22/AUGUST - 27

Chapter- 27

‘Lut ang’ min rawn en pahin a ti sup.

In lam pana a kal chu a hnungah ka zui a.Helai ka chhuahsan ni a ka chunga thilthleng kha angai leh ngaiin ka mitthlaah a lo langa,ka ding dat mai.Agnes-in Ramsey phone a lo pick saka,ka rai tih a lo hriaa.Ka nun zawng zawng thlak danglam vektu thil a sawi bawk.

‘Ngatinge?” tawng ri ka hriat rualin ka phu zawk.Ramsey lam ka hawia,ngaihtuak muk hmel zetin min lo en vung vung mai.

‘Helaia kal hi ka duh lo.Khawngaihin Inah min hruai haw zawk rawh’ ka theihtawpa pangngaiin ka ti sap.

‘Mate…’

‘Khawngaihin tiang khan min ko suh’ ka ti dam thlap.Savio laka min chhan avang khan Agnes-i nen an inneih tur a danglam phah chuang lo a.A bialnu ka ni leh ta tihna a ni hek lo.

‘Hetah hian bul kan tana,hetah bawk hian bul tan leh ka duh a…’ reife a ngawih hnuah a tichhuak sup.Sawi chhuah harsa a tih hmel takzet bawk.

‘Ni lo e,keini hian bul tan leh turin kan tlai tawh.Engmah sawifiah angai lo a,hun liam tawh kha chu hunin liampui mai rawh se’ ka ti leh nghauh.A hmui a petsawia,a ding khawng luh bawk.

‘Bul tan hi a tlai thei ngai dawn em ni?” a ti sup.Ni a sa vawl vawla,ka sam thliin a chhem leng dar dar bawk.

‘Midangah chuan a tlai lo mahna,mahse kei leh nangah hi chuan a tlai tawh.A tawp vek tawha,siamthat theih a ni tawh lo a.Zawmkhawm leh chi pawh a ni tawh lo’ uar zetin ka ti leh a.A thle buk.

‘Kan tum chhin thei maithei asin…’

‘Ka duh lo…’

‘Keiin ka duh thung a’ a mithmul a ti sang awk bawk.Ka rum hak thung,a mitmeng vawt leh nelawm lo zet chu ka en a.Ka induhtawkna neih let tumin thawk ka la vang vang bawk.

‘Thil kehchhe tawh hi kan zawmkhawm thei mahna,mahse khi a awm tawh thung ang.Chutiang chiah chuan nang leh kei hi hmanah kan tawp tawha,kan inkara thil thleng zawng zawng kha kan theihnghilh dawn lo ve ve bawk.A tha ber chu bul tan emaw insawifiah lam ai chuan inhriatloh zui zel hi a ni mai e’  ka tita duah.Ka beisei aiin ka sawi mar tha zawk.Ka aw a dam thlap bawk.

‘Ka dik lo tih lo pawm ta ila…?” a ti leh nghut.Ka tum loh tawpin ka nui chhuak hak mai.Ka nuih ngawt chhan erawh ka hre miah lo thung.

‘Khawngaihin kan In lamah min thlah ta che.Eee,Nichina ka nunna min chhansak vang khan lawmthu ka sawi bawk a’ ka ti leh a.Ka dak deuh vah bawk.Mahse, thilthleng ka ngaihtuah zawngin ka tiril a khur ru dar dar thung.

‘Zorin…’

‘Engmah sawi tur kan nei lo…’ ka ti leh hmak.Ka inhera,Motor lam ka pan ta zawk.

Mahse, thui pawh ka kal hmain a thilsawi vangin ka ding leh ta chawt.Ka bengchhe ri mai mai a ni lo tih lah ka chiang ngang mai bawk.Ka mit ka chhinga, pangngai taka ka lan theih nan theihtawpin boruak ka hip lut a,muangchangin ka thawchhuak leh a.Ka landan cool raih kha ka nei let leh anih loh chuan ka chhungril hi ka thupzo dawn lo tih ka chiang lutuk..Ka hawilet a,a dinna ngaiah a lo la dinga,a kekawr ipte a zen a,ka hriatthin Ramsey,mipa chapo leh ama hma chauh sial thin kha khawnge a awm tak tih mai turin a hmel landan a danglam vek.

‘I thilsawi kha sawi loah che ka ngai ang’ ka ti hmak.Mahse, thup rual loin ka aw a khur dar dar mai.

‘Ka sawi lo anga i ngaih vang ngawt khan ka beidawng dawn hauh lo’ luhlul zetin a ti leh hmuk.

‘Ramsey…’ ka ti sapa,Beidawng ru lutukin ka thaw hak bawk.

‘Ka hmangaih che..Haider tawh suh’ a sawi nawn leh ta..Dawt a sawi lo tih a hmelpa leh thutak zetah chuan chiang lutukin a lang thei hial bawk.

‘Tiang hian awm suh..Thil i ti harsa mai mai ania’ ka chhungril tui zawih zawh mahse ka awki erawh a chang fak thung.

‘Ni lo,Zorin..Inrunluih leh intihnat tawn hi bansan tawh ang.Mangchhia hi ka ning tawh’ ka mit ka chhing sawk.Ka menchhuah rualin min rawn pan hnai mek ka va hmu nghal zat.

‘Ni lo...Lo…lo kal hnai suh’ ka ti bah nak mai.Mahse, ka sawi hre lo ang hmakin min rawn hnaih leh ruaka,min rawn bana.Amah si chetin min pawt hnaia,a awmah ka lu a nem beta,ka thlawkbo ang tih hlau niawm fahranin nghet lutukin min kuah bet zui nghal hmiah bawk.Tal chhuah ka duh,mahse ka taksa hian ka ngaihtuahna a phatsana,a lungphu nghawr dat dat chuan thlamuanna min pe a.Hei hi ka ta,ka innghahna a ni tih min hriattir a tum ve thung.

‘Kal suh,Sleeping Pills nena nun hman hi ka ning tawh..’ tham tuakin a ti leh sup.Ka chhip samah a rawn fawpa.Kuah let lo turin ka insum tang tang thung.

‘Hetiang hian awm tur ka ni lo asin’ ka induhtawkna neihchhun sawmkhawmin ka ti sep.

‘Lut ang aw’ ka thusawi hai derin a tita zawk.

Kan inzui luta,chhunglamah Kawngkhar a kalh nghal hmak bawk.Ka hawikuala,engmah danglam a la awm lo.A la ngai vek,kumkhat liamta kha chuan Chahbi ka kawl ve thina,engtikniah emaw chuan ka ta a la ni ang tiin ka suangtuah thin anih kha.Mahse,mangchhia ang maiin thawklehkhatah an thlawkbo ta zawk.

‘Thu ila…’ a ti sup.Ka chhan hmain min kaia,Thutthlengah min pawtthu nghal zat bawk. Thutthleng hnung lam a ngheng a,hahdam hmel zetin a  ke a thluang bawk.Sawi mai tur ka hre lo.Darkar tlemte chhung hian thil a thleng nasa hman lutuka,ka harh meuh em tih ka ngaihtuah phah hial bawk.

‘Khawi atangin nge kan sawi tan ang?” reife kan thut hnuah a tichhuak sup.

‘Ka hre lo..’ ka ti sap.Ka hre lo tak tak bawk.

‘Nichin khan lo tlai hret ila chuan i thi hman dawn anih kha’ a ti leh hmuk.Thil thleng ka ngaihtuah chhuah leh takah chuan ka ip chawih mai bawk.

‘Ka lawm takzet..Mahse, engvangin nge khatiang khan Savio kha a awm ang? A rui si lo..’ ka aw a zawi lutuk.Mahse a thaw hawk ri ka hriat rualin ka sawi a hre thei tih ka hrethiam tho.

‘A hmangaih vang chein…’ a ti nghut.Ka en vat bawk.

‘Khatiang kha hmangaihna tiin a sawi theih loh ang’ ka tichhuak nghal halh mai.

‘Hmangaihna hi a chang chuan atna a ni ve bawk ang chu’ a ti leh sup.Ni e,atna a ni tak tak.Min Hmangaih ve miah lotu hmangaih tlat te,min duh miah lotu nghah tlat te..Kei ngei pawh chung zinga pakhat chu ka ni.

‘Ka thiantha ber a ni a, ka engkim a ni bawka.Mahse, kei chuan unaupa angin ka en a…Mahse, ani kha engtin nge a danglam tak ni ang?” ka ti leh sep.Ka la hrethiam thei lo.

‘A danglam thutah i ngai tak tak em?” a ti leh sup.

‘Aw,khatiang kha a ni ngai lo tih chu nangpawn i hria alawm’

‘Aih,atir phat atangin tiang kha a mizia a ni zawk.Mipa ka ni a, Mipa rilru ka hria.Chhan leh vang awm loin ka thik hek lo’ a ti leh duah.

‘I thik a maw?” ka ti ha mai.

‘Aw,nasa takin…I rai tih nangman min hrilh pawh nghak zo loin amah zawkin i awm laiin a sawia,I bula ka sawi kha i la hria em?” a ti leh nghut.

‘Eng ber?”

‘I rai tih ka hriat hlima ka sawi kha.Savio khan ama faah a pawm ang tih a sawi em ka tih kha’ a ti leh a.Ka hrechhuak zawk.Ni e,khami tum khan Savio laka rilru chhe lutuk puah ka puh anih tak kha.

‘Ka…Ka hrethiam lo…Engmah hi ka hrethiam lo’ ka ti nawi nak mai.

‘I hrethiam lo ang.Mahse, kei chuan ka hrethiam..Mipa hian khatiang khawpa thui khan hmeichhia hi kan kalpui ngawt dawn lo.Thian chu kan ni thei,mahse a tawk erawh a awm thin’ a ti leh duah.

‘Mahse, ka ngaizawng lo tih a hriaa.I bulah ka riaka,I fa ka pai bawka,chu pawh pasal neih hmain…’ a tawp lam a zuih ral titih.

‘Um,ka hria.A hmasaber ka ni bawka.Mahse,i rai tak chiah khan a ti naa,a inhrechhuak anih ka ring.Keimah lam atang chuan rinhlelh rual lohin ka fa a ni tih ka chianga,mahse nang tereuh lah hi achangin min hmangaih niin ka hriaa,achangin kei aiin Savio i hnaih leh lawia, i mize ngeng lutuk hian englaimahin Confi takin min awmtir thei ngai lo..’ a ti leh hluk.Ka ang pham mai.Ka awih thei lo zawk.

‘Chutiang chuan i awm a maw?”ka ti halh mai.

‘Um..I na nge na lo pawh hriattheih loh khawpa in Control thei i nih hi i hre miah lo tihna mi?”

‘Aih,chutiang ka ni lo…’

‘Ok..A pawi lo..’a then suk bawk.

‘Haw ka duh tawh’ ka ti sap.Ka tho chhuak nghal daih bawk.

‘Kan haw ang,mahse min neih i tiam hma chuan i kal lo ang’ phawk lutukin ka en a,A nunna hmeichhe dang awm ka hrechhuak ta chauh.Savio chet dan khan min thawng lutuka,Agnes-i a awm ve tih ka lo hre tawh eih lo.

‘Engtik nge inneih hun tur?” ka tichhuak ta sap.A mithmul a tisang awka.A rawn tho chhuak ve nghal bawk.Min rawn din hnaiha,ka tawlh hnung ve thung. Eng ang pawn min hmangaih mahse midang nun ka tichhe ngawt thei lo.

‘Sawi duh suh.Ka lawmpui tak tak che ania’ ka ti leh a.Zangkhai taka sawi tum mah ila ka hlawhchham chiang bal.

‘Tu nen nge kan inneih dawn a?” ka thilsawi a haider hmiah.

‘Tu nge ni se i tih a? Inneihna hi infiamna a ni lo ania”  ka ti leh nghat.A thle buka,hmui a petsawi zauh bawk.

‘Agnes-i i sawina anih chuan neih ka tum chhin ngai lo’ ka chil ka lem khalh mai..

‘Maw? Ngatinge?” ka hrethiam hlawl lo.Inhualna zungbun nen lam an pholanga,Savio ngei pawn a hnai tawh tih a sawi kha…Savio..Eng ber hi nge ka awih chin tur pawh ka hrethiam tawh lo.

‘Savio hian amah chauhin tiang thil hi a kalpui  i ring em?” a ti leh daih.Engvanga ka zawhna haider zel nge anih ka hrethiam lo.

‘Aih,bakah a pawimawh lo.Heng thil hi a ti tak tak nge a damlohna vangin a rilru a buai zawk lah ka hre lo..’ ka ti leh chiam.Mahse, ka chhungril hian a ti ngei tih erawh a chiang lutuk..Min thah a tum anih kha..

‘Savio leh Agnes-i hian engemaw an ti dun tih ka hre tawh a’ a ti hmuk.

‘Ni lo…’ ka ti thei hram.Ka thawk a sak talh talh bawk.Amah mai emaw ka tih laiin Agnes-i nen berkher sual rawng an lo bawl dun hi ka awih thei lo lehzual..Mahse, ka hriatchin ngawt pawh kha engmah dawt a awm der si lo.

‘Awih a harsa hle nangin a ni tlat.Meeting naa kan inhmuh tum khan Agnes-i ka hrilh hauh lo.Mahse, a tukah kan inhmu tih a lo hriaa.Engtin nge a hriat tih ka zawta,a thianpa hi in Company thawhnaa Boss a ni tih a sawia.Mahse,zana kan inhmuh khan i boss khan Agnes-i kha reitak a hmu tawh lo tih ka hria..Ka rinhlelhna tichiang turin Agnes-i leh Savio inbiakna ka hmu bawka.Mahse, chu erawh vawiinah ka hmu ta chauh,Ka tlai thelh bawk’ a tita duah.Engkim mai hi a mak vel vek.

‘Engtin nge tiang hi ka chungah a tih theih zawk? Ka la awih thei lo’ ka lu ka thing nak mai.

‘Ni e,engkim mai hi a mak a,kan chunga thil tha lo titu lah ka thisen zawmpui,Ka unaupa a ni bawka’a ti hmuk.

‘Khawngaihin min thlah haw thei tawh angem?” ka ti leh sap.Ka chau hluah hluaha,mahnia awm ka chak ber.Tunah hi chuan ka hriat tam leh ka na tam a niber.

‘Sorry…Ka sawi tawh kha,min neih i tiam loh chuan ka haw pui dawn lo che’

‘Ramsey…’ beidawng lutukin ka ban ka phar hliaia,ka dahthla leh hnak bawk.

‘Min nei rawh’ a ti leh sup.

‘Ngatinge Agnes-I kha neih tum si loin inhualna i neihpui si a’ ka zawt ta nge nge.

‘Ka hriat duh ka hriat nan a tul.Engvangmahin ka Hmangaih miah loh hmeichhia nena damchhung hun hman ka tum ngai lo’

‘Ni lo..Engtin nge ka rin theih ang che? A hma ang bawk khan infiamnan min hmang leh lo ang tih engtin nge ka hriat ang?” ka ngaihtuah zawng pawn ka la na vawng vawng thei..

‘Infiamna maw? Ni lo..Eng infiamnan mah ka hmang ngai lo che,Diktak chuan Savio i rawn zui haw hmasak ber tum atang khan ka duh che tih ka hre tawh.Mahse,tleirawl awmtha duh lo leh Mipa chi hrang hrang kawp niin ka hria che a.Hlatsan che ka tum mai zawk.An sawi ang kha i ni lo tih ka hriat takah chuan hnaih che tumin ka beia.Nang lahin min haw bawka’ a ti leh duah.Vawiin ang em em a Ramsey insawifiah nasat tum hi ka la hre lo.Hei ngawt pawh hi thil danglam chu a ni chiang bal.

‘Chutiang lam a ni lo.Hetah ngei hian Agnes-i lo kalin ka chungah Game inkhel dun tih a sawi lai ka hmu a’ ka hmui ka pet a.

‘Ni e,ka pha lo..Mahse, khatah pawh khan kan inthen tawh.Hnaih che ka tum tih a hriat vangin i tana pawi a thlen ka duh lo a,tiang zawng khan ngai se ka ti mai zawk..’a ti leh a.A thaw hawk bawk.

‘Mahse…Ni lo,ka ringngam lo che’ ka ti leh hlawl.

‘I la hrereng em? inentir tura hruai ka tum ni che khan kei ni loin Savio zawkin a kalpui che tih i sawi kha,rui chungin ka hawa.In pahnihin ka lakah Game in khel tih i sawi kha..’ a ti hmuk.

‘Kha chu,ni lo..Ka sawi ve mai mai anih kha’ ka ti bah nak.

‘Ka natzia kha i hrethiam lo zawk ang.Savio zawt turin an inah ka kala,I sawi ang tho khan min lo chhanga, kut ka thlak bawka..Mahse, ka haw tak tak thei lo chea,zanah ka rawn call leh che a..Ka zin hmaa inhmu turin..Ka induhtawkna zawng zawng dahthain naute vang talin min nei turin ngen che ka tum a.Mahse, zingah khan Savio nen in inbe thawm ka hre leh a..Ka tuar thei hlawl lo..’ a tita duah.Ka ngaihtuah leta,khami zing khan Savio nen kan inbe hauh lo.Aman min lo biak hun ka nghaka,min lo biak tak lohah khan ka beidawnga,ka na bawk anih kha..

‘Ka hrethiam lo…I lo call hun ka nghak a,mahse I lo call lo..Savio nen kan inbe hek lo..’ ka ti sap.

‘Ka hmaah a dinga,min hmu lo..Mahse,a tawng danah kha chuan nangmah bia ang chiahin a awm a.Keimah nen inhmu turin a thlem che a,nangin i duh lo niin a lang a’ ka mit ka chhing ta ngawt.

‘Ka awih thei hlawl lo’ ka ti leh sep.Mumang ang ruai nimaiin ka hria..

‘Ka zin ka lo haw hnu khan hmuh che ka tum leha,mahse amah bawkin hna i neih thu leh naute i tihtlak thu a sawi leha.Doctor lehkha min hmuhtir thlap bawk..Ka naa,ka kehchhe vek..’a tawng tawp lam a sehchilh nawk nawk chuan a thinrim tih a tilang chiang viau.

‘Ka ti tla lo…’ ka ti sep.Thil kal tawh ngaihtuah letin ka mit ka chhing vang vang bawk.

‘Ka hre tawh alawm.Mahse,a hunlai kha chuan duhthlan tur ka nei lo.Hna i nei ngei em tih ka fiaha,I lo nei ngeia,chu pawh nau i pai tih hrereng chungin min hrilh loin i lo zawma,inneih ka sawi pawn min hrilh chuang lo’ a awah min demna chiang takin a lang thei bawk.

‘Hrilh che tumin ka lo call che a.Mahse, Agnes-in a lo pick a.Meeting i nei a ti a’

‘Aih,ka hrilh che kha.Eng Meeting mah ka nei lo’

‘Anih  chuan engvangin nge i phone a pick si?”

‘Ka Motor dahna a dik loh vangin ka chhuak lawka,chumi lai chuan a lo pick anih chuan ka hre lo.Mahse, kha thil kha i thinrimpui anih ringin zanah khan ka check a,ka call listah engmah a awm lo’ a ti leh duah.Engkim mai hi a mak vek anih hi a..Savio hnenah khan ka sawi ngeia,mahse Agnes-in dawt a sawi anih a rinthu a sawi daih.An lo intiamrual anih si chuan engtin nge tiang khan a sawi ka hrethiam lo..

‘Ka lo call ngei,amah ka be bawka..’ ka ti hmak.Savio hming sawilan erawh ka duh lo.

‘Ka rai kha in planah tel lo mahse min neiha,reilote hnua min then i tum tih a sawia,bakah ka rai tih a lo hria khan min thawng bawka..’ keimah bawkin ka ti leh a.

‘Ka hrilh hauh lo..’

‘Nia,I hrilh lo…Ih…Eng lo,amah khan a hrilh anih ka ring’ a hming ka sawi thei hlawl lo.

‘Amah..Savio i tihna a ni em?” a ti sup.Tawngkaa chhang loin ka bu nghauh ringawt.

‘A nimahna..Tunah chuan ka duh ber chu i bula hun hman a ni mai’ a ti leh sup.Chhan mai ngaihna ka hre lo.Kan thilhriatthiam loh leh kan inhmuh thiam lohna zawng zawng fel duakin lang mahse ani nena hun hman nawn leh hi ka duh em ka hre lo.

‘Ka hlauthawng a…’ ka sawi zawh hmain ka kut a rawn vuana.

‘Keimah vangin vawikhatmah i tap leh tawh ngai lo ang tih ka tiam che..Ka venghim zo lo che a,nangmah aiin midang ka ring zawka..Kan naute pawh ka venghim zo lo bawka..Mahse, ka tiam che..I natna tur engmah ka ti nawn leh tawh ngai lo ang’ a thutak lutuk chuan min fan lo thei lo.A ti tak tak ang tih ka ring thlap bawk..

‘Ka haw duh’

‘Ka sawi tawh kha…’ a ti ve thung.

‘Aw..Ka..ka nei ang che’ ka tita nge nge.

Engmah sawi loin min pawt hnaia,min kuah bet nghal chial bawk..Ka mit ka chhinga,a awmah ka hmai ka phum kak bawk..Ni e, thil tamtak kan lo tisual dun tawha.Ngaihdam min dil mahse ani chauh ni loin keipawh ka thiam bik lo tih ka hria.Mahse,ka Hmangaiha,keimah leh keimah inbuma nat nawn leh ka duh tawh lo..Pasal neihna hi risk a ni a Tlangval fel tak pawh Pasal sual tak a ni theia,Tlangval sual tak pawh pasal tha tak anni thei tih an sawi ka hre fo.Risk anih rau rau chuan ani nena nun hman dun tuma risk lak hi ka duh ber.

Thla hnih a vei leh meuh chuan Ramsey nupui ka nifel der tawh.Engkim kan hriatchhuah atangin hun hi a kal chak takzet in ka hria.Ramsey lahin engmah a nghak khawtlai thei hek lo..Kum khat lai kan lo hrehawm tawn tawhna kha theihnghilh tumin kan theihtawp kan chhuah ve ve a,hetiang khawp hian nun hi a lo hlimawm thei tih ka hre hek lo.

‘Ramsey,hmanhmawh teh…’ Bathroom kawngka bula ding chungin ka ti a.

‘Ka zo tep..Lo insiam ru’ zangkhai vuhin a rawn ti let vet hung.Ka ner nak mai.Vawiin Hani te School rising day a ni a,tlai ka hlauh avangin zingah Inkhel lo turin ka ti mawlh mawlha,a kal luih talh..

Ka thawmhnaw ka thlak a,kekawr dum thawl deuh ka haa.Ka kawr hak tum duh loin ka hlip leha,midang an lo luh ka hlau lo bawka Bra chauh hain ka kawr hak tur thlangin ka thawmhnaw dahna ka keu kual dan dan bawk.

‘Eng nge ka hak dawn?” tih sup pahin hnunglam atangin min rawn kuaha,a inbual zo chiah bawk nen a taksa a vawt thlar mai.Ka darah a rawn fawp dun dun bawn.

‘Khumah khan ka dah..Kalsawn phawt teh..’

‘Aih,nizan khan ka tiharh duh lo che a’ tih pahin ka bra a rawn zena..ka hnute hmur a rawn tuaia..A mipatnain min do run bawk.

‘A hun lo lutuk aw’ tih pahin ka nghawk salh.A nui hawk hawk mai..

‘Ok..Nupui ngam loh hi a buaithlak hle mai’ min thlaha.Ka nui chhuak hak thung.

School kan thlenin an lo awm luai luai tawha,naupang inchei mak tak tak lah hmuh tur an tam a,lo in um kawi zawr zawr tawk an awm bawk.Hani erawh ka bulah a thu kaka,ka kut a chelh ran bawk.Ramsey erawh hna lam atangin an rawn call avangin kan piah deuhah ding chungin a be mawlh mawlh.

‘Mate,ka kal chhuah ngei ngei angai.Hnaah Problem a awm a’ Ramsey-an a rawn ti sup.

‘Eh,a va pawimawh awm ve’

‘Aw,Zoa’n a lo call a..’

‘Hani hian angaithiam lo angem?” ka ti sep.

‘Ka theih anga rangin ka lo let leh ang’

‘Ok..Kal la…Mahse, tlan chak lo la’ ka ti sap.A mit a siai zauh ringawt.

Nu leh pa ho thutna tur an siamah kan thu a,School naupang ho erawh hmun dangah an zirtirtu te nen an awm thung.Tan hnu rei vak loah Hani te class an lam a,ka mitah chuan Hani a thiam lawrlak.Ka hrin ni hauh lo mahse ka Hmangaih lo thei lo.Nuhrawn hrawnin ka nun ka hmang tawha,nuhrawn sual leh phakar nih ka tum lo.Ka tawn ang kha a tawn ve ka phal hek lo.An zawh veleh inhnuai lam ka pan ve a.Mahse, ka lut chiah tihin Hani lo tap par mai ka hmu nghal zat.Ka sa nghal phat bawk.

‘Hani,Bawihte..’ ka aw a hriat veleh a rawn hawi pheia,tahchhuak insum nasa lutuk baw hawk ang maiin min hmuh veleh a tapchhuak nghal hawk bawk.

‘Shh…Ngatinge? Tah tur a ni hleinem’ tih pahin ka kuaha.

‘Ka kawr hi a chhiaa’ tih pahin a kawr a pawhkhawr tat chu a en a.Ka en ve vat,a hma khan ka hmu miah lo.

‘A pawi lo,adang kan lei leh mai dawn alawm’ ka ti a,a mittui tla par mai chu ka hruksaka.A insut faih faih bawk.

‘Enteh,Thiannu,..I fanu hian ka fapa kawr a lo pawtthlera’ Hmeichhe aw ki sang zetin a rawn ti a.Ka hawi let vat.Hani’n min rawn kuah vat bawk.

Keimah ang rual vel tur,make-up chhah zeta inhnawih leh hmui sen zet a lo ni a.A bulah a fapa niawm tak a ding al bawk.

‘A zia lo hle mai,kan tihpalh lutuk’ ka ti dam thlap.

‘Nia,a zia lo..Bakah tun chauh pawh a ni tawh lo.I fanu hi lo zilh teh,naupang te si hi a kawlh em em lutuk,tiang chuan School dangah kan fate sawn mai angai ang’ a ti leh tawn tawn.Ka sa phat nangin midang an awm ve thupa,inbengdaih hram hram ka duh.

‘Ka fanu hi naupang fel tak chu a ni lo maithei.Mahse, midang hi a tibuai khat viau asin’  ka ti dam leh thlap.

‘Ehe..Nang hi a lo chhun che anih chiah hi..In hausak vangin ka hlau che emaw i ti ange? Ka engmah inni lo..’a ti leh chiam.

‘Min hrethiam teh,inhauh chiam na hmun pawh anih loh hi’ ka ti leh a.

‘Inhauh lam anih loh chu,Ka hrilh che anih chu..Lo zilh rawh’ a ti leh hmawk hmawk.

‘I fapa pawh khan a kawr hi a pawhchhiat sak ve tho asin’ ka tichang ta fak. Henu nasa lutuk vang chiah hian anih hi Hani kha a lo tah ni..

‘A pawtchhia a maw? Khawimaw ka lo en? A hma khan ka hmu lo,ka awih lo reng reng’ tih pahin Hani a rawn pawt sawk.Min nam deuh nawk bawk.Ka insum hman lo..A ri thuaia,midang an te tuar bawk.

Ka kawngah tumeawin a rawn kuaha.Talchhuah tumin ka tal laih laih thung,mahse min kuah nghet lutuk.

‘Mate,keimah..Enge thleng a?” ka beng bulah Ramsey-a awin a ti sup.Ka hawichhuaka,min lo en thup tawh.Chhuat lam ka en a,kha nu nasa zet kha  an lo kai tho mek ka va hmu a.Engtin nge ka tih chiah ka hre bik lo..