hmain Hmeichhe awin a rawn ti a, min kohna lam hawiin ka inher vat..Seni ka hmuh takah chuan ka thaw hak mai.

Min rawn pan pheia,nidang ang bawkin a hmui a sen lehpek..Darian-a nen tihtakzeta kan inzui tak hnu hian han inhmuh chang pawn ngeiawm lutuka khawsak a nei ta meuh lo..

'I tha maw?” polite chhuahin ka ti a, ka nui lui sak bawk..

'Um,tha..i lo hria em?” a sawi tum ka man lo..

'Engthil maw?” a ri chuan ka ti tha ve mai..

'Nizanah Emily a accident a...'

'Oh,a va zia lo ve,a na viau em?” ka ti halh mai..

'Aw,na ve tho..Darian-a a awm hnai hlauh zawka,tunah chuan a ngaihtuahawm lutuk tawh loh..' ati leha,ka insangmar nghal talh talh mai..

Emily accident vang chiah hian anih hi Darian-a a lo buai em em ni? Hrep tak hian..a engmah ni tawh lo angin sawi mahse thihna ko tlanga a din meuh chuan a nihna a lo lang chhuak ta anih hi a...