22/AUGUST- 26

Chapter- 26

Ebenezer lam panin ka tlana,ka vai deuh ruai a ni ber.In control ka tum pawn ka thei hlawl lo.A thi tur a ni lo,Ani tel lo chuan engmah ka ni ngai dawn lo.Ka tlan pahin ka tawngtaia,mahse mumal a awm pawn ka hre lo.Chunglam tan chhantlak engmah ka chham lo zawk hial ang.Mahse, kan mamawh zawng zawng hretu hian kan dil hma pawn a hresa veka,ka dil duh a hre em em ang tih ka chiang ve tawp thung.

Ka thlen veleh ka tlan lut nghal rawk rawk mai.Kalna tur lam hre loin ka hawikual leh riha,mi zi nuai nuai zingah Savio chhungte emaw kan  thian zinga tuemaw tal hmuh ka inringa,mahse tumah ka hmu lo.

‘Zorin…’ min ko thawm ka hriat rualin ka hawi let vat.Ka bul lawkah Ramsey a lo ding reng tawh,a hmelpa leh ngeng zet thin kha awm loin a lang dam thlup bawk.

‘Enteh..Hetah hian Savio a awm an  ti a…’ Ka ban ka vai kual a.

‘Um..A awm,lo kal la…’ a ti leh nghut.

A bawp sei zeta a pen pawk pawk chu a hnungah ka zui dat data,Savio chanchin engmah sawi lo mahse a hmelah khan dik lo a awm tlat in ka hre thung.A lo thi reng tawh a ni mai angem? Ka petek nawka,Ramsey ka va bawh titih.

‘Fimkhur la…’ a ti nghut.

‘Sorry..Thildang ka lo ngaihtuaha’ ka ti lawi rat mai.Sawi duh nei niawm takin a ang zuaua,mahse engmah sawi loin ka ban rekah a rawn vuan a,min pawt kal ta zawk.Hnial tur ka ni tih ka inhria,mahse tunah rih chuan tuemaw tal rinchhan tur ka mamawh lutuk.

Min kai zela,an lo dingkhawm taih kan thlen rualin min thlah nghal vut bawk.Apuia leh Dika an lo awma,Savio nu leh pa Bakah an Cousin ho ka hmu nual bawk.Ramsey nen kan inthen hnuah tun hi an chhungkua a ruala ka hmuh lehna hmasaber a ni a,Ramsey nen inthen tawh mah ila an vaiin Savio nen kan inkawmngeih zia an hre vek a,tha takin min lo be siam siam hlawm.

‘Engtin nge an awm?” Apuia hnenah ka ti a.Ramsey erawh an chhungte awmkhawmna lamah a phei tawh thung.

‘Chhuantea chu a harh tha..Pem tenau deuh bak engmah hliam a nei lo.A nu te an awma,Savio zawk chu an zai mek’ a ti hap.

‘Eng lai nge a sawh a?” ka aw a khur dar dar mai.

‘Lang theiah chuan hliam a awm vak lo.A dar ruh a auh an ti a.A kawchhungah thi put a awm bawka..Mahse, lungngai lo phawt ang’ tih pahin ka darah a beng thak thak a.Kan inkawm khawm vek chungin Savio nen hi chuan kan inpawh zual bik tih an hre ve tho.

‘Thu ila..’ Apuia’n a ti a.Kan piaha thutna awl lam panin Dika nen kan pathumin kan inzui phei a.Mipa anni bawka,kei ang em chuan an chiai ve lem lo.

‘Engtin nge an accident reng reng a?” kan thut fel veleh ka ti sap.

‘Bolero-in a su…’Apuia’n a ti nghauh.

‘Maw? Engtin nge a sut ngawt theih a?Overtake an tum tihna mi?” ka ti ha mai.

‘Aih,Bolero khalhtu kha Damdawi a rui a,New Capital lam atanga kan rawn tlan thla kha hnunglam atangin a rawn su…Keini kan tlan hmasa a’ a ti leh a.Ka thaw hak mai.

‘An man em chu pa chu?”

‘Man e..Chhuantea hian a khalh zawka,a hnungah Savio a thu a..A hnung zawk anih vangin a na niin ka hria’ a ti leh a.Ka bu nghauh ringawt.Ka thlen hma ai khan tunah chuan midang an awm ve ta bawka,ka thlamuang ta zawk.

‘Ngatinge rui chung hian Motor an khalh thin le aw?” ka ti vang vang mai.

‘Ni chiah mai.An mahni tan mai a pawi tawh thin bawk si lo’ Dika’n a ti ve a.Thil ngaihtuah chhuah ka nei thut.

‘Am-i in hrilh em?” ka ti nghal sap.

‘Hrilh miah lo…I sawia,ka hrechhuak chiah..’Apuia’n a ti a.Naute thla 5 mi a pai meka,thil engemaw thawng lutuk chi a awm kha atan a pawi thei maithei.Mahse,Savio harhchhuah hun nghak ta ila,a harhchhuah si loh chuan…. Ka lu ka thing nawk mai.Ngaihtuahna atthlak lutuk.

‘An zai zawh hunah hrilh ila..Nge Savio u saw ka va rawn dawn mi?” Apuia bawkin a ti leh a.

‘Ka hrethiam bik lo.A bialpa mai pawh ni loin Naute pa a ni a,hriat hi a phu a..Mahse..’ ka ngawi leh daih.

‘A thawng viau dawn sa a..Aaaa,ka hrethiam bik lo’ a ti leh nghut.Dika a tho hluaia.

‘Ka va rawn ange,an lo hrilh tawh zawk maithei bawk a’ a ti a.Kan chhanna pawh nghak loin a kal zui daih bawk.Amak lem lo,hei hi Dika tihdan fo a ni hrim hrim.Kan thianho zingah a tawngtam lo ber a ni a.Mahse, a rilru a lang tawh chu engmah ngaihtuah kual loin a follow tawp zel.

Reivaklo hnuah a rawn let leh a.’Nakinah ka lo hrilh ang a ti a.Zai zo phawt se’ rawn thut ve pahin a ti a.Ka bu nghauh ringawt.Hrilhtu nih a chakawm zawk zawk lo khawp ang le..

Darkar chanve vel kan thut hnuah Chhuantea an rawn chhuah tira,Admit a ngai dawn lo tih an sawia,ka thaw huai mai.

‘Min zui haw duh suh u.Ka tha..Savio bulah awm zawk ula’ a ti a.A hmelah chuan inthiam lohna niawm tak chiang takin a lang thei bawk.

‘Um..Hahdam la,indim ang che aw’ ka ti sap.A darah ka chul hauh hauh a,harsa tih hmel zetin a then sak.

‘Ka lo tum ang,chanchin lo sawi zel ula aw’ a ti leh a.Ka bu nghauh.Savio Cousin te hoin an rawn hnem tliar tliar a,in enkawl tha turin an fuih hlawm bawk.A thiam loh a ni lo tih an hre veka.Savio na zawk mahse ani demna tur a awm hek lo.

Ka rin aiin an zai rei ta.Ka thu hle hle thei lo,ka teikual a.Ka engtihmah a tui lo.Kei ang bawkin a nu pawh a awm hle hle thei lo.Mak min ti mahse pawi tihna pawh ka nei chuang lo.Inzaina room kawngkhar a rawn inhawn rualin ka vir zawk a ni ber.Mahse, Savio Pa leh Ramsey-an Doctor an pan vat ka hmuh rualin ka dinna ngaiah ka ding ta zawk.Tun hun hi chu Family lam chan liau liau a ni tih ka hrethiam ve tho.

‘A kawchhunga thi put kan titawp thei a.Kan zai hlawhtlingin kan hria’ Doctorin a tih riah ka thaw huai huai mai.

An rawn nawr chhuaka,room lam an panpuia,chim huk a that loh zawk ringin keini erawh pawnah kan awm thung.Kan haw hmain Am-i te an lo thlenga,Savio nu leh pa bakah a Cousin mipa a riak dawna.Am-i lah hnar haw tum luih chi a ni bau lo mai.Ka dem miah lo,kei ni ila ka haw bik miah lo ang.

In ka thlen meuh chuan dar 9 a ri thuak tawh.Ka kalna tur ka sawi lawk avangin ka haw veleh Savio chanchin ka pain min lo zawt vat.An zai hlawhtling an tih thu ka hrilha,an accident dan ka hriat ang ang ka hrilh bawk.

Ka inbuala,ka inbual zawh veleh inhnuai lama chhuk tawh loin ka mu ta than.Mimi hnenah Savio Accident ka hrilh ve a,ani nen hian an inhre tha thawkhat viau.Ka rin ang ngeiin naktuk a tlawh a dun thu a rawn sawi nghal zat.Ka muhil dawn siar siar tihin ka phone a nghawr data,pawimawh a awm ka ring lo chungin ka en leh rih.Mahse, Msg min rawn thawntu ka hmuh rualin ka harhchiang nghal kawk thung.Ramsey…

‘I muhil tawh em?” tih ringawt.A sei miah lo nangin thil tamtak ka ngaihtuah phah tho.Ka reply ang nge Reply lo ang tih ka ngaihtuaha,thil pawimawh a awm pawh a ni thei.

‘Muhil lo..Savio a tha lo leh mi?” tih ka thawn let ta zawk.

‘A tha..’ tih zawng a rawn reply..

‘Ok..’

A reh ta vang vang.Atthlak zetin a rawn reply leh ringin ka phone ka melh reng a.Enge rawn sawi se ka tih pawh ka hre chuang lo.Kan inkawp chhung khan Msg type neuh neuh a peih loh zia ka hrechiang hman viau.Hun awl a neih veleh min rawn call mai zel kha ania.Ni lo,engvangin nge thil tul miah lo ka ngaihtuah leh tak chiam ni a??!

‘Dar engzatah nge in kal dawn?” ka pa hnenah ka ti a.

‘Dar 11 velah kan thlen thlak chuan kan tlai lo ang..I nu lah nizan khan a pum a nuam lo a,kan mu mang lo a’ a ti a.Ka engahmah a thawk lem lo.

‘A va zia lo..A kal peih dawn mi?” a langah erawh chuan ka ti tha ve mai.

‘Zing lamah kha chuan a zia a.A kal peih ang a tih kha maw’ a ti leh charh.

‘Khawnge tunah a awm a?” ka ti leh a.Ka thingpui ka tem thlak bawk.

‘A inbual aniang.Savio pawh chu zing lamah enge a an awm?” a ti leh a.

‘A harh tawh an ti a.Office banah ka tlawh ang’

‘A va lawmawm teh hlauh ve’ a ti leh boh.

‘Engtikah nge in lo let leh ang?” ka ti sap.

‘Ka hre lo le,ka in check-up mai bakah i nu pawh hi entir nghal law law tha in ka hria,a pumna hi a sawi zing ta riau maia’ a ti leh a.Ka mengphar ak mai.Tun tum bak hi a pumna ka lo la hre ve miah pek lo.Inah ka awm tlem ti dawn ila hna ka kal bak chu zan lamah pawh pawimawh bik anih loh chuan ka chhuak ngai lo.

‘Nia,kal rau rau chuan tihnghal a tha alawm..Ka han insiam teh ang’ tih pahin ka tho a.Min chhang lo thung.

Office ka thlenin an lo thleng nual tawh.Ronny-a a lo kal tawh bawk.Rza nen nimin lama Meeting chungchang an lo sawi duna,thla tawp dawn anih mai bakah Sawrkar kum tawp dawn anih avangin kan buai zuala.Sawrkar hnuai ni lo mah ila min effect ve vek tho.

‘Damdawiin lam chu kal ila…’ Stepa kan chhuk laiin Mimi-in a ti a.

Nia,vawiin lam eng nge a an pawh ka hre lo’ ka ti sap.

‘I kal hreh em?” zawi deuhin a ti a.Ka en vat.

‘Ngatinge?”

‘Aih…Eng ni lo e..’

‘Sawi mai teh a’ ka ti hlak thung.

‘Eng lo,Ramsey a awm takin ka ti a’ nuam lo tih hmel zetin a hmui a pet a.

‘Naaah,ho lutuk.Hmanlai thil vanga ka la buai reng te chuan hmalam ka pan thei nang’ ka ti a.Ka nui lui sak bawk.

‘I chiang chiah maw?” a ti leh talh.

‘Lutuk…Nupui nei mai tur lehnghal laka lo in ham buai tur chuan ka tha lutuk mah mah in ka hria’ ka mit ka siai zauh bawk.

‘I va han chhe tak’ tih pahin min rawn chum a..Kan nui dawn hawk hawk mai.Mahse, Mimi ka bum mai a ni lo a, keimah leh keimah ka thusawi in awih tir tumin ka inbum tih erawh kei aia hrechiang an awm lo.Sawi hi a awlsam lutuk,zawm erawh chu hla tak a ni.

Damdawiin kan thlenin Savio u leh Am-i bakah Apuia a lo awm ve bawk.Khum lu lam an lo ti kanga,Savio-an min hmuh veleh a lo nui var var mai.Tul lo lutukin ka mittui a hnai kuara.Ka khap sak sak bawk.

‘Zorin,in va fel ve..Lo thu ru..Mimi,I tha maw?” Savio u in a lo ti sawk sawk.Mimi thutna awlah a thu a. Kei erawh chuan khum lam ka pan thung.

‘In dam lo awmpui chu hei a va harh tha tawh ve’ tih pahin khumah ka thu a..

‘Nia,vawiin lam chu beisei aiin a tha a..A lawmawm tak tak a ni’ A u bawkin a ti leh a.

‘A dam vat mai ang.Damdawi mum lian hian riahpui chawt bawk se la’ ka nui a.

‘Awi,awmpui ve tawh zawk the,a che thei si lo..A thinchhe em mai’ Ami’n a ti a,Kan nui dar dar mai.

‘Awmpui lo ang.Mahse, nitin chu lo kal ka tum dawn nia’ ka ti a.

‘Ka phut ang,mahse hei tunah pawh tlaiah i lo kal chauh a..’ titau aw a hriattheih.

‘Teh nang a..Nizanah pawh ka riak alawm..Tiraw Apui’ ka nui a.

‘Nia,a riak..Ama khumah…’ kan nui hak hlawm mai.

‘Ka dam that hunah i va han chak dawn lo tak’ a ti leh hmak.Ka nuih a za zual sauh.

‘Zanin chu Ami chiah riak se,naktukah phei chuan a pangchang lutuk anga.A tap tawh maithei ni’ ka ti leh a.Ami nui khur dar dar chu ka en a.A lang pawr fap mai chu ka khawngaih.Nau neih hnua inneih an ti a.An chhungte ve ve an inpawh vek tawh bawka.Engmah rilru hahna tur a awm lo.Mahse,nizan lamah rilru hah nen a mu tha lo tih a lang reng.

Beisei ai takin Savio a tha chaka,nitin ka tlawh ziaha,ka thlen har deuh phei chuan min lo call hman ziah bawk.Kar khat a awm tlin hmain an chhuah tir ta bawk.Damdawiin ka kal apiangin Ramsey hmuh mai ka hlau thina,mahse a Accident ni bak kha hmuh tur a awm leh ta miah lo..Kan kal hun a in ang lo a ni mahna le.Nge inneihna turah a buai zawk? Inneihna tih ka ngaihtuah zawngin ka hriatthiam chiah si lohin ka ni nghulh a.Ka awm a nuam lo a,ka tang tung bawk.

‘Hey…’ a tih thawm ka hriat rualin ka luah engemawin a rawn deng dawt.Ka phu zawk bawk.

‘Eng nge a?” tih pahin chhuata Lukham tla ka chhar a.

‘Biak hre hek lo che mawle’ a ti hluk.

‘Min ko mai ta che.Min vawm kher angai a mi?” tih pahin ka vawm let a.A thle zauh.

‘Vawi engzat nge ka koh che a? I hmalam i en ngur ngur ringawta,I kuttin te kha ei zawh i tum a mawni?” a ti leh a,Ka nui hak mai.Ka kut ka en a.Ka tin ka lo seh pawr phung tak tak.Ka seh tih ka hre der lo thung.

‘Ka kal duh tawh asin le,I nu te engtik nge an lo haw ang?” tih pahin ka tho a.Ka zi mar ar ar bawk.

‘Ka hre lo..I pa te an awm chuang lo a, eng nge i hmanhmawh em em a?” a ti hmak.

‘An awm loh vang tak zawk mawle,Sundayah em em chuan Inah awm ila ka duha.Mahse,awmpui i lo ngen ve sek bawk sia’ ka nui a.

Ka pa te zin an tum aiin an awm rei ta zawk.Ka pa ai mahin nu Hmingi an buaipui rei ta zawk bawk.Test chi hrang hrang tihtur an la nei nuala.A natna an hrechhuak maithei lo.Kar thar tawp lamah an lo haw hman chauh hmel tih tukinah Ka pain a rawn sawia.Eng na nge tih ka zawt a,engmah an la confirm lo tih zawng a sawi.

‘I peih loh leh haw la nimai lawm’

‘Hey,I accident khan i rilru zau lam i sawhchhia nge mawni? I rilru a te tlat.Titau peih bawk si’

‘Aaaa,titau lam pawh a ni lo.I lo nin viau te chuan…”

‘Ngawi mai teh..’ ka ti hlar mai.Ka pan pheia,a khumah bula chair khum lamah ka pawt hnaia,ka thu a.Khumah ka ke ka hlang thung.

‘Diktak chuan in Colony lo kal hi a nuam lo ve a maw” ka ti a.Awlsam taka sawi chhuah ka tum nangin ka beidawng chiang viau lawi.

‘Ngati? Mama vang maw?”

‘Um..’ ka ti tawi tak ringawt.

‘A ho e..In inthen daih tawha..Bakah ani ai chuan ka ta i ni hmasa zawk daih’ a ti a.Ka en vat.

‘Eng maw i sawi kha?” ka ti sap.

‘Ka sawi tum chu maw,ani nen in inkawp hmain ka thian i ni hmasa zawka,ngaipawimawh suh ka ti’ ka thaw hak mai.

‘A dik alawm.Mahse,a nuam lo ve lutuk’

‘Ka hrethiam che lawm’ a ti leh sup.

‘Inneihna tur vel an ti fel tawh em?” ka ti leh a.Ka tum aiin ka aw a chhuak pangngai zawk.

‘An buaipui mek..Ka Accident khan a pawt buai leh deuha’

‘Um..’ ka ti sap ringawt.A hma kha chuan an inneih dawn tak tak leh dawn tak tak loh ka hre miah lo.An inhualna zungbun a pho lan vang khan an innei dawn hnai turah ka ngai ve tawp zawk.Mahse, tuna Savio sawi hmang khan an innei thuai dawn tih a chiang reng.

‘I la Hmangaih em?” a ti leh thut.Ka chil ka lem khalh mai.

‘I zawhna a ho em mai a’ ka ti nghat.

‘Ho hleinem..’

‘I hre duh tak tak em?”

‘Ka ring deuh..’

‘Ka Hmangaih tluk zetin ka hua.Mahse, ka Hmangaih lo tihna erawh a ni lo.Awmze nei lo a in hambuai ka duh lo a,hmalam ka pan mek chu anih hi’ ka tita duah.

‘Am-i hi ka Hmangaih leh Hmangaih loh hmanah khan min zawta,ka chhang lo che a’ a ti leh a.

‘Ka zawt che maw?” ka ti ha mai.

‘Aw..Zawt,diktak chuan ka Hmangaih lo’

‘Oh…’ ka ti halh ringawt.

‘Ka Hmangaih chu i hre duh em?” a ti leh a.Kan titi dan nidang nen a in ang lo.Ka hriatthiam chiah si lohin ka awm a nuam lo tlat bawk.

‘Naaa…Kan cool lutuk…A ninawm,in nula kha a awm tiraw?” thildang sawi tumin ka ti a.

‘Awm ang..Ti nge?” a ti tha ve mai bawk.

‘A awm tho chuan i kal thei tho bawka.Ka hawsan dawn che’ ka ti a.Ka tho nghal that bawk.

‘Zorin…’

‘Eng nge?”

‘Ka Hmeichhe Hmangaih chu nangmah i ni tih i hria em?” ka khawng deuh lah mai.

‘Maw?”

‘Ka hmangaih che ka ti anih chu…’ a ti leh a.Ka nui chhuak hak mai.Ka nuih chhan erawh ka hre der lo thung.

‘Ka ngaina takzet che.A chhan chu,ka unaupa leh ka thiantha ber i ni a,ka laka i tih zawng zawng hi ka damchhung pawn ka rul zo lo ang che’ ka thle bak.

‘Engmah rulh leh turin ka tihsak lo che’ a ti leh hmuk.

‘Ka hrethiam alawm..’

‘I hrethiam lo ang…I tan chuan thih pawh pawi ka ti lo’

‘Savio…’ ka ti halh mai.Ka hriat thin Savio kha ni loin Mipa dang daih a ni tlat.

‘Ka ti tak tak..Engpawh ka ti thei vek tih i hriat kha’ a ti leh a.Nia,ka hria.Ka hre lutuk tlat.

‘Ka kal dawn..Ka hman leh hmasak berah ka lo kal leh dawn nia’ ka tita ngawt.Ka bag ka laa,Kawngkhar lam ka pana.

‘Mama nen fa innei dun dawn tih ka hriat ni khan ka Hmangaih che tih ka hrethiam chauha’ ka ding chawt.Muangchangin ka hawi let a.

‘Midangin an neih che ka phal lo..Ka Hmangaih che ka tih awmzia chu thian nihna bakin..’ a ti leh a. Ka tawngchhuak dawna,ka aw a ri chhuak zo lo..

‘Nu Hmingi hnenah khan nau i pai tih ka hrilha…’ amah bawkin a ti leh a,Ka thaw hawk thung.

‘Ni lo…’ reife kan ngawih hnuah ka ti chhuak thei hram.

‘Midang fa i pawm ai chuan khatia tih kha ka duh zawk..’ ka awih thei lo..Ka khur nasa lutuk,ka tluk mai hlauin ka dinna bula Chair ka vuana,ka hmer ngawt ngawt bawk.A fiamthu a ni ngei ang.Ka mit ka chhinga,ka mumang nise ka ti lutuk,mahse ka men chhuah rualin Savio-an min rawn pan hnai chu ka va hmu a, ka mumang a ni lo tih a chiang reng.Ka mittui vangin ka khawhmuh a phe ruaia.Engvanga mittui tla nge ka nih ka hre miah lo thung.

‘I fiamthu a ni tiraw?” ka aw a lawi rat mai.

‘Aih,fiamthu miah lo.Khawngaihin,Zorin..Min ngaidam rawh..Mahse, ka bulah awm la ka duh’ min rawn bana,Ka harh zawk.A kut ka vai per sak lawp mai.

‘Min khawih miah suh ang che’ ka ti tuar bawk.

‘Min ngaidam rawh…’ tih pahin min rawn ban leh a.Ka petek dawrh.Mahse, ka tlai hman ta tho.Ka ban rekah a rawn hmer a.Min pawt let rawk bawk.Dam lo derthawng leh buaipui ngai a ni ta hauh lo.

‘Min thlah rawh,chuti lo chu ka au vak mai ang’ ka ti leh that.Ka aw a khur dar dar bawk.

‘I duh tawkin au rawh.Ka kal tir dawn chuang lo che.Kha lehchen kha engmah lo niturin ka zui lo che’ a nui a.A nui ri chuan ka tiril a fana,ka rap lutuk ringawt.

‘Ka haw lutuk che’ tih pahin ka theihtawpa nain ka nem a.A hmaiah ka beng thuai bawk.Ka beng na bawk aniang a thle lawng mai.Mahse,min rawn ban leha,ka ngaihtuahna a vir zawk.A ban lehlam a rawn phar chhuah chu ka mana,ka theihtawpa nain ka seh zui ta chat.

‘Ehe..Min seh a maw?” a ti tuar.Mahse, ka thlah duh chuang lo..Ka tukkhum samah a rawn thama,min kuai dak awrh..A kut lehlamin ka hrawkah a rawn reka..A kut phelhsak tumin ka vuana,mahse a rawn rekna zual sauh..Bangah min nawr beta..A kut ka sehna ka thlah ta nge nge..

‘Ka nei lo che anih chuan tuman an nei lo ang che..Mama hi enge kei aia a that bik na?A hausak vang a mi?’ a ti leh a.Ka chhang thei lo..Ka hrawk a rehna avangin ka khawhmuh a fiah lo titih a.Ka thaw a chham hnai tih ka hre bawk.Ka tha neih zawng zawng sawmkhawmin ka tal leh laih..A rawn kun hniama,ka biangah a rawn liak kuala,ka ten lutuk..Ka thle sawn hleithei si lo..Ka tal leh a,Min thlah dul hret..Mahse, ka la thaw hleithei chuang lo…

‘Ngaithla rawh,a vaiin ka hrilh law law ang che,I nau chhiat zan kha i la hria em? Ka lo leng a,thingpui min siamsak kha..I thingpui turah khan i kalsawn hlanin  Damdawi ka pawlh a…Nang chuan chhiat ve reng emaw i inti a..Mama bulah i hna vangin naute i mamawh lo tih ka hrilh thung..Nang lahin i hna kha i lo zep avangin ka tan kawng a awlsam phah vek.Mama induhtawk zia ka hrechiang lutuk,bum nih a duh ngai lo..A hnuah i nuhrawn chimawm zet khan min zawt leha,ka hresual tih ka hrilh leh mai..I nunna atana pawi thei a tih ka phal miau lo a..Achhan chu ka Hmangaih che ka tih kha..’ nuam tih hmel zetin a nui zui hawk bawk..

‘Min nei dawn em?” a ti leh tuara,tawngkaa chhang loin ka tala,ka tlawh bawk.Ka nghawng a rekna leh salh..A kut laksawn tumin ka beia,mahse ka tha a tlem tawh.Ka thi mek ni berin ka hria..

Thawklehkhatah kawngkhar a rawn intheh hawng thuaia,Savio per sawn nawlh ka hmu phe ruai bawk.Min thlah rualin chhuatah ka thu sawp thla hnawka,ka hrawk ka dawma,Boruak hip tumin ka thaw kawk kawk bawk..Ka hawi pheia,Ramsey-an Savio a hnek thal tawp ka va hmu phe ruaia.Ka mit ka chhing ta ngawt.Ka thi dang dawn ni maiin ka hria..

‘Mate…I tha tiraw?” Ramsey-an ka biang tawn tawnah a rawn vuana..Min pawt tho a,a awmah ka lu a nem beta,ka samah a rawn fawp vang vang bawk..

‘A that…Kan naute kha min thah sak…’ ka tawngchhuah theih veleh ka tichhuak nghal sap mai..

‘Shh…Ka hria…Sawi duh rih suh..’ a rawn kun hniama,ka chalah a rawn fawp a..Ka hawi chhuaka,Chhuata Savio tlu sawp nuaih mai chu ka en a.Awih har ka la ti cheu..

‘Ramsey...’ ka ti leh sap.

‘Kal ang le…’ a ti nghut.. Savio lam a hawia,nghet zetin ka kut a vuan bawk.

‘Zorini bulah ka hmu leh che anih chuan a pawi hle ang,hrereng rawh’ a ti bul hmuk.A aw a ring hauh lo nangin a hlauhawmzia chu pui tak a ni ringawt.

Min kaichhuaka,Savio te nulain phawk zetin min lo en a.Mahse, engmah sawi loin kan chhuahsan ta zawk.Savio te in kawtah a Car a lo dinga,hun that deuh pawh a awm lo.

‘Haw ka duh..’ ka ti sap.

‘Ok..I haw dawn nia’ a ti dam thlup.A car lamah min kai pheia,ka luhna turin kawngkhar a hawnga,thuawih zetin ka thu lut ve mai bawk.

A rawn thu lut ve a.A start nghal zat.Ka mit ka chhinga, tun lawka thil thleng kha ngaihtuah loh hram hram ka tum a,mahse ka thei lo..Ka biangah ka mittui a rawn luang thlaa,ka insut zui hraih bawk.

‘I tap maw?” a ti sup.

‘Aih..’ ka ti vata,pawnlam ka hawi nghal daih bawk.

Kan tlan pelh mek lam thlirin ka thu a, mahse engmah ka hmu pawn ka hre lo.Engkim mai hi a lem vek a lo ni a,ka nuna mi pawimawh leh ka rin awmchhun ni thin khan engtin nge ka chungah tiang kha a tih theih?Dawt ni se ka ti lutuk,anih loh pawn engkim ka hriatchhuah hma khan Accident khan lo thi ta zawk se…Ka hmui ka pet a.Kha lehchen thil tamtak min tihsaktu nimahse ka naute min thah sak miau a,ka ngaidam thei ngai lo ang tih ka chiang lutuk..

‘Kan thleng e’ a ti sup.Ka mengchhuaka,mahse kan Inah ni loin a Farm houseah zawk kan lo awm thung.

‘Hetah maw?” ka ti sap.

‘Aw..Sawi tur ka neih zawng zawng hi kan bul tanna hmunah hian nise ka duh’ a ti vawt ruih.

‘I nuih a za em?” ka ti leh a.Amah en loin pawnlam ka thlir lui tlat bawk..

‘Engvangin nge ka nuih a zat anga?” min chhang dawn lo emaw ka tih hnuah a ti sup.

‘Keimah leh keimah hi ka innuihzat a….’ a tawp lam a zuih ral titih.

‘Sawi rih suh..Ka venhim zawh loh che avanga ka chhungril sahal hi i hmuh hunah i sawi dawn nia’ a ti tham tuak.Muangchangin alam ka hawia.Min en loin hmalam a en ngur thung.

‘Ramsey…’ ka ti sep..

Engmah sawi loin ka kut a rawn vuana,a lakanga.A fawp zui vang vang mai..