22/ AUGUST - 24

Chapter- 24

‘Aw..Keimah…’Savio-an a ti a.A sirah sawi ve tur hre loin ka lo ding mawl tawp thung.

‘Helmet khum chung khan Car i khalh tihna mi?” a ti leh hlur mai.

‘Aih..Diktak chuan nangmah zawk khan Signal i pe lo a…’ Savio-an a ti leh a.Ka lo ip chawih thung.Mipa ka hriat zawng zawng zinga induhtawk leh chapo ber hian a diklohna a hmaichhana hrilh a lak nat dan tur ka lo ngaihtuah a,chu pawh a nau hnen atang lehnghalin..Ka then sak mai.

‘Kal ang u…’ Savio banah ka va vuana.Muangchangin min rawn en a.Kan mit a intawng sak.Hawisawn duh loin a mitah tak ka en ve ran bawk.

‘Hmeichhia i khalh tir a maw?” a ti leh hmuk.Mahse, Savio en loin min melh run thung.

‘Aw,mahse a khalh thiam pangngai viau’ Savio-an a ti a.Ka lo ip chawih thung.Thil hlui hriatchhuah ka nei nghal zat bawk.

‘Kal ang…’ ka ti leh hmaka,Savio nghak loin Motor lam ka pana,ka lut nghal daih bawk.Ka awm ve reng laia min ngaipawimawh miah lo a ka chanchin an sawi ka duh bau lo.An duh leh Inah inhau mai rawh se.

Rei vak lo an inbiaa,Ramsey Motor lam pana a kal ka hmu a.Savio-an min rawn pan ve bawk.Ka dakchhuak nghal a.A helmet a phelh a,nidang ang bawkin Ramsey a hnial hneh leh lo tih a chiang reng.

‘Ka lo khalh ang…’ a ti a.Ka rindan chiah ka lo ti rilru ve thung.

‘Ka khalh thei alawm’ ka ti hlak.

‘Ka hria..Mahse ka lo khalh ang’ a ti leh hmuk.Hnial loh a tha zawkin ka hria..Ka bu ta nghauh.

Kan tlanchhuah hmain Ramsey-an chak zetin min rawn tlan pel thuak,min en danah khan min hre lo tak tak te pawh a ang viau.Ni lo,min hre hauh lo.Keiin ka hriat loh der vang ngawtin ani khan min hre lo der tihna a ni hauh lo.Ka duh emaw duh lo emaw ka pawm angai.

Muhil thei loin ka mu meng kar mai,engmah ngaihtuahna mumal pu loin thil chi hrang hrang ka ngaihtuah kuala,nidang ang bawkin a tawpna chu Ramsey bawk a ni leh dawn tih ka chiang sa vek.

Nuam lo burin ka harha,ka tho mai peih lo.Office kal lo a mut nilen mai ka chak zek zek bawk.Mahse,hna khawih ngei ngei ngai ka neia,chumai bakah chawlh hi kumkhatah vawi 12 chauh kan neia,Damlohna vanga mamawh tum a la awm theia,kal theih hram hram chuan kal zel ka duh bawk.

Ka tlan loh ni anih avangin Motor ka ken angai,mahse Motor nena chhuah dawn chuan Traffic Jam hisapin hma deuh a chhuah angai thina.Ka ken loh phah fo.Vawiin pawh Mimi call mai ila a that ka ring.

‘Hello..’ zangkhai zetin a rawn ti lang lang.

‘Vawiin chu i rualin ka lo kal mai dawn mawni ka ti a’

‘Ngatinge? I tlan loh ni mi?”

‘Um..Motor ken hi a peihawm loh theih lutuka’

‘Nia,jam nasa thei si..Kan kal rual dawn nia’

‘Ok...Tha lutuk…’ ka ti sap.

‘I la tho lo mi?”

‘Tho dawn chiah’ ka nui a.A nui ve hak mai.

‘Tho teh,kei ka inbual zo vek tawh ania’a rawn ti leh a.Ka tho hma lo lutuk hi min hau fo.Ka sim phah lem hlei lo a.

Ka inbuala,insiam peih vekin inhnuaiah ka chhuk ta chauh.Ka pa te dawr kal tur an lo chhuak hman daih tawh bawk.Chaw ka ei sawk sawka,tiffin tur Luni ka siamtir pah bawk.Keiman siam ka duh viau rualin tukin chu midang Motor a kal tur ka ni a, chumai bakah tuk dang aiin ka tho har zawk bawk nen ka chet a buai vek.Thawh tlai hi chuan diktak chuan hna hi a sawt hlawl lo.

‘Zanah tihtur i nei em?” min hmuh veleh Mimi-in a ti a.Ka lu ka thing a,Scootyah ka lawn nghal bawk.

‘Anih chuan a that hlauh chu,Adiki’n naute a neia,en ila..’ a ti leh a.Adiki hi Mimi thiannu a ni a,Kohhran lamah an inhmang dun nasa a,kan inhre ve tho nangin kan inkawm over ve lo thung.Nikum kum tirah pasal a nei a.Kan veng bul lawkah an awm tih ka hriaa,mahse eng ang chhungkua a mi nge Pasal a neih ka hre lo thung.

‘Naute a nei tawh law?”  ka ti satliah.

‘Um,mipa ania..Zanah hian hunawl a vang thei lutuka,zanin hi ka awl a’

‘Ok..Kan kal dawn nia’

Tlan pahin hna chungchang kan sawi zawma.Nimin lama Ronny Mood chhe lutuk kha kan sawia,kan nui dawn nghek nghek bawk.Office a kan thawhpui hmeichhia ten an duh zia ka hai lo.Kan inkawmngeih avanga min ei lo an kat nuk tih pawh ka hai hek lo.Ka thian leh ka Boss mai a ni a, thildang nihna ka lakah engmah a nei lo a.An duh duhin min ei lo mahse khin let tumna ka nei ngai lo.

Office kan thlenin Ronny a lo thleng daih tawh.Mak ti zetin Mimi nen kan in en hel hawl ringawt.Nidangah chuan kan thlen khalh ziah a.Mahse amah hi mi punctual lutuk a ni a,a thlen hun pangngai hi a pel meuh lo.Chuvang takin Staff tumah tlai ngam kan awm lo hrim hrim.

‘Zorin,I thlen veleh lut nghal turin Bossin a ti che aw’ kan peon,pa upa lam tawhin min lo ti nghal var.Phawk zetin Mimi nen kan in en a.

‘Ngatinge a va kal hma ve?” ka bag dah pahin ka ti a.

‘Nia,a lo thlen na a rei tawh mai’ a ti a.

‘A mood a chhe viau em?” ka insum hman lo.Ka nel hle nangin nimin ang kha chu tawn leh ka chak hauh lo thung.

‘Chhe hran pawn ka hre lo.Coffee a duha,ka va pe a.Amah tak phei chu a lo la chhuak leh lo reng reng’ a ti awlsam leh mai.Tul lo zetin thil tih dik loh ka neihawm ka ngaihtuah kual chiam a,engmah chutiang ka hrechhuak zo lo.

Room kawngkhar ka kik a,lut turin min rawn ti nghal a.A aw atang ngawt chuan a mood awm a hriattheih loh.Ka nem hawnga, ka luta,mahse ka beisei loh zetin inleng a lo nei der tawh.

‘Zorin,lo thu la…’ min hmuh  veleh a lo ti nghal vut.A mood a that hmel viau.A inleng lo thu min hmelhriattir a,a sawi hmangin mi pawimawh tak a ni tih ka hrethiam nghal mai bawk.File min pe a,tih tur a sawi nghal teuh bawk.

‘Eng nge a lo sawi a?” ka chhuah leh veleh Mimi’n a lo ti nghal sa sa.

‘Hei hi…’ ka file ken ka lek kang zauh bawk.

‘A va urgent awm em em,tunah a thleng tawh ania’ a ti leh vang vang.

‘Ka hre lo,chutianga hmanhmawha tih theih pawh a ni hleinem.Ka rindan chuan a inleng vang sawn a kal hma aniang’ ka ti leh duah.

‘Inleng maw? Ekhai,a va han hma si ve’ a nui a.Chhang loin ka nui sak ringawt.

Tho miah loin ka thawk ta char char,Lunch ei dawnah ka zo thei ta hram chauh.Ka thut hmunah Lunch ka ei mai bawk.Ka kal dawn khan ka lu a rit luk a,na lao ber sawi tur awm si loin ka nuam lo ngawih ngawih bawk kha ania,ka thlen veleh hna hmanhmawhthlak a lo awm leh bawk nen ka nawm lohna lam ka lo mangnghilh titih hman.Mahse ka thut hahdam takah chuan ka lu natzia ka hre chhuak ta chauh.A na satliah pawh a ni lo,ka bekah min tur ut ut a,tuboh rit zeta chhut chawrh chawrh ang maiin a ri dut dut bawk.

‘Mim,kan chhuak lawk aw…’ Mimi lo let veleh ka ti a.

‘Khawiah?”

‘Ka hawi thawveng lawk dawn’ ka ti sap ringawt.

‘Uh…A that chu  i tha maw?”

‘Tha…Aih,tha chiah lo..Ka lu a na deuh a’ ka ti chhuak halh mai.

‘Ka ring reng a ni..Damdawi i duh em?” a ti leh a,Ka lu ka thing ringawt.Diktak chuan min be tawh rih lo se ka duh ber.

Kan Room ka chhuahsana,kal leh main a tur hre loin Lift lam ka pan ta ngawt.Inhnuai lam atangin a lo chho meka,ka nghah chhungin bang ka nghenga,ka sahal huam huamin ka hre bawk.

A inhawng thawm ka hriat rualin ka ding mara,luh tumin ka pen chiah tihin Ramsey a rawn chhuak ve chiah thung.Ka pen tawp chata,kei ang bawkin ani pawh hamhaih ve niawm takin a ding ve chut bawk.

‘Zorin…’ Ronny-an min rawn tih thawm ka hriat rualin ka thaw hak mai..Muangchangin ka hawi leta,kan hnungah a lo ding reng tawh.

‘Inhnuai lamah chhuk lawk ka lo tum a’ ka ti sap.

‘Ok..Ka hria alawm,Ramsey…Officeah min lo nghak lawk thei angem?’ min en loin Ramsey a en daih bawk.

‘Ok,ka lo han chho ang’ bung vutin Ramsey-an a ti a.Min rawn en a,a bu nghut bawk.Engmah ka sawi lo,sawi tur pawh a awm hek lo.

‘I nuam lo tih Mimi’n a sawia,ngatinge engmah i sawi loh a?” Ramsey kal veleh min rawn din hnaih pahin a rawn ti a.Ka thle bak mai..

‘I haw duh chuan i bag ka lak tir anga,ka thlah ang che’ amah bawkin a ti leh a.

‘Angai lo,reilote pawn lamah ka zuk hawi thawveng lawk anga,ka zia leh mai ang’ ka ti a,Harsa ti ru zetin ka nui lui sak bawk.

‘I luhlul reuh mang e.I hmelah pawh I nawm loh zia a lang reng a..’

‘Angai lo…Bakah tianga i din reng chuan i Staff dang nula hoin min ei duh mai ang’ ka nui leh hak.

‘Ngawi mai teh a’ a ti hluk.

‘Sorry,Office a ni tih ka lo theihnghilh hman alawm le..I inleng turin a nghah che kha aw..’ ka ti leh a,Ramsey hming sawi ka hreh ru tlat.

‘Ni tak,eee..Amah kha hmanzanah pawh i hmuh kha,Agnes-i thianpa kha..A pasal hual ka tihna,I la hria em?” a ti leh duah.Ka bu nghat ringawt,diktak chuan a sawi zawng ngawt pawn ka luak a tichhuak hlui mai.

‘I haw duh lo tak tak maw?” a ti leh a.

‘Aw,duh lo..ka kal’ tih pahin ka ban ka vai zauha.Ka then lui leh sak bawk.

Reife keimahin ka thu ta vang vang..Mahse, ka ngaihtuahnaah Ramsey bak engmah a lang lo.Eng ti turin nge a lo kal ka hre hek lo.Keimah vanga lo kal a ni lo tih ka chiang viau lawi.Ka phone a ri kauh,ka en a.Whatsapp msg a lo ni a..Ka open a,Mimi..

‘Khaw nge i awm?” tih zawng.Ka kalchhuak lawk dawn tih a hrerenga..Msg type vel ka peih hlawl lo.

‘Inhnuaiah ka awm’ a pick veleh ka ti nghal sap.

‘Um…I zia deuh tawh em?” a rawn ti a.Eng chu a hria ni maw?

‘Ka zia tan,tihtur a awm a mi?” ka ti leh a.

‘Aih…Ih,eng lo ania…’ sawi mai loin a ngawi leh rih.

‘Eng maw?” ka ti hlak.

‘Ramsey…ih,Ramsey a lo kal a’ a ti zawi sap.

‘Ka hmu alawm’ awlsam zetin ka ti a.

‘Maw? Engtikah?” mak tih hmel zetin a rawn ti leh sa sa.

‘Ka chhuk dawn khan mawle,ngatinge?” pangngai thei ang berin ka ti leh a.

‘I tha em tih ka hre duh a…’ a hmel ka hmu thei lo nangin a tim deuh tih ka hrethei.

‘Tha lutuk…Enteh,thilpawimawh a awm lo tihna mi?”

‘Um…Min rawn be thuta,min thawng lutuk a’ ka ang pham mai..

‘A bia che maw?” ka insum hman lo.Kei min hriat loh laiin Mimi a la hre thung a..

‘Aw,mahse mak i va tih hmel ve’ a rawn ti leh a.

‘Aih,mak ti lo e..Ka dah dawn aw,Nakin deuhah ka lo chho ang.Boss khan mamawh a neih chuan Rza kha lo kal mai rawh se aw’ ka ti leh a.

‘Ok..Rza ka lo hrilh dawn nia’

‘Bye’ ka ti sap.Ka phone ka off a,che loin ka en ngai ka en ngawt ngawt ringawt.

Kei min hre miah lo a,mahse Mimi a hre thung.Kan inkawp chhung khan ka thiannu ber anih avangin Mimi nen pawh an innel hman viau.An infiam bawrh bawrh a,achangin kan chhuah ho tum a awm bawk.Mahse, kei min theihnghilh hmaka,Mimi a hre thung…Ni lo,thil pakhat chiah a awm.Kei ang bawkin min hre lo der ve tho..Mahse, engvang nge min hriat loh der kher? Min hria emaw hre lo emaw engmah hlawkna a awm der si lo..

Reife hnuah kan room lam ka pan chho leh ta chauh.Mimi in min hmuh veleh min rawn pan vat bawk.Ka that leh that loh min zawta,ka tha tih ka sawi ve mai.Nuam tak chu a la ni lo nangin a hma ai kha chuan zia tak a ni tawh hrim hrim.A hmelah sawi duh a nei tih ka hretheia,mahse ka haider lui tlat thung.Ramsey chungchang sawi chakna pakhatmah ka nei lo.Hna thawh tur tlem ka neia,thawh tumin ka thu vang vang,mahse ka ngaihtuah thei hlawl lo.

Sana ka en a,haw a hun titih tawh.Ronny-an min rawn ko a.Haw a hun hnai tawha,nimin anga buaina kha kan neih loh hram ka beisei ru takzet.

‘I zia deuh tawh em?” ka luh veleh a lo ti nghal vut.

‘Aw,ka tha…” ka ti sap.

‘Anih chuan zanin kha i kal thei ang tiraw?” a ti leh a.A sawi awmzia ka man mai lo..

‘Agnes-i party kha…’

‘Oh…’ ka ti hap ringawt.Ka lo hre tawh miah lo.

‘I theih loh chuan ka tilui lo che ania’ inthlahrun hmel zetin a ti leh a.

‘Aih,thei e..Ka lo theihnghilh a.Chuvang mawle’ ka ti a,ka then sak bawk.

‘Ok,a that hlauh chu..Dar 7ah ka rawn lam dawn che nia’ a ti leh a.Ka hnial dawn zeta,mahse kal rual a that ka ring leh ta zawka,ka but a nghauh.

In ka thlen veleh ka inbual sawk sawka,ka lu na awm tawh lo mahse chhungril lam atangin ka chau ngawih ngawih a,engtihmah ka phur hlawl lo.Mahse, zanin hian Ramsey ka hmachhawn ngei ngei ang.Hahdam taka ka thlir thei anih phei chuan ka tan hmasawnna ropui lutuk a ni ngei bawk ang.Chhung inkhawm kan hman zawh veleh ka pa hnenah ka thiannu Piancham lawmnaah ka kal dawn tih ka sawia,chaw kan ei nghal dawn tih ka sawi bawk.Min zawt chik viau dawn emaw ka tih laiin Nu Hmingi zawkin min zawt a.Kan thawhpui tih bak engmah ka sawi chuang lo.

Room a ka let lehin ka Phone ri a tawp ve chiah thung,Sana ka thlek zauha,dar 6:30 a ni tawha,Ronny a ni tawh ngei ang,ka phone ka en a.Mahse, Mimi zawk,tunah ngatinge min lo call ang le? Ni lo,thil hriatchhuah ka nei nghal zawk.Hna kal tura kan chhuah dawn khan zana Adiki naute en puiah min sawm tak.Huizzz,engtin chuan ka ti dawn chu nimaw?Ronny nen kan chhuak dawn ka tih chuan hnathil ni si lo lehnghal chu a ngaihdan tur ka chiang sa vek.Mahse, dawt ka sawi anih chuan a hrechhuak leh tho maithei..Ka thaw hak mai..

‘Hello…’ a rawn ti lawng lawng.

‘I lo call lai ka lo hre lo a..’ ka ti a.Engamah hmain ka tim dai mai.

‘Pawi lo,engtik nge  i hman ang?”

‘Enteh,diktak chuan zingah khan zan lamah kalchhuahna tur ka nei tih ka lo theihnghilh a’ nuam ti lo zetin ka ti a.Ka sawi zawh rualin a thaw hak mai.

‘Anih chuan i hman leh dawn si lo ni maw?” a ti nghauh.

‘Aw,a zia lo ka ti lutuk.Ka tihtur ka theihnghilh chiang lutuk a’ ka ti leh sap.

‘Ok..A pawi lo,keimahin ka lo va kal mai ang..’

‘I thinrim em?”

‘Aaah,teh nang..A ho em mai,a hla pawh a ni lo a,a harsa lo’ zangkhai fein a rawn ti leh a.Ka chil ka lem khalh thung.

‘Anih chuan thuphachawi nan naktukah ka treat ang che…’

‘Yess,a nuam dawn..Khalam kha chu ka hnar loh zawng tak’ a ti a,a nui hak hak mai.Ka then ve sak bawk.

Ka hlauhthawn angin engmah min zawt ta lo hlauh chu ania,mahse Dawtsawi chiam angai lo kha ka lawm tawk a ni hrim hrim.Zaninah tu tu nge kal dawn ka hre lo a,mahse thil pakhat chiang reng chu thlalak ka pumpelh angai ang.Anih loh chuan eng emaw Ronny nen kan inkarah awm angin angai tak tak mai ang.

Dar 7ah chiah Ronny-a a rawn thlenga,ka Pa nen an inhriat sa avangin an inbe luama,ka bialpa ni loin Office a ka boss a ni tih leh kan inkawmngeih pangngai viau tih a hriaa,hnamdang a ni chungin a be chhe lem lo.Bakah sumdawng hlun a ni a,bungrua la turin Phai a kal zuta,thian tha tak tak a nei thluah bawk nen chuti tehchiamin hnamdang lakah a ngaihdan a kawi lem lo.

‘Kalna tur kan nei tih ka lo theihnghilh a..Mimi nen kalchhuah kan lo tum a’ kan tlanchhuah hnuah ka ti a.

‘Anih chu le,khawiah nge kal in tum a?’ a ti tha ve mai.Kan kal tumna ka sawia,a chek tlak mai.

‘A thinrim viau dawn anih chu..’ a nui a.Mimi pawh hi a hrechiang viau tawh.Kei ang bawkin a thinchhe ve viau tih pawh a hrechiang ve tawh ang chu.

‘Thinrim lo…Mahse, kan kalna tur ka sawi lo a’ ka ti fan raih.

‘Ahh,hria pawh nise buaina a awm hleinem..A ni em?”

‘Ni mai e,mahse diktak chuan hna kaihhnawih lo thil anih avangin angai kawi ang tih ka hlau ve deuh a’

‘Anih chuan hna nen a inzawm tih hrilh hmak mai la..’ a nui hawk hawka.Ka nui ve hak bawk.

‘Eee,vawiina Agnes-i  pasal hual lo kal khan Mimi a lo hre saa,an inbiak danah an innel thawkhat bawka’ a ti leh thuta.Ka chil ka lem khalh mai.Ka bag hnuaiah ka kut ka thukru zal zala,ka hmer kawp tlat bawk.

‘Anih chu mawle’ pangngai thei ang berin ka ti halh ringawt.

‘A sawi dan khan a nuna hmeichhe pawimawh ber pakhat vanga a hmelhriat hlui a ti a’ ka inring hman lo,ka chil ka haka,ka khuh zui bawrh bawrh mai..

‘Ngatinge?” mangan hmel zetin a ti a.Ka chhang dawna,ka khuh nasa bawk nen ka chhang hlei thei lo..Ka ban ka vai ta ngawt.

‘Sorry ‘ ka tawngchhuah theih veleh ka ti sap.Ka mittui a tla phang mai bawk,tui ka in leh a..A hma ang em em kha ni tawh lo mahse ka khuh a la reh hleithei lo.

‘I tha meuh maw?” min ngaihtuah hmel zetin a ti vut.

‘Tha…Ka tha’ ka nui a.

Kan kalna tur kan thlen hma chu ka tawng ta lo,a khat tawkin ka khuh leh khauh thin bawk.Ka ngaihtuahnaah engmah a lang thei lo..’A nunna hmeichhe pawimawh ber’ tih lai kha a ri nawn tlut tlut,kan inkawp hmain Mimi nen an inhre ngai lo tih lah ka chiang..Mahse,a nunna pawimawhber ka nih si chuan engtin nge khatiang thil tenawm kha ka chungah a tih theih si??!!Zawhna hlir,chhanna awm si lo..

‘Ronny…In lo thleng thei maw? Zorin,I tha em?” kan thlen veleh Agnes-in a lo ti nghal chul.Ronny-an a biangah a fawh sak zauh bawk.Min rawn en a,a nui sang.Hmanah khan min mil lo thina,min huatna nen min en thin tih a lang eih lo.

A mal chanve thleng vel lek pawnfen tight zet a fenga,a kawr hakin a taksa a khuh tawi viau bawk,pheikhawk sang fahran a bun bawk.A lian lo a,pian nalh lutuk han tihtur a ni hek lo.Mahse, zep rual lohin a nalh takzet thung.Designer tha eltiang a ni a,a thawmhnaw hak tur a hria ti ila a dik ber ang.

‘Ka tha lawm’ zangkhai thei ang berin ka ti a.Ka nui lui sang bawk.

‘Lo kal ula,in duh duhin lo awm ve tawp mai ru aw..Thian tha zual tak tak ania,kan tam dawn lo’ a ti leh a.Ka bu nghat.

Thutna awl awm kan pana,intur min rawn pe vat.Coke bak engmah ei ka tum lo.Ka hawikuala,mahse ka zawn ka hmu lo.A nupui hual Party ania,neitu chan changin a hmasaberah a thlen ka lo ring ve ngawta,mahse a awm tlat lo.A awm loh chuan hahdam huai awm tak ka hahdam chuang der lo.

Kan vaiin mi 10 pawh kan tling lo,Party satliah mai ti mahse a tawk tiu teu viau..Agnes-i thiannu Saii bak tumah hriatsa ka nei lo.Mahse, ani nen hi chuan engtiklaimahin thian han tihtur kan la ni ngai lo.Agnes-i vanga hria ka ni satliah ve mai.Tunah phei chuan Ronny nen kan ni a,ani pawh Ronny thian tha tha tak a ni a,Delhi an awm laia inkawm vek tawh anni a.Tha takin min lo lawm ve mai.Saii chauh lo midang pawn Ronny bialnuah min ngai vek.Insawifiah tul ka ti chuang der lo.Lo ngai vel mai mai tehse.

‘Nuam i ti em?” ka bula rawn thut thlak pahin Ronny-an a ti a.A inhnem nen rui viau awm tak,rui hmel pawh a pu chuang lo.

‘Um..Nuam e…’ ka then sak.

‘Haw i duh chuan kan haw thei ania’ a ti leh a,Ka lu ka thing nak.Diktak chuan kan chaweikham hnuah Music ring lutuk an play a,ka lu a na leh zo vek zawk.

‘Ok,I duh hun hun animai aw’ a ti leh a.Chhan tumin ka ang hman ziau,mahse Hmeichhe pakhat,hmui hnawih sen zet leh sam buangthangin lam turin a rawn pawt tho a.Ka thaw huai mai.

Balcony lam ka pan ta zawk.Railling bawhin ka ding a..Thlifim a rawn thaw heuh heuha,ka harh sawng sawngin ka hre bawk.Ral lehlam ka thlira,Light a pe tuara,a nalh takzet.

‘I bialpa saw Dami sawn a chhuhsak mai ang che tih ka hlau hle mai’ tawngthawm ka hriat rualin ka inher zawk.Ka hnung lawkah Ramsey a lo ding reng tawh.