BLUE- 17

Chapter- 17

‘Tluangpui,I tha em?’ sawi pahin ka ti a.Mahse,engmah hre lo tih hriat zetin a zawi vek.

Ka pawmkang nawlh.Inchhungah ka pawm luta.Thutthlengah ka mut a,Gate khar turin ka tlan let leha.Ruah lah chu nasa thei ang berin a sur tlawrh tlawrh bawk.Ka khar sawk sawka,ka tlan let leh vat.Ka thawmhnaw a huh vek tawh.Thutthleng lam ka pana,ka dah dan ngai ngaiin a lo la awm.

Ka ngaihtuahnaa lo awm hmasaber ka ti nghal zat.Dimtein ka pawm kang leha,Room lamah ka pawmchho a,Khuma nghat loin Sofaah ka nghat,a thawmhnaw ka hlihsak nghal mawlh mawlh.Jacket hnuaiah T-shirt a lo ha tela,a Bra thlengin a huh tlang vek.A kekawr ipteah a Phone a lo aka.Ka phawrhchhuaka,ka hmet eng dawna,a eng thei lo.A huh vangin a chhia pawh a ni mahna.A kekawr ka phelhsak leha,a Panty pawh a lo huh tel vek.Panty nen lam ka phelhsak veka,Khumah ka pawmpheia,Puanin ka khuh nghal sawk sawk.Tisa chakna lam engmah a lang eih lo hrim hrim.Ka thawmhnaw ka hlip ve leh sawk sawka,Tluangpuii thawmhnaw huh nen Bathroomah ka daha,naktukah keiman ka su mai ang.Buati suk tura ka dah anih chuan ngaihdan mak zet a lo nei palh thei tlat.

Thawmhnaw hul ka hak hnuah Tluangpuii haktur ka thawmhnaw zinga te deuh ka zawng leha,atan chuan a lian lutuk vek.Mahse, engemaw tal a hak angai.Ka t-shirt zinga te deuh ber leh ka Boxer ka haktir a.Min hnialna emaw min tihlet tumna engmah awm loin Mithi ang maiin khawih ang angin a awm tawp.Nia,harh se chuan min sual let ngei ang.Mahse, tunah chuan engmah hre loin a mu zawi hnaka,a lainat awm reuh takzet.

A hnar bulah ka kut ka daha,a thaw sak sak.Tui taka muhil a ang zawk mah.Mahse, tiang ringawt chuan ka dah thei lo.Tuemaw tal ka biak angai.Ka rilruah Rinawma a lo lang zawka,ka phone ka ban nghal vat.

‘Aw..’ Hello pawh ti loin zangkhai zetin Rinawma’n a rawn ti a.

‘I buai em?”

‘Aih,Inah ka awm’

‘Ok,Inah lo kal teh’ ka ti leh nghut.

‘Enga?! Tunah maw?” maktih hmel zetin a ti hu.

‘Um,tunah..I lo thlen hunah ka koh chhan che i hre mai ang.I hmanrua i kawl chuan rawn keng bawk la ’ ka ti leh a.

‘Mahse…Ok,ka lo kal ang’ min hnial loin a ti leh ta zawk.

Khum bulah Chair ka pawt hnaia,Tluangpuii hmel ka en a,thisen nei lo niawm takin a hmai a dang lapa.Engvanga khatianga awm nge anih ang ka ngaihtuaha,engmah ka ngaihtuah chhuak lo.Thla khat aia tam ka hmu tawh lo va,kan inbe hek lo.Enge a tih thina,engtin nge a khawsak ka ngaihven lo hrim hrim.Ka theihnghilh ngai lo tihmai loh chu ngaihvenna ka nei lo.

Rinawma’n min rawn phone a, ka pick vat.

‘Gateah ka awm aw..’ a rawn ti a.

‘Lo nghak lawk,a rei lo vang’ ka ti a,Ka Phone ka off a.Inhnuai lamah ka chhuka,ruah a la sur bawrh bawrh,Nihliap ka laa,Gate lamah ka pheia.Rinawma Car a lo ding vang.Ka hawnsaka,a tlan luh fel veleh ka khar lehnghala.Ka Locked lehnghal thlap.Motor lam ka pana,nihliap kan inzawn pheia.Ani leh ni lo angin engmah min la zawt lo.

‘A va han sur taima si em’ veranda kan thlen veleh a ti a.A kawr ban tlema huh deuh a beng thak thak bawk.

‘Taima a zawngin maw?” ka ti sup.

‘Niang chu,dar 7 vel atangin ala bang hleinem.A taima ka ti mai’ a ti a.A nui huk huk.Ka then ve suk bawk.

‘Lut ila…’

‘Um..Intur ka mamawh ania’ min rawn kal pelh pahin a ti a.

‘Thingpui maw?”

‘Tun ang hunah thingpui ka in kurh kurh i hre ngai amawni le?” a ti bul hmuk.

‘Hre ngai chuang nang’ ka ti satliah.

‘Ruahsur hian ka lung a ti leng,chu vangin in tur ka mamawh ‘ a ti leh a.Ka nui chhuak hawk.Ruahsur loh pawn a in reng a,Doctor tha leh mi hriat hlawh tak a ni chung hian kan inhrechiang lutuka,min enkawl dawn se ka in ngaihtuah fe maithei.A thiam lo ka tih vang erawh a ni lo.Thiante hi rinngam an awl ber rualin kan inhriatchian avangin rinngam an harsa ve leh thei tlat tho.

‘Eng nge min rawn koh chhan?” amah bawkin a ti leh a.

‘Roomah chho ila..’ ka ti hmuk.Roomah kan inzui chho a.Room kawngkhar ka hawnga,Khum lamah ka bu nghut.A hawiphei vuta,Tluangpuii a hmuh rualin a hmel a danglam nghala.Min rawn en a, a hmelah zawhna a lang chiang ngang mai bawk.

‘Engmah ka hre bik lo.Ka hawin Gateah ka hmu,chu zawng chu’ ka ti sup.

‘Ok..Kan en ange’ a ti a.Khum lam a pan pheia,a hnungah ka zui phei ve a.A en kual nghal zung zung.

‘Engmah dik lo a awm lo,engemaw hlauh deuh tak a neih vang emaw a hah lutuk vang a ni thei.Ti hian hahdam deuhin mu se,naktuk zingah chuan a that leh mai ka ring’ min rawn en pahin a ti a.Ka thawveng nghal hawk.

‘A khua a sik em?”

‘Aw, tlem a awm.Mahse, hlauhthawn tham a ni lo.Ruah a do nasat vang anih ka ring.Lum tha se la,a zia mai ang’ a ti leh a.

‘Ok..A lawmawm’ ka ti sup.

Rinawma kal hnuah roomah ka chho leha,a mut dan ngaia mu tawh loin sir zawngin a lo mu tawha.Khumah dimtein ka thu thlaa,a hmeltha zet chu ka en a.Engmah mumal takin ka ngaihtuah thei lo.Enge a hlauh ang? Hlau pawh nise engvangin nge ka bulah kher a lo kal ang? Zawhna hlir.

Ka ngaihtuah naah Maria-i a rawn langa,ka thlen hunah hrilh turin min ti kha ania,ka be leh ta miah lo.Ka phone ka en a,msg a lo awm vang.Ka haw tawh tih hrilh pahin ka mangtha nghal daih bawk.Tluangpuii ka en a,ka ngaihtuahnaah Ambie-a a rawn lang veleh ta thung.Sana ka en a,dar 11 a ri tawh.A u a la haw loh avangin a mangang maithei.Tluangpuii phone lah a thi daih bawk si.Ka call ang nge call lo ang tih ka ngaihtuaha,ka call ta nge nge.

‘Hello..U Sangkim’ mutchhuah hmel fein a rawn ti a.

‘Ka tiharh che a ni maw?” ka ti sup.

‘Aih,a pawi lo.Ka u i be duh tihna mi?” a rawn ti leha,ka phone ka beng bul atangin ka la thlaa,ka melh nghek.

‘A zina,tlai lamah khan an chhuaka,signal a nei lo anih ka ring’ amah bawkin a rawn ti leh a.Tluangpuii ka en a,engmah ka hre thiam lo.A thawmhnaw hak lai zawng bak engmah bungrua a nei lo tih ka chiang.

‘Ok,a pawi lo..Ka lo try leh ang’ ka tita ngawt.

Ka en tlawk tlawk,kei ang bawkin a nau pawh a bum tihna a ni ngei ang? Engzata tam nge he nu hian dawt sawiin mi a bum kual tawh ang? Mihrang chu min lo bum pawh nise a nau chu a bum tur a ni lo asin.Mahse,a zin angin a nau chuan a hre tlat lawi si.Ka hmai ka tuai pawk,ka hmuh loh pawn buaina min thlen a bang lo,tunah ka hmu ta chenga,buaina bawk.

Puansin tur ka lachhuaka,Sofaah ka mu ta zawk.Ka beisei loh zetin ka luin lukham a sik rualin ka muhil nghal hmak.Mangang au thawm niawm takin min tiharha,ka thuchhuak nghal a.Tluangpuii lam ka en vat.Mu tawh loin a lo thu a,hlauh nei niawm takin a hawi kuala,a meng a vek bawk.Ka pan phei vat.

‘I tha em?” ka ti sup.Min rawn en a,a hmel phelh phang maiah chuan hlauhna bak engmah a lang lo.

‘I tha em?” ka ti nawn leh a.

‘Aw…Aih,tha lo aniang’ a ti bah nak.A aw a lawi rat bawk.

‘Engmah hlauhtur a awm lo,mu leh rawh’ tih pahin ka thu thlaa,muttir leh tumin ka nema,mahse a tang tlat.Ka kutah a rawn vuana,min en kiau bawk.

‘I lo mu ve thei angem?”

‘Maw?” ka ti sup.

‘Ka hlau,ka muhil thei lo’ a ti leh a.A tah aw tiau bawk.Ka mitthlaah kan inchhuahsan hnuhnun ber tum a lo langa,kha tih lai kha chuan pawisak nei lo leh hlauh nei map loin min hmachhawn kha ania,tunah chuan hmeichhe naupang hlauhlawp a ang ber.

‘Khawngaihin…’ a ti leh a.Ka intih pa na leh ka huatna zawng zawng a bo nghal duak.

‘Ok..Ka lo mu ang’ ka tita nge nge.

Ka lawna,min rawn kuaha,ka awmah a hmai a phum nghal kak bawk.Anihna ka hriat leh tuna awmdan hi a persan let tawp.Lemchan thiam el tiang pawh nise tiang hi lemchan a ni thei lo..A che sat sata,ka kawngah a malin a rawn kherh a,nghet zetin min kuah bawk.

‘Muhil rawh,engmah hlauhtur a awm lo’ ka ti leh a.

‘Ka muthilh laiin min kalsan lo ang tih min tiam la’ a ti sep.Hei pawh amak leh ta tho!!

‘Ka kalsan lo vang che’ ka ti sup.Ka awmah a hmai rawn phum leha,a che ta lo.Reivakloah a muhil tih hriat takin a thaw ta sak sak.

Ka muhil thei lo,ka mut a chhuak chhin eih lo zawk.Ka nun tihchhiat tuma a beih avang khan phuba lak chaknain ka khat kha ania,mahse ka hmuh leh meuh chuan engmah ka ti lo.Phuba lak chu khawi lamah,a awm danah khan puih angai ngawih ngawih zawk.A hmela hlauhna lang kha a der a ni lo,mahse khatiang khawpa a hlauh kha tu nge ni ang? Ramdinsanga ka ngaihtuaha,ani chu a ni thei lo.Ramdinsanga tan theihthawp chhuahin a thawka,hlauhna chhan tur a awm lo.

Ka Phone nghawr dar darah ka harha,ka tho mai dawna,mahse ka hnung lam atangin ka kawngah tu emawin min lo kuaha,ka mal karah a mal pakhat a rawn zep bawk.Ka mumang emaw ka ti dawna,mahse nizana thilthleng ka hre chhuak nghal zawk.Tho loin ka mut ngaiin ka mu a,Tluangpui’n ka hnung a rawn thawkkhum zawnga lum hiam mai chuan min fan raih raih bawk.

Reife hnuah dimtein a ban ka dahsawn saka,tihharh hlau lutukin ka tho ta tham tham.A che sat sata,a harh dawn emaw ka ti hman,mahse harh loin a inlet tapa,min hnungchhawn zawngin a mu a,a che zui lo.

Inhnuaiah ka chhuk thlaa,ka rin ang ngeiin Buati a lo thleng tawh.Pawn lam ka en a,khua a la veng chuang lo,ruah erawh a sur tawh lo thung.

‘I kal nghal dawn nge eitur ka siam dawn?” min hmuh veleh a lo ti a.

‘Vawiin chu ka chhuak lo ang’ ka ti nghut.Kawngkhar atangin kawt zawl lam ka thlir vung vung.Nizan ruah sur leh thli thaw vangin hnahthel an tla nuaiha,Motor chungah a then an bet bawk.

‘I nuam lo mi?” Buati’n min tih thawmah ka hawi leta.

‘Nuam e.Ka tha.I duh chuan chawl la,ka lo inngaihtuah mai ang’ ka ti leh sup.Inah Tluangpuii a awm ve tih a hriat ka duh lo bur.

‘Chawlh angai chuang hleinem’ a ti a,a thiltih lai a tihzawm mawlh mawlh.

‘Inah keimahin hna ka thawk dawna,chuvang zawk ania.I lo kal hmain ka rawn hrilh ang che ka tia,ka lo theihnghilh a’ ka ti leh a.

‘Anih chuan chawhnu lamah tihtur ka nei thoa.A tha phian ang’ phur hmel fein a ti a.Ka then suk.

‘Engmah siam duh suh,ka lo insiam mai ang’

‘Um..Ka ti zo law law anga,ka kal dawn nia,thingpui ka lo siam ang che’ a ti leh a.Hnial ka tum zeta,mahse ka but a nghut. Nizan khan engmah ka ei ta lo kha ania,ka riltam em ka hre lo nangin ka pum a ruak lutuk.Engemaw tal ka ei loh chuan ka pum chhe lutuk hian buaina min thlen leh ngei ngei dawn tih ka chiang.

Buati kal hnuah Lalnuna ka calla,ka tlawh dawn lo tih ka hrilha,pawimawh a awm chuan min call mai turin ka ti a.Julie ka call a,ka hrilh nghal bawk.Nitin ka kal thina,hna pending awm ka ngaithei hek lo.Mi thenkhat anga mahni eizawnna hlamchhiaha nawmchen ka ti nghai hek lo.Sammyte tlakchhiatna chhan pawh kha an eizawn naah an mahni kal mumal loin an Staffte kutah thil an dah hnem lutuka,fel em em mah se a neitu ang tak tak rilru an pu thei lo.Khatiang thil kha ka chungah thlentir ka tum lo bur,kha leh chen ka thawhrimna zawng zawng kha athlawna kal raltir ka tum hek lo.

Inchungah ka chho a,dimtein kawngkhar ka hawnga,a lo la muhil bam.Tiang em em a mut mamawh chu engtak ti thin ang maw? Zankhuain hna a thawk ti dawn ila kan ramah hian tlaivar thaka thawhtur hna a awm lo,a lo awm anih pawhin chhiar tham lek a ni ang.A inzuar ti dawn ila Mipa aiin hmeichhia a duh zawk lawi.Ka lu ka thing nawk,tunah chuan hriatchhuah loh ka duh zawk.

Bathrooma kan thawmhnaw ka dah ka lachhuaka,inhnuai lam Bathroomah ka pawm luta.Machineah ka thuna,ka nuaitir nghal vek..A nuai chhungin eitur siam tumin kitchenah ka luta.A harh hunah amah tichak thei eng emaw a mamawh ang.Fridge ka hawnga,Arsa ka lachhuaka,sin te tein ka chana,ka chhuan er hnuah buh tlem ka telh bawk.A hmin dawnah Purun hnah leh Tomato ka thlak leh a.A rimin ka ril a ti tam rawih rawih thei.Phaia keimah chauha ka khawsak lai khan ka siam thina,min tichak in ka hre tlat bawk.

Insuk zar tumin ka lachhuaka.A panty leh Bra ka en a,ka nuichhuak hawk.Ka laka a tihte kha chu engpawh nise tunah ka nuna la thleng ngai lo,hmeichhe Bra leh Panty ka su leh ta chu ania..Ka nui leh hawk..

‘Zar duh suh..’ ka hnung lam atangin a rawn ti a.Ka Inher vut.Bathroom kawngka bulah Tluangpuii a lo ding reng tawh.A hmai dang lap kha a awm tawh lo,ka hmuh hnuhnun ber ai khan a sam a sei leh deuh tawha,a mutna lamah a delh pawr deuha,mahse a inhmeh mah zawk.Chau hmel a pu tawh lo..

‘I tho thei maw?” ka ti sup.

‘Um..Kha kha zar duh suh’ tih pahin ka ke bula Balbawm a kawk zauh.

‘A ho lutuk…’ tih pahin ka lakang nghal vut.

‘Aih,ka lo ti ang’ min rawn pawhthlaksak a tum a.Ka ngaihtuahna ka thlak ta zawk.Engmah sawi loin ka pe a,ka bialnu emaw a bialpa pawh ka ni lo va.Atan a nuam lo pawh a ni ang.Bakah ka suk sak tawha,abak chu ti ve mai zawk tak tehse.

‘I zar zawhah thil i ei dawn nia’ ka ti hmuk.Min chhan hmain ka kalsan nghal daih bawk.

Kitchena a rawn luh laiin thil ka lo ei mawlh mawlh tawh,ka hawichhuaka,ka melh zawk.

‘Thu rawh’ ka ti leh sup.Nizan khan ka lo khawngaih pawh a ni thei,mahse tunah chuan a harh tha tawha,ka khawngaih a tul lo tawp tih ka chiang.

Min ep zawnga Chair awm a pawtchhuaka, a thu thlaa.Ngaihven lo niawm takin ka thil ei lai ka ei zawm lehnghal mawlh mawlh.Ka mitsirin a thei ei ka en a,mak ka ti lo thei lo.Ni tamtak chawei tawh lo ang chiahin a hma a awm apiang a ei liam duak duak a ni ber.

Ka en reng tih hria niawm takin a rawn hawichhuaka,inthiam lo niawm takin a hmai a sen tawn tawn bawk.

‘I siam tui hle mai’ a ti nghal sap.

‘A lawmawm,ei leh rawh’ bung zetin ka ti leh nghut.

‘Aih,ka ei leh chuan ka pum a keh mai ang’ a nui sak.A nui hmel a la ngai reng tih ka lo ngaihtuah leh hman pek.Hahthlak hian a.

A tho a,a thil eina a seng a.Ka thochhuak ve nghal bawk.Kan thil eina a tifai a,ka khap duh lo.Ka khawngaih tih a hriat ka duh hek lo.Nakina min nuihsawh zui lehna tur engmah ka duh lo bur.Nizan kha chuan a harh chiang lo a.Engmah a hriat loh ka beisei ve ngawt.

‘Ka tibuai hle mai che’ a ti sap.Ka melh zawka,bet lo zetin Sofaah a thu a,a hmelah nuam lo tihna a lang chiang viau.Mahse, lemchan bawk bak a ni lo ang tih ka chiang.

‘I rin aiin ka fel tihna anih hmel’ ka ti hmuk.Ka tawng riah hmuhsitna alang chiang ngang mai bawk.

‘Aih,chutiang lam ka sawi tum a ni lo..Eng lo,ih..’ ka ban ka vai zauh.

‘Sawi duh suh,min ngaihdan ka hre hnem tawk tawh ania’ ka ti leh hluk.

‘Um,nia..Anih chuan kal mai ka duha,pawi ka tih rualin ka lawm takzet’ a ti leh sap.

‘A tha lawm’ ka ti sup ringawt.A tho a,inchung lam panna Step a pana,Ka Boxer a hak chu a khup a thleng trep a,a kawr hak lah a lian lu hrat bawk.A chawn lang chin ka en a,a var satliah lo.A no nalh lutuk a ni tawp mai,nizan khan engkim ka hmu vek.A hnute nalh zia lah kha sawi ngaihna a awm lo.Mahse,nizan kha chuan tuna ka ngaihtuah ang hi pakhatmah ka ngaihtuah lo hrim hrim.

‘Tu nge i hlauh?” ka ti leh sup.A rawn hawi vat.

‘Eng maw?” a ti sap.A hriat loh tak tak vanga min zawt a ang lo.

‘Tu lakah mah ven i ngai lo tih i sawi tho nangin,nizan khan hlauh nei i ang” ka ti leh hmuk.

‘Aih,hlau lo..’

‘Ok..Ka hre sual anih chu..’

‘Nia,engtin nge hetah ka lo awm ngawt pawh ka hre lo,kan thianhoin kan chhuaka..’

‘Sawi duh suh,hriat ka chak lem lo ania’

‘Sorry’ a ti sap.

‘Engmah i tisual lo,bakah dawt nge thutak tih pawh hriat loh ngaihthlak hi ka ning,chuan i nau lehzel dawt hrilh suh’ ka ti leh duah.Mak tih hmel zetin a mengphar deuh ak mai.

‘Ni lo…’

‘Sawi duh suh,thurawn satliah anih kha’ ka ti leh nghut.Min chhan tum niawm takin a ang ziaua,mahse a chip leh hmak.A bu ta nghat.A inhera,Stepah a pen chho a,ka ngaihtuahna a vir zawk.

‘I thawmhnaw hak lai kha Dust-binah i paih dawn nia’ ka ti chhuak hmuk.Ka tawng thawm hriaiin ading chat,muangchangin a rawn hawileta,a mimtmeng lian leh nalh zetah chuan ka hriatthiam si loh thil engemaw alang zawk.Mahse, a bo leh vat.Na tuar a ang phian bawk.Teuh lo,engmah hian a tina thei hlek lo vang.

‘Ka hre thiam che,mahse..Eng natna tha lo mah ka vei lo’ a sawi zawh rualin a hmui a pet fan bawk.Ka ti mah mah em tih ka ngaihtuaha,mahse ka laka a thiltih ngaihtuah chuan engtham mah a ni lo.

‘Natna enge i neih ka ngaihven lo,I thawmhnaw hak hnu kha ka duh lo mai zawk’ ka ti leh hluk.A bu nghat.

‘Ka hria alawm’

‘Eng maw i hriat?”

‘Min ten tih mawle..Englai pawhin..’ insum hman lo niawm takin a insut hraih.A hawilet nghal vat bawk.’Lemchanna’ tih ka rilruah a lo lang nghal zat.

‘Ka laka i thiltih zawng zawng ka hriat hma kha chuan ten nang..Atthlak zetin ka lo duh hman che mawle’ ka sawi zawh rualin ka nui nghal hawk bawk,mahse eng vanga nui nge ka nih ka hre lo.

‘Min duh anih chuan min hre chiang tur i ni asin’ ka beisei loh lutuk a sawi takah chuan ka nuihzatna a bo nghal hmak.Ruata thilsawi ka bengah a rawn  ri nawn nghal zat bawk.

‘I sawi dik,ka duhna che avanga ka mit a lo del kha ka thiam loh tih ka pawm thlap..’ ka ngaihtuahna nen inpersan zetin ka ti hmuk.

‘Ni lo,kei chuan na i tihte,buaina i neih chang te khan,sawi lo mah la ka hre thei thin asin,mahse nang chuan ka chhungril hriat tumin min zir ngai lo’ a ti leh duah.Ka beisei loh lam bawk.Mahse, a sawi dik tih ka hai lo.Kan inkawp chhung khan ka Mood awmdan a hre chiang em em a,hnaah Problem ka neih changte leh ka damthat loh deuh pawn min hmu miah lo mah se, Phone a kan inbiak in ka awah enge danglam a hre thei ziah anih kha.

‘Ka pawm e.Mahse, I chanchin tenawm zet ka lo hre chiang lo hi vannei ka inti’ ka ti leh hmuk.A ner sawk thung.

‘Nia,ka tenawm..Enge i hriat belh chu ka hre lo nangin Lesbian ka ni tih an hrilh tawh che ka ring a’ muang fan raihin a ti leh a.Ka tek sawk.Mi hnen atanga hriat khan min thawng na lutuk,mahse ama hnen atanga hriat hian min la thawng na zawk cheu!!

‘Ka tenawm asin,nakinah phei chuan hei aia nasa zawk i la hre leh ang.Mahse, chumi i hriat hunah chuan i hmuh phakah ka awm tawh lo vang.I bialnu hlui ka lo nih avangin i zak leh tawh ngai lo bawk ang’ a ti dam thlap.A sawi dan chuan ka hriatthiam si lohin min fan raih raih.A aw a dam thlapa,thinrimna engmah a lang hek lo.

‘Chu hun chu a lo thlen thuai ka beisei takzet’ ngeiawm zetin ka ti leh sup.Ka then lui suk bawk.

‘I nghak rei tawh lo vang,chuan ka lawmpui che.I nunah hmeichhe tha leh Smart,I milpui i tawn avangin.I hlim ngei ka beisei pui che,Chuan,nizan vang khan ka lawm takzet bawk ania’ thutak zetin a ti leh a.A sawi zawh rualin a nui var var.A hmelah hmuhsitna emaw vertherna engmah hmuhtur a awm lo.

‘Ka lawm e…’ ka ti sup.Engvanga lawmthu hrilh ngawt nge ka nih ka inhre lo,mahse tihnat chakna ka neih kha a bo rih tlat.

A rawn chhuk lehin ka thutna ngaiah ka lo la thu a,nizana a thawmhnaw hak a ha a.Ka thawmhnaw a hak,paih tura ka tih kha a zakzeh bawk.

‘Zan a ni lo chungin Mangtha le,kan inhmu leh tawh dawn si lo va’ a nui leh sak.Ka bu nghut ringawt,sawitur hlawl ka hre lo.Tun lawka thil thleng kha ‘Lemchan’ tiin ka inhrilh nawna,mahse ka chhungril hian a tak niin a hre lawi si..Engmah ka hre thiam lo.

‘Sangkim’ ka darah min rawn khawiha,ka phu zawk.Ka hawichhuaka,ka dawhkan bulah Ruata a lo ding reng tawh.

‘I lo kal alaw?” ka ti sup.

‘Anih hi,I va han ngaihtuah muk em em ve’ a ti a.Mak tih hmel zetin min en reng bawk.

‘Nia,hna mawle.Thu la’ pangngai thei ang berin ka ti sup.A kalsawna,Ka hmaa Chairah a thu thla hnawk.Vei lianpui nei a ang viau bawk.

‘Ice tea i duh em? ”

‘Aih,min zawt dawn anih rau rau chuan Zu ka duh’

‘Akhai,chhun a zu in te chu a’ ka ti hluk.

‘Ka mamawh miau alawm le’ a ti hluk.

‘Enge buaina awma?”

‘Dingpuii a rai’

‘Enga?” ka ti nghek.

‘A rai…Mahse, keimah ka ni lo’ ka tum loh lutukin ka nuichhuak hawk.

‘Enge nuihzatthlak awm a?” a ti hlur mai.

‘Sorry….A awm ang lo lutuk a’ ka ti sup.Dingpuii laka a luanliam zia ka hria.A ke a fawp lo chauh a ni ber.

‘Nia,a awm lo’ a ti leh chiam.

‘Ka hrethiam che,intur i duh chuan en la…A awm nual ang’ ka tita zawk.Rui chhum hmawk se a tha ber ang.

Ka rin ang ngeiin a chatthla chiang viau,ka dem hran lo,Hmeichhia vanga na thei lo ni a inngai hi ka naa,ka luhlulna hian mualpho lo turin min chelh hram hram a ni zawk.

Haw ka tum laiin Pu Dama’n min rawn Calla,tunhnaiah kan inbe khat angreng.Ka nuna Tluangpuii a tel ve tak loh hnu hian kan inringtawn tha leh ti ila a dik mah zawk ang.

‘Hello…’ ka ti sup.

‘Hmana ka hrilh che kha a dik anih hmel hle mai’ a rawn ti a.A sawi tum ka man lo.

‘Eng thil berah khan nge?” ka ti liam puat.

‘Tun kartir khan he lamah hian Hmeichhe nalh zet a rawn che tlaa’

‘Chuan..?” ka ti leh sup.A sawi tum ka la man chuang lo.

‘Kan kawng chu a dal hauh lo nangin kan Partner lianber hi a rawn bel ve a’ a ti leh charh.

‘Kan chan tihna a ni em?”

‘Aih,chan lo.Mahse, a rei deuh chuan kan chan maithei’

‘Ok..Tu nge anih a?” ka ti hluk.

‘Tu nge anih i rin?” a ti leh a.Thil sawikual chiam a chin ngai loh nen tun tum chu amah a ang lo tlat.

‘Rindan ka nei lo…’ ka ti mawl tawp.

‘Um..Nia,rindan neih a harsa…A nalha,a thluak a tha bawka.Kan Partner lianber hian Hmeichhe hmeltha a hnar thei lo tih i hriat kha ’ a ti leh dap dap.A sawi dik,mahse a sawi kual vel dan ka ning lek leka,Ruata lam ka hawia,mumal nei lo zetin a mu thal der.

‘Nakinah ka lo bia ang che, ka haw dawn meka’ ka ti ta nge nge.

‘Ngai chuang lo..Amah chu i hre duh em?”

‘Duh chuang lo,min tihchhiat rih loh chuan…’

‘Hria la a that ka ring,kan dang lo anih chuan min tichhe thuai thei dawn bawka..A hming kha enge kha aw? Eee,ka hre leh si..ZOTLUANGPUII  an ti tak.’ Tluangpui’ tiin an ko a’ ka pai deuh nawk thei..